1. Ntakhara heeni Yesu amveka Yehova wi aakhapelele oomuchara awe?

 MU OHIYU ahaakumve okhwa, Yesu aapaka yooveka yavameekhaaya wa Tiithi awe a wirimu. Owo aahimveka Yehova wi aakhapelele oomuchara awe. (Yoh. 17:15, 20) Mweeparipari, Yehova ilukuluku soothene onnaavareryela achu awe wi aakhapelele ni owaakiha. Mwawiihiiha, Yesu aasuwela wi oomuchara awe yaahaala ohoolela wiiciwa otokweene woorweela wa Satana. Yesu aasuwela tho wi oomuchara awe yaahaala ochuna nikhaviheryo na Yehova wi evilele ni ohiphela wa Musaserya.

2. Mwawiiwanana ni Salumu 33:18-20, ntakhara heeni hannaphwanela okhala awoova vaavaa nnahoolelaahu makacamiho?

² Elapo yeela enalamuleliwa ni Satana, ennaaruuhela makacamiho mancipale Akristu eeparipari olelo. Ninnahoolela makacamiho yaawo ananceecheiha ni aneeha ororomeleya wahu wa Yehova. Nyenya ntoko nnahaalaahu woona mmwaha yoola, hannaphwanela okhala awoova. Yehova onnanivareryela nave onnoona makacamiho yaawo nnahoolelaahu ni ori ooreheryeya onikhaviherya ovilela ni yaawo. Hankooni noone sootakiherya piili sa Mpiipiliyani seiho sinooniherya mukhalelo Yehova ‘onaavareryeiye ni waakhapelela yaawo anamwiiwelela.’—Mwaalakhanye Salumu 33:18-20.

3. Elukuluku taani nniisoonaahu omeekha?

³ Naamwi nrino anna ni arokora ancipale mmulokoni, ilukuluku ikina nnanwerya wiisoona omeekha. Ntoko yootakiherya, amiravo ni asimwali ananwerya wiisoona omeekha vaavaa anatharihaaya soororomela saya wa asinthamwene aya oxikola naari vaavaa anathaamelaaya mmuloko muvyaani. Akina a hiyo nnanwerya okhala awuukhuwa naari owaniha ni miyoonelo soohiphwanelela nuupuwelaka wi nnahoolela miyoonelo iho mukhatiihu. Nnanwerya woovelela oloca ni akina vooloca sa mukhalelo  nniisoonaahu nuupuwelaka wi awo heeni eniiwexexe. Nave ilukuluku ikina, nnamukhwaaka minikwa waakhanle wi ookhalavo muchu onanipwacha chiryene. Moohipwacha mathowa ene, wiisoona omeekha onamuneeriha wuupuwelaka wi noonyanyaliwa ni okhala awuukhuwaxa. Yehova hanachunaru wi niisooneke mmukhalelo yoowo. Ntakhara heeni nnalocaahu yeela?

4. Ntakhara heeni mulipa a miririmu Eliya aalonceiye: “Kihanle meekhaaka?”

⁴ Muthokororye yootakiherya ya mulopwana oororomeleya Eliya. Yesapeli aalipela wi aahaala omwiipha yoowo, mwawiihiiha owo aakhalela ochawaru mu mahiku 40. (1 Mam. 19:1-9) Vookuchula, ari meekheiye onikhukuni, owo aahivekela wa Yehova ariki: “[Mulipa a miririmu] kihanle meekhaaka.” (1 Mam. 19:10) Mweelaponi yaahikhalamo alipa a miririmu. Ntoko yootakiherya, Opatiya aahaavuluxa alipa a miririmu 100 yaawo Yesapeli aachuneiye owiipha. (1 Mam. 18:7, 13) Vano ntakhara heeni Eliya iisooneiye omeekha? Apwanne owo uupuwela wi alipa a miririmu yaawo Opatiya aavulunxeiye yaahikhwa oothene? Mano akhweya owo iisoona omeekha nthowa nawi haavovo muchu aapacenrye omurumeela Yehova vamoha ni yoowo Yehova amanle wooniherya wi owo aari Muluku eeparipari va Mwaako Karmelo? Apwanne owo uupuwela wi haavo aasuwela wi owo aari va yawoopiha naari wi akhweya uupuwela wi haavo muchu aahaala omukhapelela yoowo? Yaweereya henathariha mukhalelo woothene Eliya iisooneiye. Nyenya echu nnasuwelaahu tiyawi Yehova aaniiwexexa ntakhara heeni Eliya aaniisoona omeekha nave Owo aanasuwela phaameene mukhalelo wa omukhaviherya yoowo.

5. Yehova aamuroromelinhe hai Eliya wi haari meekheiye?

⁵ Yehova aamukhaviherya Eliya mmikhalelo mincipale. Owo aamuceenyerya Eliya oloca. Ikwaha piili Yehova aamukoha owo: “Oneeranvo Eliya?” (1 Mam. 19:9, 13) Ekwaha ti ekwaha, Yehova aananwiriyana Eliya vaavaa aamuleeleiye owo mukhalelo iisooneiye. Yehova aamwaakhula Eliya moorweela wa omooniherya wi Owo aari ni yoowo nave wi Owo tooweryaxa. Yehova aahimuroromeliha tho Eliya wi yaahikhalavo Aisarayeli akina yaawo nlelo yaamulapela Yoowo. (1 Mam. 19:11, 12,  18) Moohikhwa minikwa, Eliya aahikhala ootaphuwa amanle ohula murima awe wa Yehova ni wiiwa mukhalelo aamwaakhunleiye. Yehova amvaha Eliya mirici mincipale ni soochuneya. Owo amveka wi amuthanle Hasayele ntoko mwene a Asiriya, Yehu ntoko mwene a Isarayeli ni Eliseu ntoko mulipa a miririmu. (1 Mam. 19:15, 16) Moorweela wa omvaha mirici seiho, Yehova aahimukhaviherya owo otikitheryeya mwa ichu saphaama. Muluku amvaha tho nthamwene awe avamurimani, Eliseu. Yehova onookhaviheryaani hai vaavaa muniisoonaanyu omeekha?

6. Tiheeni munaphwanelaanyu ovekela vaavaa muniisoonaanyu omeekha? (Salumu 62:8)

⁶ Yehova onnoovekaani wi mvekeleke wa yoowo. Yehova onnoona nikacamiho munahoolelaanyu nave owo onnoororomelihaani wi onahaala owiriyana mavekelo anyu elukuluku eri yoothene. (1 Tes. 5:17) Owo onnasiveliwa waawiriyana alapeli awe. (Masi. 15:8) Tiheeni munaphwanelaanyu oveka vaavaa muniisoonaanyu omeekha? Muhule murima anyu wa Yehova, hiiha ntoko Eliya eenreiye. (Mwaalakhanye Salumu 62:8.) Mmuleele vooloca sa sawuukhula sanyu ni mukhalelo iho enoovolowelaayani. Mumveke Yehova wi ookhaviheryeeni ovilelano miyoonelo sanyu. Ntoko yootakiherya, wakhala wi munniisoona omeekha ni woovelela vaavaa munalaleeryaanyu oxikola, mumveke Yehova wi oovaheeni olipa murima yoowo munachunaanyu. Nyuwaano munanwerya tho omveka Yehova miruku wi mutharihe soororomela sanyu moomaaleleya. (Luka 21:14, 15) Wakhala wi munnawaniha ni muupuwelo woohiphwanelela, mumveke Yehova wi ookhaviheryeeni oloca ni munna naari murokora awiichwelavo. Munanwerya omveka Yehova wi amukhaviherye muchu yoowo munamuroromelaanyu wi oowiriyaneni ni owiiwexexaani. Muhule murima anyu wa Yehova, moone ti mwawiihai Yehova onaakhuleiye mavekelo anyu nave mweemererye nikhaviheryo na akina; nyuwo himwiisoona omeekha.

7. Tiheeni munahuseryaanyu orweela wa yootakiherya ya Mauricio?

⁷ Yehova oonivaha oothene ahu muteko wa mphurelo wi nipake. Nyuwaano munanwerya ororomela wi Yehova onnoona ni othamalela miteko soothene munapharaanyu mmulokoni ni mmuteko woolaleerya. (Sal. 110:3) Oweiwa mmuteko yoola onookhaviheryaani hai vaavaa muniisoonaanyu omeekha? Muthokororye yootakiherya ya munna mmoha yoowo ori mmiravo awiichaniwa Mauricio. * Elukuluku vakhaani Mauricio amanle opatisiwa, mmoha a asinthamwene awe avamurimani aapacerya ohiya eparipari. Mauricio ooloca: “Omoona owo amuhiyaka Yehova waakivolowela vancipale. Kaaniikoha waakhanle wi kaahaala waakhwaniherya wiiveleela waka ni otitelela opaka makupa mu emusi ya Yehova. Kaahiisoona omeekha nave kaahuupuwela wi haavo aahaala wiiwexexa miyoonelo saka.” Tiheeni yaamukhavihenrye  Mauricio? Owo oriye: “Kaahaaceererya muteko aka woolaleerya. Eyo yaakikhaviherya ohiya wuupuwela sa miyo mukhataaka nave oheemererya wi muupuwelo woonanara otikitheryeye mmuruni mwaka. Kaanahakalala nave nkiisoona omeekha vaavaa kaalapaaka ni akina mmuteko woolaleerya.” Naamwi hiyaano nihiweryaka olapa vamoha ni anna ni arokora ahu vakhiviru ni vakhiviru, ninnalipiheya vaavaa nnalapaahu ni yaawo orweela mwa orepa ikaarata ni olaleerya nimpharihelaka telefoni. Echu taani ekina yaamukhavihenrye Mauricio? Owo ohaaceererya: “Kaari tho ooweiwa mmulokoni. Kaanapaka owetha waka ni wiirehererya wi kipake makupa a anaxikola mmithukumano. Mirici seiya saanakeeriha wiisoona okhala asisapo wa Yehova ni wa anna ni arokora aka.”

8. Ti mwawiihai makacamiho matokweene ananivolowelaaya?

⁸ Hiyaano ninnaweherya ohoolela makacamiho mmahiku yaala ookuchula. (2 Tim. 3:1) Mwawiihiiha, saweereya ni makacamiho sinanwerya onihiphela moohiwehereryeya. Akhweya nnanwerya okhalano makacamiho a ophwanya ikhorowa, ereca etokweene naari omuyeleela oosiveliwaahu mookhwani. Mu ilukuluku ntoko seiha, nnanwerya okhala oonyeenyeya ni ooceecheya xaxaxa wakhala wi nnahoolela makacamiho awo moocharelana naari elukuluku emohamoha. Muupuwele wi Yehova onnasuwela mukhalelo ahu nave nnikhaviheryo nawe nnanwerya ovilela nnikacamiho vyakala moororomeleya.

9. Mutharihe makacamiho makina yaawo Yupu aahoolenleiye.

⁹ Moone mukhalelo Yehova aamukhavihenryeiye mulopwana oororomeleya Yupu. Owo aahoolela makacamiho matokweene mu elukuluku emohamoha. Mu nihiku nimoha, Yupu aaleeliwa wi inama sawe soothene saahiiyiwa nave wi alapeli awe ni anaawe yaahiiphiwa. (Yobi 1:13-19) Vahilekenle, nlelo owo asooseyaka ni othanana otokweene, Yupu aakhalano ereca yawiicelaxa ni yoothanyeya. (Yobi 2:7) Mukhalelo awe waatepa onanara ophiyerya wi Yupu aaloca: “Kinnathanya ekumi; nkinatxhuna okhala.”—Yobi 7:16, BNM.

10. Ti mwawiihai Yehova aamvaherenryeiye Yupu yeeyo aachuneiye wi avilele ni makacamiho awe? (Moone eruku va ekaapa.)

¹⁰ Yehova aanamoona Yupu. Woona wi Yehova aanamusivela Yupu, Owo aahimvaha echu yeeyo owo aachuneiye wi avilele ni makacamiho awe ni otitelela okhala oororomeleya. Yehova aahiloca ni Yupu amuupuxeryaka miruku sawe soohimala ni wi onnakhapelela moosivela soopatuxiwa Sawe. Owo aahiloca sa axinama akina ootikhiniha. (Yobi 38:1, 2; 39:9, 13, 19, 27; 40:15; 41:1, 2) Yehova tho aahimpharihela mmiravo oororomeleya awiichaniwa Elihu wi amulipihe ni omuhakararya Yupu. Elihu aamuroromeliha yoowo wi Yehova ilukuluku soothene onnaachuwela alapeli Awe nthowa na ovilela waya. Nyenya Yehova tho aamuceenyerya Elihu wi amvahe Yupu ikano ikina soosivela. Elihu aamukhaviherya Yupu ohiya wiisuupuwelelaxa mukhateiye moorweela wa omuupuxerya wi hiyaano na akhaanixa naawiilikanyihaka ni Yehova, Mpatuxa a erimu ni elapo yavathi. (Yobi 37:14) Yehova tho amvaha Yupu echu ya weera. Owo amveka wi aavekelele asinthamwene awe araru yaawo yaachenke. (Yobi 42:8-10) Ti mwawiihai Yehova onanikhavihereiye olelo vaavaa nnakumanaahuno makacamiho oovila?

11. Ti mwawiihai Piipiliya onanikhaviheryeiye vaavaa nnakumanaahuno makacamiho?

¹¹ Yehova hanaloca ni hiyo mooluluwanya, hiiha ntoko enreiye ni Yupu, nyenya Owo onaloca ni hiyo orweela Mmasu Awe, Piipiliya. (Aro. 15:4) Owo onnanilipiha orweela wa onivaha  ewehereryo ya omwaahiyu. Muthokororye soorepa sa vakhaani sa Mpiipiliyani seiho sinanlipiha vaavaa nnakumanaahuno makacamiho. Mu Soorempwa, Yehova onnaniroromeliha wi hiyaavo echu—yeeyo enaphitaanyerya makacamiho matokweene eni—‘ewerye onimwalanya ni osivela [wawe].’ (Aro. 8:38, 39) Owo tho onnanroromeliha wi ‘ori vakhiviru va yaawo anawiichana’ mu nivekelo. (Sal. 145:18) Yehova onnanleela wi wakhala wi ninnamuroromela yoowo, nnanwerya ovilela nnikacamiho vyakala ni okhala oohakalala naamwi nihooxeyaka. (1 Kor. 10:13; Tiy. 1:2, 12) Masu a Muluku tho annanuupuxerya wi makacamiho ahu ta elukuluku vakhaani naalikanyihaka ni nchuwelo noohimala owo onahaaleiye onivaha. (2 Kor. 4:16-18) Yehova onnanivaha ewehereryo yoororomeleya yawi onahaala waatoloxa oothene yaale anatannya makacamiho, eyo tiwi, Satana Musaserya ni yaawo oonanara murima ntoko yoowo. (Sal. 37:10) Apwanne munnuupuwela soorepa soolipiha sa Mpiipiliyani inahaala wookhaviheryaani ovilela ni makacamiho a muhoolo?

12. Tiheeni Yehova onaweheryeiye wi neere wakhala wi ninnachuna ophura orweela wa Masu awe?

¹² Yehova onaweherya wi naavyeke elukuluku wi nimuhuserye Piipiliya moohihiyererya ni wuupuwelela mwawiiseela vooloca sa yeeyo nnaalakhanyaahu. Vaavaa nnapharihelaahu yeeyo nnahuseryaahu, nroromelo nahu ninnalipa nave ninnamwaacamela Tiithi ahu a wirimu. Ntoko yookhumelela, ninnakhala oolipa wi nivilele ni makacamiho. Yehova onnaavaha tho munepa awe waweela yaale anaroromela Masu awe. Nave munepa yoola onanwerya onivaha “owerya wene woopwaha” wi nivilele nnikacamiho vyakala.—2 Kor. 4:7-10.

13. Ti mwawiihai yoolya yoomunepani yeeyo “namuteko oororomeleya ni a miruku” onavahereryeiye enanikhaviheryaaya ovilela ni makacamiho?

¹³ Nnikhaviheryo na Yehova, “namuteko oororomeleya ni a miruku” onnapaka miyaha sincipale, ixilema ni macipo seiho inii inikhaviherye olipiha nroromelo nahu ni otitelela omwaacamela Yehova. (Mat. 24:45) Nnaphwanela opharihela phaama ichu soothene Yehova onanivaheiye. Murokora mmoha onakhala o Estatu Unitu hiihaanoru ooloca wi onnathamalela vancipale yoolya yeela yoomunepani. Owo oriye: “Variyari va iyaakha 40 kimurumeelaka Yehova, ororomeleya waka woheehiwa ikhwaha sincipale.” Owo oohoolela makacamiho oohiyanahiyana—avovo awe yaaphitiwa ni ekaaru ekhwa, asitiithi awe yahiiceliwa vancipale ophiyerya okhwa nave tho owo aaphwanyeryiwa ereca ya kanser ikwaha piili. Tiheeni yaamukhavihenrye ovilela? Owo oothariha: “Yehova  ilukuluku soothene aanakikhapelela. Yoolya yoomunepani owo aavahereryeiye orweela wa namuteko oororomeleya yaakikhaviherya ovilela. Nthowa na yeela, kinanwerya oloca hiihaa ntoko Yupu aalonceiye: ‘ophiyerya okhwa waka hinkirwa kihiya okhala oororomeleya!’”—Yobi 27:5.

14. Ti mwawiihai Yehova onaaphariheleiye alapeli akhwiihu wi enikhaviherye variyari va makacamiho ahu? (1 Tesalónika 4:9)

¹⁴ Yehova onnaavyakiha achu awe wi esivelaneke ni olipihana mukina ni mukhwaawe variyari va ilukuluku soovila. (2 Kor. 1:3, 4; mwaalakhanye 1 Tesalónika 4:9.) Emutakiheryaka Elihu, anna ni arokora ahu annachuna onikhaviherya otitelela okhala oororomeleya vaavaa nnakumanaahuno makacamiho. (Saw. 14:22) Ntoko yootakiherya, muthokororye mukhalelo muloko wa Diane waamulipinhaaya ni omukhaviherya olipa omunepani iyawe amanle ohooxeya ni ereca etokweene. Owo ooloca: “Waari woovila. Nyenya naahoona ikuru nnikhaviheryo noosivela na Yehova variyari va miyeeri seihe soovila. Muloko ahu waahipaka ichu sincipale wi onikhaviherye. Naanaxekuryiwa, naanalikaareliwa nave naanakhupaareliwa, ichu seiho naachunaahu wi ntitelele ovilela. Woona wi nkinasuwela weeciha ekaaru, anna ni arokora yaanapaka owetha waya wi kiwerye ophiya mmithukumano ni oya mmuteko woolaleerya vaavaa waakhalaaya wooweryeya wa miyo.” Chiryene, mareeliho opaka makupa a emusi yeela yoosivela yoomunepani!

15. Ntakhara heeni nri oolekecheya wi nnanwerya ovilela ni makacamiho?

¹⁵ Oothene ahu nnahaala ohoolela nikacamiho vyakala. Nyenya ntoko nihusenryaahu, hinrwaru nikhala meekhiihu vaavaa nnahoolelaahu makacamiho. Ntoko tiithi oosivela, Yehova ilukuluku soothene onnanoona. Owo ori vakhiviru vahu nave ori ooreheryeya oniwiriyana vaavaa nnamvekaahu nikhaviheryo nave onnachuna onikhaviherya. (Isa. 43:2) Nri oolekecheya wi nnanwerya ovilela ni makacamiho nthowa nawi owo mwa mahala onnanivaha echu eri yoothene nnachunaahu wi nivilele. Owo oonivaha yamahala ya ovekela, Piipiliya, yoolya yawaaca yoomunepani ni onna ahu woosivela wi enikhaviheryeke mu ilukuluku nnachunaahu.

16. Ti mwawiihai nneeraahu ntitelele waakhela okhapelela woosivela wa Yehova?

¹⁶ Chiryene ninnathamalela okhalano Tiithi a wirimu yoowo onanoona! “Mwa yawo onnahakalalamo murima ahu.” (Sal. 33:21, BNM.) Nnanwerya omooniherya Yehova wi ninnathamalela okhapelela wawe woosivela moorweela wa okumihavo mphurelo wa ichu soothene onanivaheiye wi anikhaviherye. Hiyaano tho nnaphwanela opaka makupa ahu wi ntitelele okhapeleliwa ni Muluku. Mmasu makina, wakhala wi ninnapaka owetha wahu wi nimwiiwelele Yehova ni opaka yeeyo eri yaphaama vamiithoni vawe, owo onahaala onivareryelaka okhala wookhala!—1 Ped. 3:12.