APWANNE yookhalavo echu mwaahaalaanyu osiveliwa opaka mmulokoni nyenya vano hamunawerya? Akhweya ori murici yoowo munna mukina oreiyeno. Naari murici yoowo mwaaraanyuno khalai. Nyenya, iyaakha, okumi wookotakota, othowa wa ichu soomwiilini, naari mirici sa veemusini sinnavukula yeeyo munachunaanyu opaka. Naari akhweya, nthowa na matorokelo mmarehereryo, ehiweerihaani omaala olapa muteko yoowo mwaapankaanyu mu iyaakha sincipale. Moohipwacha mathowa ene, nyuwaano akhweya munnoona wi hamunapaka soothene ntoko mwaachunelaanyu opaka mmuteko wa Muluku. Mmikhalelo sintoko seiha, enniiwexexeya wi mu ikwaha ikina munamukhala oosokonyeryeya. Naamwiihiiha, muni nwerye hai ovootha miyoonelo soonanara ntoko oceecheya, esara, naari winla ikuhu? Tiheeni munaphwanelaanyu opaka wi muhiyeleele ohakalala?

Nnanwerya ohuserya mukhalelo wa ohiyeleela ohakalala moorweela wa othokororya yootakiherya ya Yohani Mpatisi. Yohani aahikhalano mirici saphaama mmuteko wa Yehova, nyenya haawehererya wi okumi awe waahala ovoloweliwa ni mukhalelo woovila yoowo ahuupuweleiye. Akhweya haanyiherya wi aahaala omaliha elukuluku yincipale mukalaposo opwaha elukuluku aamalinheiye mmuteko awe. Yohani aahititelela okhala oohakalala, nave aahikhapelela moonelo yoowo mu okumi awe woothene. Tiheeni yamukhaviherye? Nave tiheeni nnaphwanelaahu opaka wi nihiyeleele ohakalala naamwi nihoolelaka sawuukhula?

Variyari va mweeri wa Apirili mu eyaakha ya 29, Yohani Mpatisi aahipacerya muteko yoowo Yehova amvanheiye, eyo tiwi waarehererya achu ntakhara orwa wa Mesiya, ariki: “Rukunushani murima, ntakhara omwene wa wirimu ohaacamela.” (Mat. 3:2; Luka 1:12-17) Achu ancipale yaaheeravo echu. Miloko sa achu a mapuro mancipale yaanapaka mikwaha soorakamela wi yiiwe michaka sa Yohani, nave ancipale yaanacharuwa soocheka saya nave yaanapatisiwa. Yohani moolipa murima aanaalopola ahooleli a malapelo yaawo yiisoona okhala eekhaikhai vooloca sa othoriha yoowo yaahaalaaya waakhela waakhanle wi hatoronke mukhalelo aya. (Mat. 3:5-12) Owo aahoona makuchuwelo a muteko mu Otupuru a eyaakha ya 29, vaavaa ampatinseiye Yesu. Ovinyerya elukuluku yeele, Yohani aanaaleela achu wi emuchareke Yesu, Mesiya aalaiheryiwe.—Yoh. 1:32-37.

 Muteko wa Yohani Mpatisi mweeparipari waari wavameekhaaya. Ophiyerya wi Yesu aaloca: “Mwa achu ayariwe ti muthiyana, haavo mutokweene ompwanhe Yoohani mPatisi.” (Mat. 11:11) Moohikhwa minikwa, Yohani aahitepa ohakalala ni mareeliho aakhenleiye. Hiiha ntoko Yohani, anna ni arokora ancipale olelo annaakhela mareeliho mancipale oorweela wa Yehova. Moone yootakiherya ya munna Terry. Owo ni mwaariye, Sandra, yaari mmuteko wa elukuluku yoothene opwaha iyaakha makhumi mathanu. Terry onnaloca: “Miyaano kaahikhalano mirici mincipale soohakalaliha. Kaahirumeela ntoko piyoneero, Petelita, piyoneero avameekhaaya, ooweherya a ekulucu, ooweherya a etistritu, nave vano wanawiili ntoko piyoneero avameekhaaya.” Waakhela mirici mmarehereryo a Yehova ennaruuha ohakalala, nyenya hiiha ntoko nnahaalaahu ohuserya orweela wa yootakiherya ya Yohani Mpatisi, otitelela okhala oohakalala onnachuneya wiilipiserya elukuluku mikhalelo sinatorokeyaaya.

Echu yoovitheya yaamukhavihenrye Yohani Mpatisi ohiyeleela ohakalala waari otitelela othamalela mirici aareiyeno. Muthokororye yootakiherya emoha. Yesu amanle opatisiwa, muteko wa Yohani waahipacerya ovukuwa, oniiha muteko wa Yesu waaceereryeyaka. Oohuserya a Yohani yaahuukhuwa vooloca sa yeeyo nave yaahiloca wa yoowo: “Yoole mmweerenlaanyu onamoona, onampatisa, nave achu oothene anaya wa yoowo.” (Yoh. 3:26) Nave, Yohani onnaakhula: “Yoole orino mwaariye, mulipa oothela; nthamwene onamukhaviherya mulipa oothela, owo tho onnamuwiriyana. Iiwa yooloca awe, onnahakalala. Ohakalala wene weiwo wookhwaaniheriwa mwa miyo!” (Yoh. 3:29) Yohani haavaanyihana ni Yesu, nave huupuwenle wi murici awe waanapwatihiwa ni muteko mutokweene wa Yesu. Moohiyana, Yohani onnatitelela okhala oohakalala nthowa nawi annavaha esisapo murici awe wa okhala “nthamwene onamukhaviherya mulipa oothela.”

Moonelo woophwanelela wa Yohani waahimukhaviherya okhala oohakalala moohiphwacha makacamiho oothene yaakhumelenle mu orummwa awe. Ntoko yootakiherya, Yohani aari Munasiri oyariwa wooyariwa, nave mwa yeeyo owo haaphwanela owurya eviinyu. (Luka 1:15) Yesu alocaka mukhalelo wa okumi wookhweya wa Yohani aahiloca: “Oorwa Yohani ohinalya naari ohinawurya.” Mmakupa makina, Yesu ni oohuserya awe hiyaari vathi va ohiiheryiwa ichu, nyenya yaahikhalano okumi wootaphuwa. (Mat. 11:18, 19) Opwaha yeeyo, Yohani hapanke sootikhiniha. Nyenya owo aahisuwela wi arummwa a Yesu, ophitaanyerya akina yaari oomuchara awe yahaala waakhela owerya yoola. (Mat. 10:1; Yoh. 10:41) Ohiya wuupuwela vancipale vooloca sa oohuserya awe ni oohuserya a Yesu, Yohani aaweiwe ni muteko yoowo Yehova amvanheiye.

Wakhala wi ninnavaha esisapo murici ahu mmuteko wa Yehova, nnanwerya okhapelela ohakalala wahu. Terry yoowo oromoliwe wuupaceryani, oriye, “Miyaano kaanatikitheryeya mu orummwa ti orummwa kaakhelaaka.” Uupuwelaka okumi awe mmuteko wa elukuluku yoothene, owo oriye,“Nkaano ekeerelani, pahiru saweereya soohakalaliha.”

Nnanwerya okhala oohakalalasa wakhala wi ninnuupuwela vooloca sa yeeyo eneeriha murici mmuteko wa Yehova okhala wavameekhaaya chiryene. Eri ekari ya okhala “amulapeli ni Muluku.” (1 Kor. 3:9, BNM) Ekaruma yasisapo enahaala otitelela okhala yaphaama wakhala wi wiiliwiili ninnakhapelela. Mmukhalelo woolikana, nnahaala otitelela okhala oohakalala wakhala wi ninnatitelela wuupuwela vooloca sa ncicimiho nryaahuno olapa vamoha ni Yehova. Nnahaala osepa olikanyiha muteko ahu ni wa akina. Hinnahaala wuupuwela wi muteko Yehova onivanheiye hiwaanono esisapo opwaha wa akina.—Gal. 6:4.

Yohani Mpatisi akhweya aasuwela wi muteko awe hiwaahaala omaliha elukuluku yincipale, nyenya akhweya haanyiherya wi waahaala omala mmukhalelo wootutuxa. (Yoh. 3:30) Mu eyaakha ya 30, sivinre miyeeri mithanu nammoha amanle ompatisa Yesu, Mwene Herote aahinwalela Yohani mukariposo. Naamwi ari mukariposo, Yohani aapaka soothene aaweryeiye wi atitelele olaleerya. (Mar. 6:17-20) Tiheeni yaahaala omukhaviherye otitelela ohakalala variyari va matorokelo yaale? Owo aatikitheryen’ye mu ichu soomunepani.

Vaavaa aareiye mukariposo, Yohani aahaakhela michaka vooloca sa ichu seiho Yesu aapakeiye. (Mat. 11:2; Luka 7:18) Yohani haarino minikwa wi  Yesu aari Mesiya, nyenya akhweya owo aaniikoha mmukhalelo taani Yesu aahaleiye okhwaaniherya soothene seihe Soorepa saalocaaya wi Mesiya ahaala weerano. Woona wi Mesiya aamukhala mwene, apwanne olamulelo wa Yesu waahaala opacerya moohilekela? Apwanne eyo yaahaala omweeriha Yohani ohuleliwa mukalaposo? Achunaka wiiwexexa phaama muteko wa Yesu, Yohani aahaaruma oohuserya awe apiili wi yamukohe Yesu: “Nyuwo mwa yoowo aahaawela orwa, hooye, nimuweheryeke mukina?” (Luka 7:19) Vaavaa oohuserya awe yaachinkaaya, Yohani aahaawiriyana moopwacha vaavaa awo yaatharihaaya vooloca sa openusa yoowo Yesu aapakeiye nave ni muchaka Yesu aarummeiye wi emuleele Yohani: “Oohoona annoona, oorakala anneeca, achu a ilepa annarehereriwa, oohiiwa anniiwa, achu ookhwa annaviihiwa, nave michaka yaphaama ennalaleeriwa, wa achu oohaawa.”—Luka 7:20-22.

Yohani Mpatisi moohikhwa minikwa aalipiheya ni yeeyo oohuserya awe yaatharinhaaya. Eyo yaahooniherya wi Yesu aanakhwaaniherya sooloherya vooloca sa Mesiya. Naamwi Yesu haahaala omoopola Yohani mukariposo, Yohani aasuwela wi muteko awe hiwaari wasiiyo. Moohipwacha mikhalelo sawe, aahikhalano mathowa a okhala oohakalala.

Hiihaa ntoko Yohani, wakhala wi nnatikitheryeya mu miyaha soomunepani, nnahaala owerya ovilela nuuhakalala ni opisa murima. (Kol. 1:9-11) Wi niwerye ovilela, nnaphwanela omwaalakhanya Piipiliya ni wuupuwelela. Eyo enahaala onuupuserya wi yeeyo nnapakaahu mmuteko wa Yehova tahi yasiiyo. (1 Kor. 15:58) Sandra ooloca: “Waalakhanya ekapitulu ya Piipiliya nihiku ti nihiku ennakikhaviherya omwaacamela Yehova. Eyo ennakikhaviherya otikitheryeya mwa Yehova, ohiya mwa miyo.” Nnanweryatho otikitheryeya mu soolokoha sa muteko wa Omwene, yeeyo eni enikhaviherye ohithokororya makacamiho ahu nave oweiwa ni yeeyo Yehova onaakhwanihereiye. Sandra ooloca: “Marehereryo a mweeri ti mweeri a JW Broadcasting^® annaneeriha wiisoona okhala vakhiviru va marehereryo a Yehova nave annanikhaviherya ohiyeleela ohakalala mu orummwa ahu.”

Variyari va elukuluku vakhaani ya orummwa awe, Yohani Mpatisi aalaleerya ni “munepa wa ikuru si Eliya.” Nave hiihaa ntoko Eliya, Yohani “aari muchu ntoko yeehu.” (Luka 1:17; Tiy. 5:17) Wakhala wi ninnachariha yootakiherya awe ya othamalela ni otikitheryeya mu omurumeela Yehova, nnanwerya tho otitelela okhala oohakalala mmuteko ahu wa Omwene, moohiphwacha yeeyo eni yeereye.