1-2. (1) Ntakhara heeni hannaphwanela okhala ootikhina wakhala wi muteko ahu onnawatiihiwa? (2) Tiheeni nnahaalaahu othokororya mmwaha yoola?

MU 2018, alaleeryi opwaha 223.000 yaakhala mu ilapo mwemmo miteko sahu soothene naari mikina iwatiihiwaayamo. Eyo henantikhiniha! Ntoko noonnaahu mmwaha ovirale, Akristu eeparipari aasuwela wi anahaala waavyaavyiwa naari wiiciwa. (2 Tim. 3:12) Moohipwacha nipuro nnakhalaahuwo, mu elukuluku vyakala alamuleli ananwerya onihiiha omulapela Muluku ahu oosivela, Yehova.

² Wakhala wi weiwo munakhalaanyuwo alamuleli aalakelela owatiiha omulapela Yehova, akhweya munamwiikoha: ‘Apwanne nniiciwa nthowa nawi Muluku hananeemererya? Apwanne ohiiheryiwa onahaala owerya omaliha omulapela wahu Yehova? Apwanne kinnaphwanela othaamela elapo ekina weiwo kineeraaka kimulapeleke Muluku mootaphuwa?’ Mmwaha yoola, nnahaala waakhula makoho yaala. Nnahaalatho othokororya mukhalelo nneeraahu ntitelele omulapela Yehova wakhala wi muteko ahu woowatiihiwa ni yeeyo nihinaphwanelaahu opaka.

3. Mwawiiwanana ni 2 Korinto 11:23-27, wiica taani murummwa Paulo ohoolenleiye naamwi aari mulapeli oororomeleya a Muluku?

³ Muupuwelo woonanara onahaala okhumelela vaavaa muteko ahu onawatiihiwaaya ni ophiyerya makuchuwelo wi Muluku onnaviihavo mareeliho awe wa hiyo. Nyenya muupuwele wi wiiciwa henataphulela wi Yehova hanasiveliwa ni muteko ahu. Moone yootakiherya ya murummwa Paulo. Moohikhwa minikwa, owo aaheemereryiwa ni Yehova. Paulo aahikhalano ekari ya orepa ikaarata khumi nasese seiyo sinapaka makupa a Soorempwa sa Ekiriki Seekristu, nave owo aahithanliwa wi apake muteko  wavameekhaaya, orumeela ntoko murummwa a maloko aachu. Moohipwacha soothene seiha, Paulo aahihoolela wiica wawaaca. (Mwaalakhanye 2 Korinto 11:23-27.) Yootakiherya ya murummwa Paulo ennanihusiha wi Yehova onanwerya weemererya wi alapeli awe oororomeleya yaavyaavyiwe.

4. Ntakhara heeni nniciwaahu ni achu eelapo?

⁴ Yesu oothariha ntakhara heeni nnaphwanelaahu oweherya wiiciwa. Owo olonce wi naahaala wiiciwaka nthowa na ohipaka makupa eelapo. (Yoh. 15:18, 19) Eyo ti wi, wiiciwa tahi eneneeryo ya oyeleela weemereryiwa ni Yehova. Moohiyana, eyo enooniherya wi nnapaka yeeyo eri yawookololowa!

5. Apwanne achu annawerya omaaliha omulapela wahu Yehova? Mutharihe.

⁵ Haavo muchu orino owerya wa omaaliha omulapela wahu Muluku Aikuru Soothene. Ophiyerya wi ancipale aheererya, nyenya aapwata. Muupuwele yeeyo yeeren’ye variyari va Ekhoco Yanaawiili ya Elapo Yoothene. Alamuleli ancipale mu elukuluku yeele yaahiwiica vancipale achu a Muluku. Muteko ahu waahiwatiihiwa ohiya pahiru ni epartitu Nasista yo Alemanya, nyenyatho ni alamuleli o Australiya, o Kanata ni ilapo ikina. Apwanne eyo yaahakanyerya muteko ahu woolaleerya? Hooye, moone wi mu 1939, eyaakha yeeyo ekhoco Yanaawiili yaapacenryaaya, yaarivo alaleeryi awaakhwana 72.475 mu elapo yoothene. Nyenya soolokoha sinooniherya wi mu 1945, eyaakha yeeyo ekhoco yaamanlaaya, yaahikhalavo alaleeryi awaakhwana 156.299. Ni mareeliho a Yehova, numero na alaleeryi naahaaceereryeya opwaha ikwaha piili!

6. Ichu taani saphaama sinahaala weereya vaavaa muteko ahu onawatiihiwaaya? Mvahe yootakiherya.

⁶ Ohiya okhala awoova, wiiciwa onamuniceenyerya omurumeela Yehova moopwaha. Moone yootakiherya ya mutheli yoowo aarino mwaana amwaamulopwana mukhaani. Awo yaakhala mu elapo yeeyo alamuleli yaawatiihaaya muteko ahu. Mutheli aanwerya okhala a woova, nyenya moohiyana tiithi vamoha ni mwaariye yaahipacerya orumeela ntoko mapiyoneero a elukuluku yoothene. Ophiyerya wi muthiyana aahihiya muteko, naamwi waamvaha ikhorowa sincipale. Iyawe olonce wi owatiihiwa muteko waahiweeriha achu okhalano nchuno na osuwela vooloca sa Anamoona a Yehova. Mwa yeeyo, waari wookhweyasa opaceryiha soohuserya. Omaalihiwa muteko onanweryatho waavolowela akina mmukhalelo woophwanelela. Mutokweene a muloko a elapo yeele olonce wi yaale yaari  oocecheya yaahikookela ophwanyeya mmithukumano ni mmuteko woolaleerya.

7. (1) Tiheeni nnahuseryaahu mu Onamukutxho 26:36, 37? (2) Tiheeni mulakelenlaanyu opaka muteko ahu wawatiihiwa?

⁷ Amwiicani ahu anachuna onoopopiha wi nihiye omurumeela Yehova. Mwa yeeyo, ohiya pahiru ohiiha muteko ahu, awo annamwaryamwasa miyaha sawootha, waaruma mapilisa ophiya mmavaate mwahu, onikeriha mmapuro oothoriha naari ophiyerya waawalela akina a hiyo mukalaposo. Amwiicani ahu anuupuwela wi, pahiru waawalela akina a hiyo mukalaposo enahaala owerya onoopopiha. Wakhala wi nooheemererya wi awo eneerihe okhala awoova, nnahaala okhala va yawoopiha ya ovukula omurumeela wahu Yehova naari ohiya moomalela. Hannachuna okhala ntoko yaale anatharihiwa mu Onamukutxho 26:36, 37. (Mwaalakhanye.) Niheemererye wi woova oneerihe ovukula mvai ahu. Hiyo ninnamuroromela Yehova mwawaakhwanela nave hinni neemererye okhala oothukumela. (Isa. 28:16) Ilukuluku soothene nnahaala ovekelaka wa Yehova wi anivahe ohoolela wawe. Noosuwela wi, wakhala wi ori mmakupa ahu, haavo mulamuleli aachu ooweryasa onahaala onihiiha omulapela Muluku ahu moororomeleya.—Ahe. 13:6.

8-9. (1) Yoolakelela taani miru sa ichoko naari mmoha ti mmoha a hiyo onaphwaneleiye opaka? (2) Tiheeni enahaala omukhaviherya muchu opaka yoolakelela yaphaama?

⁸ Wakhala wi alamuleli a elapo anyu aahiiha muteko ahu, akhweya munamwiikoha waakhanle wi hiyaahaala okhala yaphaama othaamela mu elapo ekina weiwo oriwo otaphuwa wawaaca. Eyo yoolakelela ya muchu ti muchu. Akina annoona okhala yaphaama ohuserya yeeyo Akristu a nsana noopacerya yaapankaaya vaavaa yaapacenryaaya wiikariwa. Mahiku vakhaani amanle wiiphiwa Estevawu, arummwa o Yerusalemu yaaya mu ilapo so Yuteya ni Samariya, ophiyerya wi yaahichawela mu mapuro oorakamela, ntoko Fenisiya, Xipre ni Antiyokeya. (Mat. 10:23; Saw. 8:1; 11:19) Nyenya Piipiliya onnaloca tho wi, mu ekwaha ekina ya wiikariwa wa Akristu mu nsana noopacerya, murummwa Paulo aahilakelela ohikhuma mmiceche seiho waariwo wiica. Owo aahilakelela ohela va yawoopiha okhapeleleya wawe wi amwaramwase michaka saphaama ni waalipiha anna yaakhala mu ipooma seiho waariwo wiica.—Saw. 14:19-23.

⁹ Saweereya seiha tiheeni inanihusihaaya? Othaama naari ohithaama yoolakelela enaphwanela opakiwa ni muru wa echoko. Ahaakumve olakelela, onaphwanela ovekela wa Yehova nave avareryele mukhalelo wa emusi awe, uupuwelaka phaama sookhumelela saphaama ni soonanara seiho othaama onahaalaaya okumiherya. Mmiyaha sintoko seiya, Mukristu ti Mukristu onaphwanela ‘oteexa murici awe.’ (Gal. 6:5) Hannaphwanela waathoriha akina wakhala wi aapaka yoolakelela yoohiyana ni yawihu.

10. Sooleeliherya taani Efiliyale ni asitokweene a muloko anahaalaaya ovahererya?

¹⁰ Wakhala wi muteko ahu woowatiihiwa, nni ntitelele hai omurumeela Yehova? Efiliyale enahaala oloca ni asitokweene a miloko ni waavahererya sooleeliherya ni ikano mmukhalelo nnahaalaahu waakhelaka yoolya yoomunepani, mukhalelo wa opaka mithukumano ni olaleerya. Wakhala wi Efiliyale helonce ni asitokweene a miloko, vano asitokweene anahaala wookhaviheryaani nyuwo ni anna oothene a muloko otitelela omulapela Yehova. Awo anahaala ovahererya ikano sinathipeleya Mpiipiliyani ni mu soolaleeryiwa sahu.—Mat. 28:19, 20; Saw. 5:29; Ahe. 10:24, 25.

11. Ntakhara heeni munnaroromela wi hamurwa muthoiwa yoolya yoomunepani, nave tiheeni munaphwanelaanyu opaka wi mukhapelele?

 ¹¹ Yehova oolaiherya wi alapeli awe herwa ethoiwa yoolya yoomunepani. (Isa. 65:13, 14; Luka 12:42-44) Mwa yeeyo, muroromele wi marehereryo a Yehova anahaala opaka soothene wi evahererye yeeyo munachunaanyu wi mutitelele okhala oororomeleya. Nyenya tiheeni munaphwanelaanyu weera? Muteko wawatiihiwa, mwaavye nipuro nookhapeleleya wi mumvithevo Piipiliya anyu ni soolaleeryiwa soothene muryaanyuno. Mukhaleno ekaasoope wi muhihiye ichu seiha sasisapo mmapuro yaawo onahaala okhala wookhweya ophwanyiwa, moohipwacha waakhanle sawimprimiriwa naari samukhankoonyani. Mmoha ti mmoha onaphwanela osuwela echu ya opaka wi atitelele okhala oolipa omunepani.

12. Asitokweene eni erehererye hai mithukumano wi akina ehikhwe minikwa?

¹² Nave tiheeni enahaala weereya ni mithukumano sahu? Asitokweene anahaala opaka marehereryo wi muwerye ophwanyeya mmithukumano achu akina ehisuwenle. Awo anamoolelaani othukumana mmakhuuru makhaani nave ananwerya otoroka nipuro ni elukuluku ya mithukumano mu ikwaha sincipale. Wi mukhaviherye okhapeleleya wa annihu, yaamukhala yaphaama oloca vathivathi vaavaa munaphiyaanyu mmithukumano naari murowaka. Navetho, wi akina ehikhwe minikwa, yaamukhala yaphaama ohiwara ikuwo soophwanelelasa.

13. Tiheeni nnahuseryaahu ni yootakiherya ya annihu o Uniyawu Soviyetika?

¹³ Vano hanka muteko woolaleerya? Mikhalelo sinanwerya okhala soohiyana mwawiiwanana ni mpuro. Nyenya hiyo ninnamusivela Yehova nave ninnasiveliwa oloca ni achu sa Omwene; mwawiihiiha, nnahaala ophwanya mukhalelo wammoori wa olaleerya. (Luka 8:1; Saw. 4:29) Ti yeeyo annihu o Uniyawu Soviyetika akhalai yeenraaya. Moone yeeyo mulipa ooloca miyaha Emily Baran olonceiye sa yaawo: “Vaavaa alamuleli yaaloncaaya wi Anamoona a Yehova hanaphwanela oloca sa nroromelo naya wa akina, awo yaahipacerya ovaanela ni asinthamwene, amwaacamani, ni yaawo yaalapaayano. Nave vaavaa yaarumiheliwaaya mu mapuro a miteko vooloca sa ovaanela weiwo, Anamoona a Yehova yaaheererya waalekecha alipa oophariwa akina.” Moohipwacha owatiihiwa muteko, annihu o Uniyawu Soviyetika hiyaamaanle olaleerya. Wakhala wi alamuleli a elapo anyu aahiiha muteko woolaleerya, mweere ntoko annihu yaawo: muhimaale olaleerya!

14. Salumu 39:1 onanikhaviherya ohimorela mmuraakho taani?

¹⁴ Mukhaleno ephoole ni yeeyo munaalelaanyu akina. Variyari va owatiihiwa muteko, nnaphwanela osuwela teevi eri “elukuluku yoomaala.” (Ekle. 3:7) Sooleeliherya ikina sinakhala sawiiphini nave nnaphwanela wiipithiha. Ntoko yootakiherya, masina a anna, mapuro a mithukumano sahu, mukhalelo nnalaleeryaahu  ni mukhalelo nnaakhelaahu soolaleeryiwa. Hinni nloce sa seiho wa ahooleli a alamuleli, naari mano wa asinthamwene naari amusi ahu anakhala mu elapo ahu naari mu ekina. Wakhala wi noomorela mmuraakho yoowo, nnahaala waahela annihu va yawoopiha.—Mwaalakhanye Salumu 39:1.

15. Tiheeni Satana onahaaleiye weererya opaka wa hiyo, nave tiheeni enahaala onikhaviherya ohimorela mmuraakho yoowo?

¹⁵ Muheemererye makacamiho makhaani onikawanya. Satana oosuwela wi empa yookawanyeya henawerya okhala yaweemela. (Mar. 3:24, 25) Owo onahaala opaka owetha wawe wi aruuhe okawanyeya variyari va anna. Owo onachuna wi niicaneke yeehuyeehu ohiya omwiica yene.

16. Yootakiherya taani yaphaama murokora Gertrud onihiyenryeiye?

¹⁶ Ophiyerya tho arokora yaawo arino mavyakelo anaphwanela okhalano ekaasoope wi ehuuwele mmuraakho yoola. Moone yootakiherya ya arokora eeli oothanliwa ni munepa waweela, Gertrud Poetzinger ni Elfriede Löhr. Awo ni arokora akina yaahiwaleliwa vamoha mu nipuro naachu oophariwa o nasista. Elfriede aahikhalano yookhovelela ya operekha miyaha wi aalipihe arokora akina yaaphariwe. Nyenya eyo yaanamweeriha Gertrud okhalano nrima. Voocharela Gertrud aahuuliheya muru ni yeeyo nave aahimveka Yehova wi amukhaviherye wi ahiisooneke hiiha. Owo oorepa: “Hiyo nnaphwanela ohuserya weemererya vaavaa akina anakhalaayano mavyakelo naari mirici mincipale onipwaha hiyo.” Gertrud aavoontheiye hai nrima? Owo aaheererya otikitherya muupuwelo awe mu mikhalelo saphaama sa Elfriede ni mukhalelo awe woonthamwene. Mwa yeeyo, awo yaakookela okhala asinthamwene aphaama. Ooweeli yaahikophola mu nipuro na alipa oophariwa nave yaahimulapela Yehova moororomeleya ophiyerya omakuchuwelo wa ikumi saya veelaponi ya vathi. Tiheeni nnahuseryaahu ni yootakiherya aya? Wi nihithoowele mmuraakho yoola wa okhala ookawanyeya, nnaphwanela wiilipiserya vancipale omaliha ohiiwanana yoowo nryaahuno ni annihu.—Kol. 3:13, 14.

17. Ntakhara heeni ilukuluku soothene ninnaphwanela wiiwelela sooleeliherya sa marehereryo a Yehova?

¹⁷ Ilukuluku soothene muchariheke ohoolela. Anna arino mirici nave ari oororomeleya anahaala onivahererya sooleeliherya sammoori, nave ti woochuneya ochariha. Neerano hiiha nnahaala osepa makacamiho. (1 Ped. 5:5) Ntoko yootakiherya, mu elapo emoha weiwo muteko ahu owatiihiwaayawo, anna yaarino mirici yaahaavyakiha alaleeryi wi ehikaweke mmuteko woolaleerya soolaleeryiwa sawimprimiriwa. Nyenya piyoneero mmoha, uupuwelaka wi aasuwela sincipale waapwaha akina, aahititelela okawa soolaleeryiwa mmuteko woolaleerya. Teevi yaari yookhumelela? Nihiku nimoha,  amanle ovaha onamoona woohilakelela, piyoneero ole vamoha ni anna akina yaahiphariwa ni mapilisa. Mwawooneya, mapilisa yaanaachara annihu nave yaawerya okusa soolaleeryiwa soothene seiyo yaakanwaaya. Tiheeni nnahuseryaahu mu yaweereya yeela? Nnaphwanela wiiwelela sooleeliherya soothene nnaakhelaahu, naamwi nihiiwexexaka seiyo. Ilukuluku soothene Yehova onahaala onireeliha wakhala wi ninnawiiwelela anna yaale owo aathanlileiye wi enihooleleke.—Ahe. 13:7, 17.

18. Ntakhara heeni hannaphwanela opaka malamulo oohiphwanelela?

¹⁸ Muhipake malamulo oohiphwanelela. Wakhala wi atokweene aavahererya malamulo oohiphwanelela, awo anahaala waavaha anna murici woolimela. Munna Juraj Kaminský onnuupuwela yeeyo yeeren’ye vaavaa muteko ahu waawatiihiwaaya o Tchecoslováquia akhalai: “Emanle owaleliwa anna yaarino mirici ni atokweene ancipale, akina yaawo yaahanle ehoolelaka miloko ni ikulucu yaapacerya waalamulela alaleeryi malamulo vooloca sa meecelo, epakaka elista wa yeeyo yaaphwanela opakiwa ni ohipakiwa.” Yehova hanivanhe owerya wa waapakela soolakelela akina. Yoole onaapakela akina malamulo oohiphwanelela hanaakhapelela anna—mweeparipari, muchu owo, oneererya okhala mukaneene a nroromelo na anna.—2 Kor. 1:24.

19. Mwawiiwanana ni Matharihelo 32:7, 8, ntakhara heeni hannaphwanela woova miraakho sa Satana?

¹⁹ Mwiicani ahu mutokotoko, Satana Musaserya, harwa ahiya owaavyaavya alapeli oororomeleya a Yehova. (1 Ped. 5:8; Wup. 2:10) Satana ni akhaviheryi awe anahaala weererya onihiiha omulapela Yehova. Nyenya hannaphwanela weemererya wi woova onimaalihe. (Malam. 7:21) Yehova ori mmakupa ahu, nave owo onahaala otitelela onikhaviherya naamwi muteko ahu owatiihiwe.—Mwaalakhanye 2 Matharihelo 32:7, 8.

20. Tiheeni mulakelenlaanyu opaka?

²⁰ Mwawiihiiha, mulakelele hiiha ntoko annihu a nsana noopacerya. Awo yaahiloca wa alamuleli a elukuluku aya: “Muthorihe waari waphaama vamiithoni va Muluku, owiiwelelaani nyuwo opwaha omwiiwelela Muluku. Hannawerya ohiya oloca yeeyo niiwalaahu ni noonnaahu.”—Saw. 4:19, 20.