1. Ntakhara heeni ninnasiveliwa ni achu yaawo eri oopixa murima?

 TI WAPHAAMA okhala ni achu yaawo ari oopixa murima. Nave hiyaano ninnaacicimiha achu yaawo anawerya owehererya echu vyakala ehikhanle oonyeenyeya. Nave ti yaphaama vaavaa achu anakhalaaya oopisa murima ni hiyaano, naamwi vaavaa nnapakaahu yoohesa. Ninnamuthamalela vancipale muhusiha ahu a Piipiliya wanthowa na opixa murima vaavaa niilipixeraahu wi nihuserye, naari opharihela malakiheryo a Mpiipiliyani nave yoochuneya, hiyaano ninnamuthamalela Yehova wanthowa na opixa murima yoowo oreiyeno ni hiyaano!— Aro. 2:4.

2. Mmikhalelo taani akhweya onahaalaaya okhala woovila okhala oopixa murima?

² Eparipari wi ninnatikhiniheya vaavaa muchu onakhaleiye oopixa murima, nyenya wa hiyaano onanwerya okhala nikacamiho weerano yeeyo. Ntoko yootakiherya, akhweya onanwerya okhala woovila otitelela okhala oomaaleleya vaavaa nnamuwehereryaahu simaaforu, xaxaxa wakhala wi nooxeleliwa. Nave nnanwerya oyeleela okhala oopixa murima vaavaa muchu onannyenyeiheiye. Ikwaha ikina owehererya yoororomeliha ya Yehova ya elapo ya hiihaano, onamukhala woovila. Nyuwaano munnachuna okhala oopixa murima? Mmwaha yoola nnahaala woona yootaphulela ya opixa murima nave ntakhara heeni eyo eraaya yoochuneya. Nave tho nnahaala woona yeeyo enahaala onikhaviherya okhala oopixa murima.

3. Muchu opixa murima onaakhulela hai vaavaa achu anamunyeenyeihaaya?

³ Moone mikhalelo misese seiho nnahaalaahu wooniherya opixa murima. Woopacerya, muchu oopixa murima hanaakuva oonyeenyeya. Vaavaa achu anamunyenyeihaaya, owo onnakhala oomaaleleya nave owo hanakookiha yoonanara wa akina. Owo hanaakhaliha  akina moonanara naamwi ahoolelaka mikhalelo soovila. Ekwaha yoopacerya nsu nawi “opixa murima” nnooniheriwaaya Mpiipiliyani nnaphwanyeya mu Mukwaha 34:6, vaavaa Yehova onalociweiye ntoko ‘Muluku a ikharari, a mahala, oopixa murima, oosivelasha ni oororomeleya.’—Muk. 34:6.

4. Ti mwawiihai muchu oopixa murima onaakhuleleiye vaavaa owo onaphwaneleiye owehererya?

⁴ Yanaawiili, muchu oopixa murima onnawehererya moomaaleleya. Muchu oopixa murima onneererya okhala oomaaleleya ni oohuukhuwa vaavaa echu vyakala enalekelaaya opwaha mummo yawehereryiiwaaya. (Mat. 18:26, 27) Sookhalavo mikhalelo mincipale seiho nnaphwanelaahu oweherya moopixa murima. Ntoko yootakiherya, nnaphwanela owiriyana moomaaleleya vaavaa muchu onaloceiye, nihimukwatelenle. (Yupu 36:2) Akhweya nnamuchuna okhala oopixa murima vaavaa nnamukhaviheryaahu oohuserya a Piipiliya wiiwexexa nihusiheryo na Mpiipiliyani naari ovootha yookhovelela vyakala yoonanara.

5. Mukhalelo taani mukina nnahaalaahu wooniherya opixa murima?

⁵ Yaneeraru, muchu opixa murima haneeravo echu ahuupuwelenle. Mweeparipari, mmikhalelo mikina nnaphwanela weeravo echu moohilekela. Nyenya vaavaa muchu oopixa murima onakhaleiyeno echu wi apake, owo haneerano eyo ahaakumve wuupuwelela naari haneerano soothene moochimakiha wi akwaaxe mwawaakuveya. Ohiya yeeyo, owo onnaavya elukuluku wi awerye wuupuwelela mukhalelo onahaaleiye weerano ichu. Voocharela owo onnamaliha elukuluku yeeyo eri yoochuneya wi eereno soothene mwaphaama.

6. Ti mwawiihai muchu oopixa murima onaakhuleleiye vaavaa onahooleleiye makacamiho?

⁶ Yaneesese, muchu oopixa murima onniilipixerya ohoolela makacamiho ahiikhupanyenrye. Ti nthowa nene, wiiliwiili opixa murima onalikanyihiwaaya ni ovilela. Eparipari wi tahi yoohesa okhala ootaphuwa ni nthamwene ahu ni omuleela mukhalelo nniisoonaahu vooloca sa nikacamiho vyakala. Nyenya muchu yoowo ori oopixa  murima onahaala wiitikitherya mu ichu saphaama seiho oreiyeno mu okumi awe nave onahaala opaka owetha wawe wi atitelele omurumeela Yehova moohakalala. (Ako. 1:11) Alapeli a Yehova anaphwanela wooniherya olipa murima mu mikhalelo soothene seiha. Ntakhara heeni? Nnahaala woona mathowa makina.

7. Mwawiiwanana ni Tiyaku 5:7, 8, ntakhara heeni opixa murima oryaaya woochuneya? (Moone tho eruku.)

⁷ Nnaphwanela okhala oopixa murima wakhala wi ninnachuna okhala okhala wookhala. Hiihaa ntoko alapeli akhalai nnaphwanela okhala oopixa murima ni onweherya Yehova waakhwaniherya soolakelela sawe. (Ahe. 6:11, 12) Piipiliya onnalikanyiha mukhalelo ahu ni mulipa oolima. (Mwalakhanye Tiyaku 5:7, 8.) Mulipa oolima onnalapa moowetha wi aale ni ohelela maahi mmiso awe, nyenya owo hanasuwela phaameene elukuluku taani onahaalaaya omela. Mwawihihaa, mulipa oolima onaphwanela owehererya moopixa murima, awehereryaka wi owo onahaala ohepha yeeyo aanleiye. Mmukhalelo mmohamoha, nnaphwanela okhala ooweiwa ni ichu soomunepani, naamwi ‘nihisuwelaka nihiku nenlo apwiya anarwaaya.’ (Mat. 24:42) Hiyaano ninnaweherya moopixa murima, nihikhwaaka minikwa wi mu elukuluku yoophwanelela, Yehova onahaala waakhwaniherya soororomeliha sawe soothene opankeiye. Naahikhala oopixa murima nnamukhala oovelavela oweherya nave vakhaani-vakhaani nnamukhala ocai wa Yehova. Hiyaano nnanwerya okhala ootikitheryeya wa ichu nnoonaahu wi inanwerya onivaha ohakalala wawaaca hiihaano. Nyenya, nakhala oopixa murima, nnahaala owerya ovilela ophiyerya omakuchuwelo ni ovuluxiwa.—Mik. 7:7; Mat. 24:13.

8. Ti mwawiihai opixa murima onahaalaaya onikhaviherya waakhaliha akina? (Akolose 3:12, 13)

⁸ Opixa murima onnanikhaviherya okhalano onthamwene waphaama ni akina. Owo onnanikhaviherya okhala oomaaleleya vaavaa akina analocaaya. (Tiy. 1:19) Ohiya yeela, opixa murima onanwerya onikhaviherya okhalano murecele ni akina. Wakhala wi na achu oopixa murima, naamwi vaavaa nnakhalaahu oonyeenyeya hinnahaala opaka echu yoopacerya enarwa mmuupuweloni mwahu ni oloca echu yeeyo yaahaala omphoreiha muchu mukina. Nave tho hinnahaala waakhulela moowali vaavaa muchu mukina onaneereleiye yoonanara, ohiya weererya wunla ikuhu, nnaphwanela ‘otitelela ovilelana mukina ni mukhwaawe ni olevelelana mukina ni mukhwaawe’.—Mwalakhanye Akolose 3:12, 13.

9. Ti mwawiihai opixa murima onanikhaviheryaaya vaavaa nnaphwanelaahu opaka soolakelela? (Masiposipo 21:5)

⁹ Opixa murima tho onahaala onikhaviherya vaavaa nnachunaahu opaka soolakelela. Ohiya opaka echu vyakala enanirweela mmuupuweloni, nnaphwanela okumiha elukuluku wi noone mikhalelo nryaahuno, neerano hiihaa nnanwerya opaka soolakelela saphaama. (Mwalakhanye Masiposipo 21:5.) Ntoko yootakiherya, wakhala wi ninnaavya muteko, nnahaala weemererya muteko onahaala okhumelela woopaceryani, naamwi ovolowelaka ocompelaka mithukumano mu ilukuluku ikina ni opaka vakhaani mmuteko woolaleerya. Nyenya, wakhala wi naachu oopixa murima, nnanwerya weemela ni wuupuwela ti woowi muteko owo onahaalaaya olamphwaakawo, iwora kavi kinahaalaaka omalihaka va nihiku nave ti mwawiihai eyo enahaalaaya ovolowela emusi ahu ni onthamwene ahu ni Yehova. Nyenya wakhala wi naachu oopixa murima, ninnawerya opaka soolakelela saphaama.

10. Ti heeni Mukristu onaphwaneleiye weera wi akhale oopixa murima?

¹⁰ Mvekele mvekaka opixa murima wawaaca. Opixa murima onnapaka makupa wa yawiima ya munepa. (Aka. 5:22, 23) Mwawiihiiha, nnaphwanelaahu ovekela wa Yehova wi anikhaviherye  okhalano mikhalelo seiho sinapaka makupa mu yawiima ya munepa waweela. Wakhala wi noohoolela mukhalelo oneeha opixa wahu murima nnahaala ‘otitelela oveka’ munepa waweela wi onikhaviherye wooniherya opixa murima. (Luka 11:9, 13) Ohiya yeeyo, nnaphwanela omveka Yehova wi anikhaviherye woonaka miyaha mmukhalelo owo onooneiye. Ohiya ovekela pahiru, nnaphwanela opaka owetha wahu wi nikhale oopixa murima mahiku oothene. Vaavaa nnavekelaahu nivekaka okhala oopixa murima nave nniilipixerya mmukhalelo yoola, mukhalelo yoola onahaala opaka mitathari mmurimani mwahu ni opaka makupa a omuchu ahu.

11-12. Ti mwawiihai Yehova onooniheryeiye opixa murima?

¹¹ Muupuwele sootakiherya sa Mpiipiliya. Piipiliya onnaaloca achu ancipale yaawo yaari oopixa murima. Vaavaa nnuupuwelelaahu sootakiherya seiha, nnanwerya ohuserya mikhalelo sa opixa murima. Nyenya nihaakumve othokororya ikina sa sootakiherya seiha, nnahaala woona yootakiherya etokweene ya opixa murima, Yehova.

¹² Mu emaca ya Eteni, Satana ooloca sawootha vooloca sa Yehova, eereryaka onanariha omuchu awe nave alocaka wi owo mulamuleli oonanara ni ohookololowa. Waakhanle wi Yehova aachuna, owo aahaala omutoloxa Satana mu elukuluku yeele. Nyenya owo ohooniherya opixa murima ntakhara wi aahisuwela wi waahaala oviravo elukuluku yincipale wi ooniherye wi olamulelo Awe ti waphaama opwaha woothene. Nave vaavaa onawehereryeiye, Yehova onnavilelano moopixa murima wa sawootha soothene sinalociwa ntakhara yene. Ohiya yeeyoru, Yehova onnawehererya moopixa murima ntakhara wi owo onachuna wi achu ancipale ephwanye ekari ya okhala okhala wookhala. (2Pet. 3:9, 15) Yookhumelela ene ti yawi macikhwi a achu aakhalano ekari ya omusuwela Yehova. Opixa murima wa Yehova onnaniruuhela mareeliho mancipale. Vaavaa nnatikithereyaahu mwa yeela, onamukhala wookhweya owehererya ophiya wa makuchuwelo.

13. Ti mwawiihai Yesu otakihenryeiye mmukhalelo woophaameya opixa murima wa Tiithi awe? (Moone tho eruku)

 ¹³ Yesu ootakiherya moophaameya opixa murima wa Apapaawe nave owo ohooniherya mukhalelo yoola vaavaa aareiye veelaponi yavathi. Tahi wi ilukuluku soothene waari wookhweya wooniherya opixa murima, xaxaxa wa alipa oorepa Afarisi yaawo yaari anawiisootherye. (Yoh. 8:25-27) Hiihaa ntoko Atiithi awe, Yesu haakuvela onyeenyeya. Vaavaa akina yaamuruwanaaya, owo haakhula mooruwana. (1 Pet. 2:23) Nave Yesu oohoolela saweeha ni opixa murima, ahiikhupanyeryaka. Ti yawiiwexexeya ntakhara wi Piipiliya ooloca wi ‘nimuupuwelele moopwacha yoole avilenle masu mancipale oophuca, a alipa oocheka’! (Ahe. 12:2, 3) Nnikhaviheryo na Yehova, hiyaano tho nnanwerya ohoolela yaweeha vyakala yeeyo enakhumelela mu opixa murima.

14. Tiheeni nnahuseryaahu ni opixa murima wa Aparahamu?(Ahepri 6:15) (Moone tho eruku.)

¹⁴ Akhweya nyuwaano mookhala nwehereryaka makuchuwelo a mukhalelo yoola wa ichu mu iyaakha sincipale, nave hiihaano akhweya munoona wi hamutitelela okhala wi moone ophiya wa makuchuwelo. Tiheeni enahaala onikhaviherya otitelela oweherya moopixa murima? Moone yootakiherya ya Aparahamu. Vaavaa owo areiyeno iyaakha 75 iiha ahirinono anamwane, Yehova aahimuroromeliha: “Kinamuweera muloko mutokweene.” (Map. 12:1-4, PMM) Apwanne Aparahamu aahoona yeela yaakhwanelaka? Mmakupa aya aayi. Emanle olapuwa muhice Eufrati ewehenrye iyaakha 25, Aparahamu aahoona oyariwa wa mwanawe Isaki. Ela yaari yootikhiniha etokweene nave iyaakha 60 ohoolo waya, owo aahoona oyariwa wa asulwaawe, Esawu ni Yakopo. (Mwalakhanye Ahepri 6:15.) Nyenya Aparahamu hantonko woona muyareriwo awe okhalaka mutokweene nave waakhelaka elapo yoororomelihiwa. Naamwiihiiha, mulopwana yoola oororomeleya ilukuluku soothene aakhalano onthamwene woolipaxa ni Mpatuxa awe. (Tiy.  2:23) Vaavaa Aparahamu onahaaleiye oviihiwa mookhwani, owo onahaala ohakalala voosuwela wi, wanthowa na nroromelo nawe ni opixa murima maloko oothene a veelaponi yaahireelihiwa! (Map. 22:18) Tiheeni nnahuseryaahu? Akhweya hinoona soororomeliha soothene sa Yehova saakhwanelaka phaama hiihaano. Nyenya wakhala wi noopixa murima, hiihaa ntoko Aparahamu, nnanwerya olekecheya wi Yehova onamunireeliha hiihaano ni mu elapo evyaani ororomelinheiye.—Mar. 10:29, 30.

15. Tiheeni nnahaalaahu ophitaanyerya mu yoohuserya ahu ya muchu mukhateiye?

¹⁵ Piipiliya onnanivahererya sootakiherya sincipale sa achu yaari oopixa murima. (Tiy. 5:10) Munoona hai opaka marehereryo a ohuserya ni otholathola vancipale vooloca sa yaawo? b Ntoko yootakiherya, Tavite aahitepa okhala mmiravo vaavaa aathanliweiye wi akhale mwene oomwaahiyu o Isarayeli nave owo aanaphwanela owehererya iyaakha sincipale ophiyerya akhanleene mwene. Yootakiherya ekina ti ya Siimiyoni ni Ana. Awo yaamurumeela Yehova moororomeleya vaavaa yaawehereryaaya moopixa murima orwa wa Mesiya. (Luka 2:25, 36-38) Vaavaa munayaanyu ohuserya ichu seiha, mweererye waakhula makoho ala anacharela: “Tiheeni yaamukhavihenrye muchu yoola okhala oopixa murima? Ntakhara heeni okhala oopixa murima waaryaaya waphaama wa muchu yoola? Ti mwawiihai kinahaalaaka omutakiherya?” Nyuwaano tho munanwerya ohuserya ni achu yaale yahoonihenrye opixa murima. (1 Sam. 13:8-14) Vaavaa munahuseryaanyu sootakiherya iha, mwiikohe: ‘Ntakhara heeni muchu ola hoonihenrye opixa murima? Ichu taani soonanara seeren’ye nthowa na yeeyo?’

16. Tisivi siri miphurelo sa okhala oopixa murima?

¹⁶ Muupuwele miphurelo sa okhala oopixa murima. Muchu oopixa murima toohakalala ni oohuukhuwa. Ohiya yeeyoru, opixa murima onanwerya orehererya okumi ahu omwiilini ni wa mmuupuweloni. Vaavaa nnakhalaahu oopixa murima ninnakhalano asinthamwene aphaama nave ninniiwanana ni akina. Ohiya yeeyoru muloko ahu onnakhala wawiiwanana. Vaavaa muchu onaninyeenyeiheiye hiyaano ninnasepa otepiha mwaha. (Sal. 37:8; Mas. 14:29) Echu yoochuneyaxa, vaavaa nnakhalaahu oopixa murima, ninnamutakiherya Tiithi ahu a wirimu nave ninnalipiha onthamwene ahu ni yoowo.

17. Tiheeni nnaphwanelaahu olakelela weera?

¹⁷ Moohikhwa minikwa, opixa murima mukhalelo waphaama nnaphwanelaahu wunnuwiha! Eparipari wi opixa murima tahi wookhweya mu ilukuluku soothene, nyenya nnikhaviheryo na Yehova nnanwerya otitelela wunnuwiha mukhalelo yoola. Nave vaavaa nnawehereryaahu moopixa murima elapo evyaani, nnanwerya olekecheya wi “Apwiya tanaavarerya ni waakhapelela yaawo anawiiwelela, yaawo anawehererya ikharari saya”. (Sal. 33:18, PMM) Mwawiihiiha, hiihaano opwaha khalai, nnaphwanela olakelela otitelela okhala oopixa murima.