1. Ntakhara heeni ninnachuna wiirehererya ntakhara wiiciwa?

MU OHIYU Pwiya ahu Yesu ahaakumve wiiphiwa, owo aahiloca wi oothene yaale yaahaala othanla okhala oomuchara awe yaahaala wiiciwaka. (Yoh. 17:14) Ophiyerya tho mmahiku ahu yaala, Akristu oororomeleya, Anamoona a Yehova annaavyaavyiwa ni yaale anaakaaha malapelo eeparipari. (2 Tim. 3:12) Vaavaa makuchuwelo a mukhalelo yoola wa ichu anaacamelaaya, ninnaweherya wi amwiicani ahu anahaala onaakaaha moopwahasa.—Mat. 24:9.

2-3. (1) Tiheeni nnaphwanelaahu osuwela vooloca sa woova? (2) Tiheeni nnahaalaahu othokororya mmwaha yoola?

² Tiheeni nnaphwanelaahu opaka hiihaano wi nikhale ooreheryeya ovootha wiiciwa? Hinnawerya waanyiherya ichu soothene sinahaala onikhumelela. Wakhala wi ninnuupuwela ichu soothene soonanara inahaala onikhumelela, nnamusareya woova ophiyerya omaala omurumeela Yehova naamwi nihaakumve ohoolela nikacamiho. (Masi. 12:25; 17:22) Woova, nivaka noowerya nenlo ‘mwiicani ahu Musaserya’ oneereryeiye opharihela ntakhara hiyo. (1 Ped. 5:8, 9) Tiheeni nnaphwanelaahu opaka hiihaano, wi niirehererye ntakhara wiiciwa?

³ Mmwaha yoola, nnahaala othokororya mukhalelo nnahaalaahu olipiha onthamwene ahu ni Yehova nave ntakhara heeni oryaaya woochuneyaxa opaka yeeyo hiihaano. Nnahaala tho othokororya yeeyo nnaphwanelaahu weera wi nlipihe nroromelo nahu. Nave vookuchulani, nnahaala othokororya yeeyo nnaphwanelaahu opaka elukuluku achu ananiicaaya.

4. Mwawiiwanana ni Ahebri 13:5, 6, tiheeni nnaphwanelaahu ororomela nave ntakhara heeni?

⁴ Mukhale oolekecheya wi Yehova onnoosivelaani nave wi harwa oohiyaani. (Mwaalakhanye Ahebri 13:5, 6.) Mu iyaakha  ivirale, Mulipeleli aahithariha: “Muchu onamusuwela phaama Muluku onahaala omuroromela yoowo moopwahasa mu elukuluku oneehiweiye.” Ela eparipari! Wi nikhumelele phaama mu yaweeha, nnaphwanela omusivela ni omuroromela Yehova moomalela nave nihirwe nikhwe minikwa wi Owo onnanisivela.—Mat. 22:36-38; Tiy. 5:11.

5. Tiheeni enahaala wookhaviheryaani woona osivela wa Yehova?

⁵ Mmwaalakhanyeke Piipiliya nihiku nnihiku ni yoolakelela ya omwaacamela Yehova. (Tiy. 4:8) Elukuluku munamwaalakhanyaanyu Piipiliya, mutikitheryeye mu mikhalelo saphaama sa Yehova. Moone osivela ni niphwanya nawe orweela mu ichu olonceiye ni onapakeiye. (Muk. 34:6) Wa akina onamukhala woovila weemererya wi Muluku onnaasivela nthowa nawi hatonko wooniheryiwa osivela. Waakhanle wi munnahoolela nikacamiho ntoko nenla, mweererye opaka elista nihiku ti nihiku mmukhalelo Yehova onooniheryeiye ikharari ni oreera murima ntakhara nyuwo. (Sal. 78:38, 39; Aro. 8:32) Vaavaa munathokororyaanyu saweereya sanyu ni wuupuwelela yeeyo mmanlaanyu waalakhanya mu Masu a Muluku, munanwerya orepela ichu sincipale seiho Yehova oweerenleiyeni. Wakhala wi munnamaliha elukuluku yincipale muthamalelaka yeeyo Yehova onapakeiye, onthamwene anyu ni yoowo onamukhala woolipa.—Sal. 116:1, 2.

6. Mwawiiwanana ni Salumu 94:17-19, mavekelo oorweela vathi va murima eni yookhaviheryeeni hai?

⁶ Mvekeleke moohihiyererya. Nkamuupuweleeni ponkwe yoowo okhupaareliwe moosivela ni apapa awe. Ponkwe onniisoona okhala ookhapeleleya nave onnakhala ootaphuwa oloca wa apapa awe ichu saphaama ni soonanara seiyo simweerenle mu nihiku nenle. Nyuwo munanwerya opuha onthamwene woolikana wakhala wi munnamwaacamela Yehova nihiku nnihiku moorweela mu nivekelo noorweela vathi va murima. (Mwaalakhanye Salumu 94:17-19.) Elukuluku munavekelaanyu wa Yehova, ‘muhule murima anyu’ nave mmuleele Tiithinyu oosivela vooloca sa woova ni sawuukhula sanyu soothene. (Wik. 2:19) Teevi enahaala okhala yookhumelela? Nyuwo munahaala olawiha yeeyo Piipiliya oniichaneiye “murecele wa Muluku, yoowo opwanhe wuupuwela wahu woothene.” (Fil. 4:6, 7) Wakhala wi munnavekela moohihiyererya, munahaala okhala vakhiviru va Yehova.—Aro. 8:38, 39.

7. Ntakhara heeni munaphwanelaanyu okhala oolekecheya wi soororomeliha Muluku opankeiye vooloca sa Omwene awe sinahaala waakhwanela chiryene?

⁷ Mukhale oolekecheya wi mareeliho a Omwene wa Muluku anamurwa chiryene. (Nam. 23:19) Wakhala wi munuupuwela wi soororomeliha sa Muluku hiseereya, enamukhala yookhweya wa Satana ni achu awe wooceecheihani. (Masi. 24:10; Ahe. 2:15) Muni mulipihe hai nroromelo nanyu mu Omwene wa Muluku hiihaano? Mmaliheke elukuluku muhuseryaka soororomeliha sa Muluku vooloca sa Omwene ni mukucho awe nave ntakhara heeni munaphwanelaanyu okhala oolekecheya wi mareeliho awo anamurwa chiryene. Weerano  yeeyo eni yookhaviheryeeni hai? Muthokororye yootakiherya ya Stanley Jones, yoowo aawaleliwe mu iyaakha thanu napiili, nthowa na nroromelo nawe. * Tiheeni yaamukhavihenrye okhala oolipa munroromeloni? Owo ooloca: “Kaalipiheya orweela mwa osuwela sa Omwene wa Muluku, olekecheya mwa yeeyo, ohikhalano minikwa, ni okhala aweemeleleya.” Wakhala wi moolipiha nroromelo nanyu mu soororomeliha sa Muluku, munahaala omwaacamela Yehova nave hamuni mukhale awoova.—Masi. 3:25, 26.

8. Moonelo ahu vooloca sa mithukumano yawooniherya yaphaama ya eheeni? Mutharihe.

⁸ Muhicompeleke mithukumano Seekristu. Mithukumano sinnanikhaviherya omwaacamela Yehova. Ophwanyeya wahu mmithukumano yawooniherya yaphaama wi nnahaala okhumelela phaama vaavaa nneeraahu nihoolele wiikariwa muhoolo. (Ahe. 10:24, 25) Ntakhara heeni? Wakhala wi ninneemererya wi makacamiho makhaani enooceelihe ophwanyeya mmithukumano hiihaano, tiheeni enahaala weereya ni hiyo muhoolo vaavaa oneeraaya ochuneye wiihela va yawoopiha wi nthukumane vamoha ni anna ni arokora ahu? Mmakupa makina, wakhala wi noolakelela ophiyaka mmithukumanoni, hinnahaala ohiya wakhala wi amwiicani ahu anneererya onihiiha othukumana vamoha. Ela elukuluku ya wiikhoveleliha osiveliwaka ni mithukumano. Wakhala wi ninnasivela mithukumano, hiwaavovo wiica, naari nlamulo na alamuleli nnahaala onimaaliha omwiiwelela Muluku opwaha achu.—Saw. 5:29.

9. Ntakhara heeni wuupuwelela soorepa oryaaya mukhalelo waphaama wa wiirehererya ntakhara wiiciwa?

⁹ Muupuwelele soorepa sanyu sa vamurimani. (Mat. 13:52) Muupuwelo anyu tahi woophaameya, nyenya Yehova onamoovahaani munepa awe waweela wooweryaxa wi awuupuseryeeni soorepa seihe muhusenryaanyu. (Yoh. 14:26) Moone yeeyo munna mmoha yoowo aawaleliwe makupa onakhumawo nsuwa o Alemanya nave aaheliwa mukalaposo meekheiye olonceiye: “Kaahitepa oohakalala woona wi kaanuupuwela soorepa soohiyanahiyana sawaakhwana nsana! Naamwi kaari meekhaaka, muupuwelo aka waanakhala wooweiwa moorweela mwa wuupuwelela miyaha mincipale sa Mpiipiliyani.” Soorepa iho saahimukhaviherya munnihu omwaacamela Yehova—navetho ovilela moororomeleya.

10. Ntakhara heeni ninnaphwanela wuupuwelela macipo?

¹⁰ Muupuwelele nave mwiipe macipo yaawo anamucicimiha Yehova. Vaavaa yaawaleliwaaya o Filipi, Paulo ni Sila yaaniipa macipo oomunepani  yaawo yuupuwelelaaya. (Saw. 16:25) Moolikana, vaavaa annihu o Uniyawu Soviyetika yaakerihiwe wookapuroni o Siperiya, yaawenrye hai wiilipiha? Murokora Mariya Fedun onnuupuwela: “Hiyo naaniipa macipo oothene yaawo naasuwenlaahu, macipo yaawo yaaphwanyeya mu liivuru a macipo.” Owo olonce wi macipo awo yaahaalipiha oothene yaawo nave yaahaakhaviherya omwaacamela Yehova. Apwanne munnalipiheya vaavaa muniipaanyu macipo oomunepani a vamurimani vanyu? Yaari hiiha, muupuwelele macipo yaawo hiihaano!—Moone ekaaxa “ Mukivahe Olipa Murima.”

11-12. (1) Mwawiiwanana ni 1 Samuwele 17:37, 45-47, ntakhara heeni Tavite aahikhala oolipa murima? (2) Echu taani yoochuneyaxa nnahuseryaahu orweela wa yootakiherya ya Tavite?

¹¹ Wi mvoothe wiiciwa, munaphwanela okhala oolipa murima. Vano wakhala wi munnoona wi munnayeleela olipa murima, tiheeni munaphwanelaanyu weera? Muupuwele wi olipa murima weeparipari honarweela mu mannuwelo anyu, ikuru sanyu, naari mavyakelo anyu. Nkuupuwelani yootakiherya ya mmiravo Tavite vaavaa aawanneiye ni Koliyati. Nimulikanyihaka ni nakuru ole, Tavite aari mukhaani, ooceecheya, nave oohireheryeya owana ekhoco. Tavite haarino nlema. Naamwi hiiha, aahitepa olipa murima. Tavite, moolipa murima aachimaka wi awane ni nakuru ole awiirumiha.

¹² Ntakhara heeni Tavite aareiye oolipa murima? Owo aahiroromela ni murima woothene wi Yehova aari ni yoowo. (Mwaalakhanye 1 Samuwele 17:37, 45-47.) Tavite haatikitheryen’ye mmukhalelo Koliyati unnunweiye ompwaha yene. Ohiya yeeyo, Tavite aatikitheryen’ye mmukhalelo Koliyati aareiye mukhaani vamiithoni va Yehova. Tiheeni nnahuseryaahu orweela wa yaweereya yeela? Nnamukhala oolipa murima wakhala wi ninnaroromela wi Yehova ori ni hiyo navetho wakhala wi noororomela wi amwiicani ahu akhaani naalikanyihaka ni Muluku a Ikuru Soothene. (2 Math. 20:15; Sal. 16:8) Nni nteke hai olipa wahu murima hiihaano nihaakumve ohoolela wiikariwa?

13. Nni nteke hai olipa murima? Mutharihe.

¹³ Nnamuteka olipa wahu murima hiihaano moorweela wa olaleerya wa akina michaka saphaama vooloca sa Omwene wa Muluku. Ntakhara heeni? Nthowa nawi olaleerya onnanihusiha omuroromela Yehova ni ovootha owoova achu. (Masi. 29:25) Hiiha ntoko misiphe sahu sinakhalaaya soolipa vaavaa nnavyakihaahu, olipa wahu murima onnakhala woolipa vaavaa nnalaleeryaahu empa ni empa, mmapuro awaaciwamo, olaleerya woohilakelela, naari mmapuro a nakoso. Wakhala wi nohunnuwiha  olipa wahu murima hiihaano moorweela wa olaleerya, nnamukhala ooreheryeya otitelela olaleerya naamwi muteko ahu ohiihiwe.—1 Tes. 2:1, 2.

14-15. Echu taani nnahuseryaahu orweela wa Nancy Yuen ni Valentina Garnovskaya?

¹⁴ Nnawerya ohuserya sincipale orweela wa yootakiherya ya arokora eeli oororomeleya yaawo yooniherye olipa murima wootikhiniha. Naamwi Nancy Yuen aari ookhuveya aahikhalano olipa murima otokotoko. * Owo aahikhooca omaala olaleerya michaka saphaama sa Omwene wa Muluku. Ntoko yookhumelela, owo aahiwaleliwa mu iyaakha opwaha makhumi meeli o Xina. Ahooleli yaawo yaamuthorinhe yaalonce wi yene aari “muchu ookhoma” mu elapo yo Xina!

¹⁵ Moolikana, Valentina Garnovskaya aahiwaleliwa o Uniyawu Soviyetika mu ikwaha raru soohiyana nave waalakhanyerya iyaakha waacamela makhumi meeli nammoha. * Ntakhara heeni? Owo aari oolakelela otitelela olaleerya ophiyerya wi ahooleli eloca wi aari “muchu onapaka ichu sawoopiha.” Tiheeni yaaweerinhe athiyana yaala eeli oororomeleya okhalano olipa murima ntoko yoola. Awo yaahilekecheya wi Yehova aari ni yaawo.

16. Tiheeni eni enikhaviherye okhalano olipa murima weeparipari?

¹⁶ Ntoko nihusenryaahu, wi nteke olipa murima hannaphwanela otikitheryeya mu ikuru naari mavyakelo ahu. Ohiya yeeyo, nnaphwanela ororomela wi Yehova ori ni hiyo nave wi onnawaniha ntakhara hiyaano. (Malam. 1:29, 30; Zak. 4:6) Weerano yeeyo enamunikhaviherya okhalano olipa murima weeparipari.

17-18. Ntoko erempwaaya mu Yohani 15:18-21, olopola taani Yesu onivanheiye? Mutharihe.

¹⁷ Ninnahakalala vaavaa achu anancicimihaaya, nyenya hannaphwanela wuupuwela wi tahi neechweenevo wakhala wi akina hanasiveliwa ni hiyo. Yesu ooloca: “Ooreeriwa [naari oohakalala] ti nyu, achu yaawicakaani, enoothanyaani, enooruwanaani, eweeraani oonanara mwa nthowa na mwaana a muchu.” (Luka 6:22) Tiheeni Yesu aachuneiye oloca?

¹⁸ Yesu haachuna oloca wi Akristu yaahaala osiveliwa nthowa na wiiciwa. Moohiyana,  aamunilopola wa yeeyo yaahaala weereya wa hiyo. Hiyo hannapaka makupa a elapo. Nnakhala mwawiiwanana ni mahusiheryo a Yesu nave ninnalaleerya michaka seiho owo olalenryeiye. Ntoko yookhumelela, elapo ennaniica. (Mwaalakhanye Yohani 15:18-21.) Hiyo nnachuna omuhakalaliha Yehova. Wakhala wi achu annaniica nthowa na omusivela Tiithi ahu, nikacamiho ti nawaya.

19. Nni ncharihe hai yootakiherya ya arummwa?

¹⁹ Muheemererye wi masu pure naari saweera sa achu siweeriheeni okhala awuuliwa muru nthowa na okhala mmoha a Anamoona a Yehova. (Mik. 4:5) Hiyo nnawerya ohuserya ovootha owoova achu moorweela wa othokororya yootakiherya yeeyo arummwa atikithenryaaya o Yerusalemu Yesu amanle wiiphiwa. Awo yaanasuwela ophiyerya mweeryo taani asitokweene a malapelo a Ayuta yaawiicaaya. (Saw. 5:17, 18, 27, 28) Naamwi hiiha, mahiku oothene awo yaanatitelela oya mu empa ya Muluku nave yiisuwanyeihaka vanlakani wi awo yaari oomuchara a Yesu. (Saw. 5:42) Awo hiyeemerenrye wi woova waamaalihe. Hiyotho nnanwerya ovootha owoova wahu achu moorweela wa wiisuwanyeiha ilukuluku soothene ntoko Anamoona a Yehova—omutekoni, osikola naari mmuceche nnakhalaahuvo.—Saw. 4:29; Aro. 1:16.

20. Ntakhara heeni arummwa yaaryaaya oohakalala naamwi yiiciwaka?

²⁰ Ntakhara heeni arummwa yaaryaaya oohakalala? Awo yaanasuwela ntakhara heeni yiiciwaaya, nave yoona ntoko ncicimiho ohoosiwa nthowa na opaka yookhwela ya Yehova. (Luka 6:23; Saw. 5:41) Ohoolo waya Murummwa Petro aahirepa: “Nto moona masooso mweeraka sawookololowa, mooreeriwa [naari moohakalala].” (1 Ped. 2:19-21; 3:14) Vaavaa nniiwexexaahu wi nniiciwa nthowa na opaka yeeyo eri yaphaama, hanirwa nihiya omurumeela Yehova nthowa nawi achu annaniica.

21-22. (1) Tiheeni mulakelenlaanyu weera wi mwiirehererye ntakhara wiiciwa? (2) Tiheeni nnahaalaahu othokororya mmwaha onacharela?

²¹ Hiyo hannasuwela ti liini achu eneeraaya epacerye oniica naari alamuleli eneeraaya ewatiihe muteko ahu. Nyenya noosuwela wi nnaphwanela wiirehererya hiihaano moorweela wa olipiha onthamwene ahu ni Yehova, oteka olipa wahu murima, ni ohuserya mukhalelo wa ovilela wiica wa achu. Wiirehererya weiwo nnahaalaahu opaka hiihaano onahaala onikhaviherya okhala aweemeleleya muhoolo.

²² Nyenya hanka wakhala wi omaalihiwa wa malapelo ahu woophiya? Mmwaha onacharela, nnahaala othokororya malakiheryo a Mpiipiliyani yaawo anahaala onikhaviherya omulapela Yehova naamwi muteko ahu owatiihiwe.