1. Tiheeni nnaroromelaahu?

 NTOKO achu a Yehova, noosuwela wi owo onnanisivela vancipale nave onachuna wi nihakalaleke. (Aro. 8:35-39) Ninnasuwela tho wi ninnaphura vancipale vaavaa nnapharihelaahu malakiheryo a Mpiipiliyani. (Yes. 48:17, 18) Vano ti mwawiihai nneeraahu naakhulele vaavaa nnakhumelelaaya nikacamiho noohiwehereryeya mu okumi ahu?

2. Makacamiho taani nneeraahu nihoolele nave minikwa taani akhweya enahaala okhumelela?

² Alapeli oothene a Yehova annahoolela makacamiho. Ntoko yootakiherya, mmoha aveemusini akhweya onanwerya oninyeenyeiha naari akhweya ninnahoolela nikacamiho noovila na okumi nenlo naahaala onihiiha opaka soothene naachunaahu mmuteko wa Yehova. Akhweya nnanwerya ohoolela ipahu sa maphacuwelo naari wiikariwa nthowa na nroromelo nahu. Vaavaa nnahoolelaahu makacamiho ntoko yaala, nnanwerya wiikoha: ‘Ntakhara heeni ela enneereya ni miyo? Apwanne kipanke echu yoonanara? Apwanne ela enooniherya wi nkaano mareeliho a Yehova?’ Akhweya mohintoko wiisoona hiihaa. Mwawiihiiha, muhiceecheye. Alapeli ancipale oororomeleya a Yehova ahiisoona tho hiihaa.—Sal. 22:1, 2; Hap. 1:2, 3.

3. Tiheeni nnahuseryaahu orweela mu Salmu 34:19?

³ Mwaalakhanye Salmu 34:19. Salmu yoola onnaloca ipontu piili soochuneya: (1) Awookololowa annahoolela makacamiho. (2) Yehova onnanaakiha mmakacamiho ahu. Yehova oneerano  hai yeela? Mukhalelo mmoha ori moorweela wa onikhaviherya okhalano moonelo woophwanelela vooloca sa okumi ahu mmukhalelo yoola wa ichu. Yehova onnanroromeliha wi nnahaala okhalano okumi woohakalaliha vaavaa nnamurumeelaahu yoowo. Naamwi hiihaa, owo hanaroromeliha wi hinikhalano makacamiho mookumini. (Yes. 66:14) Yehova onnaniceenyerya otikitheryeya mu omwaahiyu, vaavaa nneeraahu nikhaleno okumi owo onachuneiye—okumi woohimala ni woohakalaliha. (2 Ako. 4:16-18) Niweheryaka, Yehova onahaala onikhaviherya wi ntitelele omurumeela yoowo nihiku nnihiku moohipwacha makacamiho.—Wiik. 3:22-24.

4. Tiheeni nnahaalaahu othokororya mmwaha yoola?

⁴ Vano hankooni noone yeeyo nnahuseryaahu orweela mu sootakiherya sa alapeli oororomeleya a Yehova akhalai ni a mmahiku ahu. Ntoko nnahaalaahu woona, nnanwerya ohoolela makacamiho oohiwehereryeya. Nyenya vaavaa nnamuroromelaahu Yehova, owo ilukuluku soothene onahaala onikhaviheryaka. (Sal. 55:22) Vaavaa nnathokororyaahu sootakiherya seiho, mwiikohe: ‘Kaahaala waakhulela hai mmukhalelo ntoko yoola? Ti mwawiihai sootakiherya seiha sinalipihaaya nroromelo naka mwa Yehova? Mahusiheryo taani kinaphwanelaaka opharihela mu okumi aka?’

5. Makacamiho taani Yakopo aahoolenleiye nthowa na Lapani? (Moone eruku ya ekaapa.)

⁵ Alapeli oororomeleya a Yehova akhalai yaahihoolela makacamiho yaawo yaahiwehereryaaya. Moone yootakiherya ya Yakopo. Apapaawe yaahimuleela wi amuthanle mmoha a anamwane a Lapani ntoko mwaariye, yoowo aari Mmusi nave tho aamulapela Yehova. Apapaawe Yaakopo yaahiloca wi eerano yeeyo, moohikhwa minikwa aahaala oreelihiwa vancipale ni Yehova. (Map. 28:1-4) Mwawiihiiha, Yakopo aahiwiiwelela. Owo aahikhuma o Kana nave apaka mukwaha ayaaka vaate va Lapani, yoowo aarino anamwane eeli—Liiya ni Rakeli. Yakopo aamuchuna mwaana amwaamukhaani, Rakeli, nave aaheemererya omulapa Lapani mu iyaakha 7 wi awerye omuthela yoowo. (Map. 29:18) Nyenya tahi yeeyo yeeren’ye. Lapani aahinwoka Yakopo, eerihaka wi owo amuthele mwaana a mutokweene, Liiya. Lapani aaheemererya wi Yakopo amuthele Rakeli emanle oviravo esumana emoha, nyenya owo tho aaphwanela olapa iyaakha ikina 7 ntakhara yoowo. (Map. 29:25-27) Lapani tho haari oororomeleya mu anakoso aapakeiye ni Yakopo, naalakhanyerya, Yakopo aahimulapa Lapani mu iyaakha 20!—Map. 31:41, 42.

6. Makacamiho taani makina Yakopo aahoolenleiye?

⁶ Yakopo aahihoolela makacamiho makina. Owo aahikhalano echoko etokweene, nyenya tahi wi ilukuluku soothene anamwane awe yaanakhalihana phaama mukina ni mukhwaawe. Ophiyerya wi awo yaahimutumiha munnaya, Yosefe, ntoko kapuro. Anamwane eeli a Yakopo, Siimiyoni ni Levi, yaahinanariha ohiya pahiru nsina na echoko, nyenya tho nsina na Yehova. Ohiya yeeyo, Rakeli, mwaara oosiveliwa a Yakopo, aahikhwa amuyaraka mwaana anaawiili. Nave nthowa na etala etokweene yaakhumelenle weiwo yaakhalaayawo, Yakopo aahithaamela o Yikuputu naamwi aari awuuluvala.—Map. 34:30; 35:16-19; 37:28; 45:9-11, 28.

7. Ti mwawiihai Yehova aamuroromelinheiye Yakopo wi aanamweemererya yoowo?

⁷ Naamwi mmakacamiho oothene yaala, Yakopo hintonko oyeleela nroromelo nawe mwa Yehova ni mu soororomeliha Sawe. Nave Yehova aahimuroromeliha Yakopo wi aanamweemererya yoowo. Ntoko yootakiherya, naamwi Lapani ikwaha sincipale eererya onwoka Yakopo, Yehova ilukuluku soothene aanamureeliha yoowo omwiilini. Nave muupuwele mukhalelo Yakopo aamuthamalenleiye Yehova vaavaa aamonneiye wanaawiili mwanawe oosiveliwa Yosefe—yoowo uupuweleiye wi aahikhwa mu iyaakha sa muculi!  Onthamwene woolipa Yakopo aareiyeno ni Yehova ti waamukhavihenrye okhumelela phaama mmakacamiho oothene yaale. (Map. 30:43; 32:9, 10; 46:28-30) Vaavaa nnatitelelaahu okhalano onthamwene woolipa ni Yehova, nnahaala tho okhumelela phaama vaavaa nnahoolelaahu makacamiho oohiwehereryeya.

8. Tiheeni Mwene Tavite aachuneiye opaka?

⁸ Mwene Tavite haawenrye opaka soothene aachuneiye mmuteko wa Yehova. Ntoko yootakiherya, owo aanachuna vancipale oteka empa ntakhara Muluku awe. Owo aahimuleela yoochuna awe mulipa a miririmu Natani. Ntoko naakhulo, Natani aahiloca: “Haweni mweereno yeeyo munuupuwelelaanyu ntakhara Muluku ori ni nyuwo.” (1 Math. 17:1, 2, PMM) Masu yaala yaahimulipiha vancipale Tavite. Akhweya mwawaakuveya owo aahipacerya opaka marehereryo ntakhara muteko.

9. Ti mwawiihai Tavite aakhulenleiye vaavaa aakhenleiye muchaka woothananiha?

⁹ Nyenya voocharela, mulipa a miririmu a Yehova aahikooka ni muchaka woothananiha. Mu “ohiyu ene yoole” Yehova aahiloca wa Natani wi Tavite hi ateke empa, ohiya yeeyo, mmoha a anamwane awe taahaala weerano yeeyo. (1 Math. 17:3, 4, 11, 12) Ti mwawiihai Tavite aakhulenleiye vaavaa aakhenleiye muchaka yoola? Owo aahitoroka yoochuna awe. Tavite aahipacerya otikitheryeya mu othukumanya ikhorowa ni ikaruma soochuneya seiho Soolomoni aahaaleiye ochuna ntakhara muteko.—1 Math. 29:1-5.

10. Ti mwawiihai Yehova aamureelinheiye Tavite?

¹⁰ Amanle omuleela Tavite wi haahaala oteka empa, Yehova aahipaka nlakano ni yoowo. Yehova aahimuroromeliha wi mmoha wa muyareriwo wa Tavite aahaala olamulela okhala wookhala. (2 Sam. 7:16) Mu elapo evyaani, variyari va Olamulelo wa Iyaakha Miili, Tavite onahaala okhala oohakalala vaavaa oneereiye asuwele wi Mwene Yesu, mmoha a muyareriwo awe. Yaweereya yeela ennanikhaviherya woona wi naamwi nihiweryaka opaka soothene naachunaahu ntakhara Yehova, Muluku ahu onanwerya onireeliha mmikhalelo mikina, mareeliho yaawo nihintonkaahu wuupuwela wi naahaala okhalano.

11. Ti mwawiihai Akristu a mu nsana noopacerya yaareelihiwaaya naamwi Omwene wahaaphin’ye mu elukuluku yaaweheryaaya? (Saweeriwa ti Arummwa 6:7)

¹¹ Akristu a mu nsana noopacerya yaahihoolela makacamiho yaawo yahaawehereryaaya. Ntoko yootakiherya, awo yaanachuna vancipale Omwene wa Muluku waaruule, nyenya hiyaasuwela elukuluku ene eyo yaahaalaaya weereya. (Saw. 1:6, 7) Vano, tiheeni awo yaapankaaya? Yaahititelela oweiwa mmuteko woolaleerya. Vaavaa yaaweiwaaya olaleerya mmapuro oothene, yaahiwerya woona wi Yehova aanaakhaviherya vancipale.—Mwaalakhanye Saweeriwa ti Arummwa 6:7.

12. Tiheeni Akristu a mu nsana noopacerya yaapankaaya vaavaa yaakhumelenlaaya etala etokweene?

¹² Mu elukuluku aya, yaahikhumelela etala etokweene “mu elapo yoothene yavathi.” (Saw. 11:28) Nave Akristu a mu elukuluku yeele yaahivoloweliwa tho. Mwaanyiherye mukhalelo yaahooxen’yaaya nthowa na etala yeeyo. Moohikhwa minikwa, miru sa ichoko saahikhala sawuukhuwaxa vooloca sa mukhalelo wa ovakulela ichoko saya. Mwaanyiherye tho mukhalelo eyo yaavolowenlaaya amiravo yaale yaachuna waaceererya orummwa aya. Akhweya awo yaahuupuwela oweherya vakhaani. Naamwi mikhalelo saya saari soohiyana, Akristu yaale yaahiikhoveleliha. Awo yaahititelela olaleerya ophiyerya vaavaa yaaweryelaayavo nave yaanasiveliwa okawana ichu soomwiilini yaaryaayano ni anna o Yuteya.—Saw. 11:29, 30.

13. Ti mwawiihai Akristu yaareelihinwaaya variyari va elukuluku ya etala?

¹³ Ti mwawiihai Akristu yaale yaareelihinwaaya variyari va elukuluku ya etala? Yaale yaakhenle nikhaviheryo noomwiilini, yaahoona mukhalelo Yehova aakhaviheryeiye. (Mat. 6:31-33) Akhweya awo yaahikhala awaacameleyaxa wa anna yaawo  yaawaakhavihenrye. Nave yaale yaapanke sooveleela naari yaakhavihenrye mmikhalelo mikina, yaahoona ohakalala onakhalavo mu waakhaviherya akina. (Saw. 20:35) Yehova aahaareeliha oothene yaale nthowa na wiikhoveleliha mikhalelo seihe soovila.

14. Tiheeni yeeren’ye ni Parnape vamoha ni Paulo, nyenya ni yookhumelela taani? (Saweeriwa ti Arummwa 14:21, 22)

¹⁴ Mu nsana noopacerya, Akristu wiiliwiili yaaniikariwa, nave ikwaha sincipale, mu elukuluku yeeyo yahaaweheryaaya. Moone yeeyo yeeren’ye ni Parnape vamoha ni Paulo vaavaa yaalaleeryaaya o Listra. Woopaceryani, achu yaahiwaakhela phaama nave yaanawiriyana yeeyo yaalocaaya. Nave voocharela, amwiicani, ‘yaahituunyerya muloko’ nave akina a yaale yaawiriyanne woopaceryani, yaahimvonya Paulo maluku nave emuhiya wi akhwe. (Saw. 14:19) Naamwi hiihaa, Parnape ni Paulo yaahititelela olaleerya mmapuro makina. Teevi yaari yookhumelela? Awo yaahaapaka “oohuserya ancipale.” Ohiya yeeyo, masu ni yootakiherya aya yaahaalipiha anna a mu elukuluku yeele. (Mwaalakhanye Saweeriwa ti Arummwa 14:21, 22.) Paulo ni Parnape hiyaahin’ye olaleerya naamwi yiikariwaka, nave nthowa na yeeyo ancipale yaahiphuravo. Nahihiya ophara muteko yoowo Yehova onirummeiye, moohikhwa minikwa nnahaala tho oreelihiwa.

15. Tiheeni nnahuseryaahu orweela wa yootakiherya ya Munna Macmillan?

¹⁵ Ehaakumve eyaakha ya 1914, saahikhalavo ichu seiho achu a Yehova yaaroromelaaya wi saahaala weereya. Ntoko yootakiherya, moone yeeyo yeeren’ye ni Munna Macmillan. Ntoko ancipale a mu elukuluku yeele, owo uupuwela wi aahaala waakhela nchuwelo nawe na oya wirimu mu elukuluku yeele. Mmwaha mmoha aapankeiye mu Setempuru a 1914, owo aahiloca: “Ola akhweya mwaha aka wookuchula.” Mweeparipari, ole hiwaari mwaha awe wookuchula. Mu elukuluku yavakhaani ohoolo waya, Munna Macmillan aahirepa: “Akhweya hinoonihenrye moonelo woophimelela vaavaa nuupuwelaahu wi naahaala oya wirimu moohilekela. Nyenya naaphwanela otitelela oweiwa mmuteko wa Apwiya.” Nave Munna Macmillan chiryeene aari ooweiwa mmuteko yoola. Owo aahititelela olaleerya mwamvai. Owo tho aahikhalano ekari ya waalipiha anna ancipale yaawo yaawaleliwe nthowa na ohipaka makupa a elapo. Nyenya naamwi uuluvanle, moororomeleya aanatitelela oya mmithukumano. Ntakhara heeni waaryaaya waphaama wa Munna Macmillan okhala ooweiwa mmuteko wa Yehova vaavaa aawehereryeiye nchuwelo nawe? Elukuluku vakhaani ahaakumve okhwa mu 1966, owo aarepa: “Nroromelo naka ti noolipaxa hiihava ntoko waaryaaya khalai.” Ela yootakiherya yaphaamaxa wi oothene ahu ncharihe—xaxaxa wakhala wi makacamiho ahu annamaliha elukuluku yincipale opwaha vaavaa naaweheryaahu!—Ahe. 13:7.

16. Nikacamiho taani noohiwehereryeya Munna Herbert Jennings ni amwaariye yaahoolenlaaya? (Tiyaku 4:14)

¹⁶ Alapeli ancipale a Yehova annahoolela makacamiho a okumi oohiwehereryeya. Ntoko yootakiherya, mu yaweereya awe ya okumi, Munna Herbert Jennings b aahithariha mukhalelo owo ni amwaariye yaasiveliwaaya okhala mamisiyonaario o Kaana. Nyenya moovira wa elukuluku, aahiphwanyiwano ereca ya mmuupuweloni. Apharihelaka masu a mu Tiyaku 4:14, Munna Jennings aahiloca wi mukhalelo awe waari “ntoko ‘omeelo’ yoowo ahaawehereryeiye.” (Mwaalakhanye.) Owo oorepa: “Naaheemererya mukhalelo ahu, nave niirehererya wi nimuhiye Kaana vamoha ni asinthamwene ahu ancipale awaacameleya, wi nikookele o Kanata wi kalooliwe.” Yehova aahimukhaviherya Munna Jennings  ni mwaariye otitelela omurumeela yoowo moororomeleya, naamwi ehoolelaka nikacamiho nenle nivyaani.

17. Ti mwawiihai yaweereya ya Munna Jennings yaakhavihenryaaya anna akina?

¹⁷ Masu ookhuma vathi va murima wa Munna Jennings anaphwanyeya mu yaweereya ya okumi awe yaahaavolowela vatokweene achu ancipale. Murokora mmoha oorepa: “Nkintonko waalakhanya mwaha waakivolowenle vancipale ntoko yoola. . . . Waalakhanya wi Munna Jennings aaphwanela ohiya murici wi aloole ereca awe, yaahikikhaviherya woona nikacamiho naka mmukhalelo woophimelela.” Munna mmoha oorepa: “Kimanle orumeela ntoko mutokweene a muloko mu iyaakha khumi, kaaphwanela ohiya murici yoole nthowa na nikacamiho na mmuupuweloni. Kaanatepa wiisoona ohikhala echweenevo, nave ikwaha sincipale waalakhanya saweereya sa okumi saanakiceecheiha vancipale. . . . Nyenya ovilela wa Munna Jennings waahikilipiha.” Ela ennanuupuxerya wi naamwi nihoolelaka makacamiho oohiwehereryeya, nnanwerya waalipiha akina. Ikwaha ikina, naamwi ichu siheecaka ntoko naawehereryaahu, nnanwerya okhala yootakiherya yaphaama ya nroromelo ni ovilela wa akina.—1 Pet. 5:9.

18. Ntoko enatharihiwaaya va eruku, tiheeni nnahuseryaahu orweela wa yootakiherya ya murokora o Nixeriya?

¹⁸ Mikhalelo soovila ntoko epahu ya Koronaviru, yohaavolowela annihu ancipale. Ntoko yootakiherya, naamukhweli mmoha o Nixeriya haarino ikhorowa wi athumeno yoolya. Nihiku nimoha, mwanawe amwaamuthiyana aahaakoha vooloca sa tiheeni yaahaalaaya olya emanle omwaapeya kanika ookuchula a mvuka yaaryaayano. Murokora aahiloca wa mwanawe wi awo hiyaarino ikhorowa naari yoolya, mwawiihiiha, yaaphwanela ochariha yootakiherya ya naamukhweli o Sarefa—orehererya yoolya yookuchula ni omuroromela moomalela Yehova. (1 Mam. 17:8-16) Mu nihiku nenle ehaakumve opacerya wuukhuwa ni yeeyo yaahaalaaya olya mu alumoosu, yaahaakhela murupa waarimo yoolya orweela wa anna. Yoolya yeeyo yaari yawaakhwanela wi elye mu isumana opwaha piili. Murokora  ooloca wi mu elukuluku yeele owo aahoona mukhalelo Yehova aatikitheren’yeiye wa yoowo vaavaa aalonceiye yeele wa mwanawe. Tiheeni nnahuseryaahuvo? Eparipari ti yawi vaavaa nnamuroromelaahu mweeparipari Yehova, makacamiho oohiwehereryeya anakhumelela mu okumi ahu ananwerya onaacameliha vancipale wa yoowo.—1 Pet. 5:6, 7.

19. Wiikariwa wa mukhalelo taani munna Aleksey aahoolenleiye?

¹⁹ Nikacamiho nikina noohiwehereryeya anna ancipale anahoolelaaya olelo ori wiikariwa. Ntoko yootakiherya, moone yeeyo yeeren’ye ni Munna Aleksey Yershov, onakhala o Rusiya. Vaavaa aapatisiweiye mu 1994, anna yaari ootaphuwa mmukuma yoole. Nyenya imanle iyaakha sincipale ohoolo waya, mukhalelo waahitorokeya. Mu 2020, empa awe yaahitholatholiwa nave alamuleli yaahikusa ichu sawe sincipale. Mu miyeeri savakhaani ohoolo waya, alamuleli yaanamuthoriha owo ntoko mulipa aweera soonanara. Moothananiha, sooleeliherya saaphariheliwa ntakhara yoowo saari ixilema saapakiwe ni muchu yoowo mu iyaakha sincipale iiseera okhalano nchuno na omuhuserya Piipiliya. Mwaanyiherye mukhalelo Aleksey iisoonneiye vaavaa aamwareeliweiye!

20. Ti mwawiihai Munna Yershov olipinheiye onthamwene awe ni Yehova?

²⁰ Apwanne wiikariwa Munna Yershov aahoolenleiye yaahikumiherya echu yaphaama? Aai. Onthamwene awe ni Yehova waahilipa vancipale. Owo ooloca: “Miyaano ni amwaaraka ninnavekela vamoha mu ikwaha sincipale. Kinnasuwela wi nki kiwerye ohoolela nikacamiho nenla nihirivo nikhaviheryo na Yehova. Yoohuserya ya Piipiliya ya muchu mukhateiye ennakikhaviherya owaniha ni oceecheya. Kinnasiveliwa wuupuwelela sootakiherya sa alapeli oororomeleya akhalai. Mpiipiliyani sookhalamo miyaha sincipale inooniherya mukhalelo oryaaya woochuneya okhala oomaaleleya ni omuroromela Yehova.”

21. Tiheeni nihusenryaahu mmwaha yoola?

²¹ Tiheeni nihusenryaahu mmwaha yoola? Mmukhalelo yoola wa ichu, nnanwerya ohoolela makacamiho oohiwehereryeya. Naamwi hiihaa, Yehova ilukuluku soothene onnaakhaviherya yaale anamuroromela yoowo. Nave ntoko yoorepa ya mwaha yoola enalocaaya: “Masooso a awookololowa murima annaaca, nto Apwiya [Yehova] onnamwaakiha mwa oothene awo.” (Sal. 34:19, PMM) Mwawiihiiha, ohiya otikitheryeya mmakacamiho, nnaphwanela otikitheryeya mu owerya Yehova oreiyeno wa onikhaviherya. Wakhala wi noheerano yeeyo, nnanwerya oloca echu emohamoha murummwa Paulo aalonceiye: “Kinnawerya soothene moorweela wa yoowo onakivaha ikuru.”—Afi. 4:13.