1. Tiheeni yootikhininheeni mu ekwaha yoopacerya vaavaa mwaaleelaanyu akina michaka sa Mpiipiliyani?

APWANNE munnuupuwela vaavaa mwaasuwenlaanyu wi moophwanya eparipari ya Mpiipiliyani? Yaari yookhweya wiiwexexa echu eri yoothene mwaahuseryaanyu orweela Mpiipiliyani! Nyuwaano muupuwela wi muchu ori oothene aahaala osiveliwa ohuserya ichu seiyo munaroromelaanyu. Nyuwaano mwaalekecheya wi michaka sa Mpiipiliyani saahaala waavaha okumi woohakalaliha hiihaano ni waavaha ewehereryo ya muhoolo. (Sal. 119:105) Mwawiihiiha mwaanaaleela asinthamwene anyu oothene ni amusi vooloca sa iparipari seiyo mwaahuseryaanyu. Nyenya tiheeni yeeren’ye? Mootikhiniha, ancipale yaakhooca yeeyo mwaaleelaanyu.

2-3. Ti mwawiihai achu ancipale mmahiku a Yesu yaamukhoncaaya?

² Hannaphwanela otikhina vaavaa akina anakhoocaaya michaka nnalaleeryaahu. Mmahiku a Yesu, ancipale yaamukhooca, naamwi owo aapaka sootikhiniha, seiho sooniherya wi aakhalano nikhaviheryo na Muluku. Ntoko yootakiherya, Yesu aamviiha mookhwani Lasaro. Ela yaari yootikhiniha yeeyo oothene yaawo yaamwaakaaha yahaahaalaaya ovaanya. Naamwi hiihaa, ahooleli a malapelo hiyaamweemererya Yesu ntoko Mesiya. Awo yaachuna owiipha ooweeli Yesu ni Lasaro!—Yoh. 11:47, 48, 53; 12:9-11.

³ Yesu aanasuwela wi achu ancipale yaahaala okhooca weemererya wi owo aari Mesiya. (Yoh. 5:39-44) Owo aaloca wa nikhuuru na oomuchara a Yohani Mpatisi: “Ooreeriwa [oohakalala] ti muchu ohinaphwanya mwa miyo yookwaculiha.” (Mat. 11:2, 3, 6) Ntakhara heeni ancipale yaamukhooca Yesu?

4. Tiheeni nnahaalaahu othokororya mmwaha yoola?

 ⁴ Mmwaha yoola, ni onacharela, nnahaala othokororya mathowa yeerinhe wi ancipale mmahiku a Yesu emukhooce yoowo. Nnahaala tho woona ntakhara heeni ancipale olelo annakhooca michaka sahu. Echu yoochuneyaxa, nnahaala ohuserya ntakhara heeni ninnaphwanela olipiha nroromelo nahu mwa Yesu, wi nihikwaculeye.

5. Ntakhara heeni akina yuupuwela wi Yesu haari Mesiya yoowo aaloheryiwe?

⁵ Ancipale yaamukhooca Yesu nthowa na elapo yeeyo unnunweiyewo. Ancipale yaaneemererya wi Yesu aari muhusiha a mavyakelo nave tho wi aanapaka sootikhiniha. Nyenya awo yuupuwela wi pahiru owo aari mwaana a karpintero oohaawa. Nave wi owo aarweela o Nasareti, epooma yeeyo yooniwa okhala yoohichuneyaxa. Ophiyerya wi Nataniyeli yoowo ohoolo waya aari oomuchara a Yesu, woopaceryani aahiloca: “O Nazaré onnawerya okhumawo etxhu yaphama?” (Yoh. 1:46, BNM) Nataniyeli akhweya haasiveliwa ni epooma yeeyo Yesu unnunweiyewo. Naari akhweya owo uupuwela yooloherya enaphwanyeya mu Mikeya 5:2, yeeyo yaalohenrye wi Yesu aahaala oyariwa o Petelehemu, ohiya o Nasareti.

6. Tiheeni yaahaala waakhaviherya achu a mmahiku a Yesu osuwela wi owo aari Mesiya?

⁶ Tiheeni Soorepa inalocaaya? Mulipa a miririmu Isaiya aahiloherya wi amwiicani a Yesu hiyaahaala ‘opwacha’ sooleeliherya vooloca sa [Mesiya]. (Isa. 53:8) Sincipale sa sooleeliherya seiha saaloheryiwa. Waakhanle wi achu aathokororya sooleeliherya soothene, awo yaahaala osuwela wi Yesu aahaala oyariwa o Petelehemu nave wi aari muyareriwo wa Mwene Tavite. (Luka 2:4-7) Mwawiihiiha Yesu aayariwa mu elapo yeeyo yaaloheryiwe mu Mikeya 5:2. Vano, tinivi naari nikacamiho? Achu yaakuvela othoriha. Awo hiyaarino sooleeliherya soothene. Nthowa na yeela, awo yaahimukhooca Yesu.

7. Ntakhara heeni ancipale olelo hanaweemererya Anamoona a Yehova?

⁷ Apwanne ninnoona nikacamiho noolikana olelo? Aai. Achu ancipale a Yehova toohaawa ni oohikhala echweenevo; mwawiihiiha ancipale anuupuwela wi na “anammawaani ni oohihuserya.” (Saw. 4:13) Achu ancipale anuupuwela wi achu a Muluku hanaphwanela omuhusiha Piipiliya nthowa nawi havolonwe mu ixikola sa malapelo. Achu akina analoca wi Anamoona a Yehova “malapelo o Amerika.” Nyenya eparipari tiyawi tahi wi Anamoona oothene anakhala o Amerika. Ophiyerya wi akina annaloca wi Anamoona a Yehova hanamweemererya Yesu. Moovira wa iyaakha achu annaniichana ntoko “Makomunista,” “anamahocela o Amerika” ni “achu awoopiha.” Mwawiihiiha, ancipale hanaweherya okhala mmoha a achu a Yehova nthowa nawi awo anniiwa ichu seiha nave hanachuna osuwela iparipari vooloca sa achu a Yehova.

8. Mwawiiwanana ni Saweriwa T’arummwa 17:11, tiheeni achu anaphwanelaaya opaka wi ewerye waasuwela alapeli a Muluku mmahiku ahu?

⁸ Ti mwawiihai muchu oneereiye asepe okwaculeya? Achu anaphwanela weererya ophwanya iparipari vooloca sa mwaha. Ti yeeyo mulipa oomurepa liivuru a Michaka Luka aalakelenleiye opaka. Owo aalapa mwakuru wi ‘avarerye phaama soothene, ovinya woopaceryani.’ Owo aachuna wi alipa awaalakhanya awe ‘esuwele evelevelo’ wa seiho awo yiiwalaaya vooloca sa Yesu. (Luka 1:1-4) Ayuta yaawo yaakhala o Pereya yaari ntoko Luka. Vaavaa awo yiiwalaaya woopaceryani michaka saphaama vooloca sa Yesu, yaatholathola Soorepa sa Ehepiri wi yeerele onamoona yeeyo yaalociwe. (Mwaalakhanye Saweriwa T’arummwa 17:11.) Mmukhalelo woolikana, achu  olelo anaphwanela othokororya iparipari vooloca sa mwaha. Anaphwanela olikanyiha yeeyo anahuseryaaya ni achu a Muluku ni yeeyo Soorepa inalocaaya. Anaphwanela tho ohuserya saweera sa achu a Yehova a mmahiku ahu. Wakhala wi awo aatholathola sooleeliherya seeparipari, herwa yeemererya wi minikwa saaceecheihe.

9. Tiheeni yeeren’ye vaavaa Yesu aakhonceiye wooniha eneneeryo ya wirimu?

⁹ Mahusiheryo a Yesu hiyaari awaakhwanela wa achu akina. Awo yaanachuna sincipale. Awo yaahimveka wi awooniherye waakhanle wi chiri aari Mesiya moorweela wa owooniha “eneneeryo ya wirimu.” (Mat. 16:1) Akhweya awo yaachuna wi owo eereno yeela nthowa na yeeyo yaalakhannyaaya mu Daniyeli 7:13, 14. Nyenya, hiyaari elukuluku yeeyo Yehova aahaaleiye waakhwaniherya yooloherya yeela. Yeeyo Yesu aahusiheiye yaahaala wooniherya wi owo aari Mesiya. Nyenya vaavaa owo aakhonceiye owooniha eneneeryo yeeyo yaachunaaya, awo yaamukhooca.—Mat. 16:4.

10. Yesu aakhwanihenrye hai yeeyo Isaiya aalonceiye sa Mesiya?

¹⁰ Tiheeni Soorepa inalocaaya? Mulipa a miririmu Isaiya aahirepa vooloca sa Mesiya: “Owo hakanyakula nari mano hakalipiha olotxa, hakalotxa itxhu sintxipale muramphani.” (Isa. 42:1, 2) Yesu aapaka orummwa awe ahiiruuhenle ncicimiho mukhateiye. Owo haatenke mapuro matokweene a malapelo, nave owo haawara soowara savameekhaaya sa malapelo naari haachuna wi achu emwiichaneke ni masina a ncicimiho a malapelo. Vaavaa aahooxiweiye, Yesu heerenrye omutikhiniha Mwene Heroti moorweela wa opaka sootikhiniha, naamwi aasuwela wi ekumi awe yaari va yawoopiha. (Luka 23:8-11) Yesu aahipaka sootikhiniha ikina, nyenya olaleerya michaka saphaama waari muteko woochuneyaxa wa yoowo. Owo aaloca wa oohuserya awe: “Ntakhara ti yeeyo kirweenlaaka.”—Mar. 1:38.

11. Miruku taani sooheseya akina aryaayano olelo?

¹¹ Apwanne ninnoona nikacamiho noolikana olelo? Aai. Olelo ancipale anniiruuhela ncicimiho moorweela wa oteka mapuro matokweene a malapelo vamoha ni iruku sooreerihiwa  phaama, moorweela wa ahooleli a malapelo yaawo arino masina a ncicimiho oovuwa ni moorweela wa opaka ifesta seiho inaacuwaliha achu mapacereryo aya naari yootaphulela aya. Nyenya achu yaawo ari mmalapelo yaala hanahuserya sincipale vooloca sa Muluku ni yoolakelela awe. Yaale anaphiya mmithukumano sahu Seekristu annahuserya yeeyo Yehova onachuneiye wa hiyo ni mukhalelo wa weera ichu mwawiiwanana ni yookhwela awe. Ipa sahu sa Omwene sinneelihiwa ni sinnakhapeleliwa, nyenya hasinarempwa iruku. Atokweene anahoolela hanawara ikuwo savameekhaaya naari okhalano masina a ncicimiho oovuwa. Mahusiheryo ni soororomela sahu inathipeleya Mpiipiliyani. Naamwi hiihaa, ancipale olelo annakhooca michaka sahu nthowa nawi hannapaka sookhovelela seiho inaahakalaliha. Nave yeeyo nnahusihaahu tahi yeeyo anachunaaya owiriyana.

12. Ntoko elociwaaya mu Ahebri 11:1, 6, mukhalelo taani mmoha nneeraahu nteke nroromelo nahu?

¹² Nni niwerye hai osepa okwaculeya? Murummwa Paulo aahaaleela Akristu yaakhala o Roma: “Nroromelo nnarwa voowiriyana michaka, nave michaka ene masu a Kristu.” (Aro. 10:17) Mwawiihiiha ninnalipiha nroromelo nahu moorweela wa ohuserya Soorempwa, ohiya moorweela wa opaka makupa a sookhovelela sa malapelo ihiniiwanana ni Soorempwa, moohipwacha oreera waya naari ovuwa waya. Nnaphwanela oteka nroromelo noolipa nnathipeleya mu osuwela weeparipari nthowa nawi “voohikhalano nroromelo, honaweryeya omuhakalaliha Muluku.” (Mwaalakhanye Ahebri 11:1, 6.) Mwawiihiiha, honachuneya woona eneneeryo enarweela wirimu wi niroromele wi noophwanya eparipari. Othokororya moopwacha mahusiheryo analipiha nroromelo ti wawaakhwanela wi nroromele wi nookhalano eparipari ni oviihavo minikwa.

13. Tiheeni yeerinhe wi ancipale emukhooce Yesu?

¹³ Mmahiku a Yesu, arummwa a Yohani Mpatisi yaatikhiniheya nthowa nawi arummwa a Yesu hiyiinanela yoolya. Yesu aahithariha wi awo hiyaarino mathowa a wiinanela yoolya owo nlelo ari mukumi. (Mat. 9:14-17)  Naamwiihiiha, Afarisi ni yaawo yaamwaakaaha Yesu yaanamvaanya nthowa nawi haachariha sookhovelela saya. Awo yaananariwa vaavaa owo aapenuxeiye achu mu nihiku na Sapata. (Mar. 3:1-6; Yoh. 9:16) Awo yaanaloca wi yaanacicimiha nihiku na Sapata; nyenya hinaari nikacamiho omweeca nakoso mu empa ya Muluku. Awo yaanyeenyeya vaavaa Yesu aavannyeiye nthowa na yeeyo. (Mat. 21:12, 13, 15) Nave yaawo Yesu aalaleenryeiye mu sinakooka o Nasareti yaanyeenyeya vancipale vaavaa Yesu aapharihenleiye sootakiherya sa yaweereya ya Aisarayeli wi ooniherye wi awo yiisivela mukhataaya nave wi hiyaarino nroromelo. (Luka 4:16, 25-30) Ancipale yaamukhooca Yesu nthowa nawi haapaka yeeyo awo yuupuwelaaya wi owo aahaala opakaka.—Mat. 11:16-19.

14. Ntakhara heeni Yesu aanavaanya sookhovelela sa achu ihiniiwanana ni Soorepa?

¹⁴ Tiheeni Soorepa inalocaaya? Yehova aaloca orweela wa mulipa a miririmu Isaiya: “Muloko yoola onakaacamela olocaru, onakicicimiha vayanonru, nto murima aya ori ocai ni miyo. Ti wi, hanakoova mweeparipari; anachariha pahi malamulo oohusihiwa tachu.” (Isa. 29:13) Yesu aaheerano phaama ovaanya sookhovelela sa achu ihiniiwanana ni Soorepa. Oothene yaawo anuupuwela wi malamulo ni sookhovelela sa achu ti soochuneya ompwaha Piipiliya, annamukhooca tho Yehova ni yoowo aamurummeiye ntoko Mesiya.

15. Ntakhara heeni ancipale olelo hanasiveliwa ni Anamoona a Yehova?

¹⁵ Apwanne ninnoona nikacamiho noolikana olelo? Aai. Ancipale annanyeenyeya vaavaa Anamoona a Yehova ahinapakaaya makupa mu sookhovelela ihiniiwanana ni Soorepa ntoko mahiku ooyariwa ni Natale. Akina annanyeenyeya vaavaa Anamoona a Yehova ahinapakaaya makupa a ifesta sa mu elapo anakhalaayamo naari nthowa nawi hanachariha sookhovelela seiho inapakiwa muchu akhwa ihiniiwanana ni Masu a Muluku. Oothene yaawo anakwaculeya ni Anamoona a Yehova moorweela wa mathowa yaala akhweya annaroromela wi Muluku onneemererya mukhalelo aya wa omulapela yoowo. Nyenya awo hanamuhakalaliha Muluku woona wi anachuna sookhovelela sa mweelaponi wi ehimakeye ni mahusiheryo a Piipiliya.—Mar. 7:7-9.

16. Mwawiiwanana ni Salumu 119:97, 113, 163-165, tiheeni nnaphwanelaahu weera nave tiheeni nnaphwanelaahu osepa?

¹⁶ Nni niwerye hai osepa okwaculeya? Nnaphwanela winnuwiha osivela otokweene wa malamulo ni malakiheryo a Yehova. (Mwaalakhanye Salumu 119:97, 113, 163-165.) Wakhala wi ninnamusivela Yehova, nnahaala okhooca sookhovelela seiho ihinamuhakalaliha yoowo. Hinnahaala weemererya wi echu vyakala ekhale yoochuneyaxa opwaha osivela wahu ntakhara Yehova.

17. Ancipale mmahiku a Yesu yuupuwela wi owo aahaala opaka eheeni?

¹⁷ Akina mmahiku a Yesu yaanachuna wi mwawaakuveya olamulelo otorokeye. Awo yaanaweherya wi Mesiya aahaala waataphula orweela wa olamulelo wo Roma yoowo waahooxa. Nyenya vaavaa awo yeerenryaaya omweera Yesu ntoko mwene aya, owo aakhooca. (Yoh. 6:14, 15) Alipa a mukucho ni akina yaahuukhuwa yuupuwelaka wi Yesu aahaala weererya otoroka olamulelo. Yeeyo yaahaala weeriha wi Aroma enyeenyeye ni owaakha owerya yoowo yaannyalaaya alipa a mukucho. Nthowa nawi awo yuukhuwa ni miyaha sa epoliitika, Ayuta ancipale yaamukhooca Yesu.

18. Sooloherya taani sa Mpiipiliyani vooloca sa Mesiya ancipale yaahaathokoronryaaya?

¹⁸ Tiheeni Soorepa inalocaaya? Naamwi sooloherya sincipale saalonce wi Mesiya aahaala  okhala mukhoco oowerya, sooloherya ikina saahooniherya wi owo woopaceryani aahaala okhwa ntakhara soocheka sahu. (Isa. 53:9, 12) Vano ntakhara heeni Ayuta yaakhalano miyoonelo sooheseya vooloca sa Mesiya? Ancipale mmahiku a Yesu hiyaapwacha sooloherya seiho sahaaloherya omala wa makacamiho aya mu elukuluku ene yeeyo.—Yoh. 6:26, 27.

19. Miyoonelo taani sooheseya inaweeriha ancipale okhooca michaka sahu olelo?

¹⁹ Apwanne ninnoona nikacamiho noolikana olelo? Aai. Ancipale olelo annanikhooca nthowa nawi ninnakhooca opaka makupa a epoliitika. Awo anuupuwela wi nnaphwanela ovotaaraka mu elukuluku ya namuthanli. Nyenya, wakhala wi ninnaathanla alamuleli a achu wi enihooleleke, nnamukhooca Yehova. (1 Sam. 8:4-7) Achu akina tho anuupuwela wi nnaphwanela oteka isikola, isipithale naari miteko mikina inahaala waakhaviherya achu a mukuma nnakhalaahu. Awo annakhooca michaka sahu nthowa nawi nniilipiserya mmuteko woolaleerya ohiya weererya orehererya makacamiho a mweelaponi mwawaakuveya.

20. Echu taani enaphwanela okhala yoochuneyaxa wa hiyo mwawiiwanana ni masu a Yesu anaphwanyeya mu Mateu 7:21-23?

²⁰ Nni niwerye hai osepa okwaculeya? (Mwaalakhanye Mateu 7:21-23.) Nnaphwanela otikitheryeya mmuteko woochuneyaxa yoowo Yesu onilamulenleiye wi neereke. (Mat. 28:19, 20) Nihirweru nikhale ooteteiwa ni epoliitika naari weererya orehererya makacamiho a elapo yeela. Ninnaasivela achu nave ninnaathananela nthowa na makacamiho aya, nyenya noosuwela wi mukhalelo waphaama wa waakhaviherya amwaacamani ahu ori waahusiha yaawo vooloca sa Omwene wa Muluku ni waakhaviherya wunnuwiha onthamwene woolipa ni Yehova.

21. Nnaphwanela okhala oolakelela weera eheeni?

²¹ Mmwaha yoola, noothokororya mathowa maxexe yaawo yaaweerinhe achu ancipale mmahiku a Yesu omukhooca yoowo nave tho yaawo enaweeriha akina olelo waakhooca oomuchara a Yesu. Nyenya apwanne iha pahiru ichu seiho nnaphwanelaahu osepa? Hooye. Mmwaha onacharela, nnahaala othokororya mathowa makina masese yaawo anakwaculiha. Nnanwerya olakelela ohimukhooca Yesu ni otitelela olipiha nroromelo nahu!