1. Mutharihe yeeyo yeereya vaavaa Yesu aapankeiye yootikhiniha awe yoopacerya.

 MWAANYIHERYE yeeyo yeeren’ye omakuchuwelo wa eyaakha ya 29 E.K. vaavaa Yesu aapacenryeiye orummwa awe. Yesu ni amama awe Mariya vamoha ni oohuserya awe avakhaani yaahiwompwa ntakhara efesta ya othela o Kana, epooma yaari makupa oomoko o Nasareti, weiwo Yesu aayariweiyewo. Mariya aari nthamwene a emusi yeele nave mwawooneya aanakhaviherya owaakhela yaale yaawompwale. Nyenya variyari va efesta ya othela naahikhumelela nikacamiho naahaala wuuliha muru emusi ni mutheli muvyaani—eviinyu yaahimala. b Akhweya yaahiphiya achu ancipale opwaha vaavaa yaaweheryaaya. Mwawaakuveya Mariya aya wa mwanawe nave aloca: “Awo haanono eviinyu.” (Yoh. 2:1-3) Tiheeni Yesu aapankeiye? Echu yootikhiniha, owo aatatuxa maahi ekhala “eviinyu yaphaama.”—Yoh. 2:9, 10.

2-3. (1) Ti mwawiihai Yesu aapharihenleiye owerya wa sootikhiniha sawe? (2) Ti mwawiihai nneeraahu niphure orweela mu othokororya sootikhiniha sa Yesu?

² Yesu aahipaka sootikhiniha ikina sincipale variyari wa orummwa awe. c Owo aahipharihela owerya wa sootikhiniha sawe wi aakhaviherye achu macikhwi macikhweene. Ntoko yootakiherya, pahiru mu sootikhiniha sawe piili—waalyiha alopwana awaakhwana 5.000 nave voocharela alopwana 4.000—akhweya waanavolowela  achu awaakhwana 27.000 wakhala wi nohaaphitaanyerya athiyana ni anamwane yaawo yaari weiwo. (Mat. 14:15-21; 15:32-38) Mu ikwaha seiha piili, Yesu tho aahaapenuxa achu ancipale yaawo yiiceliwa. (Mat. 14:14; 15:30, 31) Mwaanyiherye mukhalelo muloko wa achu waaryaaya wootikhiniheya vaavaa yaapenuxiwaaya ni olyihiwa mootikhiniha ni Yesu!

³ Nnanwerya ohuserya sincipale olelo orweela mu sootikhiniha sa Yesu. Mmwaha yoola, nnahaala othokororya mahusiheryo avakhaani anahaala olipiha nroromelo nahu orweela mu sootikhiniha seiha. Voocharela nnahaala othokororya mukhalelo nneeraahu ntakiherye wiiyeviha ni niphwanya Yesu oonihenryeiye vaavaa aapakeiye sootikhiniha.

4. Sootikhiniha sa Yesu inanihusiha mahusiheryo oolipiha nroromelo vooloca sa aani?

⁴ Sootikhiniha sa Yesu sinnanihusiha mahusiheryo oolipiha nroromelo nahu ohiya pahiru mwa yene nyenya tho mwa Tiithi awe. Opwaha soothene, Yehova tori Ehime yeeparipari sa sootikhiniha sawe. Saweeriwa ti Arummwa 10:38 onnanleela wi: ‘Muluku aamuthanla Yesu ni munepa waweela ni ikuru; owo aaheeceeca makupa oothene eerakano saphaama nave aapenuxaka oothene yaahooxiwa ti Musaserya, woona wi Muluku aari ni yoowo.’ Muupuwele tho wi mu ichu soothene seiho Yesu olonceiye ni opankeiye—ophitaanyerya sootikhiniha opankeiye—owo aahooniherya moophaameya muupuwelo ni miyoonelo sa Tiithi awe. (Yoh. 14:9) Vano hankooni nthokororye mahusiheryo mararu nnahuseryaahu orweela mu sootikhiniha sa Yesu.

5. Tiheeni yaamuceenyerya Yesu opaka sootikhiniha? (Mateyu 20:30-34)

⁵ Yoopacerya: Yesu ni Atiithi awe annanisivela vancipale. Vaavaa aareiye veelaponi yavathi, Yesu aahooniherya osivela wawe otokweene ntakhara achu moorweela wa opharihela owerya wa sootikhiniha sawe wi avukule makacamiho aya. Mu ekwaha emoha, alopwana eeli oohoona yaahikhuwela wa yoowo evekaka nikhaviheryo. (Mwaalakhanye Mateyu 20:30-34.) Moone wi Yesu “aamoriwa ikharari” nave voocharela aahaapenuxa yaawo. Ntoko ephariheliwaaya va, masu mu Ekiriki ataphuleliwe ‘omoriwa ikharari’ enaahiwa niphwanya ntokweene muchu onooneiye mpuwa. Niphwanya nenla ntokweene, nenlo nri yawooniherya ya osivela naahimuceenyerya Yesu waalyiha achu oovoliwa ni ompenuxa mulipa a mareca. (Mat. 15:32; Mar. 1:41) Nnanwerya ororomela wi Yehova, Muluku a “niphwanya,” ni Mwanawe annanisivela vancipale nave annakhala awuukhuwa vaavaa nnahooxeyaahu. (Luka 1:78; 1 Pet. 5:7) Awo ni murima woothene annachuna omaliha makacamiho oothene yaawo anaavolowela achu!

6. Owerya taani Muluku omvanheiye Yesu?

⁶ Nanaawiili: Muluku omvaha owerya Yesu wa orehererya makacamiho oothene a achu. Vaavaa Yesu aapankeiye sootikhiniha, aahooniherya wi ookhalano owerya wa orehererya makacamiho oothene yaawo nihinahaalaahu owerya omaliha mukhatiihu. Ntoko yootakiherya, owo ookhalano owerya wa onitaphula wa yeeyo enatannya makacamiho aachu oothene—soocheka nramvaahu seiho inakumiherya ireca ni okhwa. (Mat. 9:1-6; Aro. 5:12, 18, 19) Sootikhiniha sawe sohooniherya wi owo onanwerya openuxa “ireca sa mukhalelo woothene” ophiyerya tho waaviha mookhwani achu. (Mat. 4:23; Yoh. 11:43, 44) Owo tho ookhalano owerya wa omaaliha echeku yawuupa ni ovootha minepa sootakhala. (Mar. 4:37-39; Luka 8:2) Ti yoolipiha osuwela wi Yehova omvaha Mwanawe owerya yoola!

7-8. (1) Yoororomeliha taani sootikhiniha sa Yesu inanivahaaya? (2) Yootikhiniha taani munaweheryaanyu waakhela mu elapo evyaani?

⁷ Naneeraru: Nnawerya ororomela wi mareeliho a omwaahiyu vathi va olamulelo wa Muluku anahaala waakhwanela. Sootikhiniha Yesu  opankeiye ntoko muchu veelaponi yavathi sinnanihusiha wi owo onahaala opaka sincipale opwaha vaavaa ntoko Mwene a Omwene wa Muluku wirimu. Muthokororye yeeyo enahaala weereya moohilekela vathi va olamulelo wa Kristu. Nnahaala opuha okumi woophaameya nthowa nawi owo onahaala oviihavo ireca soothene ni ohooxeya yoowo achu anahoolelaaya olelo. (Yes. 33:24; 35:5, 6; Wup. 21:3, 4) Hinrwa nivoliwa etala naari ohooxeya nthowa na ipahu sa maphacuwelo. (Yes. 25:6; Mar. 4:41) Nnahaala okhalano ohakalala otokweene moorweela wa owaakhela oosiveliwa ahu anahaala okookela okhala akumi orweela “mmahiyeni anuupuweliwa.” (Yoh. 5:28, 29) Yootikhiniha taani xaxaxa munawehereryaanyu waakhela mu elapo evyaani?

⁸ Vaavaa aapakeiye sootikhiniha, Yesu aanooniherya wiiyeviha otokweene ni niphwanya—mikhalelo seiho nnaphwanelaahu otakiherya. Vano hankooni nthokororye sootakiherya piili, nipaceryaka ni efesta ya othela weeren’ye o Kana.

9. Tiheeni Yesu aapankeiye mu efesta ya othela? (Yohani 2:6-10)

⁹ Mwaalakhanye Yohani 2:6-10. Vaavaa eviinyu yaamanlaaya mu efesta ya othela, apwanne waari murici wa Yesu weeravo echu wi akhaviherye? Hooye. Hiyaavo yooloherya yaaloca wi Mesiya ahaala opaka eviinyu mootikhiniha. Nyenya pahiru mwaanyiherye mukhalelo mwaahaalaanyu okhala waakhanle wi soowurya soomala mu efesta ya othela wanyu. Mwawooneya Yesu aahooniherya niphwanya wa emusi xaxaxa wa alipa oothela nave haachuna wi awo yuuliheye  muru. Mwawiihiiha, ntoko etharihiwaaya woopaceryani, owo aahipaka yootikhiniha emoha. Owo aahitatuxa maahi awaakhwana iliitru 390 ekhala eviinyu yaphaama. Akhweya owo aahaavaha eviinyu yincipale wi ehale ni yoolakelela ya ophariheliwa omwaahiyu naari ophiyerya tho wi etumihiwe wi ikhorowa sene simukhaviherye mutheli muvyaani. Mweeparipari mutheli muvyaani aahithamalela vancipale!

10. Echu taani nnahuseryaahu enaphwanyeya mu Yohani ekapitulu 2? (Moone tho eruku.)

¹⁰ Muthokororye ichu savakhaani soochuneya sinatharihiwa mu yaweereya enaphwanyeya mu Yohani ekapitulu 2. Apwanne mohoona wi tahi wi aari Yesu aasarinhemo maahi mmino sa maluku? Ohiya wiiruuhela ncicimiho mwaneene, owo ahiloca ni alapeli wi esareihe mino. ((Iversikulu 6, 7) Nave amanle otatuxa maahi ekhala eviinyu, Yesu haakunxe mwaneene wi amunnye muhooleli a efesta, ohiya yeeyo, owo aahaaleela alapeli wi yeereno yeeyo. (Eversikulu 8) Yesu haamukunxe kanika a eviinyu eemela ohoolo wa alipa oowompwa, iirumiha ariki: ‘Mulawihe eviinyu kimanlaaka opaka!’

11. Tiheeni nnahuseryaahu orweela mu yootikhiniha ya Yesu?

¹¹ Tiheeni nnahuseryaahu mu yootikhiniha ya Yesu ya otatuxa maahi ekhala eviinyu? Ninnahuserya okhala awiiyeviha. Yesu hiiruminhe vooloca sa yootikhiniha yeele, nave mweeparipari owo hintonko wiirumiha vooloca sa echu vyakala aapankeiye. Moohiyana, mwawiiyeviha ni mwawuuluulela owo aaveleela ncicimiho noothene wa Atiithi awe. (Yoh. 5:19, 30; 8:28) Wakhala wi ninnamutakiherya Yesu moorweela wa otitelela okhalano moonelo wa wiiyeviha vooloca sa hiyo, hinnahaala wiirumiha vooloca sa echu vyakala nnapakaahu. Moohipwacha yeeyo nnapakaahu mmuteko wa Yehova, hankooni niirumiheke, ohiya vooloca sa hiyo nyenya vooloca sa ekari nryaahuno ya omurumeela Tiithi ahu aphaamaxa. (Yer. 9:23, 24) Nnaphwanela omvaha ncicimiho noothene owo onaphwaneleiye. Opwaha soothene, echu taani yaphaama naahaalaahu opaka nihirino nikhaviheryo na Yehova?—1 Ako. 1:26-31.

12. Mmukhalelo taani mukina nneeraahu ntakiherye wiiyeviha wa Yesu? Mphwanaphwanihe.

¹² Muthokororye mukhalelo mukina nneeraahu ntakiherye wiiyeviha wa Yesu. Mutokweene mmoha mmulokoni onnamaliha elukuluku yincipale amukhaviheryaka murummwa oorumeela yoowo ori mmiravo wiirehererya ntakhara mwaha awe woopacerya. Ntoko yookhumelela, munna ori mmiravo onnapaka mwaha woolipiha, yoowo onaahakalaliha achu a muloko woothene. Omanle muthukumano, anna annaloca ni mutokweene ole eriki: ‘Munna Nexe ooperekha mwaha awe phaamaxa; tahi yeeyo?’ Aphwanne mutokweene a muloko onaphwanela oloca: ‘Aai, nyenya koomaliha elukuluku yincipale kimukhaviheryaka’? Naari akhweya owo mwawiiyeviha onahaala oloca: ‘Aai, owo operekha. Miyaano kinniirumiha vancipale ni yoowo’? Vaavaa nnakhalaahu awiiyeviha, hanchuna wiiruuhela ncicimiho ntakhara ichu saphaama niweerenlaahu akina. Ninnasiveliwa osuwela wi Yehova onnoona nave onnavaha esisapo yeeyo nnapakaahu. (Mulikanyihe ni Mateyu 6:2-4; Ahe. 13:16) Chiryeene, ninnamuhakalaliha Yehova vaavaa nnamutakiheryaahu Yesu mu wooniherya wiiyeviha.—1 Pet. 5:6.

13. Tiheeni Yesu onneiye vaavaa aacameleiye epooma yo Nayini, nave tiheeni aapankeiye vooloca sa yeeyo? (Luka 7:11-15)

¹³ Mwaalakhanye Luka 7:11-15. Mwaanyiherye yeeyo yeeren’ye variyari va orummwa wa Yesu. Owo aahipaka mukwaha ayaaka o Nayini, epooma emoha ya o Kalileya, waacamela o Xunemi, weiwo mulipa a miririmu Eliseu aamvinheiye mookhwani mwaana a muthiyana mmoha iyaakha 900 muculi. (2 Mam. 4:32-37) Vaavaa Yesu aacamenleiye mulako wa epooma,  owo aahiwoona achu eteenxe muruchu ekhumaka mu epooma. Yookhalavo echu yoothananiha mu yaweereya yeela—naamukhweli mmoha onnamuyeleela mwanawe mmoharu. Nyenya naamukhweli ole haari meekheiye; muloko mutokweene wa epooma waari ni yoowo. Yesu aaheemexa muloko nave aahipaka echu yeeyo yaamuhakalalinhe vancipale maayi yoole aari naamukhweli—owo aahimviiha mookhwani mwanawe! Ola oviihiwa mookhwani woopacerya wa miraru Yesu opankeiye seiho xaxaxa anatharihiwa mu aliivuru a michaka.

14. Tiheeni nnahuseryaahu orweela mu yaweereya enaphwanyeya mu Luka ekapitulu 7? (Moone tho eruku.)

¹⁴ Muthokororye ichu savakhaani nnahuseryaahu mu yaweereya enaphwanyeya mu Luka ekapitulu 7. Apwanne mohoona wi vaavaa Yesu ‘aamonneiye’ maayi inlaka voocharela ‘aamoriwa ikharari’ ni yoowo? (Eversikulu 13) Akhweya Yesu aahimoona maayi inlaka vaavaa eeceiye waacamela wa muruchu wa mwanawe nave aahimoriwa ikharari ni yoowo. Tahi wi pahiru Yesu aamoriwe ikharari ni maayi, nyenya owo aahooniherya niphwanya nawe ntakhara yoowo. Yesu aahiloca ni maayi, moohikhwa minikwa ni nsu noosivela ariki: “Omaale wunla.” Voocharela aaheeravo echu wi amukhaviherye yoowo. Owo aahimviiha mookhwani mwaana nave “aamveleela wa amama awe.”—Iversikulu 14, 15.

15. Tiheeni nnahuseryaahu orweela mu yootikhiniha ya Yesu?

¹⁵ Tiheeni nnahuseryaahu orweela mu yootikhiniha ya Yesu ya omviiha mookhwani mwaana a naamukhweli? Ninnahuserya wi nnaphwanela wooniherya niphwanya wa achu yaale aninla. Mweeparipari hiyaano hannawerya waaviiha achu mookhwani, hiihaa ntoko Yesu eereiye. Nyenya ntoko Yesu, nnanwerya wunnuwiha mukhalelo wa niphwanya wa yaale aninla moorweela wa okhala oovareryela. Nnanwerya opaceryiha wooniherya niphwanya moorweela wa oloca naari weera echu yeeyo nnaweryaahu wi naakhaviherye ni waalipiha yaawo. d (Mas. 17:17; 2 Ako. 1:3, 4; 1 Pet. 3:8) Ophiyerya tho wi miteko mikhaani nyenya soosivela sinanwerya waalipiha ni waahakararya vancipale yaawo.

16. Ntoko enooniheryiwaaya va eruku, tiheeni nnahuseryaahu orweela mu yaweereya ya maayi yoowo omuyelenle mwanawe mookhwani hiihaanoru?

¹⁶ Muthokororye yaweereya emoha. Iyaakha  sakhalai muculi vaavaa achu yiipaaya ncipo mmithukumano wa muloko, murokora mmoha aahimoona maayi yoowo aari vakhiviru vawe inlaka. Ncipo naaloca sa ewehereryo ya ovinya mookhwani nave maayi yoole iiha amuyeleenle mwanawe amwaamuthiyana mookhwani. Vaavaa aasuwenleiye sa yeela, murokora yoole mwawaakuveya aahimukhupaarela maayi yoole nave yaahikwaaxa ncipo nenle vamoha. Voocharela maayi yoole aahiloca: “Kaahoona wi anna ni arokora yaanakisivela vancipale.” Aahithamalela vancipale nthowa na oya mmithukumano. Owo ooloca: “Kinnaakhela nikhaviheryo mu Empa ya Omwene.” Nnanwerya woona wi Yehova onnoona ni onnavaha esisapo echu ekhaani nnapakaahu wi naakhaviherye yaale ari “oothanana mmunepani.”—Sal. 34:18, PMM.

17. Tiheeni nihusenryaahu mmwaha yoola?

¹⁷ Nnanwerya olipiheya vancipale vaavaa nnahuseryaahu saweereya sa Mpiipiliyani vooloca sa sootikhiniha sa Yesu. Iho sinnanihusiha wi Yehova ni Yesu annanisivela vancipale, wi Yesu ookhalano owerya wa omaliha makacamiho a achu oothene, nave wi nnanwerya ororomela wi yoororomeliha yaphaama ya omwaahiyu enahaala waakhwanela vaavaa Omwene wa Muluku oneeraaya olamuleleke veelaponi yavathi. Vaavaa nnathokororyaahu saweereya seiho nnaphwanela wuupuwelela ti mwawiihai nneeraahu ntakiherye mikhalelo sa Yesu. Munoona hai opaka marehereryo a yoohuserya ya muchu mukhateiye naari a Malapelo a Echoko wi mutikitheryeye mu sootikhiniha ikina sa Yesu? Moone yeeyo muneeraanyu muhuserye, nave voocharela mukawane yeeyo muhusenryaanyu ni akina. Vaavaa muneeraanyuno yeela, munanwerya okhalano ovaanela wamphurelo!—Aro. 1:11, 12.

18. Tiheeni nnahaalaahu othokororya mmwaha onacharela?

¹⁸ Omakuchuwelo wa orummwa awe, Yesu aahipaka yootikhiniha awe yaneeraru ni yookuchula ya omviiha muchu mookhwani enalociwa Mpiipiliyani. Nyenya ola waari woohiyana—owo aahimviiha mookhwani nthamwene awe oosiveliwa. Nave eenreno eyo mmikhalelo sahaari sawunlaana. Tiheeni nnahuseryaahu orweela mu yootikhiniha yeeyo? Nave ti mwawiihai nneeraahu nlipihe nroromelo nahu mu ewehereryo ya ovinya mookhwani? Mwaha onacharela onahaala waakhula makoho yaala.