1. Ntakhara heeni ninnavahererya maakhulo mmithukumano?

 NTAKHARA heeni ninnoonela mithukumano? Nthowa noopacerya ti nawi nnachuna omucicimiha Yehova. (Sal. 26:12; 111:1) Nthowa nikina ti nawi nnachuna olipihanaka mukina ni mukhwaawe variyari va ilukuluku seiha soovila nnakhalaahu. (1 Ate. 5:11) Vaavaa nnavinyihaahu nwono ni ovahererya maakhulo ninnapaka ichu seiha piili.

2. Ekari taani nryaahuno wi nivahererye maakhulo mmithukumano sahu?

² Isumana soothene ninnakhalano ikari sa ovahererya maakhulo mmithukumano sahu. Ntoko yootakiherya, omakuchuwelo wa isumana, nnanwerya opaka makupa variyari va Yoohuserya ya Mulipeleli. Mmithukumano sa veeri va esumana, nnanwerya ovaha maakhulo variyari va makupa wa Muhakhu Woomunepani, Yoohuserya ya Piipiliya ya Muloko ni makupa makina.

3. Tiheeni eneeriha okhala woovila wa hiyo ovaha maakhulo, nave ti mwawiihai Ahepri 10:24, 25 onanikhaviheryeiye?

³ Oothene ahu ninnachuna vancipale omucicimiha Yehova ni waalipiha annihu. Nyenya vaavaa nnachunaahu ovaha naakhulo, akhweya nnamuhoolela makacamiho. Nnanwerya okhala awuukhuwa vooloca sa ovahererya maakhulo, naari akhweya nnamuchuna opaka makupa mu ikwaha sincipale, nyenya hannathanliwa ntoko mummo naachunelaahumo. Tiheeni enahaala onikhaviherya ohoolela makacamiho yaawo? Nnanwerya ophwanya naakhulo mu ekaarata ya murummwa Paulo wa Ahepri. Atharihaka vooloca sa ochuneya waya othukumana, owo aahiloca wi awo yaaphwanela otikitheryeya mu ‘olipihanaka mukina ni mukhwaawe.’ (Mwaalakhanye Ahepri 10:24, 25.) Mwawiihiiha, vaavaa nniiwexexaahu wi anna akina ananwerya olipiheya ni maakhulo ahu ookhweya, ninnakhala ootaphuwa wi nivahererye maakhulo. Nave naamwi nihithanliwaka mu ikwaha sincipale ntoko naachunelaahumo, ninnakhala oohakalala  nthowa nawi anna akina yaahikhalano ekari ya ovahererya maakhulo.—1 Pet. 3:8.

4. Ichu taani raru nnahaalaahu othokororya mmwaha yoola?

⁴ Mmwaha yoola, woopaceryani nnahaala othokororya mukhalelo nneeraahu nlipihaneke mukina ni mukhwaawe mmiloko mikhaani, mummo achu a vakhaani anavahereryaaya maakhulo. Voocharela nnahaala woona mukhalelo nneeraahu nlipihaneke mukina ni mukhwaawe mmiloko mitokweene, mummo ancipale anaviihaaya nwono wi evahe maakhulo. Nave wookuchulani, nnahaala woona mukhalelo nneeraahu neerihe wi yeeyo nnalocaahu mmaakhulo ahu yaalipihe vancipale akhwiihu.

5. Ti mwawiihai nneeraahu naalipihe akina mmiloko mikhaani?

⁵ Mmuloko mukhaani naari ekrupu, hanakhalamo achu ancipale wi evahererye maakhulo. Ilukuluku ikina, muhooleli onaphwanela oweherya vakhaani wi muchu mmoha aviihe nwono wi avahererye naakhulo. Mmukhalelo yoola, muthukumano onanwerya okhala ntoko wi honaya vahoolo nave eyo enanwerya okhala yooceecheiha. Tiheeni munaphwanelaanyu weera? Mviiheke moono wiiliwiili. Mmukhalelo yoola, nyuwaano munanwerya waaceenyerya akina opaka makupa.

6-7. Ichu taani munaphwanelaanyu weera wi mvukulele wuukhuwa vooloca sa ovaha maakhulo?

⁶ Hanka wakhala wi munnakhala awuukhuwa vooloca sa ovaha maakhulo? Ancipale anniisoona tho mmukhalelo yoola. Vano ti mwawiihai muneeraanyu muhikhale awuukhuwaxa vooloca sa ovaha maakhulo ni owerya waalipiha anna ni arokora? Munoona hai opharihela meerelo yaawo anahaala ovukula wuukhuwa wanyu? Muni mweereno hai yeeyo?

⁷ Munanwerya woona wanaawiili sooleeliherya sikhumme mu miyaha sa Mulipeleli. b Ntoko yootakiherya, mmoha wa seiho ori wiirehererya phaama. (Mas. 21:5) Wakhala wi moosuwela phaama yeeyo enahaala othokororyiwa mmithukumano, onahaala okhala wookhweya ovahererya maakhulo. Yooleeliherya ekina ori ovahererya maakhulo ookhuveya. (Mas. 15:23; 17:27) Hamukhala awuukhuwaxa wakhala wi munnavahererya maakhulo ookhuveya. Ohiya yeeyoru, anna annawerya wiiwexexa phaama naakhulo nookhuveya, yaawo arino masu mamoha naari meeli, ohiya naakhulo noorakama. Vaavaa munavahereryaanyu maakhulo ookhuveya mmasu anyu, munnooniherya wi mohiirehererya phaama nave wi mohiiwexexa phaama yeeyo enathokororyiwa.

8. Yehova onoona hai wiilipixerya nnapakaahu?

⁸ Hanka wakhala wi nyuwaano moheererya opharihela ikina sa sooleeliherya seiha nyenya naamwi hiihaa munnatitelela okhala awuukhuwa vooloca sa ovahererya maakhulo? Muroromele wi Yehova onnavaha esisapo wiilipixerya munapakaanyu wi mpake yeeyo munaweryaanyu. (Luka 21:1-4) Opaka owetha wanyu henataphulela weera ichu opwaha vaavaa munawerelaanyuvo. (Afi. 4:5) Mutikitherye soolakelela seiho munahaalaanyu owerya waakhwaniherya, nave mumveke Yehova murima woomaaleleya. Woopaceryani, yoolakelela munaphwanelaanyu otikitherya ori ovaha maakhulo ookhuveya.

9. Nikacamiho taani nnakhumelela mmuloko mutokweene?

⁹ Ichu inanwerya okhala soohiyana wakhala wi munakhala mmuloko yoowo orimo alaleeryi ancipale. Akhweya anna ni arokora ancipale  annaviiha miwono wi evahererye maakhulo nave muhooleli wiiliwiili hanoothanlaani. Ntoko yootakiherya, murokora mmoha awiichaniwa Taniyela c ilukuluku soothene onnasiveliwa ovahererya maakhulo mmithukumano. Wa yene, ovaha maakhulo annapaka makupa a omulapelela Yehova, mukhalelo wa waalipiha akina ni mukhalelo wa olipiha nroromelo nawe wa yeeyo Piipiliya onahusiheiye. Nyenya vaavaa owo aathaamenleiye muloko mutokweene, aathanliwa ikwaha sa vakhaani wi avahererye maakhulo nave ikwaha ikina haawerya ovaha naakhulo mmuthukumano wanteero. Owo ooloca: “Kaananyeenyeya vancipale, nave yaakhala ntoko wi kaayeleela murici. Nave evinrevo elukuluku, muhooleli ahintonko woothanlaani, munampacerya wuupuwela waakhanle wi haneerano mwaayiini.”

10. Ti mwawiihai nneeraahu naaceererye ikari sahu sa ovaha maakhulo mmithukumanoni?

¹⁰ Apwanne mohintoko wiisoona ntoko Taniyela? Mmukhalelo yoola akhweya munanwerya ochuna ohiya ovahererya maakhulo ni owiriyana pahi mithukumano. Nyenya muhihiye weererya ovaha maakhulo. Tiheeni munaphwanelaanyu weera? Mweererye orehererya maakhulo mancipale ntakhara mithukumano soothene. Wakhala wi himuthanliwe woopaceryani wa yoohuserya, nlelo munahaala okhalano ikari sa ovahererya maakhulo vaavaa muthukumano oneecaaya. Vaavaa muniirehereryaanyu ntakhara Yoohuserya ya Mulipeleli, muupuwele mukhalelo iparakrafo iniiwananaaya ni muru wa mwaha. Mmukhalelo yoola, munanwerya ovahererya maakhulo aphaama variyari va yoohuserya. Mwawaaceererya, munanwerya wiirehererya phaama wi mvahe maakhulo mu iparakrafo seiho sinavuwiha miyaha sawiiseela iri soovila othariha. (1 Ako. 2:10) Ntakhara heeni? Nthowa nawi akhweya achu ancipale hanaviiha miwono mu iparakrafo seiho. Tiheeni munaphwanelaanyu weera wakhala wi moopharihela sooleeliherya soothene seiha nave muhinawerya ovaha maakhulo naamwi mweerenrye mmithukumano mincipale? Munanwerya oloca ni muhooleli ihaakumve mithukumano ni omuleela nikoho taani mwaahaalaanyu osiveliwa ovaha naakhulo.

11. Tiheeni Afilipi 2:4 onanceenyeryeiye weera?

¹¹ Mwaalakhanye Afilipi 2:4. Mooveereliwa, murummwa Paulo ohaaceenyerya Akristu okuha  mu nipuro noopacerya soochuna sa akina. Nni nipharihele hai ekano yeela variyari va mithukumano? Muupuwele wi hiihaa ntoko hiyaano, akina tho annachuna opaka makupa.

12. Mukhalelo taani mukina nnaphwanelaahu waalipiha annihu mmithukumanoni? (Moone tho eruku.)

¹² Muupuwele ela: Vaavaa munachekulaanyu ni asinthamwene, apwanne munoona oloca meekhiinyu muhaavahaka ekari wi eloce? Mweeparipari hooye! Munnachuna tho wi awo epake makupa mu ochekula. Mmukhalelo mmohamoha, mmithukumanoni, ninnachuna wi ancipale a annihu evahererye maakhulo. Mukhalelo mmoha waphaama wa waalipiha annihu ori moorweela wa waavaha ekari wi yooniherye nroromelo aryaayano moorweela wa maakhulo aya. (1 Ako. 10:24) Vano hankooni noone mukhalelo wa weerano yeela.

13. Tiheeni nnaphwanelaahu weera wi achu ancipale ewerye okhalano ekari ya ovaha maakhulo?

¹³ Echu yoopacerya nnaphwanelaahu weera ori ovahererya maakhulo ookhuveya, hiihaa achu akina tho anahaala okhalano ekari ya ovaha maakhulo. Atokweene a mmulokoni ni alaleeryi amavyakelo ananwerya ovaha yootakiherya. Naamwi mvahaka maakhulo ookhuveya, mweererye ohiloca ipontu soothene mu elukuluku emohamoha. Wakhala wi moovahererya maakhulo mulocaka soothene iri va iparakrafo, hehala echu wi akina evahe maakhulo. Ntoko yootakiherya, pahiru mu eparakrafo yeela, soovahereryiwa iponto piili: Ovaha maakhulo ookhuveya ni oheererya oloca ipontu sincipale. Mwawiihiiha, mu eparakrafo yeela, mwathanliwa woopaceryani wi mvahe naakhulo, munoona hai oloca pahiru eponto emoha?

14. Tiheeni enahaala onikhaviherya olakelela ikwaha kavi nnahaalaahu oviiha moono? (Moone tho eruku.)

¹⁴ Mukhaleno masuwelelo vaavaa munalakelelaanyu ikwaha kavi munachunaanyu ovaha maakhulo. Wakhala wi mooviiha nwono ikwaha sincipale, eyo enanwerya weeriha wi muhooleli iisooneke okhala ookhinyereryiwa wi oothanleeni, naamwi akina yahaarino ekari ya ovahererya maakhulo. Eyo tho enanwerya oweeriha akina ohiviiha nwono aya.—Ekl. 3:7.

15. (1) Ti mwawiihai nnaphwanelaahu waakhulela vaavaa muhooleli ohinanthanleiye wi nivahe maakhulo? (2) Ti mwawiihai ahooleli aneeraaya yooniherye opwacha wa oothene? (Moone ekaaxa “ Vaavaa Muneecihaanyu Nikupa.”)

 ¹⁵ Vaavaa anna ancipale anaviihaaya miwono variyari va yoohuserya, akhweya haniwerya ovaha maakhulo ntoko naachunelaahu. Ilukuluku ikina, muhooleli hawerya onithanla naari mano ekwaha emoha. Eyo enanwerya oniceecheiha, nyenya hannaphwanela okhala oonyeenyeya nthowa na ohithanliwa.—Ekl. 7:9.

16. Ti mwawiihai nneeraahu naalipihe yaale evanhe maakhulo?

¹⁶ Wakhala wi hinwenrye ovahererya maakhulo ikwaha sincipale ntoko mwaachunelaanyu, munoona hai owiriyana moomaaleleya maakhulo a anna akina nave imanle mithukumano waathamalela nthowa na yeeyo? Akhweya anna anahaala okhala oolipiheya hiihaa ntoko yaahaalaaya okhala ni maakhulo mwaahaalaanyu ovaha. (Mas. 10:21) Waathamalela akina mukhalelo mukina wa olipihana mukina ni mukhwaawe.

17. (1) Ti mwawiihai asitiithi aneeraaya yaakhaviherye anaaya ovaha maakhulo oophwanelela mwawiiwanana ni iyaakha saya? (2) Mwawiiwanana ni exilema, ichu taani xexe munaphwanelaanyu opaka vaavaa munarehereryaanyu maakhulo? (Moone tho enoota.)

¹⁷ Mikhalelo taani mikina nneeraahu nlipihaneke mukina ni mukhwaawe mmithukumano? Wakhala wi mookhalano anamwane, mwaakhaviherye yaawo orehererya maakhulo oophwanelela mwawiiwanana ni iyaakha saya.  (Mat. 21:16) Ikwaha ikina, miyaha sawiiseela ntoko makacamiho mu othela naari ichu vooloca sa meecelo sinnathokororyiwa variyari va yoohuserya. Naamwi hiihaa, ti yawooneya wi enahaala okhalavo eparakrafo emoha naari piili seiho aniinyu aryaayano ophwanelela wa ovaha maakhulo. Nave tho mwaakhaviherye yaawo wiiwexexa wi tahi wi ilukuluku soothene aneeraaya eviihe nwono anahaala othanliwa wi evahe maakhulo. Mmukhalelo yoola, vaavaa akina anathanliwaaya wi evahe maakhulo, awo hekhala oonyeenyeya.—1 Tim. 6:18. d

18. Nni nsepe hai wiivuwiha aneene vaavaa nnavahaahu maakhulo? (Masiposipo 27:2)

¹⁸ Oothene ahu nnanwerya orehererya maakhulo aphaama, yaawo anamucicimiha Yehova ni enaalipiha annihu. (Mas. 25:11) Ikwaha ikina nnawerya ovahererya maakhulo nipharihelaka yaweereya ya okumi ahu. Nyenya nnaphwanela okhalano ekaasoope wi nihiivuwihe vancipale. (Mwaalakhanye Masiposipo 27:2; 2 Ako. 10:18) Ohiya yeeyo, maakhulo ahu anaphwanela otikitheryeya wa Yehova, Mmasu awe ni alapeli awe a elapo yoothene. (Wup. 4:11) Eparipari wi wakhala wi nikoho na eparakrafo emoha ninnaniveka wi nivahe naakhulo vooloca sa hiyo, nnahaala weerano yeeyo. Yootakiherya emoha ya yeela nnahaala woona mu eparakrafo enacharela.

19. (1) Yookhumelela taani enakhalavo vaavaa nnooniheryaahu opwacha wa oothene mmithukumano? (Aroma 1:11, 12) (2) Ntakhara heeni munnasiveliwa ovaha maakhulo mmithukumano?

¹⁹ Eparipari wi hinaavo nlamulo vooloca sa mukhalelo wa ovahererya maakhulo, nyenya oothene ahu nnaphwanela wiilipixerya wi naalipihe anna ni arokora ahu vaavaa nnavahaahu maakhulo. Mukhalelo mmoha wa weerano yeela ori wiilipixerya ovaha maakhulo ikwaha sincipale. Mmikhalelo mikina ennavolowela okhala awaakhwaneliwa ni ikari nnavahiwaahu wi nivahe maakhulo ni okhala oohakalala vaavaa akina tho anavahaaya maakhulo aya. Vaavaa nnakuhaahu soochuna sa akina mu nipuro noopacerya mmithukumano, nnanwerya ‘olipihana mukina ni mukhwaawe.’—Mwaalakhanye Aroma 1:11, 12.