1-2. Mwawiiwanana ni Salumu 34:8, nni niwerye hai woona oreera murima wa Yehova?

MWAANYIHERYE wi muchu mukina ohoovahaani yoolya yeeyo muhintonkaanyuru olya. Nyuwaano munahaala ochuna osuwela sincipale vooloca sa yeeyo moorweela wa ovarerya, wunkhererya, okusamo mparaatho, naari waakoha akina waakhanle wi ennaasivela. Naamwi hiihaa, mukhalelo mmoha wa osuwela waakhanle wi ennoosivelaani ori olawiha mukhatiinyu.

² Nnanwerya ohuserya ichu ikina vooloca sa oreera murima wa Yehova moorweela wa omwaalakhanya Piipiliya ni soolaleeryiwa sahu naari orweela wa owiriyana miyaha sa achu akina vooloca sa mareeliho yaawo yaakhenlaaya orweela wa Yehova. Nyenya nnanwerya wiiwexexa mwawaakhwanela mukhalelo Yehova oreiye aphaama moorweela wa ‘olawiha’ oreera wawe murima mu okumi ahu. (Mwaalakhanye Salumu 34:8.) Hankooni niphwanaphwanihe mukhalelo mmoha nneeraahu niwerye weerano yeeyo. Naanyiherye wi nnachuna ovolowa mmuteko wa elukuluku yoothene, nyenya wi naakhwaniherye yoolakelela yeela, nnaphwanela okhweiha okumi ahu. Akhweya nohintoko waalakhanya yoolaiherya ya Yesu yawi wakhala wi nookuha soochuna sa Omwene mu nipuro noopacerya, Yehova onahaala ovahererya ichu seiho nnachunaahu, nyenya hanintonko woona yeela yaakhwaniheryeyaka mu okumi ahu. (Mat. 6:33) Nyenya nthowa na ororomela yoolaiherya ya Yesu, ninneererya ovukula ophwanya ikhorowa sincipale, opaka matorokelo mmuteko ahu wi niwerye opaka sincipale mmuteko woolaleerya. Wakhala wi noheerano yeela, nnahaala woona mukhatiihu wi Yehova chiryene onnaakhwaniherya soothowa sahu. Nnahaala ‘olawiha’ oreera murima wa Yehova.

3. Mwawiiwanana ni Salumu 16:1, 2, taani anaakhela oreera murima wa Yehova?

 ³ Yehova “taphaama wa oothene,” ophitaanyerya yaale ahimusuwenle yoowo. (Sal. 145:9; Mat. 5:45) Nyenya owo onaweerela ichu sincipale saphaama xaxaxa yaale anamusivela ni anamurumeela yoowo ni murima aya woothene. (Mwaalakhanye Salumu 16:1, 2.) Hankooni nthokororye ichu ikina saphaama Yehova onaneereleiye.

4. Ti mwawiihai Yehova onawooniheryeiye oreera murima yaale anapacerya omwaacamela yoowo?

⁴ Ilukuluku soothene vaavaa nnapharihelaahu yeeyo nnahuseryaahu orweela wa Yehova, ninnoona mukhalelo eyo enanikhaviheryaaya. Vaavaa naahusenryaahu sincipale vooloca sa yoowo nave nipacerya omusivela, owo aanikhaviherya ohiya wuupuwela ni opaka ichu seiho oniiceiye. (Kol. 1:21) Nave vaavaa niivelenlaahu wa Yehova ni opatisiwa, owo aanivaha ichu sincipale saphaama, ntoko yawuupuxerya-ya-murima yaphaama ni onthamwene wawaacameleya ni yoowo.—1 Ped. 3:21.

5. Ti mwawiihai nnoonaahu oreera murima wa Yehova mmuteko woolaleerya?

⁵ Wi ntitelele woona oreera murima wa Yehova nnaphwanela otikitheryeya mmuteko woolaleerya. Apwanne mwa muchu awuuliwa muru? Achu ancipale a Yehova anniisoona hiiha. Akhweya muhaakumve okhala mmoha a alapeli a Yehova, nyuwaano himweemererya wi mwaahaala oweryaka ovaanela ni mwaneene a vaate ni oloca ni yoowo vooloca sa Piipiliya. Vano, olelo, munneerano yeela moohihiyererya. Ohiya yeeyo, nnikhaviheryo na Yehova, nyuwaano munnasiveliwano muteko woolaleerya! Nyuwaano munnoona wi Yehova onnookhaviheryaani mmikhalelo mikina. Owo onnookhaviheryaani wi mutitelele okhala oomaaleleya vaavaa munahoolelaanyu waakaahiwa. Owo tho onnookhaviheryaani wuupuwelela ni opharihela yoorepa yoophwanelela wi mvaanele ni yaale yoonihenrye nchuno. Nave owo onnoovahaani ikuru wi mutitelele olaleerya naamwi achu ehichunaka woowiriyanaani.—Yer. 20:7-9.

6. Ti mwawiihai ovyakiha onavahereryiwa ni Yehova onooniheryaaya oreera wawe murima?

⁶ Yehova tho onnooniherya oreera wawe murima moorweela wa onivyakiha mmuteko woolaleerya. (Yoh. 6:45) Mmithukumano sahu sa veeri va esumana, ninnawiriyana ni woona sawooniherya, nave ninnaceenyeryiwa opharihela seiho mmuteko woolaleerya. Woopaceryani nnamukhala awuukhuwa mukhalelo wa opharihela meerelo yaala mavyaani, nyenya wakhala wi noheerano, nnamphwanya sooleeliherya ivyaani seiho sinahaala onikhaviherya okhumelela phaama mu ekulucu ahu. Ninnaceenyeryiwa tho mmithukumano sa muloko ni sa muceche weererya mikhalelo soohiyanahiyana sa olaleerya seiho akhweya nihintonkaahu weerano. Eyo tho enanwerya oneeriha okhala awuukhuwa, nyenya vaavaa nneeraahuno ichu seiha, Yehova onamunireeliha. Hankooni nthokororye mareeliho makina yaawo nnahaalaahu waakhela wakhala wi noheererya mikhalelo mivyaani sa omvaha Yehova owetha wahu, mwawiiwanana ni mikhalelo sahu. Voocharela nnahaala othokororya mukhalelo nneeraahu niwerye waakhwaniherya soolakelela sahu.

7. Mareeliho taani nnaakhelaahu vaavaa nniilipixeryaahu waaceererya orummwa ahu?

⁷ Ninnamwaacamela vancipale Yehova. Muthokororye yootakiherya ya mutokweene mmoha oniichaniwa Samuel, yoowo onarumeela ni mwaariye o Kolompiya. * Mutheli ola aanapuha olapa muteko woopiyoneero mmuloko awe, nyenya awo yaalakelela waaceererya orummwa aya moorweela wa okhaviherya muloko yoowo waarino othowa otokweene. Wi ewerye waakhwaniherya yoolakelela yeela, awo yaaphwanela ohiya weera ichu ikina seiho yaasiveliwaayano. Samuel ooloca: “Naampharihela Mateu 6:33  nave naahiya othuma ichu seiho saari soohichuneya. Nyenya echu yaari yoovilaxa waari ohiya empa ahu. Eyo yaatekiwe mmukhalelo naachunaahu, nave hinaahaala okhalano ikhorowa ikina wi nthumeno.” Vaavaa awo yaathamenlaaya muloko muvyaani, yaanachuna ikhorowa ikina opwaha seihe yaaryaayano. Samuel ooloca: “Hiyaano naahoona mukhalelo Yehova aanihooleleiye mu soolakelela sahu ni waakhula mavekelo ahu. Naahoona wi Yehova aanaakhula mavekelo ahu. Naahoona wi Yehova aanahakalala ni hiyaano, nave naahoona osivela wawe mmikhalelo seiho nahintonkwaahu woona.” Apwanne mwaanwerya waaceererya orummwa anyu mmikhalelo vyakala? Waakhanle wi ti hiihaa, nyuwaano munaphwanela omuroromela Yehova nave owo onahaala wookhapelelaani.—Sal. 18:25.

8. Tiheeni munahuseryaanyu orweela wa masu a Ivan ni Viktoria?

⁸ Ninnaphwanya ohakalala mmuteko ahu. Moone masu a Ivan ni Viktoria, mutheli yoowo onarumeela ntoko piyoneero o Kyrgyzstan. Awo yaatitelela okhweiha okumi aya wi ewerye wiiveleela mmuteko vyakala, ophitaanyerya muteko wa oteka. Ivan ooloca: “Naanalapa moowetha muteko vyakala naavahiwaahu. Naamwi naavelavela omakuchuwelo wa nihiku, naanaphwanya murecele ni ohakalala, voosuwela wi naamaliha ikuru sahu mmuteko wa Omwene. Hiyaano tho naanahakalala nthowa na waapaka asinthamwene ancipale avyaani ni okhalano mavyakelo mancipale.”—Mar. 10:29, 30.

9. Tiheeni akina yaawo arino makacamiho aneeraaya wi yaaceererye orummwa aya, nave ni yookhumelela taani?

⁹ Ninnakhalano ohakalala mmuteko wa Yehova naamwi nihoolelaka mikhalelo soovila. Ntoko yootakiherya, Mirreh, naamukhweli awunnuwelavo onakhala onaneela nsuwa wa Afrika, aari totore. Vaavaa owo aahin’yeiye muteko nthowa na wuuluvala aapacerya muteko wa opiyoneero. Mirreh aakhalano ereca etokweene yeeyo yeeriha okhala woovila oya mmuteko woolaleerya empa ni empa. Nyenya owo aanawerya omaliha elukuluku yincipale mmuteko wa olaleerya wa vanlakani nave aakhalano sooxekurya sincipale ni soohuserya sa Piipiliya, akina a yaawo aalocano orweela mu telefoni. Ntakhara heeni Mirreh aanachuna opaka sincipale ntakhara Yehova? Owo ooloca: “Murima aka waanakuukucha ntakhara omusivela Yehova ni Yesu. Nave kaanavekela moohihiyererya wi Yehova akikhaviherye wi kiwerye opaka sincipale seiho kaaweryaaka mmuteko awe.”—Mat. 22:36, 37.

10. Ntoko yooniheryiwaaya mu 1 Pedro 5:10, tiheeni yaale aniilipixerya anaakhelaaya orweela wa Yehova?

¹⁰ Ninnaakhela ovyakiha wawaacereryeya woorweela wa Yehova. Kenny, piyoneero onarumeela o Mauritius, ohoona wi ela eparipari. Vaavaa aahusenryeiye eparipari, owo aahiya exikola yavasulu, apatisiwa, nave aavolowa mmuteko wa elukuluku yoothene. Owo ooloca: “Kinneererya okhala mwawiiwanana ni masu a mulipa a miririmu Isaiya, yoowo aalonce: ‘Miyo kiriva! Mukirume.’” (Isa. 6:8) Kenny oolapa mmiteko mincipale sa oteka, nave tho ookhaviherya otaphulela soolaleeryiwa sinathipeleya Mpiipiliyani mu elocelo awe yooyariwano. Kenny ooloca: “Kohaakhela ovyakiha yoowo okihusinhe mavyakelo yaawo kinachunaaka wi kikhwaaniherye orummwa aka.” Nyenya owo ohuserya sincipale ohiya pahiru mukhalelo wa ophara muteko yoola. Owo ohaaceererya, “Koohuserya vooloca sa okotakota waka ni mikhalelo seiho kinaphwanelaaka wunnuwiha wi kikhale mulapeli aphaama a Yehova.” (Mwaalakhanye 1 Pedro 5:10.) Akhweya nyuwaano tho munaphwanela opaka matorokelo wi Yehova awerye woovyakihaani mmikhalelo mincipale.

11. Wiilipiserya taani arokora o Koreya apankaaya wi epake sincipale mmuteko woolaleerya, nave ni yookhumelela taani? (Moone eruku va ekaapa.)

¹¹ Naamwi achu yaale ari Anamoona mu iyaakha sincipale annachuna ovyakiha vaavaa anapakaaya mukhalelo muvyaani wa orummwa. Variyari va epahu ya Koronaviru, atokweene a muloko  mmoha wo Koreya aarepa: “Akina yaawo yuupuwela wi hiyaahaala oweryaka olaleerya nthowa na mukhalelo aya wa okumi vano annawerya weerano empharihelaka vídeo conferência. Arokora araru yaawo arino iyaakha variyari va 80 aahuserya mukhalelo wa opharihela ikhankoonya nave vano annapaka sincipale mmuteko woolaleerya.” (Sal. 92:14, 15) Apwanne mwaahaala waacererya orummwa anyu nave mulawihe oreera murima wa Yehova? Muthokororye ichu ikina seiho munaphwanelaanyu weera wi mwaakhwaniherye yoolakelela yeela.

12. Tiheeni Yehova onaroromeliheiye wa yaale anamuroromela yoowo?

¹² Muhuserye omuroromela Yehova. Owo onnaroromeliha onireeliha vaavaa nnamuroromelaahu yoowo ni omvaha owetha wahu. (Mal. 3:10) Murokora o Kolompiya awiichaniwa Fabiola ohoona waakhwanela wa yoororomeliha yeela ya Yehova mmakupa awe. Owo aanachuna orumeela ntoko piyoneera a elukuluku yoothene amanle opatisiwa. Nyenya, aiyawe ni anamwane awe araru yaanachuna nikhaviheryo nawe. Vaavaa owo eemereryiweiye ohiya olapa, owo aavekela ni murima woothene avekaka nikhaviheryo na Yehova. Owo ooloca: “Ennaviravo elukuluku yincipale wi achu yeemereryiwe ohiya muteko, nyenya wa miyaano kaaheemereryiwa ovinrevo mweeri mmoha. Ela yaari yootikhiniha!” Miyeeri miili ohoolo waya owo aapacerya opiyoneera. Owo vano orino iyaakha 70 nave onarumeela ntoko piyoneera opwaha iyaakha 20. Variyari va elukuluku yeela, owo ohaakhaviherya achu 8 ophiyerya opatisiwa. Owo ooloca: “Naamwi mu ilukuluku ikina kinnakoma, Yehova onnakikhaviherya nihiku ti nihiku wi kititelele mmuteko aka.”

13-14. Sootakiherya taani sini sinikhaviherye omuroromela Yehova ni weeravo echu?

 ¹³ Muhuserye orweela wa sootakiherya sa yaale yaamuroromela Yehova. Mpiipiliyani sookhalamo sootakiherya sa achu yaawo yiilipisenrye mmuteko wa Yehova. Mmikhalelo mincipale, akapuro yaala a Yehova tiyaapacerya weeravo echu ehaakumve waakhela mareeliho avameekhaaya oorweela wa Yehova. Ntoko yootakiherya, Yehova aamureelinhe Aparahamu pahiru amanle ovinyawo owannyawe, naamwi “ahisuwelaka weiwo aayeiyewo.” (Ahe. 11:8) Yakopo aakhenle mareeliho avameekhaaya pahiru amanle owana ni munkeelo. (Map. 32:24-30) Vaavaa nloko na Aisarayeli naayaaya ovolowa mu Elapo ya Nlakano, naawerya olapuwa Muhice Yortano pahiru anamukucho emanle onyikala maahi.—Yos. 3:14-16.

¹⁴ Nyuwaano tho munanwerya ophuravo orweela wa sootakiherya sa Anamoona a Yehova amutano yaawo anamuroromela Yehova ni weeravo echu. Ntoko yootakiherya, munna awiichaniwa Payton ni mwaariye, Diana, yaanasiveliwa waalakhanya vooloca sa anna ni arokora yaawo yaacererya muteko aya ntakhara Yehova, ntoko sawii “Eles se ofereceram.” * Payton ooloca: “Vaavaa naalakhanyaahu saweereya saya, waakhala wi naamoona muchu apuhaka yoolya yoosiva. Moovira wa elukuluku, hiyaano tho naanachuna ‘olawiha ni woona wi Yehova taphaama.’” voocharela, Payton ni Diana yaathaama wi yarumeele weiwo waariwo othowa otokweene. Apwanne mohintoko waalakhanya miyaha seiha? Naari mohintoko woona ixilema Pregação em Territórios Isolados—Australia ni Pregação em territórios isolados—Irlanda sinaphwanyeya mu jw.org? Miyaha seiha sinanwerya wookhaviheryaani woona mikhalelo muneeraanyu mwaaceererye orummwa anyu.

15. Ti mwawiihai asinthamwene aphaama ananikhaviheryaaya?

¹⁵ Mwaathanle asinthamwene aphaama. Ti wookhweya wa hiyaano olya yoolya yeeyo nihintonkaahu olya wakhala wi nnakhala ni achu yaawo enasiveliwano olya. Mmukhalelo woolikana, wakhala wi nnapaka onthamwene ni yaale anapharihela ekumi aya emurumeelaka Yehova, mwawooneya nnahaala woona mikhalelo seiho nnahaalaahu waaceererya orummwa ahu ntakhara Muluku. Ela ti yeeyo yeeren’ye ni Kent ni Veronica. Kent ooloca: “Asinthamwene ahu ni amusi yaanceenyerya wi neererye mikhalelo mivyaani sa orummwa. Nohoona wi opaka onthamwene ni achu yaawo anakuha Omwene mu nipuro noopacerya, woonikhaviherya ororomela wi neererye mikhalelo mikina mivyaani.” Kent ni Veronica vano anarumeela ntoko mapiyoneero a vameekhaaya o Serbia.

16. Ntoko yooniheriwaaya mu niphwanaphwaniho na Yesu nnaphwanyeya mu Luka 12:16-21, ntakhara heeni ninnaphwanela opaka owetha wahu?

¹⁶ Mpake owetha wanyu ntakhara Yehova. Hiyaano hinnachuna ohiya ichu nnasiveliwaahuno wi nimuhakalalihe Yehova. (Ekle. 5:19, 20) Nyenya wakhala wi noothanla ohipaka sincipale mmuteko wa Yehova nthowa nawi hinnachuna ohiya ichu seiho nnasiveliwaahuno nnahaala olikana ni mulopwana a mu niphwanaphwaniho na Yesu yoowo iilipisenrye wi aphwanye ichu sincipale saphaama nyenya ahinathokororya vooloca sa Muluku. (Mwaalakhanye Luka 12:16-21.) Munna awiichaniwa Christian, yoowo onakhala o Fransa, ooloca: “Miyaano nkaavaha elukuluku aka ni ikuru saka ntakhara Yehova ni emusi aka.” Owo ni mwaariye yaalakelela okhala mapiyoneero. Nyenya wi yaakhwaniherye yoolakelela yeela, awo yaaphwanela ohiya miteko saya. Wi eweryeke wiikhaviherya, awo yaampacerya nakoso mukhaani, nave yaahuserya waakhwaneliwa ni yeeyo yaaraayano. Apwanne awo annahakalala nthowa na ohiya ichu ikina wi epake opiyoneero? Christian  ooloca: “Ninnahakalala vancipale ni orummwa ahu wa hiihaano nave ninnasiveliwa owoona oohuserya a Piipiliya ni yaawo nnaasekuryaahu ehuseryaka vooloca sa Yehova.”

17. Ntakhara heeni onanwerya okhala woovila weererya opharihela meerelo mavyaani mu orummwa ahu?

¹⁷ Mukhale olakelela weererya mikhalelo mivyaani sa orummwa. (Saw. 17:16, 17; 20:20, 21) Shirley, piyoneera o Estatu Unitu, aapaka matorokelo mu orummwa awe variyari va epahu ya Koronaviru. Voopacerya, owo aanoovelela olaleerya ni telefoni. Owo amanle waakhela ovyakiha variyari va oxekurya wa ooweherya a ekulucu, aapacerya olaleerya ampharihelaka telefoni. Owo ooloca: “Woopaceryani, kaanoova, nyenya vano kinnasiveliwano vancipale. Vano ninnalaleerya wa achu ancipale opwaha vaavaa naalaleeryaahu empa ni empa!”

18. Tiheeni enahaala onikhaviherya wakhala wi echu vyakala enneeriha okhala woovila waakhwaniha orummwa ahu?

¹⁸ Mutikitherye soolakelela nave mweererye waakhwaniherya. Vaavaa nnahoolelaahu makacamiho, ninnavekela nivekaka nikhaviheryo ni wuupuwelela moopwacha vooloca sa yeeyo nnahaalaahu weera. (Masi. 3:21) Sonia, yoowo onarumeela ntoko piyoneera a elukuluku yoothene mu nikhuuru na elocelo ya Romaniya a Europa, ooloca: “Kinnasiveliwa orepela soolakelela saka va papelini nave kinnakuha va nipuro vaavo onakhala wookhweya woona. Vameesa vaka koocekavo mixewe miili seiho sinaya makupa oohiyana. Vaavaa kinachunaaka opaka yoolakelela, kinnavarerya mixewe seihe miili nave kinnuupuwelela makupa taani yoolakelelaaka enakikerihaayawo.” Sonia onnatitelela okhalano moonelo woophwanelela vooloca sa makacamiho yaawo onahooleleiye. Owo ooloca: “Vaavaa mikhalelo saka sinatorokeyaaya kimanle opaka yoolakelela kinnaphwanela olakelela waakhanle wi kinahaala woonaka ntoko exiri yeeyo enahaala okimaaliha naari kinahaala woonaka ntoko eponthi yeeyo enahaala okikhaviherya okhwaaniherya soolakelela saka.”

19. Nni nooniherye hayi othamalela ichu soothene saphaama Yehova onanivaheiye?

¹⁹ Yehova onnanreeliha mmikhalelo soohiyanahiyana. Nnanwerya wooniherya othamalela wahu ntakhara mareeliho oothene yaala moorweela wa opaka echu eri yoothene nnaweryaahu wi nimuhakalalihe yoowo. (Ahe. 13:15) Eyo enanwerya ophitaanyerya waavya mikhalelo mivyaani sa waacererya orummwa ahu, yeeyo enahaala weeriha wi naakhele mareeliho awaaceererya. Nihiku ti nihiku, hankooni naavye mikhalelo sa ‘olawiha ni woona wi Yehova taphaama.’ Neerano hiiha nnahaala okhala ntoko Yesu yoowo aalonce: “Yoolya aka ti weerano yookhwela ya yoole okirumme ni okhwaaniherya muteko awe.”—Yoh. 4:34.