1. Tiheeni Yesu olonceiye sa muhakhu wa wirimu?

TAHI wi muhakhu ori woothene onnooneya. Mweeparipari, muhakhu wookhweleyaxa honooneya. Mmwaha wa Vamwaakoni, Yesu aahiloca muhakhu wa wirimu yoowo ori wookhweleyaxa opwaha muhakhu woomwiilini. Voocharela owo aahaaceererya: “Weiwo orivo muhakhu aa, vaavaa tho torivo murima aa.” (Mat. 6:19-21) Vaavaa nnoonaahu echu okhala yasisapo, ninnaceenyeryeya wiilipiserya ophwanya yeeyo. Hiyo ninnathukumanya “muhakhu wirimu” moorweela wa okhalano meecelo aphaama vamiithoni va Muluku. Muhakhu yoowo Yesu olonceiye, honaweryeya onanarihiwa naari wiiyiwa.

2. (1) Mwawiiwanana ni 2 Korinto 4:17, 18, tiheeni Paulo onanceenyeryeiye weera? (2) Tiheeni nnahaalaahu othokororya mmwaha yoola?

² Murummwa Paulo onceenyerya wi ‘niwehekexa ichu soohooneya.’ (Mwaalakhanye 2 Korinto 4:17, 18.) Ichu seiha soohooneya, muhakhu yoowo onaphitaanyerya mareeliho yaawo nnahaalaahu opuha mu elapo evyaani ya Muluku. Mmwaha yoola, nnahaala othokororya ichu sese seiho iri muhakhu woohooneya yoowo onahaala oniruuhela mphurelo hiihaano, ntoko: Onthamwene ni Muluku, yamahala ya ovekela, nikhaviheryo na munepa waweela wa Muluku, vamoha ni nikhaviheryo nnaakhelaahu mmuteko woolaleerya noorweela wirimu. Nnahaala tho othokororya mukhalelo nneeraahu nooniherye othamalela muhakhu yoola woohooneya.

3. Muhakhu taani mutokweene ohinooneya, nave enaweryeya hai?

³ Muhakhu mutokweene ohinooneya ti onthamwene ni Yehova Muluku. (Sal. 25:14) Onaweryeya hai Muluku opaka onthamwene ni achu oocheka nave atitelela okhala aweela? Owo onnawerya weerano yeela nthowa na mukucho wa woopola wa Yesu yoowo  ‘onaviihavo yoocheka veelaponi’ wa achu ancipale. (Yoh. 1:29) Yehova aanasuwela woosiilo wi yoolakelela awe ya omuruma Mvuluxa wi awoopole achu yaahaala waakhwanela. Ti nthowa nene Muluku aareiye nthamwene a achu yaawo yaakhanle Kristu ahaakumve okhwa.—Aro. 3:25.

4. Mvahe sootakiherya sa alopwana yaawo yaari asinthamwene a Muluku Kristu ahaakumve orwa.

⁴ Nwuupuwele alopwana akina yaawo yaari asinthamwene a Muluku, Kristu ahaakumve orwa. Aparahamu aari mulopwana yoowo oonihenrye nroromelo noolipa. Opwaha iyaakha 1.000 Aparahamu amanle okhwa, Yehova aahimwiichana owo “nthamwene kaataannaakano.” (Isa. 41:8) Ela enataphulela wi, naamwi achu akhwile, nlelo Yehova onawoona ntoko asinthamwene awe a vanikuthani. Nlelo Yehova onnamuupuwela Aparahamu. (Luka 20:37, 38) Yootakiherya ekina ti Yupu. Variyari va muthukumano ankeelo yaaryaayano wirimu, Yehova aahiloca mwaphaama sa Yupu. Yehova aamweera “muchu oororomeleya ni awookololowa murima, oomoova Muluku ni oorapela yoonanara.” (Yobi 1:6-8) Vano Yehova oonne hai vooloca sa Taniyeli yoowo aamurumeenle Muluku moororomeleya mu iyaakha 80, mu elapo ya achu yahaamulapaaya Yehova? Mu ikwaha raru ankeelo yaahimororomeliha mulopwana ola awuuluvala wi aari “ookhweliwasha” ni Muluku. (Dan. 9:23; 10:11, 19) Nnaphwanela ororomela wi Yehova chiryene onahaala waaviiha asinthamwene awe oosiveliwa yaawo akhwile.—Yobi 14:15.

5. Tiheeni enachuneya wi nipuhe onthamwene wawaacameleya ni Yehova?

⁵ Achu akavi oohiphameeya yaawo anapuha onthamwene wawaacameleya ni Yehova olelo? Aakhalavo amilyawu aachu. Ninnasuwela yeela woona wi alopwana, athiyana ni anamwane ancipale annooniherya orweela mwa meecelo aya wi annachuna okhala asinthamwene a Muluku. Apwiya Yehova “anniiwananano awookololowa murima.” (Masi. 3:32) Onthamwene yoola ti wooweryeya nthowa na mukucho wa woopola wa Yesu. Mu mathipelo yaala, mooreera murima Yehova onnaneemererya wiiveleela wa yoowo ni opatisiwa. Vaavaa nnapakaahu echu yeela yoochuneya, ninnakhala vamoha mu nikhuuru na amilyawu aachu awiiveleela, yaawo ari Akristu oopatisiwa anapuha onthamwene wawaacameleya ni Muchu mutokweene a elapo yoothene!

6. Nni nooniherye hai othamalela onthamwene ahu ni Muluku?

⁶ Nni nooniherye hai wi ninnavaha esisapo onthamwene ahu ni Muluku? Moolikana ni Aparahamu vamoha ni Yupu, yaawo yaatitelenle okhala oororomeleya wa Muluku mu iyaakha opwaha nsana, nnaphwanela otitelela okhala oororomeleya, moohipwacha elukuluku nimalinhaahu, nimurumeelaka Yehova mu elapo yeela yawuuluvala. Moolikana ni Taniyeli, nnaphwanela ovaha esisapo onthamwene ahu ni Muluku opwaha okumi ahu. (Dan. 6:7, 10, 16, 22) Nnikhaviheryo na Yehova, nnanwerya ovilela nikacamiho vyakala nnahoolelaahu, nave voocharela nnahaala olipiha onthamwene ahu ni yoowo.—Fil. 4:13.

7. (1) Mwawiiwanana ni Masiposipo 15:8, Yehova onoona hai vooloca sa mavekelo ahu? (2) Yehova onaakhula hai mavekelo ahu?

⁷ Muhakhu mukina ohinooneya ti nivekelo. Asinthamwene avanikuthani annasiveliwa oloca sa muupuwelo ni moonelo aya wa mukina ni mukhwaawe. Apwanne emohamoha eneereya ni onthamwene ahu ni Yehova? Aayi! Yehova onnaloca ni hiyo orweela mu Masu awe, nave orweela wa masu yaawo, onnuupulula wa hiyo muupuwelo ni moonelo awe. Ninnaloca ni yoowo mu nivekelo, nave nnanwerya omuleela muupuwelo ahu wawiiseela ni moonelo ahu wampuwa. Yehova onnasiveliwa owiriyana mavekelo ahu. (Mwaalakhanye Masiposipo  15:8.) Ntoko Nthamwene oosivela, tahi wi pahiru Yehova onamoona owiriyana mavekelo ahu, nyenya onnaakhula. Mu ilukuluku ikina onnaakhula mwawaakuveya. Nave mu ilukuluku ikina nnaphwanela otitelela ovekela vooloca sa yeeyo. Naamwi hiiha, nnaphwanela ororomela wi naakhulo nnahaala orwa mu elukuluku yoophwanelela ni mmukhalelo waphaama. Mweeparipari, naakhulo na Muluku nnanwerya orwa mmukhalelo woohiyana ni yoowo nuupuwelaahu. Ntoko yootakiherya, ohiya oviihavo yaweeha, owo onanwerya onivaha miruku ni ikuru wi niweryeke “ovilela.”—1 Kor. 10:13.

8. Nni nooniherye hai othamalela wahu yamala ya nivekelo?

⁸ Nni nooniherye hai othamalela wahu yamala yeela yoochuneyaxa ya nivekelo? Mukhalelo mmoha ori moorweela wa wiiwelela ekano ya Yehova yeeyo eni, “muvekeleke moohihiyererya.” (1 Tes. 5:17) Yehova hananikhinyererya ovekela. Ohiya yeeyo, owo onnacicimiha othanla wahu woochuna nave onnanceenyerya ‘otitelela ovekela.’ (Aro. 12:12) Mwawiihiiha, nnanwerya wooniherya othamalela wahu moorweela wa ovekela ikwaha sincipale vanihikuni. Mweeparipari, nnaphwanela ophitaanyerya mu nivekelo masu oothamalela ni oomucicimihano Yehova.—Sal. 145:2, 3.

9. Munna mmoha onoona hai vooloca sa nivekelo, nave nyuwo munoona hai?

⁹ Moovira wa elukuluku nnamurumeelaahu Yehova, woona mukhalelo onaakhuleiye mavekelo ahu, onamuneeriha wi othamalela wahu ntakhara nivekelo okhale wawiiseela. Moone yootakiherya ya munna oniichaniwa Chris yoowo onarumeela mmuteko wa elukuluku yoothene mu iyaakha 47. Owo oriye: “Kinnakhala oohakalala vaavaa kinaphwanyaaka elukuluku woosiiselo ene wi kiloce ni Yehova mu nivekelo. Enakhala yaphaama wa miyo oloca ni Yehova vaavaa nsuwa nnakhumaaya nave ichu soothene inakhalaaya sooreeraxa! Ela ennakiceenyerya omuthamalela yoowo ntakhara samahala soothene, ophitaanyerya ekari ya nivekelo. Voocharela kimanle ovekela wookuchulani wa nihiku, kinnakhala oohakalala vaavaa kinayaaka ookona kirino yawuupuxerya-ya-murima yaweela.”

10. Ntakhara heeni nnaphwanelaahu ovaha esisapo munepa waweela wa Muluku?

¹⁰ Munepa waweela wa Muluku, yamahala ekina ehinooneya yeeyo nnaphwanelaahu ovaha esisapo. Yesu ooniceenyerya wi nnaphwanela otitelela oveka munepa waweela. (Luka 11:9, 13) Yehova onnapharihela munepa waweela wi anivahe owerya—ophiyerya tho “owerya wene woopwaha.” (2 Kor. 4:7; Saw. 1:8) Nnikhaviheryo na munepa wa Muluku, nnanwerya ovilela yaweeha vyakala nnahaalaahu ohoolela.

11. Mmikhalelo taani munepa waweela onanikhaviheryaaya?

¹¹ Munepa waweela onanwerya onikhaviherya waakhwaniherya murici ahu mmuteko wa Muluku. Munepa wa Muluku onanwerya wunnuwiha mavyakelo ahu. Ninnasuwela sookhumelela saphaama nnakhalaahuno mmuteko wa Muluku, nthowa nawi munepa awe onnanikhaviherya.

12. Mwawiiwanana ni Salumu 139:23, 24, nnaphwanela oveka munepa waweela wi onikhaviherye opaka eheeni?

¹² Mukhalelo mmoha nnooniheryaahu wi ninnavaha esisapo munepa waweela wa Muluku ori moorweela wa ovekela wi onikhaviherye osuwela naarino muupuwelo naari nchuno noonanara mmurimani mwahu. (Mwaalakhanye Salumu 139:23, 24.) Wakhala wi noovekela ntakhara yeeyo, Yehova, orweela wa munepa awe, onamunikhaviherya osuwela muupuwelo naari nchuno noonanara nryaahuno. Nave wakhala wi nohoona wi nookhalano muupuwelo ni nchuno noonanara, nnaphwanela oveka munepa wa Muluku wi onivahe ikuru sa ovoothano muupuwelo naari nchuno noonanara. Mwawiihiiha nnahaala wooniherya wi nri oolakelela osepa opaka echu vyakala enahaala omweeriha Yehova ohiya onikhaviherya ni munepa awe waweela.—Éfe. 4:30.

13. Nni ninnuwihe hai othamalela wahu ntakhara munepa waweela?

¹³ Nnanwerya wunnuwiha othamalela wahu ntakhara munepa waweela orweela mwa wuupuwelela seiho munepa waweela waakhwanihenryaaya mmahiku ahu. Ahaakumve oya wirimu, Yesu aahaaleela oohuserya awe wi: “Munarwa mwaakhela ikuru, oneeraaya wookhuruweleeni menepa waweela, nave munamukeerela  onamoona . . . ophiyerya weiwo elapo ekontaayawo.” (Saw. 1:8) Masu yaala annaakhwanela mmukhalelo wootikhiniha olelo. Nnikhaviheryo na munepa waweela, achu awaakhwana amilyawu athanu nararu ni emeya annamulapela Yehova mwawiiwanana mu elapo yoothene yavathi. Navetho, ninnampuha parataiso oomunepani woona wi munepa wa Muluku onnanikhaviherya wunnuwiha makhalelo aphaama, ntoko osivela, ohakalala, murecele, ovilela, oreera murima, osiveliwa ni saphaama, ororomeleya, opisa murima ni wiisuumaaliha. Makhalelo yaala annapaka makupa a “yawiima ya munepa.” (Gal. 5:22, 23) Chiryene, munepa waweela yamahala yasisapo!

14. Nikhaviheryo taani nihinooneya nnakhalaahuno vaavaa nnayaahu mmuteko woolaleerya?

¹⁴ Nookhalano muhakhu ohinooneya syoowo ori ‘olapa vamoha’ ni Yehova, Yesu ni ankeelo. (2 Kor. 6:1) Ninneerano eyo ilukuluku soothene nnayaahu mmuteko woolaleerya. Paulo aahiiloca mukhateiye ni yaale yaalapa mmuteko woolaleerya ariki: “Hiyo na alipa-muteko akhwawe a Muluku.” (1 Kor. 3:9, NN.) Vaavaa nnalapaahu muteko Weekristu, ninnakhala anamuteko akhwaawe a Yesu. Muupuwele wi amanle waaruma oomuchara awe wi “haweni wa achu a maloko oothene mwaapakeke oohuserya aka,” Yesu aahiloca: “Miyo kiri ni nyuwo.” (Mat. 28:19, 20) Vano hanka vooloca sa ankeelo? Ninnatepa othamalela woona wi ankeelo annanihoolela vaavaa nnayaahu olokoha ‘michaka yaphaama yoohimala yoovuwihiwa veelaponi yoothene ya vathi’!—Wup. 14:6.

15. Muloce yootakiherya ya Mpiipiliyani yeeyo enooniherya makupa oochuneya yaawo Yehova onapakeiye mmuteko ahu woolaleerya.

¹⁵ Nnikhaviheryo noorweela wirimu, tiheeni nnaweryaahu waakhwaniherya? Vaavaa nnaalaahu muchaka wa Omwene, mmiso mukina onnaphwanya murima waphaama nave onnannuwa. (Mat. 13:18, 23) Taani onannuwiha mmiso wa eparipari ni wiimiha sawiima? Yesu aahithariha wi haavo muchu aahaala okhala oomuchara awe ‘Atiithi awe ehimuruuhenle.’ (Yoh. 6:44) Piipiliya onnanivaha yootakiherya yooluluwanya vooloca sa yeela. Muupuwele elukuluku Paulo aalaleenryeiye nikhuuru na athiyana vaate va epooma yo Filipi. Moone yeeyo Piipiliya onaloceiye sa mmoha a yaawo, muthiyana iichaniwa Litiya: “Apwiya [Yehova] yaamuhulela murima awe wi iiweke phaama masu a Paawulu.” (Saw. 16:13-15) Moolikana ni Litiya, amilyawu a achu akina aarwa wa Yehova.

16. Taani onaphwanela ocicimihiwa ntakhara sookhumelela soothene soohakalaliha nnakhalaahuno mmuteko woolaleerya?

¹⁶ Taani onaphwanela ocicimihiwa vaavaa nnakhumelelaahu phaama mmuteko woolaleerya? Paulo aahaakhula nikoho nenla vaavaa aarempeiye masu ala vooloca sa muloko wo Korinto: “Miyo kihaala, Apoolu ahela maahi, nto Muluku toninnuwiha. Nari mulipa a waala nari mulipa oohela maahi, hari echu enevo; Muluku mwaneene toninnuwiha.” (1 Kor. 3:6, 7) Ntoko Paulo, ilukuluku soothene nnaphwanela omucicimiha Yehova wa sookhumelela soothene soohakalaliha nnakhalaahuno mmuteko woolaleerya.

17. Nni nooniherye hai othamalela wahu ntakhara ekari ya ‘olapa vamoha’ ni Muluku, Kristu, ni ankeelo?

¹⁷ Nni nooniherye hai othamalela wahu ntakhara ekari ya ‘olapa vamoha’ ni Muluku, Kristu, ni ankeelo? Nnanwerya weerano yeela moorweela wa okhala amvai wi niwerye ophwanya ekari ya olaleerya michaka saphaama wa akina. Sookhalavo mikhalelo mincipale sa weerano yeela, ntoko olaleerya mmapuro awaaciwamo naari “echoko ni echoko.” (Saw. 20:20) Ancipale annapuha onamoona woohilakelela. Vaavaa anakumanaaya ni namarwa, awo annamulocela moonthamwene nave anneererya opaceryiha  ovaanela. Wakhala wi muchu ohaakhulela phaama, awo annapacerya oloca sa michaka sa Omwene.

18-19. (1) Nnahela hai maahi mmiso wa eparipari? (2) Muloce yaweereya enooniherya mukhalelo Yehova aamukhavihenryeiye oohuserya a Piipiliya mmoha.

¹⁸ Ntoko “alipa-muteko akhwawe a Muluku,” hannaphwanela pahiru waala mmiso, nyenya nnaphwanela ohela maahi. Vaavaa muchu onooniheryeiye nchuno, nnaphwanela opaka owetha wahu wi nikookele oloca ni yoowo; naari omwaavya mulaleeryi mukina wi akumane ni muchu owo ni yoolakelela ya opaceryiha yoohuserya ya Piipiliya. Vaavaa yoohuserya enayaaya vahoolo, ninnahakalala woona mukhalelo Yehova onamukhaviheryeiye oohuserya a Piipiliya otoroka muupuwelo ni moonelo awe.

¹⁹ Muthokororye yootakiherya ya Raphalalani yoowo aari namuku o Afrika Oohico. Owo aanasiveliwa ni yeeyo aahuseryeiye mu yoohuserya awe ya Piipiliya. Nyenya waari woovila wa yoowo weemererya yeeyo Piipiliya onahusiheiye vooloca sa weererya oloca ni alipa ookhwa. (Malam. 18:10-12) Vakhaani-vakhaani, owo aaheemererya wi Muluku uupe muupuwelo awe. Nave moovira wa elukuluku, owo aahihiya okhala namuku, naamwi muteko awe waari yooworu. Raphalalani, yoowo vano orino iyaakha 60 sa oyariwa ooloca: “Kinnatepa waathamalela Anamoona a Yehova nthowa na okikhaviherya mmikhalelo mincipale, ophitaanyerya okikhaviherya ophwanya muteko. Opwaha soothene, kinnatepa omuthamalela Yehova okikhaviherya opaka matorokelo mookumini mwaka, ophiyerya wi hiihaano kinnaya mmuteko woolaleerya ntoko mmoha a Anamoona awe oopatisiwa.”

20. Tiheeni mulakelenlaanyu weera?

²⁰ Mmwaha yoola noothokororya ichu sese seiho iri mihakhu soohooneya. Echu etokweene wa soothene seiha, ti ekari ya okhalano Onthamwene wawaacameleya ni Yehova. Onthamwene yoola, onnanikhaviherya ophura mihakhu mikina soohooneya—ntoko, omwaacamela mu nivekelo, waakhela nikhaviheryo na munepa awe waweela, ni waakhela nikhaviheryo noorweela wirimu mmuteko ahu woolaleerya. Nnaphwanela olakelela wunnuwiha othamalela wahu ntakhara mihakhu seiha soohooneya. Nave hannaphwanela ohiya omuthamalela Yehova nthowa na okhala Nthamwene ahu a vamurimani.