Olipela ori “oloca mwaha mutokweene naari ororomeliha weerano echu, nto wiiliwiili wakhala wi ninnamuromola Muluku . . . ntoko namoona.” Ela enanwerya weereya moorweela wa oloca masu naari orepa.

Akina ananwerya wuupuwela wi ti yoonanara olipela woona wi Yesu ooloca: “Muhilipeleru . . . Oloca wanyu ekhaleke: Aayi, aayi; hooye, hooye. Masu oothene anapwaha vaava, anarwela wa oonanara owo.” (Mat. 5:33-37) Mweeparipari, Yesu aanasuwela wi Nlamulo na Mose naanachuna wi Aisarayeli elipeleke mmikhalelo mikina ntoko alapeli akina oororomeleya a Muluku yeeraaya. (Map. 14:22, 23; Muk. 22:10, 11) Owo tho aasuwela wi Muluku mwaneene onnalipela. (Ahe. 6:13-17) Mwawiihiiha Yesu haachuna oloca wi hannaphwanela olipela. Ohiya yeeyo, Yesu aalopola achu wi ehilipeleke mmiyaha soohichuneyasa naari sihirino yoolakelela aya ene. Waakhwaniherya masu ahu nnaphwanela woonaka ntoko echu yavameekhaaya. Nnaphwanela waakhwaniherya yeeyo nloncaahu.

Mwa yeeyo, tiheeni nnaphwanelaahu weera wakhala wi noovekiwa olipela? Voopacerya, munaphwanela ororomela wi munahaala waakhwaniherya yeeyo muroromelinhaanyu. Wakhala wi hamunaroromela, yaamukhala yaphaama ohilipela. Masu a Muluku annanlopola: “Ohihiye eyano aa wi yoochekihe.” (Ekle. 5:5) Voocharela, muthokororye malakiheryo a Mpiipiliyani yaawo analoca sa olipela, nave voocharela mweerevo echu mwawiiwanana ni yawuupuxerya ya murima anyu evyakihiwe ni Piipiliya. Taavi ari makina a malakiheryo yaala a Mpiipiliyani?

Olipela okina honavaanyihana ni yookhwela ya Muluku. Ntoko yootakiherya, Anamoona a Yehova annaroromelihana vaavaa anathelanaaya. Ororomelihana yoola, mukhalelo mmoha wa olipela. Mulipa oothela ni ootheliwa annaroromeliha vamiithoni va Muluku ni vamiithoni va anamoona wi anahaala osivelana, okhapelelana ni ocicimihana mukina ni mukhwaawe, nave wi anahaala weerano eyo “mu elukuluku yoothene eneeraaya ekhale akumi.” (Atheli akina ananwerya ohiloca masu yaala mooluluwanya, nyenya nlelo awo aapaka yoororomeliha vamiithoni va Muluku.) Ovinyerya vaava, awo annakhala mulopwana othenle ni muthiyana otheliwe, nave anaphwanela otitelela mu othela mu ekumi aya yoothene. (Map. 2:24; 1 Kor. 7:39) Yoororomeliha yeela ti yoophwanelela nave enniiwanana ni yookhwela ya Muluku.

Olipela okina honiiwanana ni yookhwela ya Muluku. Mukristu eeparipari hanaphwanela opaka olipela wa mikhalelo mikina, ntoko waakiha elapo awe ni akapuchi naari okhooca nroromelo nawe mwa Muluku. Weerano yeela, yaahaala ovuhana ni malamulo a Muluku. Akristu ‘hari a elapo ya vathi,’ mwa yeeyo hannaphwanela wiivoliiherya mmiyaha saya ni owaniha ekhoco.—Yoh. 15:19; Isa. 2:4; Tiy. 1:27.

 Olipela okina oniiwanana ni yawuupuxerya-ya-murima. Mu ilukuluku ikina onamuchuneya waalikhela moopwacha olipela wahu mwawiiwanana ni ekano ya Yesu eni: “Mveleele wa Kaisara ichu sa Kaisara, nave mveleele wa Muluku ichu sa Muluku.”—Luka 20:25.

Ntoko yootakiherya, mwaanyiherye wi Mukristu onnapharihela itukumento naari pasaporti nave onnasuwela wi owo onavekiwa wi alipele vamiithoni va alamuleli. Wakhala wi mu elapo eyo olipela vamiithoni va alamuleli onaphitaanyerya ororomeliha opaka echu enavuhana ni malamulo a Muluku, yawuupuxerya-ya-murima awe evyakihiwe ni Piipiliya hiyaahaala omweemererya weerano eyo. Mwawiihiiha, alamuleli ananwerya otoroka masu a olipela wi ekhale mwawiiwanana ni yawuupuserya ya murima ya Mukristu.

Opharihela masu makina a olipela yaawo anarweela wa alamuleli onanwerya wiiwanana ni nlakiheryo nnaphwanyeya mu Aroma 13:1, nenlo nni: “Achu oothene yaacicimiheryeke asitokweene anlamula.” Mwawiihiiha Mukristu onanwerya olakelela wi hiyaavo yoonanara vooloca sa ororomeliha opaka echu yeeyo Muluku onachuneiye wi Akristu yeereke.

Ti woochuneya tho opharihela yawuupuserya ya murima anyu evyakihiwe ni Piipiliya wakhala wi moovekiwa opharihela echu naari weera echu yammoori vaava munapakaanyu olipela. Aroma ni achu akina akhalai yaanapharihela mukhataaya wi epake yoororomeliha epharihelaka eneneeryo ya muluku akhoco yooniheryaka wi yoororomeliha aya ti yeeparipari. Akriki yaanatheteya matata aya wirimu vaavaa yaalipelaaya. Mwawiihiiha, awo yaanasuwela wi wirimu ookhalawo muchu yoowo onasuwela yeeyo nnalocaahu, nnapakaahu ni muchu eenreno.

Mweeparipari, mulapeli a Yehova hanaphwanela olipela wa eneneeryo ya elapo vyakala, eniiwanana ni malapelo atheru. Nyenya tiheeni munaphwanelaanyu weera wakhala wi mwa malamulo, moovekiwa omukuherya ntata nanyu Piipiliya wi mvahe onamoona weeparipari? Mmukhalelo yoola, munanwerya olakelela weerano yeeyo, woona wi Soorempwa sinnanleela sa akapuro oororomeleya yaawo yaalipela epharihelaka ineneeryo. (Map. 24:2, 3, 9; 47:29-31) Ti woochuneya wuupuwela wi wakhala wi moolipela, munaroromeliha wi echu muloncaanyu munamweerano. Munaphwanela okhala ooreheryeya wi mwaakhule moororomeleya nikoho vyakala nenlo muneeraanyu mukohiwe.

Woona wi ninnavaha esisapo onthamwene ahu ni Yehova, nnaphwanela ovekela ni wuupuwela moopwacha olipela vyakala nnavekiwaahu opaka. Nave nroromele wi oolipela owo honi onanarihe yawuupuserya-ya-murima ahu naari honavuhana ni malakiheryo a Piipiliya. Wakhala wi moolakelela olipela, munaphwanela ororomela wi munahaala waakhwaniherya.—1 Ped. 2:12.