1. Taani aakhavihenrye otikitherya muloko wo Filipi?

VAAVAA murummwa Paulo, Sila, Luka vamoha ni Timoteo yaaphin’yaaya o Filipi nipuro naalamuleliwa ni a Roma, awo yaahaaphwanya achu awaaca yaawo yaasiveliwe ni michaka sa Omwene. Anna yaala asese amvai yaakhaviherya otikitherya muloko muvyaani, nave arummwa oothene yaapacerya othukumana vamoha, akhweya vaate va murokora mmoha yoowo aawaakhela aleco awiichaniwa Litiya.—Saw. 16:40.

2. Nikacamiho taani muloko owo waahoolenlaaya?

² Muloko yoole muvyaani waahoolela nikacamiho. Satana aahitannya wiica orweela wa achu akina, nave awo yapacerya wiica muteko wa olaleerya. Paulo ni Sila yaaphariwa, emaniwa ni ekopo nave ewaleliwa. Emanle okumihiwa, awo yaahaasekurya arummwa avyaani wi yaalipihe. Voocharela, Paulo, Sila ni Timoteo yaarowa, nyenya Luka atitelela okhala o Filipi. Vano Muloko muvyaani waawenrye hai ovilela ni makacamiho? Nnikhaviheryo na Munepa wa Weela wa Yehova, anna yaala avyaani yaahititelela omurumeela Muluku ni murima woothene. (Fil. 2:12) Moohikhwa minikwa, Paulo anwerya wiirumiha ni yaawo!

3. Mwawiiwanana ni Filipi 1:9-11, tiheeni Paulo aavekeiye mu nivekelo?

³ Iyaakha khumi ohoolo waya, Paulo aahirepela ekaarata muloko wo Filipi. Mu ekaarata yeela, nnawerya woona ophiyerya mweeryo taani Paulo aasiveleiye anna yaale. Owo oorepa: “Kinnookhwelaani nyuwo oothene, nniphwanya na Yesu ori Kristu.” (Fil. 1:8) Mu ekaarata emohamoha yeela, Paulo ooloca wi aanavekela ntakhara yaawo. Owo aanamveka Yehova wi aakhaviherye anna winnuwiha osivela waya, wi esuwele ichu seiho saari soochuneyaxa, ohikhalano nthowa, ohaakwaculiha akina, ni osareya sawiima sawookololowa. Masu yaala eeparipari a Paulo hiyaphariheleya pahiru wa Afilipi. Hiyaano tho nnanwerya ohuserya sincipale orweela wa masu yaala. Mwa yeeyo, hankooni naalakhanye yeeyo Paulo aarepenleiye Afilipi. (Mwaalakhanye Filipi 1:9-11.) Voocharela, nnahaala othokororya masu oochuneyaxa  yaawo Paulo aalonceiye ni waalikhela mukhalelo nnahaalaahu opharihela mamoha ti mamoha a yaawo.

4. (1) Mwawiiwanana ni 1 Yohani 4:9, 10 teevi eri yaawooniherya etokweene ya osivela wa Yehova ntakhara hiyaano? (2) Omusivela wahu Muluku onaphwanela okhala wawi hai?

⁴ Yehova onnanisivela vancipale. Yawooniherya etokweene ya osivela wawe ti yawi aamurumiha Mwanawe veelaponi yavathi wi akhwe ntakhara soocheka sahu. (Mwaalakhanye 1 Yohani 4:9, 10.) Osivela otokweene wa Yehova onnanceenyerya omusivela tho yene. (Aro. 5:8) Vano omusivela wahu Muluku onaphwanela okhala wawi hai? Yesu aahaakhula nikoho nenla vaavaa aalonceiye ni Mfarisi mmoha: “Waakhweleke Apwiya Muluku aa ni murima aa woothene ni miruku aa yoothene.” (Mat. 22:36, 37) Murima ahu honaphwanela okhala wookawanyeya. Echu nnachunaahu tiyawi omusivela wahu Muluku winnuweke nihiku ti nihiku. Hiiha ntoko murummwa Paulo olonceiye wa Afilipi, osivela wahu onaphwanela ‘otepaka winnuwa.’ Tiheeni nnaphwanelaahu weera wi omusivela wahu Yehova winnuweke nihiku ti nihiku?

5. Tiheeni eni yeerihe osivela wahu okhala woolipa?

⁵ Wi niwerye omusivela Muluku, nnaphwanela omusuwela. Piipiliya oni: “Muchu ohinamukhwela mukhweiye hamusuwenle Muluku, vawi Muluku ti osivela.” (1 Yoh. 4:8) Murummwa Paulo ooloca wi omusivela wahu Muluku waahaala okhala woolipa wakhala wi nookhalano ‘osuwela wawaakhwanela ni waanyiherya’ wa Yoowo. (Fil. 1:9) Vaavaa naapacenryaahu omuhuserya Piipiliya, naahipacerya omusivela Muluku naamwi nihisuwelaka mikhalelo sawe soothene saphaama. Moovira wa elukuluku, naahihuserya ichu ikina sawaaca vooloca sa Yehova, nave osivela wahu ntakhara yene waanunnuwa moohihiyererya. Hinnachuna wi osivela wahu omaale winnuwa. Wa nthowa nenla, nnaphwanela woonaka yoohuserya ya Piipiliya ni wuupuwelela okhala echu yoochuneyaxa mookumini.—Fil. 2:16.

6. Mwa wiiwanana ni 1 Yohani 4:11, 20, 21, mukhalelo taani oni weerihe osivela wahu otepaka winnuwa?

⁶ Osivela otokotoko wa Muluku ntakhara hiyaano onahaala onceenyerya waasivelaka anna ni arokora ahu. (Mwaalakhanye 1 Yohani 4:11, 20, 21.) Akhweya nnamuupuwela wi waasivela anna ni arokora eri echu enamoona weereya mwaayiini. Mweeparipari, hiyaano nnamulapela Yehova nave ninniilipiserya otakiherya mikhalelo sawe saphaama. Nave tho ninnachara yootakiherya ya Yesu, yoowo onisivenle ophiyerya ovaha ekumi awe ntakhara hiyaano. Nyenya ikwaha ikina, wiiwelela nlamulo na osivelana mukina ni mukhwaawe honakhala wookhweya ochariha. Moone yootakiherya emoha yeeren’ye mmuloko wo Filipi.

7. Tiheeni nnahuseryaahuvo orweela wa ekano ya Paulo yeeyo amvanheiye Ewootiya ni Suntuke?

⁷ Ewootiya ni Suntuke yaari arokora eeli amvai yaawo yaalapa “vamoha” ni murummwa Paulo. Woonaru, akhweya arokora ala yaakhalano makacamiho mukina ni mukhwaawe nave yaahiya okhala asinthamwene. Mwa yeeyo, vaavaa aarepenleiye ekaarata Afilipi, Paulo aahimuromola Ewootiya ni Suntuke mooluluwanya nave aahaavaha ekano yookwakwaleya ariki: “Mwiiwananeke mwa Aphiya.” (Fil. 4:2, 3) Paulo aahoona tho okhala ya miruku oovaha ekano ela wa muloko woothene: “Mweereno soothene muhaapanaka naari waakhulana.” (Fil. 2:14) Moohikhwa, minikwa ekano ela yaari yaphaama, ohiya pahiru wa arokora ale nyenya tho ntakhara muloko woothene wi yooniherye osivelana wa mukina ni mukhwaawe.

8. Nikacamiho taani ntokweene nni nceecheihe osivela wahu ntakhara anna ni arokora ahu, nave nni niwerye hai ovootha?

⁸ Hiiha ntoko yeeren’yaaya ni Ewootiya ni Suntuke, waasivela wahu anna ni arokora onamukhala wooceecheya orweela mwa  othokororya soohesa sa akina nthowa na ohiphaameya. Oothene ahu ninnahesa nihiku ti nihiku. Nyenya wakhala wi nnatikitheryeya pahiru mu soohesa sa akina, waasivela wahu anna vamoha ni arokora onampacerya ovukuwa. Ntoko yootakiherya, mwaanyiherye wi munna mmoha oocuwala okhaviherya weeliha mu Empa Yoomwene. Akhweya nyuwaano munnakhala oonyeenyeya ni yeeyo. Wakhala wi noopacerya orepela soohesa soothene nsuwenlaahu seiyo munna opankeiye, onyeenyeya wahu onamwaaceereryeya nave omusivela wahu onamvukuwa. Waakhanle wi mookhalano nikacamiho ntoko nenla ni munna mmulokoni, yaahaala okhala yaphaama wuupuwela eparipari ela: Yehova onnawerya woona ohiphaameya wa munninyu, navetho ohiphaameya wanyu. Moohipwacha ohiphaameya yoowo, Yehova onnamusivela munna ole vamoha ni nyuwaano. Wa nthowa nenlo, nnaphwanela otakiherya osivela wa Yehova nave nikhaleno moonelo woophwanelela vooloca sa annihu. Vaava nniilipiseryaahu wi naasivele anna ni arokora ahu, ninnakhala awiiwanana moopwahaxa ni yaawo.—Fil. 2:1, 2.

9. Ichu taani siri ‘saphaamasha’ Paulo oromonleiye mu ekaarata awe wa Afilipi?

⁹ Munepa waweela waamverela murummwa Paulo oloca wa Afilipi, navetho ni Akristu oothene—wi yaaphwanela “ohiyaniha yeeyo eri yaphaamasha [naari yoochuneyaxa].” (Fil. 1:10) Variyari va ichu saphaamaxa, wookhalavo weeliha nsina na Yehova, waakhwanela wa yoolakelela awe navetho murecele vamoha ni wiiwanana mmulokoni. (Mat. 6:9, 10; Yoh. 13:35) Wakhala wi chiryene ninnamusivela Yehova, ichu seiha inahaala okhala soochuneya tho wa hiyo.

10. Tiheeni nnaphwanelaahu weera wi Yehova anooneke ntoko achu ahirino nthowa?

¹⁰ Paulo aahiloca tho sa “ohikhalano nthowa.” Eyo henataphulela wi nnaphwanela okhala oophaameya. Hiyaano haniwerya okhala oophaameya hiiha ntoko Yehova okhanleiye. Nyenya wakhala wi ninniilipiserya winnuwiha osivela ni ohiyaniha yeeyo eri yaphaamaxa, Yehova onahaala onoonaka ntoko achu oohikhalano nthowa. Mukhalelo mmoha wa wooniherya osivela ori opaka soothene nnaweryaahu wi nihikhaleno nthowa na waakwaculiha akina.

11. Ntakhara heeni nnaphwanelaahu osepa waakwaculiha akina?

¹¹ Nihusiheryo na ohaakwaculiha akina olopola otokweene chiryene. Nni niwerye hai omukwachuliha munna naari murokora? Akhweya moorweela wa ichu nnathanlaahu, mathatelo, ikuwo nnawaraahu naari muteko nryaahuno. Akhweya nyuwaano munamulakelela opaka echu ehiri yooheseya. Nyenya wakhala wi yoothanlaanyu ennuukhula yawuupuxerya-ya-murima ya muchu mukina nave owo akwaculeya nthowa na yoothanlaanyu, mwaha owo onamukhala mutokweene. Yesu ooloca wi muchu sintoko yoowo yaamukhala yaphaama omakeleliwa nsilo noolimela muxikoni ni oriheliwa mphareya ohiya okwaculiha emoha sa ipucepuche sawe.—Mat. 18:6.

12. Tiheeni nnahuseryaahu orweela wa yootakiherya ya mutheli ori piyoneero?

¹² Moone yootakiherya ya mutheli mmoha yoowo ori piyoneero aacharinhe olopola wa Yesu. Mmulokoni mwaya, aahikhalamo mutheli mmoha yaawo yaapatisiwe hiihaanoru, yaaphuiwe mu emusi yaarino moonelo wookotakota, nave yaheemererya ichu sawaaca. Wa nthowa na yeeyo, awo yuupuwela wi Akristu hanaphwanela oya onipuro onooniwawo ixilema—naari mano woona ixilema seiho sahaari sooheseya. Vanihikuni, mutheli ole aari piyoneero aya onipuro onooniwawo ixilema. Nyenya eyo yaahiwuukhula anna avyaani ale. Ovinyerya vaavale, mutheli ole aari piyoneero haakookenle woona ixilema ophiyerya mutheli ole aarino moonelo wookotakota avyakinhe yawuupuserya-ya-murima nave  iiwexenxe phaama yeeyo eri yaphaama ni yoonanara. (Ahe. 5:14) Mu weerano yeela, mapiyoneero ale yaahooniherya wi yaanaasivela anna aya avyaani ohiya pahiru mmasu, nyenyatho mu saweera.—Aro. 14:19-21; 1 Yoh. 3:18.

13. Naahaala omweeriha hai munna opaka yoocheka?

¹³ Hiyaano tho nnawerya omukwachuliha muchu orweela mwa oloca echu eni emweerihe opaka yoocheka. Mwawihai? Muupuwele yaweereya ela: ohuserya mmoha a Piipiliya, ohiilipiserya vancipale mu elukuluku yawaaca, wi awerye ohiya yookhovelela ya ohapaliwa. Owo onoona wi, mwawiiwanana ni mukhalelo awe yaamukhala yaphaama ohiya owurya soohapaliha soothene. Oohuserya yoola a Piipiliya onnaya vahoolo nave onnapatisiwa. Moovira wa elukuluku, munna a mmulokoni onnanwopa munna muvyaani owo wi yalye vamoha nave onnamvaha yoowurya yoohapaliha, ariki: “Vano nyuwaano moopatisiwa; muhaakhela munepa waweela wa Yehova. Mukhalelo mmoha wa sawiima sa munepa waweela ori wiihiiha, tahi yeeyo? Wakhala wi munniihiiha, munanwerya owurya muhipwanhe mphimo.” Iho miruku soohiphwanelela! Nkaanyiheryani yeeyo yahaala weereya ni munna yoowo muvyaani wakhala wi oochariha miruku seiya.

14. Ti mwawihai mithukumano sahu inanikhaviheryaaya ochariha ohoolela onavahiwa mu Filipi 1:10?

¹⁴ Mithukumano sahu sinnanikhaviherya opharihela ohoolela onavahiwa mu Filipi 1:10. Yoopacerya, mwaha onathokororyiwa mmithukumanoni onnanuupuserya echu yeeyo eri yoochuneyaxa wa Yehova. Yanawiili, mithukumano sinnanooniherya mukhalelo wa ochariha yeeyo nihusenryaahu, nave eyo ennanikhaviherya ohikhalano nthowa. Nave yaneeraru, mithukumano sinnanceenyerya ‘olipiseryana mu osivela ni  miteko saphaama.’ (Ahe. 10:24, 25) Vaavaa nnalipihanaahu wiiliwiili, omusivela wahu Muluku vamoha ni anna ni arokora ahu onnaacereryeya. Nave wakhala wi murima ahu woosareya ni mikhalelo seiha miili sa osivela, hineemererya weera echu vyakala eni yaakwaculihe anna ni arokora ahu.

15. Enataphulela heeni osareya ni “sawiima sawookololowa”?

¹⁵ Mu nivekelo, Paulo aahiveka wi Afilipi ‘esareye sawiima sawookololowa.’ (Fil. 1:11) Moohikhwa minikwa “sawiima sawookololowa” seiyo, sinnaphitaanyerya omusivela Yehova vamoha ni achu awe. Iho saahaala ophitaanyerya tho sooloca saya wa akina vooloca sa nroromelo naya wa Yesu ni ewehereryo aya yootikhiniha. Mu Filipi 2:15, Paulo aaloca ni Afilipi wi yaaphwanela ‘okhala mithiko soomwaleela veelaponi yavathi.’ Niphwanaphwaniho nla ti noophwanelela, ntakhara Yesu aawiichana oohuserya awe wi yaari “omwaleela wa elapo.” (Mat. 5:14-16) Nave ahaaruma oomuchara awe wi ‘yaapake oohuserya’ nave wi awo yamukhala “anamoona . . . ophiyerya weiwo elapo ekotenlayawo.” (Mat. 28:18-20; Saw. 1:8) Mwawiihiiha, mukhalelo mukina wa wiimiha “sawiima sawookololowa” ori opaka makupa mmuteko yoola woochuneyaxa ophiyerya nnaweryelaahuvo.

16. Ti mwawihai Filipi 1:12-14 onooniheryeiye wi nnawerya omwaleelaka ntoko mithiko naamwi nihoolelaka makacamiho? (Moone eruku ya ekaapa.)

¹⁶ Moohiphwacha mukhalelo ahu, hiyaano nnanwerya waaryaka ntoko mithiko. Ikwaha ikina, mukhalelo mmoha yoowo onakhala ntoko wi nikacamiho onanwerya okhala elukuluku yaphaama wi nlaleerye michaka saphaama. Moone yaweereya ya murummwa Paulo, owo aahirepa ekaarata wa Afilipi vaavaa aawaleliweiye mu empa o Roma. Nyenya omakiwa ni onyooro hiwaamweerinhe Paulo omaala olaleerya wa alipeleli ni achu yaawo yaamuxekurya. Moohipwacha mukhalelo awe, Paulo aahilakelela otitelela olaleerya, nave eyo yaahaakhaviherya anna  ni arokora okhalano nroromelo ni olipa murima mu “olaleerya masu a Muluku ehoovakaru.”—Mwaalakhanye Filipi 1:12-14; 4:22.

17. Mvahe yootakiherya emoha ya anna a mmahiku ahu yaawo aniimiha sawiima saphaama moohipwacha mikhalelo saya soovila.

¹⁷ Anna ni arokora ahu ancipale annatakiherya olipa murima wa Paulo. Awo anakhala mu ilapo seiyo muteko ahu woolaleerya empa ni empa onahiiheriwaayawo, naamwi hiiha annaphwanya mikhalelo mikina sa olaleerya michaka saphaama. (Mat. 10:16-20) Mu elapo ekina mummo muteko ahu onawatiihiwaayawo, ooweherya a ekulucu aahiloca wi mulaleeryi ori oothene aaphwanela okhwaaniherya “ekulucu awe,” eyo tiwi olaleerya wa amusi, amwacamani, asinthamwene o mutekoni naari oosikola ni yaale yaasuwenlaaya. Ivinrevo iyaakha piili, miloko mu ekulucu yeele sahaacereryeya mootikhiniha. Akhweya muteko wa olaleerya mu empa ni empa honahiihiwa mu elapo ahu. Naamwiihiiha, yootakiherya ya anna yaala awiivelela ennanihusiha echu yoochuneya: Ilukuluku soothene mwaavyavye mikhalelo sa opaka owetha wanyu mu orummwa, nave muroromele wi Yehova onahaala woovahaani ikuru seiyo munakhwelaanyu wi mvoothe nikacamiho.—Fil. 2:13.

18. Tiheeni munaphwanelaanyu olakelela opaka?

¹⁸ Mmahiku yaala oohoosa nnakhalaahumo, mukhale olakelela ochariha ekano ya Paulo yeeyo aarepenleiye anna o Filipi: ohiyaniha yeeyo eri yaphaamaxa, ohikhalano nthowa, ohaakwaculiha akina, ni osareya sawiima sawookololowa. Mweerano hiiha, osivela wanyu onamutepa winnuwa nave munahaala omucicimiha Tiithi anyu oosivela, Yehova.