1. Musamariya yoowo Yesu aampenunseiye ooniherye hai othamalela?

ALOPWANA khumi yaari mmukhalelo woovila. Awo yaahikhalano mareca, nave awo hiyaarino ewehereryo wi okumi aya waahaala okhala phaama. Nyenya nihiku nimoha, awo yaahimoona Yesu, Muhusiha Mutokweene, arwaaka ociiwene. Awo yaahiiwa wi Yesu aanapenusa ireca sa mukhalelo woothene, nave awo yaari oolekecheya wi owo aahaala owerya waapenusa tho. Vano awo yaahikhuwela moovuwa: “Yeesu, muhusiha, munimorele ikharari.” Alopwana khumi ale yaahipenuwa mwawaakhwanela. Moohikhwa minikwa oothene yaawo yaahithamalela oreera murima wa Yesu. Mwawiihiiha mmoha a yaawo, aahipaka sincipale opwaha okhalano moonelo wa othamalela—owo aahooniherya othamalela wawe * wa Yesu. Mulopwana ole aapenusiwe, yoowo aari Musamariya aahiceenyeryeya omucicimiha Muluku “alipihaka nsu.”—Luka 17:12-19.

2-3. (1) Ntakhara heeni nnamuhesa wooniherya othamalela? (2) Tiheeni nnahaalaahu othokororya mmwaha yoola?

² Moolikana ni Musamariya, hiyo nnaphwanela wooniherya othamalela wahu wa yaale ari ooreera mirima. Nyenya mu ikwaha ikina, nnamucuwala othamalela naari owooniherya akina mukhalelo nnoonaahu vooloca sa oreera waya murima.

³ Mmwaha yoola, nnahaala othokororya ntakhara heeni oryaaya woochuneyasa wooniherya othamalela moorweela mwa yeeyo nnalocaahu ni nnapakaahu. Nnahaala ohuserya orweela wa sootakiherya sa achu analociwa Mpiipiliyani yaawo yooniherye othamalela ni akina yahoonihenrye othamalela. Voocharela nnahaala othokororya mikhalelo savameekhaaya mummo nneeraahu nooniherye othamalela.

4-5. Ntakhara heeni nnaphwanelaahu wooniherya othamalela?

⁴ Yehova ootikitherya yootakiherya wa hiyo mu wooniherya othamalela. Mukhalelo mmoha owo onapakeiye yeeyo ori mu waareeliha yaale anamuhakalaliha. (2 Sam. 22:21; Sal. 13:6; Mat. 10:40, 41) Nave Soorempwa sinnanceenyerya wi “mmutakiheryeke Muluku ntoko anamwane awe oosiveliwa.” (Éfe. 5:1) Mwawiihiiha nthowa noochuneyasa nnaneeriha wooniherya othamalela ti nawi nnachuna omutakiherya Yehova.

⁵ Muthokororye nthowa nikina ntakhara heeni nnaphwanelaahu wooniherya othamalela wa akina. Othamalela ori ntoko yoolya yaphaama—enakhala yoopuheya vaavaa achu anuukaaya vamoha. Vaavaa hiyo nnasuwelaahu wi akina annathamalela wa yeeyo nipankaahu, hiyo ninnakhala oohakalala. Vaavaa nnooniheryaahu othamalela wahu, ninnaweeriha akina okhala oohakalala. Muchu yoowo nnamuthamalelaahu onnasuwela wi wiilipiserya wawe onikhaviherya hiyo, naari onivaha wawe echu yeeyo naachunaahu, mweeparipari yoonikhaviherya. Ntoko yookhumelela, onthamwenaahu onnakhala woolipa variyari va hiyo ni muchu ene yoowo.

6. Olikanela taani orivovo variyari va masu a wooniherya othamalela ni yawiima epakiwe ni ewooro?

⁶ Wooniherya wahu othamalela ti wasisapo. Piipiliya onnaloca: “Yawiima ehochiwe ya eworo etikitheryiwa mu eparata, ti masu alociwe moophwanelela.” (Masi. 25:11) Mwaanyiherye mukhalelo yawiima epakiwe ni ewooro vamoha ni eparata enakhalaaya yooreera muchu aawehaka! Nave muupuwele esisapo enakhalaayano! Mwaahaala woona hai waakhanle wi muhaakhela yoovaha sintoko yeeyo? Mweeparipari, masu oothamalela yaawo munooniheryaanyu wa akina ananwerya okhala asisapo. Nave muthokororye eparipari ela: Yawiima yeeyo epakiwe ni ewooro enanwerya okhala mu elukuluku yincipale. Mmukhalelo woolikana, masu anyu a othamalela  ananwerya wuupuweleliwa ni ocicimiheryiwa ni muchu yoowo mmuthamalenlaanyu mu okumi awe woothene.

7. Mmukhalelo taani Tavite ni anamarepa a masalumu akina yooniheryaaya othamalela waya ntoko enooneyaaya mu Salumu 27:4?

⁷ Alapeli ancipale a Muluku akhalai yaahooniherya othamalela. Mmoha a yaawo aari Tavite. (Mwaalakhanye Sal. 27:4.) Owo oona malapelo aweela okhala asisapo nave eyo yaahaala wooneya moorweela wa saweera sawe. Owo aahikhaviherya ni ichu sincipale sasisapo wi etekiwe empa ya Muluku. Muyareriwo wa Asafe waahooniherya othamalela moorweela wa orepa masalumu, naari macipo a ancicimiho. Mu ncipo nimoha, awo yaamuthamalela Muluku nave yaahooniherya ncicimiho naya ntakhara “sootikhiniha” sa Yehova. (Sal. 75:1) Mwawooneya, Tavite ni muyareriwo wa Asafe yaahichuna omooniherya Yehova ophiyerya mweeryo taani yaathamalelaaya mareeliho oothene awo yaakhenlaaya orweela wa yoowo. Apwanne munuupuwela mukhalelo mwaahaalaanyu waatakiherya alipa a masalumu yaawo?

8-9. Mmukhalelo taani murummwa Paulo oonihenryeiye othamalela wa anna ni arokorawe, nave moohikhwa minikwa teevi yaari yookhumelela?

⁸ Murummwa Paulo ahaavaha esisapo anna ni arokorawe nave aahooniherya yeeyo mmukhalelo aaloceiye sa yaawo. Owo ilukuluku soothene aanamuthamalela Muluku ntakhara yaawo mmavekelo aapakeiye mwawiipitheya. Owo tho aahooniherya othamalela elukuluku aarempeiye vooloca sa yaawo. Mu ficiciri 15 soopacerya sa Aroma ecima 16, Paulo ohaaromola Akristu oosiveliwa 27 ni masina aya. Xaxaxa Paulo aahimuupuwela Priska ni Akila “yaawo yaaleva okumi aya” ntakhara yene, nave aahimuthariha Feepi wi “onnatepa waakhaviherya achu” ophitaanyerya Paulo. Owo aahaathamalela oosiveliwa ale, anna ni arokora yaawo yaalapa moowetha.—Aro. 16:1-15.

⁹ Paulo aahisuwela wi anna ni arokorawe toohiphaameya, nyenya arepelaka ekaarata awe o Roma, owo otikitheryeya mu mikhalelo saphaama yaaraayano. Mwaanyiherye mukhalelo anna ni arokora ale yaalipihen’yaaya elukuluku yiiwaaya othamalela wa Paulo waalakhanyiwaka moovuwa mmulokoni! Ntoko yookhumelela, onthamwene aya ni Paulo moohikhwa minikwa waahikhala woolipa. Apwanne munnooniherya othamalela wanyu moohihiyererya wa ichu saphaama anna ni arokora a mmulokoni mwanyu analocaaya ni anapakaaya?

10. Tiheeni nnahuseryaahu orweela wa mukhalelo Yesu oonihenryeiye othamalela wa oomuchara awe?

¹⁰ Yesu, mu ikaarata sawe ikina aarepenleiye o Asiya mukhaani, aahooniherya othamalela ntakhara muteko yoowo oomuchara awe yaapankaaya. Ntoko yootakiherya, owo aahipacerya muchaka awe ntakhara mmuloko wo Tiyatira alocaka: “Koosuwela miteko saa, osivela waa, nroromelo naa, olapa waa ni ovilela waa. Vano onnaphara miteko mincipale opwaha woopaceryani.” (Wup. 2:19) Tahi wi Yesu aaromonle pahiru waaceereryeya wa muteko aya nyenyatho aahaathamalela ntakhara mikhalelo seiyo saaceenyenrye opaka miteko saphaama. Naamwi Yesu aachuna waavaha ekano akina o Tiyatira, owo aapacenrye ni akuchunle muchaka awe ni nlipiho. (Wup. 2:25-28) Muupuwele olamulelo Yesu oreiyeno ntoko muru wa miloko soothene. Owo haaphwanela onithamalela ntakhara muteko nnapakaahu ntakhara yoowo. Naamwi hiiha, owo onnaavya mukhalelo wa onithamalela. Ela yootakiherya yaphaamasa otikithenryeiye wa atokweene!

11. Ntoko yooniheryiwaaya mu Ahebri 12:16, muupuwelo taani Esawu aareiyeno vooloca sa ichu saweela?

¹¹ Moothananiha achu akina analociwa Mpiipiliyani hiyoonihenre othamalela. Ntoko yootakiherya, Naamwi Esawu aaphuiwale ni asitiithi  yaawo yaamusivela nave yaamucicimiha Yehova, owo haathamalenle ichu saweela. (Mwaalakhanye Ahebri 12:16.) Moonelo awe woohithamalela woonen’ye mwawiihai? Esawu moololo aahitumiha otokweene awe wa munnawe mwaamukhaani, Yakopo, ni muhusi wa chipampa. (Map. 25:30-34) Voocharela Esawu aahitepa onanariwa ni yoothanla aapankeiye. Nyenya owo hoonihenrye othamalela wa yeeyo aapankeiye, mwawiihiiha haaphwanela wiikhupanyerya vaavaa ahaakhenleiye mareeliho ntoko oopacerya oyariwa.

12-13. Aisarayeli yoonihenrye hai ohithamalela, nave teevi yaari yookhumelela?

¹² Aisarayeli yaahikhalano mathowa mancipale a wooniherya othamalela. Awo yaahoopoliwa wookapuroni Yehova amanle oruuha Ipahu Khumi o Yikuputu. Voocharela Muluku aahaavulusa mu epahu moorweela wa waatolosa akhoco oothene o Yikuputu mu Eniya Yoophilivila. Aisarayeli yaahithamalela ophiyerya wi yaahiipa ncipo moohakalala noomucicimihano Yehova. Nyenya apwanne awo yaahititelela othamalela?

¹³ Elukuluku Aisarayeli yaakumannaaya ni makacamiho mavyaani, moohilekela awo yaahicuwala ichu soothene saphaama Yehova aapankeiye wa yaawo. Awo yaahuupulula ohooniherya waya othamalela. (Sal. 106:7) Mwawiihai? “Muloko woothene wa aIsarayeli waanamwaapa Mose ni Aroni”—mweeparipari awo yaamwaapa Yehova. (Muk. 16:2, 8) Yehova aananariwa ni moonelo woohithamalela yoowo achu awe yoonihenryaaya. Voocharela owo aalaiherya wi muyareriwo woothene ole wa Aisarayeli waahaala ocakanela mutakhwani, ohiya Yosuwa ni Kalepi. (Nam. 14:22-24; 26:65) Hankooni noone mukhalelo nneeraahu nsepe ochariha sootakiherya seiha soonanara nave ncharihe sootakiherya saphaama.

14-15. (1) Atheli eni yooniherye hai wi annathamalelana mukina ni mukhwaawe? (2) Asitiithi eni yaakhaviherye hai anaaya wooniherya othamalela?

¹⁴ Veemusini. Emusi yoothene ennakhumelela phaama wakhala wi muchu ti muchu veemusini onnooniherya othamalela. Achu oothelana vaavaa anooniheryaaya othamalela wa mukina ni mukhwaawe, onthamwene aya onnakhala woolipa. Awo annoona okhala wookhweya olevelelana mukina ni mukhwaawe yakhalavo mathowa. Mulopwana yoowo onamuthamalela mwaariye tahi wi pahiru onoona ichu saphaama mwaariye onaloceiye ni onapakeiye nyenya “iyawe tho onnamucicimiherya.” (Masi . 31:10, 28) Nave muthiyana a miruku onnamuleela iyawe ichu savameekhaaya seiyo owo onathamaleleiye.

¹⁵ Asitiithi nyuwo, muni mwaahusihe hai  aniinyu wooniherya othamalela? Muupuwele wi aniinyu anahaala otakiherya yeeyo munalocaanyu ni munapakaanyu. Mwawiihiiha mutikitherye yootakiherya yaphaama moorweela wa oloca koothamalela elukuluku aniinyu anapakaaya echu vyakala ntakhara nyuwo. Mwawaaceererya, mwaahusihe aniinyu oloca koothamalela vaavaa akina anapakaaya echu vyakala ntakhara yaawo. Mwaakhaviherye aniinyu wiiwexexa wi wooniherya othamalela eri echu enarweela vathi va murima nave wi masu aya anammweeriha muchu woona phaama. Ntoko yootakiherya, mwali yoowo oniichaniwa Clary ooloca: “Elukuluku amama yaaryaayano iyaakha makhumi mararu napiili, awo yaanuukhuwa waaphuwa meekhaaya anamwane araru. Miyo tho elukuluku kaaphiyenryaaka iyaakha makhumi mararu napiili, kaahuupuwela mukhalelo waaryaaya woovila wa amama mu elukuluku yeele. Mwawiihiiha kaahaaleela mukhalelo kaathamalelaaka wiilipiserya waya waaphuwa asinnaka eeli vamoha ni miyo. Hiihaanoru, awo aakileela wi masu aka nlelo tookhweleyaxa wa yaawo, ophiyerya wi annuupuwelela, nave annaweeriha okhala oohakalala.”

16. Mvahe yootakiherya mmukhalelo wooniherya othamalela onaalipihaaya akina.

¹⁶ Mmulokoni. Vaavaa nnooniheryaahu othamalela wa anna ni arokora, ninnaalipiha yaawo. Ntoko yootakiherya, Xorxe, mutokweene a mmulokoni yoowo orino iyaakha makhumi meeli thanu nararu, aahitepa wiiceliwa. Owo haawenrye ophiya mmithukumano mu mweeri wanteero. Naamwi elukuluku aawenryeiye ophiya mmithukumano, owo nlelo haawerya operekha makupa. Xorxe onneemererya: “Kaaniisoona okhala oohiphwanelela nthowa na okotakota waka ni ohiwerya opaka miteko sa mmulokoni. Nyenya omakuchuwelo wa muthukumano mmoha, munna mmoha aahikileela ariki: ‘Kinachuna woothamalela nthowa na yootakiherya yaphaama yeeyo otikithenryaawe wa emusi aka. Weyaano honawerya waanyiherya mukhalelo naapuhaahu miyaha saa variyari va iyaakha savakhaani ivirale. Miyaha soonikhaviherya wunnuwa omunepani.’ Kaahitannyeya murima ophiyerya kipacerya winla. Masu a munna ole yaari yeeyo chiryene kaachunaaka wiiwa.”

17. Ntoko elociwaaya mu Kolosi 3:15, ni nooniherye hai omuthamalela wahu Yehova ntakhara soovaha sawe?

¹⁷ Wa Muluku ahu oovaha. Yehova onnanivaha yoolya yincipale yoomunepani. Ntoko yootakiherya, ninnaakhela mahusiheryo ookhaviherya moorweela wa mithukumano sahu, mu irevista, ni mu isaiti sahu. Apwanne mohintoko owiriyana mwaha, waalakhanya mwaha mu soolaleeryiwa, naari omoona broadcast nave muupuwela, ‘Ti yeela kaachunaaka chiryene’? Nni nooniherye hai omuthamalela wahu Yehova. (Mwaalakhanye Kolosi 3:15.) Mukhalelo  mmoha ori omuthamalela mmavekelo ahu ntakhara soovaha seiya saphaama.—Tiy. 1:17.

18. Mmikhalelo taani nneeraahu nooniherye othamalela ntakhara Empa ahu ya Omwene?

¹⁸ Ninnooniheryatho omuthamalela wahu Yehova vaavaa nneerihaahu mpuro ahu wa malapelo okhala waweela ni wookhapeleleya. Ninnapaka makupa moohihiyererya mu weeliha ni orehererya Empa ahu ya Omwene, ni yaale anakhaviherya mmakupa a ikaruma sinavuwiha masu ni ixilema mmulokoni anneerano moopwacha wi ehinanarihe. Vaavaa nnakhapelelaahu Ipa sahu sa Omwene, iho inamulekela elukuluku yincipale nave honi ochuneyeke orehereryiwa ilukuluku soothene. Mmukhalelo yoola, ninnakhapelela ikhorowa sincipale wi ipakiwe nave irehereryiweno Ipa sa Omwene ikina orukurerya elapo.

19. Tiheeni muhusenryaanyu orweela wa yaweereya ya ooweherya ekulucu mmoha ni mwaariye?

¹⁹ Wa yaale analapa mwakuru ntakhara hiyo. Elukuluku nnooniheryaahu othamalela, masu ahu anaphwanela otoroka mukhalelo muchu onooneiye vooloca sa makacamiho yaawo onahooleleiye. Muthokororye yootakiherya ya ooweherya ekulucu mmoha ni mwaariye. Emanle ohoolela oriirya nihiku nimoha mmuteko woolaleerya, awo yaakookela mpuro yaakhalaayawo eri ookhulumuwa. Nihiku nenlo waahitepa oriirya ophiyerya wi mwaariye aahikona anwanre kasakho awe. Wooxixelo, owo aahimuleela iyawe wi haki awerye otitelela mmuteko wa weeceeca. Voocharela wooxixelo ene yoole, ekaarata yeeyo yaaruule o efiliyale yaahiphiya, nave aarepeliwe murokora yoole. Moosivela ekaarata yaamuthamalela murokora ole ntakhara muteko ni ovilela wawe. Yaahooniherya wi ti woovila okhala mapuro oohiyana hiyana esumana ti esumana. Iyawe ooloca: “Mwaaraka aahitannyeya murima vatokovene ni othamalela iwe ophiyerya wi hantonko oloca wi aahaala ohiya muteko wa weeceeca. Mweeparipari, mu ilukuluku sincipale yene taakilipiha otitelela vaavaa kuupuwelaaka ohiya muteko.” Mutheli yoola aahititelela mmuteko wa weeceeca opwaha iyaakha makhumi masese.

20. Tiheeni nnaphwanelaahu weererya opaka nihiku ti nihiku, nave ntakhara heeni?

²⁰ Nnaphwanela weererya nihiku ti nihiku wooniherya mukhatiihu othamalela moorweela mwa yeeyo nnalocaahu ni nnapakaahu. Masu ahu ookhumela vathi va murima naari saweera sahu sinanwerya okhala seiyo akina anachunaaya wi ehoolele makacamiho ni sawuukhula mu elapo yeela achu vakhaani anooniheryaaya othamalela. Nave masu ahu awooniherya othamalela onahaala olipiha onthamwene ahu yoowo oni okhale wawiikhalelaru. Echu yoochuneyasa, nnahaala omutakiheryaka namavaha ahu, Tiithi oothamalela, Yehova.