1. Ekari taani nryaahuno?

NOOKHALANO ekari etokweene ya opaka makupa mmuloko wa Yehova! Nri mu parataiso oomunepani yoowo osaren’ye ni achu a murecele ni oohakalala. Makupa taani muryaanyuno mmulokoni?

2. Niphwanaphwaniho taani murummwa Paulo opharihenleiye mu ikaarata sawe sincipale sooveereliwa?

² Nnanwerya ohuserya sincipale vooloca sa mwaha yoola moorweela wa maphwanaphwaniho yaawo murummwa Paulo opharihenleiye mu ikaarata sawe sincipale sooveereliwa. Mu ikaarata seiha, Paulo olikanyinhe muloko ni mwiili wa muchu. Owo tho omulikanyinhe muchu ti muchu a mmulokoni ni makupa a mwiili.—Aro. 12:4-8; 1 Kor. 12:12-27; Éfe. 4:16.

3. Ichu taani raru nnahaalaahu othokororya mmwaha yoola?

³ Mmwaha yoola, nnahaala othokororya ichu raru soochuneya seiho nneeraahu nihuserye orweela wa maphwanaphwaniho a Paulo. Yoopacerya, nnahaala ohuserya wi mmoha ti mmoha a hiyo onnapaka makupa * mmuloko wa Yehova. Yanaawiili, nnahaala othokororya tiheeni nnaphwanelaahu weera wakhala wi ninnoona okhala woovila osuwela wi naachu oochuneya mmulokoni. Nave yaneeraru, nnahaala othokororya ntakhara heeni nnaphwanelaahu okhala ooweiwa naakhwaniheryaka murici nryaahuno mmuloko wa Muluku.

4. Aroma 12:4, 5 tiheeni onanihusiheiye?

⁴ Echu yoopacerya nnahaalaahu ohuserya orweela mu niphwanaphwaniho  na Paulo, tiyawi muchu ti muchu a hiyo ookhalano makupa oochuneya mu emusi ya Yehova. Paulo onnapacerya niphwanaphwaniho nawe ariki: “Muchu ni muchu a hiyo ookhalano mwiili awe mmoha ni makupa aya awaaca oohiyana-hiyana, epharaka miteko soohiyana-hiyana. Hiihaa tho, yeehu nri ancipale, mwa Kristu nri mwiili mmoha yoowo, nave mmoha ni mmoha makupa a akhweiye.” (Aro. 12:4, 5) Echu taani Paulo aachuneiye oceenyerya? Mmoha ti mmoha a hiyo ookhalano murici woohiyana, nyenya muchu ti muchu toochuneya.

5. “Samahala” taani Yehova onivanheiye mmulokoni?

⁵ Vaavaa munuupuwelaanyu sa yaale anapaka makupa mmulokoni, akhweya muupuwelo anyu onookerihaani wa yaale anahoolela mmulokoni. (1 Tes. 5:12; Ahe. 13:17) Eparipari wi orweela mwa Kristu, Yehova oovahererya “samahala wa atchu” mmuloko awe. (Éfe. 4:8, NN.) “Samahala wa atchu” seiha inaphitaanyerya anna a Nikhuuru Noolamulela, anna yaale athanliwe wi ekhaviheryeke Nikhuuru Noolamulela, Nikhuuru na Efiliyale, ooweherya a ekulucu, ahusiha a muteko woolaleerya, atokweene a mmulokoni, ni arummwa oorumeela. Anna oothene yaala athanliwe ni munepa waweela wi ekhapelele ipucepuche sookhweleya sa Yehova ni olipiha muloko.—1 Ped. 5:2, 3.

6. Mwawiiwanana ni 1 Tesalónika 2:6-8, tiheeni anna oothanliwa ni munepa waweela anatitelelaaya opaka?

⁶ Anna yaala athanliwe ni munepa waweela wi ekhapelele mirici soohiyanahiyana. Makupa oohiyanahiyana a mwiili, ntoko mata ni inaani, annalapa vamoha wi ekhaviherye mwiili woothene. Mmukhalelo woolikana, anna yaawo athanliwe ni munepa waweela annalapa mwakuru wi ekhaviherye muloko woothene. Awo haneererya wiicicimiha mukhataaya. Ohiya yeeyo, awo annatitelela waalipiha anna ni arokora aya. (Mwaalakhanye 1 Tesalónika 2:6-8.) Ninnamuthamalela Yehova ntakhara alopwana yaala awiichwelavo omunepani ni oophwanelela!

7. Mareeliho taani yaale ari mmuteko wa elukuluku yoothene anaakhelaaya?

⁷ Anna ni arokora akina mmulokoni annathanliwa wi erumeele ntoko mamisiyonariyu, mapiyoneero avameekhaaya, naari mapiyoneero ookilaatheya. Mweeparipari, anna ni arokora orukurerya elapo annoona muteko woolaleerya ni waapaka oohuserya okhala woochuneya mookumini mwaya. Mwaweerano yeela, awo annaakhaviherya achu ancipale okhala oohuserya a Kristu Yesu. Naamwi alaleeryi yaala a elukuluku yoothene ekhalakano ichu soomwiilini savakhaani, Yehova onnaareeliha ni ichu sincipale. (Mar. 10:29, 30) Ninnaasivela anna ni arokora yaala, nave ninnaathamalela woona wi annapaka makupa a muloko!

8. Ntakhara heeni mulaleeryi a michaka yaphaama ori oothene oreiye oochuneya wa Yehova?

⁸ Apwanne anna ni arokora yaawo ari mmuteko wa elukuluku yoothene, pahiru tanapaka makupa a muloko? Tahi yeeyo! Mulaleeryi a michaka yaphaama ori oothene toochuneya wa Muluku ni mmulokoni. (Aro. 10:15; 1 Kor. 3:6-9) Mweeparipari, yoolakelela yoochuneyaxa ya muloko ori waapaka oohuserya a Pwiyaahu Yesu Kristu. (Mat. 28:19, 20; 1 Tim. 2:4) Alaleeryi oothene mmulokoni, oopatisiwa ni oohipatisiwa, annapaka muteko woochuneya mookumini mwaya.—Mat. 24:14.

9. Ntakhara heeni ninnaavaha esisapo arokora ahu Eekristu?

⁹ Yehova ohaavaha arokora ncicimiho ntokweene mmulokoni. Owo onnaavaha esisapo arokora yaawo ari asimai, yaale atheliwe, anaamukhwele, ni aciye yaawo anamurumeela yoowo moororomeleya. Piipiliya onnaloca sa athiyana yaawo yaamuroromela Muluku ni murima aya woothene. Awo annathamaleliwa nthowa na yootakiherya yaphaama avanhaaya ya wooniherya miruku, nroromelo, mvai, olipa murima, ovaha, ni miteko saphaama. (Luka 8:2, 3; Saw. 16:14, 15; Aro. 16:3, 6; Fil.  4:3; Ahe. 11:11, 31, 35) Ninnamuthamalela Yehova ntakhara okhalano athiyana yaala Eekristu mmulokoni, yaawo anooniherya makhalelo oolikana!

10. Ntakhara heeni ninnaavaha esisapo anna ni arokora ahu awunnuwelavo?

¹⁰ Nooreelihiwa tho nthowa na okhalano anna ni arokora awunnuwelavo mmulokoni. Mmiloko mikina aakhalamo anna ni arokora awunnuwelavo yaawo apharihenle okumi aya woothene emurumeelaka Yehova. Awunnuwelavo akina ahusenrye eparipari hiihaanoru. Anna ni arokora akina awunnuwelavo, annahoolela makacamiho a okumi nthowa na wuuluvala. Makacamiho yaala ananwerya okukuca miteko seiho yaahaalaaya opaka mmulokoni naari mmuteko woolaleerya. Naamwi hiihaa, anna ni arokora yaala awunnuwelavo, annapaka yeeyo anaweryaaya opaka mmuteko woolaleerya, nave annapharihela ikuru saya soothene seiho aryaayano wi yaalipihe ni waavyakiha akina! Nave ninnaphura orweela wa saweereya saya. Mweeparipari, awo annamuhakalaliha Yehova ni hiyo.— Masi. 16:31.

11-12. Munalipiheya hai orweela wa amiravo ni asimwali a mmulokoni mwanyu?

¹¹ Muupuweletho vooloca sa amiravo ni asimwali. Awo annahoolela makacamiho vaavaa aninnuwaaya mu elapo yeela enalamuleliwa ni Satana Musaserya ni miruku soonanara sa achu. (1 Yoh. 5:19) Mwawiihiiha, ninnakhala oolipiheya vaavaa nnawoonaahu amiravo ni asimwali evahaka maakhulo aya mmithukumano, oya mmuteko woolaleerya, ni vaavaa anaakihaaya soororomela saya moolipa murima. Chiryene, nyuwo amiravo ni asimwali mwa achu oochuneya mmuloko wa Yehova!—Sal. 8:2.

¹² Wa anna ni arokora akina onakhala woovila wa yaawo ororomela wi toochuneya mmulokoni. Tiheeni enahaala omukhaviherya mmoha ti mmoha a hiyo ororomela wi toochuneya mmulokoni? Hankooni nthokororye.

13-14. Ntakhara heeni akina annuupuwela wi tahi oochuneya mmulokoni?

¹³ Moone echu yoochuneya yanaawiili nnaphwanelaahu ohuserya orweela wa niphwanaphwaniho  na Paulo. Owo aathokororya nikacamiho nenlo ancipale olelo anahoolelaaya; awo anoona okhala woovila ororomela wi achu oochuneya mmulokoni. Paulo oorepa: “Nnaani naloca, nriki: ‘vawi kihiryaaka ntata, nkiri a mwiili,’ nari hiihaa hinnahiya okhala makupa a mwiili. Ewaru yaloca, eriki: ‘vawi kihiryaaka niitho, nkiri a mwiili,’ nari hiihaa henahiya okhala makupa a mwiili.” (1 Kor. 12:15, 16) Tiheeni Paulo onanihusiheiye?

¹⁴ Wakhala wi munniilikanyiha ni akina mmulokoni, munahaala opacerya wuupuwela wi tahi mwa muchu oochuneya mmulokoni. Akina mmulokoni aavahiwa mavyakelo a ohusiha phaama, orehererya phaama ichu, ni okhala akukhula a mavyakelo. Akhweya nyuwaano munampacerya wuupuwela wi himvahiwe mavyakelo ntoko yaawo. Eyo enooniherya wi mwa muchu awiiyeviha. (Fil. 2:3) Nyenya mukhaleno ekaasoope. Wakhala wi wiiliwiili munniilikanyiha ni anna yaale arino mavyakelo mancipale mmulokoni, munamukhala awuukhuwa. Nyuwaano munahaala opacerya wuupuwela, hiiha ntoko Paulo olonceiye wi tahi mwa muchu oochuneya mmulokoni. Tiheeni enahaala wookhaviheryaani ovootha moonelo ntoko yoola?

15. Mwawiiwanana ni 1 Korinto 12:4-11, tiheeni nnaphwanelaahu osuwela vooloca sa yamahala muchu ti muchu oreiyeno?

¹⁵ Muthokororye yaweereya ela: Mu nsana noopacerya Yehova aahaavaha Akristu akina owerya wa opaka sootikhiniha orweela mwa munepa waweela, nyenya tahi Akristu oothene yaakhenle yamahala yeela. (Mwaalakhanye 1 Korinto 12:4-11.) Yehova aahaavaha awo samahala ni mavyakelo oohiyanahiyana, nave Mukristu ori oothene aari oochuneya. Olelo, hinaanono samahala sa opaka sootikhiniha nihooleliwaka ni munepa waweela. Nyenya nlakiheryo nla nlelo ninnaphariheleya wa hiyo. Oothene ahu hinni nikhaleno mavyakelo oolikana, nyenya oothene ahu naachu oochuneya wa Yehova.

16. Ekano taani ya murummwa Paulo nnaphwanelaahu opharihela?

¹⁶ Ohiya wiilikanyiha ni Akristu akina, nnaphwanela opharihela ekano yooveereliwa ya murummwa Paulo: “Mutxhu ti mutxhu avareryeke merelo awe. Nave, akhalano nthowa na  witxitximiha, itxitximiheke mekheiye pahi, ahìphwanaphwanihaka ni atxhu akina.”—Gal. 6:4, BNM.

17. Nni niphure hai wakhala wi noochariha ekano ya Paulo?

¹⁷ Wakhala wi noochariha ekano yooveereliwa ya Paulo ni ovareryela meerelo ahu, akhweya nnampacerya woona wi nookhalano mavyakelo yaawo akina ahiryaayano. Ntoko yootakiherya, akhweya mutokweene havahiwe yamahala ya ohusiha phaama otripuna, nyenya onanwerya okhumelela phaama mmuteko wa waapaka oohuserya. Naari owo onanwerya okhala oohirehererya phaama ichu hiiha ntoko atokweene akina mmulokoni, nyenya onanwerya osuweliwa phaama ntoko mukukhula oosivela, yoowo anna ni arokora anakhalaaya ootaphuwa omveka ikano inathipeleya mu Soorempwa. Naari owo onanwerya okhalano yookhovelela yaphaama ya owaakhela aleco. (Ahe. 13:2, 16) Vaavaa nnoonaahu mookwakwaleya mavyakelo ni samahala nryaahuno, nnamukhalano mathowa a ohakalalela vooloca sa yeeyo nneeraahu nikhaviheryeno mmulokoni. Nave hinni naakhalele nrima anna yaale arino samahala soohiyana ni sawihu.

18. Nni nunnuwihe hai mavyakelo ahu?

¹⁸ Moohipwacha samahala nryaahuno mmulokoni, oothene ahu nnaphwanela wunnuwiha mavyakelo ahu mmuteko woolaleerya. Wi anikhaviherye wunnuwiha mavyakelo ahu, Yehova oovahererya ovyakiha waphaama moorweela wa marehereryo awe. Ntoko yootakiherya, mmithukumano sahu sa variyari va esumana ninnaakhela mahusiheryo yaawo ananikhaviherya okhumelela phaama mmuteko ahu woolaleerya. Apwanne munnapharihela ovyakiha yoowo nnaakhelaahu mmithukumano seiya?

19. Muni nwerye hai waakhwaniherya yoolakelelaanyu ya ovolowa mu Exikola ya Alaleeryi a Omwene?

¹⁹ Ovyakiha okina woohakalaliha ti Exikola ya Alaleeryi a Omwene. Yaawo anavolowa mu esikola yeela ti anna ni arokora yaawo ari mmuteko wa elukuluku yoothene nave arino iyaakha variyari va 23 ophiyerya 65. Akhweya munanwerya wuupuwela wi hamuni nwerye ovolowa mu exikola yeela. Ohiya wiiphwanyerya mathowa anahaala woohiihaani ovolowa mu exikola yeela, mpake elista ya mathowa anaweerihaani ochuna ovolowa mu exikola yeela. Voocharela mpake mareheryo yaawo anahaala wookhaviheryaani weemereryiwa ovolowa mu exikola yeela. Nnikhaviheryo na Yehova vamoha ni wiilipiserya wanyu, yeeyo yooneya okhala yoohiweryeya wa nyuwo, enamweereya.

20. Tiheeni nnahuseryaahu mu Aroma 12:6-8?

²⁰ Nihusiheryo naneeraru nnaphwanelaahu ohuserya mu niphwanaphwaniho na Paulo, nnaphwanyeya mu Aroma 12:6-8. (Mwaalakhanye.) Mu yoorepa yeela, Paulo ohooniherya wanaawiili wi achu oothene a mmulokoni aakhalano mavyakelo oohiyana. Nyenya hiihaano owo onnanceenyerya wi nnaphwanela opharihela mavyakelo nryaahuno wi nlipihe muloko.

21-22. Tiheeni nnaphwanelaahu ohuserya orweela wa Robert ni Felice?

²¹ Muthokororye yootakiherya emoha ya munna yoowo oniichaniwa Robert. * Amanle orumeela mu elapo yookhopela, Robert aahileeliwa wi arumeeleke o Peteli mu elapo awe. Naamwi aalipihiwe ni anna wi otorokeya wa orummwa hiweeren’ye nthowa na opaka echu yooheseya, owo ooloca: “Mu miyeeri mincipale kaanakhala awuukhuwa nthowa nawi kuupuwela wi kaahipaka echu yooheseya mu orummwa aka wakhalai. Ophiyerya wi mu elukuluku ekina kaanachuna ohiya orumeela Opeteli.” Tiheeni yaamukhavihenrye okhala oohakalala wanaawiili? Mutokweene mmoha oosivela aahimuupuserya  wi Yehova onnanivyakiha orweela mmuteko naapakaahu khalai wi niwerye opaka muteko muvyaani. Robert aasuwela wi aaphwanela omaala wuupuwela ichu sa muculi ni otikitheryeya mmuteko yoowo aaphwaneleiye opakaka hiihaano.

²² Munna Felice Episcopo aahihoolela nikacamiho noolikana. Owo ni mwaariye yaakwaanxe Exikola yo Kiliyati mu 1956 nave yaahirumeela mmuteko wa oweherya ekulucu o Poliviya. Mu 1964 yaahikhalano mwaana. Felice ooloca: “Naahoona okhala woovila ohiya muteko ahu wa oweherya ekulucu. Mu eyaakha yeele kaahikhala awuukhuwa nave kaaniithananela. Nnikhaviheryo na Yehova, kaahitoroka muupuwelo aka nave kaahitikitheryeya mmurici aka muvyaani ntoko tiithi.” Apwanne nyuwaano munniisoona hiiha nto Robert ni Felice? Apwanne munnuukhuwa nthowa nawi hiihaanoru mooyeleela ekari ya orummwa yoowo mwaapakaanyu khalai? Waakhanle wi ti hiiha, nyuwo munamukhala oohakalala wakhala wi mootoroka muupuwelo anyu ni otikitheryeya mu yeeyo munaphwanelaanyu opaka hiihaano wi mmurumeele Yehova vamoha ni anninyu. Mutitelele okhala ooweiwa, mpharihelaka yamahala ni mavyakelo anyu wi mwaakhaviherye akina, nave munamukhala oohakalala vaavaa munalipihaanyu muloko.

23. Nnaphwanela omaliha elukuluku nipakaka eheeni, nave tiheeni nnahaalaahu othokororya mmwaha onacharela?

²³ Muchu ti muchu a hiyo tasisapo wa Yehova. Owo onachuna wi nipake makupa mu emusi awe. Wakhala wi noomaliha elukuluku nuupuwelaka mmukhalelo nneeraahu naakhaviherye anna ni arokora ahu ni wiilipiserya weerano yeela, hinni niisooneke ntoko achu ahinapaka makupa mmulokoni! Hanka vooloca sa mukhalelo nnawoonaahu akina mmulokoni? Nni nooniherye hai wi ninnaathamalela? Mmwaha ahu woocharela, nnahaala othokororya mwaha yoola woochuneya.