MPIIPILIYANI, ninnaalakhanya miyaha sa achu ororomeleya yaawo ‘yaari ntoko yeehu.’ (Tiy. 5:17) Ntoko yootakiherya, hiyaano ninniiwexexa yeeyo Paulo aachuneiye oloca mu Aroma 7:21-24: “Kaakhwelaka weera yaphaama, yoonanara tenaphwanyeya. . . . Ii, ka muchu ootakhaliwa!” Ikwaha ikina ohiphaameya wahu onnaneeriha okhala ooceecheya. Nyenya ninnatepa okhala oolipiheya osuwela wi Paulo, muchu yoowo aari oororomeleya, aanoona tho mmukhalelo yoola.

Paulo ooloca tho miyoonelo mikina. Mu Galasya 2:20, owo ooloca ni murima awe woothene wi Yesu ‘omukhwenle, iiveleela mwaneene wa nthowa na yoowo.’ Hanka nyuwaano? Munnoona okhala woovila weemererya yeela?

Akhweya munnuukhuwa nthowa na soocheka mpankaanyu khalai. Vaavaa muupuwelo yoola onakhumelelaaya, onamukhala woovila weemererya wi Yehova onnoosivelaani chiryene nave wi oolevelela soocheka sanyu. Voocharela, onnakhala woovila woona woopola ntoko yoovaha yasisapo wa nyuwaano. Apwanne ti yeeyo chiryene Yesu onachuneiye wi muupuweleke—wi mukucho yoovaha yasisapo wa nyuwaano? Tiheeni eni yookhaviheryeeni wuupuwela hiiha?

Aai, Yesu onachuna wi mooneke mukucho ntoko yoovaha wa nyuwaano. Nnasuwela hai yeela? Muupuwele yaweereya enaphwanyeya mu Luka 23:39-43. Mulopwana mmoha okhomeliwe vamwirini woohoosa mmakupa a Yesu. Owo onneemererya wi oopaka echu yoonanara—woonaru echu opankeiye etokweene, woona wi okhwa vamwirini woohoosa waari olakiwa wa achu yaawo yaapaka soocheka itokotoko. Athananaka nthowa na ohooxeya wawe, mulopwana ola onnaloca ni Yesu: “Mukuupuwele miyo murwaaka mu omwene anyu.”

Tiheeni Yesu enreiye? Mutitelele wuupuwela: Arukunuwelaka weiwo oriwo mulopwana, owo onnanweha. Naamwi ahaalaka vakhaani okhwa, Yesu onnatheya nave onnamuroromeliha mulopwana ole: “Eparipareene kinnooleela olelo: Onarwa okhala ni miyo Mparataiso.” Yesu aanwerya omuupuserya mulipa awiipha ole wi “mwaana a muchu haarweele olampwa nto waalapela achu ni ovaha okumi awe wi awoopole ancipale.” (Mat. 20:28, TNM) Nyenya Yesu aahooniherya oreera wawe murima nave amuleela mookwakwaleya mulopwana ole mukhalelo mukucho waahaalaaya omukhaviherya. Ninnawerya wiiwexexa phaama yeela woona wi Yesu aapharihenle masu awi “onarwa okhala ni miyo.” Nave Yesu aahiloca mukhalelo mukucho awe waahaalaaya oruuha mphurelo wa mulopwana ole: Ekari ya okhala mparataiso veelaponi yavathi.

Moohikhwa minikwa, Yesu aachuna wi mulopwana ole oone mukucho ntoko yoovaha yasisapo xaxaxa ntakhara yene. Waakhanle wi Yesu aahimmorela ikharari mulopwana ole ahaarino ekari ya omurumeela Muluku, mweeparipari onahaala woona mmukhalelo woolikana vooloca sa Mukristu oopatisiwa yoowo onamurumeela Muluku. Vano tiheeni eni yookhaviheryeeni weemererya ni murimaanyu woothene wi Yesu okhwile ntakhara nyuwo?

Yesu amvaha Paulo muteko wa olaleerya. Eyo yaahimukhaviherya Paulo ororomela wi Kristu chiryene  aakhwile ntakhara yene. Paulo oothariha: “Kinnamuthamalela Kristu Yeesu Apwiyaahu yoowo aakivanhe ikuru, akeera oororomeleya akinnyereryaka muteko. Khalai kaari oomunyemula Muluku, oowiikara achu awe, ni awiikhoma.” (1 Tim. 1:12-14) Paulo aahaakhela “muteko [naari orummwa]” naamwi owo aapanke ichu sootakhala khalai. Eyo yaahimweeriha ororomela wi aaleveleliwa soocheka sawe nave wi Yesu anamusivela ni omuroromela yene. Yesu, oonivaha tho muteko wi nlaleerye. (Mat. 28:19, 20) Apwanne eyo enanwerya onikhaviherya hiiha ntoko yaamukhavihenryaaya Paulo?

Moone yaweereya ya Alpertu. Owo aahiikariwa mmulokoni iyaakha waacamela makhumi mararu naxexe nave ookookela mmulokoni hiihaanoru, nyenya ikwaha ikina onakhala woovila ocuwala ichu seiyo opankeiye khalai. Owo onnathariha: “Soocheka saka nlelo inakhala vamiithoni vaka. Nyenya vaavaa kinakhalaaka mmuteko woolaleerya, kiniisoona ntoko murummwa Paulo. Kinoona wi Yesu mwaneene ookivaha muteko. Eyo ennakeeriha okhala oohakalala nave ennakikhaviherya okhalano moonelo waphaama vooloca sa miyo mukhataaka, mu ekumi aka ni omwaahiyu.”—Sal. 51:3.

Alani, aari mulipa awiipha ni oowali ahaakumve ohuserya eparipari. Owo onneemererya: “Miyaano nlelo kinnuupuwela sootakhala soothene kaapakenlaaka achu akina. Ikwaha ikina, eyo ennakiruuhela othanana. Nyenya kinnamuthamalela Yehova ompharihela mulipa ocheka ntoko miyaano wi alaleerye michaka saphaama. Woona mukhalelo achu anaakhulelaaya vaavaa aniiwaaya michaka saphaama ennakeriha wuupuwela wi Yehova taphaama ni oosivela. Miyaano kinnoona wi owo onnakipharihela wi kaakhaviherye akina arino mukhalelo wookumi ntoko yoole kaaryaakano khalai.”

Vaavaa nnakhalaahu mmuteko woolaleerya, hiyaano nnatikitheryeya mu saweera ni muupuwelo woophwanelela. Olaleerya onnaneeriha ororomela wi Yesu taikharari ni oosivela navetho wi owo onnaniroromela.

Vaavaa nnakhalaahu mu elapo yeela yootakhala, nnamphiyera okhala oothanana nthowa na soocheka nipankaahu khalai. Vano tiheeni eni enikhaviherye ovootha moonelo yoowo?

Jean, yoowo oniisoona okhalano nthowa, vooloca sa meecelo aareiyeno ari mwali, ooloca: “Ennakisivela yoorepa eni ‘Muluku ti mutokotoko opwaha murima ahu.’” (1 Yoh. 3:19, 20) Wakhala wi munnathanana ntakhara soocheka sanyu sakhalai, muupuwelele wi Yehova vamoha ni Yesu anniiwexexa phaama ohiphaameya wahu onipwaha hiyo. Muupuwelele tho wi moosivela aavahererya mukucho, ohiiya ntakhara achu oophaameya, nyenya ntakhara achu oocheka nave anacharuwa.—1 Tim. 1:15.

Nyuwaano tho munanwerya omaaliha murima anyu ni eparipari yeela yasisapo. Mwa yeeyo, mvekele nave muupuwelele mukhalelo Yesu aakhalinheiye achu ohiphaameya nave mpake owetha wanyu wi mwaakhwaniherye orummwa yoowo Yesu oovanheiyeni. Mweerano hiiha, nyuwaano munanwerya oloca hiiha ntoko Paulo: Yesu “okikhwenle, iileva mwaneene wa nthowa na miyo.”