1-2. Mukucho wa woopola tiheeni, nave ntakhara heeni ninnachuna?

VAAVAA Atamu aachenkeiye, owo aayeleela ekari ya okhalano okumi woohimala, ohiya wa yene pahiru, nyenya tho wa anaawe a muhoolo. Owo haahaala okhurumuweliwa wa yeeyo enreiye. Owo aachenke mwaayiini. Vano hanka vooloca sa anamwane awe? Anamwane awe hiyaapanke echu eri yoothene yoonanara, nave awo hiyaamuceenyenrye Atamu opaka yoocheka. (Aro. 5:12, 14) Atamu aaphwanela okhwa wanthowa na yeeyo eenreiye. Nyenya apwanne Yehova aaheeravo echu wi anamwane a Atamu ekhaleno ekumi yoohimala? Aai! Vahilekenle Atamu amanle ocheka, Yehova aahipaceryiha mukhalelo aahaaleiye owoopola amilyawu a anamwane a Atamu wa yoocheka ni okhwa. (Map. 3:15) Mu elukuluku yoophwanelela, Yehova aahaala omurumiha Mwanawe orweela wirimu wi “avahe okumi awe wi awoopole ancipale.”—Mar. 10:45; Yoh. 6:51.

² Mukucho wa woopola tiheeni? Mu Soorepa sa Ekiriki Seekristu, mukucho esisapo yeeyo Yesu olimveiye wi akookiherye yeeyo Atamu aayeleenleiye. (1 Kor. 15:22) Ntakhara heeni ti woochuneya? Nthowa nawi malakiheryo eekhaikhai a Yehova yaawo yaari mu Nlamulo yaanaloca wi waanachuneya oliva okumi ni okumi. (Muk. 21:23, 24) Atamu aayeleela okumi awe woophaameya. Wi aakhwaniherye wookololowa wa Muluku, Yesu aavaha okumi awe woophaameya. (Aro. 5:17) Mmukhalelo yoola owo aakhala “Tiithi Oohimala” wa oothene yaale anaroromela mukucho wa woopola.—Isa. 9:6, TNM; Aro. 3:23, 24.

3. Mwawiiwanana ni Yohani 14:31 ni 15:13, ntakhara heeni Yesu oovahererya okumi awe woophaameya?

³ Yesu aari oolakelela ovaha okumi awe nthowa na osivela otokweene ntakhara Tiithi awe a wirimu ni hiyaano. (Mwaalakhanye Yohani 14:31; 15:13.) Aceenyeryeyaka ni osivela yoola, owo aalakelela otitelela okhala oororomeleya ophiyerya omakuchuwelo ni waakhwaniherya yookhwela ya Atiithi awe. Owo aaheerano  yeela moorweela wa otitelela okhala oororomela ophiyerya okhwa. Ntoko yookhumelela, yookhwela yoopacerya ya Yehova ntakhara achu ni elapo yavathi enahaala waakhwanela. Mmwaha yoola, nnahaala othokororya ntakhara heeni Yehova aaheemererya wi Yesu aahooseye ahaakumve okhwa. Nave tho nnahaala othokororya mwawaakuveya yootakiherya ya namarepa a Piipiliya yoowo aathamalela vancipale mukucho wa woopola. Nave vookuchula, nnahaala othokororya mukhalelo nneeraahu nooniherye othamalela wahu woopola, ni mukhalelo nneeraahu ninnuwihe othamalela wahu ntakhara mukucho yoowo Yehova ni Yesu avaherenryaaya wa hiyo.

4. Mutharihe mukhalelo Yesu aakhwileiye?

⁴ Muupuwelele vooloca sa yeeyo yeeren’ye mu nihiku nookuchula Yesu ahaakumve okhwa. Owo anwerya oveka nikhaviheryo na ankeelo ancipale wi emwaakihe, nyenya owo henreno. Ohiiya yeeyo, owo aaheemererya wi anakhoco o Roma emphare ni ommana. (Mat. 26:52-54; Yoh. 18:3; 19:1) Awo yaammana ni nwasuso yoowo wamphoreihale vancipale. Voocharela, awo yaapaka ekhara ya miiwa enwariha, yeeyo yeerinhe wi nikhami nawe niyeeheyeke. Yesu aaheererya oteesa mwiri yoowo woohoosiwavo ayaakano nipuro nenlo aayeiye wiiphiwavo. Nyenya mu elukuluku vakhaani, anakhoco o Roma yaamulamulela mulopwana mukina wi ateese mu nipuro nawe. (Mat. 27:32) Vaavaa Yesu aaphin’yeiye mpuro yoowo aahaaleiye wiiphiwavo, anakhoco yaamukhomela mata ni inaani va mwirini woohoosiwavo. Olimela wa mwiili wa Yesu waanaaceererya makhwaca mwemmo aakhommwaleiyemo. Asinthamwene awe yaathanana nave amamaawe yaaninla, nyenya alamuleli Ayuta yaanamunyemula Yesu. (Luka 23:32-38; Yoh. 19:25) Yesu aahooseya mu iwora sincipale. Nthowa na mukhalelo mwiili awe weemenlaaya, murima ni mafafu awe yaanalapa mookacamiheya yeerihaka wi omumula okhale woovila. Yesu aanasuwela wi aari oororomeleya nave ahaakumve okhwa, owo aavekela wa Yehova mu ekwaha awe yookuchula. Voocharela aahuuramiha muru awe nave aveleela okumi awe. (Mar. 15:37; Luka 23:46; Yoh. 10:17, 18; 19:30) Ola chiryene waari okhwa wa vakhaani vakhaani, wawiicela, ni wa wuuliha muru!

5. Wa Yesu, tiheeni yaari yawiicelasa opwaha mukhalelo iiphiweiye?

⁵ Wa Yesu, mukhalelo owo iiphiweiye hiwaari wuukhuwa woopwahereryaxa. Owo aari awuukhuwa nthowa na yeeyo yeerinhe wi awo emwiiphe. Owo aahootheriwa wi aari mulipa oonyemula—muchu yoowo ahaamucicimiha Muluku naari nsina na Muluku. (Mat. 26:64-66) Wootheriwa ni achu wi haamucicimiha Muluku waanamuukhula vancipale Yesu nave aanaweherya wi Atiithi awe hiyaahaala weemererya wi uulihiwe muru mmukhalelo yoola. (Mat. 26:38, 39, 42) Ntakhara heeni Yehova aaheemererya wi Mwanawe oosiveliwa ahooseye nave akhwe? Hankooni nthokororye mathowa mararu.

6. Ntakhara heeni Yesu aakhomeliwa vamwirini woohoosiwavo?

⁶ Noopacerya, Yesu aaphwanela okhomeliwa vamwirini wi aataphule Ayuta mu wuulumeliwa. (Gal. 3:10, 13) Awo yaahuulumeliwa nthowa nawi yaaroromeliha wiiwelela Nlamulo na Muluku nyenya hiyaakhwanihenrye. Mwawiihiiha awo yaathoriheliwa okhwa nthowa nawi yaari anamwane a Atamu, nyenya tho awo yaahuulumeliwa. (Aro. 5:12) Nlamulo na Muluku wa Aisarayeli naanaloca wi muchu apaka yoocheka yeeyo enakeriha wookhwani aaphwanela wiiphiwa. Vakina vaya, muruchu wa muchu yoowo aakhwa waanakhomeliwa vamwirini woohoosiwavo. * (Malam. 21:22, 23; 27:26) Nthowa nawi Yesu aakhomeliwa vamwirini woohoosiwavo, Ayuta yanwerya  otaphuliwa mu wuulumeliwa yoola nave mukucho awe waanwerya waakhaviherya naamwi yaamukhonce yoowo.

7. Tinivi nri nthowa nanawiili naamweerinhe Muluku weemererya wi Mwanawe ahooseye?

⁷ Muthokororye nthowa nanawiili nenlo neerinhe wi Muluku eemererye wi Mwanawe ahooseye. Owo aamuvyakiha Yesu ntakhara murici awe wa muhoolo ntoko mulipa a mukucho Mutokotoko. Yesu ahoona mukhalelo oryaaya woovila omwiiwelela Muluku variyari va yaweeha etokotoko. Owo aahooseya vancipale ophiyerya wi aavekela “alipihaka nsu ni inlaka.” Mweeparipari, nthowa nawi Yesu aahuukhuwa vancipale, owo onniiwexexa soochuna sahu nave ‘onanwerya onikhaviherya’ vaavaa ‘nneereryiwaahu.’ Ninnamuthamalela vancipale Yehova omuthanla mulipa a mukucho mutokweene yoowo onawerya “omoriwa ikharari ni oceecheya wahu”!—Ahe. 2:17, 18; 4:14-16; 5:7-10, BNM.

8. Nthowa taani naneeraru nenlo naamweerinhe Muluku weemererya wi Yesu eehiwe vancipale?

⁸ Naneeraru, Yehova aaheemererya wi Mwanawe ahooseye vancipale wi aakhule nikoho noochuneyaxa: Apwanne achu ananwerya otitelela okhala oororomeleya wa Yehova naamwi ahoolela saweeha itokweene? Satana olonce wi hooye! Owo onaloca wi achu pahiru anamurumeela Muluku nthowa nawi anachuna wi aavahe echu ekina. Nave onnaroromela wi awo hanamusivela Yehova, hiiha ntoko Atamu enreiye. (Yobi 1:9-11; 2:4, 5) Nthowa nawi Yehova aanaroromela wi Yesu aahaala otitelela okhala oororomeleya, owo aaheemererya wi Mwanawe eehiwe vancipale. Yesu aatitelela okhala oororomeleya nave aahooniherya wi Satana mulipa awootha.

9. Yootakiherya taani murummwa Yohani otikithenryeiye wa hiyaano?

⁹ Nroromelo na Akristu ancipale naanalipa orweela wa mahusiheryo a mukucho wa woopola. Awo yaanatitelela olaleerya moohipwacha wiiciwa nave yaanavilela makacamiho oothene yaaryaayano mookumini mwaya. Muthokororye yootakiherya ya murummwa Yohani. Owo aalaleerya moororomeleya eparipari vooloca sa Kristu ni woopola, akhweya opwaha iyaakha 60. Owo aarino iyaakha waacamela 100, nyenya alamuleli o Roma yuupuwela wi aari mulipa awaakanyerya nave yaahinwalela o evilivili yo Patimo. Yoonanara taani owo aapankeiye? Owo aanaloca “masu a Muluku ni omweerela onamoona Yeesu.” (Wup. 1:9) Yohani ootikitherya yootakiherya yaphaama ya nroromelo ni ovilela!

10. Ikaarata sa Yohani inooniherya hai wi owo aanathamalela mukucho wa woopola?

¹⁰ Mu aliivuru a Mpiipiliyani yaawo Yohani aarempeiye, owo ohooniherya mukhalelo aamusiveleiye Yesu ni mukhalelo aathamaleleiye vancipale mukucho awe. Owo ooloca opwaha ikwaha 100 vooloca sa woopola ni ichu saphaama seiyo woopola weerinhaaya okhala wooweryeya. Ntoko yootakiherya, Yohani oorepa: “Oomwi mukina acheka, nookhalano mulipa a waakiha vamiithoni wa Atiithi, ti Yeesu Kristu awookololowa murima.” (1 Yoh. 2:1, 2) Ikaarata sa Yohani sinnaceenyerya tho ochuneya waya “omweerela onamoona Yeesu.” (Wup. 19:10) Chiryene, Yohani aanathamalela vancipale mukucho wa woopola. Nni nooniherye hai wi ninneerano emohamoha?

11. Tiheeni enahaala onikhaviherya okhooca yaweeha?

¹¹ Mukhooce yaweeha yeeyo eni yoochekiheeni. Wakhala wi ninnathamalela mukucho wa woopola hinni nikhaleno muupuwelo wawi: ‘Tahi woochuneya wa mi wiilipiserya wi kihipake yoocheka vaavaa kineehiwaaka. Kinanwerya opaka echu yoonanara, nave voocharela kiveke okhurumuweliwa.’ Moohiyana, vaavaa nneehiwaahu wi nipake echu yoonanara, nnanwerya oloca:  ‘Hooye! Nthowa na soothene seiho Yehova ni Yesu yeenraaya wa miyaano, nkirwa kipaka echu ntoko si yeela.’ Ni yeela mmuupuweloni, nnanwerya omveka Yehova ikuru, nriki wa yoowo: ‘Muhikihiye keereryiwaka.’—Mat. 6:13.

12. Nni nipharihele hai ekano enaphwanyeya mu 1 Yohani 3:16-18?

¹² Mwaasivele anna ni arokora anyu. Vaavaa nnooniheryaahu osivela ntoko yoola, ninnooniherya tho othamalela ntakhara mukucho wa woopola. Ntakhara heeni? Nthowa nawi Yesu oovaha okumi awe ohiya pahiru wa hiyaano nyenya tho wa anna ni arokora ahu. Waakhanle wi aari oorehereya okhwa ntakhara yaawo, chiryene awo tasisapo etokweene wa yoowo. (Mwaalakhanye 1 Yohani 3:16-18.) Ninnooniherya osivela wahu ntakhara anna ni arokora ahu moorweela wa mukhalelo nnaakhalihaahu yaawo. (Éfe. 4:29, 31–5:2) Ntoko yootakiherya, ninnaakhaviherya vaavaa awo aniiceliwaaya naari anavilelaaya makacamiho oovila, ophitaanyerya ipahu sa maphacuwelo. Nyenya tiheeni nnaphwanelaahu weera wakhala wi munna naari murokora mmulokoni oheera naari ooloca echu yeeyo eninyeenyeihale?

13. Ntakhara heeni ninnaphwanela okhala oolevelela?

¹³ Apwanne ikwaha ikina munnoona okhala woovila omukhurumuwela munna naari murokora? (Onam. 19:18) Waakhanle wi tihiiha, mucharihe nlakiheryo nnacharela: “Muvilelane mukina ni mukhwaawe nave mukhurumuwelaneke, mukina akhalano mwaha ni mukhwaawe. Mukhurumuwelaneke ntoko Apwiya ookhurumuwenlaayaani.” (Kol. 3:13) Ilukuluku soothene vaavaa nnamukhurumuwelaahu munna naari murokora ahu, ninnooniherya wa Tiithi ahu awirimu wi chiryene ninnathamalela mukucho wa woopola. Nni niwerye hai otitelela wooniherya othamalela wahu ntakhara yamahala yeela yoorweela wa Muluku?

14. Mukhalelo taani mukina nneeraahu nooniherye othamalela wahu mukucho wa woopola?

¹⁴ Mmuthamalele Yehova ntakhara woopola. Murokora awiichaniwa Joanna yoowo orino iyaakha 83 onakhala o Intiya, oriye: “Kinnoona wi ti woochuneya oromola woopola mmavekelo aka nihiku ti nihiku ni omuthamalela Yehova ntakhara yoowo.” Nihiku ti nihiku vaavaa munavekelaanyu va meekhiinyu, mmuleele Yehova yoonanara yeeyo mpankaanyu nave mumveke wi ookhurumuweleeni. Nyenya wakhala wi mpanke yoocheka etokweene, onamuchuneya waavya nikhaviheryo na atokweene. Awo anahaala woowiriyanaani nave anahaala woovahaani malakiheryo oosivela orweela Mmasu a Muluku. Awo anahaala ovekela ni nyuwo, emvekaka  Yehova wi atitelele opharihela mukucho wasisapo wa Yesu wi “mpenushiwe” omunepani.—Tiy. 5:14-16.

15. Ntakhara heeni ninnaphwanela waavya elukuluku wi naalakhanye vooloca sa mukucho ni wuupuwelela yoowo?

¹⁵ Muupuweleleke mukucho wa woopola. Murokora mmoha awunnuwelavo awiichaniwa Rajamani yoowo orino iyaakha 73, ooloca: “Ilukuluku soothene vaavaa kinaalakhanyaaka mukhalelo Yesu aahooxen’yeiye, kinninla.” Nyuwaano tho munanwerya othanana mwaawuupuwelaka mukhalelo Mwaana a Muluku aahooxen’yeiye. Nyenya vaavaa munuupuwelelaanyu vancipale mukucho yoowo Yesu ovanheiye, omusivela wanyu yoowo ni Atiithi awe onahaala waaceereryeya. Wi mukhaviheryeye wuupuwelela mukucho wa woopola, apwanne hiyaahaala okhala yaphaama opaka yoohuserya yavameekhaaya vooloca sa mwaha yoola?

16. Ti mwawiihai waahusiha akina vooloca sa woopola enanikhaviheryaaya? (Moone eruku va ekaapa.)

¹⁶ Mwaahusihe akina vooloca sa woopola. Ilukuluku soothene vaavaa nnaaleelaahu akina vooloca sa woopola, othamalela wahu ntakhara yoowo onnaaceereryeya. Nookhalano soolaleeryiwa ni ixilema saphaama seiyo inanikhaviherya othariha wa akina mathowa yeerinhe wi Yesu akhwe ntakhara hiyo. Ntoko yootakiherya, nnanwerya opharihela yoohuserya 4 ya eproxura Michaka Yaphaama Yoorweela wa Muluku! Yoohuserya ela eni “Yesu Kristu Taani?” Naari nnanwerya opharihela mwaha 5 wa liivuru Tiheeni Piipiliya Onanihusiheiye? Muru ene oni “Woopola Yamahala Etokweene ya Muluku.” Nave eyaakha ti eyaakha ninnooniherya othamalela wahu ntakhara woopola moorweela wa ophwanyeya va Mukonelo wa Okhwa wa Yesu nave tho moorweela wa waawopa akina wi ekhale ni hiyo. Yehova oonicicimiha vancipale moorweela wa onivaha ekari ya waahusiha akina vooloca sa Mwanawe!

17. Ntakhara heeni woopola yoovaha etokweene ya Muluku ntakhara achu?

¹⁷ Moohikhwa minikwa, nookhalano mathowa aphaama a wunnuwiha ni otitelela wooniherya othamalela wahu ntakhara woopola. Nthowa na woopola, nnanwerya okhalano onthamwene wa waacameleya ni Yehova naamwi nri achu oohiphaameya. Nthowa na woopola, miteko sa Musaserya inahaala omwaryiwa moomalela. (1 Yoh. 3:8) Nthowa na woopola, yookhwela yoopacerya ya Yehova ntakhara elapo enahaala waakhwanela. Elapo yoothene enahaala okhala parataiso. Mmoha ti mmoha onahaala omusivelaka Yehova ni omurumeela yoowo. Hankooni oothene ahu, nihiku ti nihiku naavye mikhalelo sawooniherya othamalela wahu ntakhara woopola—yoovaha etokweene ya Muluku ntakhara achu!