1-2. (1) Eunise aari taani, nave makacamiho taani owo aahoolenleiye ntoko maayi? (2) Mutharihe eruku va ekaapa.

 NAAMWI Piipiliya ahitharihaka sa opatiso wa Timoteo, nnanwerya waanyiherya ohakalala yoowo amamaawe, Eunise, yaaraayano nihiku nenle. (Masi. 23:25) Mwaanyiherye ohakalala yoowo owo areiyeno vaavaa aamonneiye Timoteo eemenle mmaahini. Awo onnatheya vaavaa avovo awe Timoteo, Loisi yeemenlaaya vakhiviru vaya nave epharelanne. Awo onnaphara vachirimani vaavaa Timoteo onaruuweiye mmaahini. Etheyaka awo annapacerya winla, nthowa na ohakalala. Naamwi waari woovila, Eunise aamuhusiha Timoteo omusivela Yehova ni mwanawe, Yesu Kristu. Makacamiho taani owo areiyeno vaavaa eereryeiye omuhusiha mwanawe?

² Timoteo innunwe mu emusi yeeyo yaari yookawanyeya mmalapelo. Atiithi awe yaari Mukiriki nave amamaawe ni avovo awe yaari Ayuta. (Saw. 16:1) Ti yawooneya wi Timoteo ari mwaana vaavaa Eunise ni Loisi yaakhanlaaya Akristu. Nyenya Atiithi awe hiyaakhanle Mukristu. Malapelo taani Timoteo aahaaleiye othanla? Ti yawooneya wi owo hinnunwe wi apake yoolakelela awe. Apwanne aahaala othanla malapelo a Atiithi awe? Apwanne owo aahaala ochariha sookhovelela sa Ayuta seiho aahusihiweiye vaavaa aareiye mwaana? Naari aahaala weemererya okhala oomuchara a Yesu?

3. Mwawiiwanana ni Masiposipo 1:8, 9, ti mwawiihai Yehova onooneiye muteko yoowo asimaayi anapakaaya wi yaakhaviherye anaaya okhala asinthamwene awe?

³ Asimaayi Eekristu olelo, moolikana ni Eunise, annasivela ichoko saya. Opwaha soothene, awo annachuna waakhaviherya anaaya opaka onthamwene woolipa ni Yehova. Nave Muluku ahu a wirimu onnavaha esisapo wiilipixerya waya. (Mwaalakhanye  Masiposipo 1:8, 9.) Yehova ohaakhaviherya asimaayi ancipale waahusiha anaaya omusivela ni omurumeela yoowo.

4. Makacamiho taani asimaayi anahoolelaaya olelo?

⁴ Ti yawunlaana wa maayi ilukuluku ikina wiikoha waakhanle wi anamwanaawe anahaala othanla omurumeela Yehova, hiihaa ntoko Timoteo eenreiye. Opwaha soothene, asitiithi aasuwela mukhalelo elapo ya Satana enaakhinyereryaaya anaaya. (1 Ped. 5:8) Mwawaacererya, asimaayi ancipale aakhalano nikacamiho na waaphuwa anaaya mukhataaya naari ni mulopwana yoowo ohinamulapela Yehova. Ntoko yootakiherya, murokora awiichaniwa Christine * ooloca: “Aiyaka yaari mulopwana aphaama nave yaanasivela echoko ahu, nyenya awo hiyaachuna wi anamwane ahu ekhala Anamoona a Yehova. Miyaano kaaninla ikwaha sincipale, kiikohaka waakhanle wi anaaka yaahaala omurumeela Yehova.”

5. Tiheeni nnahaalaahu othokororya mmwaha yoola?

⁵ Waakhanle wi mwa maayi ori Mukristu, munanwerya waakhaviherya aniinyu omusivela ni omurumeela Yehova hiiha ntoko Eunise eenreiye. Mmwaha yoola, nnahaala othokororya mukhalelo muneeraanyu mucharihe yootakiherya awe ni waahusiha aniinyu orweela wa yeeyo munalocaanyu ni yeeyo muneeraanyu. Nnahaala tho othokororya mukhalelo Yehova onahaaleiye wookhaviheryaani.

6. Ntoko enooniheryiwaaya mu 2 Timóteo 3:14, 15, ti mwawiihai Timoteo aakhanleiye Mukristu?

⁶ Vaavaa Timoteo aareiye mwaana, amamaawe yaapaka owetha waya wi emuhusihe “soorempwa saweela,” seiho Ayuta yiiwexexaaya. Mweeparipari, masuwelelo aya yaari avakhaani woona wi awo hiyaasuwenle echu vooloca sa Yesu Kristu. Naamwi hiihaa, yeeyo Timoteo aahuseryeiye orweela mu Soorempwa yaamukhaviherya osuwela yeeyo yaachuneya wi akhale Mukristu. Nyenya apwanne owo aahaala okhala Mukristu chiryene? Ntoko mmiravo, Timoteo aakhalano owerya wa olakelela waakhanle wi aahaala okhala Mukristu. Moohikhwa minikwa, Timoteo ‘aahusihiwa ororomela’ eparipari vooloca sa Yesu nthowa na wiilipixerya wa amamaawe. (Mwaalakhanye 2 Timóteo 3:14, 15.) Eunise aahakalala vancipale woona wi aamuhusiha mwanawe vooloca sa Yehova naamwi eyo yaari yoovila. Mweeparipari Eunise aakhala mwawiiwanana ni nsina nawe, nenlo nnarweela wa masu anataphulela “ovootha.”

7. Ti mwawiihai Eunise aahaaleiye omukhaviherya mwanawe oya vahoolo amanle opatisiwa?

⁷ Vaavaa Timoteo aapatisiweiye, owo aahaakhwaniherya yoolakelela yoochuneya mu okumi awe. Nyenya Eunise nlelo aanuukhuwa vooloca sa mwanawe amanle opatisiwa. Ti mwawiihai mwanawe aahaaleiye opharihela okumi awe? Apwanne owo aahaala wiivoliiherya mu onthamwene woonanara? Apwanne aahaala oya o exikola yo Atena ni apacerye ororomela mahusiheryo a achu oohiroromela yaawo yaari weiwo? Apwanne owo aahaala omalihaka elukuluku awe, ikuru ni omiravo awe moorweela wa olapa moowetha wi akhale ooreela? Eunise haahaala ompakela soolakelela Timoteo, nyenya aaphwanela omukhaviherya yoowo. Mwawiihai? Owo aaphwanela otitelela omuhusiha mwanawe omusivela vancipale Yehova ni othamalela ichu soothene seiho Yehova ni Yesu yeenraaya wa yaawo ntoko emusi. Tahi wi pahiru asitiithi yaawo ari ookawanyeya mmalapelo tarino makacamiho a waakhaviherya anaaya omusivela Yehova. Naamwi asitiithi ooweeli eri mu eparipari, onanwerya okhala woovila otannya murima wa amiravo wi ekhale alapeli oororomeleya a Yehova. Tiheeni asitiithi anahuseryaaya orweela wa yootakiherya ya Eunise?

8. Ti mwawiihai murokora oneereiye amukhaviherye iyawe ori Namoona a Yehova okhapelela soothowa soomunepani sa anaaya?

 ⁸ Mmuhuseryeke Piipiliya ni aniinyu. Arokora nyu, waakhanle wi asiiyanyu Anamoona a Yehova, Yehova onachuna wi mwaakhaviherye yaawo waahusiha anamwane anyu vooloca sa yoowo. Mukhalelo mmoha wa weerano yeela ori moorweela wa okhaviherya marehereryo a Malapelo a Echoko moohihiyererya. Muloce ichu saphaama vooloca sa malapelo a echoko, nave muupuwele yeeyo munaphwanelaanyu weera wi mweerihe awo okhala oohakalaliha ni oopuheya. Akhweya nyuwaano munanwerya waakhaviherya aiyanyu opaka marehereryo a yoohuserya ya Piipiliya yavameekhaaya. Mwawaaceererya, waakhanle wi anamwane akina ahunnuwa nave ananwerya ophuravo orweela wa yoohuserya sa Piipiliya ya muchu mukhateiye empharihelaka liivuru Mpuhe Okumi Okhala Wookhala! akhweya munanwerya waakhaviherya aiyanyu ovahererya nikhaviheryo nnachuneya.

9. Ti woowi maayi yoowo orino iyawe ahiri Namoona a Yehova oneereiye aphwanyewo nikhaviheryo?

⁹ Asimaayi akina annamuhuserya Piipiliya ni anaaya nthowa nawi aciye naari nthowa nawi iyaya tahi Namoona a Yehova. Waakhanle wi ela enneereya ni nyuwaano, hamunaphwanela okhala awuukhuwaxa. Yehova onahaala wookhaviheryaani. Mpharihele ikaruma soohusihano soophwanelela seiho owo onavahereryeiye orweela mmarehereryo awe wi mwaahusihekeno anamwane anyu. Munanwerya waakoha asitiithi amavyakelo mukhalelo awo anapharihelaaya ikaruma seiha ntakhara malapelo aya a echoko. * (Masi. 11:14) Yehova onanwerya wookhaviheryaani tho olocihana ni anamwane anyu. Munanwerya ovekela wa Yehova mumvekaka wi ookhaviheryeeni opharihela makoho oophwanelela wi musuwele yeeyo anamwane anyu anuupuwelaaya ni mukhalelo aniisoonaaya. (Masi. 20:5) Opaka nikoho nookhweya ntoko nla ‘Nikacamiho taani ntokweene onahoolelaawe oxikola?’ onanwerya opaceryiha ochekula yoowo onahaala wookhaviheryaani osuwela sincipale.

10. Mmikhalelo taani mikina muneeraanyu mwaakhaviherye aniinyu ohuserya vooloca sa Yehova?

¹⁰ Mwaavye ikari sa waahusiha anamwane anyu vooloca sa Yehova. Muloce sa Yehova ni ichu sincipale saphaama seiho owo eenreiye wa nyuwaano. (Malam. 6:6, 7; Isa. 63:7) Ela ti yoochuneya xaxaxa wakhala wi hamunawerya ohuserya wiiliwiili ni anamwane anyu owaani. Christine, yoowo oromoliwe woopaceryani, ooloca: “Nkaarino ikari sawaaca sa oloca sa Yehova, mwawiihiiha kaanapharihela elukuluku eri yoothene kaakhalaakano. Hiyaano naanawerya weeca ni meco naari onwela mwaaceya nave naanaya ekhopela ekina ya ephareya wi niloce sa soopatuxiwa sootikhiniha sa Yehova ni ichu ikina sincipale seiho saahaala waakhaviherya okhala asinthamwene a Yehova. Vaavaa anamwanaaka yinnunwaaya, kahaaceenyerya awo omuhuserya Piipiliya mukhataaya.” Mwawaacererya, muloce ichu saphaama vooloca sa marehereryo a Yehova ni anna ni arokora anyu. Muhiwaakaheke atokweene. Yeeyo munalocaanyu vooloca sa yaawo enanwerya waakhaviherya aniinyu oloca ni yaawo vaavaa anachunaaya nikhaviheryo.

11. Mwawiiwanana ni Tiyako 3:18, ntakhara heeni ti woochuneya otikitherya murecele veechokoni?

¹¹ Mutikitherye murecele vachokoni. Wiiliwiili mooniherye osivela wa aiyanyu ni anamwane anyu. Muloceke ni aiyanyu mmukhalelo woosivela ni mwa ncicimiho nave mwaavyakihe anamwane anyu weerano emohamoha. Vaavaa muneeranyuno yeela, onahaala okhala wookhweya  wa anamwane anyu ohuserya vooloca sa Yehova. (Mwaalakhanye Tiyako 3:18.) Muthokororye yootakiherya ya Jozsef yoowo onarumeela ntoko piyoneera avameekheiye o Romaniya. Vaavaa owo innuweiye, atiithi awe yaaheeriha okhala woovila wa yoowo, amamaawe ni asinnawe omurumeela Yehova. Jozsef oloca: “Amamaaka yaaniilipixerya wi etikitherye murecele vachokoni. Vaavaa apapa aka yaakhalaaya onyeenyeyaxa, amama aka yaanakhala ooreera murima. Vaavaa yoonaaya wi waanakhala woovila wa hiyaano owiiwelela ni waacicimiha atiithi ahu, awo yaanamuthokororya ni hiyaano Éfeso 6:1-3. Voocharela awo yaanaloca mikhalelo saphaama sa atiithi ahu nave yaananikhaviherya wiiwexexa ntakhara heeni nnaphwanelaahu waacicimiha. Eyo yaakhaviherya emusi ahu okhalaka mwa murecele.”

12. Mwawiiwanana ni 2 Timóteo 1:5, yootakiherya ya Eunise yamvolowenle hai Timoteo?

¹² Mwaalakhanye 2 Timóteo 1:5. Eunise aatikitherya yootakiherya yaphaama wa Timoteo. Owo aamuhusiha wi nroromelo neeparipari nnavolowela miteko. (Tiy. 2:26) Moohikhwa minikwa Timoteo aawerya woona wi saweera sa amama awe saaceenyeryiwa ni osivela waya otokweene ntakhara Yehova. Mweeparipari Timoteo aahoona wi omurumeela Yehova waaweeriha amamaawe okhala oohakalala. Yootakiherya ya Eunise yamvolowenle hai Timoteo? Murummwa Paulo aathariha wi Timoteo aakhalano nroromelo noolipa hiihaa ntoko amamaawe. Ela hiyaarimoona weereya. Timoteo aanoona yootakiherya ya amamaawe nave aachenyeryeya ochariha yeeyo. Moolikana, olelo asimaayi ancipale annatannya mirima sa achu a veemusini vaya ‘nari ehilonce.’ (1 Ped. 3:1, 2) Nyuwaano munanwerya weerano emohamoha. Mwawiihai?

13. Ntakhara heeni maayi onaphwaneleiye weeriha wi onthamwene awe ni Yehova okhale mu nipuro noopacerya?

¹³ Mweerihe onthamwene anyu ni Yehova okhala mu nipuro noopacerya. (Malam. 6:5, 6) Ntoko asimaayi akina, nyuwaano muniilipixerya vancipale. Nyuwaano munnavaha elukuluku, ikhorowa, okona ni ichu ikina wi mukhapelele soothowa soomwiilini sa anamwane anyu. Nyenya hamunaphwanela okhala ooweiwaxa mukhapelelaka ichu seiha ophiyerya ohikhalano elukuluku ya okhapelela onthamwene anyu ni Yehova. Ilukuluku soothene mwaavyeke elukuluku ya ovekela mukhatiinyu, yoohuserya ya Piipiliya ya muchu mukhateiye ni mithukumano sa muloko. Mweerano yeela, nyuwaano munahaala olipiha onthamwene anyu ni Yehova nave munahaala otikitherya yootakiherya yaphaama wa emusi anyu ni wa akina.

14-15. Tiheeni muhusenryaanyu orweela wa yootakiherya ya Leanne, Maria ni João?

¹⁴ Muthokororye sootakiherya sa vakhaani sa amiravo yaawo yaahusenrye omusivela ni omuroromela Yehova orweela wa owoona asimamaaya. Mwaana amwaamuthiyana a Christine awiichaniwa Leanne ooloca: “Hinaamuhuserya Piipiliya elukuluku apapa yaakhalaaya owaani. Nyenya amama ilukuluku soothene yaanaya mmithukumano. Naamwi nahaasuwela sincipale vooloca sa Piipiliya, saweera saya saanikhaviherya okhalano nroromelo noolipa. Naasuwela wi ela eparipari naamwi nahaakumve ophiyaka mmithukumano.”

¹⁵ Maria, yoowo Atiithi awe ikwaha ikina yaahooxa aveemusini vaya nthowa na oya mmithukumano, ooloca: “Amamaaka mmoha a arokora oolipa murima yaawo kaasuwenlaaka. Vaavaa kaaryaaka mwaana, ilukuluku ikina kaanakhooca weera ichu nthowa nawi kaanoova yeeyo akina yaahaalaaya oloca. Nyenya moorweela wa woona mukhalelo awo yaaryaaya oolipa murima ni mukhalelo awo ilukuluku soothene  yaamuhelaaya Yehova mu nipuro noopacerya mu okumi aya waakikhaviherya ovootha owoova waka achu.” João, yoowo atiithi awe yaakhwatiiha emusi aya oloca ichu soomunepani veemusini vaya, ooloca: “Akhweya echu yaakikhavihenrye ti yawi Amama aka yaari oolakelela weera echu vyakala wi yaahakalalihe apapa nyenya ohihiya osivela waya ntakhara Yehova.”

16. Yootakiherya ya maayi eni yaavolowele hayi akina?

¹⁶ Asimaayi muupuwele wi yootakiherya anyu ennaavolowela akina. Mwawiihai? Muthokororye mukhalelo yootakiherya ya Eunise yaamvolowenlaaya murummwa Paulo. Owo aarepa wi nroromelo noohiwoka na Timoteo “naari wa . . . Ewuniike.” (2 Tim. 1:5) Ti liini Paulo oonneiye nroromelo na Eunise mu ekwaha yoopacerya? Mwawooneya waari variyari va mukwaha awe woopacerya woomisionariyu vaavaa owo aamusuwenleiye Loisi ni Eunise o Listra, nave akhweya taakhavihenrye okhala Akristu. (Saw. 14:4-18) Pahiru muupuwele: Vaavaa Paulo aamurepenleiye Timoteo—iyaakha 15 ohoolo waaya, owo nivano aanuupuwela miteko sa nroromelo na Eunise nave aamuloca owo ntoko yootakiherya yaphaama nnaphwanelaahu ochariha! Mweeparipari, yootakiherya awe, yaahimulipiha vancipale murummwa Paulo nave tho mwawooneya Akristu ancipale yaakhala mu elukuluku yeele. Waakhanle wi munaaphuwa anamwane mukhatiinyu naari ni muchu a malapelo ookawanyeya, muroromele wi yootakiherya anyu ya nroromelo, ennaalipiha ni waaceenyerya yaale anawoonaani.

17. Tiheeni munaphwanelaanyu weera wakhala wi onooneya ntoko wi aniinyu hanaakhulela ovyakiha wanyu?

¹⁷ Vano hanka wakhala wi aniinyu hanaakhulela  wiilipixerya wanyu? Muupuwele wi omuhusiha mwaana onnamaliha elukuluku yincipale. Ntoko enooniheryiwaaya mu eruku, vaavaa munaalaanyu enuku, nyuwaano munanwerya wiikoha waakhanle wi enahaala wunnuwa ophiyerya okhala mwiri yoowo oni onavahererya sawiima. Naamwi muhisuwelaka wi mwiri owo onahaala ovahaka sawiima, nyuwaano munnatitelela ohela maahi wi owo wunnuwe. (Mar. 4:26-29) Moolikana, ikwaha ikina mayi onanwerya wiikoha waakhanle wi wiilipixerya wawe onnaakhaviherya chiryene anamwane awe omusivela Yehova. Nyuwaano hamuwerya ovareryela soolakelela sa aniinyu. Nyenya wakhala wi munnatitelela opaka soothene munaweryaanyu wi mwaavyakihe yaawo, nyuwaano munahaala waavaha ekari ya okhala asinthamwene a Muluku wakhala wooweryeya.—Masi. 22:6.

18. Ti mwawiihai Yehova oneereiye aakhaviherye anamwane anyu okhala asinthamwene awe?

¹⁸ Opacerya ilukuluku sakhalai, Yehova ohaakhaviherya amiravo ancipale okhala asinthamwene awe. (Sal. 22:9, 10) Owo tho onanwerya waakhaviherya aniinyu wunnuwa omunepani, wakhala wi eyo yoolakelela aya. (1 Kor. 3:6, 7) Naamwi okhalaka wi anamwane anyu hanachuna omurumeela Yehova ni murima woothene, owo onahaala otitela waasivela yaawo. (Sal. 11:4) Wakhala wi awo ahooniherya wi annachuna omuhakalaliha Yehova, owo onahaala okhala oorehereya waakhaviherya yaawo okhala asinthamwene awe. (Saw. 13:48; 2 Math. 16:9) Owo onanwerya wookhaviheryaani oloca echu yoophwanelela mu elukuluku yoophwanelela—vaavaa mwaninyu onachuneiye wiiwa vancipale yeeyo. (Masi. 15:23) Naari owo onanwerya omuceenyerya munna naari murokora oopwacha a mmulokoni wi awooniherye opwacha wa vameekhaaya. Naamwi anamwane anyu yunnunwe nave epwahavo vaate, Yehova onanwerya owuupuxerya yaawo echu yeeyo mwaahusinhaanyu khalai. (Yoh. 14:26) Wakhala wi mootitelela waavyakiha anamwane anyu moorweela wa yootakiherya ni masu, Yehova onahaala wooreelihaani vancipale.

19. Ntakhara heeni munnaphwanela ororomela wi mookhalano weemereryiwa ni Yehova?

¹⁹ Osivela wa Yehova ntakhara nyuwo honarweela mu soothanla seiho anamwane anyu anapakaaya. Owo onnoosivelaani nthowa nawi nyuwaano munnamusivela. Waakhanle wi mwa mayi ori muciye, Yehova onnaroromeliha okhala tiithi a anamwane anyu ni Mwaakiha anyu. (Sal. 68:5) Nyuwaano hamuwerya waakhinyererya aniinyu othanla omurumeela Yehova naari hooye. Nyenya wakhala wi munnatitelela ororomela nikhaviheryo na Yehova ni opaka owetha wanyu, munahaala okhalano weemereryiwa wawe.