1. Echu taani Tavite olonceiye ntakhara wiiyeviha wa Yehova?

APWANNE chiryene nnanwerya oloca wi Yehova tawiiyeviha? Chiryene nnanwerya. Mu ekwaha emoha, Tavite aaloca ariki: “Apwiya, munnakaakiha wi koopowe. Wiiyeviha wanyu onnakinnuwiha.” (2 Sam. 22:36; Sal. 18:35) Vaavaa aaloceiye masu yaala, Tavite akhweya aamuupuwela mulipa a miririmu Samuwele aaphin’yeiye vaate wa atiithaawe wi amuthanle owo ntoko mwene oocharela o Isarayeli. Tavite aari mukhaani wa asinnawe athanu nararu, nyenya naamwi hiiha Yehova aahimuthanla wi amuraceele Mwene Sawuli.—1 Sam. 16:1, 10-13.

2. Tiheeni nnahaalaahu othokororya mmwaha yoola?

² Moohikhwa minikwa Tavite aakhalano moonelo woolikana ni wa mulipa oomurepa Salumu 113, onaloca sa Yehova wi: “Yoowo onnuurama wi avarerye, sa osulu ni sa veelaponi ya vathi. Yoowo onnamviiha oohaawa onchupini, annaakilaathiha vamoha ni asitokweene.” (Sal. 113:6-8) Mmwaha yoola nnahaala othokororya saweereya seiho inooniherya wi Yehova tawiiyeviha ni mukhalelo nneeraahu nihuserye orweela wa yootakiherya awe. Voocharela nnahaala ohuserya savakhaani vooloca sa wiiyeviha ni yootakiherya ya Mwene Sawuli, mulipa a miririmu Taniyeli ni Yesu.

3. Yehova onanikhaliha hai, nave eyo enooniherya eheeni?

³ Nnanwerya ohuserya sincipale orweela wa mukhalelo Yehova onaakhaliheiye alapeli awe naamwi eri achu oohiphaameya. Yehova hananeemererya pahiru nthowa na okhala alapeli awe; nyenya owo onanoona ntoko asinthamwene awe. (Sal. 25:14) Wi okhale wooweryeya opaka onthamwene ni Yehova, owo oovahererya mukucho wa Mwanawe wi anoopole wa soocheka sahu. Chiryene iha ikharari ni niphwanya Yehova oonihenryeiye! Soothene seiha inooniherya wi Yehova, Muluku awiiyeviha.

4. Tiheeni Yehova onivanheiye, nave ntakhara heeni?

⁴ Muthokororye yawooniherya ekina ya wiiyeviha wa Yehova. Woona wi owo Mpatuxa, Yehova aanwerya olakelela echu taani  muchu ti muchu onaphwaneleiye weera. Nyenya owo henreno. Yehova onipatunxe moophwanaphwana ni yene nave oonivaha otaphuwa wa opaka soothanla, naamwi asuwelaka wi naachu akhaani anlikanyihaka ni yene. Owo hanachuna wi nimulapeke mookhinyereryeya, nyenya nthowa na omusivela ni osuwela mphurelo wa omwiiwelela. (Malam. 10:12; Isa. 48:17, 18) Chiryene ti yoohakalaliha omurumeela Muluku awiiyeviha!

5. Yehova onanihusiha hai okhala achu awiiyeviha? (Moone eruku ya ekaapa.)

⁵ Mukhalelo Yehova onaakhaliheiye achu ennanihusiha okhala awiiyeviha. Mu elapo yoothene haavo ori oosuwelaxa ompwaha Yehova. Naamwi hiihaa, owo ori ooreheryeya weemererya moonelo ahu. Ntoko yootakiherya, Yehova aaheemererya wi Yesu amukhaviherye opatuxa ichu. (Masi. 8:27-30; Kol. 1:15, 16) Naamwi ari a Ikuru Soothene, owo onnaavyakiha ni waavahererya achu mirici. Yehova oomuthanla Yesu wi akhale Mwene a Omwene awe, nave ohaavaha owerya a 144.000 wi elamulele ni Yesu. (Luka 12:32) Ti yawooneya wi Yehova oomuvyakiha Yesu wi akhale Mwene ni Mutokweene a Anamukucho. (Ahe. 5:8, 9) Owo ohaavyakiha tho yaale anahaala olamulela ni Yesu. Yehova hanavareryela echu eri yoothene anapakaaya wi ekhwaaniherye murici aya. Ohiiya yeeyo, owo onnaroromela wi anahaala owerya opaka yookhwela Awe.—Wup. 5:10.

6-7. Sootakiherya taani Yehova onivanheiye vooloca sa waavahererya akina miteko?

⁶ Waakhanle wi Yehova yoowo ohinachuna nikhaviheryo na muchu mukina, onnaavahererya miteko achu akina, hanka hiyaano! Apwanne mwa muru wa echoko naari mwa mutokweene a muloko? Yaari hiiha, mmutakiherye Yehova. Mwaavahererye miteko akina nave muheererye ovareryela echu eri yoothene anapakaaya wi yaakhwaniherye muteko aya. Mwachariha yootakiherya ya Yehova, hamuni mukhale  oohakalala pahiru vaavaa munoonaanyu muteko waakhwanenle, nyenya munahaala okhala oohakalala nthowa na waakhaviherya akina okhala oororomeleya. (Isa. 41:10) Ichu taani ikina yaale arino ohoolela anaphwanelaaya ohuserya orweela wa Yehova?

⁷ Piipiliya onnooniherya wi Yehova onnawiriyana moonelo wa ankeelo. (1 Mam. 22:19-22) Asitiithi, muni nwerye hai omutakiherya Yehova? Wakhala woochuneya mwaakohe anamwane anyu moonelo aya vooloca sa echu munachunaanyu opaka. Wakhala wi moonelo aya ti woophwanelela, mweereno yeeyo awo aloncaaya.

8. Yehova aamukhalinhe hai Aparahamu ni Sara moopisa murima?

⁸ Yehova onnooniherya tho wi tawiiyeviha moorweela wa opisa murima. Ntoko yootakiherya, Yehova tawiiyeviha vaavaa oneemereryeiye wi alapeli awe eloce moonelo aya mwawiiyeviha vooloca sa minikwa saya ntakhara soolakelela sawe. Aparahamu aahikhalano minikwa vooloca sa yoolakelela ya Yehova ya omutoloxa Sotoma ni Komora nave Aparahamu aahiloca wuukhuwa wawe, nave Yehova aahinwiriyana. (Map. 18:22-33) Sara aahitheya vaavaa Yehova aamuroromelinheiye wi aahaala okhalano mwaana aniiha uuluvanle, nyenya Yehova haananariwe. (Map. 18:10-14) Ohiya yeeyo, Yehova aahimukhaliha Sara mwa ncicimiho.

9. Asitiithi ni atokweene a mmulokoni eni emutakiherye hai Yehova?

⁹ Apwanne mwa tiithi naari mutokweene a mmulokoni? Muni mmutakiherye hai Yehova? Muupuwele vakhaani vooloca sa mukhalelo munaakhulelaanyu vaavaa aniinyu naari anna a mmulokoni anakhwaaya minikwa vooloca sa yoolakelela mpankaanyu. Apwanne munneererya waavaanya mwawaakuveya? Naari munneererya wiiwa moonelo aya? Vaavaa yaale anahoolela anakhalaaya awiiyeviha ntoko Yehova, imusi ni miloko sinnakhumelela phaama. Ophiyerya vaavaa, noohuserya mukhalelo nneeraahu ntakiherye wiiyeviha wa Yehova. Vano nnahaala ohuserya mukhalelo wa wooniherya wiiyeviha moorweela wa ohuserya sootakiherya inaphwanyeya Mpiipiliyani.

10. Yehova onanihusiha hai moorweela wa sootakiherya inaphwanyeya Mpiipiliyani?

¹⁰ Yehova “Muhusiha” ahu mutokotoko, oonivaha sootakiherya orweela Mpiipiliyani seiho inahaala onihusiha ichu soochuneya. (Isa. 30:20, 21) Mpiipiliyani ninnaphwanyamo sootakiherya sa achu akina yaawo yoonihenrye mukhalelo yoowo Muluku oneemereryeiye, ntoko wiiyeviha. Ninnaphwanyamo tho sootakiherya sa achu akina yaawo yahoonihenrye mukhalelo yoola wa wiiyeviha ni sookhumelela saya. Vaavaa nnahuseryaahu saweererya seiya ni wuupuwelela ninnahuserya sincipale.—Sal. 37:37; 1 Kor. 10:11.

11. Tiheeni nnahuseryaahu orweela wa yootakiherya yoonanara ya Sawuli?

¹¹ Muupuwele yeeyo yeeren’ye ni Mwene Sawuli. Woopaceryani owo aari mmiravo awiiyeviha. Owo aanasuwela okotakota wawe ophiyerya wi mu ekwaha emoha aanakhooca waakhela murici. (1 Sam. 9:21; 10:20-22) Nyenya moovira wa elukuluku, Sawuli aahikhala awiirumiha. Owo aapacenrye wooniherya mukhalelo yoola wa wiirumiha mu elukuluku vakhaani amanle okhala mwene. Mu ekwaha emoha, Sawuli aahiyeleela opisa murima, nave haawenrye onweherya mulipa a miririmo Samuwele. Ohiya okhala awiiyeviha ni omuroromela Yehova wi aahaala weeravo echu ntakhara muloko, Sawuli aahipaka echu yeeyo ahaarummweiye opaka—aahiveleela mukucho woopahiwa wa Yehova. Teevi yaari yookhumelela? Sawuli aahiyeleela mahala a Yehova, nave heemereryiwe okhala mwene. (1 Sam. 13:8-14) Chiryene, nnaphwanela ohuserya  orweela wa yootakiherya yeela nave niheemererye okhala awiirumiha ntoko Sawuli.

12. Taniyeli oonihenrye hai wi aari awiiyeviha?

¹² Moohiyana ni yootakiherya yoonanara ya Sawuli, moone yootakiherya yaphaama ya mulipa a miririmo Taniyeli. Mu okumi awe woothene, Taniyeli aari mulapeli a Muluku awiiyeviha, nave ilukuluku soothene aanaavya ohoolela wa Yehova. Vaavaa aaphariheliweiye ni Yehova wi ataphulele sooloha sa Napukotonosori, Taniyeli heerenrye wiicicimiha mukhateiye. (Dan. 2:26-28) Tiheeni nnahuseryaahu? Wakhala wi akina annanthamalela ntakhara operekha mwaha wa vanlakani naari okhumelela phaama mmuteko woolaleerya, nnaphwanela omvaha ncicimiho Yehova. Nnaphwanela okhala awiiyeviha ni osuwela wi hinaahaala okhumelela phaama nihirivo nikhaviheryo na Yehova. (Fil. 4:13) Vaavaa nneerahuno yeela, tahi wi nnamutakiherya pahiru Taniyeli, nyenya tho ninnachariha yootakiherya yaphaama ya Yesu. Mwawiihai?

13. Tiheeni nnahuseryaahu ni yootakiherya ya Yesu enaphwanyeya mu Yohani 5:19, 30?

¹³ Naamwi aari mwaana oophaameya a Muluku, Yesu ohooniherya wi aanamuroromela Yehova. (Mwaalakhanye Yohani 5:19, 30.) Owo heerenrye wiikuxerya olamulelo wa atiithi awe. Afilipi 2:6 onaloca wi: “Naamwi . . . aphwanaphwana ni Muluku ene, owo haakhwenle wiikusherya.” Ntoko mwaana awiiwelela, Yesu aanasuwela okotakota wawe nave aanacicimiha olamulelo wa Tiithi awe.

14. Yesu aakhulenle hai vaavaa aavekiweiye murici yoowo ahaaphwaneleiye ovaha?

¹⁴ Muupuwele mukhalelo Yesu aakhulenleiye vaavaa murummwa Yakopo ni Yohani vamoha ni amamaaya yaakelaaya wa Yesu wi yamveke murici yoowo ahaaphwaneleiye ovaha. Ahilekenle, Yesu aahiloca mookwakwaleya wi Atiithi awe awirimu tanahaala olakelela taani aaphwanela okhala moono woolopwana naari woothiyana mu Omwene awe. (Mat. 20:20-23) Yesu aanasuwela okotakota wawe, nave aahikhalano ncicimiho. Yesu aari awiiyeviha. Owo aanapaka ichu mwawiiwanana ni ohoolela wa Yehova. (Yoh. 12:49) Nni ncharihe hai yootakiherya yaphaama ya Yesu?

15-16. Nni nicharihe hai ekano enaphwanyeya mu 1 Korinto 4:6?

¹⁵ Nnanwerya ochariha wiiyeviha wa Yesu moorweela wa ochariha ekano enaphwanyeya mu 1 Korinto 4:6. Yeeyo eni: “Muhipwahe yeeyo erempwe.” Mwawiihiiha vaavaa muchu onanivekeiye miruku, hannaphwanela ovuwiha moonelo ahu naari oloca echu vyakala  enarwa mmuupuweloni mwahu. Ohiya yeeyo, nnaphwanela omuleela muchu wi atholathole Mpiipiliyani naari mu soolaleeryiwa sahu. Neerano hiiha nnahaala wooniherya wi ninnasuwela okotakota wahu. Wiiyeviha onnaneeriha ororomela wi “ikano . . . seekhaikhai” sa Muluku a Owerya Woothene, ilukuluku soothene ti saphaama opwaha ikano sa achu.—Wup. 15:3, 4.

¹⁶ Vaavaa nnakhalaahu awiiyeviha, ninnamucicimiha Yehova. Nyenya aakhalavo mathowa makina ananeeriha wooniherya mukhalelo yoola. Vano nnahaala ohuserya ti mwawiihai wiiyeviha onaneerihaaya okhala oohakalala, ni mukhalelo onanikhaviheryaaya okhalano onthamwene waphaama ni akina.

17. Ntakhara heeni achu awiiyeviha annakhala oohakalala?

¹⁷ Vaavaa nnakhalaahu awiiyeviha, ninnakhala oohakalala. Ntakhara heeni? Nthowa nawi vaavaa nnasuwelaahu okotakota wahu, ninnathamalela nave ninnakhala oohakalala vaavaa nnaakhelaahu nikhaviheryo na akina. Ntoko yootakiherya, muupuwele vaavaa Yesu aapenunxeiye olopwana khumi yaawo yaari alipa a mareca. Mmoha a yaawo taakoonke wi amuthamalele Yesu nthowa na openusiwa wa ereca yeele yawoopiha. Owo hi awerye openuwa ahikhaviheryiwe ni Yesu! Wiiyeviha waahimweeriha mulopwana ole othamalela ni omvaha Muluku ncicimiho ntakhara nikhaviheryo nenlo aakhenleiye.—Luka 17:11-19.

18. Wiiyeviha onanikhaviherya hai okhalano onthamwene waphaama ni akina? (Aroma 12:10)

¹⁸ Muchu awiiyeviha onnakhala phaama ni opaka onthamwene woolipa ni akina. Ntakhara heeni? Nthowa nawi achu awiiyeviha annasuwela makhalelo aphaama a akina nave annaaroromela yaawo. Achu awiiyeviha annahakalala vaavaa anawoonaaya akina ekhumelelaka phaama mu orummwa aya, moohiphwacha orummwa  taani. Awo tho hanoovelela waathamalela ni waacicimiha akina.—Mwaalakhanye Aroma 12:10.

19. Ntakhara heeni ninnaphwanela owaniha wi nihikhaleno wiirumiha?

¹⁹ Muchu awiirumiha toohiyana ni akina. Achu a mukhalelo yoola onakhala woovila wa yaawo waathamalela akina; awo tanachuna othamaleliwaka. Awo aakhalano yookhovelela ya wiilikanyiha ni akina nave hanachuna opwahiwa ni akina. Ohiya waavyakiha akina ni wannyererya mirici, awo anuupuwela wi: ‘Muteko waariki opakeye phaama kinaphwanela opaka mukhataaka.’ Eparipari tiyawi, muteko waariki opakeye phaama onaphwanela opakiwa mwawiiwanana ni yookhwela aya. Opwaha yeeyo, achu awiirumiha ikwaha sincipale ta nrima. (Gal. 5:26) Awo hanakhalano onthamwene woolipa. Wakhala wi noosuwela wi nookhalano moonelo wawiirumiha, nihule murima ahu wi nimuleele Yehova, nimvekaka wi anikhaviherye ‘otatuxa muupuwelo ahu.’ Neerano hiiha, moonelo wa wiirumiha honi okhaleno mitathaari mmurimani mwahu.—Aro. 12:2.

20. Ntakhara heeni ninnaphwanela okhala achu awiiyeviha?

²⁰ Ninnathamalela woona wi nookhalano yootakiherya yaphaama ya Yehova! Ninnoona wiiyeviha wawe moorweela wa makhalelo onaakhaliheiye alapeli awe— nave hiyaano ninnachuna omutakiherya. Nave tho nnachuna ochariha sootakiherya inaphwanyeya Mpiipiliyani sa achu awiiyeviha yaawo yaachariha malakiheryo a Yehova. Neerano hiiha nnammuvaha Yehova ncicimiho ni ovuwa onaphwaneleiye waakhela. (Wup. 4:11) Nave tho nnanwerya weeca ni Tiithi ahu a wirimu, yoowo onaasivela achu awiiyeviha.