1-2. Tiheeni nnaphwanelaahu weera vaavaa nnaweheryaahu elapo evyaani?

 NINNAVAHA esisapo yoororomeliha ya Yehova ya otoroka elapo yeela wi ekhale elapo evyaani yawookololowa. (2 Pet. 3:13) Naamwi hiihaa, hannasuwela ti liini elapo evyaani enahaalaaya orwa, nto saweereya sinnooniherya wi hanimaliha elukuluku yincipale niweheryaka.—Mat. 24:32-34, 36; Saw. 1:7.

² Nyenya, moohipwacha elukuluku nimalinhaahu nri mu eparipari, oothene ahu nnaphwanela olipiha nroromelo nahu mu yoororomeliha yeela. Ntakhara heeni? Nthowa nawi nroromelo noolipa nnanwerya okhala nooceecheya. Mweeparipari, murummwa Paulo ohiichana okhalano nroromelo nooceecheya ntoko “yoocheka yeeyo enrukurenrye.” (Ahe. 12:1) Wi nroromelo nahu nihikhale nooceecheya, nnaphwanela wuupuwelela mwawiiseela ni mwawuuluulela vooloca sa ichu seiho inooniherya wi elapo evyaani enahaala orwa moohilekela.—Ahe. 11:1.

3. Tiheeni nnahaalaahu othokororya mmwaha yoola?

³ Mmwaha yoola, nnahaala othokororya mikhalelo miraru nneeraahu nlipihe nroromelo nahu mu yoororomeliha ya Yehova ya elapo evyaani: (1) moorweela wa wuupuwelela mukucho wa woopola, (2) moorweela wa wuupuwelela owerya wa Yehova ni (3) moorweela wa okhala ooweiwa mmiteko soomunepani. Voocharela, nnahaala othokororya mukhalelo muchaka wa Yehova wa Hapakukhi enalipihaaya nroromelo nahu olelo. Voopaceryani, hankooni nthokororye mikhalelo savakhaani, akhweya nneeraahu nihoolele hiihaano vaava seiho onahaalaaya ochuneya okhalano nroromelo noolipa mu yoororomeliha ya elapo evyaani.

 MIKHALELO ONACHUNEYA OKHALANO NROROMELO NOOLIPA

4. Soolakelela taani nnaphwanelaahu opaka seiho onachuneya okhalano nroromelo noolipa?

⁴ Mahiku oothene, ninnapaka soolakelela seiho onachuneya okhalano nroromelo noolipa. Ntoko yootakiherya, ninnapaka soolakelela inaavolowela asinthamwene ahu, mathatelo, exikola, othela, anamwane ni muteko. Nnaphwanela wiipakela makoho ntoko ala: ‘Apwanne soothanla saka sinnooniherya wi kinnaroromela wi mukhalelo yoola wa ichu ti wa elukuluku vakhaani nave wi moohilekela onahaala oraceeliwa ni elapo evyaani ya Muluku? Naari wi soothanla saka sinavoloweliwa ni achu yaawo anoona ntoko wi okhwa makuchuwelo wa ichu soothene?’ (Mat. 6:19, 20; Luka 12:16-21) Nnahaala opakaka soothanla saphaama wakhala wi noolipiha nroromelo nahu nawi elapo evyaani enahaala orwa moohilekela.

5-6. Ntakhara heeni nnachunaahu nroromelo noolipa mu ilukuluku sookacamiha? Mphwanaphwanihe.

⁵ Ninnahoolela makacamiho yaawo onachuneya okhalano nroromelo noolipa. Akhweya ninnahoolela wiikariwa, ereca etokweene, naari echu ekina yeeyo enaniceecheiha. Woopaceryani, akhweya nnahaala woonaka wi nri ooreheryeya wi nivilele ni makacamiho ahu. Nyenya makacamiho ntoko yaala wiiliwiili annamaliha elukuluku yincipale, mwawiihiiha, nnahaala ochuna nroromelo noolipa wi nivilele ni otitelela omurumeela Yehova moohakalala.—Aro. 12:12; 1 Pet. 1:6, 7.

⁶ Variyari va makacamiho, akhweya nnanwerya woona wi elapo evyaani ya Yehova herwa ephiya. Apwanne ela enataphulela wi nroromelo nahu ti nooceecheya? Ikwaha ikina hooye. Muthokororye niphwanaphwaniho nimoha. Variyari va elukuluku yooriirya otokweene, akhweya nnanwerya woona wi elimwi herwa ephiya. Nave naamwiihiiha, elimwi enahaala ophiya. Moolikana, vaavaa nnakhalaahu ooceecheyaxa, akhweya nnanwerya woona wi elapo evyaani herwa ephiya. Mwawiihiiha, vaavaa nroromelo nahu nnakhalaaya noolipa, ninnasuwela wi soororomeliha sa Muluku sinahaala waakhwanela. (Sal. 94:3, 14, 15; Ahe. 6:17-19) Ni nroromelo nenla, nnanwerya otitelela okuha mu nipuro noopacerya mu okumi ahu omurumeela Yehova.

7. Mukhalelo taani wa wuupuwela nnaphwanelaahu osepa?

⁷ Muthokororye nikupa nikina onachuneyaaya nroromelo noolipa—mmuteko woolaleerya. Achu ancipale yaawo nnaalaleeryaahu anoona wi “michaka saphaama” vooloca sa orwa wa elapo evyaani ya Muluku ethale. (Mat. 24:14; Ese. 33:32) Nnaphwanela okhalano ekaasoope wi nihirwe nikhwe minikwa vooloca sa yeeyo Yehova onanihusiheiye hiihaa ntoko awo. Wi eyo eheereye, nnaphwanela otitelela olipiha nroromelo nahu. Vano hankooni nthokororye mikhalelo miraru nneeraahu neereno yeela.

MUUPUWELELE MUKUCHO WA WOOPOLA

8-9. Ti mwawiihai wuupuwelela mukucho wa woopola onalipihaaya nroromelo nahu?

⁸ Mukhalelo mmoha wa olipiha nroromelo nahu ori moorweela wa wuupuwelela mukucho wa woopola. Mukucho yoola onnanroromeliha wi yookhwela ya Muluku enahaala waakhwanela. Vaavaa nnuupuwelelaahu mwawiiseela vooloca sa ntakhara heeni ovahereryiwaaya mukucho wa woopola ni yeeyo evolowenle, ninnalipiha nroromelo nahu nawi yoororomeliha ya Muluku ya onivaha okumi woohimala mu elapo yaphaamaxa, moohikwa minikwa enahaala waakhwanela. Ntakhara heeni nnalocaahu yeela?

⁹ Vano mukucho wa woopola waavolowela eheeni? Yehova oomurumiha Mwanawe oosiveliwa ooyariwa meekheiye, nthamwene awe  awaacameleyaxa, orweela wirimu wi ayariwe ntoko muchu oophaameya veelaponi yavathi. Vaavaa aareiye veelaponi yavathi, Yesu aahivilela ni makacamiho a mukhalelo woothene. Voocharela aahihooxeya nave aahihoolela okhwa wawiicelaxa. Chiryeene Yehova aahihooxeya vancipale! Muluku ahu oosivela haahaala weemererya wi Mwanawe ahooxeye ni okhwa pahiru wi anivahe ekumi yaphaama mu elukuluku yavakhaani. (Yoh. 3:16; 1 Pet. 1:18, 19) Woona wi Yehova omvaha Mwanawe wi anikhaviherye, onahaala weeriha wi okhale wooweryeya wa hiyo okhalano okumi woohimala mu elapo evyaani.

MUUPUWELELE OWERYA WA YEHOVA

10. Mwawiiwanana ni Aefesu 3:20 tiheeni Yehova onaweryeiye opaka?

¹⁰ Mukhalelo wanaawiili wa olipiha nroromelo nahu ori moorweela wa wuupuwelela owerya wa Yehova. Owo ookhalano owerya wa waakhwaniherya ichu soothene onaroromeliheiye. Achu ancipale olelo anoona wi okumi woohimala mu elapo evyaani tahi wooweryeya wa hiyo. Nyenya Yehova wiiliwiili onnaroromeliha ichu seiho achu ahinahaalaaya owerya waakhwaniherya. Opwaha soothene, owo Muluku a Owerya Woothene. (Yupu 42:2; Mar. 10:27) Mwawiihiiha, hannakhala oohaleeliheya vaavaa owo onaniroromeliheiye opaka ichu sootikhiniha!—Mwaalakhanye Aefesu 3:20.

11. Mvahe yootakiherya emoha sa soororomeliha sootikhiniha sa Muluku. (Moone tho ekaaxa “ Soororomeliha Savakhaani Sootikhiniha Saakhwanenle.”)

¹¹ Muthokororye ichu savakhaani sooneya okhala soohiweryeya, seiho Yehova aaroromelinheiye achu awe khalai. Owo aahimuroromeliha Aparahamu ni Sara wi yaahaala okhalano mwaana naamwi yaari awuuluvala. (Map. 17:15-17) Owo tho aahiloca wa Aparahamu wi muyareriwo awe waahaala ovahiwa elapo yo Kana. Variyari va iyaakha sincipale, muyareriwo wa Aparahamu, Aisarayeli, yaari akapuro o Yikuputu, nave yooneya ntoko wi yoororomeliha yeela hiyii yaakhwanele. Nyenye ela yaahaakhwanela. Ohoolo waya, Yehova aahiloherya wi muthiyana awuuluvala awiichaniwa Elisapeti aahaala omuyara mwaana. Owo aahiloca wi Mariya, yoowo aahintonko okumanela ni mulopwana aahaala omuyara Mwaana a Muluku. Ela yaahaala waakhwaniherya yooloherya Yehova aapankeiye mu iyaakha macikhwi macikhweene muculi mu emaca ya Eteni!—Map. 3:15.

12. Tiheeni Yosuwa 23:14 ni Yesaya 55:10, 11 sinanroromelihaaya vooloca sa owerya wa Yehova?

¹² Vaavaa nnuupuwelelaahu vooloca sa soororomeliha soothene Yehova opankeiye ni mukhalelo aakhwanihenryeiye seiho, ninniiwexexa wi owo ookhalano owerya otokweene. Eyo ennalipiha nroromelo nahu mu yoororomeliha ya elapo evyaani. (Mwaalakhanye Yosuwa 23:14; Yesaya 55:10, 11.) Ela ennanrehererya phaama wi naakhaviherye akina ororomela wi yoolaiherya ya elapo evyaani tahi ethale. Alocaka sa erimu evyaani ni elapo evyaani, Yehova mwaneene oothariha wi: “Masu yaala toororomeleya ni eeparipari.”—Wup. 21:1, 5.

MUSAREIHE OKUMI ANYU NI MITEKO SOOMUNEPANI

13. Ti mwawiihai mithukumano sa muloko sinalipihaaya nroromelo nahu? Mutharihe.

¹³ Mukhalelo waneeraru wa olipiha nroromelo nahu ori moorweela wa oweiwa mmiteko soomunepani. Ntoko yootakiherya, muthokororye mukhalelo nnaphuraahu orweela mmithukumano sahu sa muloko. Ana, yoowo omalinhe iyaakha sincipale mmikhalelo soohiyana sa muteko wa elukuluku yoothene, ooloca: “Mithukumano sinnakikhaviherya otitelela okhalano nroromelo noolipa. Naamwi namaloca ahiri muhusiha a mavyakelo naari ahilonce echu vyakala evyaani, wiiliwiili  kinnawiriyana echu yeeyo enakikhaviherya wiiwexexa phaama iparipari sa Mpiipiliyani, nave eyo ennalipiha nroromelo naka.” b Moohikhwa minikwa, hiyaano ninnathamalela maakhulo oolipiha orweela wa anna ni arokora ahu.—Aro. 1:11, 12; 10:17.

14. Ti mwawiihai muteko woolaleerya onalipihaaya nroromelo nahu?

¹⁴ Hiyaano tho ninnalipiha nroromelo nahu vaavaa nnapakaahu makupa mmuteko woolaleerya. (Ahe. 10:23) Parpara, yoowo onamurumeela Yehova mu iyaakha opwaha 70, ooloca: “Kohoona wi muteko woolaleerya ilukuluku soothene onnalipiha nroromelo. Vaavaa kinaaleelaaka vancipale akina vooloca sa soororomeliha sooreera sa Yehova, nroromelo naka ninnakhala noolipaxa.”

15. Ti mwawiihai yoohuserya ya muchu mukhateiye enalipihaaya nroromelo nahu? (Moone tho eruku.)

¹⁵ Muthokororye muteko mukina woomunepani yoowo onalipiha nroromelo nahu: Yoohuserya ya muchu mukhateiye. Susana ooloca wi othanla nihiku na opaka yoohuserya ya muchu mukhateiye ennakhaviherya. Owo ooloca: “Namurunku, kinnarehererya Mwaha Woohuserya wa Mulipeleli wa esumana enacharela. Noomorela muteko ni Nanaawiili, kinnarehererya mithukumano sa veeri va esumana. Mahiku anahalela, kinnapaka yoohuserya ya muchu mukhateiye.” Moorweela wa ochariha moohihiyererya marehereryo awe ntakhara ohuserya, Susana onnatitela oteka nroromelo nawe. Irene, yoowo orumeenle mu iyaakha sincipale o nipuro ntokweene, ohoona wi ohuserya sooloherya sa Mpiipiliyani ennalipiha nroromelo. Owo ooloca: “Ti yootikhiniha wi sooloherya sa Yehova sinnaakhwanela hiihaa ntoko yaaloheryiwaaya.” c

“HIYOOCEELA WEEREYA MOOHISHELELIWA”

16. Ntakhara heeni yoororomeliha ya Yehova wa Hapakukhi eryaayano yootaphulela olelo? (Ahepri 10:36, 37)

¹⁶ Alapeli a Yehova akina annawehererya makuchuwelo wa mukhalelo yoola wa ichu mu  iyaakha sincipale. Achu akina anuupuwela wi makuchuwelo annalekela orwa. Nyenya Yehova oosuwela mukhalelo alapeli awe aniisoonaaya. Mweeparipari, owo aahimuroromeliha mulipa a miririmu Hapakukhi: “Yeeyo kineeraaka kiwuupululele, elukuluku aya hephiyale nlelo, ti ya makuchuwelo nto enamweereya chiri. Nari woonaka olekela, owehereryeke. Hiyooceela weereya moohisheleliwa.” (Hap. 2:3, PMM) Apwanne Yehova aalonce yeela wi amukhaviherye Hapakukhi pahiru? Naari wi masu Awe aakhalano yootaphulela wa hiyaano olelo? Mooveereliwa, murummwa Paulo aahipharihela masu yaala wa Akristu, yaawo arino ewehereryo ya elapo evyaani. (Mwaalakhanye Ahepri 10:36, 37.) Chiryeene, nnanwerya ororomela wi naamwi noonaka wi yoororomeliha ya Yehova ya onivuluxa ennalekela, “hiyooceela weereya moohisheleliwa.”

17. Ti mwawiihai murokora mmoha aapharihenleiye ekano Yehova amvanheiye Hapakukhi?

¹⁷ Alapeli ancipale a Yehova annapharihela ekano ya Yehova ya ‘otitelela oweherya’ mu iyaakha sincipale. Ntoko yootakiherya, Loisi, opacenrye omurumeela Yehova mu eyaakha ya 1939. Owo ooloca: “Mu elukuluku yeele miyaano kuupuwela wi Armaketo ahaala ophiya kihaakumve omaliha exikola ya vasulu. Ela hiyeeren’ye. Moovira wa iyaakha, waahikikhaviherya waalakhanya saweereya sa Mpiipiliyani sa achu yaawo yaaweherenrye mu iyaakha sincipale waakhela nchuwelo na Yehova, ntoko Nowa, Aparahamu, Yosefe ni akina. Otitelela oweherya waahikikhaviherya miyaano ni akina ororomela wi elapo evyaani helekela.” Alapeli akina ancipale a Yehova akhalai annaroromela yeela!

18. Ti mwawiihai ovarerya soopatuxiwa onalipihaaya nroromelo nahu mu orwa wa elapo evyaani?

¹⁸ Eparipari wi elapo evyaani nlelo hephiyale. Nyenya nuupuwele ichu ikina nryaahuno: Itheneeri, miri, axinama ni achu akhwiihu. Haavo onakhwa minikwa wi ichu seiha ti seeparipari, naamwi yaariwo elukuluku yahaakhanlaaya. Iho vano sookhala nthowa nawi Yehova topatunxe. (Map. 1:1, 26, 27) Muluku ahu oororomeliha tho oruuha elapo evyaani. Owo onahaala waakhwaniherya yoororomeliha yeela. Mu elapo evyaani, achu anahaala okhalano okumi woohimala ni woophaameya. Nnawerya ororomela wi elapo evyaani enahaala orwa mu elukuluku Yehova olakelenleiye.—Yes. 65:17; Wup. 21:3, 4.

19. Muni mulipihe hai nroromelo nanyu?

¹⁹ Nweheryaka, mpharihele ikari soothene muryaanyuno wi mulipihe nroromelo nanyu. Munnuwihe othamalela wanyu ntakhara mukucho wa woopola. Mooneke owerya wa Yehova. Musareihe okumi anyu ni miteko soomunepani. Moorweela wa weerano yeela munanwerya okhala variyari va “yaale moorweela wa nroromelo ni opixa murima anaakhela soororomeliha.”—Ahe. 6:11, 12; Aro. 5:5.