1. Ti mwawiihai nnaphuraahu moorweela wa oloca sa mukhalelo nihusenryaahu “eparipari?”

 “MUHUSENRYE hai eparipari?” Moohikhwa minikwa nyuwaano mohaakhula nikoho nenla ikwaha sincipale. Nla nimoha na makoho oopacerya yaawo nnampakelaahu munna naari murokora vaavaa nnachunaahu omusuwela phaama yoowo. Ninnasiveliwa wiiwa mukhalelo anna ni arokora ahu emusuwenlaaya ni omusivela Yehova nave ninnasiveliwa waaleela yaawo mukhalelo nnoonaahu eparipari. (Aro. 1:11) Ntoko yookhumelela ya ochekula yoola, ninnuupuxeryiwa mukhalelo eparipari eryaaya yoochuneya. Nave tho ninnalipiha yoolakelela ahu ya ‘weeca mu eparipari,’ eyo tiwi, otitelela okhala mmukhalelo yoowo onahaala onruuhela mareeliho ni weemereryiwa wa Yehova.—3 Yoh. 4.

2. Tiheeni nnahaalaahu othokororya mmwaha yoola?

² Mmwaha yoola, nnahaala othokororya mathowa makina yaawo ananeeriha osivela eparipari. Voocharela nnahaala othokororya mukhalelo nneeraahu ntitelele wooniherya osivela wa yamahala yeela yoochuneya. Moohikhwa minikwa, othokororya yoola onahaala wunnuwiha omuthamalela wahu Yehova wa yeeyo eenreiye wa hiyo, onikeriha mu eparipari. (Yoh. 6:44) Ela tho enahaala olipiha nchuno nahu na waahusiha akina eparipari ya Mpiipiliyani.

3. Nthowa taani noochuneyaxa nnaneeriha osivela eparipari?

³ Nookhalano mathowa mancipale ananeeriha osivela eparipari. Nthowa noochuneyaxa, ninnamusivela Yehova Muluku, yoowo ori Mathipelo a eparipari. Moorweela wa Masu awe, Piipiliya, noomusuwela yoowo ohiya pahiru ntoko a owerya woothene naari Mpatuxa a erimu ni elapo yavathi nyenya tho ntoko Tiithi ahu a wirimu oosivela, yoowo onanthokororya. (1 Ped. 5:7) Noosuwela wi Muluku ahu ta “ikharari ni ooreera murima, oohaakuvela onanariwa, oosareya osivela woororomeleya  ni weeparipari.” (Muk. 34:6, TNM.) Yehova onnasivela wookololowa. (Isa. 61:8) Owo onnasooseya murima vaavaa onanooneiye nihooxeyaka, mwa yeeyo ori ooreheryeya nave onnachuna omaliha makacamiho oothene. (Yer. 29:11) Ela ti yoohakalalihaxa! Moohikhwa minikwa ninnamusivela vancipale Yehova!

4-5. Ntakhara heeni murummwa Paulo oolikanyiha ewehereryo ahu ni ankora?

⁴ Nthowa taani nikina nnaneeriha osivela eparipari? Eparipari ennanruuhela mphurelo wawaaca. Muthokororye yootakiherya emoha. Eparipari ya Mpiipiliyani enaphitaanyerya ewehereryo ahu ya omwaahiyu. Wi aphwanaphwanihe esisapo ya ewehereryo yeela, murummwa Paulo oorepa: ‘Ti yeeyo enanlipiha mmurimani mwahu, ntoko aankora oolipa ni oothipeleya.’ (Ahe. 6:19) Hiihaa ntoko ankora onamulipiheiye mwaaceya, ewehereryo ahu enathipeleya Mpiipiliyani enanwerya onikhaviherya okhala oomaaleleya vaavaa nnahoolelaahu makacamiho mookumini.

⁵ Mu yoorepa yeela, Paulo aaloca sa ewehereryo ya wirimu yeeyo Akristu oothanliwa aryaayano. Nyenya masu yaala tho annaphariheleya wa Akristu yaawo arino ewehereryo ya okhala mparataiso veelaponi yavathi okhala wookhala. (Yoh. 3:16) Mweeparipari, ohuserya vooloca sa ewehereryo ahu ya okumi woohimala onneeriha okumi ahu okhalano yootaphulela.

6-7. Yvonne aaphunre hai moorweela wa ohuserya eparipari vooloca sa omwaahiyu?

⁶ Muthokororye yaweereya ya murokora mmoha awiichaniwa Yvonne. Owo haaphwiiwe mu eparipari nave vaavaa aareiye mwaana, aanoova okhwa. Owo onnuupuwela masu yaawo aalakhannyeiye yaaloca wi: “Nihiku nikina honi okhalevo omeelo.” Owo ooloca: “Masu yaala yaanakeeriha okona kiri awoova kuupuwelaka sa omwaahiyu. Kaanuupuwela: ‘Apwanne okumi ti yoolaru pahi? Ntakhara heeni kikhanlaaka?’ Nkaachuna okhwa!”

⁷ Voocharela, ari mwali, Yvonne aahaasuwela Anamoona a Yehova. Owo oothariha: “Kaapacerya ororomela wi kinanwerya okhalano ewehereryo ya okhala mu Parataiso veelaponi ya vathi okhala wookhala.” Ti mwawiihai murokora ahu aaphunreiye moorweela wa ohuserya eparipari? Owo ohaaceererya: “Ohiyu nkaakona tho kiri awoova vooloca sa omwaahiyu naari okhwa.” Ntoko munaweryaanyu waanyiherya, eparipari ti yoochuneyaxa wa Yvonne nave onnahakalala vancipale waaleela akina ewehereryo awe ya omwaahiyu.—1 Tim. 4:16.

8-9. (1) Mu nimoha na maphwanaphwaniho a Yesu, ti mwawiihai mulopwana mmoha aavanheiye esisapo muhakhu yoowo aaphwanyeiye? (2) Ophiyerya mweeryo taani munavahaanyu esisapo eparipari?

⁸ Eparipari ya Mpiipiliyani ennaphitaanyerya tho michaka yaphaama vooloca sa Omwene wa Muluku. Yesu oolikanyiha eparipari vooloca sa Omwene ni muhakhu ovithiwe. Ntoko erempwalaaya mu Mateu 13:44, BNM Yesu oriye: “Omwene wa wirimu onaphwanaphwana ni muhakhu ovithiwe mmatxani. Mutxhu otxontxe onnavitha wiliwili; àtepa ohakalala, àkuliha sothene oreiyeno, ni akula ematxa ele.” Moone wi mulopwana tahi wi aavya muhakhu. Nto vaavaa aaphwannyeiye, aahiilipixerya vancipale wi awerye othuma. Mweeparipari, owo aatumiha soothene aareiyeno. Ntakhara heeni? Owo aahisuwela mukhalelo muhakhu ole waaryaaya wasisapo. Muhakhu owo waari woochuneyaxa opwaha echu vyakala aareiyeno.

⁹ Apwanne ti hiiha munoonaanyu eparipari? Moohikhwa minikwa munoona hiihaa! Ninnasuwela wi hiyaavo echu elapo yeela  enavahaaya nneeraahu nlikanyihe ni ohakalala nryaahuno mu orumeela Yehova hiihaano, vamoha ni ewehereryo ya okhalano okumi woohimala omwaahiyu vathi va olamulelo wa Omwene wa Muluku. Ekari nryaahuno ya opuha onthamwene wawaacameleya ni Yehova ti yasisapo opwaha wiilipixerya vyakala nnapakaahu. Ohakalala wahu otokweene onarweela mu ‘omuhakalaliha yoowo mu soothene.’—Kol. 1:10.

10-11. Tiheeni yaamuceenyenrye Michael opaka matorokelo matokweene mu okumi awe?

¹⁰ Ancipale a hiyo noopaka wiilipixerya otokweene wi nikhale aweemereryiwa ni Yehova. Akina aahiya miteko sa mulaponi seiho saaliva ikhorowa sincipale. Akina aahiya waavyaavya okhala achu ooreela. Nave akina aatoroka moomalela mukhalelo wa okumi aya vaavaa yaahusenryaaya vooloca sa Yehova. Ti yeeyo Michael eenreiye. Owo haaphwiiwale mu eparipari. Vaavaa aareiye mmiravo, owo aavyakihiwa mmapokha a owaniha. Owo oriye: “Kaaniirumiha vancipale nthowa na okhala akuru. Mu ilukuluku ikina, Kaaniisoona ntoko muchu oohivootheya.” Nyenya vaavaa Michael aapacenryeiye omuhuserya Piipiliya, aahuserya moonelo wa Yehova vooloca sa nlala. (Sal. 11:5) Uupuwelaka sa mutheli yoowo aari Namoona aamuhusiha Piipiliya, Michael ooloca: “Awo hiyaantonko okileela wi kihiye opaka mapokha a owaniha; pahiru awo yaarimoona otitelela okihusiha iparipari sa Mpiipiliyani.”

¹¹ Vaavaa Michael aahusenryeiye sincipale vooloca sa Yehova, osivela wawe ntakhara Yoowo waahinnuwa. Owo aatannyeya murima xaxaxa moorweela wa ohuserya vooloca sa ikharari sa Yehova ntakhara alapeli Awe. Mweelukuluku aya, Michael aahiiwexexa wi aaphwanela opaka matorokelo mookumini. Owo ooloca: “Kaahisuwela wi ohiya mapokha a owaniha yaahaala okhala echu yoovila wa miyaano. Nyenya kaahisuwela wi eyo yaahaala omuhakalaliha Yehova nave kaahilekecheya wi omurumeela yoowo yaari echu yaphaamaxa opwaha wiilipixerya vyakala.” Michael aasuwela wi eparipari aaphwannyeiye yaari yasisapo nave eyo yaahimuceenyerya opaka matorokelo matokweene mu okumi awe.—Tiy. 1:25.

12-13. Ti mwawiihai eparipari ya Mpiipiliyani yaamukhavihenryaaya Mayli?

¹² Wi ooniherye esisapo ya eparipari, Piipiliya onnalikanyiha eyo ni omwaleela variyari va epiiphi. (Sal. 119:105; Éfe. 5:8) Mayli yoowo onakhala o Aserpaixau, onnathamalela vancipale nikhaviheryo nenlo aakhenleiye orweela Mmasu a Muluku. Owo ophwiiwale mu emusi yookawanyeya mmalapelo. Apapa awe yaari Musulumaanu nave amama awe yaari Muyuta. Owo oriye: “Naamwi kahikhwaaka minikwa wi Muluku ookhala, kaakhalano makoho mancipale mmuruni mwaka. Kaaniikoha: ‘Ntakhara heeni Muluku ohaapatuxa achu nave ni yoolakelela taani muchu onahooxeyeiye mu okumi awe woothene voocharela anahooxeya omooroni okhala wookhala?’ Woona wi achu yaaloca wi echu eri yoothene eneereya yookhwela ya Muluku, kaaniikoha, ‘Apwanne Muluku onnaavareryela achu ni anahakalala vaavaa onawooneiye ehooxeyaka?’”

¹³ Mayli aahititelela waavya maakhulo a makoho awe. Ohoolo waya owo aaheemererya yoohuserya ya Piipiliya nave aakhala Namoona a Yehova. Owo ooloca: “Olekecheya ni yeeyo Piipiliya onahusiheiye waakikhaviherya okhala muchu oohakalala. Iparipari sookwakwaleya kaaphwannyaaka Mmasu a Muluku saakiruuhela murecele wampuwa.” Moolikana ni Mayli, oothene ahu  ninnamucicimiha Yehova ‘yoowo oniichanne naaryaahu mu epiiphi wi nikhaleke mu omwaleela wawe wootikhiniha.’—1 Ped. 2:9.

14. Nni ninnuwihe hai osivela wahu ntakhara eparipari? (Moone tho ekaaxa “ Maphwanaphwaniho Awaaceererya.”)

¹⁴ Iha sootakiherya savakhaani sinooniherya mukhalelo eparipari eryaaya yasisapo. Moohikhwa minikwa munanwerya wuupuwela sootakiherya sa akina. Munoona hai opaka marehereryo a yoohuserya ya muchu mukhateiye wi mphwanye mathowa makina ananeeriha osivela eparipari? Vaavaa nnasivelaahu eparipari moopwaha, nnahaala ophwanya mikhalelo mikina sa wooniherya osivela wahu wa yeeyo.

15. Mukhalelo taani mmoha nnaweryaahu wooniherya osivela wahu ntakhara eparipari?

¹⁵ Nnawerya wooniherya osivela ntakhara eparipari moorweela wa omwaalakhanya Piipiliya moohihiyererya ni soolaleeryiwa sinathipeleya Mpiipiliyani. Opwaha soothene, moohipwacha elukuluku taani nimalinhaahu mu eparipari, ilukuluku soothene sinnakhalavo ichu sincipale wi nihuserye. Erevista ya Mulipeleli yoopacerya yaaloca: “Mweelaponi  aakhalamo mahusiheryo mancipale oowoka, ela enanwerya weeriha okhala woovila osuwela eparipari. Wi mphwanye eyo munaphwanela otitelela waavya. . . . Waakhanle wi moophwanya, munaphwanela wiilipixerya okhapelela yeeyo. Muheeliwe murima ni ethutu emoha ya eparipari. . . . Muthukumanye vamoha, mwaavyeke ekina.” Ohuserya, muteko woovila, nyenya ti woophwanelela wiilipixerya weerano.

16. Meerelo taani a ohuserya anookhaviheryaani? (Masiposipo 2:4-6)

¹⁶ Tahi wi oothene ahu ninnasiveliwano waalakhanya ni ohuserya. Nyenya Yehova onnaniwopa wi ‘ntitelele waavya’ wi niiwexexe mwawiixeela eparipari. (Mwaalakhanye Masiposipo 2:4-6, TNM.) Vaavaa nneerahuno yeela, ilukuluku soothene ninnaphura. Uupuwelaka sa omwaalakhanya wawe Piipiliya, Corey olonce wi onatikitheryeya mu eversikulu emoha mu ekwaha ti ekwaha. Owo oothariha: “Kinnaalakhanya inoota soothene, kinnaalakhanya tho ireferensiya soothene nave kinnapaka otholathola wawaaceereryeya. . . . Meerelo yaala annakikhaviherya ohuserya ichu sincipale!” Moohipwacha waakhanle wi nnapharihela meerelo yaala naari makina, ninnooniherya othamalela wahu ntakhara eparipari vaavaa nnaavyaahu elukuluku ni opaka wiilipixerya wahu wi nihuserye yeeyo.—Sal. 1:1-3.

17. Enataphulela eheeni okhala mwawiiwanana ni eparipari? (Tiyako 1:25)

¹⁷ Mweeparipari, ninnasuwela wi henaakhwana pahiru ohuserya eparipari. Wi niphure vancipale, nnaphwanela okhalaka mwawiiwanana ni eparipari, eyo tiwi, opharihela mu okumi ahu yeeyo nnahuseryaahu. Neerano yeela, eparipari enahaala onruuhela ohakalala weeparipari. (Mwaalakhanye Tiyako 1:25.) Nni nroromele hai wi ninnakhala mwawiiwanana ni eparipari? Munna mmoha oovahererya moonelo. Owo olonce wi nnaphwanela wiisaalikhela wi nsuwele makupa taani nneeraahuno phaama ni makupa yaawo nnaphwanelaahu orehererya. Murummwa Paulo ooloca: “Vaavaa niphin’yaahuvo nchariheke meecelo oophwanelela.”—Fil. 3:16.

18. Ntakhara heeni ninnapaka owetha wahu wi ‘ntitelele weeca mu eparipari?’

¹⁸ Pahiru muupuwele mukhalelo nnaphuraahu vaavaa nnapakaahu owetha wahu wi ‘neeceke mu eparipari!’ Tahi wi pahiru nnarehererya mukhalelo wa okumi ahu nyenya ninnamuhakalaliha tho Yehova ni alapeli akhwiihu. (Masi. 27:11; 3 Yoh. 4) Ala mathowa aphaama ananeeriha osivela eparipari ni okhala mwawiiwanana ni yeeyo!