1, 2. (1) Mwaha taani onaavolowela achu oothene? (2) Ntakhara heeni mwaha owo oryaaya wookhweleya wa hiyo?

WA ACHU ancipale olelo, ikhorowa tori mwaha mutokweene. Ti yeeyo anuupuwelaaya ni anoovaaya. Achu annamaliha elukuluku aya yeereryaka waavya ikhorowa naari okhapelela ikhorowa aryaayano. Wa akina, echu eri yookhweleyaxa eri emusi aya, ekumi aya, naari ichu anachunaaya okhwaaniherya mookumini.

² Wookhalavo mwaha ori wookhweleyaxa opwaha ichu seiya. Mwaha owo ori ovuwihiwa wa otokweene wa Yehova. Echu yookhweleyaxa wa hiyo othokororya mwaha yoowo. Naahiikasoopa, nnahaala okhala ooweiwaxa ni okumi ahu naari woova vooloca sa makacamiho ahu ophiyerya ocuwala esisapo ya mwaha yoowo. Wakhala wi nookhaviherya otokweene wa Yehova, nnahaala owerya ovilela ni makacamiho mu okumi ahu, nave nnahaala okhala vakhiviru va Yehova.

3. Tiheeni Satana aalonceiye sa olamulelo wa Muluku?

³ Satana Musaserya aahitannya nikoho waakhanle wi Yehova  ookhalano ophwanelela wa olamulela. Satana onachuna wi achu yuupuwele wi Yehova Mulamuleli oonanara murima nave wi Owo hananichuniha yeeyo eri yaphaama. Satana aalonce wi achu yaahaala okhala oohakalala waakhanle wi aniilamulela mukhataaya. (Maphatxuwelo 3:1-5) Owotho aalonce wi haavo muchu ori oororomeleya wa Muluku chiryene nave wi wakhala wi muchu ookhalano makacamiho mancipale, muchu ti muchu onahaala omukhooca Yehova ntoko Mulamuleli. (Yobi 2:4, 5) Mwawiihiiha Yehova onneemererya ovira elukuluku yincipale wi ekhale yawooneya wa oothene wi okumi ahirivo Muluku ntoko Mulamuleli onakhala wookacamiha.

4. Ntakhara heeni mwaha vooloca sa otokweene wa Yehova onnaphwanela orehereryiwa?

⁴ Chiryene, Yehova oosuwela wi sooloca sa Musaserya ti sawootha. Vanonto, ntakhara heeni owo oneemereryeiye ovira elukuluku wi Satana eererye woona mwaha awe? Naakhulo ninnamvolowela muchu ti muchu, wirimu ni veelaponi. (Mwaalakhanye Salumu 83:19.) Atamu ni Eva aakhooca olamulelo wa Yehova, nave ovinyerya vaavaa annakhalavo akina anakhooca. Eyo ennaweeriha akina wuupuwela wi Musaserya ookhalano mathowa aphaama. Horwa okhalavo murecele ni wiiwanana wakhala wi achu ni ankeelo aakhalano minikwa vooloca sa mwaha owo. Nyenya omanle ovuwihiwa otokweene wa Yehova, muchu ti muchu onahaala okhala vathi va olamulelo wootikhiniha okhala wookhala. Vaavo onarwa okhalawo murecele veelaponi yoothene.—Éfeso 1:9, 10.

5. Mmukhalelo taani nryaahu oovoloweliwa mmwaha wa otokweene wa Muluku?

⁵ Otokweene wa Muluku onahaala ovuwihiwa, nave olamulelo wa Satana ni achu onahaala opwata ni oviihiwavo moomalela. Olamulelo wa Muluku moorweela wa Omwene wa Mesiya onahaala okhumelela phaama. Achu oororomeleya eni eniiha yoonihenrye wi ti wooweryeya okhala oororomeleya ni okhaviherya olamulelo wa Muluku. (Isaiya 45:23, 24) Mano, ninnachuna okhala variyari va achu yaala oororomeleya? Chiryene! Mwawiihiiha, nnaphwanela wiiwexexa okhweleya wa mwaha owo.

6. Mmukhalelo taani ovuwihiwa wa otokweene wa Yehova oryaaya wookhweleya?

⁶ Ovuwihiwa wa otokweene wa Yehova ti wookhweleyaxa opwaha ovulusiwa wahu. Nyenya ela henataphulela wi ovulusiwa wahu tahi woochuneya naari wi Yehova hananikhapelela. Nnasuwela hai yeela?

7, 8. Ovuwihiwa wa otokweene wa Muluku oni onikhaviherye hai?

⁷ Yehova onnaasivela vancipale achu. Chiryene, hiyaano tinasisapo wa yene ophiyerya wi owo omvaha Mwanawe wi niwerye okhalano ekumi yoohimala. (Yohani 3:16; 1 Yohani 4:9) Waakhanle wi Yehova haahaala okhwaaniherya malakano awe vooloca sa omwaahiyu ahu, Satana ni amwiicani akina yaahaala okhalano ophwanelela. Satana aalonce  wi Yehova nawoothe yoowo aawaateelinhe achu ichu saphaama nave onalamulela mmukhalelo woonanara. Amwiicani annanyemula malakano a Yehova nave annaloca: “Nri wowi nroromeliho na orwa wa Kristu? Txhiri makholo ahu àkhwa ni sothesene siri ntoko saryaya ovinya wopatxeryani wa elapo.” (2 Pedro 3:3, 4) Nyenya Yehova onahaala okhwaaniherya maroromeliho awe. Owo onnasuwela wi ovuwihiwa wa otokweene awe onahaala ophitaanyerya ovulusiwa wa achu awiiwelela. (Mwaalakhanye Isaiya 55:10, 11.) Otokweene wa Yehova onathipeleya mu osivela. Mwawiihiiha nnaphwanela ororomela wi mahiku oothene onahaala waasivela ni waacicimiha akapuro awe oororomeleya.—Mukwaha 34:6.

⁸ Oloca wi otokweene wa Yehova mwaha wookhweleyaxa, eyo henataphulela wi ovulusiwa wahu tahi wookhweleya wa yene. Yehova onnatepa onikhapelela. Nnaphwanela okuha mmuupuweloni yeeyo eri yookhweleyaxa ni okhaviherya olamulelo awe.

9. Tiheeni Satana aalonceiye sa Yobi? (Moone eruku yoopacerya.)

⁹ Ti wookhweleya okhalano moonelo woophwanelela vooloca sa otokweene wa Yehova. Nnanwerya woona yeela orweela wa omwaalakhanya liivuru a Yobi, yoowo onapaka makupa a aliivuru oopacerya a Piipiliya. Mummo ninnaalakhanya wi Satana aahiloca wi wakhala wi Yobi oohooseya vancipale, owo aahaala omukhooca Muluku. Ophiyerya wi Satana aahimveka Muluku wi amoonihe ekoi Yobi. Yehova haahaala weerano yeeyo, nyenya owo aahimweemererya Satana omweeha Yobi, alocaka wi: “Phamene, werele muhakhu awe wothene ntoko onatxhunelawevo.” (Mwaalakhanye Yobi 1:7-12.) Vahilekelenyevo, Yobi aahaayeleela akapuro awe ni muhakhu awe. Voocharela aahisuwela wi anamwane awe khumi oothene yaahikhwa. Satana aaheeriha okhala ntoko wi Muluku taatannya ipahu seiye. (Yobi 1:13-19) Ohoolo waya, Satana amphoreiha Yobi ni ereca yawiicela ni yoothanyeyasa. (Yobi 2:7) Ni yoolakelela ya otepiha mwaha, mwaara a Yobi ni asinthamwene awe araru oowoka, yaahiloca ichu sawiiniha murima ni sooceecheiha.—Yobi 2:9; 3:11; 16:2.

10. (1) Yobi oonihenrye hai ororomeleya wawe wa Muluku? (2) Ntakhara heeni Yobi aanaphwanela wookololiwa?

¹⁰ Apwanne masu Satana aalonceiye yaari eeparipari? Hooye. Naamwi Yobi aahoosen’ye ni ipahu seiye, owo hantonko omukhooca Yehova. (Yobi 27:5) Nyenya, veelukuluku aya, Yobi aahicuwala yeeyo yaari yookhweleya nave uupuwela pahiru sa yoowo meekheiye. Owo aahititelela oloca wi haapanke echu yoonanara. Yobi aahiisoonatho wi aanaphwanela osuwela ntakhara heeni aahooseyeiye. (Yobi 7:20; 13:24) Akhweya nnanwerya wiiwexexa miyoonelo sa Yobi. Naamwi hiiha, Yehova aahoona wi Yobi aahikhalano moonelo wooheseya, nave owo aahimookolola Yobi. Enreno mwawiihai?

11, 12. Tiheeni Yehova amukhavihenryeiye Yobi othamalela? Yobi aakhulenle hai?

¹¹ Nnanwerya waalakhanya yeeyo Yehova aamulenleiye Yobi mu icima 38 ophiyerya 41 sa liivuru a Yobi. Yehova haamutharihenle mathowa a ohooseya wawe. Opwaha yeeyo, Yehova aachuna omukhaviherya wiiwexexa oyeva wawe aalikanyihiwaka ni Muluku. Owo aahimuhusiha Yobi wi waakhalavo mwaha wookhweleyaxa opwaha makacamiho awe. (Mwaalakhanye Yobi 38:18-21.) Masu a Yehova yaahimukhaviherya Yobi otoroka moonelo awe.

 ¹² Apwanne waari woohiphwanelela Yehova oloca wa Yobi mmukhalelo yoola amanle ohooseya vancipale? Hooye, nave Yobi mwaneene huupuwenle hiiha. Yobi aahiiwexexa nave aahivaha esisapo ekano ya Yehova. Ophiyerya wi aahiloca: “Vanonto kuliwaka muru wa nthowa na itxhu kolotxenlakani, kootxharuwa kiyevihaka vantxhupini ni vatxùrwani.” (Yobi 42:1-6) Woopaceryani, mmiravo mmoha iichaniwa Elihu aahimukhaviheryatho Yobi otoroka muupuwelo awe. (Yobi 32:5-10) Yobi amanle owiriyana ekano yoosivela ya Yehova nave atoronke moonelo awe, Yehova aaheeriha wi akina esuwele wi owo aanahakalala ni ororomeleya wa Yobi.—Yobi 42:7, 8.

13. Ekano ya Yehova yaamukhavihenrye hai Yobi emanle makacamiho awe?

¹³ Ekano ya Yehova yaahititelela omukhaviherya Yobi naamwi makacamiho awe yaamanle. “Apwiya yàmurèliha Yobi mwa miyakha sawe somaliherya opwaha wopatxeryani.” Veelukuluku aya, owo aahikhalano “anamwane asilopwana athanu napili ni asithiyana araru.” (Yobi 42:12-14) Naamwi Yobi aanaasivela anamwane yaawo, owo chiryene aahaayeleela yaale yaakhwile. Nave akhweya hantonko ocuwala ichu soothene sawoopiha samphacuwenle ni emusi awe. Naamwi veelukuluku aya Yobi aahusenrye mathowa a makacamiho awe, owo akhweya aanikoha ntakhara heeni Muluku eemerenryeiye makacamiho yaale. Vano wakhala wi Yobi aahikhalano muupuwelo ntoko yoola, owo aanawerya wuupuwela yeeyo Yehova aamulenleiye. Eyo yaahimuhakalaliha nave yaahimukhaviherya okhalano moonelo woophwanelela.—Salumu 94:19.

14. Tiheeni nnahuseryaahu orweela wa yaweereya ya Yobi?

¹⁴ Wuupuwelela yeeyo yeeren’ye ni Yobi enanwerya onikhaviherya otoroka muupuwelo ahu ni onihakalaliha. Liivuru a Yobi makupa yaawo Yehova eemerenryeiye orepiwa ‘wi enihusihe wi, nivilelaka ni nihakalalaka ni masu a nlivuru na Muluku, nikhaleno owehererya.’ (Aroma 15:4) Owo onnanihusiha wi hannaphwanela wuupuwelelaxa makacamiho ahu ophiyerya ocuwala wuupuwelela vooloca sa ovuwihiwa wa otokweene  wa Yehova. Moolikana ni Yobi, ninnooniherya okhaviherya wahu otokweene wa Yehova moorweela wa otitelela okhala oororomeleya wa yoowo naamwi okumi okacamiheyaka.

15. Ororomeleya wahu onakhwaaniherya eheeni vaavaa nnakhalaahuno makacamiho?

¹⁵ Yaweereya ya Yobi enanwerya onihakalaliha nthowa nawi ennooniherya wi saweeha henataphulela wi Yehova orimunyeenyeya ni hiyo. Saweeha sinnanivaha ekari ya okhaviherya otokweene wa Yehova. (Masiposipo 27:11) Vaavaa nnavilelaahu moororomeleya, ninnamuhakalaliha Yehova nave ewehereryo ahu ya omwaahiyu ennakhala yoolipa. (Mwaalakhanye Aroma 5:3-5.) Yaweereya ya Yobi ennanooniherya wi “Apwiya t’aniphwanya ni a ikharari.” (Tiyako 5:11) Wakhala wi ninnakhaviherya otokweene wa Yehova, owo onahaala onivaha nchuwelo. Osuwela yeela ennanikhaviherya wooniherya “ovilela wothene ni ohakalala.”—Kolosi 1:11.

16. Tiheeni nnaphwanelaahu wiisuupuserya nave ntakhara heeni?

¹⁶ Eparipari wi onamukhala woovila okhaviherya ovuwihiwa otokweene wa Yehova vaava nnahoolelaahu makacamiho mookumini. Naamwi makacamiho ari makhaani ananwerya winnuwa wakhala wi ninnuupuwelaxa yaawo. Mwawiihiiha ti woochuneya wiiliwiili wiisuupuserya wi echu yookhweleyaxa ori okhaviherya otokweene wa Muluku moohipwacha makacamiho nnahoolelaahu.

17. Okhala ooweiwa mmuteko wa Yehova enanikhaviherya hai?

¹⁷ Okhala ooweiwa mmuteko wa Yehova enamunikhaviherya wuupuwelela yeeyo eri yookhweleyaxa. Ntoko yootakiherya, murokora oniichaniwa Rene aahikhalano ereca ya muru yoowo waatepa omwiicela, navetho aakhalano kanser. Vaavaa aareiye o nipuro na ekumi, owo aanalaleerya wa yaale yaalapa weiwo, areca akina ni alipa ooxekurya. Elukuluku Rene aakhanleiye o nipuro na ekumi mu isumana piili ni emeya, owo aahimaliha  iwora 80 alaleeryaka. Naamwi Rene aasuwenle wi ahaala okhwa, owo haacuwanle yeeyo chiryene yaari yookhweleya. Okhaviherya otokweene wa Yehova yaahimvaha murecele.

18. Yaweereya ya Yenifa enanihusiha eheeni vooloca sa okhaviherya otokweene wa Yehova?

¹⁸ Nnanwerya tho okhaviherya otokweene wa Yehova vaavaa nnakumanaahuno makacamiho a nihiku nnihiku naamwi eri makhaani. Murokora oniichaniwa Yenifa aahimaliha mahiku mararu ari onipuro na maceeke. Ephiyeryaka elukuluku ya ocimula, mahiku yamvira etorokiwaka, nave Yenifa aatepa ohapaleya nave aaniisoona okhala meekheiye. Owo anwerya opacerya wiisoona ohikhala echweenevo. Nyenya moohiyana, Yenifa aahivekela wa Yehova wi amukhaviherye olaleerya michaka yaphaama wa akina yaawehererya nceeke. Owo aahaalaleerya achu ancipale nave aahivaha soolaleeryiwa sincipale. Yenifa aaloca: “Kaahoona wi Yehova aahikireeliha moohipwacha yaweereyaaka yoothananiha nave aahikivaha ikuru sawaakhwanela wi kivuwihe nsina nawe moophwanelela.”

19. Tiheeni enaasuwanyeiha alapeli eeparipari?

¹⁹ Pahiru achu a Yehova taniiwexexa phaama okhweleya wa otokweene wa Yehova. Wiiwexexa yoola onnaasuwanyeiha alapeli eeparipari. Mwawiihiiha, muchu ti muchu a hiyo onaphwanela otitelela okhaviherya otokweene wa Yehova.

20. Yehova onoona hai vooloca sa soothene munapakaanyu wi mukhaviherye otokweene awe?

²⁰ Yehova onnoona nave onnavaha esisapo soothene munapakaanyu wi mukhaviherye otokweene awe vaavaa munamurumeelaanyu moororomeleya ni ovilela saweeha. (Salumu 18:25) Mwaha onacharela onahaala othariha sincipale ntakhara heeni munnaphwanela okhaviherya otokweene wa Yehova ni mukhalelo muneeraanyu mukhaviherye mwawaakhwanela.