IKWAHA ikina anamarepa a Piipiliya yaanuuluulela masu makina nsu ti nsu. Moone mathowa mararu akhweya yaaweeriha weerano yeeyo:

Mu elukuluku yeeyo aataphuleliweiye. Mu Aisarayeli khalai, achu ancipale hiyaawaarino ikoopiya sa Nlamulo wi muchu anapharihela mukhateiye. Ikwaha sincipale, pahiru mukhalelo mmoha yaaryaayano wi ewiriyane nlamulo waari vaavaa achu yaathukumanaaya ohoolo wa Tapernakulu. (Malam. 31:10-12) Ti yawooneya wi mu ilukuluku seiya waari wookhweya achu okhala awaakanyereya, vaavaa yaawiriyanaaya nlamulo variyari va iwora sincipale ni veeri va achu ancipale. (Neh. 8:2, 3, 7) Wa nthowa na yeeyo, wi achu ewerye wuupuwelela yeeyo yaalakhanyiwa nave voocharela epharihele ikano seiyo mu okumi aya, waari woochuneya wi yuuluuleliwe masu oochuneya. Wuuluulela masu makina waari woochuneyaxa wi achu eweryeke wuupuwelela phaameene Malamulo makina yaawo yaavolowela ichu sincipale.—Onam. 18:4-22; Malam. 5:1.

Mukhalelo aarempweiye. Makupa makina a Mpiipiliya arempwile mmukhalelo wa macipo—ntoko yootakiherya livuru a Salmu, Ncipo na Solomoni, ni Wiikhupanyerya. Macipo makina yaanakhalano akooru ni masu awuuluulela, nave eyo yaanathariha muru wa ncipo, yaakhaviheryaka tho yaawo yaawiriyana ncipo wuupuwelelaka masu. Ntoko yootakiherya, moone yeeyo erempwale mu Salmu 115:9-11, PMM: “AIsarayeli roromelaani Apwiya!—Ti mulipa awookhaviheryaani ni oowaakihaani. Nloko na Aaroni, roromelaani Apwiya!—Ti mulipa ookhaviherya anyu ni yawaakiha anyu. Nyuwo munawoova Apwiya, roromelaani yaawo!—Ti mulipa ookhaviherya anyu ni yawaakiha anyu.” Apwanne munnawerya woona mukhalelo wuuluuleliwa masu yaala yaahaalaaya waakhaviherya alipa awiipa okhapelela mmuupuweloni ni mmurimani mwaya masu yaala?

Ochuneya waya wa ovuwiha miyaha soochuneya. Anamarepa a Piipiliya ikwaha ikina yaanuuluulela masu oochuneyaxa. Ntoko yootakiherya, vaavaa Yehova aavaherenryeiye Aisarayeli sooleeliherya vooloca sa ohilya nikhami, Yehova aahimuleela Mose wuuluulela ikwaha sincipale mathowa ene. Yehova aachuna ocicimiherya wi nikhami nneemelela okumi. (Onam. 17:11, 14) Elukuluku vaakhani ohoolo waya, vaavaa arummwa ni atokweene o Yerusalemu yaarempaaya vooloca sa yeeyo Akristu yaaphwanelaaya weera wi emuhakalalihe Yehova, naari wi yaaphwanelaaya osepa wi ehimuhicihe Yehova, wanaawiili awo yaahicicimiherya ochuneya waya othanya nikhami.—Saw. 15:20, 29.

Eparipari wi Piipiliya onnuuluulela masu oohiyanahiyana, nyenya eyo henataphulela wi Yehova onachuna wi hiyaano nuuluuleleke masu mamohamoha. Ntoko yootakiherya, Yesu ooloca: “Mmavekeloni mwanyu, muhuuluuleke masu yaawoyaawo.” (Mat. 6:7) Owo oovahererya ichu ikina soochuneya wi hiyaano niphitaanyeryeke mmavekelo ahu mwawiiwanana ni yookhwela awe. (Mat. 6:9-13) Wa nthowa na yeeyo, naamwi hiyaano nsepaka wuuluulela masu mamohamoha mmavekelo ahu, hiyaano nnanwerya ophitaanyeryaka ichu seiyo mmavekelo ahu.—Mat. 7:7-11.

Aakhalavo mathowa aphaama wi Piipiliya uuluuleleke masu wa nsu ti nsu. Ola mukhalelo mmoha wa mikhalelo mincipale seiho Yehova Muhusiha ahu Mutokweene, onanihusiheiye yeeyo eri yaphaama wa hiyaano.—Yes. 48:17, 18.