1-2. Tiheeni nnahaalaahu othokororya mmwaha yoola?

MUNOONA hai wakhala wi echu yeeyo mwaachunaanyu wunnyereriwa henaphiya mu elukuluku mwaawehereryaanyu? Apwanne munnakhala oonyeenyeya? Akhweya munniisoona ntoko Masiposipo 13:12 onaloceiye: “Owehererya woolekela waakhela, wiiceliha murima.” Hanka wakhala wi moosuwela wi echu yeeyo mwaawehereryaanyu hephin’ye ni mathowa oophwanelela? Ela akhweya enanweerihaani owehererya moopisa murima.

² Mmwaha yoola, nnahaala woona malakiheryo makina yaawo anahaala onikhaviherya ‘owehererya’ moopisa murima. (Mik. 7:7, BNM) Voocharela, nnahaala othokororya mikhalelo miili seiho inachuneya owehererya moopisa murima ophiyerya Yehova eenrevo echu. Wookuchulani, nnahaala woona mareeliho yaawo Yehova onahaaleiye waavaha yaawo ari oolakelela oweherya.

3. Masiposipo 13:11 onanihusiha eheeni?

³ Yoorepa ya Masiposipo 13:11 ennanihusiha ntakhara heeni nnaphwanelaahu okhala oopisa murima. Eyo eni: “Muhakhu woochimakela, waakuva ovukuwa, nto yoole woophwanya vakhaani vakhaani, onnaaceerereya.” Tiheeni yoorepa ela enanihusihaaya? Muchu a miruku onneera ichu moopisa murima, nave owo onnakhumelela phaama.

4. Nlakiheryo taani noochuneya nnaphwanyeya mu Masiposipo 4:18?

⁴ Masiposipo 4:18, BNM oni: “Ephiro ya atxhu awokololowa enakhala ntoko ekamama ya wosiselo enatxererya warya waya ophiyerya othana.” Masu yaala annooniherya mookwakwaleya mukhalelo Yehova onaakhaviheryeiye alapeli awe wiiwexexa yoolakelela awe nave owo oneerano eyo vakhaani vakhaani. Nyenya yoorepa ela ennanikhaviherya tho wiiwexexa mukhalelo  Mukristu onapakeiye matorokelo mu okumi awe wi atitelele omwaacamela Yehova. Winnuwa omunepani honeereya mwawaakuveya. Ennaviravo elukuluku. Wakhala wi ninnahuserya mwawiiseela ni opharihela miruku seiho nnahuseryaahu Mpiipiliyani ni mmareheryo a Yehova, vakhaani vakhaani nnanwerya otakiherya mikhalelo sa Kristu. Nnahaala tho omusuwela phaameene Muluku. Muthokororye niphwanaphwaniho nenlo Yesu aapankeiye wi ooniherye phaameene mwaha yoola.

5. Yootakiherya taani Yesu ovanheiye wi ooniherye wi ennaviravo elukuluku wi muchu apake matorokelo?

⁵ Yesu aaloca niphwanaphwaniho wi ooniherye mukhalelo michaka sa Omwene inannuwaaya mmurimani mwa yaawo anasivela yeeyo eri yaphaama. Owo ooloca: “Mmiso onnamela, onninnuwa, owo ahisuwelaka weereya waya. Echaya teniimiha meekhaaya, opacerya muropo, mutathi, nikala, ophiyerya enuku.” (Mar. 4:27, 28) Tiheeni Yesu aachuneiye oloca ni masu yaala? Yesu aachuna oloca wi hiiha ntoko mwiri onannuwaaya vakhaani vakhaani, winnuwa woomunepani wa muchu oneemererya michaka sa Omwene oneereya tho vakhaani vakhaani. Ntoko yootakiherya, vaavaa oohuserya a Piipiliya onapaceryeiye omwaacamela Yehova, vakhaani vakhaani, ninnoona matorokelo owo onapakeiye mu okumi awe. (Éfe. 4:22-24) Nyenya hannaphwanela ocuwala wi Yehova toneeriha mmiso winnuwa.—1 Kor. 3:7.

6-7. Tiheeni nnahuseryaahu orweela wa mukhalelo Yehova aapatuxeiye elapo?

⁶ Yehova onnapaka soothene moopisa murima moohipwacha elukuluku yeeyo enahaala oviravo wi aakhwaniherye muteko awe. Owo onneerano yeela wi aruuhele ncicimiho nsina nawe ni waakhaviherya akina. Ntoko yootakiherya, moone mukhalelo Yehova orehenryeiye elapo ntakhara achu vakhaani vakhaani.

⁷ Atharihaka mukhalelo Yehova opatunxeiye elapo, Piipiliya onaloca wi owo ‘oophima winnuwa wa elapo,’ aahela ‘apotxo anapharela’ ni ‘aathipa malici aya.’ (Yobi 38:5, 6, BNM) Owo aahaavya elukuluku wi avarerye miteko sawe. (Map. 1:10, 12) Muupuwele mukhalelo ankeelo yiisoonnaaya vaavaa yoonnaaya ichu  soothene Yehova aapatunxeiye. Awo chiryene yaatepa ohakalala! Nthowa na yeeyo, awo yaapacerya ‘okhuwela wa nthowa na wèliwa murima.’ (Yobi 38:7, BNM) Tiheeni nnahuseryaahuvo? Yehova aahimaliha iyaakha sincipale wi amalihe ichu seiho aapatuxeiye, nyenya weerano soothene vakhaani vakhaani ni mweephoole waakumiherya mphurelo. Nave vaavaa Yehova aavarenreiye aahoona wi soothene “saatepa okhala phaama.”—Map. 1:31.

8. Tiheeni nnahaalaahu othokororya hiihaano?

⁸ Sootakiherya seiha soonooniherya wi aakhalavo malakiheryo mancipale a Mmasu a Muluku ananihusiha ochuneya waya okhala oopisa murima. Vano nnahaala woona mikhalelo miili seiho nnaphwanelaahu onweherya Yehova.

9. Mmukhalelo taani mmoha nnaphwanelaahu onweherya Yehova?

⁹ Nnaphwanela oweherya wi mavekelo ahu yaakhuliwe. Vaavaa nnavekelaahu wi nivilele nnikacamiho naari oveka nikhaviheryo wi nihiye opaka echu yeeyo ehinamuhakalaliha Yehova, nnanwerya woona wi Yehova onnalekela waakhula mavekelo ahu. Ntakhara heeni Yehova hanaakhula mavekelo ahu oothene mwawaakuveya?

10. Ntakhara heeni opisa murima ti woochuneya vaavaa nnaweheryaahu waakhuliwa wa mavekelo ahu?

¹⁰ Yehova onnawiriyana mavekelo ahu mweephoole. (Sal. 65:2) Owo onnoona mavekelo ookhumela vathi va murima ntoko yaawooniherya ya nroromelo nahu. (Ahe. 11:6) Vaavaa nnavekelaahu wa Yehova wi anikhaviherye omuhakalaliha yoowo, owo annachuna onoona nipakaka owetha wahu wi neere yoochuna awe. (1 Yoh. 3:22) Mwawiihiiha vaavaa nnamvekaahu Yehova wi anikhaviherye ohiya echu yeeyo ehinamusivela, hiyaano nnaphwanela okhala oopisa murima ni weera echu eri yoothene nnaweryaahu wi nipake matorokelo. Yesu oonikhaviherya wiiwexexa wi mavekelo ahu makina ananwerya ohaakhuliwa mwawaakuveya. Owo ooloca: “Vekani, munamvahiwa; avyakani, munamphwanya; manakani nsele, munamuhuleliwa. Tiwi yoole onaveka onnaakhela, yoole onaavya onnaphwanya nave yoole onamana onnahuleliwa.” (Mat. 7:7, 8) Vaavaa nnacharihaahu miruku seiha ni ‘otitelela ovekela,’ nnaphwanela ororomela wi Atiithi ahu a wirimu annaniiwa nave anahaala waakhula mavekelo ahu.—Kol. 4:2.

11. Ti mwawiihai Ahebri 4:16 onanikhaviheryeiye vaavaa nnoonaahu ntoko wi mavekelo ahu annalekela waakhuliwa?

¹¹ Naamwi naakhulo na mavekelo ahu nikhalaka wi ninnalekela, Yehova onnaroromeliha waakhula mavekelo ahu “mu elukuluku yoophwanelela.” (Mwaalakhanye Ahebri 4:16.) Ti nthowa nene nihinaphwanelaahu omuruwana Yehova wakhala wi echu vyakala heneereya mwawaakuveya ntoko nuupuwelaahu. Ntoko yootakiherya, ancipale annavekela mu iyaakha sincipale wi yoone Omwene wa Muluku omalihaka mukhalelo yoola wa ichu. Ophiyerya wi Yesu aaloca wi nnaphwanela ovekela vooloca sa yeela. (Mat. 6:10) Nyenya enanwerya ohikhala ya miruku wakhala wi nooyeleela nroromelo mwa Muluku nthowa nawi makuchuwelo hanaphiya mu elukuluku yeeyo nuupuwelaahu wi yaahaala ophiya! (Hab. 2:3; Mat. 24:44) Ninnakhala a miruku vaavaa nnatitelelaahu onweherya Yehova ni ovekela wa yoowo nroromelaka wi owo onahaala waakhula mavekelo ahu. Makuchuwelo anahaala ophiya mu elukuluku yoophwanelela, nthowa nawi Yehova oothanla “nihiku ni elukuluku” makuchuwelo anahaalaaya ophiya. Nave nihiku nenla enahaala okhala elukuluku yoophwanelela wa oothene.—Mat. 24:36; 2 Ped. 3:15.

12. Mukhalelo taani xaxaxa onahaala okhala woovila wa hiyo okhala oopisa murima?

 ¹² Nnaphwanela okhala oopisa murima vaavaa nnaweheryaahu omalihiwa wa ohookololowa. Achu a mweelaponi annaakhaliha moonanara achu yaale ari oohiyana mwiikho, mwiili, mikhalelo, sookhovelela naari elapo. Akina annakhalihiwa moonanara nthowa na okhalano makacamiho a mmwiilini naari a mmuupuweloni. Anamoona a Yehova ancipale annavilela ni ohookololowa nthowa na soororomela saya sinathipeleya Mpiipiliyani. Vaavaa nnakhalihiwaahu moonanara, nnaphwanela wuupuwela masu yaawo Yesu aalonceiye: “Nto yoole oni avilele ophiyerya omakuchuwelo, onamvulushiwa.” (Mat. 24:13) Mano hanka wakhala wi moosuwela wi ookhala muchu mmulokoni opanke yoocheka etokweene? Atokweene emanle osuwela sa yoocheka yeeyo, apwanne munnakhala oopisa murima ni owehererya wi awo anahaala orehererya mwaha mmukhalelo yoowo Yehova onachuneiye? Tiheeni atokweene aneeraaya vaavaa anasuwelaaya wi muchu oopaka yoocheka etokweene?

13. Tiheeni Yehova onachuneiye wi atokweene yeere vaavaa muchu onapakeiye yoocheka etokweene?

¹³ Vaavaa atokweene anasuwelaaya sa yoocheka etokweene mmulokoni, awo annavekela yaavyaka “miruku yoorweela wirimu” wi ewerye osuwela moonelo wa Yehova vooloca sa mwaha. (Tiy. 3:17) Yoolakelela aya ori omukhaviherya namacheka ‘okookela ephiro yaphaama’ wakhala wooweryeya. (Tiy. 5:19, 20, BNM) Awo tho annachuna opaka echu eri yoothene anaweryaaya wi ekhapelele muloko ni waalipiha yaale ahooxen’ye. (2 Kor. 1:3, 4) Vaavaa atokweene anasuwelaaya wi ookhala opanke yoocheka etokweene, awo woopaceryani anaphwanela osuwela ichu soothene inavowelavo, nave enanwerya oviravo elukuluku. Voocharela awo annavekela nave annavahererya olaka woorweela mu Soorempwa nave annamookolola namacheka “moophwanelela.” (Yer. 30:11) Nyenya naamwi atokweene ehiweheryaka elukuluku yincipale, awo tho hanapaka soolakelela mwawaakuveya. Vaavaa atokweene anacharihaaya ohoolela woorweela wa Yehova, muloko woothene onnaphura. Nyenya naamwi atokweene epanke ichu mmukhalelo woophwanelela, akina ananwerya ohisiveliwa. Waakhanle wi munoona hiiha, tiheeni munaphwanelaanyu weera wi muhiisooneke mmukhalelo yoowo?

14. Yootakiherya taani ya Mpiipiliyani enahaala wookhaviheryaani wakhala wi munna mukina ohoochekelaani?

¹⁴ Apwanne mohintoko ophuciwa ni muchu  mukina akhweya ni munna naari murokora? Munanwerya ophwanya sootakiherya saphaama Mmasu a Muluku seiho sinanihusiha mukhalelo wa onweherya Yehova wi arehererye ichu. Ntoko yootakiherya, naamwi Yosefe aakhalihiwe moohookololowa ni asinnawe, owo heemerenrye wi soohesa saya simweerihe okhala oonyeenyeya. Moohiyana, owo aatitelela opaka owetha wawe wi amurumeele Yehova, nave Yehova aamureeliha nthowa na opisa wawe murima ni ovilela. (Map. 39:21) Moovira wa elukuluku, Yosefe aawerya waakhurumuwela yaale yaamukhalinhe moonanara nave ahoona mukhalelo Yehova aamureelinheiye. (Map. 45:5) Moolikana ni Yosefe, nnanwerya olipiheya vaavaa nnamwaacamelaahu Yehova ni onweherya wi arehererye oohookololowa mu elukuluku aya.—Sal. 7:17; 73:28.

15. Tiheeni yaamukhavihenrye murokora mmoha ohipwacha ohookololowa yoowo aahoolenleiye?

¹⁵ Mweeparipari, tahi wi ichu soothene soohookololowa nnakumanaahuno sinakhala itokweene ntoko seiho Yosefe aahoolenleiye, nyenya oothene ahu ninnahooxeya vaavaa nnakhalihiwaahu moonanara mmukhalelo vyakala. Vaavaa nnakhalaahuno nikacamiho ni muchu mukina, ophitaanyerya yaale ahinamulapela Yehova, ninnaphuravo wakhala wi ninnapharihela malakiheryo a Mpiipiliyani. (Fil. 2:3, 4) Muthokororye yaweereya emoha. Murokora mmoha aanyeenyeya vaavaa aasuwenleiye wi nthamwene awe oomutekoni aanamuloca moonanara wa akina. Ohiya weera ichu mwawaakuveya, murokora aahuupuwelela yootakiherya ya Yesu. Vaavaa aaruwaniweiye, owo haamukookiherya muchu. (1 Ped. 2:21, 23) Ni yeela mmuupuweloni, owo aalakelela oheeravo echu wa yeeyo yeereya. Ohoolo waya, owo aahisuwela wi nthamwene awe yoole oomutekoni aakhalano makacamiho matokweene a okumi ni aanahooxeya ni wuukhuwa. Murokora aahiphiyerya makuchuwelo wi nthamwene awe oomutekoni haarimulakelela omuloca mmukhalelo woonanara. Mwawiihiiha, owo aakhala oohakalala moorweela wa okhala oopisa murima ni oovilela nave tho aakhalano murecele.

16. Tiheeni enahaala woolipihaani waakhanle wi munnavilela ni ohookololowa? (1 Pedro 3:12)

¹⁶ Waakhanle wi nyuwaano munavilela ni ohookololowa naari echu ekina yeeyo enaweerihaani okhala oonyeenyeya, muupuwele wi Yehova ori vakhiviru va yaale “awiiniwa murima.” (Sal. 34:18) Muroromele wi Yehova  onnoosivelaani nthowa na okhala wanyu oopisa murima ni omvonyerya yoowo sawuukhula sanyu. (Sal. 55:22) Owo Muthoriha a elapo yoothene. Owo onnoona ichu soothene sineereya. (Mwaalakhanye 1 Pedro 3:12.) Vaavaa munahoolelaanyu makacamiho matokweene, yaawo muhinaweryaanyu orehererya, muupuwele wi echu eri yoochuneya ori onweherya Yehova wi eerevo echu.

17. Tiheeni Yehova ororomelinheiye mu Isaiya 30:18?

¹⁷ Moohilekela Tiithi ahu a wirimu onamunireeliha moorweela wa Omwene awe. Isaiya 30:18 oni: “Hiihaa, Apwiya annawehererya owooniheryaani mahala aya, anamvinya tho wi yoomoreleeni ikharari. Tiwi, Apwiya, Muluku awookololowa; ooreeriwa ti yaawo oothene anamuwehererya yoowo.” Yaale ananweherya Yehova anahaala waakhela mareeliho mancipale hiihaano ni mu elapo evyaani enoorwa.

18. Mareeliho taani nnawehereryaahu?

¹⁸ Vaavaa achu a Muluku aneeraaya evolowe mu elapo evyaani, awo herwa tho echikela wuukhuwa ni makacamiho yaawo anahoolelaaya hiihaano. Ohookololowa ni ohooxeya horwa tho okhalavo. (Wup. 21:4) Hinrwa nikhala awuukhuwa niweheryaka yeeyo nnachunaahu woona wi elapo yoothene enamukhalano ichu sincipale. (Sal. 72:16; Isa. 54:13) Mweeparipari ela ti yootikhiniha chiryene!

19. Ti mwawiihai Yehova onanirehereryeiye hiihaano?

¹⁹ Yehova onnanirehererya hiihaano wi nikhale mu olamulelo awe, moorweela wa onikhaviherya ovootha sookhovelela soonanara ni winnuwiha mikhalelo seiho sinamuhakalaliha yoowo. Muhiceecheye nave muhihiye omurumeela Yehova. Nookhalano ewehereryo yootikhiniha ya omwaahiyu! Vaavaa nnaweheryaahu elukuluku yeeyo, hankooni nikhale oohakalala niweheryaka moopisa murima wi Yehova aakhwaniherye ichu soothene olaihenryeiye!