1-2. Mwawiiwanana ni Mateu 5:11, nnaphwanela woonaka hai makacamiho?

YESU aahaaroromeliha oomuchara awe, wi yaahaala okhalano ohakalala weeparipari. Nave tho owo, aahaalopola yaale anamusivela wi yaahaala ohoolela makacamiho. (Mat. 10:22, 23; Luka 6:20-23) Ninnahakalala nthowa na okhala oohuserya a Kristu. Nyenya nnoona hai vaavaa amusi aneereryaaya onihiiha omurumeela Yehova, wakhala wi alamuleli annaniikara, naari wakhala wi asinthamwene oomutekoni ni asinthamwene oosikola annanikhinyererya opaka echu yoonanara? Vaavaa nnuupuwelaahu ichu ntoko seiya, nnanwerya okhala awuukhuwa.

² Achu ancipale, hanoona wiikariwa ntoko echu enaaruuhela ohakalala. Naamwiihiiha, Masu a Muluku annanleela wi nnanwerya okhala oohakalala naamwi niikariwaka. Ntoko yootakiherya, murummwa Yakopo oorepa wi hannaphwanela okhala awuukhuwa vaavaa nnahoolelaahu makacamiho, opwaha yeeyo nnaphwanela okhala oohakalala. (Tiy. 1:2, 12) Nave tho Yesu aahiloca wi nnaphwanela okhala oohakalala naamwi niikariwaka. (Mwaalakhanye Mateu 5:11.) Nni nikhapelele hai ohakalala wahu naamwi nihoolelaka makacamiho? Nnanwerya ohuserya sincipale moorweela wa othokororya masu avakhaani, anaphwanyeya mu ekaarata ya Tiyako yeeyo aarepenleiye Akristu oopacerya. Voopacerya, hankooni nthokororye makacamiho makina yaawo Akristu yaala yaahoolenlaaya.

3. Tiheeni yeeren’ye evinrevo elukuluku vakhaani, Yakopo amanle okhala oohuserya a Yesu?

³ Evinrevo elukuluku vakhaani munnawe Yesu oomaayi, Yakopo amanle okhala oohuserya, Akristu o Yerusalemu yaahipacerya wiikariwa. (Saw. 1:14; 5:17, 18) Nave vaavaa oohuserya Stefano iiphiweiye,  Akristu ancipale “yaamwalamwalela elapo ya oYuteya ni ya oSamariya,” nave yaaphiya o Kupuru ni o Antiyokeya. (Saw. 7:58–8:1; 11:19) Nnanwerya waanyiherya makacamiho oohuserya yaala yaahoolenlaaya. Naamwiihiiha, awo yaatitelela olaleerya mwamvai michaka yaphaama mmuceche ori woothene yaayaayawo, nave miloko saatikitheryiwa mmiceche soohiyanahiyana. (1 Ped. 1:1) Nave emanle weereya ela, awo yaahihoolela ilukuluku sookacamihaxa.

4. Makacamiho taani Akristu oopacerya yaakumannaayano?

⁴ Akristu oopacerya, yaahoolela makacamiho mancipale. Ntoko yootakiherya, variyari va eyaakha 50 E.K., Mulamuleli o Roma, Klautiyu, aahilamulela wi Ayuta oothene epwahewo o Roma. Mwawiihiiha, Ayuta yaawo yaari Akristu, yaahilamuleliwa ohiya ipa saya ni oya mu ilapo ikina. (Saw. 18:1-3) Mu eyaakha 61 E.K., murummwa Paulo aahirepa wi Akristu akhwaawe yaahinyemuliwa, yaahiwaleliwa mukariposo, nave yaahaakhiwa muhakhu aya. (Ahe. 10:32-34) Nave moolikana ni achu akina, Akristu akina yaahivilela ni ohaawa navetho ireca.—Aro. 15:26; Fil. 2:25-27.

5. Makoho taani nnahaalaahu waakhula mmwaha yoola?

⁵ Elukuluku Yakopo aarepeiye ekaarata awe ehaakumve eyaakha ya 62 E.K., owo aanasuwela phaama makacamiho yaawo anna ni arokora awe yaahoolelaaya. Yehova aahimveerela Yakopo waarepela Akristu ale ekaarata yeeyo yaarino ikano soophara muteko, saahaala waakhaviherya otitelela okhala oohakalala naamwi yaakumana ni makacamiho. Hankooni nthokororye ekaarata ya Yakopo, nave niphwanye maakhulo a makoho ala anacharela: Ohakalala taani Yakopo aarempeiye mu ekaarata awe? Tiheeni yaahaala omweeriha Mukristu oyeleela ohakalala wawe? Nave miruku, nroromelo, ni olipa murima inii inikhaviherye hai okhapelela ohakalala wahu moohipwacha makacamiho nnahoolelaahu?

6. Mwawiiwanana ni Luka 6:22, 23, ntakhara heeni Mukristu onanwerya okhala oohakalala vaavaa onahooleleiye makacamiho?

⁶ Achu ananwerya wuupuwela wi anahaala okhala oohakalala wakhala wi aakhalano okumi waphaama, ikhorowa sincipale, ni emusi yoohakalala. Nyenya mukhalelo wa ohakalala yoowo Yakopo orempeiye mu ekaarata awe, onnapaka makupa a yawiima ya munepa wa Muluku, nave honarweela mu ichu seiho muchu oreiyeno. (Gal. 5:22) Mukristu onanwerya okhalano ohakalala naari otheya weeparipari wakhala wi onnasuwela wi onnamuhakalaliha Yehova ni ochariha yootakiherya ya Yesu. (Mwaalakhanye Luka 6:22, 23; Kol. 1:10, 11) Ohakalala wahu onanwerya olikanyihiwa ni efarolya eri mpuwa mwa lanterna. Efarolya ennakhapeleleya mpuwa mwa lanterna wi ehiphwanyiwe ni echeku naari epula. Moolikana, hiyo tho nnanwerya otitelela okhala oohakalala moohipwacha nikacamiho taani nnahoolelaahu mookumini. Hinni n’yeleele ohakalala wahu vaavaa nniiceliwaahu naari nihinakhalaahuno ikhorowa sawaakhwanela. Nnamutitelela okhala oohakalala, elukuluku nnanyemuliwaahu, naari vaavaa amusi ni achu akina, ananiicaaya. Nnanwerya okhapelela ohakalala wahu, vaavaa achu aneereryaaya onaakha. Makacamiho nnahoolelaahu nthowa na nroromelo nahu, annooniherya wi na oohuserya eeparipari a Kristu. (Mat. 10:22; 24:9; Yoh. 15:20) Ti nthowa nene Yakopo orempeiye wi: “Asinnaka, mweereke okhala woohakalalihasha, vaavaa munavolowaanyu mu weereriwani woohiyanahiyana.”—Tiy. 1:2.

7-8. Ntakhara heeni nroromelo nahu nnakhalaaya noolipa vaavaa nneehiwaaya?

⁷ Yakopo ooromola nthowa nikina nnaweeriha Akristu ovilela ni makacamiho oovila. Owo oriye: “Weehiwa wa nroromelo nanyu onnaruuha ovilela.” (Tiy. 1:3) Makacamiho ananwerya olikanyihiwa ni mooro yoowo onooxiwano muthipo wi nihaniwe nlema naari mwaalo. Vaavaa muthipo onooxiwaaya ni ohaniwa nlema naari mwaalo, muthipo owo wavola onnakhala woolipa. Moolikana, vaavaa nnahoolelaahu makacamiho, nroromelo nahu ninnakhala noolipa. Ti nthowa nene Yakopo orempeiye wi: “Ovilela tho, okhwaaniheryeye, wi mukhale awinnuwa ni awaakhwanela, ehihanlevo echu ekina.” (Tiy. 1:4) Vaavaa nnoonaahu wi makacamiho ahu anneeriha nroromelo nahu okhala noolipa, nnanwerya ovilela ni yaawo moohakalala.

⁸ Mu ekaarata awe, Yakopo ooromola ichu ikina seiho saahaala oneeriha oyeleela ohakalala wahu. Makacamiho taani yaawo, nave nni niwerye hai ovootha?

9. Ntakhara heeni ninnachuna miruku?

⁹ Echu taani enahaala oneeriha oyeleela ohakalala wahu? Vaavaa nihinasuwelaahu echu yaweera. Vaavaa nnakhalaahuno makacamiho, nnaphwanela omveka Yehova wi anikhaviherye opaka soolakelela seiho sinahaala omuhakalaliha, seiho sinahaala waakhaviherya anna ni arokora ahu, nave tho seiho sinahaala onikhaviherya otitelela okhala oororomeleya.  (Yer. 10:23) Ninnachuna miruku, wi nisuwele echu yaweera ni masu ooloca wa yaale ananiica. Wakhala wi hannasuwela echu yaweera nnamukhala ooceecheya, nave mwawaakuveya nnamuyeleela ohakalala wahu.

10. Wi nikhaleno miruku tiheeni nnaphwanelaahu weera yeeyo Tiyako 1:5 onanleeleiye?

¹⁰ Tiheeni nnaphwanelaahu weera wi nikhapelele ohakalala wahu? Nimveke Yehova miruku. Wi nivilele ni makacamiho ahu nihiyeleenle ohakalala, voopacerya nnaphwanela omveka Yehova wi anivahe miruku seiho nnachunaahu, wi nipake soolakelela saphaama. (Mwaalakhanye Tiyako 1:5.) Tiheeni nnaphwanelaahu weera wakhala wi nohoona wi Yehova haakhunle mwawaakuveya nivekelo nahu? Yakopo olonce wi nnaphwanela ‘otitelela omveka Muluku.’ Tahi wi Yehova hananiwiriyana vaavaa nnamvekaahu miruku. Nave owo hani ananariwe ni hiyo. Tiithi ahu a wirimu ‘onnanivaha moolakelela’ vaavaa nnamvekaahu miruku wi nivilele ni makacamiho ahu. (Sal. 25:12, 13) Owo onnoona makacamiho ahu, ookhalano niphwanya, nave ori ooreheryeya wi anikhaviherye. Mweeparipari, ela ennaneeriha okhala oohakalala! Ti mwawiihai Yehova oneereiye anivahe miruku?

11. Echu taani ekina nnaphwanelaahu weera wi niphwanye miruku?

¹¹ Yehova onnanivaha miruku orweela Mmasu awe. (Masi. 2:6) Wi niphwanye miruku seiho, nnaphwanela waalakhanya Masu a Muluku ni soolaleeryiwa sahu seiho sinathipeleya Mpiipiliyani. Nyenya ninnaphwanela opaka sincipale ohiya pahiru omuhuserya Piipiliya ni soolaleeryiwa sahu. Nnaphwanela opharihela miruku sa Muluku mookumini mwahu. Yakopo oorepa: “Mukhale aweerano masu, tahi awiiwaru ni wiiwoka aneene.” (Tiy. 1:22) Vaavaa nnapharihelaahu ikano sa Muluku, nnamukhala achu a murecele, oophimelela, ni aikharari. (Tiy. 3:17) Makhalelo yaala, annanikhaviherya ovilela ni makacamiho nihiyeleenle ohakalala wahu.

12. Ntakhara heeni oryaaya woochuneyaxa omusuwela phaama Piipiliya?

¹² Masu a Muluku ari ntoko eweheryo yaawo ananikhaviherya osuwela echu yaweera, ni mukhalelo wa weerano. (Tiy. 1:23-25) Ntoko yootakiherya, nimanle ohuserya Masu a Muluku nnanwerya  osuwela wi ninnaphwanela wiikasoopa. Nnikhaviheryo na Yehova, nnamuhuserya okhala achu oomaaleleya vaavaa achu ni makacamiho ananuukhulaaya. Nthowa na okhala oomaaleleya, ninnaakhulela phaama vaavaa nnahoolelaahu makacamiho. Ninnawerya wuupuwela moopwacha ni opaka soolakelela saphaama. (Tiy. 3:13) Ti woochuneyaxa omusuwela phaama Piipiliya!

13. Ntakhara heeni nnaphwanelaahu ohuserya sootakiherya sa achu analociwa Mpiipiliyani?

¹³ Mu ilukuluku ikina, ninnasuwela echu nnaphwanelaahu osepa nimanle opaka yoocheka. Nyenya ohuserya mmukhalelo yoola, tahi woophwanelela. Mukhalelo waphaama wa ophwanya miruku, ori moorweela wa ohuserya sootakiherya sa yaale yaapanke ichu saphaama ni yaale yaapanke ichu soonanara. Ti nthowa nene Yakopo onanceenyeryeiye wi, nthokororye sootakiherya sa achu analociwa Mpiipiliyani ntoko Aparahamu, Rahapi, Yupu ni Eliya. (Tiy. 2:21-26; 5:10, 11, 17, 18) Alapeli yaala oororomeleya a Yehova, yaahiwerya ovilela ni makacamiho aya yaawo yaahaala owaakha ohakalala. Sootakiherya saya sa ovilela sinnooniherya wi nnikhaviheryo na Yehova, hiyotho nnanwerya weerano emohamoha.

14-15. Ntakhara heeni nnaphwanelaahu omaliha mwawaakuveya minikwa sahu?

¹⁴ Vaavaa nnakhwaahu minikwa vooloca sa soororomela sahu. Wiiliwiili, onanwerya okhala woovila wa hiyo wiiwexexa echu vyakala Mmasu a Muluku. Naari Yehova onanwerya ohaakhula mavekelo ahu mmukhalelo naawehereryaahu. Ichu ntoko seiha, inanwerya oneeriha okhalano minikwa. Wakhala wi hinimalinhe mwawaakuveya minikwa sahu, iho inanwerya oceecheiha nroromelo nahu ni onanariha onthamwene ahu waphaama ni Yehova. (Tiy. 1:7, 8) Nave minikwa inanwerya oniyeleeliha ewehereryo ahu ya muhoolo.

¹⁵ Murummwa Paulo, aalikanyiha ewehereryo ahu ya muhoolo ni ankora. (Ahe. 6:19) Ankora, wiiliwiili onakhala muthipo woohokola yoowo onamulipiha pophoro variyari va echeku yawuupa, nave tho onnamukhaviherya pophoro wi ahikhumule maluku. Nyenya ankora onalapa pahiru wakhala wi muthipo omakeleliweiyeno ni pophoro hopasen’ye. Hiiha ntoko murawa onnanarihaaya muthipo yoowo omakeleliweno ankora, wakhala wi hinimalinhe mwawaakuveya minikwa sahu, iho inanwerya oceecheiha nroromelo nahu. Vaavaa nnahoolelaahu makacamiho, nnanwerya oyeleela nroromelo nuupuwelaka wi Yehova hani aakhwaniherye soororomeliha sawe. Wakhala wi nooyeleela nroromelo nahu, nnahaala tho oyeleela ewehereryo nahu. Hiiha ntoko Yakopo olonceiye, minikwa ‘iri ntoko ncumusha na ephareya, nenlo nnakushiwa ti echeku.’ (Tiy. 1:6) Muchu oniisoona mmukhalelo yoola, akhweya hani akhaleno ohakalala!

16. Tiheeni nnaphwanelaahu weera wakhala wi nookhalano minikwa?

¹⁶ Mmalihe minikwa sanyu; mulipihe nroromelo nanyu. Mweerevo echu mwawaakuveya. Mmahiku a mulipa miririmu Eliya, achu a Yehova yaanakhwa minikwa vooloca sa soororomela saya. Eliya aahaaleela yaawo ariki: “Ophiyerya liini mututhunyaka ni onamphara piili? Apwiya [Yehova] yaari Muluku mwaachareke yaawo. Vano, aari Paala, mmuchareke yoowo.” (1 Mam. 18:21) Olelo tho ninnaphwanela weeravo echu mwawaakuveya. Hiyaano tho nnaphwanela otholathola wi nroromele wi Yehova tori Muluku eeparipari, wi Piipiliya Masu awe, nave tho wi Anamoona a Yehova, achu awe. (1 Tes. 5:21) Weerano soothene seiha onahaala omaliha minikwa sahu, ni olipiha nroromelo nahu. Wakhala wi ninnachuna nikhaviheryo wi nimalihe minikwa sahu, nnanwerya waaveka atokweene. Nnaphwanela weeravo echu mwawaakuveya wi nikhapelele ohakalala wahu mu omurumeela wahu Yehova!

17. Tiheeni enahaala weereya wakhala wi nooyeleela olipa wahu murima?

¹⁷ Vaavaa nnakhalaahu awuukhuwa. Masu a Muluku ani: “Wavelavela nihiku nawuukhuwa, ikuru saa sinnavukuwa.” (Masi. 24:10) Nsu na Ehepiri ntaphuleliwe wi “sinnavukuwa,” nnanwerya otaphulela “oyeleela olipa murima.” Wakhala wi mooyeleela olipa wanyu murima, mwawaakuveya munahaala tho oyeleela ohakalala wanyu.

18. Ovilela onataphulela eheeni?

 ¹⁸ Nimuroromele Yehova wi anivahe olipa murima wi nivilele. Nnaphwanela okhalano olipa murima elukuluku nnahoolelaahu makacamiho. (Tiy. 5:11) Nsu nenlo Yakopo opharihenleiye nraceeliwe ni nsu nawi “ovilela” ninnaneeriha wuupuwela sa muchu yoowo eemenle mwakuru mu nipuro nawe. Nnanwerya wuupuwela sa mukhoco yoowo moolipa murima eemenle mu nipuro nawe na owaniha, vaavaa amwiicani awe anamuhiphelaaya.

19. Tiheeni nnaweryaahu ohuserya moorweela wa yootakiherya etikitheryiwe ni murummwa Paulo?

¹⁹ Murummwa Paulo ootikitherya yootakiherya yaphaama ya olipa murima ni ovilela. Mu ilukuluku ikina, owo aanakhala ooceecheya. Nyenya Paulo aahiwerya ovilela nthowa nawi aahimuroromela Yehova, wi amvahe ikuru seiho aachuneiye. (2 Kor. 12:8-10; Fil. 4:13) Hiyo tho nnanwerya okhalano ikuru ni olipa murima ntoko yoola, wakhala wi mwawiiyeviha noosuwela wi ninnachuna nikhaviheryo na Yehova.—Tiy. 4:10.

20-21. Tiheeni nnaphwanelaahu ororomela?

²⁰ Nnanwerya ororomela wi makacamiho nnakumanaahuno, tahi olaka onarweela wa Yehova. Yakopo onnaniroromeliha wi: “Muchu eereriwaka, ahiloce wi, ‘kineereriwa ti Muluku,’ ntakhara Muluku hanawerya weereryiwa ni yoonanara, nave yoowo hanamweererya tho muchu.” (Tiy. 1:13) Vaavaa nnalekecheyaahu ni eparipari yeela, ninnamwaacamela Tiithi ahu oosivela, a wirimu.—Tiy. 4:8.

²¹ Yehova ‘hanathatuwa naari okhalano muuruxi wa marukunuwelo.’ (Tiy. 1:17, NN) Yehova aahaakhaviherya Akristu a mu nsana noopacerya ohoolela makacamiho aya, nave owo tho onammukhaviherya mmoha ti mmoha a hiyo. Mumveke Yehova okhumela vathi va murima wi ookhaviheryeeni okhalano miruku, nroromelo, ni olipa murima. Owo onahaala waakhula mavekelo anyu. Mweerano hiiha, munanwerya ororomela wi owo onahaala wookhaviheryaani okhapelela ohakalala wanyu vaavaa munahoolelaanyu makacamiho!