1. Ichu taani ancipale anahiyaaya muculi, nave ntakhara heeni?

AMILYAWU aachu a Muluku olelo aahiya ichu sincipale muculi. Anna ni arokora ancipale aalakelela okhala aciye. Atheli akina annalakelela ohikhalano anamwane. Imusi ikina sinnatitelela okhweiha okumi aya. Oothene yaala annapaka soolakelela seiya ni mathowa oochuneya—awo anachuna omurumeela Yehova moopwahaxa ophiyerya anaweryelaayavo. Awo annahakalala ni yeeyo aryaayano nave annaroromela wi Yehova onahaala waavaha ichu seiho anachunaaya. Apwanne anamukhalano ekeerelani? Hooye! Ntakhara heeni hinnaphwanela okhwa minikwa ni yeela? Nthowa nimoha ti nawi Yehova aahimureeliha Aparahamu, “nikholo na oothene yaale anaroromela.”—Aro. 4:11.

2. (1) Mwawiiwanana ni Ahebri 11:8-10, 16, ntakhara heeni Aparahamu aalakelenleiye ohiya epooma awe yo Ur? (2) Tiheeni nnahaalaahu othokororya mmwaha yoola?

² Aparahamu aari oolakelela ohiya muhakhu awe woothene aareiyeno ni epooma awe yo Ur. Ntakhara heeni? Nthowa nawi owo aanawehererya “epooma yootikithereya.” (Mwaalakhanye Ahebri 11:8-10, 16.) “Epooma” taani? Makacamiho taani Aparahamu aahoolenleiye vaava aawehereryeiye otekiwa wa epooma? Nave nni niwerye hai okhala ntoko Aparahamu ni yaale anachariha yootakiherya awe mmahiku ahu?

3. “Epooma” taani Aparahamu aaweheryeiye?

³ Epooma Aparahamu aaweheryeiye ti Omwene wa Muluku. Yesu vamoha ni Akristu othanliwa 144.000 tanapaka makupa mu Omwene yoowo. Paulo iichanne Omwene owo ntoko “Yerusalemu a wirimu, epooma ya Muluku ookumi.” (Ahe. 12:22; Wup. 5:8-10; 14:1) Yesu aahaahusiha oohuserya awe ovekela ntakhara Omwene owo, evekaka wi orwe wi yookhwela ya Muluku yeereye  veelaponi ya vathi hiiha ntoko wirimu.—Mat. 6:10.

4. Mwawiiwanana ni Maphatxuwelo 17:1, 2, 6, tiheeni Aparahamu aasuweleiye vooloca ya epooma, naari Omwene, yoowo Muluku aalaihenryeiye?

⁴ Apwanne Aparahamu aasuwela mukhalelo Omwene wa Muluku waahaalaaya orehereryiwa? Hooye. Mu iyaakha masana masaneene, ichu iha saari “sawiiphini.” (Éfe. 1:8-10; Kol. 1:26, 27) Nyenya Aparahamu aanasuwela wi akina a muyareriwo awe yaahaala okhala mamwene. Yehova mwaneene aahimuroromeliha yeeyo. (Mwaalakhanye Maphatxuwelo 17:1, 2, 6.) Aparahamu akhalano nroromelo noolipa wa soororomeliha sa Muluku. Yaakhala wi yene aanamoona yoowo aahaala okhala Mwene a Omwene wa Muluku, Oothanliwa, naari Mesiya. Ti nthowa nene Yesu aalonceiye ni Ayuta a mmahiku awe wi: “Aaparahamu tiithinyu, aahakalalasha onneiye nihiku naka; aahoona, atheya.” (Yoh. 8:56) Ti yawooneya wi Aparahamu aanasuwela wi muyareriwo awe waahaala opaka makupa mu Omwene yoowo wi okhaviheryiweke ni Yehova, nave owo aari oolakelela oweherya wi Yehova aahaala okhwaaniherya yoororomeliha yeeyo aapankeiye.

5. Nnasuwela hai wi Aparahamu aanaweherya epooma yeeyo etikitheryiwe ti Muluku?

⁵ Ti mwawiihai Aparahamu oonihenryeiye wi aanaweherya “epooma”, naari Omwene otikitheryiwe ti Muluku? Yoopacerya, Aparahamu haakhavihenrye olamulelo wa achu. Owo aatitela okhala namarwa, athaamelaka mapuro oohiyanahiyana, ahikhaviheryaka olamulelo waachu. Opwaha yeeyo, Aparahamu heerenrye otikitherya omwene awe. Mwawiihiiha, owo atitelela omwiiwelela Yehova aweheryaka wi ahaala waakhwaniherya yoolaiherya Awe. Mwa weerano yeela, Aparahamu aahooniherya wi nroromelo nawe wa Yehova naari noolipa. Nnahaala othokororya makacamiho Aparahamu aahoolenleiye ni mukhalelo nneeraahu nihuserye orweela wa yootakiherya awe.

6. Epooma yo Ur yaari yawi hai?

⁶ Epooma Aparahamu aakhaleiyewo yaari yookhapeleleya, ni yooreela. Eyo yaari yookhapeleleya ni ixiri soorekama, mmakupa mararu yaakhalano mihice sawiixa. Achu o Ur yaanasuwelano orepa phaama ni opaka ikonta. Enakhala wi achu ancipale yanampaka nakoso mu  epooma yeele; nthowa nawi mmuceche yoole saahiphwanyiwamo misokho sa alipa anakoso. O Ur saakhalawo ipa sa itixolu; ixiri saamariwe, nave saapintaariwe ni kaale. Ikina sa ipa seiya saakhalano mapuro 13 naari 14 yaawo achu yaachekulaayamo nave nchaco na ipa seiyo naanaheliwa maluku.

7. Ntakhara heeni Aparahamu aanaphwanela omuroromela Yehova?

⁷ Wi ahiye epooma yookhapeleleya ni yooreera, Aparahamu aaphwanela ororomela wi Yehova aahaala omukhapelela ni emusi awe. Ntakhara heeni? Nthowa nawi owo vamoha ni mwaariye Sara yaahaala okhalaka mmixakalani vanlakani mu elapo yo Kanani. Hisaariwo ixiri sa itixolu, naari mihice sawiixa seiyo saahaala waakhapelelaka. Ohiya yeeyo, owo ni emusi awe yaahaala ohipheliwaka mookhweya ni amwiicani.

8. Tiheeni yeeren’ye ni Aparahamu?

⁸ Aparahamu aanapaka yookhwela ya Muluku, naamwi hiihaa, owo aahihoolela makacamiho. Ekwaha emoha, etala etokweene yaahiphiya mu muceche yoowo Yehova aamurummeiye Aparahamu oyawo. Aparahamu haawerya ovakulela emusi awe. Mwawiihiiha owo aahilakelela othaamela o Yikuputu wi akhale weiwo mu elukuluku vakhaani. Vaavaa aareiye weiwo, Farawo, mulamuleli a elapo yeele, aamukuxa mwaara a Aparahamu. Vookuchulani vaya, Yehova aahimuleela Farawo wi amukookiherye Sara Aparahamu. Eyo ehaakumve weereya, munnawerya waanyiherya mukhalelo Aparahamu aareiye awuukhuwa.—Map. 12:10-19.

9. Makacamiho taani emusi ya Aparahamu yaahoolenlaaya?

⁹ Wi yaaceereryeye makacamiho a emusi ya Aparahamu, mwaariye, Sara haawerya okhalano anamwane. Nave awo yaanavilela nikacamiho nenla mu iyaakha sincipale. Mwawiihiiha Sara aalakelela omunnya Aparahamu namuteko awe, Hakari. Mmukhalelo yoola, Sara uupuwela wi aahaala okhalano anamwane orweela wa namuteko awe. Nyenya vaavaa Hakari aasuwenleiye wi oomurupala Isimayeli, aapacerya omunyemula Sara. Nikacamiho nlo naari noovila wa Sara ophiyerya wi aaheeriha wi Hakari achawe.—Map. 16:1-6.

10. Tiheeni yeeren’ye wa Isaki vamoha ni Isimayeli yeeyo yeenhe nroromelo na Aparahamu wa Yehova?

¹⁰ Voocharela Sara aarupala nave aamuyara mwaana ni Aparahamu, yoowo Aparahamu aamuchunweiye nsina nawi Isaki. Aparahamu aanaasivela anaawe oopiili, Isimayeli ni Isaki. Nyenya, wanthowa na mukhalelo Isimayeli aamukhaliheiye Isaki, Aparahamu aamurowiha Isimayeli vamoha ni Hakari. (Map. 21:9-14) Vahoolo vaya, Yehova aahimveka Aparahamu wi amvahe Isaki ntoko mukucho. (Map. 22:1, 2; Ahe. 11:17-19) Mmakacamiho yaala oomeeli, Aparahamu aaphwanela omuroromela Yehova, wi aahaala waakhwaniherya soororomeliha wa anamwane awe.

11. Ntakhara heeni Aparahamu aaphwaneleiye onweherya Yehova moopisa murima?

¹¹ Mu ekumi awe yoothene Aparahamu aahuserya onweherya Yehova moopisa murima. Vaavaa aakhummeiye elapo yo Ur ni emusi awe, woonaru owo iiha arino iyaakha opwaha 70. (Map. 11:31–12:4) Mu iyaakha nsana, owo aakhala mmixakalani eeceecaka mu elapo yo Kanani. Aparahamu okhwile arino iyaakha 175. (Map. 25:7) Nyenya owo hoonne waakhwanela wa yoororomeliha ya Yehova vooloca sa oveleela elapo ele wa muyareriwo awe. Nave owo hoonne otikitheryiwa wa epooma, naari Omwene wa Muluku. Naamwi hiiha Piipiliya onaloca wi Aparahamu okhwile “mmureceleni uuluvanlesha.” (Map. 25:8) Moohiphwacha makacamiho oovilaxa Aparahamu aahoolenleiye, owo aakhalano nroromelo noolipa, nave aananweherya Yehova moohakalala. Ntakhara heeni Aparahamu aatitelela ovilela? Nthowa nawi mu ekumi awe yoothene, Yehova aamukhapelela nave aahimukhaliha ntoko nthamwene awe.—Map. 15:1; Isa. 41:8; Tiy. 2:22, 23.

12. Tiheeni nnaweheryaahu, nave tiheeni nnahaalaahu othokororya?

 ¹² Hiiha ntoko Aparahamu, hiyaano ninnaweherya epooma yeeyo eri yoolipihiwa. Nyenya hinnaweherya otekiwa epooma eyo. Omwene wa Muluku wootikitheryiwa wirimu mu 1914, nave onnalamulela wirimu. (Wup. 12:7-10) Nyenya ninnawehererya wi Omwene owo onahaala olamulela elapo yavathi. Vaavaa nnaweheryaahu, nnahaala ohoolela makacamiho mancipale hiiha ntoko Aparahamu ni Sara. Apwanne alapeli oororomeleya a Yehova a mmahiku ahu, annawerya ochariha yootakiherya ya Aparahamu ni Sara? Saweereya sa okumi sa anna seiyo sinalociwa mu Mulipeleli sinnooniherya wi ancipale olelo aakhalano nroromelo ni opisa murima hiiha ntoko Aparahamu ni Sara. Nnahaala othokororya saweereya seiyo ni woona tiheeni nnahaalaahu ohuserya ni seiyo.

13. Tiheeni muhusenryaanyu moorweela wa yaweereya ya okumi ya munna Bill?

¹³ Mukhale oolakelela ohiya ichu ikina muculi. Wakhala wi ninnachuna wi epooma naari Omwene wa Muluku, okhale mu nipuro noopacerya mu okumi ahu, nnaphwanela ohiya ichu ikina muculi wi nimuhakalalihe Muluku, hiiha ntoko Aparahamu. (Mat. 6:33; Mar. 10:28-30) Moone yootakiherya ya munna oniichaniwa Bill Walden. * Vaavaa aapacenryeiye ohuserya ni Anamoona a Yehova mu 1942, Bill iha ahanle vakhaani okwaasa ohuserya mu esikola etokweene ya manxinyeiru yo Estatu Unitu. Muhusiha awe aachuna wi apacerye olapa vaavaa aahaaleiye okwaasa ohuserya, nyenya Bill aahikhooca. Owo aahimutharihela muhusiha awe wi aachuna wi aapharihele elukuluku awe wi amurumeele Muluku, ohiya okhala enxinyeiru. Evinrevo elukuluku vakhaani, Bill aahiwompwa wi akhale mukhoco. Mwa ncicimiho owo aakhooca okhala mukhoco, ntoko yookhumelela, aahilivihiwa ikhorowa sawaakhwana atoolare 10.000, nave aalamuleliwa wi amalihe iyaakha thanu mukariposo, nyenya aataphuliwa ivinrevo iyaakha raru. Ohoolo waya, aahiwompwa wi avolowe mu Exikola ya Kiliyati nave aahirumeela ntoko Misiyonaariyo  o Afrika. Voocharela, Bill apaka othela ni Eva, nave yaahiya ichu ikina muculi wi yarumeele o Afrika. Moovira wa elukuluku, awo yaakookela o Estatu Unitu wi yaakhapelele amamaawe Bill. Alocaka mookwasa yaweereya ya okumi awe, Bill oriye: “Kinnahakalala kaawuupuwelaka ekari etokweene ya ophariheliwa ni Yehova opwaha iyaakha 70. Kinnamuthamalela Yehova nthowa na okikhaviherya othanla muteko woophwanelela.” Apwanne muri oolakelela opharihela okumi anyu mmuteko wa elukuluku yoothene?

14-15. Tiheeni muhusenryaanyu orweela wa yaweereya ya mutheli Apostolidis?

¹⁴ Muhiweherye wi hamuhoolela makacamiho. Noohuserya orweela wa yootakiherya ya Aparahamu wi oothene yaale anapharihela okumi aya wi emurumeele Yehova anahaala ohoolela makacamiho. (Tiy. 1:2; 1 Ped. 5:9) Muthokororye yeeyo yeeren’ye ni Aristotelis Apostolidis. * Owo opatisiwe mu 1946 o Kresiya, nave mu 1952 aahimwaakamela murokora Eleni yoowo aarino soolakelela imohamoha. Nyenya Eleni aaniiceliwa nave aahiphwanyiwano echu yeeyo yiipale mu ocoopare. Echu eyo yiipale mu ocoopare yaavihiwamo, nyenya moovira wa iyaakha amanle opaka othela, yaahiipa wanaawiili. Matotore yaamooperaara Eleni, nyenya owo aahiyeleela ikuru, nave haawerya oloca phaama. Naamwi hiiha owo aatitelela okhala amvai naamwi ereca awe yaatitelenle vamoha ni wiica wa alamuleli a elukuluku yeele.

¹⁵ Munna Aristotelis aamukhapelela mwaariye ophiyerya iyaakha 30. Mu elukuluku yeele, aanarumeela ntoko mutokweene a muloko, aahilapa mu nikhuuru na muthukumano wa ekulucu nave aahikhaviherya otekiwa wa Empa ya Muthukumano wa Ekulucu. Voocharela, mu 1987, Eleni vaavaa aareiye mmuteko woolaleerya aahimpaka asitenti nave aahiituthula. Mu iyaakha raru owo aatepa wiiceliwa, nave akhwa. Alocaka mookwasa yaweereya ya okumi awe munna Aristotelis oriye: “Moovira wa iyaakha, saweeha, makacamiho oovila ni oohiwehereryeya saahaaceereryeya ophiyerya wi waanachuneya ovilela. Mwawiihiiha ilukuluku soothene Yehova aanatitelela okivaha ikuru kaachunaaka wi kiwerye ovilela makacamiho aka.” (Sal. 94:18, 19) Yehova onnatitelela waasivela  yaale oothene, anapaka yeeyo owo onachuneiye, moohipwacha makacamiho anahoolelaaya!

16. Miruku taani soophwanelela munna Knorr amvanheiye mwaariye?

¹⁶ Muupuweleke mareeliho oomwaahiyu. Aparahamu aanuupuwela mareeliho yaawo Yehova aamuroromelinheiye, nave eyo yaahimukhaviherya ovootha makacamiho awe. Murokora Audrey Hyde aahititelela wuupuwelela mareeliho a muhoolo, naamwi aiyawe oopacerya Nathan Knorr, yaakhwile ereca ya kanser, navetho aiyawe anaawiili Glenn Hyde yaahooxen’ye ni ereca ya Alzheimer. * Owo olonce wi echu yaamukhavihenrye yaari masu yaawo munna Knorr, aalonceiye isumana vakhaani ahaakumve okhwa. Owo oriye: “Nathan aakuupuxerya: ‘Vaavaa nnakhwaahu, ewehereryo ahu enakhala yeeparipari, nave hinni nihooxeye.’ Nave owo aahikileela wi: ‘Wuupuweleleke mareeliho oomwaahiyu wi waakhele nchuwelo naa.’ . . Nave okhaleke ooweiwa wi opharihele okumi aa wi waakhaviherye akina. Eyo enahaala wookhaviherya okhala oohakalala.’” Iho saari miruku soophwanelela, okhala ooweiwa waakhaviherya akina, ni ‘ohakalalela mu ewehereryo’!—Aro. 12:12.

17. (1) Ntakhara heeni nookhalano mathowa oophwanelela a wuupuwelela mareeliho a muhoolo? (2) Ochariha yootakiherya enaphwanyeya mu Mikeya 7:7 eni enikhaviherye hai waakhela mareeliho a muhoolo?

¹⁷ Olelo, hiyaano nookhalano mathowa oophwanelela wuupuwelela mareeliho a muhoolo. Ichu sineereya mweelaponi sinnooniherya wi nnakhala mmahiku ookuchula a mukhalelo yoola wa ichu. Moohilekela, Omwene yoowo nnaweheryaahu onahaala olamulela Elapo yoothene yavathi. Wa mareeliho mancipale yaawo nnaweheryaahu, nnahaala okhala oohakalala owoona oosiveliwaahu eviihiwaka mookhwani. Mu elukuluku yeeyo, Yehova onahaala omureeliha Aparahamu nthowa na ororomeleya wawe ni okhala oopisa murima, vaavaa onahaaleiye omukookiherya ekumi awe ni okhala veelaponi ya vathi vamoha ni emusi awe. Apwanne munahaala okhalawo wi mmwaakhele? Munanwerya wakhala wi, hiiha ntoko Aparahamu, moolakelela ohela Omwene wa Muluku mu nipuro noopacerya, okhala ooromeleya moohipwacha makacamiho munahoolelaanyu, ni otitelela onweherya Yehova moopisa murima.—Mwaalakhanye Mikeya 7:7.