1, 2. Yehova onanihakalaliha hai mmakacamiho ahu, nave yoororomeliha taani nnaphwanyaahu Mmasu awe?

MMIRAVO yoowo ori muciye aahuupuwela vooloca sa 1 Korinto 7:28, yoowo onaloca wi yaawo anathela “anamukhalano sokatxamiha.” Munna aahiloca ni mutokweene mmoha awunnuwelavo othenle nave aahimukoha: “Makacamiho awo tiheeni, nave kini kisepe hai kathela?” Ahaakumve waakhula nikoho, mutokweene aahiloca ni mmiravo wi uupuwele vooloca sa masu Paulo aarempeiye ariki: Yehova ti “Muluku anihakalaliho nothene. Yowo onnanihakalalaiha mwa masoso ahu othene” naari sokatxamiha.—2 Korinto 1:3, 4.

² Hiyaano noosuwela wi Yehova, onnanisivela, nave onnanihakalaliha vaavaa nnakumanaahuno makacamiho. Akhweya nyuwaano munnawerya wuupuwela elukuluku yeeyo Yehova oolipinheiyeni ni woohoolelaani moorweela wa Masu awe. Ninnawerya woona wi mweeparipari owo onnasiveliwa onoona nikhalaka phaama hiiha ntoko aasiveliweiye ni  alapeli awe akhalai.—Mwaalakhanye Yeremiya 29:11, 12.

3. Makoho taani nnahaalaahu waakhula mmwaha yoola?

³ Wiiliwiili, ennakhala yookhweya ovilela makacamiho ni masooso wakhala wi ninnasuwela tiheeni enatannya makacamiho awo. Vano ntakhara heeni nneeraahu nikhalano makacamiho mu othela wahu naari veemusini vahu? Nave sootakiherya taani sakhalai naari sahiihaano sinaphwanyeya Mpiipiliyani sini sinikhaviherye ophwanya nihakalaliho nnakhwelaahu? Hankooni naakhule makoho yaala nave noone mukhalelo nneeraahu nivilele makacamiho.

4, 5. Makacamiho taani mulopwana ni muthiyana anakhalaayano?

⁴ Yehova amanle ompatuxa muthiyana oopacerya, owo aamukeriha wa mulopwana nave aahikhala mwaariye. Voocharela Yehova aahiloca ariki: “Wa nthowa na yeyo mulopwana onamwahiyaka atithinya ni amannya, wi aphitàneke ni mwàriye nave òwèli anamukhalaka ntoko mutxhu mmoharu.” (Maphatxuwelo 2:24) Mweeparipari, oothene ahu naachu oohiphaameya. (Aroma 3:23) Wa nthowa na yeela vaavaa mulopwana ni muthiyana anapakaaya othela awo anamukhalano makacamiho. Ntoko yootakiherya, ahaakumve otheliwa, muthiyana aanawiiwelela asitiithi awe. Nyenya masu a Muluku analoca wi emanle opaka othela mulopwana tonakhala muru wa muthiyana. (1 Korinto 11:3) Woopaceryani, akhweya enahaala okhala yoovila wa mulopwana omvaha mwaariye ohoolela. Nave enahaalatho okhala yoovila wa muthiyana ochariha ohoolela wa iyawe opwaha wa asitiithi awe. Navetho, vaavaa anapakaaya othela, anahaala okhalano ohiiwanana ni asitiithi a oothelana, eyotho enahaala okhala nikacamiho.

⁵ Nkuupuwelanitho mukhalelo mulopwana ni mwaariye anoonaaya vaavaa anasuwelaaya wi anahaala okhalano mwaana. Naamwi awo etempe ohakalala, wiiliwiili annakhalatho awuukhuwa. Awo anniikoha waakhanle wi mwaana orupaliwe onahaala oyariwa phaama, navetho annakhala awuukhuwa vooloca sa ekumi ya mwaana owo. Annasuwelatho wi anaphwanela waaceererya ntatha naya. Amanle oyariwa mwaana, onamuchuneya mutheli opaka matorokelo makina. Mayi onahaala omalihaka elukuluku amulelaka mwaana. Hiiha mulopwana ni mwaariye akhweya hemalihaka elukuluku yincipale vamoha hiiha ntoko yeerelaaya khalai. Mulopwana onahaala okhalano mirici mincipale. Owo onaphwanela ororomela wi mwaariye ni mwaana aakhalano yeeyo anakhwelaaya.

6-8. Mutheli onoona hai vaavaa onasuweleiye wi hanayara?

⁶ Atheli akina aakhalano makacamiho makina. Awo annachuna okhalano anamwane, nyenya hanawerya. Vaavaa muthiyana otheliwe ohinayareiye onnatepa wiiniwa murima. (Masiposipo 13:12) Khalai waari woochuneyaxa athiyana otheliwa ni okhalano anamwane. Ti nthowa nene Rakele, mwaara a Yakopo aakhaleiye oohica vaavaa ahaaweryeiye orupala naamwi murokora awe aawerya. (Maphatxuwelo 30:1, 2) Mu ilapo ikina, achu ancipale anneemererya wi ti wookhweleya okhalano anamwane ancipale. Achu annaakoha mamisiyonaariyo anakhala mu ilapo seiyo  ntakhara heeni hanakhalano mwaana mmoha mano. Naamwi mamisiyonaario yaatharihenle nthowa neni, akina nlelo annaloca eriki, “ninnookhupanyeryani!”

⁷ Muthokororye yootakiherya ekina. Murokora mmoha onakhala o Inklatera aanachuna okhalano anamwane. Vaavaa aasuwenleiye wi haahaala okhalano anamwane, owo aahitepa wiiniwa murima. Voocharela owo ni iyawe yaalakelela ompoleya mwaana. Nyenya mu ilukuluku ikina owo aaninla. Owo aahiloca ariki, “koosuwela wi ompoleya mwaana hori ntoko okhalano mwanaka.”

⁸ Piipiliya onaloca wi muthiyana “oni avuluwele oyara wawe.” (1 Timóteo 2:15) Nyenya eyo henataphulela wi onahaala okhalano ekumi yoohimala nthowa na okhalano anamwane. Vano teevi eri yootaphulela ya eciciri ela? Mayi onnakhala ooweiwa vancipale aakhapelelaka anamwane ni echoko awe. Eyo ennamukhaviherya osepa ichu ntoko orakama nlumi naari osuwela sa mwaneene mu ichu ihinamvolowela. (1 Timóteo 5:13) Naamwi hiiha, owo nlelo onamukhalano makacamiho mu othela wawe naari veemusini.

9. Makacamiho taani makina atheli anakumanaayano?

⁹ Makacamiho mamoha a yaala atheli anakumanaayano ori omuyeleela oothelanaaya. Naamwi yuupuwelaka wi eyo hiyaaphwanela waakhumelela, ancipale annawerya ovilela nikacamiho nenla ntokotoko. Mweeparipari Akristu anneemererya yoororomeliha ya ovinya mookhwani, nave eyo ennaavaha nihakalaliho nawaaca. (Yohani 5:28, 29) Mmasu awe, Tiithi ahu, Yehova, oolaiherya ichu sincipale inanihakalaliha variyari va ilukuluku soovila. Vano hankooni noone mukhalelo alapeli a Yehova yaakhenlaaya nihakalaliho nenlo ni mukhalelo naakhavihenryaaya.

10. Ana aahakalalihiwe mwawiihai? (Moone eruku yoopacerya.)

¹⁰ Muthokororye yeeyo yeeren’ye ni Ana mwaara a Elikana. Owo aanachuna okhalano anamwane, nyenya haayara. Nave namwaaceiwaawe Fenema aanayara. (Mwaalakhanye 1 Samuwele 1:4-7.) Wi atepihe mwaha, Fenema aanamulamwiha Ana “muyakha ti muyakha” nthowa na ohiyara. Ela yaanamwiicela vancipale Ana. Tiheeni aapankeiye wi aphwanye nihakalaliho? Owo aahivekela wa Yehova. Ana aahiya o nipuro na malapelo a Yehova nave aahivekela mu elukuluku yincipale. Aahimveka Yehova wi amvahe mwaana, nave owo aanaroromela wi Yehova aahaala omukhaviherya. Amanle ovekela, owo aahikhala phaama nave “winiwa murima wammalela.” (1 Samuele 1:12, 17, 18) Ana aanasuwela wi Yehova aahaala omvaha mwaana naari omuhakalaliha mmukhalelo mukina.

11. Nivekelo nni nnihakalihe hai?

 ¹¹ Woona wi naachu oohiphaameya nave nnakhala mu elapo yeela ya Satana, nnahaala otitelela okhalakano makacamiho. (1 Yohani 5:19) Nyenya nookhalano nikhaviheryo. Nnanwerya ovekela wa Yehova “Muluku a nihakalaliho nothene.” Ti yeeyo Ana eenreiye. Ana aamuleela Yehova mukhalelo ooneiye nave aampachaanyerya mmavekeloni wi amukhaviherye. Mmukhalelo mmohamoha, wakhala wi ninnakumanano makacamiho, nnaphwanela opaka sincipale opwaha pahiru omuleela Yehova nikacamiho nahu. Hiyaano nnaphwanela opachaanyerya mmavekelo mwa yoowo wi anikhaviherye nave nimuleele moonelo ahu.—Filipi 4:6, 7.

12. Tiheeni yaamukhavihenrye Ana okhala oohakalala moohipwacha makacamiho awe?

¹² Akhweya nnamukhala oothananaxa nthowa na ohikhalano anamwane naari okhwa wa oosiveliwa ahu. Nyenya nlelo nnanwerya ophwanya nihakalaliho. Muthokororye yaweereya ya Ana, yoowo aakhanle mu elukuluku ya Yesu. Imanle miyakha mithanu namiili atheliwe, iyawe aahikhwa. Nave enakhala wi owo haarino anamwane. Vano tiheeni yaamukhavihenrye? “Hàhiya empa ya Muluku.” Naamwi aarino iyaakha 84 sa oyariwa, owo haahiyerenrye oya mu empa ya Muluku wi avekele ni omulapela Yehova. (Luka 2:37) Ti yeeyo yaamukhaviherya okhala oohakalala moohipwacha makacamiho awe.

13. Asinthamwene eeparipari eni enikhaviherye hai vaavaa amusi ahu ananthananihaaya?

¹³ Nnanweryatho ophwanya nihakalaliho moorweela wa asinthamwene eeparipari a mmulokoni. (Masiposipo 18:24) Paula aarino pahiru iyaakha thanu vaavaa amamaawe yaahin’yaaya omulapela Yehova. Paula aahitepa othanana, nave ichu saari soovila wa yoowo. Nyenya voocharela piyoneera mmoha iichaniwa Anne aahimulipiha nave aanamuthokororya. Paula onnaloca: “Naamwi Anne ahaari muhimaaka, kaahoona osivela nnikhaviheryo nawe. Eyo yaahikikhaviherya otitelela omulapela Yehova.” Ovinyerya vaavaa amamaawe yaahikookela  mmulokoni, nave ela yaamweeriha Paula okhala oohakalala. Anne tho ori oohakalala woona wi oomukhaviherya Paula otitelela omurumeela Yehova.

14. Nnaphura hai vaavaa nnaahakalalihaahu akina?

¹⁴ Vaavaa nnakhalaahu ooweiwa nipakaka ichu saphaama wa akina, wiiliwiili ninnacuwala makacamiho ahu. Ntoko yootakiherya, arokora ancipale atheliwe naari ahitheliwe, annasuwela wi vaavaa analaleeryaaya michaka saphaama sa Omwene wa Muluku ni akina, awo analapa ni Yehova nave annapaka yookhwelaawe. Eyo ennaweeriha okhala oohakalala. Mweeparipari, oothene ahu nnanwerya waakhaviherya akina moorweela wa olaleerya michaka yaphaama vamoha. Nave vaavaa nnapakaahu ichu saphaama ntakhara anna ni arokora ahu, ninnaataana ni yaawo. (Filipi 2:4) Ti yeeyo murummwa Paulo aapankeiye. Owo aanaakhapelela akina hiiha ntoko “mai  onakhapeleleiye anawe.” Paulo tho aanaahakalaliha nave aanaalipiha asinnawe “ntoko tithi ni anawe.”—Mwaalakhanye 1 Tesalónika 2:7, 11, 12.

15. Taani orino murici wa waahusiha anamwane vooloca sa Yehova?

¹⁵ Nni nihakalalihe hai imusi mmulokoni? Ikwaha ikina, ale ari avyaani mmulokoni akhweya anamuniveka wi naakhaviherye waahusiha anaaya vooloca sa Yehova naari omuhuserya Piipiliya ni anaaya. Piipiliya onnooniherya wi Yehova ohaavaha asitiithi murici wa waahusiha ni waavyakiha anamwane aya. (Masiposipo 23:22; Éfeso 6:1-4) Naamwi ilukuluku ikina akina ehaalaka okhaviherya, ti wookhweleya asitiithi waahusiha anaaya. Ti woochuneya asitiithi oloca ni anaaya moohihiyererya.

16. Tiheeni nnaphwanelaahu wuupuwela vaavaa nnaakhaviheryaahu anamwane?

¹⁶ Wakhala wi tiithi ooniveka omuhusiha Piipiliya mwanawe mwamuthiyana naari mwaamulopwana, ti yaphaama wuupuwela wi hiyaano hinaano olamulelo wa asitiithi. Ikwaha ikina nnamphiyera omuhusiha mwaana yoowo asitiithi awe ahiri mu eparipari. Vaavaa nnaahusihaahu anamwane ahiri awihu, onamukhala wamiruku waahusiha owannyaya wakhala wi asitiithi aya naari Namoona a Yehova awiichwelavo ori vakhiviru naari ohuserya vanlakani. Mmukhalelo yoola hinimweeriha muchu mukina okhalano moonelo woonanara. Vakina vaya, akhweya asitiithi mukhataaya anahaala owerya waahusiha anaaya vooloca sa Yehova.

17. Anamwane eni yaahakalalihe hai akina a veechokoni?

¹⁷ Amiravo yaawo ahusenrye omusivela Yehova ananwerya waahakalaliha ni waalipiha amusi aya. Mwawiihai? Moorweela wa waacicimiha ni waakhaviherya asitiithi aya mmikhalelo soohiyanahiyana. Navetho vaavaa anamwane anakhalaaya ororomeleya wa Yehova, eyo ennalipiha emusi yoothene. Ehaakumve Maahi Mancipale, Lameke aanamulapela Yehova. Owo aahiloca sa mwanawe Nowa. “Mwana ola onamunihakalaliha mmitekoni mwawe sowalamela, wa nthowa na etxhaya yulumeliwe t’Apwiya.” Yooloherya ela yaahaakhwanela emanle Maahi Mancipale, vaavaa Yehova aamalinheiyevo onanara veelaponi. (Maphatxuwelo 5:29; 8:21) Olelo, anamwane yaawo anatitelela olipiha nroromelo naya mwa Yehova ananweryatho waahakalaliha amusi aya. Awo ananwerya omuhakalaliha muchu ti muchu a veemusini ovilela makacamiho a hiihaano ni oomwaahiyu.

18. Tiheeni eni enikhaviherye ovilela moohipwacha nikacamiho nneeraahu nikumaneno?

¹⁸ Achu a Yehova olelo annaphwanya nihakalaliho moorweela wa nivekelo, wuupuwelela sootakiherya sa Mpiipiliya, ni okhalano onthamwene ni anna ni arokora aya. (Mwaalakhanye Salumu 145:18, 19.) Hiyo noosuwela wi Yehova ori ooreheryeya wi anihakalalihe, nave owo mweeparipari onahaala onikhaviherya ovilela nikacamiho vyakala nneeraahu nikumaneno!