1. Ntakhara heeni Yehova oopatuxa ikumi?

AHAAKUMVE opatuxa ichu Yehova aari meekheiye. Nyenya owo hiisoona okhala meekheiye; nthowa nawi owo tawaakhwanela mmikhalelo soothene. Naamwi hiiha, Muluku aalakelela waavaha ekumi akina ni okhala oohakalala. Nthowa na osivela wawe, Yehova aapacerya opatuxa ichu.—Sal. 36:9; 1 Yoh. 4:19.

2. Yesu ni ankeelo yoonne hai vaavaa Yehova aapatuxeiye ichu?

² Woopaceryani, Yehova aampatuxa Mwanawe oopacerya, Yesu. Moorweela wa Yesu, “soothene saapatushiwa mwa yoowo,” ophitaanyerya amilyawu a ankeelo. (Kol. 1:16) Yesu aatepa ohakalala olapa vamoha ni Tiithi awe. (Masi. 8:30) Nave ankeelo yaakhalano mathowa aphaama a ohakalala. Awo yaanawerya omoona Yehova ni Yesu elapaka vamoha, vaavaa yaapatuxaaya erimu ni elapo yavathi. Nyenya ankeelo yaakhulenle hai? Awo ‘yaanachapa’ vaavaa yaapatuxiwaaya elapo, nave awo yaatitelela weerano emohamoha vaavaa yaamoonaaya Yehova amalihaka opatuxa ichu soothene. Ankeelo yaatepa ohakalala vaavaa yoonnaaya yoopatuxiwa yookuchula yoochuneyaxa ya veelaponi yavathi: Achu. (Yobi 38:7; Masi. 8:31.) Soopatuxiwa seiya sinnooniherya osivela ni miruku Yehova oreiyeno.—Sal. 104:24; Aro. 1:20.

3. Mwawiiwanana ni 1 Korinto 15:21, 22, tiheeni mukucho wa Yesu oneerihaaya okhala wooweryeya?

³ Yehova aachuna wi achu ekhaleke okhala wookhala veelaponi yeeyo owo aapatunxeiye. Nyenya Atamu ni Eva yaammwareela Tiithi aya oosivela, nave yoocheka ni okhwa wohaavolowela achu oothene. (Aro. 5:12) Yehova aakhulenle hai? Emanle ocheka, owo aaloca yeeyo aahaaleiye opaka wi awoopole achu. (Map. 3:15) Owo aahaala omvaha Mwanawe, Yesu ntoko yawoopola, nave eyo yaahaala oweeriha anamwane oothene a Atamu ni Eva okhala ootaphuwa wa yoocheka ni okhwa. Muchu ti muchu ookhalano otaphuwa  wa othanla omulapa Yehova wi akhaleno okumi woohimala.—Yoh. 3:16; Aro. 6:23; Mwaalakhanye 1 Korinto 15:21, 22.

4. Makoho taani nnahaalaahu othokorororya mmwaha yoola?

⁴ Yoolaiherya ya ovinya mookhwani ennakumiherya makoho makina. Ntoko yootakiherya, ovinya mookhwani akhweya onahaala weereya hai? Apwanne nnawerya waasuwela amusi ahu ni asinthamwene vaavaa anahaalaaya oviihiwa? Ohakalala taani nnahaalaahu okhalano? Nave ntakhara heeni ovinya mookhwani onnanihusiha osivela, miruku ni opisa murima wa Yehova? Nnahaala othokororya makoho yaala.

5. Ntakhara heeni nnaphiyerya makuchuwelo awi alipa ookhwa hanahaala oviihiwa mu elukuluku emohamoha?

⁵ Mu elapo evyaani Yehova onahaala ompharihela Mwanawe wi aaviihe macikhwi macikhweene a achu. Nyenya nnawerya ophiyerya makuchuwelo awi alipa ookhwa heni eviihiwe oothene mu elukuluku emohamoha. Ntakhara heeni? Nthowa nawi wakhala wi aaviihiwa oothene mu elukuluku emohamoha, mu elapo evyaani onahaala okhalamo namvutuka. Yehova hanapaka ichu mwa waakanyeryeya. Owo oosuwela wi murecele waariki okhalevo, ichu inaphwanela okhala soohakanyereya. (1 Kor. 14:33) Vaavaa aalapeiye ni Yesu epatuxaka erimu ni elapo yavathi, Yehova aari amiruku ni oopisa murima; owo aareherya elapo vakhaani-vakhaani ahaakumve waapatuxa achu. Yesu onahaala omutakiherya Tiithi awe vaavaa onahaaleiye olapa vamoha ni achu yaawo eni evuluwe mu Armaketo wi erehererye elapo ntakhara achu anahaala oviihiwa mookhwani.

6. Mwawiiwanana ni Saweriwa T’arummwa 24:15, achu a mukhalelo taani anahaala oviihiwa mookhwani?

⁶ Achu anahaala ovuluwa mu Armaketo anahaala opaka echu yoochuneyaxa, waahusiha achu anahaala oviihiwa mookhwani vooloca sa Omwene wa Muluku, ni okhalaka mwawiiwanana ni malamulo a Yehova. Ntakhara heeni  oryaaya woochuneya? Nthowa nawi ancipale a yaawo anahaala oviihiwa mookhwani ‘toonanara murima.’ (Mwaalakhanye Saweriwa T’arummwa 24:15.) Achu yaawo ‘oonanara murima’ onahaala ochuneya opaka matorokelo mookumini mwaya wi ewerye waakhela woopola wa Kristu. Muupuwele muteko mutokweene wa waahusiha macikhwi macikhweene a achu yaawo ahimusuwenle Yehova. Apwanne muchu ti muchu onahaala okhalano muhusiha awe, hiiha ntoko eneereyaaya olelo ni soohuserya sa Piipiliya? Apwanne yaawo anahaala oviihiwa anahaala othanleliwa muloko aya, ni ovyakihiwa wi yaahusihe akina anahaala oviihiwa ohoolo waya? Nnaphwanela oweherya wi noone. Echu nnasuwelaahu tiyawi, omakuchuwelo wa Olamulelo wa Kristu wa Iyaakha Masanaru Khumi, “elapo ya vathi enamusareyano waasuwela Apwiya [Yehova].” (Isa. 11:9) Nnahaala okhalano muteko mutokweene variyari va iyaakha masanaru khumi, owo onahaala okhala muteko woohakalalihaxa!

7. Ntakhara heeni achu a Muluku anaphwanela okhala a niphwanya vaavaa eneeraaya enahusiha achu anahaala oviihiwa?

⁷ Variyari va Miyakha Masanaru Khumi sa Olamulelo wa Kristu, alapeli oothene a Yehova a veelaponi ya vathi, anahaala opaka matorokelo wi ewerye omuhakalaliha yene. Mwa yeeyo oothene anaphwanela okhalano niphwanya vaavaa eneeraaya enaahusiha ooviihiwa mookhwani, nthowa nawi aasuwela wi onachuneya wiilipiserya wi awo ehiye meecelo oohiphwanelela wi ewerye ochariha malamulo a Yehova. (1 Ped. 3:8) Moohikhwa minikwa, yaawo anahaala okookiheryiwa okhala akumi anahaala opaka makupa a achu awiiyeviha a Yehova, yaawo anahaala wiilipiserya wi, ‘elapeke moocicimiherya ovulushiwa waya.’—Fil. 2:12.

8. Ntakhara heeni ninnaroromela wi nnahaala owerya waasuwela amusi ni asinthamwene yaawo anahaala oviihiwa mookhwani?

⁸ Aakhalavo mathowa oophwanelela ananlekecha wi, nnahaala waasuwela amusi ni asinthamwene ahu yaawo anahaala oviihiwa mookhwani. Mwa yeeyo, nuupuwela ovinya mookhwani yoowo weeren’ye, enakhala yawooneya wi Yehova onahaala waaviha hiiha ntoko yaaryaaya ehaakumve okhwa, naari wi ni mwiili aya vamoha ni makhalelo aya ooloca ni wuupuwela. Muupuwele wi Yesu olikanyinhe okhwa ni ikhove nave ovinya mookhwani ni oviihiwa mu ikhove. (Mat. 9:18, 24; Yoh. 11:11-13) Vaava muchu onavinyeiye, owo onakhala hiiha ntoko aareiye ahaakumve okona. Owo onnooneya mmukhalelo mmohamoha nave onnakhalano muupuwelo mmohamoha hiiha ntoko aakhanleiye. Muupuwele yootakiherya ya Lasaro. Owo aamalinhe mahiku masese vaavaa aakhwileiye, nave mwiili awe waapacerya wuuca. Vaavaa Yesu aamviihaleiye mookhwani, Lasaro aahisuweliwa mwawaakuveya ni arokora we, nave owotho aahiwuupuwela.—Yoh. 11:38-44; 12:1, 2.

9. Ntakhara heeni yaawo eni eviihiwe mookhwani heni ekhaleno muupuwelo ni mwiili woophaameya?

⁹ Yehova oolaiherya wi mparataiso haavo ani aloce wi: “Kinniiceliwa.” (Isa. 33:24; Aro. 6:7) Mwawiihiiha oothene yaale eni eviihiwe mookhwani anahaala okhalano mwiili waphaama. Nyenya nlelo awo heni ekhale oophaameya. Waakhala wi toophaameya amusi ni asinthamwene aya heni ewerye waasuwela. Variyari va Miyakha Masanaru Khumi sa Olamulelo wa Kristu, achu anahaala okhalaka oophaameya vakhaani-vakhaani. Pahiru omakuchuwelo wa Olamulelo wa Iyaakha Masanaru Khumi, Yesu onahaala waakookiherya Omwene Atiithi awe. Mweelukuluku yeeyo, Omwene onahaala waakhwaniherya yookhwela awe, yeeyo enavolowela oweeriha achu oothene okhala oophaameya.—1 Kor. 15:24-28; Wup. 20:1-3.

10. Ovinya mookhwani onanceenyerya eheeni?

¹⁰ Muupuwele mukhalelo nneeraahu nikhale vaavaa nnahaalaahu owaakhela amusi ni asinthamwene yaawo nnaasivelaahu. Apwanne munahaala  wunla naari otheya ntakhara ohakalala? Apwanne munahaala wiipa wi mmuthamalele Yehova? Chiryene nnaphwanela olekecheya wi: Ovinya mookhwani onahaala waaceererya omusivela wahu Yehova ni Yesu. Yahaari mahala ni onipwacha waya, hinaahaala waakhela yoovaha yeela yoohakalalihaxa.

11. Mwawiiwanana ni masu a Yesu anaphwanyeya mu Yohani 5:28, 29, tiheeni enahaala weereya ni yaale anahaala ochariha malamulo eekhaikhai a Muluku?

¹¹ Muupuwele ohakalala eneereya ekhaleno yaawo anahaala oviihiwa mookhwani vaavaa eneeraaya ehiye omuchu wakhalai ni opacerya ochariha malamulo eekhaikhai a Muluku. Yaawo anahaala opaka matorokelo oochuneyaxa anahaala okhala mu parataiso. Nyenya yaale eni emmwareele Muluku heni yaakanyerye murecele ni okhapeleleya mu parataiso.—Isa. 65:20; mwaalakhanye Yohani 5:28, 29.

12. Yehova oni aareelihe hai achu eni ekhaleke veelaponi yavathi?

¹² Vaavaa Omwene onahaalaya opacerya olamulela, achu a Muluku anahaala weemererya yeeyo Masiposipo 10:22 enalocaaya: “Mareeliho a Apwiya tanavaha muhakhu, nave hanruuha yoothananiha.” Nnikhaviheryo na munepa waweela, alapeli a Muluku anahaala okhala ooreela omunepani, naari wi vakhaani-vakhaani okhala oophaameya hiiha ntoko Kristu. (Yoh. 13:15-17; Éfe. 4:23, 24) Nihiku ti nihiku awo anamukhalakano ikuru, ni okumi waphaama. Okumi onamukhala woohakalalihaxa! (Yobi 33:25) Apwanne wuupuwela ovinya mookhwani onahaala onikhaviherya hiihaano?

13. Mwawiiwanana ni Salumu 139:1-4, oviihiwa mookhwani onooniherya hai wi Yehova oomusuwela mmoha ti mmoha a hiyaano?

¹³ Ntoko elociwaaya, vaavaa Yehova onahaaleiye omviiha muchu ookhwa, owo onahaala omukookiherya muupuwelo ni omuchu awe, nave owo onamukookela okhala hiiha ntoko aakhanleiye ahaakumve okhwa. Muupuwele tiheeni enavolowelavo. Yehova onnatepa woosivelaani nave onnoopwachaani ophiyerya wi onnoona yeeyo munoonaanyu, munuupuwelaanyu, munalocaanyu ni munapakaanyu, owo okhalano owerya wa opaka yeeyo. Waakhanle wi Yehova onooviihaani mookhwani, owo aanwerya okookiherya muupuwelo anyu, mavyakelo ni makhalelo a omuchu anyu. Mwene Tavite aanasuwela wi Yehova onnampwacha mmoha ti mmoha a hiyo. (Mwaalakhanye Salumu 139:1-4.) Tiheeni nnahuseryaahu moorweela wa Yehova onisuwela phaama?

14. Ntakhara heeni oryaaya woochuneya wuupuwelela wi Yehova oonisuwela phaama?

¹⁴ Wuupuwelela wi Yehova oonisuwela phaameene ennanikhaviherya ohikhala a wuukhuwa. Ntakhara heeni? Muupuwele wi Yehova onnoopwachaani vancipale. Owo osuwela wi munnachuneya wa yene. Owo onnasuwela soothene iri soochuneya mookumini mwahu. Ti yoohakalaliha osuwela yeela! Mwawiihiiha hinnaphwanela wuupuwela wi nri meekhihu. Yehova ori ni nyuwaano mu elukuluku yoothene, achunaka wookhaviheryaani.—2 Math. 16:9.

15. Ovinya mookhwani onooniherya hai miruku sa Yehova?

¹⁵ Woova okhwa onanwerya okhala muraakho wawoopiha. Achu yaawo anahooleliwa ni Satana annapharihela okhwa wi yaahuwelihe asinthamwene aya ni waahiiha soororomela saya. Nyenya muraakho yoola honawerya onoopopiha. Noosuwela wi, wakhala wi amwiicani ahu aaniipha, Yehova onahaala oniviiha mookhwani. (Wup. 2:10) Noolekecheya wi awo heni ewerye onimwalanyiha ni Yehova. (Aro. 8:35-39) Ti yoohakalaliha osuwela wi Yehova ohooniherya miruku moorweela wa onivaha ewehereryo ya ovinya mookhwani! Moorweela wa oviihiwa mookhwani, Yehova onahaala omaliha mmoha wa miraakho seiyo Satana onaroromeleiye. Mu elukuluku emohamoha owo onahaala onivaha nikhaviheryo ntokweene wi niwerye wiisaakiha moorweela wa olipa murima weeparipari.

16. Makoho taani munaphwanelaanyu wiipakela? Maakhulo anyu anahaala wookhaviheryaani hai osuwela waakhanle wi munnamuroromela Yehova?

 ¹⁶ Wakhala wi amwiicani a Yehova aawoopopihaani wi anahaala owiiphaani, muni mwaakhulele hai? Apwanne munahaala omuroromela Yehova ni yoororomeliha awe ya wooviihaani mookhwani? Wi musuwele waakhanle wi munnamuroromela Muluku munaphwanela wiikoha: ‘Apwanne mu soolakelela ikhaani, kinnooniherya wi kinnamuroromela Yehova?’ (Luka 16:10) Nikoho noocharela nnaphwanela okhala: ‘Apwanne mukhalelo aka wookumi onnooniherya wi kinnaroromela wi, kahela Omwene mu nipuro noopacerya, Yehova onahaala othokororya soothowa saka soomwiilini?’ (Mat. 6:31-33) Waakhanle wi naakhulo nanyu ti nawi ‘aa’ vooloca sa makoho yaala, eyo enooniherya wi munnamuroromela Yehova nave wi muri oorehereya ohoolela saweeha inoorwa.—Masi. 3:5, 6.

17. (1) Oviihiwa mookhwani onooniherya hai wi Yehova toopisa murima? (2) Nni nooniherye hai othamalela opisa murima wa Yehova?

¹⁷ Yehova ooreherya nihiku ni elukuluku onahaaleiye omaliha mikhalelo soonanara sa elapo yeela. (Mat. 24:36) Owo hani ahiye okhala oopisa murima ni oruuha makuchuwelo ehaakumve elukuluku awe. Naamwi arino nchuno na waaviha alipa ookhwa, owo onnatitelela okhala oopisa murima. (Yobi 14:14, 15) Owo onawehererya elukuluku yoophwanelela wi aaviihe alipa ookhwa. (Yoh. 5:28) Moohikhwa minikwa, opisa murima wa Yehova onnanihusiha ichu sincipale. Muupuwele ela: opisa murima wa Yehova, onnaavaha elukuluku achu ancipale wi “ephiye wuucharuwani,” ophitaanyerya hiyaano. (2 Ped. 3:9) Yehova onachuna wi achu ancipale wakhala wooweryeya ephwanye ekumi yoohimala. Mwa yeeyo, nnaphwanela wooniherya wi ninnathamalela opisa wawe murima. Mwawiihai? Moorweela wa opaka owetha wahu wi niwaavye yaale “yaalakhanyeriwe waakhela okumi woohimala” ni waakhaviherya omusivela ni omurumeela Yehova. (Saw. 13:48) Mmukhalelo yoola, awo anahaala ophwanya mphurelo ntakhara opisa murima wa Yehova, hiiha ntoko hiyaano.

18. Ntakhara heeni nnaphwanelaahu okhala oopisa murima ni akina?

¹⁸ Yehova oosuwela wi pahiru nnahaala okhala oophaameya omakuchuwelo wa iyaakha masanaru khumi. Ophiyerya elukuluku yeeyo owo onahaala okhala oopisa murima ni otitelela olevelela soocheka sahu. Nla nthowa naphaama nnahaala ooniceenyerya waavya makhalelo aphaama a akina ni okhala oopisa murima ni yaawo. Moone yootakiherya ya murokora mmoha. Iyawe ahipacerya okhala awuukhuwaxa ophiyerya wi aahiya ophiya mmithukumano. Murokora  ooloca: “Eyo yaari yawiicela wa miyaano. Soolakelela naapankaahu ntoko emusi saahipwata.” Naamwi hiiha murokora aahooniherya opisa murima ni iyawe. Owo aahimuroromela Yehova nave haaceechen’ye. Hiiha ntoko Yehova, murokora hoona pahiru makacamiho nyenya aatikitheren’ye ni makhalelo aphaama a iyawe. Owo oriye “aiyaka aakhalano makhalelo aphaama, awo anniilipixerya ovootha nikacamiho naya vakhaani-vakhaani.” Yootakiherya ela ennooniherya ochuneya waya okhala oopisa murima ni amusi vamoha ni anna a mmulokoni yaawo anniilipiserya ovootha makacamiho aya!

19. Tiheeni nnaphwanelaahu olakelela opaka?

¹⁹ Yesu ni ankeelo yaatepa ohakalala vaavaa yoonaaya soopatuxiwa sa veelaponi ya vathi. Mwaanyiherye mukhalelo eneeraaya ekhale oohakalala, vaavaa achu a veelaponi yavathi anahaalaaya okhala oophaameya, emusivelaka ni omulapa Yehova. Mwaanyiherye mukhalelo oothanliwa eneeraaya ekhale oohakalala elamulelaka vamoha ni Kristu wirimu, ni yoonaka mphurelo wa muteko aya ntakhara achu. (Wup. 4:4, 9-11; 5:9, 10) Navetho mwaanyiherye okhala mu elapo yeeyo miithori anakhuma nthowa na makacamiho aneereya eraceelihiwe ni miithori a ohakalala, ohirimo ireca, wuukhuwa ni okhwa. (Wup. 21:4) Ophiyerya nihiku nenno mukhale oolakelela otakiherya osivela, miruku ni opisa murima wa Yehova. Mweerano hiihaa, hamuni muyeleele ohakalala wanyu, moohipwacha makacamiho anahaala okhumelela. (Tiy. 1:2-4) Mweeparipari nnaphwanela omuthamalela vancipale Yehova nthowa na oniroromeliha wi onarwa ‘okhalavo ovinya mookhwani’!—Saw. 24:15.