1. Makoho taani nnaphwanelaahu wiipakela vaavaa nnuupuwelaahu ichu soothene Yehova opatunxeiye?

WAKHALA wi nohuupuwelela mwawiixeela ichu seiho Yehova opatunxeiye nnahaala wiisoona ntoko mulipa a masalumu, yoowo aavekenle wa Yehova nave aloca: “Kaavareryaka erimu, muteko wa mata anyu, mweeri ni itheneeri, seiyo mwaapankanyu, kinnuupuwela: ‘Muchu, tisheeni, wi nyu munnamuupuwelela? Muchu pahi, tisheeni wi muukhuwekeno ni yoowo?’” (Sal. 8:3, 4) Moolikana ni Tavite, nnanwerya wuupuwela vooloca sa mukhalelo nryaahu akhaani naawiilikanyihaka ni itheneeri seiho Yehova opatunxeiye nave nnanwerya otikhina nthowa nawi Yehova onnanithokororya. Nyenya nnahaala woona wi Yehova aanaathokororya achu oopacerya Atamu ni Eva nave aaweeriha opaka makupa mu emusi awe.

2. Tiheeni Yehova aachuneiye wi Atamu ni Eva epake?

² Atamu ni Eva yaari anamwane a Yehova oopacerya oyariwa a veelaponi yavathi, nave Yehova aari Tiithi aya a wirimu. Owo aaweherya wi mutheli yoola akhaleno anamwane. Muluku aaloca wa yaawo: “Murelanesha, musareye elapo ya vathi nave muhooleleke.” (Map. 1:28) Awo yaaphwanela okhalano anamwane nave wi ekhapeleleke phaama elapo yavathi. Waakhanle wi ahiiwelela nave aheera yeeyo owo aaleenleiye, awo ni anamwane aya yaahaala otitelela okhala mu emusi ya Muluku okhala wookhala.

3. Ntakhara heeni nnanwerya oloca wi Atamu ni Eva yaavahiwa nipuro noocicimiheya mu emusi ya Yehova?

³ Atamu ni Eva yaakhalano nipuro noocicimiheya mu emusi ya Yehova. Mwawiiwanana ni Salumu 8:5, BNM, Tavite aaloca yeela vooloca sa mapakeliwo a muchu: “Mòmpaka owo vohala vakhani okhala munkelo, mon’wariha ovuwa ni ntxitximiho.” Mweeparipari, Yehova haavanhe achu ikuru, masuwelelo ni mavyakelo olikana ni ankeelo. (Sal. 103:20) Nyenya, achu anahiyana ‘vakhani’ pahiru ni soopatuxiwa seiha soomunepani sakuru. Ela ti yootikhiniha!  Mweeparipari Yehova aahaavaha asitiithi ahu oopacerya okumi wootikhiniha.

4. Tiheeni yeeren’ye nnipuro na Atamu ni Eva mu emusi ya Yehova, nave tiheeni nnahaalaahu othokororya mmwaha yoola?

 ⁴ Moothananiha, Atamu ni Eva yaayeleela nipuro naya mu emusi ya Yehova. Eyo yaahikumiherya sookhumelela soowaawa wa anaaya, hiihaa ntoko nnahaalaahu woona mmwaha yoola. Nyenya yoolakelela ya Yehova hetoroken’ye. Owo onachuna wi achu awiiwelela ekhale anaawe okhala wookhala. Yoopacerya, hankooni nthokororye mukhalelo Yehova onooniheryeiye wi onnanoona okhala asisapo. Voocharela, nnahaala othokororya yeeyo nnaphwanelaahu weera hiihaano wi nooniherye wi ninnachuna opaka makupa mu emusi ya Muluku. Vookuchulani, nnahaala othokororya mareeliho yaawo anamwane a Yehova a veelaponi yavathi anahaalaaya opuha okhala wookhala.

5. Mmukhalelo taani nneeraahu nimucicimihe Muluku moorweela wa onipatuxa oolikana ni yoowo?

⁵ Yehova oonooniherya ncicimiho moorweela wa onipatuxa oolikana ni yoowo. (Map. 1:26, 27) Nthowa nawi nipakiwe moolikana ni Muluku, nnanwerya wunnuwiha ni wooniherya makhalelo awe mancipale ootikhiniha, ntoko osivela, niphwanya, ororomeleya, ni wookololowa. (Sal. 86:15; 145:17) Vaavaa nnooniheryaahu mikhalelo seiha, ninnamucicimiha Yehova nave ninnooniherya wi ninnamuthemalela yoowo. (1 Ped. 1:14-16) Vaavaa nnakhalaahu mwawiiwanana ni mukhalelo yoowo onamuhakalaliha Tiithi ahu a wirimu, ninnakhala oohakalala. Nave moorweela wa onipatuxa moolikana ni yoowo, Yehova oonivaha mavyakelo wi nikhale achu yaawo onaachuneiye mu emusi awe.

6. Ti mwawiihai Yehova aaciciminheiye achu moorweela wa orehererya elapo yavathi?

⁶ Yehova oorehererya nipuro navameekhaaya wa hiyo. Ahaakumve ompatuxa mulopwana oopacerya, Yehova aarehererya elapo yavathi wa achu. (Yobi 38:4-6; Yer. 10:12) Nthowa nawi owo tamiruku ni a mahala, Yehova oovahererya ichu sincipale saphaama wa hiyo wi nipuheke. (Sal. 104:14, 15, 24) Mu elukuluku aya, owo aahivarerya ichu seiho aapankeiye, nave “aahoona wi ti saphaama.” (Map. 1:10, 12, 31) Owo aahaacicimiha achu moorweela wa waavaha ‘olamulelo’ wa miteko sawe soothene sootikhiniha veelaponi. (Sal. 8:6) Muluku onachuna wi achu oophaameya epuhe murici yoola wa okhapelela soopatuxiwa sawe sooreera okhala wookhala. Apwanne nyuwaano munnamuthamalela Yehova moohihiyererya nthowa na yoolaiherya yeela yootikhiniha?

7. Ti mwawiihai Yosuwa 24:15 onooniheryeiye wi muchu ookhalano othanla woochuna?

⁷ Yehova oonivaha otaphuwa wa opaka yeeyo nnachunaahu. Nnanwerya othanla yeeyo nnachunaahu opaka mu okumi ahu. (Mwaalakhanye Yosuwa 24:15.) Mavyakelo yaala aniichaniwa othanla woochuna. Muluku ahu oosivela onnahakalala vaavaa nnathanlaahu omurumeela yoowo. (Sal. 84:11; Masi. 27:11) Nnanwerya opharihela otaphuwa wahu wa othanla wi nipake soolakelela sincipale saphaama. Muthokororye yootakiherya etikitheryiwe ni Yesu.

8. Mukhalelo taani mmoha Yesu aapharihenleiye otaphuwa wawe wa othanla?

⁸ Wakhala wi noochariha yootakiherya ya Yesu, nnanwerya othanla othokororya woopaceryani soochuna sa akina ohiya sawihu. Nihiku nimoha, vaavaa Yesu ni arummwa awe yaavelavenlaaya, awo yaaya nipuro noomaaleleya weiwo yuupuwelaaya wi yaahaala wiichuuwawo. Nyenya awo hiyaawenrye wiithuuwa. Muloko wahaaphwanya yaawo, nave awo yaachuna ohusihiwa ni Yesu. Nyenya Yesu haanyeenyen’ye. Moohiyana, owo aahimoriwa ikharari ni achu yaawo. Vano tiheeni Yesu eenreiye? Owo  “ápacherya wahusiha itchu sinchipale.” (Mar. 6:30-34, NN) Vaavaa nnamutakiheryaahu Yesu moorweela wa opharihela elukuluku ahu ni ikuru sahu wi naakhaviherya akina, ninnaruuhela ncicimiho wa Tiithi ahu a wirimu. (Mat. 5:14-16) Nave tho ninnooniherya wa Yehova wi ninnachuna opaka makupa mu emusi awe.

9. Yamahala taani yoochuneya Yehova aavanheiye achu?

⁹ Yehova ohaavaha achu mavyakelo a okhalano anamwane, nave tho murici wa waahusiha yaawo wi emusivele ni omulapela yoowo. Waakhanle wi mwa tiithi, apwanne munnavaha esisapo yamahala yeela yavameekhaaya? Yehova ohaavaha ankeelo mavyakelo mancipale ootikhiniha, nyenya owo haavanhe mavyakelo a okhalano anamwane. Mwawiihiiha, waakhanle wi mwa tiithi muthamalele ekari yeela ya waaphuwa anamwane. Asitiithi aavahiwa murici woochuneya wa waaphuwa anamwane aya “m’maphuwelo ni mathoriheryo a Apwiya.” (Éfe. 6:4, NN; Malam. 6:5-7; Sal. 127:3) Wi yaakhaviherye asitiithi, marehereryo a Muluku annavahererya ikaruma sincipale inathipeleya Mpiipiliyani, ntoko soolaleeryiwa, ixilema, macipo ni miyaha sa mu interneti. Mweeparipari, ooweeli, Tiithi ahu a wirimu ni Mwanawe annaasivela amiravo. (Luka 18:15-17) Vaavaa asitiithi anamuroromelaaya Yehova ni opaka owetha waya wi yaakhapelele anaaya oochuneya, Yehova onnahakalala. Nave asitiithi ntoko yaala annavaha anamwane aya ekari ya opaka makupa mu emusi ya Yehova okhala wookhala!

10-11. Tiheeni Yehova eerinheiye okhala wooweryeya wa hiyo nthowa na mukucho?

¹⁰ Yehova omvaha Mwanawe oochuneya wi niwerye opaka makupa mu emusi Awe wanaawiili. Ntoko elociwaaya mu  eparakrafo 4, Atamu ni Eva yaayeleela nipuro naya mu emusi ya Yehova, nave tho yaayeleeliha nipuro wa anaaya. (Aro. 5:12) Atamu ni Eva yaammwarenle Yehova mwaayiini, mwawiihiiha awo hiyaaphwanelenle okhala mu emusi awe. Mano hanka vooloca sa muyareriwo aya? Yehova onnaasivela achu, mwawiihiiha oheeriha okhala wooweryeya wa anamwane yaawo awiiwelela opaka makupa mu emusi. Owo oheerano yeela moorweela wa mukucho wa Mwanawe ooyariwa meekheiye, Yesu Kristu. (Yoh. 3:16; Aro. 5:19) Ntoko yookhumelela ya mukucho wa Yesu, Muluku ooweemererya achu oororomeleya 144.000 wi ekhale anaawe.—Aro. 8:15-17; Wup. 14:1.

¹¹ Nave tho amilyawu a achu akina awiiwelela annapaka yoochuna ya Muluku. Awo aakhalano ewehereryo ya opaka makupa mu emusi ya Muluku emanle yaweeha yookuchula omakuchuwelo wa iyaakha 1000. (Sal. 25:14; Aro. 8:20, 21) Nthowa na okhalano ewehereryo yeela, awo annamwiichana Yehova, Mpatuxa aya, ntoko ‘Tiithi.’ (Mat. 6:9) Ooviihiwa mookhwani anahaala tho ovahiwa ekari ya ohuserya yeeyo Yehova onaweheryeiye wa yaawo. Oothene yaawo anahaala waakhulela phaama ohoolela wawe wookuchulani anahaala tho opaka makupa mu emusi awe.

12. Nikoho taani nnahaalaahu waakhula hiihaano?

¹² Ntoko noonnaahu, Yehova taapacenrye wooniherya ncicimiho wa achu mmikhalelo soohiyanahiyana. Owo ooweemererya oothanliwa ntoko anaawe, nave owo ohaavaha oothene yaale anapaka makupa a “mucici muncipale” ewehereryo ya okhala anaawe mu elapo evyaani. (Wup. 7:9) Tiheeni nnaphwanelaahu weera hiihaano wi nooniherye wa Yehova wi ninnachuna opaka makupa mu emusi awe okhala wookhala?

13. Echu taani emoha nnaphwanelaahu weera wi ntitelele opaka makupa mu emusi ya Muluku? (Marko 12:30)

¹³ Mooniherye osivela wanyu wa Yehova moorweela wa omurumeela yoowo ni murima anyu woothene. (Mwaalakhanye Marko 12:30.) Moosivela Muluku oonivaha samahala sincipale. Mwawooneya emoha wa samahala seiho eri  yoochuneya ari mavyakelo a omurumeela yoowo. Ninnooniherya wi ninnamusivela Yehova moorweela wa “wiiwelela malamulo awe.” (1 Yoh. 5:3) Nimoha wa malamulo yaawo Yehova onachuneiye wi niiweleleke nri nlamulo nenlo Yesu onivanheiye na waapaka oohuserya, ni waapatisa yaawo. (Mat. 28:19) Owo tho oonilamulela wi nisivelaneke mukina ni mukhwaawe. (Yoh. 13:35) Yehova onnawaakhela phaama yaale aniiwelela malamulo awe mu emusi awe ya veelaponi yoothene.—Sal. 15:1, 2.

14. Nni niwerye hai wooniherya osivela wa akina? (Mateu 9:36-38; Aroma 12:10)

¹⁴ Mooniherye osivela wa akina. Osivela mukhalelo woochuneyaxa wa Yehova. (1 Yoh. 4:8) Yehova aahooniherya osivela wawe ntakhara hiyo nihaakumve omusuwela yoowo. (1 Yoh. 4:9, 10) Ninnamutakiherya yoowo vaavaa nnooniheryaahu osivela wa akina. (Éfe. 5:1) Mukhalelo mmoha waphaama wa wooniherya osivela wa achu ori moorweela wa waakhaviherya yaawo ohuserya vooloca sa Yehova elukuluku ehaakumve omala. (Mwaalakhanye Mateu 9:36-38.) Vaavaa nnaakhaviheryaahu yaawo, ananwerya ohuserya yeeyo anaphwanelaaya weera wi ekhale mu emusi ya Muluku. Muchu amanle opatisiwa, nnaphwanela otitelela wooniherya osivela ni ncicimiho wa yoowo. (1 Yoh. 4:20, 21) Nni neereno hai yeela? Mukhalelo mmoha, ori moorweela wa ohimukhwa minikwa muchu yoowo. Ntoko yootakiherya, wakhala wi hinniiwexexa ntakhara heeni eenreiye echu yammoori, hannaphwanela wuupuwela wi owo eenreno ni mathowa oohiphwanelela. Moohiyana, nnahaala omooniherya ncicimiho munnihu, ni omoona owo okhala oonipwaha.—Mwaalakhanye Aroma 12:10; Fil. 2:3.

15. Taani nnaphwanelaahu owooniherya ikharari ni oreera murima?

¹⁵ Mooniherye ikharari ni oreera murima wa achu oothene. Waakhanle wi ninnachuna opaka makupa mu emusi ya Yehova okhala wookhala, nnaphwanela opharihela Masu a Muluku mu okumi ahu. Ntoko yootakiherya, Yesu aahusiha wi nnaphwanela wooniherya ikharari ni oreera murima wa achu oothene, ophiyerya tho amwiicani ahu. (Luka 6:32-36) Ikwaha ikina enanwerya okhala yoovila wa hiyo weerano. Waakhanle wi ti hiiha, nnaphwanela ohuserya wuupuwela ni weera ichu ntoko Yesu. Vaavaa nnapakaahu owetha wahu wi nimwiiwelele Yehova ni omutakiherya Yesu, ninnooniherya wa Tiithi ahu a wirimu wi ninnachuna opaka makupa mu emusi awe okhala wookhala.

16. Nni niwerye hai okhapelela meecelo waphaama wa emusi ya Yehova?

¹⁶ Mukhapelele meecelo aphaama a emusi ya Yehova. Mu emusi, ti yawunlaana mwaana mukhaani omutakiherya munnawe a mutokweene. Wakhala wi mwaana a mutokotoko onnapharihela malakiheryo a Mpiipiliyani mu okumi awe, owo onahaala okhala yootakiherya yaphaama wa mwaana a mukhaani. Nyenya wakhala wi owo onnapaka ichu soonanara, onahaala okhala yootakiherya yoonanara wa munnawe a mukhaani. Ela tho emohamoha mu emusi ya Yehova. Wakhala wi Mukristu yoowo aari oororomeleya oomwaryeya naari onnapaka ocapaheya naari ichu ikina soonanara, akina ananwerya omutakiherya yoowo ni opakaka yeeyo eri yoonanara. Yaawo anapaka ichu seiho annananariha meecelo aphaama a emusi ya Yehova. (1 Tes. 4:3-8) Nnaphwanela osepa ochariha sootakiherya soonanara ni oheemererya echu vyakala wi enanarihe onthamwene ahu ni Tiithi ahu oosivela a wirimu.

17. Mukhalelo taani wa wuupuwela nnaphwanelaahu osepa, nave ntakhara heeni?

¹⁷ Mmuroromele Yehova ohiya ichu soomwiilini. Yehova oororomeliha wi onahaala onivahererya yoolya, soowara, nnipuro nookhalavo wakhala wi ninnakuha omwene awe mu nipuro noopacerya ni okhala mwawiiwanana ni malakiheryo awe awookololowa. (Sal. 55:22; Mat. 6:33) Wakhala  wi ninnaroromela yoolaiherya yeela, hinnahaala wuupuwelaka wi ichu soomwiilini sa elapo yeela sinahaala onikhapelela ni oneeriha okhala oohakalala. Ninnasuwela wi mukhalelo mmoha wa okhalano murecele weeparipari wa mmuupuweloni ori moorweela wa weera yookhwela ya Yehova. (Fil. 4:6, 7) Naamwi niilipixeryaka okula ichu sincipale, nnaphwanela othokororya waakhanle wi chiryene nookhalano elukuluku ni ikuru sa opharihela ni okhapelela ichu ntoko seiho. Apwanne ninnasiveliwaxa ni ichu seiho nryaahuno? Nnaphwanela wuupuwela wi Muluku oonivaha muteko wi nipake mu emusi awe. Ela enataphulela wi hannaphwanela weemererya okhala awaakanyeryeya. Hinnachuna okhala ntoko mmiravo yoowo aalakelenle ohimuchara Yesu nthowa nawi aasiveliwaxa ni ichu seiho aareiyeno. Owo aayeleela ekari ya omurumeela Yehova ni okhala mmoha a anaawe!—Mar. 10:17-22.

18. Ncicimiho taani ntokweene ni mareeliho yaawo achu awiiwelela anahaalaaya opuha okhala wookhala?

¹⁸ Achu awiiwelela anahaala opuha ncicimiho ntokweene wa soothene—ekari ya omusivela ni omulapela Yehova okhala wookhala! Oothene yaale arino ewehereryo ya okhala veelaponi yavathi anahaala okhala oohakalala okhapelela elapo yeeyo Yehova opatunxeiye wi nikhale nipuro naya noophaameya. Moohilekela Omwene wa Muluku onahaala weeriha elapo ni ichu soothene okhala sooreeraxa wanaawiili. Yesu onahaala orehererya makacamiho oothene yaawo atannyiwe moorweela wa yoolakelela ya Atamu ni Eva. Yehova onahaala waaviiha amilyawu a achu ni waavaha ekari ya okhalano okumi woohimala ni woophaameya ni weeriha elapo okhala parataiso. (Luka 23:42, 43) Vaavaa achu yaawo anamulapela Yehova anahaalaaya okhala oophaameya, awo anahaala okhalano “ncicimiho ni ovuwa” seiho Tavite aarempeiye.—Sal. 8:5.

19. Tiheeni nnaphwanelaahu wuupuwelaka?

¹⁹ Waakhanle wi nyuwaano munapaka makupa a “mucici muncipale,” mookhalano ewehereryo yootikhiniha. Muluku onnoosivelaani; owo onachuna wi mpake makupa a emusi awe. Mwawiihiiha mpake soothene munaweryaanyu wi mmuhakalalihe. Nihiku ti nihiku muupuweleleke yoolaiherya ya Muluku. Muthamalele ekari muryaanyuno ya omulapela Tiithi ahu a wirimu, nave mvahe esisapo ewehereryo ya omvuwiha yoowo okhala wookhala!