1. Tiheeni Yesu aalonceiye wa oohuserya awe vooloca sa elukuluku ya makuchuwelo, nave olopola taani aavanheiye?

 MAHIKU vakhaani Yesu ahaakumve okhwa, oohuserya awe axexe yaamukoha: “Tiivi eni ekhale eneneeryo ya . . . makuchuwelo a mukhalelo yoola wa ichu?” (Mat. 24:3) Oohuserya yaale akhweya yaakoha wi esuwele ti liini Yerusalemu ni empa ya Muluku saahaalaaya otoloxiwa. Mu naakhulo nawe, Yesu haalonce pahiru vooloca sa otoloxiwa wa Yerusalemu ni empa ya Muluku, nyenya tho vooloca sa “makuchuwelo a mukhalelo yoola wa ichu,” naari wi elukuluku yeela nnakhalaahu. Atharihaka vooloca sa elukuluku yookuchula, Yesu aahi: “Vooloca sa nihiku nenlo naari elukuluku ene, haavo muchu onasuwela, naari ankeelo a wirimu naari Mwaana, nyenya Atiithi.” Voocharela owo aahaalopola oohuserya awe oothene wi ‘etitelele owehererya’ nave tho ‘etitelele olipelela.’—Mar. 13:32-37.

2. Ntakhara heeni waaryaaya woochuneya wa Akristu a mu nsana noopacerya otitelela okhala oolipelela?

² Akristu yaari Ayuta a mu nsana noopacerya yaari oolipelela, mwawiihiiha awo yaahiwerya ovuluxa okumi aya. Yesu aahaaleela oomuchara awe wi evareryeleke ti liini mukhalelo wa ichu wa Ayuta waahaalaaya ophiya omakuchuwelo. Owo aahiloca: “Vaavaa muneeraanyu mmoone Yerusalemu arukureryiwe ni amwiicani, musuwele wi otoloxiwa wawe ori vakhiviru.” Mu elukuluku yeeyo, awo yaaphwanela wiiwelela olopola wa Yesu nave “epacerye ochawela mmiyaakoni.” (Luka 21:20, 21) Yaale yiiwelenle olopola yoola yaahikophola vaavaa Aroma yaamutolonxaaya Yerusalemu.

3. Tiheeni nnahaalaahu othokororya mmwaha yoola?

³ Olelo nnakhala mu elukuluku yookuchula wa mukhalelo  yoola wa ichu. Mwawiihiiha, hiyaano tho nnaphwanela okhapelela mavyakelo ahu a wuupuwela ni okhala oolipelela. Mmwaha yoola, nnahaala othokororya mukhalelo nneeraahu nikhale oophimelela vaavaa nnoonaahu saweereya sa elapo, mukhalelo nneeraahu niivareryeleke, ni mukhalelo nneeraahu niphariheleke phaama elukuluku ehalenle.

4. Ntakhara heeni nnaphwanelaahu okhalano nchuno na osuwela mukhalelo saweereya sahiihaano sa elapo sinaakhwaniheryaaya sooloherya sa Mpiipiliyani?

⁴ Ni mathowa aphaama, ninnachuna woona mukhalelo saweereya sahiihaano sa elapo sinaakhwaniheryaaya sooloherya sa Mpiipiliyani. Ntoko yootakiherya, Yesu aahinileela vooloca sa ichu seiho sinahaala weereya wi anikhaviherye osuwela ti liini yaahaalaaya waacamela makuchuwelo a elapo ya Satana. (Mat. 24:3-14) Murummwa Petru aahiniceenyerya otikitheryeya mu waakhwanela wa sooloherya sa Mpiipiliyani wi nroromelo nahu ntitelele okhala noolipa. (2 Pet. 1:19-21) Liivuru ookuchula a Mpiipiliyani onapacerya ni masu: “Wuupulula wa Yesu Kristu, yoowo Muluku omvanheiye, wi awoonihe akapuro awe ichu inaphwanela weereya voohilekela.” (Wup. 1:1) Mwawiihiiha, hiyaano ninnachuna osuwela ichu sineereya mweelaponi olelo ni mukhalelo iho sinaakhwaniheryaaya sooloherya sa Mpiipiliyani. Nave akhweya ninnachuna ni murima woothene oloca saweereya seiho mukina ni mukhwaawe.

5. Tiheeni nnaphwanelaahu osepa, nave tiheeni nnaphwanelaahu weera? (Moone tho iruku.)

⁵ Vaavaa nnalocaahu sooloherya sa Mpiipiliyani, nnaphwanela osepa waaceereryavo ichu. Ntakhara heeni? Nthowa nawi hinnachuna oloca echu vyakala yaahaala otannya ohiiwanana mmulokoni. Ntoko yootakiherya, akhweya nnanwerya owiiwa alamuleli a elapo elocaka mukhalelo enahaalaaya orehererya nikacamiho vyakala ni oruuha murecele ni okhapeleleya. Ohiya weemererya wi yeeyo alamuleli analocaaya, waakhwanela wa yooloherya enaphwanyeya mu 1 Atesalonika 5:3, nnaphwanela osuwela otharihiwa wa hiihaanoru vooloca sa yooloherya yeela. Vaavaa masu ahu anathipeleyaaya mu soolaleeryiwa sivonyiwe ni marehereryo a Yehova, ninnakhaviherya muloko otitelela okhala wawiiwanana “mmoonelo mmohamoha.”—1 Ako. 1:10; 4:6.

6. Tiheeni nnahuseryaahu mu 2 Petru 3:11-13?

⁶ Mwaalakhanye 2 Petru 3:11-13. Murummwa Petru onnanikhaviherya okhalano moonelo woophimelela vaavaa nnathokororyaahu sooloherya sa Mpiipiliyani. Owo onnanceenyerya wi nikhaleno “mmuupuweloni orwa wa nihiku na Yehova.” Ntakhara heeni? Ohiya nthowa nawi nnachuna osuwela ‘nihiku ni elukuluku’ yeeyo Yehova onahaaleiye omuruuha Armaketo, nyenya nthowa nawi nnachuna opharihela elukuluku nryaahuno wi nooniheryeke “meecelo aweela oomucicimiha Muluku.” (Mat. 24:36; Luka 12:40) Mmasu makina, hiyaano nnachuna otitelela okhalano meecelo aweela ni ororomela wi ichu soothene nnapakaahu ntakhara Yehova nneerano iho nthowa na omusivela vancipale yoowo. Wi ntitelele otikitheryeya mwa yeela, hiyaano nnaphwanela wiivareryelaka.

7. Nni nooniherye hai wi ninniivareryela? (Luka 21:34)

⁷ Yesu aahaaleela oohuserya awe wi ohiya pahiru ovareryela saweereya sa mulaponi awo tho yaaphwanela wiivareryelaka  akaneene aya. Ela yohooniheryiwa mookwakwaleya mu olopola onaphwanyeya mu Luka 21:34. (Mwaalakhanye.) Yesu olonce wi: “Mwiivareryeleke.” Muchu awiivareryela onnoona ichu vyakala sawoopiha seiho saahaala onanariha onthamwene awe ni Yehova nave onneeravo echu wi asepe seiho. Mmukhalelo yoola, owo onnatitelela wiikhapelela mu osivela wa Muluku.—Mas. 22:3; Yuta 20, 21.

8. Olopola taani murummwa Paulo aavanheiye Akristu?

⁸ Murummwa Paulo aahaalopola Akristu wi yiivareryeleke. Ntoko yootakiherya, owo aahiloca wa Akristu o Efesu ariki: “Mutitelele wiivareryela wi muheeceke ntoko alolo, nyenya ntoko a miruku.” (Aef. 5:15, 16) Satana wiiliwiili onneererya onanariha onthamwene ahu ni Yehova, mwawiihiiha Piipiliya onnanivaha ekano wi ‘ntitelele wiiwexexa tiivi eri yookhwela ya Yehova’ wi niikhapelele orweela wa ohiphela woothene wa Satana.—Aef. 5:17.

9. Nni niiwexexe hai yookhwela ya Yehova ntakhara hiyo?

⁹ Piipiliya hananleela ichu soothene saahaala onanariha onthamwene ahu ni Yehova. Hiyaano wiiliwiili ninnaphwanela opaka soolakelela mmiyaha seiho Soorepa sihinalocaaya mooluluwanya. Wi nipake soothanla mwa miruku, nnaphwanela wiiwexexa, naari osuwela “yookhwela ya Yehova.” Nnanwerya weerano yeela moorweela wa ohuserya Masu a Muluku moohihiyererya ni wuupuwelela yaawo. Vaavaa nniiwexexaahu phaama yookhwela ya Yehova ni wiilipixerya wi nikhaleno “muupuwelo wa Kristu,” nnahaala weecaka ntoko achu “a miruku,” naamwi nihirivo nlamulo nooluluwanya wi nnihoolele mmeecelo ahu. (1 Ako. 2:14-16) Mu ikwaha ikina onnakhala wookhweya wa hiyaano woona yeeyo nnaphwanelaahu osepa. Nyenya mu ilukuluku ikina honakhala wookhweya.

10. Ichu taani sawoopiha nnaphwanelaahu osepa?

¹⁰ Sawoopiha savakhaani nnaphwanelaahu osepa sinaphitaanyerya okareelana, ohapaliwa, oloca masu oophoreiha, woona ni owiriyana ixilema sa nlala, woona epwitikiri ni ichu ntoko seiha. (Sal. 101:3) Mwiicani ahu, Musaserya, wiiliwiili onnaavya ikari wi ananarihe onthamwene ahu ni Yehova. (1 Pet. 5:8) Wakhala wi hanniikhapelela, Satana onanwerya waala mmuupuweloni ni mmurimani mwahu mmiso wa nrima, ohiroromeleya, ehace, wiica, wiirumiha ni okuha mathowa. (Aka. 5:19-21) Woopaceryani, mathitimanelo yaala akhweya enanwerya okhala oohilipa. Nyenya wakhala wi hineenrevo echu mwawaakuveya wi niphole ichu seiho, iho sinahaala otitelela winnuwa ntoko mwiri wa esenya nave sinahaala onruuhela makacamiho.—Tiy. 1:14, 15.

11. Yawoopiha taani emoha yoohiwehereryeya yeeyo nnaphwanelaahu osepa nave ntakhara heeni?

¹¹ Echu emoha yawoopiha ni yoohiwehereryeya ori onthamwene woonanara. Muthokororye yawooniherya ela. Nyuwaano munalapa ni muchu yoowo ohiri Namoona a Yehova. Munnachuna wi nthamwene anyu oomutekoni akhaleno moonelo woophwanelela vooloca sa Anamoona a Yehova, mwawiihiiha munnakhala muchu ooreera murima ni ookhaviherya. Ikwaha ikina munnalya vamoha ni yoowo mu elukuluku ya wiichuuwa. Mwawaakuveya, munnapacerya olya ni muchu yoowo wiiliwiili. Mu ikwaha ikina, muchu yoowo onnaloca ichu soohiphwanelela. Woopaceryani, munneererya okhooca seiho. Nyenya voocharela, munnapacerya opharihela masu yaawo yahoosivelaani khalai. Nihiku nimoha, nthamwene anyu oomutekoni onnoowopaani wi mwawurye mmanle woorowa nave munneemererya.  Mwawooneya, munnapacerya wuupuwela ntoko yoowo. Heviravo elukuluku yincipale wi mpacerye opaka ichu seiho nthamwene anyu oomutekoni onapakeiye. Mweeparipari, naachu ooreera murima nave ninnaacicimiha achu oothene, nyenya nnaphwanela wuupuwela wi ninnavoloweliwa vancipale ni yaawo nnaathanlaahu wi nimalihekeno elukuluku ahu. (1 Ako. 15:33) Wakhala wi ninniivareryela, hiihaa ntoko Yesu onileenleiye weera, nnahaala osepa onthamwene woohiphwanelela ni yaale ahinakhala mwawiiwanana ni malakiheryo a Yehova. (2 Ako. 6:15) Nnahaala woona yawoopiha nave nnamusepa yeeyo.

12. Tiheeni oohuserya a Yesu yeeraaya vaavaa yaaweheryaaya ophiya makuchuwelo?

¹² Yesu aachuna wi oohuserya awe ekhale ooweiwa vaavaa yaawehereryaaya ophiya makuchuwelo. Yesu aahaavaha muteko yaawo. Owo aahaalamulela wi elaleeryeke michaka saphaama “o Yerusalemu, o Yuteya woothewene ni o Samariya, ophiyerya weiwo elapo ekotenlaayawo.” (Saw. 1:6-8) Owo waari muteko mutokweene oohuserya a Yesu yaakhenlaaya! Moorweela wa opaka soothene yaaweryaaya wi yaalaleerye akina, awo yaanapharihela phaama elukuluku aya.

13. Ntakhara heeni nnaphwanelaahu opharihela phaama elukuluku ahu? (Akolose 4:5)

 ¹³ Mwaalakhanye Akolose 4:5. Wi niivareryele, nnaphwanela wuupuwelela mwawiiseela mukhalelo nnapharihelaahu elukuluku ahu. “Ichu soohiwehereryeya” inanwerya omvolowela mmoha ti mmoha a hiyo. (Ekl. 9:11, TNM) Hiyaano nnanwerya oyeleela okumi ahu moohiwehereryeya.

14-15. Ti mwawiihai nneeraahu nipharihele phaama elukuluku ahu? (Ahepri 6:11, 12) (Moone tho eruku.)

¹⁴ Nnanwerya opharihela phaama elukuluku ahu moorweela wa opaka yookhwela ya Yehova ni olipiha onthamwene ahu ni yoowo. (Yoh. 14:21) Nnaphwanela ‘okhala awiithipela, oohicikinyeya, nipharakaxa muteko wa Apwiya.’ (1 Ako. 15:58) Voocharela vaavaa makuchuwelo anaphiyaaya—moohipwacha waakhanle wi makuchuwelo a okumi ahu naari makuchuwelo wa mukhalelo yoola woonanara—hiyaano hinikhalano ekeerelani.—Mat. 24:13; Aro. 14:8.

¹⁵ Olelo, Yesu onnatitelela waahoolela oohuserya awe vaavaa analaleeryaaya vooloca sa Omwene wa Muluku veelaponi yoothene yavathi. Owo onnakhwaaniherya yoororomeliha awe. Orweela wa marehereryo a Yehova, Yesu onnanivyakiha mukhalelo wa olaleerya ni onnanivahererya ikaruma seiho nnachunaahu wi nimwaramwaxeno michaka saphaama. (Mat. 28:18-20) Ninnapaka yeeyo Yesu onaweheryeiye wa hiyaano moorweela wa olapa mwakuru wi naalaleerye akina ni moorweela wa otitelela okhala oolipelela vaavaa nnanweheryaahu Yehova oruuha makuchuwelo a mukhalelo yoola wa ichu. Nnahaala opharelela ewehereryo ahu “ophiyerya wuukuchulani,” wakhala wi noopharihela ekano enaphwanyeya mu Ahepri 6:11, 12.—Mwaalakhanye.

16. Tiheeni nnaphwanelaahu olakelela weera?

¹⁶ Yehova ootikitherya nihiku ni ewora yeeyo onahaaleiye oruuha makuchuwelo a mukhalelo yoola wa Satana. Naphiya nihiku nenlo, Yehova onahaala waakhwaniherya sooloherya soothene sinaphwanyeya Mmasu awe. Mwawiihiiha, mu ilukuluku ikina nnanwerya wuupuwelaka wi makuchuwelo heni ephiye mwawaakuveya. Nyenya, nihiku na Yehova “hinni nilekele.” (Hap. 2:3, TNM) Mwawiihiiha, nnaphwanela okhala oolakelela ‘otitelela onweherya Yehova,’ nooniheryaka “moonelo wa onweherya Muluku a nivuluxo [nahu.]”—Mik. 7:7, TNM.