1-2. Echu taani yootikhiniha yeeren’ye mu nihiku na Pentekoste mu eyaakha ya 33 E.K.?

WAARI wooxixelo wa nihiku na Murunku o Yerusalemu. Yaari eyaakha ya 33 E.K., nave nihiku na Pentekoste. Nikhuuru na arummwa awaakhwana nsana nimoha ni makhumi meeli, naahithukumana mu esaala ya empa yoosulu. (Saw. 1:13-15; 2:1) Mu mahiku vakhaani muculi, Yesu aahaaleela wi etitelele okhala o Yerusalemu nthowa nawi yaahaala waakhela yoovaha yavameekhaaya. (Saw. 1:4, 5) Tiheeni yeeren’ye voocharela?

² “Mootutusha, waahiiweya okukuceya waarwa wirimu ntoko woopa wa echeku yincipale.” Onyakula iwe waasareya mpa moothemwene. Voocharela, “malumi, ntoko makalume a mooro” yaahimorela vamuru va arummwa, nave oothene “yaasareya munepa waweela.” (Saw. 2:2-4) Mmukhalelo yoola wootikhiniha, Yehova aahiyeeherya munepa awe waweela wa nikhuuru nenle. (Saw. 1:8) Awo yaahikhala oopacerya othanliwa ni munepa waweela * ni ovahiwa ewehereryo ya olamulela vamoha ni Yesu wirimu.

3. Ntakhara heeni yaale yaathukumanne mu nihiku na Pentekoste hiyaarino minikwa wi yaahithanliwa ni munepa waweela?

³ Waakhanle wi mwaari mmoha a arummwa yaale yaathukumanne mu esaala yeele yoosulu mu nihiku nenle, himwaahaala  ocuwala yeeyo yeeren’ye. Echu yeeyo yaakhala ntoko makalume a mooro yaahaala omorela vamuru vanyu, nave mpacerye oloca ilocelo soohiyanahiyana! (Saw. 2:5-12) Nyuwo himwaahaala okhwa minikwa waakhanle wi moothanliwa ni munepa waweela. Apwanne yaale anathanliwa ni munepa waweela, anathanliwa mmukhalelo wootikhiniha ntoko yeeren’yaaya mu nihiku na Pentekoste navetho mu elukuluku yoolikana? Hooye. Nnasuwela hai?

4. Apwanne oothene yaathanliwe ni munepa waweela mu nsana noopacerya, yaathanliwe mu elukuluku yoolikana? Mutharihe.

⁴ Voopacerya, nnahaala woona ti liini muchu onathanliweiye ni munepa waweela. Akristu yaale awaakhwana nsana nimoha ni makhumi meeli hiyaari yaaleru yaathanliwe ni munepa waweela mu Pentekoste a eyaakha ya 33 E.K. Voocharela, mu nihiku nenle tho achu awaakhwana macikhwi mararu yaahaakhela munepa waweela. Awo yaathanliwe ni munepa waweela emanle opatisiwa. (Saw. 2:37, 38, 41) Nyenya mu iyaakha soocharela, Akristu akina tahi wi yaathanlile ni munepa waweela emanle opatisiwa. Asamariya yaathanliwe ni munepa waweela evinrevo elukuluku ovinyerya vaavaa yaapatisiwaaya. (Saw. 8:14-17) Nave echu yavameekhaaya yeeren’ye ni Korneliyu vamoha ni emusi awe, yaawo yaathanliwe ni munepa waweela ehaakumve opatisiwa.—Saw. 10:44-48.

5. Mwawiiwanana ni 2 Korinto 1:21, 22, tiheeni eneereya vaavaa muchu onathanliweiye ni munepa waweela?

⁵ Vano, nnahaala woona yeeyo eneereya elukuluku muchu onathanliweiye ni munepa waweela. Yaale anathanliwa ni munepa waweela, wuupaceryani onamukhala woovila wa yaawo weemererya wi Yehova ohaathanla chiryene. Awo anniikoha ‘Ntakhara heeni Muluku okithanlileiye?’ Akina hanuupuwela hiiha. Moohipwacha mukhalelo muchu ti muchu onaakhuleleiye, murummwa Paulo oothariha yeeyo eneereya wa oothene yaale anathanliwa ni munepa waweela: “Moomurororomela yoowo, mweeyeriwaanyu eneneeryo yoohishipha * ya munepa waweela woororomelihiwa. Munepa owo ori  mweemeseryo wa muhakhu nnaweheryaahu waakhela.” (Éfe. 1:13, 14) Mwawiihiiha Yehova onnapharihela munepa awe waweela wi ooniherye vanlakani wa Akristu yaawo wi chiryene ohaathanla. Mmukhalelo yoowo, munepa waweela “ori mweemeseryo” wa yaawo wi muhoolo anahaala waakhela ekumi yoohimala wirimu ohiya veelaponi yavathi.—Mwaalakhanye 2 Korinto 1:21, 22.

6. Tiheeni Mukristu othanliwe onaphwaneleiye opaka wi aakhele nchuwelo nawe wirimu?

⁶ Wakhala wi Mukristu oothanliwa ni munepa waweela, apwanne eyo enataphulela wi onahaala oya wirimu naamwi ahiilipiseryaka? Hooye. Owo onnasuwela wi oothanliwa wi aye wirimu. Nyenya onaphwanela wuupuwelela olopola ola: “Asinnaka, ninleelo mulipisheryeke otikitherya wiichaniwa ni othanliwa wanyu. Mweerakano hiiha, hamurwa muuwa.” (2 Ped. 1:10) Mwawiihiiha naamwi Mukristu athanliwe naari wiichaniwa wi aye wirimu, pahiru owo onahaala waakhela nchuwelo nawe wakhala wi otitelela okhala ororomeleya.—Fil. 3:12-14; Ahe. 3:1; Wup. 2:10.

7. Akristu oothanliwa anasuwela hai wi ahiichaniwa wi yakhale wirimu?

⁷ Nyenya muchu onasuwela hai wi owo ohiichaniwa wi akhale wirimu? Naakhulo nookwakwaleya nnaphwanyeya mmasu yaawo Paulo aalonceiye wa Akristu o Roma yaawo ‘yiichaneliwe okhala aweela murima.’ Owo aahaaleela ariki: “Nyuwo hamwaakhenle munepa wookapuro, wi muuluule okhala a woova, nto mwaakhenle munepa wooweerihaani anamwane a Muluku. Mwa munepa ene yoowo nniichanaahuno, nriki: ‘Aapa, Tiithi.’ Munepa ene yoowo tonaneerela onamoona ni munepa ahu wi hiyo nri anamwane . . . a Muluku.” (Aro. 1:7; 8:15, 16) Mwawiihiiha, Muluku onnapharihela munepa awe waweela wi ooniherye mookwakwaleya wa muchu, wi oothanleliwa okhala wirimu.—1 Tes. 2:12.

8. Mwawiiwanana ni 1 Yohani 2:20, 27, ntakhara heeni Akristu oothanliwa hanaphwanela ororomelihiwa ni akina vooloca sa othanliwa waya?

⁸ Yehova hanahiya minikwa mmuupuweloni ni mmurimani wa yaale athanliwe wi yakhale wirimu. (Mwaalakhanye 1 Yohani 2:20, 27.) Mweeparipari, Akristu oothanliwa annachuna ohusihiwa ni Yehova orweela wa muloko hiiha ntoko muchu vyakala. Nyenya tahi woochuneya wi muchu mukina aaroromelihe wi aathanliwa ni munepa waweela. Yehova oopharihela ikuru sooweryaxa opwaha echu eri yoothene, munepa waweela, wi waaroromelihe!

9. Mwawiiwanana ni Éfeso 1:18, matorokelo taani anapakeya wa muchu othanliwe?

⁹ Wa alapeli a Muluku ancipale olelo, onamukhala woovila wa yaawo wiiwexexa tiheeni eneereya wa muchu vaavaa onathanliweiye. Eyo ti yawiiweya nthowa nawi awo hathanliwe ni munepa waweela. Muluku aapatunse achu wi ekhaleke veelaponi yavathi, ohiya wirimu. (Map. 1:28; Sal. 37:29) Nyenya Yehova oolakelela waathanla achu akina wi yakhale wirimu. Mwawiihiiha, vaavaa Muluku onaamuthanleiye muchu, onnatoroka ewehereryo ni mukhalelo awe wa wuupuwela, wi muchu owo uupuweleke okhala wirimu.—Mwaalakhanye Éfeso 1:18.

10. ‘Oyariwa wa naawiili’ onataphulela eheeni? (Moone tho masu avathi.)

¹⁰ Vaavaa Mukristu onathanliweiye ni munepa waweela, owo ‘onnayariwa wa naawiili,’ naari ‘oyariwa mwa munepa.’ * Yesu aahooniherya tho wi ti woovila othariha mookwakwaleya wa muchu yoole ohithanliwe ni munepa waweela mukhalelo wa ‘oyariwa wa naawiili,’ naari ‘oyariwa mwa munepa.’—Yoh. 3:3-8.

11. Mutharihe matorokelo yaawo aneereya mmuupuwelo wa Mukristu athanliwa.

 ¹¹ Tiheeni eneereya mmuupuweloni mwa Akristu elukuluku anathanliwaaya? Yehova ahaakumve waathanla awo anakhalano ewehereryo ya okhala ni ekumi yoohimala veelaponi yavathi. Awo anawehererya elukuluku yeeyo Yehova onahaaleiye omaliha otakhala woothene ni weeriha elapo okhala Parataiso. Akhweya anniisaanyiherya emwaakhelaka mmusi naari nthamwene aviihiwaka mookhwani. Nyenya emanle othanliwa ni munepa waweela, owo annapacerya wuupuwela mmukhalelo woohiyana. Ntakhara heeni? Tahi wi hanachuna okhala veelaponi yavathi, wi aari awuukhuwa mmuupuweloni naari wi yaahikhalano makacamiho naari wi mwawaakuveya aahoona wi okhala veelaponi yavathi waahaala okhala woowalamela. Ohiya yeeyo, Yehova topharihenle munepa awe waweela wi atoroke mukhalelo wa wuupuwela wa Akristu ni ewehereryo yeeyo yaasiveliwaayano vancipale.

12. Mwawiiwanana ni 1 Pedro 1:3, 4, Akristu oothanliwa anoona hai vooloca sa ewehereryo aya?

¹² Mukristu yoowo othanliwe ni munepa waweela akhweya onamuupuwela wi hanaphwanela ekari yeela yavameekhaaya. Nyenya owo hanono minikwa wi Yehova oomuthanla. Onnakhala oohakalala nave onnathamalela ewehereryo awe ya okhala wirimu.—Mwaalakhanye 1 Pedro 1:3, 4.

13. Oothanliwa ni munepa waweela anoona hai vooloca sa ekumi aya veelaponi yavathi?

¹³ Apwanne eyo enataphulela wi oothanliwa annachuna okhwa? Murummwa Paulo ohaakhula nikoho nenla. Owo olikanyinhe mwiili wa oothanliwa ni musakala, ariki: “Nakhala ninleelo mmushakala yoola, ninnuupuwela nuukhuwaka, vawi hinnakhwela oruliwa, nto nnakhwela owarihiwa waphaama, wi mwiili yoola onawehererya okhwa omiriwe ti okumi.” (2 Kor. 5:4) Tahi wi Akristu yaala aayeleela nchuno na okhala veelaponi yavathi, enachuna okhwa. Moohiyana, awo annasiveliwa okhala nave annachuna opharihela nihiku ti nihiku wi emurumeele Yehova ni amusi vamoha ni asinthamwene aya. Mwawiihiiha, moohipwacha yeeyo awo anapakaaya, ilukuluku soothene awo annuupuwela ewehereryo yoocicimiheya aryaayano muhoolo.—1 Kor. 15:53; 2 Ped. 1:4; 1 Yoh. 3:2, 3; Wup. 20:6.

14. Echu taani ehinooniherya wi muchu oothanliwa ni munepa waweela?

¹⁴ Akhweya mohintoko wiikoha waakhanle wi moothanliwa ni munepa waweela. Waakhanle wi ti hiiha muupuwele vooloca sa makoho ala oochuneya: Apwanne mookhalano nchuno ntokweene na opaka yookhwela ya Yehova? Apwanne muniisoona wi mootepa okhalano mvai mmuteko woolaleerya? Apwanne mookhalano nchuno ntokweene mu omwaalakhanya Piipiliya ni ohuserya vooloca sa “sawiiseela sa Muluku”? (1 Kor. 2:10) Apwanne munoona wi Yehova ohoovahaani sookhumelela saphaama mmuteko anyu woolaleerya? Mano munnoona wi mookhalano murici mutokweene wa waakhaviherya akina ohuserya vooloca sa Yehova? Apwanne mookhalano sawooniherya seiyo sinoolekechaani wi Yehova ohookhaviheryaani mmikhalelo savameekhaaya mookumini mwanyu? Wakhala wi mohaakhula makoho oothene yaala muriki aai, apwanne ela enooniherya wi mohiichaniwa wi muye wirimu? Hooye, tahi yeeyo. Ntakhara heeni? Nthowa nawi alapeli a Muluku oothene ananwerya wiisoona mmukhalelo yoola, moohipwacha waakhanle wi aathanliwa ni munepa waweela naari hooye. Nave orweela wa munepa awe waweela, Yehova onanwerya omvaha mulapeli awe ori oothene owerya ntoko yoola, moohipwacha sa ewehereryo awe. Mweeparipari, mwaarimwi mwiikohaka waakhanle wi moothanliwa ni munepa waweela, minikwa ntoko seiya inooniherya wi  hamwiicaniwe wi muye wirimu. Yaale yiichaniwe ni Yehova, haniikoha waakhanle wi aathanliwa ni munepa waweela naari hooye! Awo annasuwela!

15. Nnasuwela hai wi tahi wi oothene yaale yaakhenle munepa waweela wa Muluku anahaala oya wirimu?

¹⁵ Mpiipiliyani, sookhalamo sootakiherya sa alopwana oororomeleya yaawo yaakhenle munepa waweela; nto, hiyaarino ewehereryo ya okhala wirimu. Tavite aahihooleliwa ni munepa waweela. (1 Sam. 16:13) Munepa waweela waahimukhaviherya Tavite wiiwexexa ichu sawiiseela vooloca sa Yehova, nave waahimuhoolela orepa makupa makina a Piipiliya. (Mar. 12:36) Naamwiihiiha, murummwa Petro aahiloca wi “Tavite haawenle wirimu.” (Saw. 2:34) Yohani Mpatisi ‘aasareya munepa waweela.’ (Luka 1:13-16) Yesu aalonce wi haarivo mutokweene ompwaha Yohani, nyenya voocharela Yesu aahiloca wi Yohani haahaala opaka makupa mu Omwene wawirimu. (Mat. 11:10, 11) Yehova aahipharihela munepa awe waweela wi aavahe alopwana yaala wi epake ichu sootikhiniha, nyenya owo haapharihenle munepa yoowo wi aathanle ntakhara oya wirimu. Apwanne ela enooniherya wi awo yaarino nroromelo vakhaani waapwaha yaale athanliwe wi eye wirimu? Tahi yeeyo. Pahiru ela enooniherya wi Yehova onahaala waaviiha awo wi ekhale ni ekumi mu Parataiso veelaponi yavathi.—Yoh. 5:28, 29; Saw. 24:15.

16. Ewehereryo taani alapeli ancipale a Muluku aryaayano olelo?

¹⁶ Alapeli a Muluku ancipale veelaponi yavathi, hiyaanono ewehereryo ya oya wirimu. Hiiha ntoko Aparahamu, Sara, Tavite, Yohani Mpatisi, ophitaanyerya alopwana ni athiyana akina a elukuluku yakhalai, awo yaawehererya okhala ni ekumi veelaponi yavathi elukuluku Omwene wa Muluku waahaalaaya waalamulelaka.—Ahe. 11:10.

17. Makoho taani nnahaalaahu waakhula mmwaha onacharela?

¹⁷ Olelo, aakhalavo anna ni arokora oothanliwa ni munepa waweela veeri vahu, mwawiihiiha nnanwerya wiipakela makoho oohiyanahiyana. (Wup. 12:17) Ntoko yootakiherya, muchu othanliwe onaphwanela wiisoona hai? Wakhala wi muchu mmulokoni mwanyu oopacerya olya ephaawu ni owurya eviinyu va Mukonelo, munaphwanela omukhalihaka hai? Hanka wakhala wi waaca wa achu yaale analoca wi aathanliwa ni munepa waweela anamvira yaaceereryeyaka? Apwanne munnaphwanela wuukhuwa nthowa na yeeyo? Nnahaala waakhula makoho yaala mmwaha onacharela.