Ntakhara heeni Yesu ahaakumve okhwa aaloca masu a Tavite anaphwanyeya mu Salumu 22:1?

Wa masu ookuchula yaawo Yesu aalonceiye ahaakumve okhwa, aakhalavo makina yaawo anaphwanyeya mu Mateu 27:46: “Muluku aka, Muluku aka, mukihiyeryeni miyo?” Moorweela wa oloca yeela, Yesu aahaakhwaniherya masu a mulipa oomurepa salmu Tavite anaphwanyeya mu Salumu 22:1. (Mar. 15:34) Yaahaala okhala yoonanara wuupuwela wi Yesu aalonce masu yaala nthowa nawi aari oophweeleya naari wi aayeleela nroromelo nawe mu elukuluku vakhaani. Yesu aaniiwexexa ntakhara heeni aanaphwanela okhwa nave aari ooreheryeya weerano yeeyo. (Mat. 16:21; 20:28) Yesu tho aanasuwela wi yaphiya elukuluku awe wi iiphiwe, Yehova aahaala oviihavo “mukuso” voorukurerya vawe. (Yobi 1:10) Mmukhalelo yoola, Yesu aahaala wooniherya wi aari oororomeleya moohipwacha okhwa wawiicelasa.—Mar. 14:35, 36.

Vano ntakhara heeni Yesu aaloca masu a mu salmu yoola? Naamwi nihilonce mooluluwanya, hankooni noone ichu seiho akhweya seerinhe wi aloce masu yaala. *

Moorweela wa oloca masu yaala, Yesu akhweya ooniherya wi Yehova haahaala weeriha wi owo ahikhwe. Yesu aaphwanela olivela woopola ohirivo nikhaviheryo na Yehova. Owo aari muchu nave aaphwanela okhwa ntoko muchu wi “alawihe okhwa wa nthowa na achu oothene.”—Ahe. 2:9.

Yesu akhweya aaloca masu makina a mu salmu yoola, wi achu yuupuwele masu oothene  a mu salmu yoola. Mmahiku a Yesu yaari yookhovelela ya Ayuta wuupuwelela masaalimu. Nave wakhala wi ahiiwa eversikulu ya salmu mmoha awo mwawaakuveya yaanamuupuwela Salimu oothene. Yaarimwi eri yeeyo Yesu uupuweleiye, owo akhweya aachuna oweeriha oohuseryaawe yaawo yaari Ayuta wuupuwela wi salmu ola aakhalano sooloherya sincipale vooloca sa okhwa wawe. (Sal. 22:7, 8, 15, 16, 18, 24) Ohiya yeeyo, iversikulu sookuchula sa salumu yoola sinnamucicimiha Yehova nave sinnamuloca owo ntoko mwene a elapo yoothene.—Sal. 22:27-31.

Moorweela wa oloca masu yaala a Tavite, akhweya Yesu aachuna wooniherya wi owo heenre echu yoonanara. Ahaakumve okhwa, Yesu aathorihiwa moohookololowa nave aahootheryiwa wi aari mulipa oonyemula. (Mat. 26:65, 66) Othoriha yoola weeren’ye mwawaakuveya, ohiyu eriyari nave moovuhana ni malamulo a mu elukuluku yeele. (Mat. 26:59; Mar. 14:56-59) Vaava Yesu aalonceiye ariki: “Muluku aka, Muluku aka, mukihiyeryeni miyo?” owo akhweya achuna wooniherya wi heenre echu yeeyo yaahaala weeriha okhwa mmukhalelo yoole.

Apwanne Yesu akhweya aachuna owuupuxerya akina wi Tavite tho, yoowo aamurempe salmu yoola, Muluku aaheemererya wi ahooxeye, nyenya ohooxeya wa Tavite hiyaari yawooniherya yawi aayeleela weemereryiwa ni Yehova? Nikoho na Tavite hinnooniherya wi owo aayeleela nroromelo. Tiwi amanle opaka nikoho nenla, owo aaloca wi aanaroromela ikuru soovuluxa sa Yehova, nave Yehova aatitelela omureeliha yoowo. (Sal. 22:23, 24, 27) Moolikana, naamwi Yesu “Mwaana a Tavite,” aahooxeya vamwirini woohooxiwavo, eyo hiyaari yawooniherya wi owo aayeleela weemereryiwa ni Yehova.—Mat. 21:9.

Yesu akhweya ooniherya wiicela yoowo ooneiye nthowa na ohikhalano Naakiho na Yehova mu elukuluku yeele. Yehova haachuna wi mwaana awe ahooxeye ni okhwa. Eyo pahiru yeeren’ye nthowa na omwareya woopacerya mu emaca ya Eteni. Yesu hapanke echu yoonanara, nyenya waanachuneya wi owo ahooxeye ni okhwa wi arehererye mwaha yoowo waatannyiwe ni Satana ni ovaha woopola waachuneya wi akookiherye yeeyo achu yaayelenlaaya. (Mar. 8:31; 1 Ped. 2:21-24) Eyo pahiru yaahaala oweryeya waakhanle wi Yesu aayeleela naakiho Yehova.

Yesu akhweya aachuna waakhaviherya oohuserya awe wuupuwela mathowa yaawo yaamweerinhe Yehova weemererya wi owo akhwe mmukhalelo yoole. * Yesu aanasuwela wi ancipale yaahaala okwaculeya nthowa na okhwa wawe ntoko mulipa oohuhula. (1 Kor. 1:23) Nyenya waakhanle wi oomuchara awe yaatikitheryeya mu nthowa nenlo neerinhe wi owo akhwe, awo yaahaala wiiwexexa yootaphulela aya. (Gal. 3:13, 14) Mmukhalelo yoola, oohuserya a Yesu yaahaala omoona ntoko Moopoli ohiya ntoko mulipa oohuhula.

Moohipwacha mathowa yaawo yeerinhe wi Yesu aloce masu yaala, owo aasuwela wi aaphwanela okhwa wi aakhwaniherye yookhwela ya Yehova. Ohoolo waya amanle omuloca salmu yoola, Yesu aahi: “Vano sookhwaanela!” (Yoh. 19:30; Luka 22:37) Naamwi owo aahaakhapeleliwe ni Muluku mu elukuluku yeele, Yesu anwerya waakhwaniherya moomalela yoolakelela yeeyo aarweenleiye veelaponi yavathi. Nave tho anwerya okhwaaniherya ichu soothene saarempwe vooloca sa yoowo “mmalamulo a Moose, aliivuru a alipa a miririmu ni Masaalimu.”—Luka 24:44.