Nyuwaano Mwaanasuwela?
Ntakhara heeni yaaryaaya yaphaama wa Aisarayeli ovaha masiya naari ikakaiya?
MWAWIIWANANA ni Nlamulo Muluku aamvanheiye Mose, masiya naari ikakaiya saari soovaha seemereryiwa ni Yehova. Ipalame seiha piili ilukuluku soothene sinalociwa vamoha mu malamulo analoca sa mikucho nave emoha yaanwerya ophariheliwa mu nipuro na ekina. (Onam. 1:14; 12:8; 14:30) Ntakhara heeni eyo yaaryaaya ya mphurelo? Nthowa nimoha ti nawi ilukuluku soothene hiwaari wookhweya ophwanya masiya. Ntakhara heeni?
Nsiya
Masiya ipalame saweeceeca seiho sinakhala mu elapo ya Isarayeli variyari va miyeeri sa elimwe. Iyaakha soothene, mweeri wa Otupuru, awo annavava eyaaka ilapo soohico sooviha, nave annakookela o Isarayeli elimwi. (Ntxi. 2:11, 12; Yer. 8:7) Ela enataphulela wi, mu elukuluku ya Aisarayeli waari woovila ovaha masiya ntoko mukucho variyari va miyeeri sooriirya.
Ekakaiya
Nyenya ikakaiya hasineeceeca, mwawiihiiha ti wooweryeya ophwanya ilukuluku soothene mu elapo ya Isarayeli. Ohiya yeeyo, ikakaiya saanaphwiiwa. (Mulikanyihe ni Yohani 2:14, 16.) Mwawiiwanana ni liivuru Plantas e Animais da Bíblia, “miceche ni ipooma soothene so Palestina saanaphwiiwawo ikakaiya. Empa ni empa yaanakhalano nikhola, naari nikhuku vaxirini, mwemmo saakhalamo ikakaiya.” —Mulikanyihe ni Isaiya 60:8.
Ekakaiya eri mu nikhuku
Mwawiihiiha, moorweela wa oweemererya Aisarayeli ovaha mikucho ipalame seiho waari wookhweya ophwanya ilukuluku soothene variyari va eyaakha, Yehova aahooniherya wi toophimelela ni oosivela.
