1. Ntakhara heeni Apapulu yaahitikhiniheya ni mulipa a miririmu Taniyeli?

 MULIPA a miririmu Taniyeli aari mmiravo vaavaa aakuxiweiye ni Apapulu wi akhale kapuro o Papulu, elapo yeeyo yaari ocai ni Yerusalemu, weiwo aaphwiiwaleiyewo. Nyenya mwawooneya, Taniyeli aahaatikhiniha ahooleli o Papulu. Awo yoona ichu ‘saari sawooneya,’ wi Taniyeli aari ‘oohirakala ni oophwaneliwa,’ nave wi aarwa mu emusi yoochuneya. (1 Sam. 16:7, PMM) Mwawiihiiha, awo yaahimuvyakiha wi arumeeleke mu empa ya mwene.—Tan. 1:3, 4, 6, PMM.

2. Yehova aamoonne hai Taniyeli? (Esekiyeli 14:14)

² Yehova aanamusivela Taniyeli ohiya nthowa na ophwaneliwa wawe naari mirici savameekhaaya aareiyeno o empa ya mwene, nyenya nthowa na mukhalelo wa okumi mmiravo yoola aathanlileiye okhalano. Mweeparipari, vaavaa Yehova aalonceiye wi Taniyeli aari ntoko Nowa ni Yupu, owo akhweya aarino iyaakha 20 sa oyariwa. Naamwiihiiha, Yehova aanamoona Taniyeli okhala awookololowa ntoko Nowa ni Yupu, yaawo yaamurumenle yoowo moororomeleya mu iyaakha sincipale. (Map. 5:32; 6:9, 10; Yupu 42:16, 17; mwaalakhanye Esekiyeli 14:14.) Nave Yehova aatitelela omusivela Taniyeli mu ekumi awe yoothene yoohakalaliha.—Tan. 10:11, 19.

3. Tiheeni nnahaalaahu othokororya mmwaha yoola?

³ Mmwaha yoola, nnahaala othokororya mikhalelo miili sa Taniyeli seiho saamweerinhe okhala oochuneya wa Yehova. Woopaceryani, nnahaala othariha mukhalelo ti mukhalelo ni woona ilukuluku seiho owo oonihenryeiye. Voocharela, nnahaala woona tiheeni yaamukhavihenrye Taniyeli wuunnuwiha mikhalelo seiho. Wookuchulani, nnahaala woona ti mwawiihai nneeraahu nimutakiherye yoowo. Naamwi mwaha yoola orepeliwaka amiravo, oothene ahu nnanwerya ohuserya orweela wa yootakiherya ya Taniyeli.

4. Ti mwawiihai Taniyeli oonihenryeiye olipa murima? Mvahe yootakiherya.

⁴ Achu oolipa murima ananwerya okhala awoova, nyenya awo haneemererya wi woova waahiihe opaka yeeyo eri yaphaama. Taniyeli aari mmiravo oolipa murima. Nthokororye mikhalelo miili seiho owo oonihenryeiye olipa murima. Yoopacerya yeeren’ye mu iyaakha piili Apapulu emanle ommwarya Yerusalemu. Mwene Napukotonosori o Papulu aahikhalano yooloha yootikhiniha ya eruku etokotoko. Owo aahaaleela anamiruku awe oothene ophitaanyerya Taniyeli wi emuleele yooloha ni yootaphulela aya. Waakhanle wi awo hiyenreno yeeyo, yaaphwanela wiiphiwa oothene aya. (Tan. 2:3-5) Taniyeli aaphwanela weeravo echu mwawaakuveya nthowa nawi oheerano yeeyo, yaahaala okumiherya okhwa wa achu ancipale. Owo “aaya, avolowa wa mwene, amuveka wi amvahe elukuluku yoorweela otaphulela yooloha yeele.” (Tan. 2:16; PMM) Waanachuneya olipa murima ni nroromelo. Piipiliya hanooniherya wi Taniyeli aahitaphulela yooloha mu elukuluku ene yeeyo. Owo aahaaveka asinthamwene awe yaawo yaarino masina o Papulo awi, Satraki, Mesaki ni Apitineko wi enamvekela Muluku a wirimu “wi aamorele ikharari, awooniherye yawiiphiini yeela.” (Tan. 2:18, PMM) Yehova aahaakhula mavekelo yaala. Nnikhaviheryo na Muluku, Taniyeli aataphulela yooloha ya Napukotonosori. Taniyeli ni asinthamwene awe hiyaawiiphiwe.

5. Yaweeha taani ya olipa murima Taniyeli aahoolenleiye?

⁵ Evinrevo elukuluku Taniyeli amanle otaphulela yooloha ya eruku etokweene, olipa wawe murima waaheehiwa wanaawiili. Napukotonosori aahikhalano yooloha ekina yaamuukhunle vancipale. Yooloha ela yaari ya mwiri mutokweene. Taniyeli moolipa murima aahimuleela mwene yootaphulela ya yooloha, ophitaanyerya yoolokoha yawi mwene aahaala okhala naanepa nave aahaala oyeleela omwene awe mu elukuluku yavakhaani. (Tan. 4:25) Mwene aanwerya wuupuwela wi Taniyeli aamammwaryeela, yeeyo yaahala weeriha wi Taniyeli iiphiwe. Nyenya Taniyeli aahooniherya olipa murima nave aathariha yooloha moohiphwacha yeeyo yaahaala weererya.

6. Tiheeni yaamukhavihenrye Taniyeli okhala oolipa murima?

⁶ Tiheeni yaamukhavihenrye Taniyeli okhala oolipa murima variyari va okumi awe? Vaavaa aareiye mmiravo, mweeparipari Taniyeli aahihuserya ni yootakiherya yaphaama ya amamaawe ni apapaawe. Hisaavo minikwa wi awo yaaniiwelela mahusiheryo a Yehova wa alipa ooyara o  Isarayeli, nave yaanamuhusiha mwanaya Malamulo a Muluku. (Malam. 6:6-9) Taniyeli tahi wi aasuwenle pahiru Malamulo Khumi, nyenya tho aanasuwela sooleeliherya ikina. Ntoko yootakiherya, owo aahisuwela yeeyo Aisarayeli yaaphwanelaaya olya ni yahaaphwanelaaya olya. b (Onam. 11:4-8; Tan. 1:8, 11-13) Taniyeli tho aahihuserya ni saweereya sa achu a Muluku nave aanasuwela echu yeeren’ ye vaavaa awo yahiiwelelaaya malakiheryo a Yehova. (Tan. 9:10, 11) Yaweereya ya okumi ya Taniyeli yaahimweeriha omuroromela Yehova ni ankeelo awe wi yaanwerya omukhaviherya owo.—Tan. 2:19-24; 10:12, 18, 19.

7. Tiheeni yaamukhavihenrye Taniyeli okhala oolipa murima? (Moone tho eruku.)

⁷ Taniyeli aahihuserya soorepa sa alipa a miririmu a Muluku, ophitaanyerya sooloha sa Yeremiya. Moorweela wa yoohuserya yeeyo, Taniyeli ohoolo waya, aahiiwexexa wi okapuro wa Ayuta yaari o Papulu waahala vakhaani omala. (Tan. 9:2) Woona yooloherya ya Mpiipiliya ekhalaka yeeparipari, moohikhwa minikwa, yaahilipiha ororomeleya wa Taniyeli ntakhara Yehova. Yaale arino nroromelo wa Muluku enanwerya wooneya olipa waya murima. (Mulikanyihe ni Aroma 8:31, 32, 37-39.) Echu yoochuneyaxa, Taniyeli aanavekela wa Atiithi awe awirimu moohihiyererya. (Tan. 6:10) Owo aahilokoha soocheka sawe wa Yehova nave aahimuleela mukhalelo iisooneiye. Nave Taniyeli aahiveka nikhaviheryo Nawe. (Tan. 9:4, 5, 19) Owo aari muchu ntoko hiyaano, mwawiihiiha owo haayariwe areene oolipa murima. Ohiya yeeyo, owo aahinnuwiha mukhalelo yoola moorweela wa ohuserya, ovekela ni moorweela wa omuroromela Yehova.

8. Nnahaala winnuwiha hai olipa murima?

⁸ Wi ninnuwihe olipa murima, tiheeni nnaphwanelaahu weera? Asitiithi ahu ananwerya oniceenyerya okhala oolipa murima, nyenya awo hanawerya onivaha mukhalelo yoowo ntoko yoohiyeryiwa ya veemusini. Okhalano olipa murima ori ntoko ohuserya mavyakelo mavyaani. Mukhalelo mmoha wa ohuserya mavyakelo ori moorweela wa ovareryaka vakhiviru saweera sa muhusiha, nave voocharela ocharihaka yootakiherya awe. Mmukhalelo woolikana, ninnahuserya okhala oolipa murima naavareryaka vakhiviru khiviru mukhalelo akina anooniheryaaya mukhalelo yoola wa olipa murima, nave voocharela nnachariha yootakiherya aya. Vano tiheeni nnahuseryaahu orweela wa Taniyeli? Hiiha ntoko yoowo, nnaphwanela osuwela phaama Masu a Muluku. Hiyaano nnanwerya okhala asinthamwene awaacameleya ni Yehova moorweela wa oloca ni yoowo mootaphuwa ni moohihiyererya. Nave nnaphwanela omuroromela Yehova moorweela wa olekecheya wi ilukuluku soothene owo onahaala onikhaviheryaka. Vaavaa nroromelo nahu nneehiwaaya, nnahaala okhala oolipa murima.

9. Nnaphura hai orweela wa okhala oolipa murima?

⁹ Ninnaphura mmikhalelo mincipale moorweela wa okhala oolipa murima. Nthokororye yaweereya ya Ben. Owo aahuserya esikola emoha yo Alemanya weiwo achu oothene yaaroromelaaya wi ichu irimuthatuwa nave yoona wi michaka sa Mpiipiliya sawi ichu irimpatuxiwa tahi eparipari. Nihiku nimoha, Ben aahivahiwa ekari ya weemela ohoolo wa anasikola mu esaala awe wi atharihe ntakhara heeni aaroromeleiye wi okumi orimpatuxiwa. Owo moolipa murima aahithariha soororomela sawe. Ni yookhumelela taani? Ben oriye: “Muhusiha aka aahiwiriyana moomaleleya nave aahipaka ikoopiya sa sooleeliherya kaapharihenlaaka mu othariha waka nave aahiwinnya anasikola oothene yaari mu esaala yeele.” Ti mwawiihai asinthamwene oosikola a Ben yaakhulenlaaya? Ben oriye: “Ancipale a yaawo yaahikiwiriyana nave yaahiloca wi yaanatikhiniheya ni miyaano.” Ntoko yaweereya  ya Ben yoonihenryaaya, wiiliwiili achu oolipa murima annacicimihiwa ni akina. Awo tho ananwerya waakhaviherya achu akina omusuwela Yehova. Mweeparipari nookhalano mathowa aphaama wi ninnuwihe olipa murima.

10. Tiheeni Piipiliya onaloceiye sa ororomeleya?

¹⁰ Piipiliya wiiliwiili onnaloca sa “ororomeleya” naari “osivela woororomeleya” Muluku onawooniheryeiye asinthamwene awe. Piipiliya tho onnaloca sa ororomeleya yoowo alapeli a Muluku anooniheryanaaya mukina ni mukhwaawe. (2 Sam. 9:6, 7) Ororomeleya wahu onanwerya okhala woolipa moovira wa elukuluku. Vano hankooni noone mukhalelo ororomeleya wa Taniyeli waakhanlaaya woolipa.

11. Yaweeha taani ya ororomeleya Taniyeli aahoolenleiye vaavaa aareiye awuuluvala? (Moone eruku ya ekaapa.)

¹¹ Ororomeleya wa Taniyeli ntakhara Yehova waaheehiwa variyari va okumi awe. Nyenya yaweeha etokweene yaakhumelenle vaavaa aareiyeno iyaakha opwaha 90. Mu elukuluku yeeyo, Apapulu yaahiphariwa ni a Meto ni a Persiya nave yaalamuleliwa ni Mwene Tariyu. Ahooleli yaamulapela mwene Tariyu yaanamwiica Taniyeli nave tho hiyaamucicimiha Muluku awe. Mwawiihiiha, awo yaahipaka marehereryo wi emwiiphe Taniyeli. Awo yaahimweeriha mwene otikitherya nlamulo nenlo nahaala wooniherya waakhanle wi Taniyeli ahaala okhala ororomeleya wa Muluku naari wa mwene. Echu emoha Taniyeli aaphwaneleiye opaka wi ooniherye ororomeleya wa mwene ni okhala ntoko akina waari omaala ovekela wa Yehova mu mahiku makhumi mararu. Taniyeli aahikhala oororomeleya wa Yehova. Ntoko yookhumelela, awo yaahimurihela mu nlici na amwaco. Nyenya Yehova aahireeliha ororomeleya wa Taniyeli moorweela wa omoopola mmwaano mwa amwaco. (Tan. 6:12-15, 20-22) Ti mwawiihai nneeraahu ninnuwihe ororomeleya woohicikinyeya wa Yehova yoowo Taniyeli oonihenryeiye?

12. Ti mwawiihai Taniyeli innuwinheiye ororomeleya woohicikinyeya ntakhara Yehova?

¹² Wi nikhale oororomeleya wa Yehova, nnaphwanela okhalano osivela woolipa wa yoowo. Ororomeleya wa Taniyeli ntakhara Yehova waari woohicikinyeya ntakhara owo aanamusivela Tiithi awe awirimu. Taniyeli moohikhwa minikwa aahinnuwiha osivela yoola moorweela wa wuupuwelela vooloca sa mikhalelo sa Yehova ni otakiheryaka mukhalelo Owo oonihenryeiye seiho. (Tan. 9:4) Taniyeli tho aanuupuwelela moothamalela wa ichu soothene saphaama  Yehova aampakenleiye Owo ni achu awe.—Tan. 2:20-23; 9:15, 16.

13. (1) Yaweeha taani ya ororomeleya amiravo ni asimwali ahu anahoolelaaya? Mvahe yootakiherya. (Moone tho eruku.) (2) Ntoko yooniheryiwaaya mu exilema, ti mwawiihai nyuwaano munahaalaanyu waakhula vaavaa akina anakohaaya waakhanle wi Anamoona a Yehova annaakhaviherya yaale anathanla mukhalelo wa okumi wa okonihana wa achu oolikana mwiikho?

¹³ Ntoko Taniyeli, amiravo ni asimwali ahu arukureryiwe ni achu yaawo ahinamucicimiha Yehova ni malakiheryo awe. Achu ntoko yaala ananwerya omwiica muchu vyakala yoowo onaloca wi onnamusivela Muluku. Ophiyerya akina annaakhinyererya amiravo ni asimwali ahu ohiya ororomeleya wa Yehova. Ntoko yootakiherya, moone yeeyo yeeren’ye ni mmiravo mmoha awiichaniwa Graeme, yoowo onakhala o Australiya. Owo aahoolela nikacamiho vaavaa aahuseryeiye o esikola sekuntaariya. Muhusiha aahaakoha anasikola mukhalelo yaahaalaaya waakhulela waakhanle wi nthamwene aya ohaaleela wi onamuchuna muchu oolikana mwiikho. Muhusiha aahiloca wi oothene yaale yii emukhaviherye nthamwene aya wa otitelela okhalano mukhalelo yoowo wa okumi yeemele makupa ammoori a esaala, nave yaale yii ehikhaviherye yeemele makupa makina a esaala. Graeme ooloca: “Anasikola oothene yaaheemela makupa yaawo yaakhaviherya mukhalelo yoowo wa okumi, pahiru kaahanle miyaano ni Namoona a Yehova mukina.” Yeeyo yeeren’ye voocharela yaari yaweeha etokweene ya ororomeleya wa Graeme ntakhara Yehova. Owo ooloca: “Naarino ewora emoha wi nihuserye, nto elukuluku ekina yaahanle, anasikola akina ophiyerya ni prusoore ahu yaahiniruwana vancipale. Miyaano kaahipaka owetha waka wi kaakihe nroromelo naka moomaaleleya nave tho moophwanelela, nyenya awo hiyaakiwiriyanneru.” Yaweeha yeela ya ororomeleya yamvolowenle hai Graeme? Owo oriye: “Miyaano nkaasiveliwe vaavaa asinthamwene aka yaakiruwanaaya, nyenya kaahihakalala vancipale nthowa nawi kaahititelela okhala oororomeleya wa Yehova nave kaahaakiha soororomela saka.” c

14. Mukhalelo taani mmoha nneeraahu nunnuwihe ororomeleya woohicikinyeya wa Yehova?

¹⁴ Nnanwerya winnuwiha ororomeleya woohicikinyeya ntakhara Yehova wakhala wi ninnamusivela vancipale yoowo, hiihaa ntoko Taniyeli. Ninninnuwiha osivela yoowo moorweela wa ohuserya mikhalelo sa Yehova. Ntoko yootakiherya, nnanwerya ohuserya ichu owo opankeiye. (Aro. 1:20) Waakhanle wi munnachuna winnuwiha osivela yoowo ni ncicimiho wa Yehova, munanwerya waalakhanya miyaha soohiyanahiyana irino muru “Teve um Projeto?” naari woona ixilema. Nyuwaano tho munanwerya waalakhanya iproxura “A vida Teve um Criador?” ni “A Origem da Vida—Cinco perguntas que merecem resposta.” Moone yeeyo mwali mmoha awiichaniwa Ester onakhala o Tinamarka olonceiye sa soolaleeryiwa seiha: “Mukhalelo onatharihaaya ti wootikhiniha. Iproxura hinaloca yeeyo nnaphwanelaahu weemererya; iho pahiru inathariha eparipari nave sinnahiya wi nyuwaano mulakelele.” Ben, yoowo olociwe wuupaceryani, ooloca: “Sooleeliherya seiha soolipiha vancipale nroromelo naka nave sookikhaviherya okhala oolekecheya wi Muluku topatunxe okumi.” Mmanle ohuserya sooleeliherya seiha, mweeparipari nyuwaano munahaala weemererya yeeyo Piipiliya onaloceiye: “Oophwanelela ti nyuwo, Yehova Muluku ahu, waakhela ovuwa, ncicimiho ni owerya, ntakhara moopatuxa ichu soothene.”—Wup. 4:11. d

15. Mmukhalelo taani mukina nnahaalaahu winnuwiha onthamwene ahu ni Yehova?

¹⁵ Mukhalelo mukina wa waacererya osivela wahu wa Yehova ori moorweela wa ohuserya okumi wa Mwanawe, Yesu. Mwali mmoha o  Alemanya awiichaniwa Samira, oheerano yeeyo. Owo ooloca: “Nthowa na ohuserya vooloca sa okumi wa Yesu, koomusuwela phaama Yehova.” Vaavaa aareiye mwaana, Samira aakhalano nikacamiho na wiiwexexa waakhanle wi Yehova onnaniiwexexa. Nyenya owo aanawerya wiiwexexa mukhalelo Yesu ooneiye. Owo ooloca: “Kaanasiveliwa ni Yesu nthowa nawi owo aari oonthamwene nave aanasiveliwa ni anamwene.” Vaavaa owo aahuseryeiye vancipale vooloca sa Yesu, aanaaceererya osivela wawe ntakhara Yehova. Ntakhara heeni? Owo ooloca: “Moovira wa elukuluku, kaahipacerya wiiwexexa wi Yesu aamutakiherya Tiithi awe moophaameya. Awo annaphwana vancipale. Nave kaahiiwexexa wi nthowa nimoha naamweerinhe Yehova omurumiha Yesu veelaponi yavathi, naari wi achu ewerye omusuwela phaama Yoowo.” (Yoh. 14:9) Waakhanle wi nyuwaano munnachuna olipiha onthamwene anyu ni Yehova, munoona hai ohuserya vancipale vooloca sa Yesu? Wakhala wi nyuwaano moheerano yeeyo, ororomeleya ni osivela wanyu ntakhara yene onahaala waaceereryeya.

16. Ntakhara heeni nnaphwanelaahu okhala oororomeleya? (Salmu 18:25; Mikeya 6:8)

¹⁶ Yaale ari oororomeleya wiiliwiili annakhalano asinthamwene ari oororomeleya tho. (Ruti 1:14-17) Ohiya yeeyoru, vaavaa nnakhalaahu oororomeleya wa Yehova, ninnakhalano murecele wa mpuwa. Ntakhara heeni? Nthowa nawi Yehova oororomeliha wi onahaala okhala oororomeleya wa yaale anooniherya okhala oororomeleya wa yoowo. (Mwaalakhanye Salmu 18:25; Mikeya 6:8.) Muupuwele ela: Naamwi nri akhaanixa naalikanyihiwaka ni Mpatuxa a owerya woothene, owo oororomeliha wi ilukuluku soothene onahaala onisivelaka! Vaavaa nnakhalaahuno onthamwene si yoola woolipa ni Yehova, hinaavo nikacamiho, naari mwiicani, naari okhwa, onahaala owerya onimwalanya ni yoowo. (Tan. 12:13; Luka 20:37, 38; Aro. 8:38, 39) Ti nthowa nene eryaaya yoochuneya omutakiherya Taniyeli ni otitelela okhala oororomeleya wa Yehova!

17-18. Tiheeni tho nnahaalaahu ohuserya vooloca sa Taniyeli?

¹⁷ Mmwaha yoola, noonne pahiru mikhalelo miili sa Taniyeli. Nyenya sookhalavo sincipale nneeraahu nihuserye ni yoowo. Ntoko yootakiherya, Yehova aahimvaha Taniyeli sawoona ni sooloha soohiyanahiyana ni owerya wa otaphulela michaka sa sooloherya. Sooloherya sincipale sa seiha sohaakhwanela. Sooloherya ikina sinnaloca saweereya sa omwaahiyu sinahaala waavolowela achu oothene veelaponi yavathi.

¹⁸ Mmwaha onacharela, nnahaala woona mwawiiseela sooloherya piili sirempwe ni Taniyeli. Wiiwexexa sooloherya seiha sinanwerya onikhaviherya oothene ahu, opakaka soolakelela mwa miruku moohipwacha iyaakha nryaahuno. Sooloherya seiha inahaala tho onikhaviherya waaceererya olipa wahu murima ni ororomeleya wahu wi nikhale oorehereya ohoolela saweeha sa muhoolo.