1. Tiheeni Yehova onachuneiye wa achu oothene?

 YEHOVA aapatunxe achu ni mavyakelo a othanla woochuna. Nyuwaano munnapharihela yamahala yeela vaavaa munapakaanyu soolakelela. Yoolakelela yoochuneyaxa yeeyo muchu vyakala onaphwaneleiye opaka, ori olakelela wiiveleela wa Yehova ni opaka makupa a emusi Awe. Yehova onachuna wi oothene yeereno yeeyo. Ntakhara heeni? Nthowa nawi owo onnaasivela achu nave onachuna yeeyo eri yaphaama wa yaawo. Onachuna wi awo epuhe onthamwene ni yoowo nave ekhale okhala wookhala.—Malam. 30:19, 20; Aka. 6:7, 8.

2. Yehova onoona hai vooloca sa anamacheka oohicharuwa? (1 Yohani 2:1)

² Nyenya Yehova hanamukhinyeererya muchu omurumeela yoowo. Owo onnamweemererya muchu ti muchu olakelela yeeyo onahaaleiye opaka. Hanka wakhala wi Mukristu opatisiwe oopaka yoocheka etokweene? Wakhala wi owo hacharunwe, onaphwanela oviihiwamo mmulokoni. (1 Ako. 5:13) Nto naamwi hiiha, Yehova onnaweherya moochuna wi namacheka onahaala omukookela Yoowo. Mweeparipari, nla nthowa noochuneya nenlo nimweerinhe owo ovahererya woopola: Wi eerihe okhala wooweryeya oleveleliwa anamacheka oocharuwa. (Mwaalakhanye 1 Yohani 2:1.) Muluku ahu oosivelaxa onnaaveka anamacheka wi erukunuxe murima.—Sak. 1:3; Aro. 2:4; Tiy. 4:8.

3. Tiheeni nnahaalaahu othokororya mmwaha yoola?

 ³ Yehova onnanleela mukhalelo oniisooneiye vooloca sa yoocheka ni sa yaale anapaka soocheka itokweene. Nave owo onachuna wi niisooneke mmakhalelo mmohamoha. Mwaha yoola onahaala othokororya mukhalelo nneeraahu nipake yeeyo. Vaavaa nnahuseryaahu mwaha yoola, moone (1) mukhalelo saathokororyiwaaya soocheka itokweene mmuloko wo Korintu mu nsana noopacerya, (2) ohoolela yoowo murummwa Paulo aavanheiye vaavaa mulipa oocheka aarukununxeiye murima, ni (3) mukhalelo yaweereya yeela ya Mpiipiliyani enooniheryaaya moonelo wa Yehova vooloca sa Akristu yaawo apanke yoocheka etokweene.

SOOCHEKA ITOKWEENE SAATHOKORORYIWA HAI MU NSANA NOOPACERYA?

4. Tiheeni yeeren’ye mu nsana noopacerya mmuloko wo Korintu? (1 Akorintu 5:1, 2)

⁴ Mwaalakhanye 1 Akorintu 5:1, 2. Variyari va mukwaha awe waneeraru woomisiyonaariyo, Paulo aahiiwa vooloca sa echu yawoopiha yeeyo yeereya mmuloko muvyaani wo Korintu. Munna a muloko yoowo, aanacapaheya ni amwaara a apapaawe. Meerelo yaawo yaari oothanyeya nave hiyaantonko “ophwanyeya variyari va maloko”! Tahi wi pahiru muloko woona otumerya meerelo awe nyenya tho awo yaaniirumiha ni meerelo yaawo. Akhweya akina mmulokoni yuupuwela wi yaari aikharari ntoko Yehova ntakhara achu oocheka. Nto Yehova haneemererya yoocheka variyari va achu awe. Ni meecelo yaala awuuliha muru, chiryene mulopwana yoola aanananariha meecelo aphaama a muloko. Owo tho aanwerya waavolowela Akristu akina yaawo yaapankeno onthamwene ni yoowo. Vano, tiheeni Paulo aalonceiye wi muloko opake?

5. Tiheeni Paulo aalonceiye wi muloko weere nave tiheeni aachuneiye oloca? (1 Akorintu 5:13) (Moone tho eruku.)

⁵ Mwaalakhanye 1 Akorintu 5:13. Yehova aahimuceenyerya Paulo orepela muloko ekaarata ni othariha wi mulipa oocheka oohicharuwa onaphwanela oviihiwamo mmulokoni. Akristu oororomeleya yaaphwanela omukhalihaka hai yoowo? Paulo aahaaleela yaawo wi ‘emaale okhala vamoha’ ni yoowo. Ela yaataphulela eheeni? Paulo aahithariha wi nlamulo nenla naaphitaanyerya omaala “olya mano ni muchu ntoko yoowo.” (1 Ako. 5:11) Okiraathi vamoha ni muchu ntakhara yoolya onneeriha okhala wookhweya omaliha elukuluku ni yoowo muchekulaka. Mwawooneya, Paulo aachuna oloca wi muloko waaphwanela omaala okhala ni muchu yoowo. Ela  yaahaala okhapelela muloko orweela wa ovolowela woonanara. (1 Ako. 5:5-7) Mwawaaceererya, ela yaahaala omukhaviherya muchu ole wiiwexexa mukhalelo aamuthananinheiye vancipale Yehova, nave owo aahaala wuuliwa muru ni aahaala oceenyeryeya ocharuwa.

6. Muloko vamoha ni mulipa oocheka yaakhulenle hai ekaarata ya Paulo?

⁶ Amanle orumiha ekaarata awe wa Akristu o Korintu, Paulo aapacerya okhala awuukhuwa ni mukhalelo muloko waahaalaaya waakhulela yeeyo. Ohoolo waya, Titu aahiruuha michaka saphaama seiho saamuhakalalinhe yoowo. Muloko waahaakhulela phaama ekaarata ya Paulo. (2 Ako. 7:6, 7) Awo yaahichariha ohoolela wawe. Nave tho, ehivinrevo elukuluku yincipale Paulo amanle orumiha ekaarata awe yoopacerya, mulopwana ole aahicharuwa! Owo aatoroka meecelo ni meerelo awe nave apacerya ochara malakiheryo  awookololowa a Yehova. (2 Ako. 7:8-11) Vano, ohoolela taani Paulo aavaherenryeiye muloko?

MULOKO WAAPHWANELA OMUKHALIHA HAI MULIPA OOCHEKA AACHARUNWE?

7. Oviihiwamo wa mulipa oocheka mmulokoni waarino yookhumelela taani yaphaama? (2 Akorintu 2:5-8)

⁷ Mwaalakhanye 2 Akorintu 2:5-8. Paulo aahiloca wi ‘osamela yoola wa achu ancipale ntakhara mulopwana yoola waanaakhwana.’ Mmasu makina, olaka yoola waahikhalano yoolakelelaaya. Yoolakelela taani? Ya omukeriha woorukunuxani murima.—Ahe. 12:11.

8. Echu taani yoocharela Paulo aalonceiye wi muloko opake?

⁸ Mwawiihiiha, Paulo aavahererya muloko ohoolela ola: ‘Mmulevelele mooreera murima ni omuhakararya’ munna yoowo ohense, nave “mmooniherye yoowo osivela wanyu.” Moone wi Paulo aachuna wi muloko opake sincipale ohiya pahiru omweemererya muchu owo okookela variyari va achu a Yehova. Paulo aachuna wi awo emuroromelihe muchu owo aacharunwe moorweela wa masu aya, mukhalelo ni saweera saya wi yaahimulevelela mweeparipari nave wi yaanamusivela yoowo. Awo yaahaala wooniherya wi yaari oohakalala ni okookela wawe mmulokoni.

9. Ntakhara heeni akhweya akina yaanoovelela omulevelela mulipa oocheka yoowo aacharunwe?

⁹ Eyo yaanwerya okhala yoovila wa akina omooniherya mulopwana ole mahala vaavaa aakookenleiye mmulokoni. Ntakhara heeni nnalocaahu yeela? Akina akhweya nlelo yaari oonyeenyeya woona wi owo aaruuhela makacamiho muloko. Nave akina akhweya yaaniisoona okhala awuukhuwa woona wi owo aahaanyeenyeiha. Anna ni arokora mmulokoni yaahiilipixerya vancipale wiiwelela malamulo a Yehova. Mwawiihiiha, akina akhweya yoona wi hiyaari yoophwanelela wi muchu yoowo aapanke soocheka itokotoko weemereryiwa okookela mmulokoni. (Mulikanyihe ni Luka 15:28-30.) Vano, ntakhara heeni waaryaaya woochuneya wa anna ni arokora omooniherya osivela weeparipari munnaya yoowo aacharunwe?

10-11. Tiheeni yaahaala weereya waakhanle wi atokweene aakhooca omulevelela mulipa oocheka yoowo aacharunwe?

¹⁰ Mwaanyiherye yeeyo yaahaala weereya waakhanle wi atokweene a muloko aakhooca omweemererya muchu yoowo aacharunwe okookela mmukoloni naari amanle okooka, muloko okhooca omooniherya osivela. Owo aanwerya ovoothiwa ni “othanana woopwaha mphimo.” Akhweya owo aahaala wiisoona wi harwa amurumeela Yehova wanaawiili. Owo aahaala ohiya wiilipixerya orehererya onthamwene awe ni Muluku.

¹¹ Echu yoothananiha ti yawi, waakhanle wi anna ni arokora mmulokoni aakhooca omulevelela mulipa oocheka aacharunwe, awo yaahaala ohela va yawoopiha onthamwene aya ni Yehova. Mwawiihai? Nthowa nawi awo yaahaala wooniherya, ohiya mukhalelo wa olevelela wa Yehova, nyenya mukhalelo woonanara ni woohikhalano ikharari wa Satana. Awo yaahaala omweemererya Musaserya waapharihela wi amweerihe mulopwana ole omaala omurumeela Yehova.—2 Ako. 2:10, 11; Aef. 4:27.

12. Muloko wi owerye hai omutakiherya Yehova?

¹² Vano, muloko wo Korintu wi owerye hai omutakiherya Yehova, ohiya Satana? Moorweela wa ochariha mukhalelo Yehova onaakhaliheiye alipa oocheka oocharuwa. Moone yeeyo anamarepa akina a Piipiliya aloncaaya sa Yehova. Tavite ooloca: Owo ‘taphaama nave ilukuluku soothene ori oorehereya olevelela.’ (Sal. 86:5) Mikeya oorepa: “Muluku,  taani ori ntoko nyuwo? Munnakhurumuwela soocheka ni soonanara.” (Mik. 7:18, PMM) Nave Yesaya oriye: “Aweera soonanara, ehiye meecelo aya; oonanara murima ehiye muupuwelo aya. Ekookele wa Apwiya! Awo anarwa yaamorela ikharari. Ekookele wa Muluku ahu, yoowo onakhurumuwelasha.”—Yes. 55:7, PMM.

13. Ntakhara heeni waaryaaya woophwanelela omukookiherya mmulokoni mulipa oocheka yoowo aacharunwe? (Moone ekaaxa “ Ti Liini Mulopwana o Korintu Aakookiheryiweiye Mmulokoni?”)

¹³ Wi emutakiherye Yehova, anna ni arokora o Korintu yaaphwanela omwaakhela mulopwana yoowo aacharunwe ni omuroromeliha wi yaanamusivela. Moorweela wa ochariha ohoolela wa Paulo wa omwaakhela mulipa oocheka yoowo aacharunwe, anna ni arokora yaahooniherya wi yaari “awiiwelela mu ichu soothene.” (2 Ako. 2:9) Mweeparipari, saavinrevo pahiru miyeeri vakhaani amanle oviihiwamo mmulokoni, nyenya olaka yoola waahimweeriha owo orukunuxa murima. Mwawiihiiha, hiwaari woochuneya atokweene omulekeliha owo okookela mmulokoni.

NNI NIWERYE HAI OTAKIHERYA EKHAIKHAI NI IKHARARI SA YEHOVA?

14-15. Mahusiheryo taani nnahuseryaahu orweela wa yeeyo yeeren’ye mmuloko wo Korintu? (2 Petru 3:9) (Moone tho eruku.)

¹⁴ Yaweereya vooloca sa mukhalelo saathokororyiwaaya miyaha o Korintu a khalai yoophitaanyeryiwa Mpiipiliyani ‘wi enihusihe.’  (Aro. 15:4) Moorweela wa yaweereya yeela, noohuserya wi Yehova hanatumerya soocheka itokweene variyari va achu awe. Akina anuupuwela wi woona wi Yehova ta ikharari, owo aahaala omweemereryaka muchu yoowo ohinacharuwa otitelela okhala mmulokoni. Nto, tahi mmukhalelo yoola Yehova onooniheryeiye ikharari. Yehova ta ikharari, nto owo tahi ootumerya; malakiheryo awe vooloca sa yaphaama ni yoonanara hanatorokeya. (Yuta 4) Mweeparipari, weerano yeeyo hiwaahaala okhala wooniherya ikharari, woona wi eyo yaahaala onanariha muloko woothene.—Mas. 13:20; 1 Ako. 15:33.

¹⁵ Naamwi hiiha, ninnasuwela wi Yehova hanachuna wi muchu vyakala atoloxiwe. Owo onnachuna waavuluxa achu oothene wakhala wooweryeya. Owo onnooniherya ikharari wa achu yaawo anatoroka murima nave anachuna orehererya onthamwene aya ni yoowo. (Ese. 33:11; mwaalakhanye 2 Petru 3:9.) Mwawiihiiha, vaavaa mulopwana ole o Korintu aacharunweiye ni ohiya meecelo awe oonanara, Yehova aahihoolela muloko wi omulevelele mulopwana ole ni omweemererya owo okookela mmulokoni.

16. Munoona hai vooloca sa Yehova mmanle ohuserya sa yeeyo yeeren’ye o Korintu?

¹⁶ Yootakiherya ya muloko wo Korintu ennanooniherya wi Yehova toosivelaxa, awookololowa ni eekhaikhai. (Sal. 33:5) Ohuserya vooloca sa yeela ennaneeriha ochuna omucicimiha yoowo vancipale. Ninnathamalela vancipale wi owo ta ikharari, woona wi oothene ahu na alipa oocheka nave ninnachuna olevelela wawe. Ninnamuthamalela tho Yehova wi oovahererya mukucho wi awerye olevelela soocheka sahu. Ennatepa ohakararya osuwela wi Yehova mweeparipari onnaasivela achu awe nave onachuna yeeyo eri yaphaama wa yaawo.

17. Tiheeni nnahaalaahu othokororya mmiyaha sinacharela?

¹⁷ Vano, hanka vooloca sa othokororya soocheka itokweene mmahiku ahu? Atokweene a mmulokoni eni ewerye hai wooniherya yoochuna ya Yehova ya omukeriha mulipa oocheka woocharuwani? Muloko onaphwanela waakhulela hai vaavaa atokweene analakelelaaya omviihamo naari omukookiherya muchu mmulokoni? Makoho yaala anahaala othokororyiwa mmiyaha sinacharela.