1, 2. Tiheeni muchu ti muchu a hiyo onaphwaneleiye osuwela? (Moone eruku yoopacerya.)

NTOKO nthokoronryaahu mmwaha ovirale, Musaserya olonce wi Yehova haano ophwanelela wa waalamulela achu. Oewoe olonce wi Yehova hanalamulela phaama nave wi achu yaahaala ohakalala waakhanle wi aniilamulela mukhataaya. Apwanne Satana aalonce eparipari? Mwaanyiherye waakhanle wi achu anniilamulela mukhataaya ni okhalano ekumi yoohimala. Apwanne yaahaala okhala oohakalala ohikhanle wi analamuleliwa ni Muluku? Apwanne mwaamukhala oohakalala waakhanle wi moowerya okhalano ekumi yoohimala ni muhilamuleliwaka ni Muluku?

² Haavo muchu oni awerye woovahaani maakhulo a makoho yaala. Muchu ti muchu a hiyo onaphwanela wuupuwelela mwawiiseela. Voocharela enakhala yawooneya wi mukhalelo wa olamulela wa Yehova ti waphaama nave wi owo onnaphwanela nikhaviheryo nahu. Nnanwerya osuwela moorweela  wa yeeyo nnaalakhanyaahu Mpiipiliya. Hankooni noone yeeyo Piipiliya onaloceiye vooloca sa ophwanelela wa Yehova olamulela elapo yoothene.

3. Ntakhara heeni Yehova ookhalano ophwanelela wa okhala Mutokweene?

³ Yehova pahiru ti Mutokweene a elapo yoothene nthowa nawi owo Muluku a owerya woothene ni Mpatusa. (1 Matharihelo 29:11; Saweriwa T’arummwa 4:24) Mu yawoona ya wirimu, mamwene 144.000 yaawo anamuchara Kristu yaaloca: “Òphwanela ti weyo Pwiya Muluku ahu wakhela ovuwa, ntxitximiho ni owerya wona wi opatunse itxhu sothene nave sopatusiwa sinnakhala wa nthowa na okhwela wà.” (Wupulula 4:11) Yehova topatunse ichu soothene, mwawiihiiha owo ookhalano ophwanelela wa waalamulela achu oothene, veelaponi yavathi naari wirimu.

4. Ntakhara heeni othanla woochuna honanivaha ophwanelela wa ommwareela Muluku?

⁴ Satana haapatunse echu. Va nthowa nenla owo haano ophwanelela wa olamulela elapo. Satana vamoha ni mutheli oopacerya yaari alolo vaavaa yaamwarenlaaya otokweene wa Yehova. (Yeremiya 10:23) Apwanne othanla waya woochuna waavanhe ophwanelela wa okhooca olamulelo wa Yehova? Hooye. Othanla woochuna onamvaha muchu ophwanelela wa opaka soothanla ni soolakelela, nyenya ohiya ophwanelela wa ommwareela Mpatusa, Yehova. Mwawooneya, ommwareela Muluku opharihela moonanara othanla woochuna. Ntoko achu, ninnachuna olamulelo ni ohoolela wa Yehova.

5. Ntakhara heeni soolakelela sa Muluku wiiliwiili ti sawookololowa?

⁵ Muupuwele nthowa nikina ntakhara heeni Yehova oreiyeno ophwanelela wa olamulela. Owo onapharihela olamulelo awe mmukhalelo woophaameya. Owo onnanleela: “Miyano, Apwiya, kiri aphama, awokololowa ni òrèra murima ni achu othene. Ti seiha itxhu inakisivelà.” (Yeremiya 9:23) Yehova hanachuna malamulo aachu wi emukhaviherye olakelela echu yoophwanelela. Moohiyana, owo ootikitherya malakiheryo wa yeeyo eri yoophwanelela. Nave mu mathipelo a wookololowa wawe woophaameya, Yehova onnaavaha achu malamulo. Namarepa a Salumu ooloca: “Eparipari ni wokololowa sinnalipiha omwene anyu.” Mwawiihiiha nlamulo vyakala, nlakiheryo ni yoolakelela yeeyo enarwa wa Yehova ti yoophwanelela. (Salumu 89:15; 119:128) Satana olonce wi Yehova tahi Mulamuleli aphaama. Naamwi hiiha, Satana mwaneene hanawerya oruuha wookololowa mweelaponi.

6. Nthowa taani nimoha Yehova oreiyeno ophwanelela olamula?

⁶ Nthowa nikina ntakhara heeni Yehova oreiyeno ophwanelela wa olamulela tiwi owo ookhalano masuwelelo ni miruku sa okhapelela elapo. Ninnawerya woona yeela mmukhalelo owo amvanheiye Mwanawe owerya wa openuxa ireca seiyo totore  ahaaweryeiye omaliha. (Mateu 4:23, 24; Marko 5:25-29) Naamwi siri sootikhiniha wa hiyo, iho tahi sootikhiniha wa Yehova. Owo onniiwexexa mukhalelo mwiili onalapaaya nave onanwerya waakiha echu vyakala ennanariha. Owotho onanwerya waakookiherya okumi yaale akhwile ni omaaliha ikuru sa maphacuwelo.

7. Ophiyerya mweeryo taani Yehova oreiye a miruku ompwaha muchu vyakala mu elapo ya Satana?

⁷ Elapo enalamuleliwa ni Satana hewerya oruuha murecele, naamwi ori mu elapo emoha naari variyari va ilapo. Pahiru Yehova torino miruku sa oruuha murecele mweelaponi. (Isaiya 2:3, 4; 54:13) Ninnoona ntoko murummwa Paulo onneiye vaavaa aalonceiye: “Txhiri, muhakhu wa Muluku, osuwela wawe ni miruku sawe iri itokotoko. Othoriha wawe ori wohithoriheya ni iphiro sawe iri sohitaphuleleya.”—Aroma 11:33.

8. Munoona hai vooloca sa mukhalelo Yehova onalamuleleiye?

⁸ Ntoko noonnaahu, Piipiliya onnooniherya wi Yehova ookhalano ophwanelela wa olamulela. Onnooniheryatho ntakhara heeni oreiye Mulamuleli aphaama. Nthowa nimoha ti nawi owo onalamulela ni osivela. Ninnamwaacamela vaavaa nnuupuwelaahu mukhalelo owo oreiye “a ikharari, òrèra murima, òvilela ni òroromeleya.” (Mukwaha 34:6) Muluku onnanikhaliha mwancicimiho nave moophwanelela. Owo onnanikhapelela phaama opwaha hiyo aneene. Musaserya olonce wi Yehova onnawateeliha saphaama wa akapuro Awe, nyenya iwo wootha. Ophiyerya wi Muluku oonivaha Mwanawe oochuneya wi niwerye okhalano ewehereryo ya ekumi yoohimala.—Mwaalakhanye Salumu 84:12; Aroma 8:32.

9. Nnasuwela hai wi Muluku onnamukhapelela muchu ti muchu a hiyo?

⁹ Yehova onnaasivela achu awe oothene ntoko nikhuuru. Nyenya owotho onnamuthokororya muchu ti muchu. Muupuwele yeeyo yeeren’ye khalai. Mu iyaakha masana mararu, Yehova aahaapharihela amuthoriha wi ehooleleke nloko nawe nave aahaavaha owerya wa waavootha amwiicani aya. Naamwi hiiha variyari va elukuluku yeeyo yoothene, Yehova nlelo aanamuthokororya muchu ti muchu. Mmoha a yaala aari muthiyana iichaniwa Ruthi. Owo haari a nloko na Aisarayeli, nave owo aahihiya ichu sincipale wi akhale mulapeli a Yehova. Yehova aahimvaha nchuwelo na otheliwa ni mulopwana nave aahimvaha mwaana. Nyenya opwaha yeela, mwaana a Ruthi aahikhala makupa a nloko nenlo oyariwemo Mesiya. Yehova tho oheeriha wi yaweereya ya okumi wa Ruthi erepiwe Mpiipiliyani, mu liivuru onakuxa nsina nawe. Mano, munnaanyiherya mukhalelo Ruthi onahaaleiye woona vaavaa oneereiye aviihiwe mookhwani ni ahuserye vooloca sa ichu seiya?—Ruthi 4:13; Mateu 1:5, 16.

10. Ntakhara heeni nnalocaahu wi olamulelo wa Yehova tahi woohoosa?

¹⁰ Olamulelo wa Yehova tahi woohoosa. Moohiyana, yaale anamwiiwelela anakhala ootaphuwa ni oohakalala. (2 Korinto 3:17) Tavite aahiloca sa Yehova: “Woharukurerya ovuwa ni warya, owerya ni ohakalala  sosareya mpa mwaya.” (1 Matharihelo 16:7, 27) Namarepa a salumu Etani ooloca: “Norèriwa ti nloko nsuwenle wotxitximihani, nave nnetxa, Pwiya, mukamamani mwanyu: nihiku nothene ninnatxhapela nsina nanyu n’wokololowani mwanyu ninnaphwanyamo ovuwa waya.”—Salumu 89:16, 17.

11. Nni nikhale hai oolekecheya wi otokweene wa Yehova ti waphaama?

¹¹ Vaavaa nnuupuwelelaahu sa ekhaikhai ya Yehova, ninnakhala oolekecheya wi olamulelo awe ti waphaama. Nnoona ntoko namarepa a salumu yoowo olonce: “Okhala mpa mwanyu nihiku nimoha ti worèrasa opwaha mahiku ntxikhwi.” (Salumu 84:11) Yehova tonipatunxe, mwawiihiiha owo oosuwela yeeyo eni enihakalalihe. Owo onnanivaha sincipale opwaha nnachunelaahu. Echu vyakala Yehova onanivekeiye opaka ti yamphurelo ahu. Naamwi ochuneyaka wiilipiherya, mahiku oothene nnahaala okhala oohakalala wakhala wi ninnamwiiwelela Yehova.—Mwaalakhanye Isaiya 48:17.

12. Tinivi nri nthowa ntokweene nnaneeriha okhaviherya otokweene wa Yehova?

¹² Noohuserya Mpiipiliyani wi omanle Olamulelo wa Kristu wa Iyaakha Ekonto, akina anahaala omwaryeela otokweene wa Yehova. (Wupulula 20:7, 8) Tiheeni eni eweerihe opaka yeeyo? Mu elukuluku yeeyo, Musaserya onahaala oweeriha achu weera ichu mwanrima. Wiiliwiili owo onneerano yeeyo. Owo akhweya onamweererya waalekeche achu wi ananwerya okhalano ekumi yoohimala naamwi ehimwiiwelelaka Yehova. Eyo heni ekhale eparipari. Nyenya nnaphwanela wiikoha: ‘Apwanne kinahaala weemererya yawootha ntoko yeeyo?’ Wakhala wi ninnamusivela Yehova chiryene nave noolekecheya wi owo taphaama nave wi ookhalano ophwanelela wa olamulela elapo, yawootha ntoko yeeyo enahaala okhala yoothanyeya wa hiyo. Nnahaala ochuna okhala pahiru vathi va otokweene wa Yehova, yoowo onalamulela ni osivela.

13. Nni nikhaviherye hai otokweene wa Muluku?

¹³ Ntoko noonnaahu, Yehova ookhalano ophwanelela wa olamulela, nave mukhalelo onalamuleleiye ti waphaama. Ninnaphwanela okhaviherya mwawaakhwanela otokweene Awe. Ninnakhaviherya vaavaa nnakhalaahu oororomeleya wa Yehova ni omutakiherya. Vaavaa nnawethaahu opaka ichu mmukhalelo wa Yehova, ninnooniherya wi ninnasivela nave ninnakhaviherya mukhalelo awe wa olamulela.—Mwaalakhanye Éfeso 5:1, 2.

14. Atokweene a muloko ni miru sa imusi eni emutakiherye hai Yehova?

¹⁴ Noohuserya orweela Mpiipiliyani wi Yehova wiiliwiili onnapharihela owerya wawe moosivela. Miru sa imusi ni atokweene a muloko yaawo anasivela otokweene wa Yehova anahaala omutakiherya ehikhalaka ooturuwa naari oovareryela echu yoothene eneereya. Murummwa Paulo aahiilipiserya omutakiherya Muluku ni Mwanawe. (1 Korinto 11:1) Owo haawuuliha muru akina naari waatiteliha weera echu yoophwanelela. Moohiyana, owo aanaaceenyerya opaka echu yoophwanelela. (Aroma 12:1; Éfeso 4:1; Filémone 8-10) Mu weerano yeela, Paulo aamutakiherya Yehova. Vaavaa nnaakhalihaahu akina moosivela ninnakhaviherya otokweene wa Yehova.

15. Nni nikhaviherye hai olamulelo wa Yehova?

¹⁵ Ninnakhaviheryatho olamulelo wa Yehova  moorweela wa waacicimiha ni wiiwanana ni yaale owo onaavaheiye olamulelo. Naamwi nihiiwexexaka phaama naari niheemereryaka yoolakelela awo apankaaya, nlelo ninnaakhaviherya. Nave tahi yeeyo elapo enapakaaya, nyenya hiyaano ninneerano vaavaa nnamweemereryaahu Yehova ntoko Mulamuleli ahu. (Éfeso 5:22, 23; 6:1-3; Ahebri 13:17) Nave voocharela ninnakhala oohakalala, woona wi Muluku onachuna yeeyo eri yaphaama wa hiyo.

16. Soolakelela nnapakaahu sinooniherya hai wi ninnakhaviherya otokweene wa Muluku?

¹⁶ Nnanweryatho okhaviherya otokweene wa Muluku moorweela wa soolakelela nnapakaahu. Yehova hananivaha nlamulo wa mikhalelo soothene sa okumi. Moohiyana, owo onnanleela mukhalelo onuupuweleiye. Ela ennanikhaviherya wiiwexexa yeeyo nnaphwanelaahu opaka. Ntoko yootakiherya, Yehova hanaavaha Akristu elista ya soowara anaphwanelaaya naari ahinaphwanelaaya owara. Moohiyana, owo onnathariha wi nnaphwanela owara moophwaneliwa ni ncicimiho ntoko Anamoona awe. (1 Timóteo 2:9, 10) Owo onachuna wi nuupuweleke mukhalelo soolakelela sahu sinaavolowelaaya akina. (1 Korinto 10:31-33) Vaavaa nnapakaahu soolakelela sinathipeleya mmukhalelo Yehova onuupuweleiye, ninnooniherya wi ninnamusivela nave ninnakhaviherya mukhalelo onalamuleleiye.

17, 18. Atheli eni yooniherye hai wi annakhaviherya otokweene wa Yehova?

¹⁷ Muthokororye mukhalelo mmoha mutheli ori Mukristu oneereiye akhaviherye  otokweene wa Yehova. Othela akhweya honi okhale ntoko mutheli aaweheryeiye. Ophiyerya wi awo anamukhalano makacamiho matokotoko. Wakhala wi ti hiiha, awo ananwerya ophura orweela wa wuupuwelela mukhalelo Yehova aakhalinheiye nloko na Aisarayeli akhalai. Yehova aahiiloca ntoko mulipa oothela a nloko nawe. (Isaiya 54:5; 62:4) Nloko naanamunyeenyeiha Yehova ikwaha sincipale. Waataana yoowo waari ntoko othela wookacamiha. Nyenya Yehova aari oopisa murima ni Aisarayeli. Nave aanaalevelela ikwaha soothene nave aahikhwaaniherya malakano awe wa yaawo.—Mwaalakhanye Salumu 106:43-45.

¹⁸ Atheli ari Akristu yaawo anamusivela Yehova anneererya omutakiherya. Naamwi ekumanakano makacamiho mu othela waya, awo hanaavyaavya nthowa nihiri mu soorempwa wi emalihe othela waya. Awo annasuwela wi Yehova onoona nlakano na othela okhala mwaha mutokweene nave onachuna wi mulopwana ni mwaariye ‘ephitàne’. Mararuwo pahiru ti nthowa nnamweeriha muchu omwalana ni okhala ootaphuwa othela naari otheliwa wanaawiili. (Mateu 19:5, 6, 9) Vaavaa Akristu anapakaaya soothene anaweryaaya wi yeerihe wi othela waya okhumelele phaama, awo annakhaviherya otokweene wa Yehova.

19. Tiheeni nnaphwanelaahu opaka wakhala wi noohesa?

¹⁹ Oothene ahu naachu oohiphaameya, nave ikwaha ikina ninnapaka ichu sinamunyeenyeiha Yehova. Owo oosuwela yeela, nave ti nthowa nene ovaherenryeiye mukucho wa Kristu. Mwawiihiiha vaavaa nnahesaahu, nnaphwanela omveka Yehova wi anilevelele. (1 Yohani 2:1,  2) Opwaha okhala oosarasareya ni soohesa sahu, nnaphwanela weererya ohuserya orweela wa seiyo. Nnachuna omwaacamela Yehova, yoowo oni anilevelele ni onikhaviherya openuwa ni otitelela omurumeela.—Salumu 103:3.

20. Ntakhara heeni ninnaphwanela okhaviherya otokweene wa Yehova hiihaano?

²⁰ Mu elapo evyaani, muchu ti muchu onahaala olamuleliwaka ni Yehova nave onahaala ohuserya iphiro sawe sawookololowa. (Isaiya 11:9) Nyenya naamwi hiihaano nnanwerya ohuserya sincipale vooloca sa mukhalelo owo onuupuweleiye ni onachuneiye wi nooneke ichu. Moohilekela, haavo oni aakaaheke ophwanelela wa Muluku olamulela. Mwawiihiiha, hankooni nipake soothene nnaweryaahu wi nikhaviherye otokweene wa Yehova moorweela wa omwiiwelela, omurumeela moororomeleya ni wiilipiserya omutakiherya mwa soothene nnapakaahu.