1. Tiheeni Masu a Muluku ananihusihaaya?

HIYO nnanwerya ovootha makacamiho oothene —nthowa nawi Yehova tori Muhusiha ahu Mutokotoko. (Isa. 30:20, 21) Masu awe annanivahererya yeeyo nnachunaahu wi nikhale “awaakhwanela”ni “oorehereryeya mmiteko soothene saphaama.” (2 Tim. 3:17) Vaavaa nnakhalaahu mwawiiwanana ni mahusiheryo a Piipiliya, ninnakhala amiruku waapwaha yaale anavuwiha “miruku seelapo yeela ya vathi.”—1 Kor. 3:19; Sal. 119:97-100.

2. Tiheeni nnahaalaahu othokororya mmwaha yoola?

² Ntoko nnahaalaahu woona, miruku sa elapo wiiliwiili sinavuwiha soochuna sa mwiili. Mwawiihiiha onamukhala woovila okhooca muupuwelo ni meerelo oolikana ni yaawo anapaka makupa eelapo. Ni mathowa aphaama, Piipiliya ooloca: “Phoole, ahikhalevo anii oophareeni ni osuwela wawe wa miruku soowoka satheru acharihaka sookhoveleliha soopacerya sa achu.” (Kol. 2:8) Mmwaha yoola nnahaala woona mukhalelo achu apacenryaaya weemererya sawootha piili, seiyo Satana onahusiheiye. Makupa ti makupa, nnahaala woona ntakhara heeni miruku sa elapo ya vathi siryaaya soololo ni mukhalelo miruku sa Masu a Muluku siraaya savasuluxa opwaha echu eri yoothene elapo enavahaaya.

3-4. Matorokelo taani vooloca sa moonelo wa okonihana yaakhumelenle mu 1900 ni 1930?

³ Variyari va iyaakha, 1900 ni 1930, achu o Estatu Unitu yaahitorokeya vancipale vooloca sa okonihana. Ehaakumve elukuluku yeeyo, ancipale yeemererya wi okonihana waari pahiru wa achu athenle nave wi hiwaari mwaha waaphwanela olociwa vanlakani. Nyenya meecelo yaawo yaapacerya otorokeya nave okhumelela moonelo yoowo weemererya.

 ⁴ Mu 1920, yeeyo akina yiichanaaya Loucos Anos 20, mukhalelo wa achu ni moonelo aya vooloca sa okonihana waatorokeya vancipale. Namarepa mmoha ooloca: “Ixilema, iteyaaturu, macipo, aliivuru ni ipropakanta sinnooniherya nchuno na achu vooloca sa ichu inavuwiha okonihana.” Mu iyaakha seiye, wiina waavuwiha okonihana nave soowara saari soohiphwanelela. Hiiha ntoko Piipiliya aalohenryeiye vooloca sa mahiku ookuchula, yaakhala yawooneya wi achu ‘yaakhwela opuha.’—2 Tim. 3:4.

5. Ovinyerya 1960 tiheeni yeeren’ye ni moonelo weelapo vooloca sa okonihana?

⁵ Ovinyerya mu eyaakha ya 1960, ichu ntoko okhala vamoha achu ehipanke othela, okonihana wa achu a mwiikho woolikana nave omwalana waari wawunlaana. Ikhankoonya inapaka mathatelo saapacerya ovuwiha okonihana. Apwanne meerelo yaawo yeemererya soothene yaahikumiherya mphurelo wa achu? Hooye. Namarepa a miyaha mmoha amwaamuthiyana olonce wi elukuluku ahu ennahoolela makacamiho mancipale ntoko omwareya wa ichoko, tiithi naari mai aaphuwaka anamwane meekheiye, wuukhuwa mmuupuweloni ni nchuno na woona epwitikiri. Wa yoowo, nthowa na soothene seiya ti wi “achu aahiya meerelo oophwanelela vooloca sa okonihana.” Ni waaceereryeya wa ereca enaraviwa mu okonihana, ntoko SIDA, yawooniherya ekina yawi miruku seelapo yeela ololo.—2 Ped. 2:19.

6. Satana onakumihavo hai mphurelo vooloca sa moonelo achu aryaayano vooloca sa okonihana?

⁶ Satana onnakumihavo mphurelo vooloca sa moonelo achu aryaayano vooloca sa okonihana. Owo oosuwela wi othela, okonihana ni okhalano anamwane soovaha sa Yehova wa achu. Musaserya, onnatepa ohakalala vaavaa onawooneiye achu epharihelaka moonanara soovaha seiya savameekhaaya. (Éfe. 2:2) Opwaha yeeyo, Satana oosuwela wi yaale anapaka ocapaheya herwa yaakhela ekumi yoohimala.—1 Kor. 6:9, 10.

7-8. Moonelo taani wavasuluxa vooloca sa okonihana Piipiliya onahusiheiye?

⁷ Achu yaawo anachara miruku sa elapo, yoothene yeeyo Piipiliya onaloceiye sa okonihana yoovireliwa nave henaphariheleya. Awo ani: ‘woona wi Muluku oonivaha nchuno na okonihana, ntakhara heeni aahaaleiye onikhinyererya ovareryela?’ Moonelo yoola onathipeleya mu muupuwelo woonanara wawi achu anaphwanela opaka yeeyo anachunaaya opaka. Nyenya Piipiliya onnanleela echu yoohiyana. Owo onahusiha wi nookhalano owerya wa wiivareryela ni othanla oheemererya soochuna soonanara. (Kol. 3:5) Opwaha yeeyo, Yehova  oopaka othela wi mulopwana ni mwaariye eweryeke okhwaaniherya soochuna saya sa okonihana mmukhalelo wa ncicimiho ni woophwanelela. (1 Kor. 7:8, 9) Pahiru vaavaa okonihana oneereyaaya mpuwa mwa othela, mutheli onnakhapeleleya okhalano ekeerelani ni ohikhapeleleya weiwo ocapaheya onatannyaaya.

⁸ Moonelo wa Yehova vooloca sa okonihana ti wavasuluxa opwaha miruku sa elapo yeela. Piipiliya onaloca wi meerelo a okonihana enanwerya okhala ehime ya ohakalala. (Masi. 5:18, 19) Mu elukuluku emohamoha, owo onnanleela wi: “Mmoha ni mmoha a nyuwo asuweleke okhapelela mwiili awe mu weela murima ni ocicimiheya, ahicharihaka minkhela saya ntoko amalapo ahimusuwenle Muluku.”—1 Tes. 4:4, 5.

9. (1) Miruku taani saavahereryiwe mu Mulipeleli a 1926 sooniherya wi miruku sa Masu a Muluku ti savasuluxa? (2) Miruku taani saphaama nnaphwanyaahu mu 1 Yohani 2:15, 16? (3) Meerelo taani oonanara anaphwanyeya mu Aroma 1:24-27 nihinaphwanelaahu wiivoliiherya?

⁹ Variyari va elukuluku yeele ya 1900 ni 1930, alapeli a Yehova hiyaacharinhe meerelo a achu yaawo yaayeleenle “ophama aya wothene.” (Éfe. 4:19, BNM) Awo yaahiilipixerya ochariha vakhiviru khiviru yeeyo Piipiliya onaloceiye. Mu 1926 Mulipeleli a 15 a Maiyu (a enklesi) aahiloca: “Mulopwana ni muthiyana anaphwanela okhala oohiriipiheya ni aweela mmuupuwelo ni mu saweera, xaxaxa wa achu oohiyana mwiikho.” Moohipwacha moonelo wooheseya wa achu mu elukuluku yeele, alapeli a Yehova yaaniiwexexa miruku sa vasulu sa Muluku nave yaanachariha masu awe. (Mwaalakhanye 1 Yohani 2:15, 16.) Echu yaphaama okhalano Piipiliya wi anihooleleke! Nave ti yaphaama Yehova ikwaha soothene onivaha yoolya yoomunepani mu elukuluku yoophwanelela! Eyo ennanikhaviherya ohuutuweleya ni miruku sa elapo yeela vooloca sa okonihana. *—Mwaalakhanye Aroma 1:24-27.

10-11. Tiheeni Piipiliya aalohenryeiye wi yahaala weereya mmahiku oomaliherya?

¹⁰ Piipiliya aahiloherya wi mu mahiku ookuchula, achu yaahaala ‘pahiru wiichunaka mukhataaya.’ (2 Tim. 3:1, 2) Mwa yeeyo, hinnatikhina vaavaa nnoonaahu elapo yaaceenyeryaka achu wiivaha esisapo moophwahererya. Ensiklopetia (liivuru a mulaponi) olonce wi, mu iyaakha 70, “aliivuru a nikhaviheryo wa muchu mukhateiye ahaaceereryeya vancipale.” Aliivuru akina a yaala “yaanaaceenyerya alipa a waalakhanya wiisuwela meekhaaya, wiiseemererya ni wiiloca meekhaaya.” Ntoko yootakiherya, liivuru mmoha ooloca: “Mwiipakele mphimo ophiyerya mweeryo taani muniisivelaanyu meekhinyu mmukhalelo wootikiniha, wooceenyerya nave muchu asisapo mweelaponi—mukhale nyuwo.” Liivuru mmohamoha onaakiha “malapelo a muchu mwaneene, yaale muchu mukhateiye onalakeleleiye meecelo awe mwawiiwanana ni yawuupuserya-ya-murima awe ni malamulo a vamucecheni vawe yaawo anaphara muteko mwa yoowo.”

¹¹ Apwanne moonelo yoola honaneeriha omuupuwela muchu mukina? Mweeparipari ti yeeyo Satana aaloceiye wa Eva. Owo aalonce wi owo anwerya ‘okhala ntoko Muluku, asuwelaka yeeyo eri yaphaama ni yoonanara.’ (Map. 3:5) Olelo, ancipale aniivaha esisapo asineenaaya yuupuwelaka wi haavo—naari mano Muluku—ookhalano ophwanelela wa waaleela yeeyo eri yaphaama naari yoonanara. Yootakiherya emoha ya yeeyo ori moonelo achu aryaayano vooloca sa othela.

12. Moonelo taani elapo eryaayano vooloca sa othela?

¹² Piipiliya onahusiha wi mulopwana ni mwaariye anaphwanela ocicimihanaka mukina ni mukhweiye ni waakhwaniherya yoororomeliha apankaaya mu othela. Ooniheryaka ochuneya  waya okhwaaniherya yoororomeliha yeela, Piipiliya oni: “Mulopwana aahiyeke atiithinya ni amannya, aphitaane ni mwaariye, nave ala enii ekhale mwiili mmoha.” (Map. 2:24) Moohiyana, yaale anachariha miruku sa elapo anaakiha moonelo woohiyana. Awo analoca wi echu yoochuneyaxa ori muchu waavya ohakalala wawe. Liivuru mmoha onaloca sa omwalana ooloca: “Mu ifesta ikina sa othela, nlakano nookhoveleleya nawi ‘ophiyerya okhwa onimwalanya’ ninnatorokiwa ni yoororomeliha yookotakota eni: ‘ophiyerya osivela wahu omale.’” Moonelo yoola wawi othela okhaleke wa elukuluku vakhaani ti nthowa nene iryaayavo ichoko imwaren’ye ni makacamiho mancipale a mmuupuweloni. Moohikhwa minikwa, moonelo wa elapo vooloca sa othela ti woololo.

13. Tinivi nri nthowa nimoha nnamweeriha Yehova waathanya achu awiirumiha?

¹³ Piipiliya oni: “Apwiya [Yehova] annaathanya oothene awiisinnuwiha.” (Masi. 16:5) Ntakhara heeni Yehova onnaathanya achu awiirumiha? Nthowa nimoha ti nawi achu yaale aniisoona okhala oochuneyaxa, annaaceenyerya akina okhala tho ntoko yaawo, ekhalaka a wiirumiha ntoko Satana. Mwaanyiherye ela: Satana aahiphiyerya weemererya wi Yesu—yoole Muluku aampharihenleiye wi apatuxe ichu soothene—aaphwanela okokhora ohoolo wawe wi amulapele! (Mat. 4:8, 9; Kol. 1:15, 16) Ophiyerya wi achu yaale aniisivela moophwahererya annooniherya wi miruku sa elapo ti sololo vamiithoni va Muluku.

14. Moonelo taani woophimeleleya wa wiisivela yoowo yoorepa ya Aroma 12:3 enanihusihaaya?

¹⁴ Piipiliya onnanikhaviherya okhalano moonelo woophimelela vooloca sa hiyo meekhihu. Owo onnanuupuxerya wi ninnaphwanela okhalano mukhalelo woophimelela wa wiisivela. Vaavaa Yesu aalonceiye “Omukhweleke mukhwaa ntoko oniikhwelelaa weyo mwaneene,” owo ooniherya wi tahi yoonanara okhalano osivela wa muchu mukhateiye mmukhalelo woophimeleleya. (Mat. 19:19) Nyenya Piipiliya halonce wi niiheleke vasulu waapwaha akina. Owo onnanihusiha: “Muheere echu muchunaka wiiphwanyerya nari wiisoona, nto mwiiyeviheke;  mmoha ni mmoha amweereke mukhwaawe wi toompwaha.”—Fil. 2:3; mwaalakhanye Aroma 12:3.

15. Ntakhara heeni munoonaanyu wi moonelo wa Piipiliya vooloca sa wiisivela woophimelela ti waphaama opwaha moonelo weelapo?

¹⁵ Wa achu ancipale yaale anooniwa okhala amavyakelo mu elapo yeela, moonelo wa Piipiliya ntakhara wiisivela woophimelela, wa yaawo tahi echu. Awo analoca wi waakhaliha akina ntoko avasulu onnamweeriha muchu okhala oolosowa nave eyo ennaavaha ekari ya omukhaliha muchu moohiphwanelela. Nyenya nkawooneeni achu a elapo ya Satana. Moone yeeyo moonelo ola okumihenryaaya mwa yaawo. Apwanne achu anrima toohakalalasa? Apwanne imusi saya ti soohakalala? Mano awo aakhalano asinthamwene eeparipari? Apwanne aakhalano onthamwene wawaacameleya ni Muluku? Mwawiiwanana ni yeeyo munoonaanyu olelo, teevi enaruuha mphurelo waphaama? Apwanne miruku seelapo, naari miruku sa Masu a Muluku?

16-17. Tiheeni nnaphwanelaahu othamalela, nave ntakhara heeni?

¹⁶ Muchu yoowo onachara ikano sa yaale anaakiha miruku sa elapo yeela, hanapaka yoothanla yaphaama. Owo onalikana ni mulipa a weecelela mapuro yoowo orimeenle nave onaveka sooleeliherya wa nthamwene awe a weecelela mapuro yoowotho orimeenle. Yesu aahiloca sa alopwana “amiruku” mu elukuluku awe ariki: “Ari ahooleli oohoona. Muchu oohoona aanamuhoola oohoona mukhweiye, ooweeli ala anammorela mulicini.” (Mat. 15:14) Enakhala yawooneya wi miruku sa elapo yeela ti soololo vamiithoni va Muluku.

¹⁷ Miruku sa Piipiliya ilukuluku soothene sinnooniwa okhala saphaama. Ikano owo onanivaheiye “Sinaphara muteko woohusiha, woovaanyiha, weereranyiha ni okhoveleliha mu sawookololowa.” (2 Tim. 3:16) Nnaphwanela omuthamalela vancipale Yehova. Sooleeliherya owo onanivaheiye moorweela wa marehereryo awe sinnanikhapelela orweela wa miruku seelapo yeela. (Éfe. 4:14) Yoolya yoomunepani nnaakhelaahu wa yoowo ennanivaha ikuru nnachunaahu wi niwerye wiiwelela malakiheryo anaphwanyeya mu Masu awe. Moohikhwa minikwa, eri ekari etokweene ochariha miruku soororomeleya seiyo ikhanle: miruku sa Piipiliya!