1-2. Tiheeni mulipa oorepa mmoha aalonceiye, nave tiheeni nnahaalaahu ohuserya mmwaha yoola?

MAMILYAWU aachu olelo annaloca wi annamweemererya Yesu, nyenya hanachariha mahusiheryo awe. (2 Tim. 4:3, 4) Eri ntoko mulipa oorepa mmoha aalonceiye: “Mwaanyiherye wi ookhalavo Yesu mukina veeri vahu olelo nave onnaloca ichu imohamoha seiho Yesu oopacerya aaloceiye . . . , apwanne naahaala omukhooca hiiha ntoko yeeren’yaaya iyaakha 2.000 ivirale? . . . Naakhulo nookwakwaleya ti nawi: ‘Aai, naahaala omukhooca.’”

² Ancipale a mu nsana noopacerya yaahiiwa mahusiheryo a Yesu nave yaamoona apakaka sootikhiniha, nyenya naamwiihiiha awo hiyaamuroromenle yoowo. Ntakhara heeni? Mmwaha ovirale, noothokororya mathowa maxexe yaawo yeerinhe wi achu ekwaculeye nthowa na yeeyo Yesu aaloceiye ni yeeyo eereiye. Mmwaha yoola, nnahaala woona mathowa makina maxexe. Nave tho, nnahaala woona ntakhara heeni achu ancipale olelo annaakhooca oomuchara a Yesu ni yeeyo enahaala onikhaviherya wi nihikwaculeye.

3. Mukhalelo taani wa Yesu weerinhe wi akina ekwaculeye?

³ Vaavaa aareiye veelaponi yavathi, Yesu aapaka onthamwene ni achu a mikhalelo soothene. Owo aanalya ni yaale yaari ooreela ni oovuwa, nyenya tho aanamaliha elukuluku yincipale ni yaale yaari oohaawa ni yaahooxiwa. Ohiya yeeyoru, owo aanaakhaliha mooreera murima yaale yooniwa ntoko “achu oocheka.” Akina yaawo yiisoona okhala eekhaikhai yaakwaculeya nthowa na mukhalelo wa Yesu. Awo yaahaakoha oomuchara awe eriki: “Hai munalyanyu ni owurya vamoha ni atchu amushokho ni ótcheka?” Yesu aawaakhula ariki: “Yowo analipa hanakhwela  mulipa-mureche; nyenya awicheliwa. Nkárwele Miyo witchana ékhaikhai, nyenya ótcheka wi erukunuwe murima.”—Luka 5:29-32, NN.

4. Mwawiiwanana ni mulipa a miririmu Isaiya, tiheeni Ayuta yaaphwanelaaya osuwela vooloca sa Mesiya?

⁴ Tiheeni Soorepa inalocaaya? Mesiya ahaakumve orwa, mulipa a miririmu Isaiya aaloherya wi elapo hiyaahaala omweemererya. Yooloherya eyo yaahi: “Achu yaamunyemula ni omukhooca yoowo; aari muchu awoona masooso ni awuukhuwa. Wa hiyo aari oothanyeya ni oonyemuwa nave hinaampwacha.” (Isa. 53:3) Ntoko yooloherya ela yoonihenryaaya, Mesiya aahaala onyemuliwa ni “achu.” Mwawiihiiha, Ayuta a mu nsana noopacerya yaaphwanela osuwela wi Yesu aahaala okhoociwa.

5. Ti mwawiihai ancipale olelo anawoonaaya oomuchara a Yesu?

⁵ Apwanne ninnoona nikacamiho noolikana olelo? Aai. Ahooleli ancipale a malapelo anaweemererya mmakerexani mwaya achu oochuneya ni ooreela, nave tho yaale anooniwa mweelaponi ntoko achu amiruku. Awo anneerano yeela naamwi esuwelaka wi achu yaawo aakhalano meecelo yaawo anavuhana ni malakiheryo a Muluku. Ahooleli yaala a malapelo annaanyemula alapeli a Yehova. Naamwi eri amvai nave ekhalaka mwawiiwanana ni malakiheryo a Muluku, Akristu eeparipari hanooniwa okhala achu oochuneyaxa mweelaponi. Ntoko murummwa Paulo olonceiye, Muluku aathanlile ichu “soohisuwanyeya.” (1 Kor. 1:26-29) Nyenya wa Yehova, alapeli awe oothene oororomeleya toochuneya vancipale.

6. Nni niwerye hai otakiherya mukhalelo wa Yesu, yoowo wooniheryiwe mu Mateu 11:25, 26?

⁶ Nni niwerye hai osepa okwaculeya? (Mwaalakhanye Mateu 11:25, 26.) Muheemererye owokiwa ni moonelo wa elapo vooloca sa achu a Muluku. Mweemererye eparipari yawi pahiru Yehova onaapharihela achu a wiiyeviha wi epake yoochuna awe. (Sal. 138:6) Nave muupuwele ichu seiho Yehova owenryeiye opaka aapharihelaka achu yaawo mweelaponi anooniwa ntoko oohisuwela echu ni oohikhalano mavyakelo.

7. Ntakhara heeni Yesu aawiichana Afarisi wi alipa oowoka, nave awo yaakhulenle hai?

⁷ Yesu aahuupulula owoka wa ahooleli a malapelo a mu elukuluku awe. Moolipa murima, Yesu aahaavaanya Afarisi yaawo yaateteiwa ni onawa mata, ohiya ni mukhalelo wa waakhaviherya asitiithi aya. (Mat. 15:1-11) Ti yawooneya wi oohuserya a Yesu yaatikhiniheya ni masu awe. Ophiyerya wi awo yaamukoha eriki: “Moosuwela wi Afarisi, iiwalaaya yeeyo muloncaanyu, aakwaculiwano?” Yesu aahiwaakhula ariki: “Miri soothene, ihaaliwe ti atiithi aka a wirimu, inampholiwa. Mwaahiyeeni! Ari ahooleli oohoona. Muchu oohoona aanamuhoola oohoona mukhweiye, ooweeli ala anammorela mulicini.” (Mat. 15:12-14) Yesu heemerenrye wi moonelo wooheseya wa ahooleli a malapelo omuhiihe oloca eparipari.

8. Ti mwawiihai Yesu oonihenryeiye wi Muluku haneemererya soororomela soothene sa malapelo?

⁸ Yesu tho aavaanya mahusiheryo oowoka a malapelo atheru. Owo haakhaviherya moonelo wawi Muluku onneemererya soororomela soothene sa malapelo. Moohiyana, Yesu aaloca wi ancipale yaahaala ocharaka mphiro mutokweene yoowo onakeriha wootoloxiwani nave wi pahiru ti avakhaani yaawo yaahaala ophwanya mphiro wawuuraanyeya onakeriha wookumini woohimala. (Mat. 7:13, 14) Yesu tho aahooniherya mookwakwaleya wi akina pahiru yaahaala wiisooneihaka wi annamurumeela Muluku, nyenya mweeparipari ehimurumeelaka. Yesu aalopola: “Phoole ni alipa a miririmo oowoka. Yaawo annarwa wa nyuwo ewanre ntoko ipucepuche, nto mpuwa mwaya ari miici  sooluwa. Munarwa mwaasuwela mwa sawiima saya.”—Mat. 7:15-20.

9. Mahusiheryo taani makina a malapelo oowoka Yesu uupulunleiye?

⁹ Tiheeni Soorepa inalocaaya? Piipiliya aaloherya wi mvai ntakhara empa ya Yehova waahaala omulya murima Mesiya. (Sal. 69:9; Yoh. 2:14-17) Mvai yoola waamweerinhe Yesu wuupulula soororomela ni meerelo a malapelo atheru. Ntoko yootakiherya, Afarisi yuupuwela wi vaavaa muchu onakhweiye aakhala makupa makina ahinakhwa; nyenya Yesu aahusiha wi achu ookhwa anamurupa. (Yoh. 11:11) Asatuki hiyeemererya wi wookhalavo ovinya mookhwani; nyenya Yesu amviiha nthamwene awe Lasaro mookhwani. (Yoh. 11:43, 44; Saw. 23:8) Afarisi yaaloca wi ichu soothene seereya waari nthowa na Muluku naari wi saarimulakeleliwa; nyenya Yesu aahusiha wi achu ananwerya othanla omurumeela Muluku naari hooye.—Mat. 11:28.

10. Ntakhara heeni mahusiheryo ahu annaweeriha akina okwaculeya?

¹⁰ Apwanne ninnoona nikacamiho noolikana olelo? Aai. Ancipale annaniica vaavaa nnampharihelaahu Piipiliya wi nooniherye wi mahusiheryo makina a malapelo toowoka. Ntoko yootakiherya, wi yeererye waalekecha achu, ahooleli a malapelo annahusiha wi Muluku onnaahooxa achu oonanara murima o cukucha a mooro. Nyenya yaale anamulapela Yehova, Muluku a osivela, annooniherya wa achu wi mahusiheryo awo toowoka. Ahooleli a malapelo annahusiha tho wi vaavaa muchu onakhweiye aakhala makupa ahinakhwa. Nyenya hiyaano ninnooniherya wi mahusiheryo yaawo hanarweela Mpiipiliyani. Chiryene, waakhanle wi aakhala makupa makina ahinakhwa, nihusiheryo na ovinya mookhwani hinaahaala okhalano mphurelo. Nave vaavaa mahusiheryo a malapelo atheru anahusihaaya wi ichu soothene inamulakeleliwa mookumini mwahu, hiyaano ninnahusiha wi muchu ookhalano otaphuwa wa othanla nave onanwerya olakelela omurumeela Muluku naari hooye. Ti mwawiihai ahooleli a malapelo anaakhulelaaya soothene seiha? Ikwaha ikina, awo annanyeenyeya!

11. Mwawiiwanana ni masu a Yesu mu Yohani 8:45-47, tiheeni Yehova onaweheryeiye wa alapeli awe?

¹¹ Nni niwerye hai osepa okwaculeya? Waakhanle wi chiryene ninnasivela eparipari, nnaphwanela  weemererya yeeyo Muluku onaloceiye. (Mwaalakhanye Yohani 8:45-47.) Hanri ntoko Satana, Musaserya, yoowo ahaalekenle mu eparipari. Hiyaano hannakhooca soororomela sahu. (Yoh. 8:44) Muluku onachuna wi alapeli awe ‘yiicanekeno yoonanara’ nave wi ‘yaakeeleleke yeeyo eri yaphaama,’ hiihaa ntoko Yesu enreiye.—Aro. 12:9; Ahe. 1:9.

12. Ntakhara heeni Ayuta ancipale yaakwaculeya nthowa na Yesu okhwa vamwirini woohooxiwavo?

¹² Nthowa taani nikina neerinhe wi Ayuta a mmahiku a Yesu ekwaculeye? Paulo ooloca: “Nto hiyo nnalaleerya Kristu, mwene othomeiwe, yoowo chiri ori yookwaculiha wa Ayuta.” (1 Kor. 1:23) Ntakhara heeni Ayuta ancipale yaahikwaculeya nthowa na mukhalelo Yesu aakhwileiye? Nthowa nawi Yesu aakhwile vamwirini woohooxiwavo, wa yaawo yooniherya wi owo aari mulipa oohuhula ni mulipa oocheka, nave ohiya Mesiya.—Malam. 21:22, 23.

13. Tiheeni Ayuta yaale yaakwaculen’ye yahaathokoronryaaya?

¹³ Ayuta yaakwaculeya nthowa na ohithokororya sooleeliherya sincipale. Ntoko sawi Yesu haarino nthowa, aarimootheriwa ni wi owo aakhalihiwa moohookololowa. Alipa oothoriha yaawo yaamuthorinhe Yesu, hiyaapwancheru mano wookololowa. Awo yaapaka yoolakelela mwawaakuveya nave hiyaathokoronrye malakiheryo mancipale vooloca sa othoriha. (Luka 22:54; Yoh. 18:24) Waakhanle wi athoriha yaale hiyaari a nthalu, awo yaahaala othokororya sawootha soothene nave yoone waakhanle wi chiryene Yesu aapaka echu yoonanara. Nyenya ohiya yeeyo, yaawo ene “yànasya etxhu yomotheryano Yesu, wi ethorihele okhwa wawe.” Nave vaavaa wootherya iwo waahiphanraaya muteko, mulipa a mukucho mutokotoko aaheererya omweeriha Yesu wi aloce echu yeeyo yaahaala weeriha wi owo iiphiwe. Iwo chiryene waari ochekela malamulo a mu elukuluku yeele. (Mat. 26:59, [BNM]; Mar. 14:55-64) Nave naamwi Yesu aaviihiwe mookhwani, athoriha yaale yaatitelela weera ichu mmukhalelo woohookololowa. Awo yaahaaliva “ikhorowa sincipale” anakhoco yaawo yaalipelela nihiye na Yesu, wi anakhoco awo emwaramwaxe sawootha wi mwiili wa Yesu waarimucakanela.—Mat. 28:11-15.

14. Tiheeni Soorepa saalohenryaaya vooloca sa okhwa wa Mesiya?

 ¹⁴ Tiheeni Soorepa inalocaaya? Eparipari wi Ayuta a mmahiku a Yesu yuupuwela wi Yesu haahaala okhwa, nyenya moone yeeyo Soorepa saalohenryaaya: “Aayeeha okumi awe mwa okhwa, aalakhanyeryiwa ntoko oohiiwelela, ateesha yoowo ene soocheka sa ancipale, awaakiha ni owaakhulela yaale oohiiwelela.” (Isa. 53:12) Nthowa na yeela, Ayuta hiyaarino mathowa a okwaculeya vaavaa Yesu aakhwileiye ntoko muchu oocheka.

15. Sawootha taani vooloca sa Anamoona a Yehova seerinhe wi achu ancipale ekwaculeye?

¹⁵ Apwanne ninnoona nikacamiho noolikana olelo? Moohikhwa minikwa ninnoona! Yesu aahootheriwa ni othorihiwa moohookololowa, nave emohamoha tho olelo enneereya ni Anamoona a Yehova. Moone sootakiherya savakhaani. Variyari va iyaakha 1930 ophiyerya 1950, o Estatu Unitu, achu a Muluku ikwaha sincipale yaaphwanela oya mmapuro oothoriha wi yaakihe otaphuwa waya ntakhara omurumeela Muluku. Athoriha akina yaahooniherya chiryene wi annaniica. O Kepeki, elapo yo Kanata, Ikerexa ni Kovernu yaalapa mwawiiwanana wi emalihe muteko ahu. Ela yaaheeriha wi alaleeryi ancipale ewaleliwe mukariposo pahiru nthowa nawi yaanaloca ni amwaacamani aya vooloca sa Omwene wa Muluku. O Alemanya, amiravo ancipale oororomeleya yaakhwa mu olamulelo wa Nasista. Mu iyaakha sahiihaanoru, anna ancipale o Rusiya yaamakiwa ni owaleliwa nthowa na oloca sa Piipiliya, mukhalelo yoowo onooniwa ntoko “omwaryeela olamulelo.” Ophiyerya wi Tradução do Novo Mundo da Bíblia Sagrada mu elocelo ya Rusu ookhwatiihiwa nave onooniwa ntoko wi “ekaruma enahaala oweeriha achu omwareya,” pahiru nthowa nawi onnapharihela nsina na Yehova.

16. Mwawiiwanana ni 1 Yohani 4:1, ntakhara heeni hannaphwanela owokiwa ni miyaha sawootha vooloca sa achu a Yehova?

¹⁶ Nni niwerye hai osepa okwaculeya? Musuwele ichu inavolowelavo. Va Mwaha awe wa Vamwaako, Yesu aaloca wi achu yaahaala ‘owootheraka ni waalocela soonanara soothene’ oohuserya awe. (Mat. 5:11) Mathipelo a sawootha seiha ti Satana. Owo onnaweeriha alipa awootha omwaramwaxa sawootha ntakhara yaale anasivela eparipari. (Wup. 12:9, 10) Hinnaphwanela owiriyana sawootha seiho alipa awiica analocaaya. Nihirweru neemererye wi sawootha seiho sineerihe okhala awoova naari siceecheihe nroromelo nahu.—Mwaalakhanye 1 Yohani 4:1.

17. Mmukhalelo taani ichu seeren’ye Yesu ahaakumve okhwa saaweerinhaaya akina okwaculeya?

¹⁷ Elukuluku vakhaani ahaakumve okhwa, Yesu aaveleeliwa ni mmoha a arummwa awe khumi neeli. Murummwa mukina aamukhooca Yesu ikwaha raru nave arummwa oothene yaamuchawa mu ohiyu yoole ahaakumve okhwa. (Mat. 26:14-16, 47, 56, 75) Yesu haatikhinihen’ye. Ophiyerya wi owo mwaneene aaloca wi eyo yaahaala weereya. (Yoh. 6:64; 13:21, 26, 38; 16:32) Vawoona yeela, akhweya akina yaakwaculeya nave enuupuwela: ‘Waakhanle wi arummwa awe aheerano yeela, miyaano nkinachuna okhala a nikhuuru nenla!’

18. Sooloherya taani saakhwanenle elukuluku vakhaani Yesu ahaakumve okhwa?

¹⁸ Tiheeni Soorepa inalocaaya? Iyaakha masana muculi, Yehova aaloherya Mmasu awe wi Mesiya aahaala oveleeliwa ni ikhorowa sa eparata makhumi mararu. (Zak. 11:12, 13) Mulipa omveleela aahaala okhala mmoha a asinthamwene awaacameleya a Yesu. (Sal. 41:9) Mulipa a miririmu Sakariya aarepa tho: “Omwiiphe mukukhula wi ipucepuche imwalamwale.” (Zak.  13:7) Yaale chiryene yaarino murima waphaama, hiyaahaala okwaculeya nthowa na saweereya seiha. Moohiyana, woona sooloherya seiha saakhwaniheryeyaka wa Yesu, yaahaala weeriha wi nroromelo naya nikhale noolipa.

19. Yaale arino murima waphaama tiheeni anasuwelaaya?

¹⁹ Apwanne ninnoona nikacamiho noolikana olelo? Aai. Mmahiku ahu, Anamoona akina oosuwanyeya aahiya eparipari ekhala alipa oomwaryeya nave anneererya waahuweliha akina. Awo annaapharihela aliivuru ni Interneti, wi emwaramwaxe miyaha sawootha ni weeriha wi achu ekhaleno minikwa vooloca sa Anamoona a Yehova. Nyenya yaale arino murima waphaama hanakwaculeya nthowa na soothene seiha. Moohiyana, awo annasuwela wi Piipiliya aaloherya wi achu akina yaahaala omwareya.—Mat. 24:24; 2 Ped. 2:18-22.

20. Tiheeni enahaala onikhaviherya ohikwaculeya nthowa na yaale ahin’ye eparipari? (2 Timóteo 4:4, 5)

²⁰ Nni niwerye hai osepa okwaculeya? Nnaphwanela olipiha nroromelo nahu. Wi neereno yeela, nnaphwanela omuhuseryaka Piipiliya ilukuluku soothene, ovekela moohihiyererya ni otitelela okhala ooweiwa mmuteko yoowo Yehova onivanheiye. (Mwaalakhanye 2 Timóteo 4:4, 5.) Wakhala wi nookhalano nroromelo, hinni nikhale awuukhuwa vaavaa ineeraaya ikhumelele miyaha sooceecheiha vooloca sa Anamoona a Yehova. (Isa. 28:16) Omusivela wahu Yehova, Masu awe, ni annihu onahaala onikhaviherya ohikwaculeya nthowa na yaale ahin’ye eparipari.

21. Naamwi achu akina ekhoocaka michaka sahu, tiheeni nnaphwanelaahu ororomela?

²¹ Mu nsana noopacerya, ancipale yaakwaculeya nave yaamukhooca Yesu. Mu elukuluku emohamoha, akina yaamweemererya yoowo. Variyari va yaawo, aakhalavo mutokweene mmoha a nikhuuru na Ayuta nave tho ophiyerya “alipa a mukucho ancipale.” (Saw. 6:7; Mat. 27:57-60; Mar. 15:43) Emohamoha tho enneereya olelo, mamilyawu aachu haneemererya wi echu vyakala yaakwaculihe. Ntakhara heeni? Nthowa nawi awo aasuwela ni annasivela iparipari inaphwanyeya mu Soorempwa. Hiihaa ntoko Masu a Muluku analocaaya: “Yaawo anakhwela mahusiheryo anyu ekhaleno murecele wawaaca, haanono yookwaculiha.”—Sal. 119:165.