1-2. Mutharihe ti mwawiihai malakiheryo a Mpiipiliyani anakhalaayano yootaphulela etokweene vaavaa mikhalelo sahu sinatorokeyaaya.

 NIHIKU na othela, wiiliwiili mutheli onnawiriyana mwaha onathipeleya Mpiipiliyani yoowo onalociwa ni mutokweene vooloca sa othela. Soorepa sinathokororyiwa mmwaha yoola hasinakhala ivyaani wa yaawo. Nyenya opacerya nihiku nenle oya muhoolo, sooleeliherya seiha sinnakhalano yootaphulela etokweene wa yaawo. Ntakhara heeni? Nthowa nawi awo anahaala opharihelaka seiho ntoko mutheli.

² Ela ti yoolikana vaavaa mutheli yoowo ori Mukristu onakhaleiye tiithi. Mu iyaakha sincipale, awo yaaniiwa miyaha sincipale vooloca sa waaphuwa anamwane. Nyenya vano malakiheryo yaalociwa mmiyaha seiho enahaala okhala oochuneyaxa wa yaawo. Awo aakhalano mwaana yoowo anaphwanelaaya omphuwa mukhataaya. Ola murici mutokweene! Mweeparipari, vaavaa ichu sinatorokeyaaya mu okumi ahu, soorepa ikina sinnakhala soochuneyaxa wa hiyaano. Nla nthowa nimoha nnaweeriha alapeli a Yehova waalakhanya soorepa ni wuupuwelela seiho “mahiku oothene” a okumi aya, hiiha ntoko mamwene a Isarayeli yaaleeliwaaya weera.—Malam. 17:19.

3. Tiheeni nnahaalaahu othokororya mmwaha yoola?

³ Asitiithi, nyuwaano mookhalano mmoha wa mirici mitokweene seiho Mukristu onakhaleiyeno, yoowo ori waahusiha anamwane anyu vooloca sa Yehova. Nyenya nyuwaano munnachuna opaka sincipale ohiya pahiru waaleela sooleeliherya ikina vooloca sa Muluku ahu. Nyuwaano munnachuna waakhaviherya aniinyu omusivela owo vancipale. Tiheeni munaphwanelaanyu opaka wi mmuhusihe mwaninyu omusivela Yehova? Mmwaha yoola, nnahaala othokororya malakiheryo maxexe a Mpiipiliyani yaawo anahaala wookhaviheryaani ntoko  tiithi. (2 Tim. 3:16) Nnahaala tho woona mukhalelo asitiithi Eekristu aphunryaaya orweela wa opharihela malakiheryo a Mpiipiliyani.

4. Nlakiheryo taani nimoha nenlo nnahaala waakhaviherya asitiithi waahusiha anaaya omusivela Yehova? (Tiyako 1:5)

⁴ Nlakiheryo 1: Mwaavye ohoolela wa Yehova. Mumveke Yehova miruku seiho munachunaanyu wi mwaakhaviherye aniinyu wunnuwiha osivela wa yoowo. (Mwaalakhanye Tiyako 1:5.) Owo tori muchu oophwanelela woovahaani miruku. Aakhalavo mathowa mancipale a weerano yeeyo. Muthokororye meeli. Noopacerya, Yehova ookhalano masuwelelo mancipale ntoko tiithi. (Sal. 36:9) Nave nanaawiili, miruku seiho onoovaheiyeeni, ilukuluku soothene sinnakhalano mphurelo.—Isa. 48:17.

5. (1) Tiheeni marehereryo a Yehova anavahereryaaya wi yaakhaviherye asitiithi? (2) Ntoko enooniheriwaaya mu exilema, tiheeni muhusenryaanyu orweela wa mukhalelo Munna ni Murokora Amorim yaaphunwaaya anaaya?

⁵ Orweela mmasu ni marehereryo awe, Yehova onnavahererya yoolya yoomunepani yincipale enathipeleya Mpiipiliyani yeeyo enahaala wookhaviheryaani waahusiha anamwane anyu omusivela Yehova. (Mat. 24:45) Ntoko yootakiherya, munanwerya ophwanya miruku soophara muteko mu miyaha “Ajuda Para as Famílias,” seiho mu iyaakha sincipale saaphwanyeya mu erevista Vinyani! nave vano inaphwanyeya mu esaiti ahu. Nave tho, ixilema sincipale sinaphwanyeya mu jw.org, sinnooniherya okoha ni waakhula ni itrama seiho sinahaala waakhaviherya asitiithi opharihela ikano sa Yehova vaavaa anaaphuwaaya anaaya. *—Masi. 2:4-6.

6. Ti mwawiihai tiithi mmoha oniisooneiye vooloca sa ohoolela yoowo owo ni amwaariye anaakhelaaya orweela mmarehereryo a Yehova?

⁶ Asitiithi ancipale alonce wi annathamalela vancipale nikhaviheryo nenlo anaakhelaaya wa Yehova orweela mmarehereryo awe. Tiithi awiichaniwa Joe onneemererya: “Waaphuwa anamwane araru mu eparipari tahi murici wookhweya. Amwaaraka ni miyaano ninnavekela ilukuluku soothene wi Yehova anikhaviherye. Nave wiiliwiili ninnoona wi mwaha naari exilema yeeyo ekhumme ephin’ye mu  elukuluku yoophwanelela wi enikhaviherye ovilela ni mukhalelo yoowo nnahoolelaahu. Ilukuluku soothene hiyaano ninnaroromela miruku sa Yehova.” Joe ni amwaariye ahoona wi soovaha seiha sinnaakhaviherya anamwane aya omwaacamela Yehova.

7. Ntakhara heeni oryaaya woochuneya wa asitiithi opaka owetha waya wi etikitherye yootakiherya yaphaama? (Aroma 2:21)

⁷ Nlakiheryo 2: Mukhale yootakiherya yaphaama. Anamwane annaavarerya asitiithi aya vakhivirukhiviru nave wiiliwiili annaatakiherya yaawo. Eparipari wi asitiithi tahi oophaameya. (Aro. 3:23) Naamwi hiiha asitiithi a miruku annapaka owetha waya wi ekhale yootakiherya yaphaama wa anamwane aya. (Mwaalakhanye Aroma 2:21.) Alocaka sa anamwane tiithi mmoha ooloca: “Anamwane ari ntoko nchoce nenlo nnanuula echu eri yoothene.” Owo onnaacererya: “Awo anahaala onleela vaavaa yootakiheryaahu ehiniiwananaaya ni yeeyo nneereryaahu waahusiha.” Mwawiihiiha wakhala wi ninnachuna wi aniihu emusiveleke Yehova, osivela wahu wa yoowo onaphwanela okhala woolipa ni wawooneya.

8-9. Tiheeni muhusenryaanyu orweela wa masu alociwe ni Andrew vamoha ni Emma?

⁸ Sookhalavo mikhalelo sincipale seiho asitiithi aneeraaya epharihele wi yaakhaviherye anaaya omusivela Yehova. Moone yeeyo munna orino iyaakha 17 awiichaniwa Andrew olonceiye: “Asitiithi aka ilukuluku soothene yaanakihusiha wi ti woochuneya ovekela. Ohiyu ori woothene apapa aka yaanavekela ni miyaano naamwi kilonce wi koovekela. Asitiithi aka ilukuluku soothene yaananuupuxerya: ‘Nyuwaano munanwerya oloca ni Yehova ilukuluku sincipale munachunelaanyuvo.’ Wa nthowa nenla ovekela waakhala echu yoochuneyaxa wa miyaano. Vano kinnoona okhala wookhweya wa miyaano ovekela nave kinnamoona Yehova ntoko tiithi yoowo onakisivela.” Asitiithi nyu, ilukuluku soothene muupuweleke wi osivela wanyu ntakhara Yehova onanwerya waakhaviherya aniinyu omusivela yoowo tho.

⁹ Muthokororye tho yootakiherya ya Emma. Vaavaa apapa awe yaachanwaaya emusi, yaahaahiyerya ivaale sincipale amama awe. Emma ooloca: “Saanakhalavo ilukuluku sincipale amama yahaakhalaayano ikhorowa sawaakhwanela, nave awo yaanaloca mukhalelo Yehova onaakhapeleleiye ni waavakulela alapeli awe. Miyaano kaanawerya woona mukhalelo awo yaakhalaaya wi chiryene awo yaanaroromela yeeyo. Amama yaanapaka yeeyo yaakihusihaaya.” Tiheeni nnahuseryaahuvo? Asitiithi ananwerya ohusiha orweela mu yootakiherya naamwi mmikhalelo soovila.—Gal. 6:9.

10. Ikari taani asitiithi ancipale a Aisarayeli yaaryaayano sa ochekula ni anamwane aya? (Malamulo 6:6, 7)

¹⁰ Nlakiheryo 3: Muloceke ni aniinyu moohihiyererya. Yehova aahaaleela Aisarayeli akhalai wi yaahusiheke anaaya vooloca sa yoowo moohihiyererya. (Mwaalakhanye Malamulo 6:6, 7.) Asitiithi yaale yaakhalano ikari sincipale variyari va nihiku sa oloca ni anaaya ni waahusiha yaawo omusivela Yehova. Ntoko yootakiherya, mmiravo mu Isarayeli aanwerya omaliha elukuluku yincipale aakhaviheryaka atiithi awe waala ni ohaca soolya. Murokora awe aanwerya omaliha elukuluku yincipale vanihikuni aakhaviheryaka amama awe osona, ovathaanya, ni miteko mikina sa vaate. Vaavaa asitiithi ni anamwane yaalapaaya vamoha, awo yaanawerya ochekula vooloca sa miyaha mincipale soochuneya. Ntoko yootakiherya, awo yaanwerya othokororya mukhalelo wa oreera murima  wa Yehova ni mukhalelo okhavihenryeiye emusi aya.

11. Ekari taani emoha asitiithi yaawo ari Akristu aryaayano ya oloca ni anaaya?

¹¹ Olelo, okumi ti woohiyana ni wa khalai. Mu ilapo sincipale, asitiithi ni anamwane hanamaliha elukuluku yincipale vamoha variyari va nihiku. Asitiithi ananwerya okhala omutekoni nave anamwane ananwerya okhala oxikola. Mwawiihiiha, asitiithi anaphwanela wiilipixerya waavya elukuluku wi ewerye ochekula ni anamwane aya. (Éfe. 5:15, 16; Fil. 1:10) Malapelo a echoko emoha ya ilukuluku seiho. Munna ori mmiravo awiichaniwa Alexander ooloca: “Apapa aka ilukuluku soothene annapaka marehereryo a malapelo a echoko, nave awo haneemererya echu vyakala wi yaakanyerye elukuluku yeela ya okhala vamoha. Nimanle ohuserya, hiyaano ninnachekula.”

12. Tiheeni muru wa echoko onaphwaneleiye okhalano mmuupuweloni variyari va malapelo a echoko?

¹² Waakhanle wi mwa muru wa echoko, tiheeni munaphwanelaanyu opaka wi malapelo anyu a echoko ekhale oohakalaliha wa aniinyu? Muhuserye ni aniinyu yoolaleeryiwa ahu evyaani Mpuhe Okumi Okhala Wookhala! Yoohuserya yeela enanwerya ovahererya ekari yaphaama ya ochekula. Nyuwaano munnachuna wi aniinyu ekhaleke ootaphuwa wooleelaani yeeyo anuupuwelaaya ni mukhalelo aniisoonaaya, mwawiihiiha muhipharihele elukuluku ya malapelo a echoko wi mwaasamele naari owookolola yaawo. Nave mweererye ohinyeenyeya wakhala wi aniinyu annaloca moonelo aya yoowo ohiniiwanana ni Soorempwa. Moohiyana, mwaathamalele vaavaa awo moororomeleya anooleelaayaani yeeyo anuupuwelaaya, nave mweerihe okhala wookhweya wa yaawo otitelela weerano yeeyo. Munanwerya waakhaviherya aniinyu moophwanelela pahiru wakhala wi moosuwela mukhalelo awo chiryene aniisoonaaya.

13. Ikari taani ikina asitiithi aryaayano wi yaakhaviherye anaaya omwaacamela Yehova?

¹³ Asitiithi, mwaavyeke ikari variyari va nihiku wi mwaakhaviherye aniinyu omwaacamela Yehova. Hamunaphwanela oweherya pahiru elukuluku ya yoohuserya ya Piipiliya wi mwaahusihe awo vooloca sa Muluku ahu oosivela. Moone yeeyo mai awiichaniwa Lisa olonceiye: “Hiyaano naanaakhaviherya aniihu woona wiiwanana orivovo variyari va  Yehova ni soopatuxiwa. Ntoko yootakiherya, vaavaa mwanapwa ahu aapakeiye echu yeeyo yaatheiha aniihu, hiyaano naanaaleela yaawo wi ela enooniherya wi Yehova, Muluku oohakalala nave onnaneeriha okhala oohakalala ni opuha ichu sootheiha.”

14. Ntakhara heeni oryaaya woochuneya wa asitiithi waakhaviherya anaaya waathanla asinthamwene mwa miruku? (Masiposipo 13:20)

¹⁴ Nlakiheryo 4: Mwaakhaviherye aniinyu waathanla asinthamwene aphaama. Masu a Muluku annooniherya mookwakwaleya wi asinthamwene ahu annanivolowela—mmukhalelo waphaama naari woonanara. (Mwaalakhanye Masiposipo 13:20.) Asitiithi, apwanne mohaasuwela asinthamwene a aniinyu? Apwanne mohintoko ochekula ni yaawo? Tiheeni munaphwanelaanyu opaka wi mwaakhaviherye aniinyu waathanla asinthamwene yaawo anamusivela Yehova? (1 Kor. 15:33) Nyuwaano munanwerya waakhaviherya aniinyu waathanla asinthamwene aphaama moorweela wa waawopa achu yaawo arino onthamwene waphaama ni Yehova wi epake ichu ni nyuwaano vamoha ni aniinyu.—Sal. 119:63.

15. Tiheeni asitiithi anaphwanelaaya opaka wi yaakhaviherye anaaya waathanla asinthamwene aphaama?

¹⁵ Tiithi awiichaniwa Tony onnathariha yeeyo owo ni amwaariye yeeraaya wi yaakhaviherye anaaya waathanla asinthamwene aphaama. Owo ooloca: “Mu iyaakha sincipale, miyaano ni amwaaraka naanaawopa anna ni arokora oohiyanahiyana, amiravo ni awunnuwelavo, wi erwe owaani. Awo yaanalya vamoha ni hiyaano nave yaanakhala va malapelo ahu a echoko. Ola mukhalelo waphaama wa waasuwela yaale anamusivela Yehova ni anamulapela moohakalala. Hiyaano naanaahaiha ooweherya a ekulucu, mamisiyonariyu, ni achu akina owaani. Saweereya saya, mvai ni wiiveleela waya waahaavolowela mwawiiseela aniihu nave waahaakhaviherya awo omwaacamela Yehova.” Asitiithi, mukhale oolakelela waakhaviherya aniinyu okhalano onthamwene waphaama.

16. Tiheeni munaphwanelaanyu weera wakhala wi mwaninyu ooloca wi hanachuna omurumeela Yehova?

¹⁶ Hanka wakhala wi moopaka owetha wanyu wi mwaakhaviherye anamwane anyu,  nyenya mmoha aloca wi hanachuna omurumeela Yehova? Hamunaphwanela ophiyerya makuchuwelo wi moohesa ntoko tiithi. Yehova oonivaha oothene ahu—ophitaanyerya mwaninyu—yamahala ya othanla wootaphuwa, mavyakelo a othanla waakhanle wi nnahaala omurumeelaka Muluku naari hooye. Waakhanle wi mwaninyu oolakelela ohiya omurumeela Yehova, muhiyeleele ewehereryo yawi nihiku nimoha owo onamukooka. Muupuwele niphwanaphwaniho na mwaana oorimeela. (Luka 15:11-19, 22-24) Mmiravo yoola aahipaka ichu sincipale soonanara, nyenya vookuchula owo aahikooka. Akina ananwerya oloca: “Ela pahiru yaweereya. Apwanne mwanaka onanwerya okookela wa Yehova?” Aai, onanwerya! Mweeparipari, ela ti yeeyo yeeren’ye ni mmiravo awiichaniwa Elie.

17. Ti mwawiihai yaweereya ya Elie enoolipihaayaani?

¹⁷ Uupuwelaka sa asitiithi awe, Elie ooloca: “Awo yaahipaka owetha waya wi ekihusihe omusivela Yehova ni Masu awe, Piipiliya. Nyenya vaavaa kaaryaaka ponkwe, kaahipacerya omwareya.” Elie moovitheya aahipacerya opaka ichu soohiphwanelela. Asitiithi awe yaaheererya omukhaviherya omwaacamela Yehova, nyenya owo haawiriyanne yaawo. Ohoolo waya owo aapwahavo vaate, iivoliiherya mmeecelo oonanara. Naamwi hiiha, ilukuluku ikina owo aanavaanela ni mmoha a asinthamwene awe vooloca sa Piipiliya. Elie ooloca: “Vaavaa kaalocaaka ni nthamwene aka vooloca sa Yehova, kaanuupuwelela tho vooloca sa Yehova. Vakhaani-vakhaani, mmiso wa eparipari yoowo asitiithi aka yaanlaaya mmurimani mwaka waapacerya wunnuwa.” Mu elukuluku aya, Elie aahikookela mu eparipari. * Mwaanyiherye mukhalelo asitiithi yaahakalanlaaya nthowa na weererya omuhusiha owo opacerya ari mwaana omusivela Yehova!—2 Tim. 3:14, 15.

18. Ti mwawiihai muniisoonaanyu vooloca sa asitiithi yaawo aniilipixerya wi yaahusihe anaaya omusivela Yehova?

¹⁸ Asitiithi, Yehova ohoovahaani yamahala yaphaama, yeeyo eri, ophuwa muyareriwo muvyaani wa alapeli a Yehova. (Sal. 78:4-6) Ola tahi murici wookhweya, nave ninnoothamalelaani vancipale wiilipixerya yoowo munapakaanyu wi mwaakhaviherye aniinyu! Wakhala wi mootitelela opaka owetha wanyu wi mwaakhaviherye aniinyu omusivela Yehova ni waahusiha omwiiwelela yoowo, muroromele wi Tiithi ahu oosivela a wirimu onahaala ohakalala.—Éfe. 6:4.