1. Ti mwawiihai mmiravo mmoha oonihenryeiye nroromelo nawe mu ewehereryo ya oviihiwa mookhwani?

 MMIRAVO mmoha awiichaniwa Mateyu, ookhalano nikacamiho ntokweene na okumi, mwawiihiiha, owo ompaka operasau mu ikwaha sincipale. Vaavaa aareiyeno iyaakha thanu napiili, owo ni emusi awe yaamoona Broadcasting^®. Omakuchuwelo wa prokrama yoole, awo yaahoona ncipo mvyaani na mweeri yoole nenlo naaloca sa owaakhela oosiveliwa yaale yaakhwile eviihiwaka mookhwani. b Omakuchuwelo wa prokrama yoole, Mateyu aahiwaacamela asitiithi awe, apharela matata aya, nave aloca: “Papa, Mama, mohoona? Naamwi kikhwile kinahaala oviihiwa mookhwani. Nyuwaano munaphwanela okiweherya, ichu inamukhala phaama.” Munnaanyiherya mukhalelo asitiithi yaale yiisonnaaya vaavaa yaasuwenlaaya wi mwanaya ookhalano nroromelo noolipa mu ewehereryo ya ovinya mookhwani?

2-3. Ntakhara heeni ti waphaama wa hiyo wuupuwelela yoororomeliha ya ovinya mookhwani?

² Ti waphaama wa hiyo wuupuwelela sa yoororomeliha ya Mpiipiliyani vooloca sa oviihiwa mookhwani omwaahiyu. (Yoh. 5:28, 29) Ntakhara heeni? Nthowa nawi hinrwa nsuwela ti liini nneeraahu nikhaleno nikacamiho ntokweene na okumi naari omuyeleela oosiveliwaahu mookhwani moohiwehereryeya. (Ekl. 9:11; Tiy. 4:13, 14) Ewehereryo ahu ya ovinya mookhwani enanwerya onikhaviherya ovilela makacamiho yaawo. (1 Ate. 4:13) Soorepa sinnaniroromeliha wi Tiithi ahu a wirimu onnanisuwela phaama nave onnanisivela vancipale. (Luka 12:7) Yehova Muluku ahu onnanisuwela phaamaxa wi aniviihe mookhwani ni omuchu ahu ni muupuwelo mamohamoha. Woona wi Yehova onnanisivela vancipale, oonivaha ekari wi naakhele okumi woohimala. Naamwi nikhwile owo onahaala oniviiha mookhwani!

³ Mmwaha yoola, woopaceryani nnahaala othokororya ntakhara  heeni nneemereryaahu yoororomeliha yeela ya oviihiwa mookhwani. Voocharela nnahaala othokororya yaweereya ya Mpiipiliyani yoolipiha nroromelo nahu yeeyo enaphwanyeya mmasu a yoorepa eri mathipelo a mwaha ahu yoola: “Munnaa onamvinya mookhwani.” (Yoh. 11:23) Vookuchulani, nnahaala ohuserya mukhalelo wa wunnuwiha nroromelo nahu mu eweheryeryo ya ovinya mookhwani.

4. Wi neemererye yoororomeliha, tiheeni nnaphwanelaahu olekecheyano? Mphwanaphwanihe.

⁴ Wi neemererye yoororomeliha vyakala, nnaphwanela olekecheya wi muchu opanke yoororomeliha yeeyo ookhalano nchuno, hiihaa ntoko owerya naari mavyakelo a waakhwaniherya yeeyo. Wi niphwanaphwanihe: Mwaanyiherye wi empa anyu yoonanarihiwa vancipale ni echeku etokweene. Nthamwene anyu onnarwa wa nyuwo nave oororomelihaani ariki: ‘Kinahaala wookhaviheryaani orehererya empa anyu.’ Owo toororomeleya nave moolekecheya wi ookhalano nchuno na wookhaviheryaani. Wakhala wi owo mulipa ooteka amavyakelo nave ookhalano ikaruma soochuneya, munnasuwela tho wi ookhalano owerya wa wookhaviheryaani. Mwawiihiiha munnaroromela yoororomeliha awe. Vano, hanka vooloca sa yoororomeliha ya Muluku ya ovinya mookhwani? Apwanne owo okhalano nchuno ni owerya wa waakhwaniherya yeeyo?

5-6. Ntakhara heeni nnaroromelaahu wi Yehova ookhalano nchuno na waaviiha achu mookhwani?

⁵ Apwanne Yehova ookhalano nchuno na waaviiha achu akhwile? Chiryeene ookhalano. Owo aahaaveerela oomurepa ancipale a Piipiliya wi erepe yoororomeliha awe ya waaviiha achu mookhwani omwaahiyu. (Yes. 26:19; Ose. 13:14; Wup. 20:11-13) Nave vaavaa Yehova onapakeiye yoororomeliha, owo ilukuluku soothene onnaakhwaniherya yeeyo. (Yos. 23:14) Mweeparipari, Yehova onnachuna ni murima woothene waaviiha achu akhwile. Ntakhara heeni nnalocaahu yeela?

⁶ Muupuwele vooloca sa masu a Yupu. Owo aanaroromela wi naamwi aakhwile, Yehova aahaala ochuna omoona wanaawiili. (Yupu 14:14, 15) Yehova onnachuna waaviiha yaawo mookhwani eri akumi ni oohakalala. Hanka vooloca sa apilyawu a achu yaawo akhwile ehirino ekari ya ohuserya eparipari vooloca sa Yehova? Muluku ahu oosivela onnachuna tho waaviiha yaawo. (Saw. 24:15) Owo onachuna wi awo ekhaleno ekari ya okhala asinthamwene awe ni opuha okumi okhala wookhala veelaponi yavathi. (Yoh. 3:16) Moohikhwa minikwa, Yehova ookhalano nchuno na waaviiha achu akhwile.

7-8. Ntakhara heeni nnaroromelaahu wi Yehova ookhalano owerya wa waaviiha yaale akhwile?

⁷ Apwanne Yehova ookhalano owerya wa waaviiha achu mookhwani? Moohikhwa minikwa, ookhalano! Owo ta “Ikuro Soothene.” (Wup. 1:8) Ookhalano ikuru sawaakhwanela sa omutoloxa mwiicani vyakala, ophiyerya tho okhwa. (1 Ako. 15:26) Ninnaphwanya nlipiho ni nihakararyo voosuwela yeela. Muthokororye yaweereya ya Murokora Emma Arnold. Owo ni emusi awe, nroromelo naya naaheehiwa vancipale variyari va Ekhoco Yanaawiili ya Elapo Yoothene. Wi amuhakararye mwanawe nthowa na waayeleela oosiveliwaaya mookhwani onipuro na alipa oophariwa o Nasi, owo aahiloca: “Waakhanle wi achu akhwile herwa ekookela okhala akumi, eyo enataphulela wi mwiicani ahu, okhwa, tooweryaxa ompwaha Muluku. Nyenya ela tahi eparipari.” Chiryeene, hiyaavo echu eri yooweryaxa ompwaha Yehova! Muluku a ikuru soothene, yoowo opatunxe okumi, ookhalano owerya wa okookiherya okumi wa yaale akhwile.

⁸ Noosuwela tho wi Yehova ookhalano owerya wa waaviiha achu akhwile nthowa nawi muupuwelo awe honakota. Owo onniichana etheneeri ti etheneeri ni nsina naya. (Yes. 40:26) Owo tho onnawuupuwela yaale akhwile. (Yupu 14: 13; Luka 20:37, 38) Mookhweya onanwerya wuupuwela sooleeliherya soothene vooloca sa yaale onahaaleiye waaviiha mookhwani, ophitaanyerya mukhalelo yaaryaaya ni omuchu aya, saweereya sa okumi aya ni muupuwelo aya.

9. Ntakhara heeni munaroromelaanyu yoororomeliha ya Yehova ya ovinya mookhwani omwaahiyu?

⁹ Nnanwerya ororomela yoororomeliha ya Yehova ntakhara ovinya mookhwani omwaahiyu nthowa nawi noosuwela wi owo ookhalano nchuno ni owerya wa waakhwaniherya yeeyo. Muthokororye nthowa nikina na ororomela yoororomeliha ya Muluku ya waaviiha achu akhwile: Yehova oheerano yeela. Mu ilukuluku sa khalai, owo aahaavaha owerya alopwana oororomeleya avakhaani, ophitaanyerya Yesu wi yaaviihe alipa ookhwa. Vano hankooni nthokororye yaweereya emoha ya ovinya mookhwani yaapakiwe ni Yesu enaphwanyeya mu Yohani ekapitulu 11.

10. Tiheeni yeeren’ye ni Yesu vaavaa aalaleeryeiye okhopela wa Yortano arwaaka o Petaniya, nave tiheeni aapankeiye? (Yoh. 11:1-3)

¹⁰ Mwaalakhanye Yohani 11:1-3. Mwaanyiherye yeeyo yeeren’ye o Petaniya omakuchuwelo wa eyaakha ya 32 E.K. Yesu aahikhalano asinthamwene awaacameleya mu epooma yeele—Lasaro ni arokorawe eeli, Mariya ni Marta. (Luka 10:38-42) Nyenya Lasaro aahiiceliwa nave arokorawe yaakhala awuukhuwa. Awo yaarumiha michaka wa Yesu, yoowo aari makupa makina o Yortano, mukwaha yoowo onamaliha mahiku meeli ni meco muchu akhumaka o Petaniya. (Yoh. 10:40) Moothananiha, Lasaro aahikhwa mu elukuluku yeeyo anamichaka yaamphwannyaaya Yesu. Naamwi Yesu aasuwenle wi nthamwene awe okhwa, aahititelela okhala weiwo mahiku meeli awaaceereryeya nave voocharela aacimula ayaaka o Petaniya. Mwawiihiiha vaavaa Yesu aaphin’yeiye, Lasaro iiha amalinhe mahiku maxexe vaavaa aakhwileiye. Yesu aahaala opaka echu emoha yeeyo yaahaala oruuha mphurelo wa asinthamwene awe ni ncicimiho wa Muluku.—Yoh. 11:4, 6, 11, 17.

11. Nihusiheryo taani vooloca sa onthamwene nnahuseryaahu mu yaweereya yeela?

¹¹ Ninnahuserya nihusiheryo vooloca sa onthamwene mu yaweereya yeela. Muthokororye: Vaavaa Mariya ni Marta yaaruminhaaya michaka wa Yesu, awo hiyamvenke wi aye o Petaniya. Awo yaalonce pahiru wi nthamwene awe oosiveliwa aamwiiceliwa. (Yoh. 11:3) Vaavaa Lasaro aakhwileiye, Yesu aanwerya omviiha mookhwani ari ocaiwene. Nto Yesu aathanlile oya o Petaniya wi akhale ni asinthamwene awe Mariya ni Marta. Apwanne mookhalano nthamwene yoowo aahaala wookhaviheryaani naamwi muhimvenke? Moosuwela wi munanwerya omuroromela yoowo wi ookhaviheryeeni mu ‘ilukuluku sawuukhuwa.’ (Mas. 17:17, PMM) Ntoko Yesu, nnaphwanela okhala nthamwene aphaama wa akina! Vano hankooni nikookele waalikhela yaweereya ni woona yeeyo yeeren’ye voocharela.

12. Tiheeni Yesu aamuroromelinheiye Marta, nave ntakhara heeni aaroromenleiye yoororomeliha yeeyo? (Yoh. 11:23-26)

¹² Mwaalakhanye Yohani 11:23-26. Marta aahisuwela wi Yesu aanaacamela o Petaniya. Mwawaakuveya aaya wa Yesu nave aloca: “Pwiya, mwaari wenno, munnaka hakaakhwile.” (Yoh. 11:21) Mweeparipari, owo aanwerya ompenuxa  Lasaro. Nyenya Yesu aachuna opaka echu yootikhinihaxa opwaha ompenuxa. Owo aahimuroromeliha: “Munnaa onamvinya mookhwani.” Yesu tho aahimvaha Marta nthowa ntokweene na weemererya yoororomeliha awe, vaavaa aalonceiye: “Miyaano ka ovinya mookhwani ni okumi.” Muluku omvaha Yesu owerya wa waaviiha alipa ookhwa. Woopaceryani, owo aahimviiha nahano mmoha mu elukuluku vakhaani amanle okhwa nave tho aahimviiha mmiravo, mwawooneya, mu nihiku nimohamoha aakhwileiye. (Luka 7:11-15; 8:49-55) Apwanne aanwerya omviiha muchu yoowo aamalinhe mahiku maxexe akhwile nave mwiili awe waapacenrye wuuca?

13. Ntoko etharihiwaaya mu Yohani 11:32-35, ti mwawiihai Yesu aakhulenleiye vaavaa aamonneiye Mariya ni akina yinlaka? (Moone tho eruku.)

¹³ Mwaalakhanye Yohani 11:32-35. Mwaanyiherye yeeyo yeeren’ye voocharela. Mariya, murokora mukina a Lasaro aaya tho wa Yesu. Owo aahuuluulela yeeyo murokora awe aalonceiye: “Pwiya, mwaari wenno, munnaka hakaakhwile.” Owo ni akina yaari ni yoowo yaari oothananaxa. Vaavaa aawoonneiye ni owiiwa yinlaka, Yesu aathanana vancipale. Aceenyeryiwaka nniphwanya wa asinthamwene awe, owo tho aahinla. Owo onniiwexexa wiicela nnakhalaahuno vaavaa oosiveliwaahu onakhweiye. Mweeparipari, onnachuna ni murima woothene oviihavo yeeyo enatannya miithori!

14. Tiheeni nnahuseryaahu vooloca sa Yehova oorweela mmukhalelo Yesu aakhulenleiye vaavaa Mariya inleiye?

¹⁴ Mukhalelo Yesu aakhulenleiye vaavaa aamonneiye Mariya inlaka, ennanihusiha wi Yehova, Muluku a niphwanya ntokweene. Ntakhara heeni nnalocaahu yeela? Ntoko nonnaahu mmwaha ovirale, Yesu onnooniherya moophaameya muupuwelo ni miyoonelo sa Atiithi awe. (Yoh. 12:45) Yesu aahinla nthowa nawi aanamoriwa ikharari ni asinthamwene awe yaale yinla. Mwawiihiiha, noosuwela tho wi Yehova onnamoriwa ikharari vaavaa onanooneiye ninlaka. (Sal. 56:8) Apwanne ela henooceenyeryaani omwaacamela Muluku ahu a niphwanya?

15. Ntoko etharihiwaaya mu Yohani 11:41-44, tiheeni yeeren’ye o nihiye na Lasaro? (Moone tho eruku.)

¹⁵ Mwaalakhanye Yohani 11:41-44. Yesu aaphiya omahiye aavithiwewo Lasaro nave aaveka wi nluku nenlo naawala nihiye niviihiwevo. Marta aahaakaaha alocaka wi woonaru mwiili awe waahipacerya wunkha. Yesu aahaakhula  ariki: “Nkooleenle wi waroromela onamoona ncicimiho na Muluku?” (Yoh. 11:39, 40) Voocharela, Yesu aaviiha miitho awe nave avekela variyari va muloko yoowo waari vaavale. Owo aachuna omvaha Yehova ncicimiho noothene wa yeeyo yeeren’ye voocharela. Yesu aahiloca ni masu oovuwa ariki: “Lasaro, khuma!” Nave Lasaro aahikhuma mu nihiyeni! Yesu aahimala opaka echu yeeyo akina yuupuwelaaya wi hiyaari yooweryeya.—Moone enoota ya ohuserya ya mu Yohani. 11:17, a Ekunya.

16. Ti mwawiihai yaweereya enaphwanyeya mu Yohani 11 enalipihaaya nroromelo nahu mu ewehereryo ya ovinya mookhwani?

¹⁶ Yaweereya enaphwanyeya mu Yohani ekapitulu 11 ennalipiha nroromelo nahu mu ewehereryo ya ovinya mookhwani. Mwawiihai? Muupuwele yoororomeliha ya Yesu wa Marta: “Munnaa onamvinya mookhwani.” (Yoh. 11:23) Ntoko Atiithi awe, Yesu ookhalano nchuno ni owerya wa waakhwaniherya yoororomeliha yeeyo. Miithori awe aahooniherya wi owo ookhalano nchuno na waaviiha achu mookhwani ni oviihavo wiicela woothene okhwa onaaruhelaaya achu. Nave mu elukuluku Lasaro aakhumeiye mmahiyeni, Yesu aahooniherya wanaawiili wi ookhalano owerya wa waaviiha achu akhwile. Nave tho muupuwele vooloca sa yeeyo Yesu aamuupuxenreryeiye Marta: “Nkooleenle wi waroromela onamoona ncicimiho na Muluku?” (Yoh. 11:40) Nookhalano mathowa aphaama a weemererya wi Muluku onahaala waakhwaniherya yoororomeliha awe ya waaviiha alipa ookhwa. Mwawiihiiha, tiheeni nnaphwanelaahu weera wi nlipihe nroromelo nahu mu ewehereryo yeela?

17. Tiheeni nnaphwanelaahu wuupuwelela vaavaa nnaalakhanyaahu saweereya sa Mpiipiliyani vooloca sa ovinya mookhwani?

¹⁷ Mwaalakhanyeke nave muupuweleleke vooloca sa ovinya mookhwani weeriweno khalai. Mpiipiliyani sookhalamo saweereya thanu nararu sa achu yaawo yaaviihiwe wi ekhaleke veelaponi yavathi. c Munoona hai ohuserya saweereya seiho mwawiiseela? Vaavaa muneeraanyuno yeela,  muupuwele wi awo achu yaakhanle—alopwana, aathiyana ni anamwane. Moone yeeyo munahuseryaanyu. Muupuwele vooloca sa mukhalelo yootakiherya emoha ti emoha enooniheryaaya wi Muluku ookhalano nchuno ni owerya wa waaviiha alipa ookhwa. Opwaha soothene, muupuwelele oviihiwa mookhwani woochuneyaxa weeriwe—oviihiwa wa Yesu. Muupuwele wi ovinya wawe mookhwani waaheereliwa onamoona ni achu masana masaneene nave eyo ennalipiha nroromelo nahu.—1 Ako. 15:3-6, 20-22.

18. Ti mwawiihai muneeraanyu mpharihele phaama macipo ahu analoca sa ewehereryo ya ovinya mookhwani? (Moone tho enoota.)

¹⁸ Mphariheleke phaama “macipo oomunepani” yaawo analoca sa ewehereryo ya ovinya mookhwani. d (Aef. 5:19) Macipo yaala anneeriha ovinya mookhwani okhala weeparipari wa hiyo nave annalipiha nroromelo nahu mu ewehereryo yeela yoochuneya. Nwiriyaneke yaawo, mwiikhovelelihe ni yaawo, nave muthokororye yootaphulela ya masu a macipo yaawo variyari va malapelo anyu a echoko. Musuwele yootaphulela ya macipo yaawo, nave muupuwelele mwawiiseela wi elipihe nroromelo nanyu ni otannya murima anyu. Voocharela, wakhala wi moohoolela makacamiho oovila mookumini naari omuyeleela oosiveliwaanyu mookhwani, munepa wa Yehova onahaala wookhaviheryaani wuupuwela macipo yaawo nave enahaala woohakararyaani ni woolipihaani.

19. Tiheeni nnaphwanelaahu waanyiherya vooloca sa ovinya mookhwani? (Moone ekaaxa “ Tiheeni Mwaahaalaanyu Waakoha Yaawo?”)

¹⁹ Mpharihele mavyakelo a waanyiherya. Yehova oonivaha mavyakelo a wiisaanyiherya nri mu elapo evyaani. Murokora mmoha oothariha: “Kinnamaliha elukuluku yincipale kiisaanyiheryaka kiri mu elapo evyaani kinkhereryaka ithutu seiho inathapuruwa Mparataiso.” Mwaanyiherye mwaasuwelaka alopwana ni athiyana a nroromelo analociwa Mpiipiliyani. Taani munachunaanyu omoona? Makoho taani munahaalaanyu ompakela muchu yoowo? Mwaanyiherye tho mukhalaka wanaawiili ni oosiveliwaanyu yaale akhwile khalai. Muupuwelele vooloca sa echu yoopacerya munahaalaanyu oloca wa yaawo, mukhalelo munahaalaanyu owaakhela ni waakhupaarela ni mukhalelo muneeraanyu mukhale oohakalala nwoonaka yaawo.

20. Tiheeni nnaphwanelaahu olakelela weera?

²⁰ Ninnamuthamalela vancipale Yehova ntakhara yoororomeliha awe ya waaviha achu mookhwani! Nnaphwanela ororomela wi yoororomeliha yeela ti yeeparipari nthowa nawi Yehova ookhalano nchuno ni owerya wa waakhwaniherya. Hankooni ntitelele olakelela olipiha nroromelo nahu mu ewehereryo yeela yoochuneya. Moorweela wa weerano yeela nnahaala omwaacamela vancipale Muluku, yoowo oniroromelinhe mmoha ti mmoha a hiyo wi ‘oosiveliwaahu anahaala ovinya mookhwani!’