1. Mavyakelo ahu a oloca arweenle woowi?

 MAVYAKELO ahu a oloca yamahala enarweela wa Muluku ahu oosivela. Vaavaa mulopwana oopacerya Atamu aapatuxiweiye, moohilekela owo anwerya opharihela masu wi aloceke ni Tiithi awe a wirimu. Owo tho anwerya opaceryiha masu makina mavyaani. Atamu aahipharihela mavyakelo yaala wi awerye waakhwaniherya murici awe wa waavaha masina axinama oothene. (Map. 2:19) Nave owo aatepa ohakalala vancipale vaavaa aalonceiye mu ekwaha yoopacerya ni muchu mukina—mwaariye ooreera, Eva!—Map. 2:22, 23.

2. Timwawihayi masu yaaphariheliwaaya khalai nave anaphariheliwaaya hiihaano?

² Moohilekela yamahala ya oloca yaahiphariheliwa moonanara. Satana Musaserya aahinwoka Eva, nave yawootha eyo yaaheriha wi achu echeke ni ekhale oohiphaameya. (Map. 3:1-4) Atamu aahipharihela nlumi nawe moonanara vaavaa amoothenryeiye Eva—ophiyerya tho Yehova—ntakhara soocheka sa yene mwaneene. (Map. 3:12) Kayini aahootha wa Yehova amanle omwiipha munnawe Apele. (Map. 4:9) Ohoolo waya Lameki aaloca masu yooniherya wi achu yaari anlalaxa mu elukuluku awe. (Map. 4:23, 24) Hanka vooloca sa olelo? Ilukuluku ikina ahooleli a ipoliitika hanuuliwa muru opharihela masu oonanara. Nave ti woovila olelo ophwanya ixilema seiyo sihirino malocelo oonanara. Anaxikola anniiwa oruwana oxikola, nave asitokweene anniiwa mmapuro yaawo analapaayawo. Wunlaana wa ophariheliwa malocelo oonanara olelo onnooniherya mukhalelo elapo eraaya yoonanara.

3. Ekaasoope taani nnaphwanelaahu okhalano, nave tiheeni nnahaalaahu othokororya mmwaha yoola?

³ Nahikhalano ephoole, nnanwerya okhalano yookhovelela ya owiriyana masu oonanara, ophiyerya wi nipacerye opharihela yaawo. Mweeparipari, ntoko Akristu, ninnachuna omuhakalaliha Yehova, mwawiihiiha hannaphwanela opharihela masu oonanara. Nyenya nnaphwanela opharihela yamahala ya oloca mmukhalelo  waphaama—wi nimvuwihe Muluku ahu. Mmwaha yoola nnahaala othokororya mukhalelo wa weerano yeeyo (1) mmuteko woolaleerya, (2) mmithukumano sa muloko ni (3) mu ochekula wahu wa nihiku ti nihiku. Nyenya woopaceryani, hankooni nthokororye ntakhara heeni Yehova onnapwacha yeeyo nnalocaahu.

4. Mwawiiwanana ni Malakiya 3:16, ntakhara heeni Yehova onnapwacha malocelo ahu?

⁴ Mwaalakhanye Malakiya 3:16. Apwanne munnupuwela ntakhara heeni Yehova onahaleiye orepa mu liivuru a “yawuupusherya” masina a yaale malocelo aya anooniherya wi annamoova ni wuupuwelela nsina nawe? Masu ahu annooniherya yeeyo eri mmurimani mwahu. Yesu ooloca: “Eyano enalotxa itxhu seiye isaren’ye mmurimani.” (Mat. 12:34, BNM) Yeeyo nnathanlaahu oloca ennooniherya ti mwawiihai nnamusivelaahu Yehova. Nave Yehova onachuna wi oothene yaale enamusivela epuhe okumi okhala wookhala mu elapo evyaani.

5. (1) Ti mwawihai malapelo ahu aniiwananaaya ni yeeyo nnalocaahu? (2) Ntoko enooniheryiwaaya mu eruku, tiheeni nnaphwanelaahu osuwela vooloca sa masu ahu?

⁵ Mukhalelo nnalocaahu onanwerya wooniherya waakhanle wi Yehova onahaala weemererya malapelo ahu. (Tiy. 1:26) Akina a yaawo ahinamusivela Muluku analoca mmukhalelo woonyeenyeya, woosoosiha murima ni mwa wiirumiha. (2 Tim. 3:1-5) Mweeparipari hiyaano hinnachuna okhala ntoko yaawo. Hiyaano nnachuna omuhakalaliha Yehova ni yeeyo nnalocaahu. Vano apwanne Yehova ahaala osiveliwa ni hiyaano waakhala wi ninnapharihela masu oothamalela ni oosivela mmithukumano sahu Seekristu naari mmuteko woolaleerya nyenya nnaloca mmukhalelo woosoosiha murima ni woohisivela ni amusi ahu vaavaa akina ahinanoonaaya naari oniiwa.—1 Ped. 3:7.

6. Yookhumelela taani yaphaama Kimberly aareiyeno nthowa na opharihela masu awe mmukhalelo waphaama?

⁶ Vaavaa nnapharihelaahu yamahala ya oloca mmukhalelo waphaama, ninnooniherya wi na alapeli a Yehova. Hiyaano ninnaakhaviherya yaale anirukurenrye woona mookwakwaleya ohiyana orivovo variyari va “muchu onaalapa Apwiya ni yoowo ohinaalapa.” (Malak. 3:18) Ela ti yeeyo yeeren’ye ni murokora awiichaniwa Kimberly. * Owo aathanliwa wi alape vamoha  muteko woosikola ni naxikola mukhwaawe. Emanle olapa vamoha, naxikola mukhwaawe aahoona wi Kimberly aari oohiyana ni anaxikola akina. Owo haaloca achu moonanara, aaloca mmukhalelo woosivela nave haaruwana. Naxikola ole aatikhiniheya nave ohoolo waya aapacerya omuhuserya Piipiliya ni Kimberly. Yehova onnasiveliwa vancipale vaavaa nnalocaahu mmukhalelo yoowo onaweeriha achu ochuna ohuserya sa yoowo!

7. Yamahala anyu ya oloca mvahiwaanyu ni Muluku enaphwanela wooceenyeryaani weera eheeni?

⁷ Oothene ahu ninnachuna oloca mmukhalelo yoowo onamucicimiha Yehova ni onanaacameliha wa annihu. Mwawiihiiha hankooni nthokororye mikhalelo mikina soophara muteko seiho inii inikhaviherye otitelela okhala “yootakiherya . . . mmasu.”

8. Yootakiherya taani Yesu onihiyenryeiye vooloca sa mukhalelo owo aaphariheleiye masu awe mmuteko woolaleerya?

⁸ Muloce mooreera murima ni mwa ncicimiho vaavaa munanyeenyeihiwaanyu. Variyari wa orummwa awe, Yesu aahootheriwa wi ari namahapaliwa, namalya, mmoha a alapeli a Satana, muchu yoowo aamunanariha Sapata nave ophiyerya wi yaanaloca wi aanamunyemula Muluku. (Mat. 11:19; 26:65; Luka 11:15; Yoh. 9:16) Nyenya Yesu haawaakhunle moonyeenyeya. Moolikana ni Yesu, hiyaano hannaphwanela waakhula moonyeenyeya naamwi nloceliwe moosoosiha murima. (1 Ped. 2:21-23) Nyenya tahi wookhweya okhala ooreera murima vaavaa akina anannyeenyeihaaya. (Tiy. 3:2) Tiheeni enahala onikhaviherya?

9. Tiheeni enahaala onikhaviherya ovareryela masu ahu mmuteko woolaleerya?

⁹ Vaavaa muchu onooloceleiyeni moowali mmuteko woolaleerya, mweererye ohinyeenyeya. Munna awiichaniwa Sam, ooloca: “Kinneererya wuupuwela mukhalelo muchu owo onachuneiye ohuserya eparipari vooloca sa Muluku ni wuupuwela wi owo onanwerya opaka matorokelo.” Ilukuluku ikina mwaneene a vaate onnakhala oonyeenyeya pahiru nthowa nawi niphin’ye mu elukuluku yoohiphwanelela wa yoowo. Vaavaa nnamphwanyaahu muchu yoowo onyeenyen’ye, nnanwerya opaka yeeyo murokora Lucia onapakeiye. Nnanwerya opaka nivekelo mwawaakuveya, nimvekaka Yehova wi anikhaviherye otitelela okhala oomaaleleya ni ohiloca echu eri yoothene yoohiphwanelela naari moopwaalu.

10. Mwawiiwanana ni 1 Timóteo 4:13, yoolakelela taani nnaphwanelaahu okhalano?

¹⁰ Mukhale muhusiha a mavyakelo. Timoteo aari mulaleeryi Eekristu a mavyakelo, nyenya naamwi hiihaa owo aanaphwanela otitelela oya vahoolo omunepani. (Mwaalakhanye 1 Timóteo 4:13.) Nni niwerye hai okhala ahusiha a mavyakelo mmuteko woolaleerya? Nnaphwanela wiirehereryaka phaama. Ninnathamalela wi nookhalano ikaruma soohiyanahiyana seiho inii  inikhaviherye okhala ahusiha aphaama. Nyuwaano munanwerya ophwanya sooleeliherya sinahala wookhaviheryaani mu eproxura Mwiikhovelelihe Waalakhanya ni Ohusiha ni makupa anii “Mwiivyakihe Mmuteko Woolaleerya” a Okumi ni Muteko Ahu Weekristu—Yoochariha ya Mithukumano. Apwanne munnaphuravo echu orweela wa soolaleeryiwa seiya? Vaavaa nniirehereryaahu phaama, hannakhala oonyeenyeya nave ninnaloca ni murima woothene.

11. Ti mwawihai Akristu akina anakhalaaya ahusiha aphaama?

¹¹ Nnanwerya tho okhala ahusiha aphaama moorweela wa waavarerya akina mmuloko ni ohuserya orweela wa yaawo. Sam, yoowo oromoliwe woopaceryani, aniikoha tiheeni yaaweeriha Akristu akina okhala ahusiha aphaama. Owo aahuserya meerelo aya nave voocharela aaheererya waatakiherya yaawo. Murokora awiichaniwa Talia onnawiriyana moomaleleya mukhalelo anamaloca a miyaha amavyakelo anaperekhaaya miyaha sa achu oothene. Moorweela wa weerano yeeyo, owo oohuserya mukhalelo wa ovaanela miyaha seiho achu anakohaaya wiiliwiili mmuteko woolaleerya.

12. Nikacamiho taani akina aryaayano?

¹² Oothene ahu nnanwerya okhaviherya wi mithukumano sahu sa muloko sikhumelele phaama moorweela wa wiipa vamoha ni operekha maakhulo oorehereryiwa phaama. (Sal. 22:22) Ti woovila wa akina wiipa nari ovaha maakhulo mmithukumano. Hanka nyuwaano? Waakhanle wi ti hiihaa, ohuserya yeeyo yaakhavihenrye akina ohoova wiipa ni ovaha maakhulo mmithukumano enahala wookhaviheryaani.

13. Tiheeni eni yookhaviheryeeni wiipa ni murima woothene mmithukumano?

¹³ Mwiipe ni murima woothene. Nthowa noochuneyaxa na wiipa mmithukumano sahu ori omvuwiha Yehova. Murokora awiichaniwa Sara hiisoona okhala mulipa awiipa aphaama. Nyenya owo aanachuna omvuwiha Yehova ni macipo. Wi aakhwaniherye yeela, vaavaa aarehereryeiye mithukumano, owo aanarehererya tho macipo. Owo aniixakiha ni wiipa macipo nave aaneererya woona wiiwanana orivovo variyari va masu a macipo ni ichu seiho saahaala othokororiwa mmithukumano. Owo ooloca: “Kaawuupuwelaka sa masu yaawo, nkinuukhuwaxa waakhanle wi kinahaala wiipa phaama naari hooye.”

14. Waakhanle wi mwa muchu awuuliwa muru, tiheeni enahaala wookhaviheryaani ovaha maakhulo mmithukumano?

¹⁴ Mvaheke maakhulo ilukuluku soothene. Mweeparipari, ela enanwerya okhala yoovila chiryene wa akina. Talia yoowo oromoliwe woopaceryani onnathariha: “Kinnakhala awuukhuwaxa kaalocaka ohoolo wa achu akina. Mwawiihiiha onnakhala tho woovila wa miyaano ovaha maakhulo.” Nyenya ela henamuhiiha Talia ovaha maakhulo. Vaavaa oniirehereryeiye ntakhara mithukumano, owo onnuupuwela wi naakhulo  noopacerya wa nikoho nnaphwanela okhala nookhuveya ni nooluluwanya. Owo ooloca: “Ela enataphulela wi kinahaala wooniherya wi kohiirehererya wakhala wi naakhulo naka ti nookhuveya, nookhweya ni nooluluwanya, woona wi nlo naakhulo nenlo mulipa aweeciha yoohuserya onachuneiye wi kivahe.”

15. Tiheeni nnaphwanelaahu wuupuwela vooloca sa maakhulo ahu?

¹⁵ Naamwi Akristu yaawo ahiri awuuliwa muru ilukuluku ikina ananwerya woovelela ovaha maakhulo. Ntakhara heeni? Murokora awiichaniwa Juliet onnathariha: “Ilukuluku ikina kinnoovelela ovaha maakhulo nthowa nawi kinoona wi naakhulo naka ti nookhuveyaxa nave tahi nawaakhwanela.” Muupuwele wi Yehova onachuna wi nivaheke maakhulo aphaama yaawo nnaweryaahu. * Owo onnasiveliwa vancipale vaavaa nnapakaahu owetha wahu wi nivahe maakhulo mmithukumano naamwi ilukuluku ikina noovelelaka.

16. Masu a mukhalelo taani nnaphwanelaahu osepa?

¹⁶ Musepe mikhalelo soothene sa “munyemu.” (Éfe 4:31) Ntoko elociwaaya woopaceryani, Mukristu hanaphwanela opharihela masu ooruwana. Nyenya aakhalavo masu makina anooneya ntoko tahi oophuca yaawo tho nnaphwanelaahu okhalano ephoole. Ntoko yootakiherya, nnaphwanela okhalano ephoole wi nihiloce ichu soonanara vaavaa nnalocaahu sa sookhovelela sa achu akina, mahimo naari elapo. Nave tho, hannachuna waaphoreiha akina moorweela wa waalocela masu ooruwana. Munna mmoha onneemererya: “Ilukuluku ikina, kaanaloca ichu seiho kuupuwelaaka wi saari soohakalaliha ni soohinyeenyeiha nyenya mweeparipari iho saari soohisivela ni sawiicela wa akina. Mu iyaakha sincipale, amwaaraka yaakikhaviherya vancipale moorweela wa okileela moovitheya wi ichu ikina seiho kaalocaaka saari soonyeenyeiha ni sawiicela wa yene ni wa akina.”

17. Mwawiiwanana ni Éfeso 4:29, ti mwawiihai nneeraahu naalipihe akina?

¹⁷ Muloce mmukhalelo onahaala waalipiha akina. Mwaakuveleke othamalela ohiya oceenya. (Mwaalakhanye Éfeso 4:29.) Aisarayeli yaakhalano ichu sincipale yaaphwanelaaya othamalela, nyenya wiiliwiili awo yaanaceenya. Wakhala wi ninnaceenya wiiliwiili, nnanwerya tho oweeriha akina okhala ooceenya. Muupuwele wi muchaka woonanara yoowo anamahocela khumi yaaruuhalaaya waahiweeriha ‘Aisarayeli oothene omwaapa Mose.’ (Nam. 13:31–14:4) Nyenya wakhala wi ninnaathamalela akina, eyo enanwerya omukhaviherya mmoha ti mmoha okhala oohakalala. Nnanwerya ororomela wi othamalela yoowo mwaana a Yefite aakheleiye orweela wa asinthamwene awe waanamulipiha vancipale wi awerye waakhwaniherya murici awe. (Amut.  11:40) Sara yoowo oromoliwe woopaceryani, ooloca: “Vaavaa nnaathamalelaahu akina, ninnaweeriha awo wiisoona wi Yehova onnaasivela nave tho ninnaakhaviherya osuwela wi akina mmulokoni annaasivela tho.” Mwawiihiiha mwaavyeke ikari sa waathamalela anna ni arokora anyu.

18. Mwawiiwanana ni Salumu 15:1, 2, ntakhara heeni ninnaphwanela oloca eparipari nave eyo enaphitaanyerya eheeni?

¹⁸ Muloceke eparipari. Hiyaano hanni niwerye omuhakalaliha Yehova wakhala wi hannaloca eparipari. Owo onniica mikhalelo soothene sa wootha. (Masi. 6:16, 17) Naamwi achu ancipale olelo yuupuwelaka wi wootha echu yoophwanelela, hiyaano ninnasepa woona wi Yehova onaloca wi eyo ti yoonanara. (Mwaalakhanye Salumu 15:1, 2.) Mweeparipari, hiyaano ninnasepa oloca sawootha, nyenya tho nnaphwanela osepa oloca ichu seiho inooneya ntoko ti seeparipari nyenya inahaala oweeriha akina okhalano makuchuwelo oohiphwanelela.

19. Echu taani ekina nnaphwanelaahu okhalano ephoole?

¹⁹ Musepe waaloca akina moonanara. (Masi. 25:23; 2 Tes. 3:11) Juliet yoowo oromoliwe woopaceryani, onnathariha mukhalelo waapa onamvolowelaaya. Owo ooloca: “Owiriyana sa waapa ti wooceecheiha, nave onnakeeriha oyeleela omuroromela muchu yoowo onaapa. Opwaha soothene, ti mwawiihai kinasuwelaaka wi owo hanakaapa ni achu akina?” Wakhala wi mohoona wi ochekula woopacerya okhala waapa, mutoroke mwaha owo nave muloce ichu seiho iri soolipiha.—Kol. 4:6.

20. Tiheeni munaphwanelaanyu olakelela weera ni masu anyu?

²⁰ Woona wi nnakhala mu elapo yeeyo achu ancipale anapharihelaaya masu oonanara, nnaphwanela wiilipixerya woona waakhanle wi masu ahu annamuhakalaliha Yehova. Muupuwele wi oloca yamahala yoorweela wa Yehova, nave owo onnapwacha mukhalelo nnapharihelaahu. Owo onahaala onireeliha wakhala wi ninniilipixerya oloca mmukhalelo yoowo onamvuwiha mmuteko woolaleerya, mmithukumano ni mu ochekula wahu wa nihiku ti nihiku. Vaavaa Yehova onahaaleiye otoloxa elapo yeela yoonanara, onahaala okhala wookhweya omucicimiha yoowo ni masu ahu. (Yuda 15) Mwawiihiiha, mukhale oolakelela omuhakalaliha Yehova ni “masu a mwaano [mwanyu].”—Sal. 19:14.