1. Soolakelela taani soomunepani nnaphwanelaahu otikitherya?

 NTOKO Akristu eeparipari, ninnamusivela vancipale Yehova. Hiyaano nnachuna wi muteko ahu wa yoowo okhala woophwanelela. Nyenya wi nipake echu eri yoothene ntakhara Yehova, nnaphwanela otikitherya soothanla soomunepani, ntoko wunnuwiha mikhalelo Seekristu, ohuserya opaka ichu, ni waavya mikhalelo sa waarumeela akina. *

2. Ntakhara heeni ninnaphwanela otikitherya soolakelela soomunepani ni olapa mwakuru wi nikhwaaniherye?

² Ntakhara heeni nnaphwanelaahu okhalano nchuno na wunnuwa omunepani? Yoopacerya, nnachuna omuhakalaliha Tiithi ahu oosivela a wirimu. Yehova onnahakalala vaavaa onanooneiye nipharihelaka mavyakelo ahu xaxaxa mmuteko awe. Mwawaaceererya, ninnachuna wunnuwa omunepani wi niwerye waakhaviherya moopwacha anna ni arokora ahu. (1 Tes. 4:9, 10) Moohipwacha elukuluku nryaahu mu eparipari, oothene ahu nnanwerya wunnuwa omunepani. Hankooni noone mukhalelo nneeraahu neereno yeela.

3. Ntoko elociwaaya mu 1 Timóteo 4:12-16, tiheeni murummwa Paulo aamuceenyenreiye Timoteo opaka?

³ Vaavaa murummwa Paulo aarempeiye ekaarata awe yoopacerya wa Timoteo, mmiravo yoola aphaama eera ari mutokweene a muloko a mavyakelo. Naamwi hiiha, Paulo aahimuceenyerya otitelela wunnuwa omunepani. (Mwaalakhanye 1 Timóteo 4:12-16.) Elukuluku munaalakhanyaanyu masu a Paulo, munahaala woona wi owo aachuna wi Timoteo innuwe omunepani mmikhalelo miili: moorweela wa wunnuwiha  mikhalelo Seekristu ntoko osivela, nroromelo, wiisuumaaliha ni orehererya mikhalelo ntoko waalakhanya masu, olaka, ni ohusiha. Ni yootakiherya ya Timoteo mmuupuweloni, hankooni noone ti mwawiihai otikitherya soolakelela soophwanelela enanikhaviheryaaya wunnuwa omunepani. Nnahaalatho othokororya mikhalelo mikina nneeraahu nipake wi naaceererye orummwa ahu.

4. Mwawiiwanana ni Filipi 2:19-22, tiheeni yaamweerinhe Timoteo okhala kapuro a Yehova asisapo?

⁴ Tiheeni yaamweerinhe Timoteo okhala kapuro a Yehova asisapo? Mikhalelo sawe saphaama Seekristu. (Mwaalakhanye Filipi 2:19-22.) Orweela wa mukhalelo Paulo omulonceiye Timoteo, nnanwerya woona wi owo aari awiiyeviha, oororomeleya, oowetha ni oohiporora. Owo aari oosivela nave aanaathokororya vancipale anna. Ntoko yookhumelela, Paulo aanamusivela Timoteo nave hoovelela omvaha mirici soovila. (1 Kor. 4:17) Moolikana, Yehova onahaala onisivela nave nnahaala ophariheliwa vancipale mmulokoni wakhala wi nootikitherya mikhalelo seiyo onasiveleiye.—Sal. 25:9; 138:6.

5. (1) Ti mwawiihai nyuwaano mwahaalanyu othariha yoolakelela ya winnuwiha makhalelo Eekristu? (2) Ntoko eruku enooniheryaaya, ti mwawiihai murokora oyeveelavo onooniheryeiye wiilipiserya vaava onalapeiye ni yoolakelela ya wooniherya niphwanya wa alapeli akhwaawe?

⁵ Muthanle yoolakelela yooluluwanya. Muthokororye nnivekelo mikhalelo taani sinaphwanela orehereryiwa. Muthanlele mukhalelo mmoha yoowo nyuwo mwahaalanyu osiveliwa otikitheryeyano. Mwa yootakiherya, apwanne nyuwaano munanwerya otikitherya niphwanya naari nchuno ntokweene na waakhaviherya alapeli akina? Apwanne nyuwaano munaphwanela okhala a murecele ni oolevelela? Munanwerya ophwanya nikhaviheryo moorweela wa omveka nthamwene anyu oororomeleya wi ooleeleeni mikhalelo seiho munaphwanelaanyu orehererya.—Masi. 27:6.

6. Muni nwerye hai wunnuwiha mukhalelo wammoori?

⁶ Mulape wi nwerye okhwaaniherya yoolakelela anyu. Muni mweereno hai yeeyo? Mukhalelo mmoha wa weerano yeeyo ori moorweela wa ohuserya moomaaleleya mikhalelo seiyo munachunaanyu orehererya. Mwaanyiherye wi munachuna okhala ookhurumuwelaxa wa akina. Nyuwaano munanwerya opacerya moorweela mu waalakhanya ni wuupuwelela sootakiherya sa Mpiipiliyani sa achu  yaawo yaalevelenle akina moomalela ni yaawo yahenreno yeeyo. Muthokororye yootakiherya ya Yesu. Owo aanaalevelela akina moomalela. (Luka 7:47, 48) Owo hatikithereya mu soohesa saya nyenya mwa yeeyo yaahaalaaya owerya opaka. Moohiyana, Afarisi a mahiku a Yesu ‘yaanaanyemula akhwaaya.’ (Luka 18:9) Mmanle othokororya sootakiherya seiha mwiikohe: ‘Tiheeni kinoonaaka wa akina? Wa mikhalelo saya tisivi kinatikitheryeyaakano?’ Wakhala wi onnakhala woovila omukhurumuwela muchu, mweererye orepela mikhalelo sawe soothene saphaama. Voocharela mwiikohe: ‘Yesu onamoona hai muchu yoola? Apwanne aahaala omukhurumuwela?’ Mukhalelo yoola wa ohuserya onamunikhaviherya otoroka muupuwelo ahu. Woopaceryani onamuchuneya wiilipiserya wi nimukhurumuwele muchu yoowo oninyeenyeihale. Nyenya wakhala wi ninnatitelela wiilipiserya, moovira wa elukuluku onamukhala wookhweya okhurumuwela.

7. Mwawiiwanana ni Masiposipo 22:29, mmikhalelo taani Yehova onaaphariheleiye yaale anaphara phaama muteko olelo?

⁷ Yoolakelela ekina munaphwanelaanyu otikitherya ori ohuserya opaka ichu. Muupuwele vooloca sa waaca wa awiivelela anachuneya ntakhara otekiwa wa Ipeteli, Ipa sa muthukumano wa ekulucu, ni Ipa sa Omwene. Ancipale a yaawo ahusenrye opaka ichu moorweela wa olapa vamoha ni anna ni arokora a mavyakelo. Ntoko enooniheryiwaaya va eruku, anna ni arokora oothene annahuserya miteko seiyo iri soochuneya wi ekhaviherye orehererya Ipa sa muthukumano wa ekulucu, ni Ipa sa Omwene. Mmikhalelo seiha ni mikina, Yehova Muluku, “Mwene oohimala,” ni Kristu Yesu, “Mwene a mamwene,” annaakhwaniherya ichu sootikhiniha orweela wa yaawo anaphara phaama muteko. (1 Tim. 1:17; 6:15; mwaalakhanye Masiposipo 22:29.) Hiyaano nnachuna olapa mwakuru ni opharihela mavyakelo ahu wi nimucicimihe Yehova, ohiya yeehu mukhatiihu.—Yoh. 8:54.

8. Muni mulakelele hai mavyakelo yaawo munachuna ohuserya?

⁸ Muthanle yoolakelela yooluluwanya. Mavyakelo taani mwaahaalaanyu ohuserya? Mwaakohe atokweene a muloko naari ooweherya a ekulucu vooloca sa mavyakelo taani mwaahaalaanyu wunnuwiha. Ntoko yootakiherya, wakhala wi alonce wi onnachuneya orehererya mukhalelo anyu wa oloca ni ohusiha, mwaakohe wi yookhaviheryeeni woona makupa ooluluwanya munaphwanelaanyu orehererya. Voocharela mulape mwakuru wi nwerye orehererya. Muni mukhwaaniherye hai yeeyo?

9. Muni nwerye hai olapa wi mukhwaaniherye yoolakelela anyu ya ohuserya mavyakelo?

⁹ Mulape wi nwerye okhwaaniherya yoolakelela anyu. Mwaanyiherye wi munachuna okhala muhusiha aphaama. Munaphwanela ohuserya mwawiichaalela eproxura Mwiikhovelelihe Waalakhanya ni Ohusiha. Mwavahiwa nikupa na mithukumano sa veeri va esumana, munanwerya omveka munna a mavyakelo wi awiriyane nikupa nanyu muhaakumve operekha nave oovaheeni sooleeliherya wi mweereno phaama. Murehererye nikupa nanyu woosiilo, hiiha achu anahaala woona wi moolapa mwakuru nave wi mwa muchu oororomeleya.—Masi. 21:5; 2 Kor. 8:22.

10. Mvahe yootakiherya mmukhalelo nneeraahu nihuserye mavyakelo yaawo nnachunaahu wunnuwiha.

¹⁰ Tiheeni munaphwanelaanyu weera wakhala wi mavyakelo yaawo munachunaanyu wunnuwiha ennavolowelavo echu yeeyo eri yoovila opaka? Muhivolole! Munna awiichaniwa Garry haawerya waalakhanya phaama.  Owo onnuupuwela wi aahuuliheya muru vaavaa eerenryeiye waalakhanya moovuwa mmithukumano sa muloko. Nyenya owo aatitelela wiilipiserya wi arehererye. Vano owo olonce wi wanthowa na ovyakiha aakhenleiye, onnawerya operekha miyaha mu Ipa sa Omwene, mithukumano sa ekulucu, ni sa muceche!

11. Hiiha ntoko Timoteo, tiheeni enahaala onikhaviherya waakhela mirici mikina?

¹¹ Apwanne Timoteo aakhala namaloca naari muhusiha aphaamaxa? Piipiliya hanaloca. Nyenya Timoteo aahikhumelela phaama mmurici awe, nthowa nawi aahichariha ekano ya Paulo. (2 Tim. 3:10) Moolikana, wakhala wi nohinnuwiha mavyakelo ahu, nnahaala owerya opaka sincipale mmuteko ahu ntakhara Yehova.

12. Mphunre hai orweela wa miteko sa akina?

¹² Oothene ahu ninnaphura orweela wa miteko sa akina. Vaavaa nnakhalaahu oxipitale ninnathamalela oxekurya wa atokweene yaawo anarumeela mu Makhuuru Aniiwanana ni Exipitali naari Makhuuru Anaaxekurya Areca. Vaavaa nnahoolelaahu nikacamiho mu okumi ahu, ninnathamalela vaavaa mutokweene oopwacha onaavyeiye elukuluku wi aniwiriyane ni onihakararya. Elukuluku nnachunaahu nikhaviheryo va yoohuserya ya Piipiliya, ninnasiveliwa vaavaa piyoneero amavyakelo oneemereryeiye okhala vamoha ni hiyo va yoohuserya ni ovahererya sooleeliherya. Anna ni arokora yaala annahakalala onikhaviherya. Nnanwerya okhalano ohakalala yoola wakhala wi nri ooreheryeya wi naarumeela annihu. Yesu ooloca: “Wookhalavo ohakalala wawaaca mu ovaha, opwaha mu waakhela.” (Saw. 20:35, TNM) Wakhala wi munnachuna opaka sincipale ntakhara Yehova mmikhalelo seiha naari mikina, tiheeni enahala wookhaviheryaani weerano hiihaa?

13. Vaavaa nnatikitheryaahu yoolakelela, tiheeni nnaphwanelaahu wuupuwela?

¹³ Muhitikitherye yoolakelela yeeyo ehiri yooluluwanya. Ntoko yootakiherya, munamuupuwela, ‘Kinnachuna opaka sincipale mmulokoni.’ Nyenya onamukhala woovila osuwela mukhalelo wa waakhwaniherya yoolakelela yeeyo, nave onanwerya okhala woovila osuwela ti liini muneeraanyu mukhwaaniherye yoolakelela yeeyo. Mwawiihiiha muthanle yoolakelela yookwakwaleya ni yooluluwanya. Munanwerya orepela yoolakelela  ni mukhalelo munachunaanyu okhwaaniherya eyo.

14. Ntakhara heeni ninnachuna okhala amvai vaavaa nnatikitheryaahu soolakelela?

¹⁴ Nnachunatho okhala amvai vaavaa nnatikiteryaahu soolakelela. Ntakhara heeni? Nthowa nawi hinnawerya ovareryela ichu inahaala okhumelela. Wi nooniherye: Murummwa Paulo aahikhaviherya opaceryiha miloko mivyaani o epooma yo Tesalonika. Nave moohikhwa minikwa owo aahikhalano yoolakelela ya okhala weiwo wi aakhaviherye Akristu yaale avyaani. Nyenya amwiicani yaahimweeriha Paulo okhuma mu epooma. (Saw. 17:1-5, 10) Waakhanle wi Paulo ootitelela weiwo aahaala waahela annawe va yawoopiha. Nyenya Paulo haahin’ye weererya waakhaviherya. Moohiyana owo aaheera ichu mwawiiwanana ni otorokeya wa mikhalelo. Owo aahimurumiha Timoteo wi aakhaviherye Akristu avyaani o Tesalonika wi ekhale oolipa. (1 Tes. 3:1-3) Mweeparipari Atesalonika yaahitepa ohakalala woona wi Timoteo aari ooreheryeya oyawo.

15. Ti mwawiihai mikhalelo nihinaweryaahu ovareryela inavolowelaaya soolakelela sahu? Mooniherye.

¹⁵ Hiyaano nnanwerya ohuserya orweela wa yaweereya ya Paulo o Tesalonika. Nnanwerya otikitherya yoolakelela, nyenya mikhalelo sahu inanwerya otorokeya nave nihiwerye okhwaaniherya yoolakelela ahu. (Ekle. 9:11) Wakhala wi ti hiiha mmukhalelo anyu, mukhale ooreheryeya otikitherya soolakelela soohiyana hiyana seiyo muneeraanyu nwerye okhwaaniherya. Ti yeeyo aapankeiye mutheli mmoha awiichaniwa Ted ni Hiedi. Nthowa na makacamiho a ekumi awo yaahikhuma o Peteli. Nyenya osivela waya ntakhara Yehova waahiweeriha waavya mikhalelo mikina sa waaceererya orummwa aya. Woopaceryani awo yaahirumeela ntoko mapiyoneero ookilaatheya. Moovira wa elukuluku yaahithanliwa ntoko mapiyoneero avameekhaaya, nave Ted aahivyakihiwa ntoko ooweherya a ekulucu ookhaviherya. Voocharela iyaakha sahikwatelela muteko wa orumeela ntoko ooweherya a ekulucu ookhaviherya. Ted ni Hiedi yaahisuwela wi yaahitepa wuuluvala wi etitelele mmurici yoola. Naamwi yaathananne awo yaahisuwela wi yanwerya omurumeela Yehova mmikhalelo mikina. Ted ooloca: “Hiyaano noohuserya wi nnanwerya omurumeela Yehova mmikhalelo soohiyanahiyana.”

16. Nihuseryo taani nnaphwanyaahu mu Galasya 6:4?

¹⁶ Hiyaano hinnavareryela ichu soothene ineereya mu okumi ahu. Mwawiihiiha ti yookhweleya ohuupuwela wi nookhalano esisapo wa Yehova pahiru nthowa na mirici nryaahuno, nave hinnaphwanela wiilikanyiha ni akina yaawo arino mirici seiho nihiraahuno. Hiedi oothariha: “Muchu onnayelela murecele vaavaa onalikanyiheiye okumi awe ni yeeyo eneereya  mu ikumi sa akina.” (Mwaalakhanye Galasya 6:4.) Ti woochuneya waavya mikhalelo sa waakhaviherya akina ni omurumeela Yehova. *

17. Tiheeni muneeraanyu mpake wi mphwanelele mirici sa orumeela?

¹⁷ Mukhale ooreheryeya ntakhara mirici sa orumeela moorweela wa okhweiha okumi ni osepa ivaale soohiphwanelela. Mutikitherye soolakelela ikhaani seiyo inahaala wookhaviheryaani okhwaaniherya soolakelela itokweene. Ntoko yootakiherya, waakhanle wi yoolakelela anyu etokweene ori orumeela ntoko piyoneero ookilaatheya, apwanne munanwerya orumeela ntoko piyoneero ookhaviherya mweeri ti mweeri ovinyerya hiihaano? Wakhala wi yoolakelela anyu ori orumeela ntoko murummwa oorumeela, apwanne mwanwerya omaliha elukuluku yincipale mmuteko woolaleerya ni waasekurya awiiceliwa ni awuuluvala a muloko anyu? Saweereya muneeraanyu mphwanye hiihaano inanwerya ohula milako ntakhara mirici sa orumeela muhoolo. Mukhale oolakelela opaka owetha wanyu mmurici vyakala muneeraanyu mwaakhele.—Aro. 12:11.

18. Ntoko enooniheryiwaaya va eruku, tiheeni nnahuseryaahu orweela wa yootakiherya ya Beverley?

¹⁸ Wuuluvala honanihiiha otikitherya ni waakhwaniherya soolakelela soomunepani. Ntoko yootakiherya, muthokororye yootakiherya ya murokora a iyaakha 75 oniichaniwa Beverley. Owo aahikhalano makacamiho ookumi yaamweeriha okhala woovila weeca. Nyenya owo aanachuna opaka makupa mmukipici wa Yawuupuserya. Mwawiihiiha aahitikitherya soolakelela sooluluwanya. Vaavaa Beverley aakhwanihenryeiye soolakelela sawe, aahitepa ohakalala. Wiilipiserya wawe waahaaceenyerya akina olapa moowetha. Yehova onnavaha esisapo muteko wa anna ni arokora awuuluvala, naamwi mikhalelo saya ihiweemereryaka opaka sincipale.—Sal. 71:17, 18.

19. Soolakelela taani ikina soomunepani nnaphwanelaahu otikitherya?

¹⁹ Mutikitherye soolakelela seiyo muneeraanyu nwerye waakhwaniherya. Mutikitherye mikhalelo inahaala omuhakalaliha Yehova. Muhuserye miteko seiyo inahaala oweerihaani ophariheliwa phaama ni Muluku ni marehereryo awe. Mwaavye mikhalelo sa waarumeela mwawaakhwanela anna ni arokora. * Moolikana ni Timoteo, ni mareeliho a Yehova ‘oothene anamoona winnuwa wa murima anyu.’—1 Tim. 4:15.