1. Ti mwawiihai ancipale aneereryaaya opaka sincipale mmuteko wa Yehova?

 NOOKHALANO muteko muncipale wi nipake vaavaa anaacamelaaya makuchuwelo a mukhalelo yoola wa ichu. (Mat. 24:14; Luka 10:2; 1 Ped. 5:2) Oothene ahu ninnachuna omurumeela Yehova ophiyerya vaavaa nnaweryelaahuvo. Ancipale annaaceererya orummwa aya. Akina annaweherya orumeela ntoko mapiyoneero. Akina annaweherya orumeela Opeteli naari okhaviherya muteko wa oteka. Nave anna ancipale anniilipixerya wi ephwanelele okhala arummwa oorumeela naari atokweene a mmulokoni. (1 Tim. 3:1, 8) Yehova onnatepa ohakalala vaavaa onawooneiye achu awe yiiveleelaka ni murima woothene wi emurumeele yoowo!—Sal. 110:3; Isa. 6:8.

2. Nniisoona hai wakhala wi hannawerya waakhwaniherya soolakelela sahu soomunepani?

² Nnanwerya okhala ooceecheya wakhala wi hannawerya waakhwaniherya soolakelela sahu mmuteko wa Yehova emanle oviravo elukuluku yincipale. Naari nnanwerya okhala ooceecheya wakhala wi hannawerya opaka ichu ikina mmarehereryo a Yehova nthowa nawi nohuuluvala naari mathowa makina. (Masi. 13:12) Ela ti yeeyo yeeren’ye ni Melissa. * Owo aanachuna orumeela Opeteli naari ovolowa mu Exikola ya Alaleeryi a Omwene, nyenya owo ooloca: “Iyaakha saka hasinakeemererya wi kiphwanelele mirici seiha. Ilukuluku ikina kinnaceecheya.”

3. Tiheeni akina anaphwanelaaya weera wi ephwanelele waakhela mirici mikina?

³ Wa akina yaawo ari amiravo nave arino ekumi yaphaama onamuchuneya wunnuwa omunepani naari okhalano mikhalelo mikina ehaakumve ophwanelela waakhela mirici sawaaceererya. Ntoko yootakiherya, akina ananwerya okhala a miruku, opaka soolakelela mwawaakuveya, naari awiiveleela va mutekoni. Nyenya onamuchuneya okhala oopisa murima, opaka miteko saya mweephoole, ni otitelela waacicimiha akina. Wakhala wi munniilipixerya  wunnuwiha mikhalelo seiha inachuneya, anna ananwerya woovahaani murici wakhala wi moopisa murima. Muthokororye yaweereya ya Nick. Vaavaa owo aareiyeno iyaakha 20, aaceecheya vancipale nthowa nawi haathanliwe ntoko murummwa oorumeela. Owo ooloca, “Kaahiisoona ntoko wi yookhala echu yoonanara yeeyo kenraaka. Nyenya owo haamaanle wunnuwiha mikhalelo seiho saachuneya wa yoowo. Owo aanapaka owetha wawe mmulokoni ni mmuteko woolaleerya. Olelo owo onarumeela ntoko mmoha a Nikhuuru na Efiliyale.

4. Tiheeni nnahaalaahu othokororya mmwaha yoola?

⁴ Apwanne munnaceecheya nthowa nawi hamunawerya waakhwaniherya soolakelela ikina soomunepani? Waakhanle wi ti hiihaa, mvekele wa Yehova vooloca sa yeeyo nave mmuleele mukhalelo muniisoonaanyu. (Sal. 37:5-7) Mwawaaceererya, mwaaveke anna awunnuwelavo omunepani sooleeliherya vooloca sa mukhalelo muneeraanyu nwerye waaceererya orummwa anyu wa Muluku. Nave voocharela mweererye opaka owetha wanyu wi mpharihele miruku saya. Wakhala wi moheerano yeela, munanwerya waakhela murici naari waakhwaniherya yoolakelela anyu. Nyenya ntoko Melissa, akhweya tahi wooweryeya hiihaano wa nyuwo weera yeeyo mwaachunaanyu ntakhara Yehova. Waakhanle wi ti hiihaa, muni mutitelele hai okhala oohakalala? Wi naakhule nikoho nenla, mwaha yoola onahaala othokororya (1) ti woowi nneeraahu niphwanyewo ohakalala, (2) mukhalelo muneeraanyu mwaaceererye ohakalala wanyu, ni (3) soolakelela taani muneeraanyu mutikitherye seiho sinahaala waaceererya ohakalala wanyu.

5. Wi nikhale oohakalala, nnaphwanela otikitheryeya mwa eheeni? (Eklesiyaste 6:9)

⁵ Eklesiyaste 6:9, onnathariha yeeyo eni enikhaviherye okhala oohakalala. (Mwaalakhanye.) Muchu yoowo onapuha ‘yeeyo oreiyeno’ onnahakalala ni yeeyo, mwawiiwanana ni mikhalelo sawe. Nyenya muchu yoowo onachuna sincipale seiho ohireiyeno hanakhala oohakalala. Tiheeni nnahuseryaahuvo? Wi nikhale oohakalala, nnaphwanela otikitheryeya wa echu yeeyo nryaahuno ohiya mu ichu seiho nihiraahuno.

6. Niphwanaphwaniho taani nneeraahu nthokororye hiihaano, nave tiheeni nneeraahu nihuserye orweela wa nenlo?

⁶ Apwanne chiryene ti wooweryeya okhala oohakalala ni ichu seiho muryaanyuno? Achu ancipale anuupuwela wi tahi wooweryeya, nthowa nawi ninnachuna otitelela ohuserya mukhalelo wa weerano ichu ivyaani. Nyenya mweeparipari ela ti yooweryeya. Mweeparipari nnanwerya opuha ichu seiho nryaahuno hiihaano. Nni neereno hai yeela? Wi niphwanye naakhulo, hankooni nthokororye niphwanaphwaniho na Yesu na italentu, nnaphwanyeya mu Mateu 25:14-30. Nnahaala othokororya mukhalelo nneeraahu nikhaleno ohakalala wawaaca moohipwacha mikhalelo sahu.

7. Mutharihe mwa mukwasu niphwanaphwaniho na Yesu vooloca sa italentu.

⁷ Mu niphwanaphwaniho nenla, pwiya aahikhalano mukwaha. Ahaakumve ocimula, owo aahiwiichana anamuteko awe nave aavaha mmoha ti mmoha italentu wi empakeno nakoso. * Pwiya aasuwela wi anamuteko awe yaakhalano mavyakelo oohiyanahiyana, mwawiihiiha owo aahimvaha mmoha italentu thanu, mukina italentu piili, nave aneeraru etalento emoha. Anamuteko apiili yaahiilipixerya wi yaaceererye ikhorowa sa pwiya aya. Nyenya namuteko aneeraru heenre echu ni ikhorowa seiho innyiweiye, nave pwiya awe aamwiikara muteko.

8. Tiheeni yaamweerinhe namuteko oopacerya a mu niphwanaphwaniho okhala oohakalala?

 ⁸ Namuteko oopacerya aahihakalala vancipale nthowa nawi pwiya awe aahimvaha italentu thanu. Iha saari ikhorowa sincipale, nave eyo yaahooniherya wi pwiya awe aanamuroromela! Nyenya hanka vooloca sa namuteko anaawiili? Owo aanwerya oceecheya nthowa nawi haavahiwe italentu sincipale ntoko namuteko oopacerya. Nto ti mwawiihai owo aakhulenleiye?

9. Tiheeni Yesu ahaalonceiye vooloca sa namuteko anaawiili? (Mateu 25:22, 23)

⁹ Mwaalakhanye Mateu 25:22, 23. Yesu halonce wi namuteko anaawiili haasiveliwe naari okhala oonyeenyeya nthowa nawi aavahiwe pahiru italentu piili. Nave Yesu halonce wi namuteko owo aniikhupanyerya ariki: ‘Ntakhara heeni pwiya aka okinnyaleiye vakhaani? Kinnalapa moowetha hiihaa ntoko namuteko yoola annyiwe italentu thanu! Waakhanle wi pwiya aka hanakoona okhala namuteko aphaama, kinamukacela nlici ikhorowa sawe nave kilapeke miteko saka ohiya sawawe.’

10. Tiheeni namuteko anawiili eenreiye ni italentu piili innyiweiye?

¹⁰ Ntoko namuteko oopacerya, namuteko anaawiili aahoona wi murici awe waari woochuneya nave owo aahipacerya olapa mwakuru ntakhara pwiya awe. Ntoko yookhumelela, owo aahaaceereryavo italentu piili ikhala xexe. Pwiya aahimuchuwela namuteko ntakhara wiilipixerya wawe. Tahi wi Pwiya awe pahiru aarimoona ohakalala nyenya tho owo aahimvaha murici mukina!

11. Nni niwerye hai waaceererya ohakalala wahu?

¹¹ Moolikana, nnanwerya okhala oohakalalaxa wakhala wi ninnapaka owetha wahu mmurici vyakala nryaahuno mmarehereryo a Yehova. ‘Mwiivahe ni murima woothene’ mmuteko woolaleerya, nave mwiilipixeryeke mmulokoni.  (Saw. 18:5, BNM; Ahe. 10:24, 25) Mwiirehereryeke phaama ntakhara mithukumano wi nweryeke ovaha maakhulo oolipiha. Mucicimiheryeke makupa a anaxikola yaawo munavahiwaanyu mmithukumano sa veeri va esumana. Wakhala wi moovekiwa wi mukhaviherye murici vyakala mmulokoni, mukhaleke awaakuveya ni oororomeleya. Hamunaphwanela wuupuwela wi murici yoowo mvahiwaanyu tahi woochuneya nave wi hamunaphwanela omalihaka elukuluku anyu ni yoowo. Mwiilipixerye okhalano mavyakelo mmuteko anyu. (Masi. 22:29) Wakhala wi munniilipixerya mmiteko ni mmirici seiho munavahiwaanyu, munahaala oya vahoolo mwawaakuveya nave munahaala okhala oohakalala. (Gal. 6:4) Onahaala tho okhala wookhweya ohakalalaka ni akina yaawo yaakhenle mirici seiho nyuwo mwaachunaanyu mwaakhenle.—Aro. 12:15; Gal. 5:26.

12. Tiheeni yaamukhavihenrye Melissa ni Nick okhalano ohakalala?

¹² Munnamuupuwela Melissa, murokora yoowo aachuna oya orumeela Opeteli naari ovolowa mu Exikola ya Alaleeryi a Omwene? Naamwi owo ahaawenrye waakhwaniherya soochuna sawe seiha, owo ooloca: “Kinnapaka owetha waka mmuteko wa opiyoneera nave kinneererya mikhalelo soohiyanahiyana sa olaleerya. Ela ennakiruuhela ohakalala otokweene.” Ti mwawiihai Nick aavoontheiye oceecheya wawe vaavaa ahaathanliweiye okhala ntoko murummwa oorumeela? Owo ooloca: “Kaatikitheryeya mu ikari seiho kaaryaakano—opaka makupa mmuteko woolaleerya ni ovaha maakhulo oolipiha mmithukumano. Kaahiveka wi karumeeleke Opeteli nave kaaheemereryiwa iyaakha ohoolo waya.”

13. Tiheeni enahaala okhumelela wakhala wi ninniilipixerya mmurici yoowo nryaahuno hiihaano? (Eklesiyaste 2:24)

¹³ Wakhala wi munniilipixerya mmirici seiho muryaanyuno hiihaano, apwanne munahaala waakhela mirici sa waaceereryiwa muhoolo? Ela enanwerya weereya, hiihaa ntoko yeeren’yaaya ni Nick. Nyenya wakhala wi hiyeeryen’ye hiihaa ntoko Melissa, nyuwaano munanwerya ohakalala, ni okhala awaakhwaneliwa ni yeeyo munaweryaanyu weera ntakhara Yehova. (Mwaalakhanye Eklesiyaste 2:24.) Nyuwaano tho munanwerya okhala oohakalala osuwela wi munnamuhakalaliha Pwiya ahu, Yesu Kristu.

14. Tiheeni nnaphwanelaahu wuupuwelelaka vooloca sa soolakelela sahu mmuteko wa Yehova?

¹⁴ Wakhala wi ninnapaka owetha wahu mmuteko wa Yehova hiihaano, apwanne enataphulela wi hinnaphwanela otitelela opaka sincipale ntakhara yoowo? Hooye! Nnanwerya otikitherya soolakelela seiho sinahaala onikhaviherya okhala alaleeryi ni ahusiha aphaama ni waakhaviherya anna ni arokora ahu. Nnanwerya waakhwaniherya soolakelela seiha wakhala wi mwamiruku ni mwawiiyeviha ninnatikitheryeya mu waarumeela akina ohiya mu soochuna sahu.—Masi. 11:2; Saw. 20:35.

15. Ti mwawiihai soolakelela ikina sineeraaya saaceererye ohakalala wanyu?

¹⁵ Soolakelela taani munaphwanelaanyu otikitherya? Mumveke Yehova wi ookhaviheryeeni osuwela soolakelela seiho muneeraanyu nwerye waakhwaniherya. (Masi. 16:3; Tiy. 1:5) Apwanne mwanwerya waakhwaniherya yoolakelela emoha wa seiho iromoliwe  mu eparakrafo yoopacerya ya mwaha yoola—okhala piyoneero ookhaviherya naari a elukuluku yoothene, orumeela Opeteli, naari okhaviherya muteko wa oteka? Naari akhweya munanwerya ohuserya elocelo evyaani wi nwerye olaleerya michaka saphaama naari olaleerya mu elocelo ya okhopela. Nyuwaano munanwerya ohuserya yeeyo enavolowelavo moorweela wa wuuluulela mwaha 10 wa liivuru Ooreheryeya wi Yeereno Yookhwela ya Yehova ni moorweela wa oloca ni atokweene a muloko  anyu. * Vaavaa muneereryaanyu waakhwaniherya soolakelela seiha, akina ananwerya woona wi munnaya vahoolo nave ohakalala wanyu onamwaaceereryeya.

16. Tiheeni munaphwanelaanyu weera waakhanle wi hiihaano mohaakhwaniherya yoolakelela yammoori?

¹⁶ Hanka wakhala wi mohaakhwaniherya emoha wa soolakelela seiho nthokoronryaahu? Mweererye otikitherya yoolakelela ekina, yeeyo muneeraanyu nwerye waakhwaniherya. Muthokororye ichu sinacharela seiho akhweya sinahaala wookhaviheryaani.

17. Mwawiiwanana ni 1 Timóteo 4:13, 15, tiheeni munna onaphwaneleiye weera wi akhale muhusiha aphaama?

¹⁷ Mwaalakhanye 1 Timóteo 4:13, 15. Waakhanle wi mwa munna oopatisiwa, munaphwanela wunnuwiha mavyakelo anyu a oloca ni ohusiha. Ntakhara heeni? Nthowa nawi wakhala wi mwa mulipa a waalakhanya aphaama, namaloca, ni muhusiha, nyuwaano munahaala waakhaviherya yaale anoowiriyanaani. Mweererye otikitherya yoolakelela ya ohuserya ni opharihela soohuserya soothene inathokororyiwa mu eproxura Mwiikhovelelihe Waalakhanya ni Ohusiha. Muhuserye mukhalelo mmoha mu elukuluku aya, mwiilipixerye wiivyakiha owaani, nave mpharihele yeeyo muhusenryaanyu vaavaa munavahiwaanyu miyaha. Mveke sooleeliherya wa mukhaviheryi onavaha miruku naari wa atokweene yaawo “anuukhuwa mmasu ni mahusiheryo.” * (1 Tim. 5:17) Muhitikitheryeye pahiru mu opharihela yeeyo muhusenryaanyu orweela wa eproxura nyenya tho mwaakhaviherye oowiriyana anyu olipiha nroromelo naya naari waaceenyerya awo opharihela yeeyo anahuseryaaya. Wakhala  wi moheerano yeela, munahaala waacererya ohakalala wanyu ni wawaya.

18. Tiheeni enahaala wookhaviheryaani okhwaaniherya soolakelela sanyu mmuteko woolaleerya?

¹⁸ Oothene ahu nookhalano murici wa olaleerya ni waapaka oohuserya. (Mat. 28:19, 20; Aro. 10:14) Apwanne himwaahaala osiveliwa okhala a mavyakelo mmuteko yoola woochuneya? Muhuserye eproxura Ohusiha nave mutikitherye soolakelela seiho sinahaala wookhaviheryaani opharihela yeeyo muhusenryaanyu. Munanwerya ophwanya sooleeliherya ikina soophara muteko mu Okumi ni Muteko Ahu Weekristu—Yoochariha ya Mithukumano ni ixilema sa ochekula wa ntakiheryo inoonihiwa mmithukumano sa veeri va esumana. Mweererye sooleeliherya soohiyanahiyana wi mphwanye seiho sinahaala wookhaviheryaani phaama. Vaavaa munapharihelaanyu sooleeliherya seiha, nyuwaano munahaala okhala mulaleeryi aphaama nave munahaala ohakalalaka.—2 Tim. 4:5.

19. Muni nwerye hai wunnuwiha mikhalelo Seekristu?

¹⁹ Hamunaphwanela ocuwala wi emoha wa soolakelela soochuneyaxa munaphwanelaanyu otikitherya ori wunnuwiha mikhalelo sinamuhakalaliha Muluku. (Gal. 5:22, 23; Kol. 3:12; 2 Ped. 1:5-8) Muni nwerye hai waakhwaniherya yoolakelela yeela? Ntoko yootakiherya, akhweya munnachuna waaceererya ni olipiha nroromelo nanyu. Munanwerya waalakhanya miyaha mu soolaleeryiwa sahu seiho sinahaala woovahaani sooleeliherya soophara muteko wi mulipihe nroromelo nanyu. Munanwerya tho ophura vaavaa munamoonaanyu JW Broadcasting^® yoowo anooniherya mukhalelo anna ni arokora anooniheryaaya nroromelo noolipa vaavaa anavilelaaya ni makacamiho oohiyanahiyana. Voocharela muthokororye mikhalelo seiho muneeraanyu nwerye otakiherya nroromelo naya mu okumi anyu.

20. Nni niwerye hai waaceererya ohakalala wahu ni ovukula oceecheya?

²⁰ Moohikhwa minikwa oothene ahu ninnachuna opaka sincipale ntakhara Yehova opwaha seiho nnaweryaahu opaka hiihaano. Mu elapo yahiihaano ya Muluku, nnahaala oweryaka omurumeela owo moopwaha. Ophiyerya elukuluku yeeyo, wakhala wi ninnapaka owetha wahu ophiyerya nnaweryelaahuvo, nnahaala waaceererya ohakalala wahu ni ovukula muupuwelo wooceecheiha. Echu yoochuneyaxa, nnahaala oruuhela ncicimiho ni omuhakalaliha Yehova, “Muluku [ahu] oohakalala.” (1 Tim. 1:11, TNM) Mwawiihiiha hankooni niphwanye ohakalala mu ikari seiho nryaahuno!