MWAHA WOOHUSERYA 19
Osivela ni Ekhaikhai mu Ohoolela Otakhala
“Nyuwo mwa Muluku ohinahakalalano yoonanara, alipa a maraapwa hanaacamana ni nyuwo.”—SAL. 5:4.
NCIPO 142 Ewehereryo Ennanivaha Olipa Murima
YEEYO NNAHAALAAHU OHUSERYA *
1-3. (1) Mwawiiwanana ni Salumu 5:4-6, Yehova onoona hai otakhala? (2) Ntakhara heeni nnalocaahu wi omukoniha mwaana onnavaanyihana ni “nlamulo na Kristu”?
YEHOVA MULUKU onniica mukhalelo ori woothene wa otakhala. (Mwaalakhanye Salumu 5:4-6.) Owo onniica vatokovene meerelo a okonihiwa anamwane—mukhalelo yoowo ori wootakhala ni woothanyeya! Hiyo nri Anamoona awe, nnuupuwela ntoko yene. Omukoniha mwaana eri yoocheka etokweene yeeyo ehineemereryiwa mmuloko Weekristu.—Aro. 12:9; Ahe. 12:15, 16.
2 Meerelo ari oothene a waakoniha anamwane annavaanyihana ni “nlamulo na Kristu”! (Gal. 6:2) Ntakhara heeni nnalocaahu yeela? Ntoko nihusenryaahu mmwaha ovirale, nlamulo na Kristu—eyo tiwi, soothene seiho Yesu ohusinheiye mu masu ni mu yootakiherya—sinathipeleya mu osivela nave sinnaceenyerya ekhaikhai. Woona wi Akristu anachariha nlamulo nenla annaakhaliha anamwane mmukhalelo yoowo onaweeriha wiisoona okhala ookhapeleleya ni osiveliwa chiryene. Nyenya omukoniha mwaana ori mukhalelo wa nrima ni woonanara onamweeriha mwaana wuupuwela wi haavovo onamukhapelela naari omusivela.
3 Moothananiha, meerelo a okonihiwa anamwane epahu eneereya veelaponi yoothene, nave Akristu eeparipari annavoloweliwa ni meerelo yaala. Ntakhara heeni? “Yaale oonanara murima ni oowooka” annaaceereryeya nave akina anamweererya ovolowa mmulokoni. (2 Tim. 3:13) Nthowa nikina ti nawi akina yaamurumeela Yehova yaahikhalano nchuno noonanara na opaka ocapaheya nave ephiyerya omukoniha mwaana. Hankooni nthokororye ntakhara heeni omukoniha mwaana eryaaya yoocheka etokweene. Voocharela nnahaala othokororya yeeyo atokweene anapakaaya elukuluku muchu a mmulokoni onapakeiye yoocheka etokweene, ophitaanyerya omukoniha mwaana, ni mukhalelo asitiithi eneeraaya yaakhapelele anaaya. *
YOOCHEKA ETOKOTOKO
4-5. Ntakhara heeni meerelo a okonihiwa anamwane yoocheka oneereliwa yoowo okonihiwe?
4 Meerelo a okonihiwa anamwane annaavolowela achu mu elukuluku yincipale. Eyo ennatannya wiicela wa yoole okonihiwe ophitaanyerya oothene yaale anamusivela mwaana yoowo okonihiwe, ntoko yootakiherya amusi awe ni anna ni arokora Eekristu. Omukoniha mwaana yoocheka etokotoko.
5 Yoocheka ntakhara yoowo okonihiwe. * Yoocheka omuhoosa mukina ni omweeriha ohooseya. Ntoko nnahaalaahu woona mmwaha onacharela, yoole onamukoniha mwaana onnamuhoosa mwaana nave onnamweeriha ohoolela nikacamiho noovila ovootha. Yoowo onamukoniha mwaana onnanariha ororomeleya wa mwaana nave onniiya okhapelela yoowo aahaaleiye okhalano. Anamwane annachuna waakihiwa ntakhara meerelo yaala oonanara, nave yaale akonihiwe annachuna nihakararyo ni nikhaviheryo.—1 Tes. 5:14.
6-7. Ntakhara heeni meerelo a omukoniha mwaana eryaaya yoocheka ntakhara muloko ni alamuleli eelapo?
6 Yoocheka ntakhara muloko. Muchu yoowo a mmulokoni orino nthowa na omukoniha mwaana onnaruuha munyemu mmulokoni. (Mat. 5:16; 1 Ped. 2:12) Ti yoohiphwanelela oloca wi muloko Weekristu onneemererya omukoniha mwaana nthowa nawi macikhwi a Akristu oororomeleya anniilipiserya weerano ichu mmukhalelo yoowo onamucicimiha Yehova! (Yuda 3) Hinnaweemererya achu okhala mmulokoni wakhala wi annapaka ichu soonanara nave ehicharuwa.
7 Yoocheka ntakhara alamuleli eelapo. Akristu anaphwanela ‘waacicimihaka asitokweene anlamula.’ (Aro. 13:1) Hiyo ninnooniherya wi ninniiwelela vaavaa nnacicimihaahu malamulo eelapo. Wakhala wi munna naari murokora mmulokoni onnananariha nlamulo, ntoko omukoniha mwaana, owo onaachekela alamuleli eelapo. (Mulikanyihe ni Saw. 25:8.) Atokweene a muloko haanono owerya wa omulaka muchu yoowo ohiiwelenle nlamulo. Mwa yeeyo, awo hanamwaakiha mulipa omukoninhe mwaana orweela wa olaka wa alamuleli. (Aro. 13:4) Namacheka onahepha yeeyo ominseiye.—Gal. 6:7.
8. Yehova onoona hai soocheka anapakeliwa achu?
8 Opwaha soothene, yoocheka ntakhara Muluku. (Sal. 51:4) Vaavaa muchu onamuchekeleiye mukina, owo tho onnamuchekela Yehova. Moone yootakiherya mu nlamulo nenlo Yehova aavanheiye Aisarayeli. Nlamulo nlo naaloca wi muchu yoowo aamwiiyerya mwaacamani awe, owo haakhala “oororomeleya wa Yehova.” (Onam. 6:2-4) Mmukhalelo woolikana, muchu a mmulokoni yoowo onamukoniha mwaana— onniiya okhapeleleya owo aaphwaneleiye okhalano—owo onakhala oohiroromeleya ntakhara Muluku. Muchu yoowo osuweliwe ntoko Namoona a Yehova nave amukoniha mwaana onnaruuhela munyemu nsina na Yehova. Mwa yeeyo, omukoniha mwaana enaphwanela wooniwaka ntoko yoocheka etokotoko ntakhara Muluku.
9. Sooleeliherya taani marehereryo a Yehova anavahereryaaya moovira wa iyaakha vooloca sa omukoniha mwaana, nave ntakhara heeni?
9 Moovira wa iyaakha, mareheryo a Yehova annavahererya sooleeliherya sincipale sa Soorempwa vooloca sa omukoniha mwaana. Ntoko yootakiherya, miyaha sa Mulipeleli ni Vinyani! soothokororya mukhalelo yaawo akonihiwe anahaalaaya ovootha maharipa a mmuupuwelo atannyiwe vooloca sa yeeyo eereliwaaya, mukhalelo akina eneeraaya yaakhaviherye nave yaalipihe ni mukhalelo asitiithi eneeraaya yaakhapelele anaaya. Atokweene ahaakhela ovyakihiwa wookwakwaleya yoowo onathipeleya mu Piipiliya mmukhalelo wa okhapelela yoocheka ya omukoniha mwaana. Marehereryo annatitelela waalikhela mukhalelo miloko sinathokororyaaya yoocheka ya omukoniha mwaana. Ntakhara heeni? Wi eroromele wi mukhalelo nnathokororyaahu meerelo a okonihiwa anamwane onniiwanana ni nlamulo na Kristu.
YAKHUMELELA YOOCHEKA ETOKOTOKO
10-12. (1) Vooloca sa yoocheka etokotoko, tiheeni atokweene anaphwanelaaya wuupuwela? Ichu taani atokweene anathokororyaaya? (2) Mwawiiwanana ni Tiyako 5:14, 15, tiheeni atokweene aneereryaaya opaka?
10 Vaavaa atokweene anathokororyaaya mwaha onavolowela yoocheka etokotoko, awo annuupuwela wi nlamulo na Kristu nnaloca wi awo anaphwanela okhalihaka muhuwo mmukhalelo woosivela ni opaka yeeyo Muluku onooneiye okhala yeekhaikhai ni yawookololowa. Mwa yeeyo, vaavaa anasuwelaaya wi ookhala opanke yoocheka etokotoko, annathokororya ichu sincipale. Yoolakelela yookhweleyaxa ya atokweene ori omucicimiha Yehova ni okhapelela ophwanelela wawe. (Onam. 22:31, 32; Mat. 6:9) Yoolakelela ekina yookhweleya anakhalaayano ori waakhaviherya anna ni arokora a mmulokoni omwaacamela Yehova ni waahakararya ni waakhaviherya yaale apakeliwe yoocheka.
11 Mwa waaceererya, atokweene anneererya osuwela waakhanle wi ole opanke yoocheka etokotoko oocharuwa, wi emukhaviherye orehererya onthamwene awe ni Yehova. (Mwaalakhanye Tiyako 5:14, 15.) Mukristu yoowo oneemererya soochuna sawe soonanara nave apaka yoocheka etokotoko onamwiiceliwa makupa oomunepani. Eyo enataphulela wi haano onthamwene waphaama ni Yehova. * Atokweene, ari ntoko alipa ooloola oomunepani. Epharihelaka ikano sa Piipiliya, awo anahaala weererya wi yoowo ‘oniiceliwa [eyo tiwi namacheka],’ akhale phaama nave arehererye onthamwene awe ni Yehova. Nyenya eyo enahaala weereya pahiru wakhala wi muchu owo opanke yoohesa oocharuwa mwevelevelo.—Saw. 3:19; 2 Kor. 2:5-10.
12 Enakhala yawooneya wi atokweene aakhalano murici mutokweene. Awo annateteiwa vancipale ni ipucepuche seiyo Yehova aahiyenryeiye wi ekhapelele. (1 Ped. 5:1-3) Awo anachuna wi anna ni arokora oothene yiisooneke okhala awaakiheya mpuwa mwa muloko. Ti nthowa nene, atokweene anaakuveyaaya wakhala wi aasuwela wi yoopakiwa yoocheka etokotoko, ntoko meerelo a okonihiwa anamwane. Mu miyaha sintoko seiho, tiheeni awo anapakaaya? Moone makoho anaphwanyeya omapacereryo wa iparakrafo 13, 15 ni 17.
13-14. Wakhala wi nlamulo ninnaloca wi muchu yoowo onamukoniha mwaana onaphwanela olokohiwa, tiheeni atokweene anapakaaya?
13 Apwanne atokweene anniiwelela malamulo yaawo analoca wi yaale anaakoniha anamwane elokohiwe wa alamuleli eelapo? Aai. Mu mapuro mwemmo malamulo aneemereryaaya, atokweene annachariha yeeyo awo analocaaya. (Aro. 13:1) Malamulo awo hanavaanyihana ni malamulo a Muluku. (Saw. 5:28, 29) Ti nthowa neni, vaavaa atokweene anasuwelaaya mwaha wa okonihiwa mwaana, awo moohilekela annaloca ni anna o Peteli wi esuwele echu yaweera mwawiiwanana ni malamulo.
14 Atokweene anahaala tho waatharihela achu yaawo avoloweliwe ni mwaha yoowo ntoko (yoowo okonihiwe, asitiithi awe naari muchu vyakala osuwenle yeeyo yeeren’ye) wi awo aakhalano ophwanelela wa olokoha wa alamuleli a elapo. Nyenya hanka wakhala wi yoolokoha eyo epakiwe ni munna a mmulokoni naari murokora, nave mwaha osuweliwa vamucecheni? Apwanne Mukristu yoowo onahaala olokoha mwaha owo onaphwanela woonaka wi oonanariha ophwanelela wa Muluku? Hooye. Mweeparipari, yoowo omukoninhe mwaana tonanarinhe ophwanelela wa Muluku.
15-16. (1) Mwawiiwanana ni 1 Timóteo 5:19 ntakhara heeni ti woophwanelela orehereryiwa nikhuuru na othoriha pahiru wakhala wi aakhalavo anamoona eeli? (2) Ichu taani asitokweene anathokororyaaya vaavaa muchu a mmulokoni onalokohiweiye wi oomukoniha mwaana?
15 Mmulokoni, ntakhara heeni atokweene annarehererya nikhuuru na othoriha wakhala wi aakhalavo anamoona eeli? Nthowa nawi ti yeeyo enavekiwa Mpiipiliyani wi echarihiwe malakiheryo a vasulu eekhaikhai. Wakhala wi muchu yoowo onakhwiiwa minikwa wi oopaka yoocheka etokotoko onaloca wi henreno, asitokweene anahaala orehererya nikhuuru na othoriha wakhala wi aakhalavo anamoona eeli. (Malam. 19:15; Mat. 18:16; mwaalakhanye 1 Timóteo 5:19.) Apwanne eyo enataphulela wi, wakhala wi muchu onachuna omulokoha wa alamuleli yoowo omukoninhe mwaana, onaphwanelatho okhalano anamoona eeli? Hooye. Yoovekeya ela pahiru enaphariheleya mpuwa mwa muloko, nyenya ohiya vaavaa asitokweene a mmulokoni naari achu akina analakelelaaya olokoha wa alamuleli nlala nikhumelenle.
16 Vaavaa muchu a mmulokoni onakhwiiweiye minikwa wi oomukoniha mwaana, asitokweene anahaala opaka yeeyo malamulo analocaaya. Voocharela, mwawiiwanana ni Piipiliya, awo anahaala otholathola wi esuwele waakhanle wi ti woochuneya orehereryiwa nikhuuru na othoriha. Wakhala wi muchu owo ooloca wi henreno, asitokweene anahaala wiiwananiha ni masu a anamoona. Wakhala wi wookhalavo onamoona wa achu eeli—wa yoowo olokonhe ni wa muchu mukina oneemererya wi muchu owo oheerano meerelo a okonihiwa anamwane—asitokweene anahaala orehererya nikhuuru na othoriha. * Nyenya hanka wakhala wi haavo namoona anaawiili? Apwanne eyo enataphulela wi muchu owo olokonhe onamootha? Hooye. Naamwi ehirivo anamoona eeli wi eloce wi muchu owo oopaka meerelo a omukoniha mwaana, asitokweene aasuwela wi muchu owo akhweya oopaka echu yoonanara yeeyo enaahoosa mwawiiseela akina. Asitokweene anahaala otitelela omvaha nihakararyo ni nikhaviheryo yoowo ohooxen’ye. Opwaha yeeyo, atokweene anahaala okhala oovareryela phaama wa mulipa a waakoniha anamwane wi eroromele wi muloko ori wookhapeleleya wa yawoopiha.—Saw. 20:28.
17-18. Mutharihe murici wa nikhuuru noothoriha.
17 Tuuvi ori murici wa nikhuuru noothoriha? Masu awi “nikhuuru na othoriha” henataphulela wi asitokweene anathoriha waakhanle wi mulipa oocheka onnaphwanela olakiwa naari hooye ni alamuleli eelapo ntakhara epahu opankeiye. Asitokweene haniivoliiherya mu ovaha olaka yoowo onavahereryiwa mu nlamulo, owo murici wa alamuleli eelapo. (Aro. 13:2-4; Tito 3:1) Echu asitokweene anapakaaya ori othoriha naari olakelela, waakhanle wi muchu owo onnaphwanela otitelela okhala mmulokoni naari hooye.
18 Muteko wa asitokweene mu nikhuuru na othoriha ari makupa oomunepani a malapelo. Awo anahaala ompharihela Piipiliya wi ethorihe waakhanle wi muchu omukoninhe mwaana ohooniherya ocharuwa naari hooye. Wakhala wi hoonihenrye ocharuwa, owo onahaala wiikariwa mmulokoni, nave asitokweene anahaala ovaha yoolokoha mmulokoni. (1 Kor. 5:11-13) Wakhala wi muchu omukoninhe mwaana ohooniherya ocharuwa, nivano owo onahaala otitelela okhala mmulokoni. Nyenya asitokweene anahaala omuleela wi owo hani akhaleno murici mmulokoni, akhweya moovira wa iyaakha sincipale naari mu okumi awe woothene. Voocharela, wi eroromele wi okhala phaama wa anamwane mmulokoni wootikitheryeya, asitokweene anahaala ovahererya mphimo. Ntoko yootakiherya, awo anamuchekula mwa vameekhaaya ni yaale arino anamwane akhaani mmulokoni wi evareryeleke phaama ochekula ori woothene wa anaaya ni muchu yoowo onaakoniha anamwane. Mu elukuluku emohamoha, asitokweene heni yaaloce asitiithi yaawo yeereliwe sootakhala ni muchu yoowo ocharunwe.
MUKHALELO WA WAAKHAPELELA ANIINYU
Wi yaakhapelele anamwane ntakhara okonihiwa, asitiithi annaahusiha yeeyo anaphwanelaaya osuwela vooloca sa mwiikho. Awo anapharihela sooleeliherya seiho marehereryo a Yehova anavahereryaaya. (Moone iparakrafo 19-22)
19-22. Ti heeni asitiithi anaphwanelaaya opaka wi yaakhapelele anaaya? (Moone eruku ya ekaapa.)
19 Taani orino murici wa waakhapelela anamwane wa yawoopiha? Ti nyuwaano asitiithi. * Muupuwele wi aniinyu eri yoovaha yasisapo ya Muluku yeeyo oohiyenryeiyeni ntoko, “yamahala yoorweela wa [Yehova].” (Sal. 127:3) Nyuwo murino murici wa okhapelela yoovaha eyo. Muni mwaakhapelele hai anamwane anyu wa meerelo a okonihiwa anamwane?
20 Yoopacerya, mwaavye osuwela sooleeliherya vooloca sa okonihiwa wa anamwane. Muhuserye vooloca sa achu a mukhalelo taani arino yookhovelela ya waakoniha anamwane ni mavyakelo awo anapharihelaaya wi yaawoke. Mukhale oovareryela wa achu naari mikhalelo seiho sinahaala okhala sawoopiha. (Masi. 22:3; 24:3) Musuwele wi, ikwaha sincipale yoole onaakoniha anamwane muchu yoowo mwaana omusuwenleiye phaama nave onamuroromeleiye.
21 Yanaawiili, mukhaleno ovaanela waphaama ni anamwane anyu. (Malam. 6:6, 7) Eyo enaphitaanyerya waawiriyana phaama vaavaa awo analocaaya. (Tiy. 1:19) Musuwele wi wiiliwiili anamwane woova oloca wi aakonihiwa. Akhweya anuupuwela wi haavo onahaala weemererya yeeyo analocaaya, naari wi ole aakoninhe oowoopopiha wi ehimuleele muchu yeeyo yeeren’ye. Wakhala wi muhoona wi yookhala echu ehesen’ye, mweepewe mumpakele makoho mwaana wi mmukhaviherye ohula murima awe. Nave vaavaa owo onaloceiye, munwiriyane moopisa murima.
22 Yaneeraru, mwahusihe aniinyu. Mwawiiwanana ni iyaakha sa aniinyu ni yeeyo awo anaweryaaya wiiwexexa, mwahusihe yeeyo anaphwanelaaya osuwela vooloca sa mwiikho. Mwaahusihe tho yeeyo anaphwanelaaya oloca ni weera vaavaa muchu oneereryeiye waaphara mmukhalelo woohiphwanelela. Mpharihele sooleeliherya seiyo marehereryo avaherenryaaya vooloca sa waakhapelela aniihu.— Moone ekaaxa “ Yeeyo Nyuwaano ni Aniinyu Munaphwanelaanyu osuwela.”
23. Nnoona hai meerelo a okonihiwa anamwane, nave tiheeni nnahaalaahu ohuserya mmwaha onacharela?
23 Hiyo, Anamoona a Yehova, meerelo a okonihiwa anamwane nnoona ntoko yoocheka etokotoko ni mukhalelo wootakhalasa. Ncharihaka nlamulo na kristu, miloko sahu hannawaakiha alipa a waakoniha anamwane wa sookhumelela sa soocheka saya. Hanka yaale akonihiwe? Tiheeni nnaphwanelaahu weera wi naakhaviherye yaale akonihiwe? Ti yeeyo nnahaalaahu ohuserya mmwaha onacharela.
NCIPO 103 Asitokweene Yoovaha ya Yehova
^ par. 5 Mwaha ola onahaala onooniherya mukhalelo nneeraahu naakhapelela anamwane vooloca sa okonihiwa. Nnahaala woona yeeyo atokweene anapakaaya wi ekhapelele muloko ni yeeyo alipa ooyara anaphwanelaaya opaka wi yaakhapelele anaaya.
^ par. 3 MASU ATHARIHIWE: Meerelo a okonihiwa anamwane eneereya vaavaa muchu awunnuwelavo, muthiyana naari mulopwana, onamphariheleiye mwaana wi aakhwaniherye nchuno nawe na okonihana. Eyo ennaphitaanyerya okonihana ophariheliwaka mwiikho, okonihana waamakhucu, mwaano, waapapela mwiikho, mapele naari makhucu ni meerelo makina ootakhala. Woona wi awaacaxa anakonihiwa anakhala anahano, maponkwe mancipale annakhinyereryiwa okoniha. Naamwi ancipale anaakoniha anamwane ekhalaka alopwana, athiyana akina annaakhinyererya maponkwe wi yaakonihe.
^ par. 5 MASU ATHARIHIWE: Mmwaha yoola ni onacharela, nsu nawi “yaale akonihiwe” onaahiwa muchu yoowo okonihiwe ari mwaana. Nnapharihela nsu nenla wi nihiye vanlakani wi mwaana yoowo okhalihiwe moonanara nave akonihiwa haano nthowa.
^ par. 11 Ereca yoomunepani tahi mukhalelo wa wiisaakihano wi muchu apake yoocheka etokotoko. Namacheka onnakhalano mulacu ntakhara soolakelela ni saweera sawe, nave onahaala okhalano mulacu vamiithoni va Yehova.—Aro. 14:12.
^ par. 16 Asitokweene herwa echuna wi mwaana yoowo okonihiwe akhalevo elukuluku anavaanelaaya ni mulipa oomukoniha. Mmoha a asitiithi awe naari muchu mukina awunnuwelavo yoowo mwaana onamuroromeleiye onanwerya oloca mu nsina na mwaana. Eyo enahaala ovukula ohooseya woopwahererya wa mwaana.
^ par. 19 Sooleeliherya iha sinnaphariheleya tho wa yaale anaakhapelela anamwane naari yaale arino murici wa omukhapelela mwaana mukhaani.
