NANEERARU, 18 a Yaneru a 2023, yoolokoha yavameekhaaya yaahooneya mu jw.org, etharihaka wi munna Gage Fleegle ni Jeffrey Winder yaahithanliwa wi erumeele ntoko anna a Nikhuuru Noolamulela na Anamoona a Yehova. Anna oopiili yaala aakhalano saweereya sincipale mmuteko aya woororomeleya wa Yehova.

Munna Fleegle ophwiiwale o Pensilvaniya o makupa onakhumawo echeku ya murupi, Ostatu Unitu, ni asitiithi awe yaawo enamoova Muluku. Vaavaa aareiye mmiravo asitiithi awe yaahithaamela mu epooma ekhaani, weiwo waariwo othowa otokweene. Elukuluku vakhaani ohoolo waya, aahipatisiwa mu 20 a Novempuru a 1988.

Asitiithi a munna Fleegle ilukuluku soothene yaanamuceenyerya ovolowa mmuteko wa elukuluku yoothene. Awo wiiliwiili yaanaahaiha ooweherya a ekulucu ni Mapetelita owannyaya, nave Munna Fleegle aanawerya woona mukhalelo anna ni arokora yaala yaaryaaya oohakalala. Mu elukuluku vakhaani amanle opatisiwa, owo aahipacerya orumeela ntoko piyoneero a elukuluku yoothene—mu 1 a Setempuru a 1989. Iyaakha piili ohoolo waya, owo aahaakhwaniherya yoolakelela yeeyo aatikithenryeiye arino iyaakha 12 sa oyariwa—yoolakelela ya orumeela Opeteli. Owo aahipacerya muteko awe wo Peteli o Brooklyn mu Otupuru a 1991.

Opeteli, Munna Fleegle oolapa mu ekupweethe ya waapaka aliivuru, voocharela aahiwompwa wi alape mu Etepartamentu ya Muteko. Variyari va elukuluku yeeyo owo aarumeela mmuloko wa elocelo ya Erusiya mu iyaakha sa vakhaani. Mu 2006 owo aahimuthela mwaariye Natiya, vamoha ni yoowo yaanarumeela mmuteko wa Opeteli. Vamoha, awo aarumeela mu ekulucu ya Ekunya, nave opwaha iyaakha 10 mu ekulucu ya Espanyoli. Ivinre iyaakha sincipale mu Etepartamentu ya Muteko, Munna Fleegle aahiwompwa wi alape mu Ekupweethe ya Nikhuuru na Ohusiha, nave  voocharela mu Ekupweethe ya Nikhuuru na Muteko. Mu Marsu a 2022 owo aahithanliwa ntoko mukhaviheryi a Nikhuuru na Muteko na Nikhuuru Noolamulela.

Munna Winder ophwiiwale o Muriyeta o Kaliforniya, Ostatu Unitu. Owo ophwiiwale mu eparipari ni asitiithi awe, nave opatisiwe mu 29 Marsu a 1986. Mu mweeryi woocharela aalakelela okhala Piyoneero ookhaviherya. Owo aahisiveliwano ophiyerya ochuna okookela. Amalinhe miyeeryi mincipale sa opiyoneero wookhaviherya, owo aahipacerya opiyoneero wa elukuluku yoothene mu 1 a Otupuru a 1986.

Aryeene mmiravo, Munna Winder aahaaxekurya asinnawe eeli atokweene yaawo yaarumeela Opeteli elukuluku ene yeele. Oxekurya yoole waahitannya nchuno nawe na wiiveleela orumeela Opeteli. Nave mu Maiyu a 1990 owo aahiwompwa wi arumeele mu Epeteli yo Wallkill.

Opeteli, Munna Winder oolapa mu Itepartamentu soohiyanahiyana, ophitaanyerya Etepartamentu Enathokororya Imaca sa Opeteli, Etepartamentu ya Ompaka Limpesa ni Ekupweethe ya Opeteli. Owo aahipaka othela ni mwaariye Anxela mu 1997, nave awo anarumeela Opeteli ophiyerya hiihano. Mu 2014 awo yaahirumihiwa o Warwick, weiwo munna Winder aakhavihenryeiye otekiwa wa nipuro ntokweene. Mu 2016 awo yaahithaamela o Nipuro na Ohusiha na Torre de Vigia o Paterson, weiwo munna Winder aalapeiye Mmuteko wa Autiyu ni Vitiyu. Ivinre iyaakha xexe awo yaahikookela o Warwick, Munna Winder aahiwompwa wi alape mu Ekupweethe ya Nikhuuru na Awiiveleela. Mu Marsu a 2022 owo aahithanliwa okhala mukhaviheryi a Nikhuuru na Awiiveleela a Nikhuuru Noolamulela.

Ninnavekela wi Yehova areelihe ‘samahala sa alopwana’ yaala vaavaa awo anatitelelaaya olapa moowetha ntakhara soochuna sa Omwene.—Aef. 4:8.