1. Mikhalelo taani saphaama alapeli a Yehova oonihenryaaya mu ilukuluku sakhalai?

 APWANNE nyuwaano munnavaha esisapo onthamwene anyu ni Yehova? Moohikhwa minikwa aai! Nave hamuri mukhatiinyu. Ovinyerya mu ilukuluku sakhalai, achu ancipale oohaalakhanyeya anniisoona hiiha ntoko nyuwaano. (Sal. 104:33, 34) Ancipale yaahipaka wiilipixerya wi emulapele Yehova. Ti yeeyo yeeraaya Anasiri mu Aisarayeli Khalai. Awo yaari taani, nave tiheeni nnahuseryaahu orweela wa yootakiheryaaya?

2. (1) Anasiri yaari taani? (Namarepela 6:1, 2) (2) Ntakhara heeni Aisarayeli akina yaahithanla okhala Anasiri?

² Masu awi “Nasiri” anarweela mu Ehepiri anataphulela “Muchu Othanliwe,” “Ovalaanyiwe,” naari “Iiveleenle wi Apake Muteko Wavameekhaaya.” Masu yaala annathariha phaameene Aisarayeli amvai yaawo yaapanke owetha waya wi emurumeele Yehova mmukhalelo wavameekhaaya. Nlamulo na Mose nanneemererya wi mulopwana naari muthiyana apake nlakano navameekhaaya wa Yehova, athanlaka okhala ntoko Nasiri mu elukuluku yammoori. a (Mwaalakhanye Namarepela 6:1, 2.) Nlakano nenla naari yoororomeliha yeela yavameekhaaya, yannavolowela ochariha ikano seiho Aisarayeli akina yaahiryaayano ophwanelela ochariha. Mano ntakhara heeni Muisarayeli aanathanla opaka nlakano na okhala Nasiri? Muisarayeli owo akhweya aanaceenyeryiwa ni osivela wawiixeela wa Yehova ni othamalela mahala ni mareeliho Awe.—Malam. 6:5; 16:17.

3. Ti mwawiihai achu a Muluku olelo analikanaaya ni Anasiri?

³ Marehereryo a Onasiri yaamanle vaavaa Nlamulo na Mose naaraceelihiwaaya ni “nlamulo na Kristu.” (Aka. 6:2; Aro. 10:4) Nyenya, hiiha ntoko Anasiri, achu a Yehova olelo  annatitelela wooniherya nchuno naya na omurumeela owo ni murima aya woothene, okumi aya woothene, muupuwelo ni ikuru saya soothene. (Mar. 12:30) Ninnapaka nlakano nahu mwaphaama na omurumeela Yehova vaavaa nniiveleelaahu wa Yoowo. Okhala mwawiiwanana ni nlakano nenlo ennavolowela opaka yookhwela ya Yehova ni wiilipixerya. Vaavaa nnathokororyaahu mukhalelo Anasiri yaakhwaniheryaaya nlakano naya, nnanwerya ohuserya mahusiheryo oochuneya vooloca sa mukhalelo nnahaalaahu okhala mwawiiwanana ni nlakano nahu. b (Mat. 16:24) Hankooni noone sootakiherya ikina.

MPAKE WIILIPIXERYA

4. Mwawiiwanana ni Namarepela 6:3, 4, ti mwawiihai munepa wawiiveleela wa Nasiri weehiwaaya?

⁴ Mwaalakhanye Namarepela 6:3, 4. Anasiri hiyaaphwanela owurya soowurya soohapaliha, awo tho yaaphwanela osepa omulya uuva naari soolya seiho saakanyeryiwe ni uuva oonyaala. Achu yaawo yaarukurenrye yaanasiveliwa vancipale ni soolya seiya woona wi hiyaarivo yoonanara ni uuva. Piipiliya onnathariha “eviinyu yeeyo enahakalaliha murima wa muchu,” ntoko yoovaha ya Muluku. (Sal. 104:14, 15, PMM) Naamwi ichu seiya seerihaka okumi wa muchu okhala woohakalalaxa, Anasiri yaari oolakelela osepa ichu seiho. c

5. Wiilipixerya taani Matiyani ni Marsela yaathanlilaaya opaka nave ntakhara heeni?

⁵ Ntoko Anasiri, hiyaano ninnapaka owetha wahu wi nimulapele Yehova mwawaakhwanela. Muthokororye yootakiherya ya Matiyani ni Marsela. d Mutheli yoola Eekristu aanapuha ekumi yookhapeleleya. Matiyani aahikhalano muteko waphaama yoowo waamweemererya okhala mu empa yaphaama yawaalukaara. Naamwiihiiha, awo yaanachuna opaka sincipale mmuteko wa Yehova. Wi yaakhwaniherye yoolakelela aya, yaahipaka matorokelo mu ichu ikina. Awo aaloca: “Naahipacerya opharihela ikhorowa savakhaani wi nikulele ichu. Naahithaamela mu empa ekhaani yeeyo naalukaaraahu nave tho naahitumiha ekaaro ahu.” Matiyani ni Marsela hiyaaphwanela opaka wiilipixerya yoola, nyenya awo yaahithanla weerano yeeyo woona wi eyo yaanaweemererya waakhwaniherya murici aya. Awo anniisoona okhala oosiveliwa ni oohakalala ni soothanla saya.

6. Ntakhara heeni Akristu a mmahiku ahu anniilipixerya? (Moone tho eruku.)

⁶ Akristu a mmahiku ahu annaphwanya  ohakalala vaavaa aniilipixeryaaya ovaha elukuluku aya mmiteko sa Omwene. (1 Ako. 9:3-6) Yehova hananikhinyererya opaka wiilipixerya yoola, naamwi ichu ikina nnahiyaahu muculi ihiri soonanara. Ntoko yootakiherya akina annahiya muteko woophwanelela, empa yaphaama, ni axinama yaawo yaasiveliwaayano waaphuwa. Akina annalakelela okhala aciye mu elukuluku yincipale naari ohikalano anamwane mwawaakuveya. Akina annalakelela orumeela weiwo oriwo othowa otokweene, naamwi eyo yeerihaka okhala ocai ni amusi aya. Ancipale a hiyo mwawiiveleela ninnapaka wiilipixerya wahu wi nimvahe Yehova yeeyo nnaweryaahu. Muroromele wi Yehova onnavaha esisapo wiilipixerya vyakala munapakaanyu, moohipwacha waari otokweene naari hooye wi mmurumeele yoowo.—Ahe. 6:10.

MUREHERYEYE WI MUKHALE OOHIYANA

7. Nikacamiho taani Nasiri aahaaleiye ohoolela wi aakhwaniherye nlakano nawe? (Namarepela 6:5) (Moone tho eruku.)

⁷ Mwaalakhanye Namarepela 6:5. Anasiri yaahiroromeliha ohicema miihi. Ola waari mukhalelo aya mmoha wa wooniherya omwiiwelela waya Yehova. Wakhala wi Muisarayeli ookhala Nasiri mu iyaakha sincipale, miihi awe yaanarakama nave akina yaanamusuwela mwawaakuveya. Waakhanle wi akina ennamucicimiha ni omulipiha wi atitelele waakhwaniherya nlakano nawe, waahaala okhala wookhweya wa Nasiri otitelela okhala oohiyana. Moothananiha, mu yaweereya ya Aisarayeli, yaahikhalavo elukuluku yeeyo Anasiri yaahaathamaleliwaaya naari okhaviheryiwa. Variyari va elukuluku ya mulipa a miririmu Amosi, Aisarayeli oomwaryeya ‘yaanatitelela waavaha Anasiri eviinyu wi ewurye,’ akhweya ni yoolakelela ya oweeriha ohiiwelela nlakano naya na othanya eviinyu. (Amo. 2:12, BNM) Mu ikwaha ikina waanachuneya okhalano olipa murima weeparipari wi Nasiri aakhwaniherye nlakano nawe na okhala oohiyana.

8. Tiheeni yoolipinheeni nyuwaano mu yaweereya ya Penxami?

⁸ Nnikhaviheryo na Yehova, hiyaano tho nnanwerya moolipa murima okhala oohiyana naamwi nri awuuliwa muru. Muthokororye yootakiherya ya Penxami, Namoona a Yehova mmoha a iyaakha khumi o Noruweka. Wa nthowa na ekhoco ya Ukraniya, exikola awe yaahikhalano yaweereya wi yooniherye okhaviherya waya achu o Ukraniya. Anamwane yaahiwompwa wiipa ncipo enwanre uniforme a elapo ya Ukraniya. Penxami ahuupuwelela osepa yawereya eyo ya elapo awe, atitelelaka okhala ocai ni nipuro nenlo yaweereya eyo yaapakiwaayawo. Naamwihiiha purusoore mmoha aahimoona nave akhuwela ni masu oovuwa: “Weyaano onaphwanela orwa nno mwawaakuveya wi nikhale vamoha. Oothene ahu nnooweherya  yoowe!” Moolipa murima Penxami aahiwaacamela apurusoore nave aloca: “Nkinavolowela miyaha sa elapo nave nkinapaka makupa mu ifesta sa epolitika. Nyenya Anamoona a Yehova ancipale ari mukariposo nthowa na okhooca oya okhoconi.” Apurusoore yaaheemererya othariha wa Penxami nave yaahimuhiya opwaha. Mwawiihiiha, asinthamwene awe yaahipacerya omukoha ntakhara heeni owo haari vamoha ni yaawo. Penxami aahikhala oonyeenyeya ophiyerya wi apacerya wunla; nave owo moolipa murima aahuuluula waalela anaxikola oothene yeeyo aaleenleiye apurusoore. Voocharela, Penxami aahaaleela asitiithi awe wi Yehova aahimukhaviherya waakiha nroromelo nawe.

9. Mmukhalelo taani nnahaalaahu ohakalaliha murima wa Yehova?

⁹ Nthowa na othanla wiiwelela yookhwela ya Yehova, hiyaano ninnakhala oohiyana ni achu yaawo anirukurenrye. Nnaphwanela okhala olipa murima wi niisuwanyeihe ntoko Anamoona a Yehova omutekoni naari oxikola. Nave vaavaa mukhalelo ni meecelo a elapo yeela enaamviraaya otepaka onanara, tiyawooneya wi nnanwerya woona okhala woovila okhalaka mwawiiwanana ni malakiheryo a Mpiipiliya ni waaleela akina vooloca sa Michaka saphaama. (2 Tim. 1:8; 3:13) Muupuwele wi ilukuluku soothene, ‘ninnahakalaliha murima wa Yehova’ vaavaa moolipa murima nnakhalaahu oohiyana ni yaale ahinamulapela.—Mas. 27:11; Mal. 3:18, PMM.

MMUKUHE YEHOVA MU NIPURO NOOPACERYA MU OKUMI ANYU

10. Ti mwawiihai ochariha nlakiheryo nnaphwanyeya mu Namarepela 6:6, 7 yaanwerya okhala yaweeha wa Anasiri?

¹⁰ Mwaalakhanye Namarepela 6:6, 7. Anasiri hiyaaphwanela waacamela muruchu. Akhweya munamuupuwela wi oheerano yeela onachuneya wiilipixerya otokweene. Mu ilukuluku sakhalai, Nasiri aanwerya woona okhala yaweeha etokweene vaavaa mmusi awe awaacameleya aakhweiye. Mu yookhovelela ya omvitha muchu waanavolowelavo okhala vakhiviru va muruchu. (Yoh. 19:39, 40; Saw. 9:36-40) Nlakano na Nasiri naanakwatelela vancipale mukhalelo awe wa ochariha sookhovelela ikina. Variyari va ilukuluku sawiicela, Anasiri yaanooniherya nroromelo naya noolipa ekhapelelaka nlakano naya. Mweeparipari Yehova aahaalipiha alapeli yaala wa malakano aya wi evoothe makacamiho yaawo yaahaalaaya ohoolela.

11. Tiheeni Mukristu onaphwaneleiye opaka vaavaa onahooleleiye makacamiho mu emusi? (Moone tho eruku.)

¹¹ Ntoko Akristu, ninnakuha mu nipuro noopacerya nlakano nahu nawiiveleela wa  Yehova. Eyo ennavolowela soolakelela ni saweera sahu vooloca sa miyaha sa mweemusini. Ninnathokororya moopwacha mirici sahu sa mweemusini mwawiiwanana ni Piipiliya, nyenya hannakuha mu nipuro noopacerya soochuna sahu opwaha yeeyo Yehova onanivekeiye wi neereno. (Mat. 10:35-37; 1 Tim. 5:8) Mu ikwaha ikina, nnanwerya opaka soolakelela seiho amusi ahu ahinahaalaaya osiveliwano, wi nimuhakalalihe Yehova.

12. Woona wi aanahoolela nikacamiho noovila mu echoko awe, tiheeni Alexantru eenreiye nave tiheeni owo aahenreiye?

¹² Muthokororye yaweereya ya Alexantru ni amwaariye Torina. Mutheli ola, evinrevo eyaakha emoha emuhuseryaka Piipiliya, Torina aahilakelela ohiya omuhuserya Piipiliya nave tho aanachuna wi aiyawe Alexantru ehiye. Nyenya, moomaaleleya Alexantru aahiloca wi aahaala otitelela. Mwaariye Torina haasiveliwe nave aaheererya omukhinyeererya wi ahiye ohuserya. Alexantru oloca wi aaneererya wiiwexexa mukhalelo aya, nyenya eyo hiyaari yookhweya wa yoowo. Mu ikwaha ikina, vaavaa Torina aakhinyeereryeiye ni owaakhula moowali, owo aanuupuwela ohiya omuhuserya Piipiliya. Naamwiihiiha, Alexantru aahivilela ni omukuha Yehova mu nipuro noopacerya, mu elukuluku tho emohamoha aanooniherya osivela otokweene ni ncicimiho wa amwaariye. Wookuchulani, yootakiherya awe yaphaama yaahaaceenyerya amwaariye okookela omuhuserya Piipiliya, nave awo yaahiphiyerya makuchuwelo a opharelela eparipari.—Moone exilema mu jw.org Alexandru ni Dorina Văcar: “Osivela ti Woopisa Murima ni Wooreera Murima”‏ makupa ani “Eparipari Ennatoroka Ikumi.”

13. Ti mwawiihai nnahaalaahu wooniherya osivela wa Yehova ni wa emusi ahu?

¹³ Yehova oopaka marehereryo a echoko, nave owo tho onachuna wi nikhaleno echoko yoohakalala. (Aef. 3:14, 15) Wakhala wi ninnachuna okhalano ohakalala weeparipari, nnaphwanela opakaka ichu mmukhalelo wa Yehova. Muhirwe mukhwe minikwa wi Yehova onnavaha esisapo wiilipixerya wanyu wi mmulapele vaavaa munathokororyaanyu echoko anyu ni okhaliha eyo mwa osivela ni mwa ncicimiho.—Aro. 12:10.

MULIPIHANEKE MUKINA NI MUKHWAAWE WI MUKHALE NTOKO ANASIRI

14. Taani xaxaxa nnaphwanelaahu wiilipixerya wi nimulipihe ni masu ahu?

¹⁴ Oothene yaale anathanla omulapela Yehova mmahiku ahu yaala anaphwanela oreheryeya okhala awiilipixerya eceenyeryiwaka ni osivela. Ikwaha ikina, weerano yeela tahi wookhweya. Nni niwerye hai waakhaviherya akina opaka owetha waya ntakhara Yehova? Ori moorweela wa waalipiha ni masu ahu. (Yupu 16:5) Apwanne  mmulokoni mwanyu aakhalamo anna naari arokora aniilipixerya okhweiha okumi aya ni yoolakelela ya opaka sincipale mmuteko wa Yehova? Apwanne mohaasuwela amiravo yaawo eri oolipa murima anakhala oohiyana ni akina oxikola, naamwi eyo ekhalaka yoovila weerano? Hanka vooloca sa oohuserya a Piipiliya ni Akristu akina a munroromeloni yaawo aniilipixerya owaniha wi etitelele okhala oororomeleya wa nthowa na wiiciwa ni amusi aya? Mukhale oolakelela opaka yeeyo munaweryaanyu wi mwaalipihe ni waaleela mukhalelo munatikhiniheyaanyu ni olipa waya murima wa yeeyo anapakaaya ntakhara Yehova.—File. 4, 5, 7.

15. Ti mwawiihai akina anaakhaviheryaaya yaale ari mmuteko wa elukuluku yoothene?

¹⁵ Mu ikwaha ikina, nnanwerya okhala ooreheryeya ovaha nikaviheryo nawooneya wa annihu ari mmuteko wa elukuluku yoothene. (Mas. 19:17; Ahe. 13:16) Eyo yaari yoolakelela etokweenexa ya murokora mmoha oororomeleya awuuluvala onakhala o Siri Lanka. Owo aahaaceereryiwa ikhoro nthowa na wuuluwala, mwa yeeyo aanachuna waakhaviherya arokora eeli ari mapiyoneera otitelela mmuteko aya, moohipwacha makacamiho a othowa wa ikhorowa. Owo aahilakelela waakhaviherya moorweela wa waavahaka ikhorowa mweeri ti mweeri wi eweryeke okhalano yavakhaani wi yiivakulelekeno. Mweeparipari, murokora ola onnooniherya munepa waphaama!

16. Tiheeni nnahuseryaahu orweela wa Anasiri a mu elukuluku yakhalai?

¹⁶ Mweeparipari nnanwerya ohuserya vancipale orweela mu yootakiherya yaphaama evahiwe ni Anasiri awiiveleela a mmahiku akhalai! Mwawiihiiha, nlakano na Anasiri ninnanuupuxerya echu vooloca sa Tiithi ahu a wirimu, Yehova. Chiryene owo onnaroromela wi nri oolakelela omuhakalaliha, ni wi nri ooreheryeya opaka wiilipixerya wahu wi naakhwaniherye nlakano nahu na wiiveleela. Owo onnancicimiha anivahaka ekari ya othanla wooniherya osivela wahu ntakhara yoowo. (Mas. 23:15, 16; Mar. 10:28-30; 1 Yoh. 4:19) Marehereryo a Onasiri annooniherya wi Yehova onniiwexexa nave onnava esisapo wiilipixerya nnapakaahu wi nimurumeeleke. Nri oolakelela otitelela omurumeela Yehova, nimvaka owetha wahu woothene wi nimuhakalalihe.