1. Tiheeni enanivaha ohakalala wawaaca?

 YEHOVA onachuna wi hiyaano nikhaleke oohakalala. Ninnasuwela yeela nthowa nawi ohakalala mukhalelo mmoha wa yawiima ya munepa waweela. (Gal. 5:22) Woona wi wookhalavo ohakalala wawaaca mu ovaha ohiya mu waakhela, ninnahakalala vancipale vaavaa nnapakaahu owetha wahu mu orummwa ahu ni waakhaviherya annihu mmikhalelo soohiyanahiyana.—Saw. 20:35.

2-3. (1) Ntoko elociwaaya mu Galasya 6:4, ichu taani piili inahaala onikhaviherya otitelela okhalano ohakalala wawaaca mmuteko wa Yehova? (2) Tiheeni nnahaalaahu othokororya mmwaha yoola?

² Ntoko elociwaaya mu Galasya 6:4, murummwa Paulo ooloca ichu piili seiho inahaala onikhaviherya okhalano ohakalala wawaaca. (Mwaalakhanye.) Yoopacerya, yoolakelela ahu enaphwanela okhala omvaha Yehova owetha wahu. Waakhanle wi ninnamvaha owetha wahu, nnaphwanela okhala oohakalala. (Mat. 22:36-38) Nnaphwanela osepa wiilikanyiha ni akina. Moohipwacha yeeyo nnaweryaahu opaka nthowa na okumi ahu, masuwelelo naari mavyakelo ahu, nnaphwanela omuthamalela Yehova. Opwaha soothene, hiyaano naakhenle wa yene echu eri yoothene nryaahuno. Mmukhalelo mukina, wakhala wi akina aakhalano mavyakelo mmakupa vyakala a orummwa onipwaha hiyo, nnaphwanela okhala oohakalala nthowa nawi awo anapharihela mavyakelo aya wi emvuwihe Yehova, ohiya wiivuwiha mukhataaya. Mwawiihiiha ohiya waakhalela nrima nnaphwanela ohuserya orweela wa yaawo.

³ Mmwaha yoola, nnahaala woona tiheeni enahaala onikhaviherya vaavaa nnakhalaahu ooceecheya nthowa nawi hannawerya opaka soothene naachunaahu mu orummwa ahu. Nnahaalatho othokororya mukhalelo nneeraahu nipharihele mavyakelo vyakala akhweya nryaahuno ni yeeyo nneeraahu nihuserye orweela wa sootakiherya sa akina.

4. Tiheeni enaweeriha akina okhala ooceecheya? Mvahe yootakiherya.

⁴ Akina a hiyo hinnawerya opaka soothene naachunaahu mmuteko wa Yehova nthowa nawi nohuuluvala naari nnamwiiceliwa, nave eyo ennanceecheiha. Ela ti yeeyo yeeren’ye ni Karol. Owo aakhalano ekari ya orumeela weiwo waariwo othowa otokweene. Variyari va elukuluku yeele, owo aaneeciha soohuserya sa Piipiliya 35 nave aahaakhaviherya ancipale a yaawo ophiyerya opatisiwa. Karol aakhalano orummwa wa mphurelo! Voocharela owo aahiiceliwa vancipale nave aaphwanela okhala owaani elukuluku yincipale. Karol ooloca: “Kaanasuwela wi nthowa na wiiceliwa, nki kiwerye opaka ichu seiho akina yaaweryaaya opaka, nyenya kaaniisoona wi nkaari Mukristu aphaama ntoko yaawo. Nkaawerya opaka echu eri yoothene kaachunaaka opaka nave eyo yanakeeriha okhala ooceecheya.” Karol aanachuna opaka soothene aaweryeiye ntakhara Yehova. Mweeparipari, ela ti yoothamaleleya! Ninnaroromela wi Muluku ahu ooreera murima onnasiveliwa nthowa nawi owo onnapaka owetha wawe.

5. (1) Tiheeni nnaphwanelaahu wuupuwela wakhala wi okotakota wahu onnanceecheiha? (2) Ntoko enooniheryiwaaya mu eruku, ti mwawiihai munna onavaheiye yeeyo onaweryeiye mmuteko wa Yehova?

⁵ Waakhanle wi ilukuluku ikina munnaceecheya nthowa na okotakota wanyu, mwiikohe: ‘Tiheeni Yehova onachuneiye wa miyaano?’ Yehova onachuna wi mpakeke yeeyo munaweryaanyu mmukhalelo anyu wa hiihaano. Muupuwele ela: Murokora orino iyaakha 80 onnaceecheya nthowa nawi hanawerya opaka sincipale mu orummwa hiihaa ntoko aapakeiye vaavaa areiyeno iyaakha 40. Owo onuupuwela wi naamwi avahaka yeeyo onaweryeiye, eyo henamuhakalaliha Yehova. Nyenya apwanne ela eparipari? Muupuwele wi waakhanle wi murokora ola aanavaha yeeyo aaweryeiye arino iyaakha 40 nave nivano onnavaha yeeyo onaweryeiye ni iyaakha 80, owo hahin’ye opaka owetha wawe. Wakhala wi noopacerya wiisoona wi yeeyo nnapakaahu tahi yawaakhwanela wi nimuhakalalihe Yehova, nnaphwanela wiisuupuserya wi Yehova tonalakelela yeeyo enahaala omuhakalaliha. Waakhala wi ninnapaka owetha wahu, Yehova onahaala oloca wa hiyaano: “Wòhera phama!”—Mulikanyihe ni Mateu 25:20-23, BNM.

6. Tiheeni nnahuseryaahu orweela wa yootakiherya ya Maria?

⁶ Onamukhala wookhweya ohakalala wakhala wi nnatikitheryeya wa yeeyo nnaweryaahu opaka ohiya wa yeeyo nihinaweryaahu opaka. Muthokororye yootakiherya ya murokora oniichaniwa Maria, yoowo orino ereca enamuhiiha opaka sincipale mu orummwa. Woopaceryani owo aanuukhuwa nave aniisona wi hapaka sincipale. Nyenya voocharela owo aahuupuwela sa murokora mukina mmuloko yoowo iiceliwa nave Maria aalakelela omukhaviherya. Maria ooloca: “Kaapaaka marehereryo wi kilaleeryeke ni yoowo nimpharihelaka telefoni ni ikaarata. Ilukuluku soothene naalapaahu vamoha, kaanaphiya owaani kiri oohakalala ni oosiveliwa woona wi koomukhaviherya murokora aka.” Hiyaano tho nnanwerya waaceererya ohakalala wahu wakhala wi ninnatikitheryeya wa yeeyo nnaweryaahu opaka ohiya wa yeeyo nihinaweryaahu opaka. Nyenya hanka wakhala wi ninnawerya opaka sincipale naari ninnakhumelela phaama mmikhalelo mikina sa orummwa ahu wa Yehova?

7. Ekano taani yoophara muteko murummwa Petru aavanheiye Akristu?

⁷ Mu ekaarata awe yoopacerya, murummwa Petru aahaaceenyerya asinnawe opharihela samahala ni mavyakelo vyakala yaaryaayano wi yaalipihe asinthamwene aya a munroromeloni.  Petru oorepa: “Mukhaviheryaneke, muchu ni muchu ni yamahala onnyereriweiye, mukawaka ntoko anamuteko aphaama mahala oohiyana-hiyana a Muluku.” (1 Ped. 4:10) Hannaphwanela woovelela opharihela samahala nryaahuno noovaka wi akina anahaala onikhalelaka nrima naari okhala ooceecheya. Wakhala wi ninneerano yeela, hanni niwerye omvaha Yehova owetha wahu.

8. Mwawiiwanana ni 1 Korinto 4:6, 7, ntakhara heeni nnaphwanelaahu osepa wiirumiha ni samahala seiho nryaahuno?

⁸ Hiyaano ninnachuna vancipale opharihela samahala nryaahuno, nyenya nnaphwanela okhalano ekaasoope wi nihirumiheke nthowa na seiho. (Mwaalakhanye 1 Korinto 4:6, 7.) Ntoko yootakiherya, akhweya nyuwaano munnakhumelela phaama mu opaceryiha soohuserya sa Piipiliya. Nyuwaano hamunaphwanela woovelela opharihela yamahala yeela! Nyenya ti woochuneya wuupuwela wi hamunaphwanela wiirumiha ni yeeyo. Mwaanyiherye wi hiihaanoru mwaakhalano yaweereya yaphaama mmuteko woolaleerya nave mpaceryiha yoohuserya ya Piipiliya. Nyuwaano muri oohakalala nave munnachuna waaleela anna oothene a mu nikhuuru nanyu noolaleerya vooloca sa yeeyo. Vaavaa munakumanaanyu ni yaawo, murokora mukina onnaloca yaweereya awe yeeyo yeerinhe wi avahe yoolaleeryiwa. Owo oovaha yoolaleeryiwa; nyuwaano moopaceryiha yoohuserya. Tiheeni mwaahaalaanyu weera? Moosuwela wi nikhuuru nnahaala olipiheya ni yaweereya anyu, nyenya munanwerya olakelela oweherya elukuluku ekina yoophwanelela wi mwaaleele yaawo, nthowa nawi hamunachuna omuhiciha murokora ovanhe yoolaleeryiwa. Ela enanwerya okhala echu yaphaama ya weerano. Nyenya mmikhalelo soothene hamunaphwanela ohiya opaceryiha soohuserya sa Piipiliya. Nyuwaano mookhalano yamahala—mpharihele yeeyo!

9. Ti mwawiihai nnaphwanelaahu opharihela samahala nryaahuno?

⁹ Nuupuweleke wi mavyakelo oothene nryaahuno samahala soorweela wa Muluku. Nnaphwanela opharihela samahala seiha wi nlipihe muloko, ohiya wiivuwiha aneene meekhihu. (Fil. 2:3) Wakhala wi ninnapharihela ikuru ni mavyakelo ahu wi neere yookhwela ya Muluku, nnahaala okhalano mathowa a ohakalala, ohiya nthowa nawi ninnapaka sincipale waapwaha akina naari weererya okhala aphaamaxa waapwaha akina, nyenya nthowa nawi ninnapharihela samahala nryaahuno wi nimuruuhele Yehova ncicimiho.

10. Ntakhara heeni tahi ya miruku wiilikanyiha ni akina?

¹⁰ Naahikhalano ephoole, nnanwerya olikanyiha ichu nnaweryaahu opaka phaama ni yeeyo  akina ahinaweryaaya opaka phaama. Ntoko yootakiherya, munna onanwerya okhala namaloca aphaama a miyaha. Ela ti yeeyo owo onaweryeiye opaka phaama. Nyenya owo onanwerya wuupuwela wi taphaamaxa ompwaha munna mukina yoowo ohinawerya oloca phaama miyaha. Nyenya munna owo onanwerya okhala aphaama mu owaakhela aleco, waahusiha anaawe naari okhala amvai mmuteko woolaleerya. Ninnahakalala vancipale okhalano anna ni arokora amavyakelo yaawo anapharihela samahala aryaayano wi emurumeele Yehova ni waakhaviherya akina!

11. Ntakhara heeni ninnaphwanela weererya ochariha yootakiherya ya Yesu?

¹¹ Naamwi niphwanelaka osepa wiilikanyiha ni akina, nnanwerya ohuserya vancipale orweela wa alapeli akina a Yehova. Wi niphwanaphwanihe, hankooni nthokororye yootakiherya ya Yesu. Moohiyana ni Yesu hiyaano naachu oohiphaameya, nyenya nnanwerya ohuserya orweela wa mikhalelo sawe saphaama ni ichu sootikhiniha owo aapankeiye. (1 Ped. 2:21) Vaavaa nnapakaahu owetha wahu wi ncharihe yootakiherya awe ophiyerya vaavaa nnaweryelaahuvo, ninnakhala alapeli aphaama a Yehova ni ninnakhumelela phaama mu orummwa ahu.

12-13. Tiheeni nnahuseryaahu orweela wa Mwene Tavite?

¹² Mmasu a Muluku, ninnaphwanyamo sootakiherya sawaaca sa alopwana ni athiyana yaawo nnaphwanelaahu waatakiherya naamwi yaari oohiphaameya. (Ahe. 6:12) Muupuwele sa Mwene Tavite, yoowo Yehova aamwiichanneiye “muchu a vamurimani vaka.” (Saw. 13:22) Nyenya Tavite haari oophaameya. Mweeparipari, owo aapaka soocheka itokweene. Naamwi hiiha, owo yootakiherya yaphaama wa hiyo. Ntakhara heeni? Nthowa nawi vaavaa owo aasameliweiye, heererya wiikuphelela. Ohiya yeeyo, owo aaheemererya ekano yakuru aavahiweiye nave aahicharuwa mweeparipari wa yeeyo aapankeiye. Ntoko yookhumelela, Yehova aahimukhurumuwela.—Sal. 51:3, 4, 10-12.

¹³ Nnanwerya ohuserya orweela wa Tavite moorweela wa wiikoha: ‘Ti mwawiihai kinaakhulelaaka ekano? Apwanne kinneemererya yoohesa aka mwawaakuveya naari kinneererya wiikuphelela? Apwanne kinnaakuvela waaphwanyerya mathowa akina? Apwanne kinneererya ohikookela opaka soohesa imohamoha?’ Munanwerya tho wiipakela makoho mamohamoha vaavaa munaalakhanyaanyu vooloca sa alopwana naari athiyana oororomeleya analociwa Mpiipiliyani. Apwanne awo yaahoolela makacamiho mamohamoha yaawo munahoolelaanyu? Mikhalelo taani saphaama awo  yoonihenryaaya? Mu yaweereya ti yaweereya mwiikohe: ‘Ti mwawiihai kineeraka kikhale ntoko mulapeli yoola oororomeleya a Yehova?’

14. Ti mwawiihai nneeraahu niphure orweela wa waavarerya akhwiihu a munroromeloni?

¹⁴ Nnanwerya tho ophura orweela wa waavarerya akhwiihu a munroromeloni, moohipwacha yaari amiravo naari atokweene. Apwanne munnamuupuwela muchu a mmuloko anyu yoowo onavilela moororomeleya makacamiho—akhweya okhinyererya woosikola, waakaahiwa veemusini naari okumi wookotakota? Apwanne munnoona mikhalelo saphaama mwa muchu owo seiho mwaahaalaanyu osiveliwa otakiherya? Moorweela wa othokororya yootakiherya awe yaphaama, munanwerya ohuserya mikhalelo soophara muteko sa ovilela ni makacamiho anyu. Ninnathamalela vancipale wi anna ni arokora yaala ennanivaha yootakiherya yaphaama ya nroromelo!—Ahe. 13:7; Tiy. 1:2, 3.

15. Ekano taani murummwa Paulo ovanheiye yeeyo enahaala onikhaviherya otitelela okhala oohakalala mmuteko ahu wa Yehova?

¹⁵ Wi ntikitherye murecele ni wiiwanana mmulokoni, oothene ahu nnaphwanela opaka owetha wahu. Muthokororye yootakiherya ya Akristu a mu nsana noopacerya. Awo yaakhalano samahala ni mirici soohiyanahiyana. (1 Kor. 12:4, 7-11) Nyenya eyo hiyeerinhe wi okhalevo okhalelana nrima ni okawanyeya. Ohiya yeeyo, Paulo aamuceenyerya mmoha ti mmoha opaka yeeyo yaachuneya “wi mwiili wa Kristu otikitheryeye.” Paulo aahaarepela Aefeso: “Makupa ni makupa elapaka mookhaviheryana, wi mwiili woothene winnuwe, otikitheryeye mu osivela.” (Éfe. 4:1-3, 11, 12, 16) Oothene yaawo aneerano yeeyo Paulo olonceiye annatikitherya murecele ni wiiwanana—mikhalelo seiho nnoonaahu mmiloko sahu olelo.

16. Tiheeni nnaphwanelaahu olakelela weera? (Ahebri 6:10)

¹⁶ Mukhale oolakelela osepa wiilikanyiha ni akina. Ohiya yeeyo, muhuserye orweela wa Yesu nave mwiilipixerye otakiherya mikhalelo sawe. Mphure orweela wa sootakiherya sa nroromelo sa Mpiipiliyani ni sa mmahiku ahu. Wakhala wi mootitelela opaka owetha wanyu, muroromele wi Yehova “hari oohookololowa; harwa acuwalaru muteko anyu.” (Mwaalakhanye Ahebri 6:10.) Mutitelele okhala oohakalala mmurumeelaka Yehova, musuwelaka wi owo onnathamalela wiilipixerya muneeraanyu ni murima anyu woothene wi mmuhakalalihe.