Sara * ooloca: “Kamuchu awuumaanyeya oyariwa wooyariwa, nave nkiniiroromela. Wanthowa na yeeyo, nkinakhala ootaphuwa vaavaa kinakhala ni achu awiiroromela ni oowali. Nyenya vaavaa kinakhalaaka ni achu awiiyeviha ni awiisuumaaliha, kinnakhala ootaphuwa. Kinnakhala ootaphuwa ni muchu yoowo omuleela moonelo ni makacamiho aka. Asinthamwene aka anakhala awiiyeviha.”

Masu a Sara annooniherya wi nakhala awiiyeviha achu akina anamuchuna okhala asinthamwene ahu. Wiiyeviha naari wiisuumaaliha onnamuhakalaliha Yehova. Masu awe annanlopola: “Muware . . . wiiyeviha.” (Kol. 3:12) Wiiyeviha tiheeni? Yesu oonihenrye hai wiiyeviha? Nave ti mwawiihai mukhalelo ola onanikhaviheryaaya okhalano ekumi yoohakalaliha?

Wiiyeviha mukhalelo onakhumelela vaavaa muchu onakhaleiye a murecele. Muchu awiisumaaliha onakhala ooreera murima vaavaa onaakhaliheiye akina. Onniikhalelaru oomaaleleya ni awiihiiha vaava akina anamunyeenyeihaaya.

Okhala awiisumaaliha henataphulela wi muchu haanono ikuru. Nsu na Ekriki “wiiyeviha” naaphariheliwa wa kavalo amutakhwani yoowo aavyakihiwa wi akhale oomaaleleya. Kavalo haahiya okhala akuru nthowa na ovyakiha aakheleiye, nyenya owo anahuserya ovareryela ikuru sawe. Mmukhalelo woolikana, wiiyeviha onnanikhaviherya ovareryela omuchu ahu woohiphaameya ni okhala a murecele ni akina.

Akhweya nnamuupuwela: ‘Miyaano nkamuchu awiisumaaliha.’ Elapo nnakhalaahumo aakhalamo achu oowali ni oohipisa murima, nyenya wooniherya wiiyeviha onamukhala woovila. (Aro. 7:19) Chiryene, wooniherya wiiyeviha onnachuneya wiilipiserya, nyenya nnikhaviheryo na munepa waweela wa Yehova, nnanwerya waakhwaniherya yoolakelela yeela. (Gal. 5:22, 23) Ntakhara heeni ninnaphwanela wiilipiserya wunnuwiha wiisumaaliha?

Wiiyeviha mukhalelo mmoha onaweeriha achu onaacamela. Hiiha ntoko Sara oromoliwe woopaceryani, ninnakhala ootaphuwa vaavaa nnakhalaahu ni achu awiisumaaliha. Yesu oovaha yootakiherya etokweene ya wooniherya wiiyeviha ni oreera murima. (2 Kor. 10:1) Ophiyerya wi anamwane yahaamusuwenle yaanamwaacamela.—Mar. 10:13-16.

Wiiyeviha onnanikhapelela, vamoha ni yaale anirukurenrye. Nakhala awiisumaaliha hinni naakuveleke onyeenyeya naari onanariwa. (Masi. 16:32)  Mwawiihiiha, nnamusepa wiiphwanyerya mathowa nimanle omuhoosa muchu, xaxaxa yoole nnamusivelaahu. Woona wi wiiyeviha onnanikhaviherya ovareryela moonelo ni muupuwelo ahu, hinnahaala waahoosa akina.

Yesu aanakhala ooweiwa nave aahikhalano mirici mitokweene. Naamwi hiihaa aanaakhaliha achu mwa wiiyeviha. Achu ancipale mmahiku a Yesu yaanalapa mwakuru nave yaaniisoona okhala oonyokoliwa. Awo yaanachuna wiichuuwihiwa. Yaahikhala oohakararyeya vaavaa Yesu aalonceiye wi: “Rwaani wa miyo . . . kiri ooreera murima ni awiiyeviha.”—Mat. 11:28, 29.

Tiheeni enahaala onikhaviherya okhala awiisumaaliha hiiha ntoko Yesu? Yoopacerya, nnaphwanela ohuserya masu a Muluku wi nsuwele mukhalelo Yesu aakhaliheiye achu nave ti mwawiihai aahooleleiye mikhalelo soovila. Voocharela vaavaa nnahoolelaahu mikhalelo seiho ineeha wiiyeviha wahu, nnaphwanela wiilipiserya omutakiherya Yesu. (1 Ped. 2:21) Moone ichu raru seiyo saamukhavihenrye Yesu okhala awiisumaaliha.

Yesu aari muchu awiiyeviha. Yesu haalonce pahiru wi ari “ooreera murima” nyenya tho aari “awiiyeviha.” (Mat. 11:29) Piipiliya onnaloca makhalelo yaala meeli vamoha nthowa nawi wiiyeviha ni wiisuumaaliha sinniiwanana. (Éfe. 4:1-3) Mwawiihai?

Wiiyeviha onnanikhaviherya ohaakeelela mwaha ni ohaakuvela onyeenyeya vaavaa nihinakhalihiwaahu phaama ni akina. Vaavaa akina yaamwiichanaaya Yesu “namalya nnamuhapaliwa,” owo aakhulenle hai wootheriwa wuuwu? Owo aheeriha wi yootakiherya awe evahe naakhulo nave mwawiiyeviha aahiloca wi “miruku inasuwanyeya ni miteko aya.”—Mat. 11:19.

Waakhala wi muchu ooloca masu oohiphwanelela ntakhara mwiili anyu, okhala wanyu mulopwana naari muthiyana, naari elapo muyariwaanyuwo, hamunoona okhala yaphaama waakhulela mwawiiyeviha? Pedro, mutokweene mmoha o Afrika Oohico, ooloca: “Wakhala wi muchu ooloca masu anakinyenyeiha, kinniikoha: ‘Yesu aahaala waakhulela hai?’” Owo tho ooloca: “Koohuserya ohithokororya masu yaawo akinyeenyeinhe.”

Yesu aaniiwexexa wi achu toohiphaameya. Oohuserya a Yesu yaanachuna opaka yeeyo eri yawookololowa, nyenya nthowa na ohiphaameya hiyaawerya opaka ichu mwawookololowa. Ntoko yootakiherya, mu ohiyu ahaakumve okhwa, Petru, Yakopo ni Yohani hiyaamuhakaranrye mwawiiwanana ni yooveka ya Yesu. Naamwi hiihaa, Yesu aanasuwela wi ‘munepa onnakhwela, nto mwiili ti wooceecheya.’ (Mat. 26:40, 41) Woona wi aahisuwela ohiphaameya wa achu, Yesu haanyeenyeya ni oohuserya awe.

Murokora mmoha awiichaniwa Mandy aaweherya wi akina yeereke saphaamaru. Nyenya olelo owo onniilipiserya okhala awiisumaaliha hiiha ntoko Yesu. Owo ooloca: “Kinniilipixerya weemererya wi achu toohiphaameya nave kinnatikitheryeya mu mikhalelo saphaama sa achu, hiiha ntoko Yehova.” Moolikana ni Yesu, osuwela oceecheya wa akina munanwerya waakhaliha mwawiiyeviha.

Yesu aanahiya mwaha mmatani mwa Muluku. Vaavaa aareiye veelaponi yavathi, owo aahikhalihiwa moonanara. Achu yaamuloca moonanara, omunyemula ni omuhoosa. Naamwi hiihaa owo aahititelela waakhulela mwawiiyeviha woona wi “aaniiveleela wa yoowo onathoriha mwa wookololowa.” (1 Ped. 2:23) Owo aanasuwela wi Tiithi awe awiirimu aahaala omukhapelela, nave wi ahaala omaliha ohookololowa mu elukuluku yoophwanelela.

Wakhala wi nookhalano esara nthowa na okhalihiwa moohookololowa, nnamuupuwela weeravo echu mukhatiihu. Nyenya weerano eyo enahaala otepiha mwaha. Ti nthowa nene Piipiliya onanuupuxeryeiye wi: “Onanariwa wa muchu, honaruuha wookololowa wa Muluku.” (Tiy. 1:20) Naamwi nrino mathowa a onyeenyeya, ohiphaameya onamuneeriha waakhulela mmukhalelo woonanara.

Cathy, murokora mmoha o Alemanya wiiliwiili aanuupuwela: ‘Wakhala wi nkiniisaakiha haavo anii akaakihe.’ Nyenya owo aatoroka muupuwelo awe vaavaa aahusenryeiye omuroromela Yehova. Owo ooloca: “Miyaano nkinatitelela wiisaakiha. Echu enakeeriha waakhaliha akina mwawiiyeviha, ori osuwela  wi Yehova onnasuwela soothene.” Wakhala wi mookhalihiwa moohookololowa, mmutakiherye Yesu yoowo aamuroromela Muluku. Weerano hiiha enamookhaviheryani otitelela wooniherya wiiyeviha.

Yesu ooloca wi wiiyeviha ti woochuneya wi nikhale oohakalala. Owo oloca: “Oohakalala taale awiiyeviha.” (Mat. 5:5, NM) Moone ti mwawiihai wiiyeviha oryaaya woochuneya wa hiyo mu mikhalelo inacharela.

Wiiyeviha onnavukula makacamiho mu othela. Robert, munna o Australiya, onneemererya: “Mu ikwaha sincipale miyaano kaanaloca masu yaawo yaamututhula mwaaraka. Vaavaa muchu onaloceiye ni esara, hanawerya okookela muculi. Miyaano nkaakhala phaama vaavaa koonaka wi masu aka amphoreiha mwaaraka.”

“Ninnakwaculiwa oothene mu sincipale” ni ichu nnalocaahu. Nave yeeyo nnalocaahu nihuupuwelenle ennawerya waakanyerya murecele mu othela. (Tiy. 3:2) Vaavaa onakhumelelaaya ohiiwanana mu othela, wiiyeviha onamunikhaviherya okhala oomaala ni ovareryela masu ahu.—Masi. 17:27.

Robert ahiilipiserya winnuwiha omaaleleya ni wiihiiha. Teevi yaari yookhumelela? Owo ooloca: “Vaavaa onakhumelelaaya ohiiwanana, kinniilipiserya owiriyana moomaaleleya, oloca mwawiiyeviha nave nkinakhala oonyeenyeya. Vano onthamwene ahu ni mwaaraka wookhala phaama.”

Wiiyeviha onnanikhaviherya okhala phaama ni akina. Muchu awaakuvela onyeenyeya, hanakhalano asinthamwene ancipale. Mmakupa makina, wiiyeviha onnakhaviherya okhalano “olucelelana wa murecele.” (Éfe. 4:2, 3) Cathy, yoowo oromoliwe woopaceryani ooloca: “Vaavaa kinakhalaaka awiiyeviha, kinnapuha onthamwene ni akina, naamwi okhalaka woovila okhala ni akina a yaawo.”

Wiiyeviha onnanikhaviherya okhala a murecele. Piipiliya onniiwananiha “miruku yoorweela wirimu” ni wiiyeviha vamoha ni murecele. (Tiy. 3:13, 17) “Okurunusha murima” ori ni achu awiiyeviha. (Masi. 14:30) Martin, yoowo iilipisenrye okhala muchu awiiyeviha, ooloca: “Vano kamuchu awaataanyiheya ohiya waakeelela masu, nave kinnakhala a murecele ni oohakalala.”

Eparipari wi wooniherya wiiyeviha onamuchuneya wiilipiserya. Munna mmoha oriye: “Oloca eparipari, ophiyerya olelo ilukuluku ikina kinnakhala osokonyeryeya.” Nyenya Yehova onachuna wi nikhale achu awiisumaaliha, nave owo onahaala onikhaviherya waakhwaniherya yoolakelela yeela. (Isa. 41:10; 1 Tim. 6:11) Owo ‘onahaala okhwaaniherya ovyakihiwa wahu’ nave ‘onamunilipiha.’ (1 Ped. 5:10, NM) Moovira wa elukuluku, hiiha ntoko murummwa Paulo, nnahaala owerya otakiherya ‘wiiyeviha ni oreera murima wa Kristu.’—2 Kor. 10:1.