1. Mphwanaphwanihe ntakhara heeni nnaphwanelaahu omuchara Yehova ntoko yoohoolelaahu.

 MWAANYIHERYE wi nyuwaano moorimeela mu ntakhwa nimoha. Yawoopiha eri voorukurerya vanyu: axinama amutakhwani, asiichu anaraviha ireca, makukhu arino esenya yawiipha ni arathuwela awoopiha. Nyuwaano mwaahaala okhala oohakalalaxa ni ootaphuwa wakhanle wi muri ni muchu yoowo aahaala woohoolelakaani ni asuwenle phaama nipuro nenlo nave aahaala wookhaviheryaani osepa! Elapo yeela eri ntoko ntakhwa nenle. Yoosareya ni sawoopiha seiyo inoopopiha xaxaxa okumi ahu woomunepani. Nyenya nookhalano yoohoolela yoophaameya—Yehova. Owo onnaneeciha anikerihaka ocai wa yawoopiha nave anihoolelaka o nipuro nnayaahuwo—mu elapo evyaani ntakhara ekumi yoohimala.

2. Yehova onanihoolela hai?

² Yehova onanihoolela hai? Xaxaxa moorweela wa masu awe oorempwa, Piipiliya. Mwawiihiiha, owo tho onnaapharihela ahooleli. Ntoko yootakiherya, owo onnampharihela “kapuro oororomeleya ni amiruku” wi anivahererye yoolya yoomunepani yeeyo enanikhaviherya opaka soolakelela mwa miruku. (Mat. 24:45) Yehova tho onnaapharihela alopwana akina amavyakelo wi enihoolele. Ntoko yootakiherya, ooweherya a ekulucu ni atokweene a mmulokoni annavahererya nlipiho ni sooleeliherya seiyo sinahaala onikhaviherya ovilela mu ilukuluku sookacamiha. Ninnathamalela vancipale nthowa na Yehova onihoolela wawe phaama variyari va ilukuluku seiya soovila ehaakumve ophiya makuchuwelo! Eyo ennanikhaviherya otitelela okhala asinthamwene a Yehova ni owerya okhalano ekumi yaphaama hiihaano ni okhala wookhala.

3. Tiheeni nnahaalaahu othokororya mmwaha yoola?

³ Ikwaha ikina, onamukhala woovila wa hiyaano ochara ohoolela wa Yehova, xaxaxa vaavaa owo onavahereryiwaaya ni achu oohiphaameya. Ntakhara heeni? Ohoolela yoowo awo ananivahaaya  onanwerya okhala yoowo nihinachunaahu wiiwa. Naari nnanwerya woona wi ohoolela naakhenlaahu tahi wa miruku nave ophiyerya makuchuwelo awi miruku seiho hasinarweela wa Yehova. Mmahiku ahu yaala, nnaphwanela xaxaxa ororomela wi Yehova onnaahoolela achu awe ni wi ochariha ohoolela wawe onnakumiherya mareeliho. Wi onikhaviherye olipiha nroromelo nahu, mwaha yoola onahaala othokororya (1) ti mwawiihai Yehova aahoolenleiye achu awe mmahiku akhalai, (2) ti mwawiihai owo onanihooleleiye olelo, nave (3) nnaphura hai vaavaa nnatitelelaahu ochariha ohoolela wawe.

TI MWAWIIHAI YEHOVA AAHOOLENLEIYE NLOKO NA AISARAYELI?

4-5. Ti mwawiihai Yehova oonihenryeiye wi annampharihela Mose wi aahoolele Aisarayeli? (Moone eruku.)

⁴ Yehova aahimuthanla Mose wi aahoolele Aisarayeli okhuma Oyikuputu. Nave aahaavaha Aisarayeli sawooniherya sawooneya wi aahoolela orweela wa Mose. Ntoko yootakiherya, owo aanaahoolela othana nneeku naweemela nave ohiyu ni mooro. (Muk. 13:21) Mose aanachara neeku naweemela, nenlo naamukunxe owo ni Aisarayeli naakerihaka o eniya yooxeera. Nyenya achu yaahikhala awoova vaavaa yoonaaya wi yaari veeri, eniya ni anakhoco Oyikuputu. Awo yaahipiyerya makuchuwelo wi Mose aahaawoka vaavaa aakerinheiye o eniya yooxeera. Nyenya tahi wi waari owoka. Yehova aahimpharihela Mose waahoolela achu awe ophiyerya weiwo. (Muk. 14:2) Mulukku aahiwoopola mmukhalelo wootikhiniha.—Muk. 14:26-28.

⁵ Ivinre iyaakha 40, Mose aahititelela ororomela neeku wi aahoolele achu a Muluku mutakhwani. a Mu elukuluku ekina, Yehova aahikuha neeku vasulu va muxakala wa Mose, vaavaa Aisarayeli oothene yaaweryaaya woona. (Muk. 33:7, 9, 10) Orweela mu neeku, Yehova aahiloca ni Mose, nave owo aahivahererya malakiheryo wa achu. (Sal. 99:7) Aisarayeli yaanawerya woona mookwakwaleya wi Yehova aanamparihela Mose wi aahooleleke.

6. Ti mwawiihai Aisarayeli yaakhulenlaaya ohoolela wa Yehova? (Namarepela 14:2, 10, 11)

⁶ Moothananiha, Aisarayeli ancipale yaahikhooca yawoona yookwakwaleya yawi Yehova aanampharihela Mose ntoko yoohoolela awe. (Mwaalakhanye Namarepela 14:2, 10, 11.) Wiiliwiili, awo yaanakhooca weemererya wi Yehova aanampharihela Mose wi aahoolele. Wa nthowa na yeeyo Yehova haaweemerenrye awo ovolowa mu elapo ya nlakano.—Nam. 14:30.

7. Mutharihe sootakiherya sa yaale yaacharinhe ohoolela wa Yehova. (Namarepela 14:24) (Moone tho eruku.)

⁷ Nyenya Aisarayeli akina, yaahichariha ohoolela wa Yehova. Ntoko yootakiherya, Yehova aahoona wi: ‘Kalepe aanamuchara ni murima awe woothene.’ (Mwaalakhanye Namarepela 14:24, PMM.) Muluku aahimureeliha Kalepe, ophiyerya omuroromeliha wi athanle nipuro aachuneiye okhalakawo mu elapo ya nlakano. (Yos. 14:12-14) Aisarayeli yaawo yeemereryiwe ovolowa mu elapo ya nlakano yaahivaha yootakiherya yaphaama ya ochara ohoolela wa Yehova. Vaavaa Yosuwa aamuraceenleiye Mose ntoko muhooleli oothanliwa Aisarayeli, awo “yaanamucicimiha yoowo okumi awe woothene.” (Yos. 4:14, PMM) Ntoko yookhumelela, Yehova aahaareeliha aavahaka elapo yeeyo owo aalakanneiyeno.—Yos. 21:43, 44.

8. Mutharihe ti mwawiihai Yehova aahoolenleiye achu awe variyari va ilukuluku sa mamwene. (Moone tho eruku.)

⁸ Moovira wa elukuluku, Yehova aanaathanla athoryiha wi yaahooleleke achu awe. Voocharela, variyari va ilukuluku sa mamwene, Yehova aahaathanla alipa a miririmu wi yaahooleleke achu awe. Mamwene oororomeleya yaanachariha miruku sa alipa a miririmu. Ntoko yootakiherya,  Mwene Tavite mwawiiyeviha aaheemererya ekano ya mulipa a miririmu Natani. (2 Sam. 12:7, 13; 1 Math. 17:3, 4) Mwene Yehosafate aahicharihela ohoolela yoowo mulipa a miririmu amvaherenryeiye wi aahoolele ni waalipiha wi ‘ekhaleno nroromelo wa alipa a miririmu a [Muluku].’ (2 Math. 20:14, 15, 20) Vaavaa Mwene Esekiya aareiye va yawoopiha, aahiveka nikhaviheryo wa mulipa a miririmu Yesaya. (Yes. 37:1-6) Ilukuluku soothene mamwene yaacharihaaya ohoolela wa Yehova, awo yaanareelihiwa nave achu yaanakhapeleliwa. (2 Math. 20:29, 30; 32:22) Oothene yaanaphwanela wiiwexexa mookwakwaleya wi Yehova aanaapharihela alipa a miririmu awe wi yaahoolele achu awe. Mwawiihiiha, mamwene mancipale, hiiha tho ntoko Aisarayeli, yaahaakhooca alipa a miririmu a Yehova.—Yer. 35:12-15.

TI MWAWIIHAI YEHOVA AAHOOLENLEIYE AKRISTU OOPACERYA

9. Taani Yehova aapharihenleiye wi aahoolele Akristu a mu nsana noopacerya? (Moone tho eruku.)

⁹ Mu nsana noopacerya E.K., Yehova aahitikitherya muloko Weekristu. Ti mwawiihai owo aahoolenleiye Akristu yaale oopacerya? Owo oomuthanla Yesu ntoko muru wa muloko. (Aef. 5:23) Nyenya Yesu haaloca ni mmoha ti mmoha a oohuserya awe vameekheiye. Owo aahaapharihela arummwa ni alopwana awinnuwelavo o Yerusalemu wi etitelele ohoolela. (Saw 15:1, 2) Ohiya yeeyoru, yaahithanliwa atokweene wi ehooleleke muloko.—1 Ate. 5:12; Titu 1:5.

10. (1) Ti mwawiihai ancipale a Akristu a mu nsana noopacerya yaakhulenlaaya ohoolela yoowo yaakhenlaaya? (Saw. 15:30, 31) (2) Ntakhara heeni akina mu ilukuluku sakhalai hiyaawiiwelela yaawo Yehova aaphariheleiye wi yaahooleleke? (Moone ekaaxa “ Ntakhara Heeni Akina Yaahikhooca Sawooniherya Sookwakwaleya.”)

¹⁰ Ti mwawiihai Akristu a nsana noopacerya yaakhulenlaaya? Ancipale a yaawo yaahihakalala ni sooleeliherya yaakhenlaaya nave yaahipharihela muteko mwaphaama. Mweeparipari, “yaahakalala nthowa na waakhela masu oolipiha.” (Mwaalakhanye Saweeriwa ti Arummwa 15:30, 31.) Ti mwawiihai Yehova onaahooleleiye achu awe mmahiku ahu yaala?

YEHOVA ONANIHOOLELA HAI OLELO?

11. Mvahe yootakiherya enooniherya mukhalelo Yehova onaahooleleiye yaawo enayano vahoolo ohoolela mmahiku yaala ookuchula.

¹¹ Yehova onnatitelela waahoolela achu awe olelo. Owo onneerano yeeyo moorweela wa masu awe ni Mwanawe, muru wa muloko. Apwanne nnanwerya woona sawooniherya sawi  Muluku onnatitelela waapharihela ahooleli? Aai. Muthokororye yootakiherya yeeyo yeerenye omakuchuwelo wa eyaakha ya 1800. Charles Taze Russell ni asinthamwene awe yaahipacerya wiiwexexa wi eyaakha ya 1914 yaahaala okhala yoochuneya ntakhara otikitheryiwa Omwene wa Muluku. (Tan. 4:25, 26) Wi ephiyerye makuchuwelo yaala, awo yaaroromela sooloherya sa Mpiipiliya. Apwanne Yehova aanahoolela sootholathola saya sa Mpiipiliya? Chiryene owo aanahoolela. Mu 1914 saweereya sa elapo saanooniherya wi Omwene wa Muluku woopacerya olamulela. Ekhoco Yoopacerya ya elapo yoothene, voocharela ipahu, amwaacikinye ni othowa wa soolya. (Luka 21:10, 11) Mweeparipari Yehova aahaapharihela alopwana yaale Ekristu oororomeleya wi yaakhaviherye achu awe.

12-13. Tiheeni anna oohoolela yeenraaya variyari va Ekhoco Yanaawiili ya elapo yoothene wi yaaceererye muteko woolaleerya?

¹² Muthokororye tho, yeeyo yeeren’ye variyari va Ekhoco Yanawiili ya elapo yoothene. Anna yaahoolela o nipuro ntokweene yaahimuhuserya Wupulula 17:8, variyari va yoohuserya yaahiiwexexa wi ekhoco yanaawiili ya elapo yoothene tahi wi yaakeriha mu Armaketo, mwawiihiiha awo yaahiiwexexa wi yaahaala okhalavo elukuluku ya murecele emanle ekhoco vaavaa Anamoona yaahaalaaya olaleerya michaka wa achu ancipale. Mwawiihiiha, naamwi yooneyaka ntoko wi matorokelo yaale hiyaahaala ophariheleya mu elukuluku yeele, Exikola ya Kiliyati yaahitikitheryiwa ni marehereryo a Yehova wi yaavyakihe mamisiyonaariyu ntakhara olaleerya ni ohusiha mu ilapo orukurerya elapo yoothene. Mamisiyonaariyu yaahirumihiwa naamwi waari variyari va ekhoco. Ohiya yeeyoru, kapuro oororomeleya aahivahererya Exikola ya Orummwa Woomuluku b wi aavyakihe oothene mmilokoni wi ekhale alaleeryi amavyakelo. Mmukhalelo yoola, achu a Muluku yaanarehereryiwa ntakhara muteko woomwaahiyu.

¹³ Naawuupuwelaka sa muchuli, nnanwerya woona mookwakwaleya wi Yehova aanaahoolela achu awe variyari va elukuluku yeele yoovila. Ovinyerya mu Ekhoco Yanaawiili ya elapo yoothene, achu a Yehova annalaleerya mootaphuwa mu ilapo sincipale, mweeparipari achu aamusuwela Yehova nave alapeli awe annalaleerya mu elapo yoothene.

14. Ntakhara heeni nnanwerya ororomela ohoolela yoowo onarweela mmarehereryo a Yehova ni wa atokweene oothanliwa? (Wupulula 2:1) (Moone tho eruku.)

 ¹⁴ Olelo, anna a Nikhuuru Noolamulela annatitelela waavya ohoolela wa Kristu. Awo anachuna wi ohoolela anaavahaaya anna okhaleke wawiiwanana ni moonelo wa Muluku. Nave awo anaapharihela ooweherya a ekulucu ni atokweene a mmulokoni wi evahereryeke sooleeliherya. c Atokweene oothanliwa ari mu ‘ntata noolopwana’ na Kristu. (Mwaalakhanye Wupulula 2:1.) Eparipari wi atokweene oothene toohiphaameya nave annahesa. Mu ikwaha ikina Mose ni Yosuwa yaanahesa hiihaa tho ntoko arummwa. (Nam. 20:12; Yos. 9:14, 15; Aro. 3:23) Mwawiihiiha, Kristu onnamuhoolela moopwacha kapuro oororomeleya ni atokweene oothanliwa, nave onahaala otitelela weerano yeeyo “mahiku oothene ophiyerya omakuchuwelo wa mukhalelo yoola wa ichu.” (Mat. 28:20) Mwawiihiiha, nookhalano mathowa mancipale a ororomela ohoolela yoowo owo onavahereryeiye moorweela wa oothanliwa wi etitelele ovaha ohoolela.

HIYAANO NINNAPHURA VAAVAA NNATITELELAAHU OCHARIHA OHOOLELA WA YEHOVA

15-16. Tiheeni nyuwaano munahuseryaanyu ni saweereya sa yaale yaacharinhe ohoolela wa Yehova?

¹⁵ Vaavaa nnatitelelaahu ochariha ohoolela wa Yehova, ninnapuha mareeliho ovinyerya hiihaano. Ntoko yootakiherya, Anti ni Rupi yaahichariha ohoolela wa kapuro oororomeleya wi ekhweiye okumi aya. (Ahe. 13:5.) Ntoko yookhumelela awo yaari ooreheryeya wiivaha olapa mmuteko wa oteka. Rupi ooloca: “Nnakhala mu ipa ikhaanixa nave mu ikwaha ikina hannakhalano ikosinya. Waanachuneya okuliha ichu ikina seiyo kaapharihelaaka ntoko maakina ookumiha iruku ni ookulu yoowo aakisivela vancipale. Nave kaahinlela vancipale vaavaa kaakulinhaaka. Hiiha ntoko Sara mwaara a Aparahamu, miyaano kaari oolakelela owehaka ohoolo ohiya muculi.” (Ahe. 11:15) Tiheeni mutheli ola ophunreiye ni yoolakelela yeela? Rupi ooloca: “Nookhalano ohakalala otokweene osuwela wi nnamvaha Yehova soothene nryaahuno. Vaavaa nnalapaahu mmuteko wa oteka ninnawerya woona mukhalelo okumi onahaalaaya okhala mu elapo evyaani.” Anti onneemererya ariki: “Nookhalano ohakalala otokweene nthowa nawi ninnavaha elukuluku ahu ni ikuru sahu ntakhara muteko wa Yehova.”

¹⁶ Mukhalelo taani mukina nnaphuraahu vaavaa nnatitelelaahu ochariha ohoolela wa Yehova? Ntoko yootakiherya, Marsiya amanle okwaaxa  ohuserya oxikola, owo aanachuna ochariha yooleeliherya aakhenleiye wi akhale piyoneera. (Mat. 6:33; Aro. 12:11) Owo ooloca: “Miyaano kaavahiwa ekari ya ohuserya mu iyaakha xexe kihilivenle echu. Nyenya miyaano kaachuna opaka ichu sincipale ntakhara Yehova. Mwawiihiiha ohiya weemererya yoovaha yeele, kaahaavya muteko yoowo waahaala okikhaviherya okhalano ekhorowa yawaakhwanela wi kiwerye okhala piyoneera. Yaari yoolakelela emoha yaphaamaxa yeeyo kaapankaaka. Vano kapiyoneera oohakalala, kinnawerya olakelela nihiku kinayaaka olapa, nave tho kiri ooreheryeya okhaviherya Opeteli, ni opaka ichu sicipale soochuneyaxa ntakhara Yehova.”

17. Mareeliho taani awaaceereryeya anakhumelela vaavaa nnatitelelaahu ochariha ohoolela wa Yehova? (Yesaya 48:17, 18)

¹⁷ Vakina vaya, ninnaakhela ohoolela yoowo onanikhapelela ohikhala ootikitheryeya mu wiithukumanyerya ni miteko seiho sinahaala onikeriha va yaawoopiha ni onanariha malamulo a Muluku. Mmakupa yaala nnahaala ophuravo vancipale wakhala wi pahiru ninnachariha ohoolela wa Yehova. Ninneeriha yawuupuxera ya murima ahu okhala yaweela ni osepa makacamiho mancipale yaawo yaahaala oninyeenyeihaka. (1 Tim. 6:9, 10) Ntoko yookhumelela, ninnaavya ni murima woothene malapelo a Yehova, yaawo enaruuha ohakalala wawaaca, murecele ni waakhwaneliwa.—Mwaalakhanye Yesaya 48:17, 18.

18. Ntakhara heeni nyuwaano muri oolakelela otitelela ochariha ohoolela wa Yehova?

¹⁸ Moohikwa minikwa, Yehova onahaala otitelela waapharihela ahooleli wi avahererye ohoolela variyari va yoohooxa etokotoko ni mu Olamulelo wa Iyaakha Ncikhwi. (Sal. 45:16) Nnahaala otitelela ochariha ohoolela yoola, naamwi eyo evolowelaka ohiya soochuna sahu muculi? Onaahaala okhala wookhweya weerano yeeyo wakhala wi ninnachariha ohoolela wa Yehova hiihaano. Mwawiihiiha, ntitelele ochariha ohoolela wa Yehova ophitaanyerya yoowo onavahereryiwa ni alopwana yaawo athanliwe wi enihooleleke. (Yes. 32:1, 2; Ahe. 13:17) Vaavaa nneeraahu yeela, ninnakhalano mathowa oothene a omuroromela Yehova yoowo ananeeciha anikerihaka ocai wa yawoopiha yoomunepani nave ananihoolela o nipuro nnayaahuwo—mu elapo evyaani ntakhara ekumi yoohimala.