1. Tiheeni liivuru a Wupulula onaloceiye vooloca sa achu a Muluku?

 LIIVURU a Wupulula onnaloca wi Omwene wa Muluku wootikitheryiwa wirimu nave wi Satana ohiikariwawo. (Wup. 12:1-9) Wiikariwa yoola woheeriha wi wirimu okhalewo otaphuwa, nyenya wooruuhela makacamiho wa hiyaano. Ntakhara heeni? Nthowa nawi Satana toonyeenyeya nave onnaahiphela oothene yaale anamurumeela Yehova moororomeleya veelaponi yavathi.—Wup. 12:12, 15, 17.

2. Tiheeni enahaala onikhaviherya otitelela okhala oororomeleya wa Yehova?

² Nni niwerye hai otitelela okhala oororomeleya wa Yehova naamwi Satana anihiphelaka? (Wup. 13:10) Echu emoha enahaala onikhaviherya ori osuwela yeeyo enahaala weereya omwaahiyu. Ntoko yootakiherya, mu Wupulula, murummwa Yohani onnathariha mareeliho makina yaawo nnahaalaahu opuha moohilekela. Nimoha na mareeliho yaala ti nawi amwiicani a Muluku anahaala otoloxiwa. Vano hankooni nihuserye mukhalelo liivuru a Wupulula onaathariheiye amwiicani yaawo ni yeeyo enahaala weereya ni yaawo.

3. Ineneeryo taani ikina iphariheliwe mu Wupulula?

³ Mu ekapitulu yoopacerya mu eversikulu yoopacerya, liivuru a Wupulula onnanleela wi sooleeliherya seiho nnahaalaahu waalakhanya, ilociwe moorweela wa “ineneryo,” eyo tiwi, mmukhalelo woosiphela. (Wup. 1:1 BNM) Amwiicani a Muluku anatharihiwa moosiphela. Voocharela ninnaalakhanya vooloca sa axinama ancipale awoopiha yaawo anaweemelela amwiicani a Muluku. Ntoko yootakiherya, onnaloca sa “mwaashinama awoopiha akhumaka mphareya.” Owo “aarino manyaka khumi ni miru mithanu namiili.”  (Wup. 13:1) Mwaaxinama yoola aachareliwa ni “mwaashinama mukina aakhumale vachayani.” Mwaashinama yoola awoopiha aaloca ntoko enowa etokotoko yawoopiha nave aaheeriha wi ‘okhuruwe mooro wirimu orwa veelaponi.’ (Wup. 13:11-13) Voocharela ninnaalakhanya sa mwaaxinama oohiyana, “mwaashinama oophilivila,” yoowo okiraatheliwe ni namararuwe. Axinama yaala araru awoopiha anaweemelela amwiicani yaawo anawana ni Yehova Muluku vamoha ni Omwene awe mu elukuluku yincipale. Mwawiihiiha, ti woochuneya waasuwela wi awo taani.—Wup. 17:1, 3.

4-5. Ti mwawiihai yeeyo enalociwa mu Daniyeli 7:15-17 enanikhaviheryaaya wiiwexexa yootaphulela ya ineneeryo seiha?

⁴ Nihaakumve ohuserya wi amwiicani yaala taani, nnaphwanela wiiwexexa yeeyo axinama ni namararuwe aneemelelaaya. Mukhalelo mmoha waphaama wa wiiwexexa ori moorweela wa omuhiya Piipiliya wi antharihele. Ineneeryo sincipale inaphwanyeya mu liivuru a Wupulula sinnatharihiwa tho mu aliivuru akina a Piipiliya. Ntoko yootakiherya, mulipa a miririmu Taniyeli mu yooloha awe aawoona ‘ashinama asheshe atokotoko ekhumaka mphareya.’ (Dan. 7:1-3) Taniyeli onnanleela yeeyo awo yeemelelaaya. Axinama yaala atokotoko yaaweemelela ‘mamwene’ maxexe, nari olamulelo. (Mwaalakhanye Daniyeli 7:15-17.) Otharihiwa yoola wookwakwaleya onnanikhaviherya wiiwexexa wi axinama analociwa mu Wupulula anaweemelela tho alamuleli a elapo.

⁵ Vano hankooni noone ineneeryo ikina inatharihiwa mu Wupulula. Vaavaa nneerahuno yeela, nnahaala woona mukhalelo Piipiliya onanikhaviheryeiye wiiwexexa yeeyo ineneeryo seiha inataphulelaaya. Nnahaala opacerya ni axinama ancipale awoopiha. Woopaceryani, nnahaala woona tiheeni awo aneemelelaaya. Voocharela, nnahaala woona yeeyo enahaala weereya ni axinama yaawo. Vookuchula, nnahaala othokororya yeeyo saweereya seiha inataphulelaaya wa hiyaano.

6. Mwaaxinama a miru mithanu nameeli onatharihiwa mu Wupulula 13:1-4 tiheeni?

⁶ Mwaaxinama a miru mithanu namiili tiheeni? (Mwaalakhanye Wupulula 13:1-4.) Ninnoona wi mwaaxinama ola aari ntoko havara, nyenya meco sawe saari ntoko sa ursu, eyano awe ntoko mwaco nave aarino manyaka khumi. Axinama axexe analociwa mu Daniyeli ekapitulu 7 aakhalano tho mikhalelo imohamoha. Nyenya mu liivuru a Wupulula, makhalelo oothene yaala anaphwanyeya mwa mwaaxinama mmoha, ohiya ooxeexe. Mwaxinama yoola awoopiha haneemelela pahiru omwene omoha naari olamulelo wa elapo yoothene. Yohani aaloca tho wi owo aavahiwa olamulelo wa “mahimo oothene, maloko oothene, ilocelo ni ilapo soothene.” Mwawiihiiha owo waahaala okhala otokweene opwaha olamulelo ori woothene. (Wup. 13:7) Mwawiihiiha, mwaaxinama yoola awoopiha onaweemelela alamuleli oothene yaawo anaalamulela achu ophiyerya olelo. *—Ekle. 8:9.

7. Tiheeni muru ti muru wa miru thanu napiili sa mwaaxinama oneemelelaaya?

⁷ Tiheeni muru ti muru wa miru thanu napiili oneemelelaaya? Wupulula ekapitulu 17 onnanikhaviherya ophwanya naakhulo woona wi owo onnathariha eruku ya mwaaxinama onalociwa mu Wupulula ekapitulu 13. Mu Wupulula 17:9, 10, ninnaalakhanya: “Ti mamwene tho mathanu nameeli: mamwene mathanu aamora, mmoha ookhala nlelo, nave mukina ninleelo hakhumme. Nto arwa, anii akhale elukuluku tonto.” Wa alamuleli oothene Satana onaaphariheleiye,  athanu napiili analikanyihiwa ni “miru” nthowa nawi awo tarinono owerya. Ala alamuleli a elapo yoothene yaawo yaalamulenle achu a Muluku naari yaavolowenle vancipale yaawo. Mmahiku a murummwa Yohani, athanu a yaawo olamulelo aya wiiha ovinre: Ikuputu, Asiriya, Papulu, Meto-Persiya ni Kresiya. Olamulelo waneethanu nammoha wa elapo yoothene, yoowo ori Roma, nlelo wiiha olamulelaka elukuluku Yohani aavahiweiye wuupulula. Tuuvi waahaala okhala olamulelo waneethanu napiili wa elapo yoothene ni wookuchula, naari muru?

8. Omwene taani oneemeleliwa ni muru waneethanu napiili wa mwaaxinama awoopiha?

⁸ Vano nnahaala woona ti mwawiihai sooloherya sa mu liivuru a Daniyeli inanikhaviheryaaya osuwela muru waneethanu napiili ni wookuchula wa mwaaxinama awoopiha. Olamulelo taani wa elapo yoothene onalamulela variyari va elukuluku yeela yookuchula, naari wi “nihiku na Apwiya?” (Wup. 1:10) Ola wiiwanana wa Reinu Unitu ni Estatu Unitu, naari wi Olamulelo wa Elapo Yoothene wa Ankolo-Amerikana. Mwawiihiiha nnanwerya ophiyerya makuchuwelo awi owo muru waneethanu napiili wa mwaaxinama awoopiha onalociwa mu Wupulula 13:1-4.

9. Taani onamweemelela mwaaxinama yoowo orino ‘manyaka meeli ntoko epuchepuche?’

⁹ Wupulula ekapitulu 13 onnanleela wi muru waneethanu napiili, Olamulelo wa Elapo Yoothene wa Ankolo-Amerikana, onneera tho ichu ntoko mwaaxinama awoopiha yoowo orino “manyaka meeli ntoko epucepuche, nto aaloca ntoko enowa etokotoko yawoopiha.” Mwaashinama yoola, “aaneerano ineneeryo sootikiniha sitokotoko, ntoko okurusha mooro wirimu orwa veelaponi, achu yoonaka.” (Wup. 13:11-15) Wupulula ikapitulu 16 ni 19 sinnamuloca mwaaxinama yoola ntoko “mulipa a miririmo oowoka.” (Wup. 16:13; 19:20) Taniyeli onnathariha echu ekina yoolikana, yawi Olamulelo wa Elapo Yoothene wa Ankolo-Amerikana waahaala oruuha ‘otolosa wawopiha.’ (Dan. 8:19, 23, 24, BNM) Ela chiryene ti yeeyo yeeren’ye variyari va Ekhoco Yanaawiili ya Elapo Yoothene. Apompa atoomiku apiili yaawo yaavonyiwe nave yeerinhe wi ekhoco yeela emale o Pasifiku yaapakiwe ni masiyentista o Pritaniya ni o Amerika. Moorweela wa opaka ipompa seiha, Olamulelo wa Elapo Yoothene wa Ankolo-Amerikana ‘waakurusha mooro wirimu orwa veelaponi ya vathi.’

10. ‘Eruku ya mwaaxinama’ eneemelela eheeni? (Wupulula 13:14, 15; 17:3, 8, 11)

¹⁰ Voocharela ninnahuserya sa mwaaxinama mukina. Ola onalikana vakhaani ni mwaaxinama a miru mithanu napiili nyenya ekoore awe ti yoophilivila. Ola oniichaniwa ‘eruku ya mwaashinama nave onatharihiwa’ ntoko “mwene aneethanu nachaaru.” * (Mwaalakhanye Wupulula 13:14, 15; 17:3, 8, 11.) Yohani aahoona wi “mwene” owo aakhala, voocharela arimeela, nave ohoolo waaya akookela okhala. Ela ennathariha mookwakwaleya marehereryo a Maloko Awiiwanana, yaawo anavuwiha soochuna sa mukhalelo wa ipoliitika wa elapo yoothene! Woopaceryani, awo yiichaniwa Wiiwanana wa Maloko. Voocharela awo yaacakanela variyari va Ekhoco Yanaawiili ya Elapo Yoothene. Ohoolo waya, owo aakookela okhala ntoko Maloko Awiiwanana.

11. Tiheeni axinama awoopiha anapakaaya, nave ntakhara heeni nihinaphwanelaahu owoova?

¹¹ Moorweela wa soovuwiha saya, axinama yaawo, naari alamuleli, annaaceenyerya achu omwaakaaha Yehova ni alapeli awe. Moosiphela, awo anaathukumanya “mamwene a elapo yoothene” vamoha ntakhara ekhoco ya Armaketo, yeeyo eri “nihiku ntokotoko na Muluku mwaneene a ikuru soothene.” (Wup. 16:13, 14, 16) Nyenya hiyaano hannaphwanela woova echu. Muluku  ahu mutokweene Yehova, onahaala weeravo echu mwawaakuveya wi aavuluxe yaale anakhaviherya olamulelo awe.—Ezek. 38:21-23.

12. Tiheeni enahaala weereya wa axinama oothene?

¹² Tiheeni enahaala weereya wa axinama oothene? Wupulula 19:20 onnaakhula: “Aaphariwa mwaashinama vamoha ni mulipa a miririmo oowoka, yoowo eenreno ineneeryo sootikiniha mu nsina na mwaashinama yoole. Yoowo aawonke achu ni sootikiniha seiye, yaale yeeyeriwe eneneeryo ya mwaashinama, enakokhorela eruku awe. Oopiili yaariheliwa yoonaka munchiyani na mooro nnavarela ni maluku awunkha.” Mwawiihiiha, nlelo erikimulamulela, alamuleli yaala ari amwiicani a Muluku anahaala otoloxiwa moomalela.

13. Nikacamiho taani Akristu anahoolelaaya nthowa na alamuleli a elapo?

¹³ Ela enataphulela eheeni wa hiyaano? Ntoko Akristu, nnaphwanela okhala oororomeleya wa Yehova ni Omwene awe. (Yoh. 18:36) Wi neereno yeela, nnaphwanela otitelela ohiivoliiherya mmiyaha sa epoliitika sa elapo yeela. Nyenya onanwerya okhala woovila wa hiyaano otitelela okhala awiivalaanya nthowa nawi alamuleli a elapo anachuna wi naakhaviheryeke wa yeeyo analocaaya ni anapakaaya. Yaale anaakhaviherya alamuleli yaala, annaakhela eneneeryo ya mwaaxinama. (Wup. 13:16, 17) Oothene yaawo yaakhenle eneneeryo yeela, anahaala oyeleela weemereryiwa ni Yehova nave heni yaakhele ekumi yoohimala. (Wup. 14:9, 10; 20:4) Mwawiihiiha ti woochuneyaxa otitelela okhala awiivalaanya moomalela, moohipwacha mukhalelo alamuleli ananikhinyereryaaya wi naakhaviherye yaawo!

14. Ntoko enatharihiwaaya mu Wupulula 17:3-5, echu taani yootikhiniha murummwa Yohani oonneiye voocharela?

¹⁴ Murummwa Yohani ooloca wi owo ‘aatikhinasha’ nthowa na echu yeeyo oonneiye. Echu taani yeeyo? Muthiyana yoowo aanwenle mmoha a axinama oowali. (Wup. 17:1, 2, 6) Owo “maayi a anamararuwe” nave oniichaniwa “Paapulu mutokotoko.” Owo onnapaka “mararuwo” ni “mamwene eelapo ya vathi.”—Mwaalakhanye Wupulula 17:3-5.

15-16. Papulu mutokotoko taani, nave nnasuwela hai yeela?

¹⁵ “Paapulu mutokotoko” taani? Muthiyana yoola haneemelela marehereryo a ipoliitika woona wi Wupulula onaloca wi owo onnapaka mararuwo ni ahooleli a ipoliitika a elapo. (Wup. 18:9) Nave woona wi owo owenle va mwaaxinama yoola, eyo enooniherya wi owo onneererya waahoolela alamuleli yaala. Mwawaacererya, owo haneemelela marehereryo a nakoso a elapo yeela ya Satana. Awo tho annalociwa mmakupa makina mu Wupulula nave aniichaniwa “alipa a maroca a veelaponi ya vathi.”—Wup. 18:11, 15, 16.

¹⁶ Mu Soorempwa, masu awi “namararuwe” ananwerya olociwa yaale analoca wi annamurumeela Muluku nyenya annalapela soophwaniherya naari mmukhalelo mukina annaataana ni elapo. (1 Math. 5:25; Tiy. 4:4) Nyenya moohiyana, Piipiliya onaloca wi yaale anamulapela Muluku moororomeleya ari ntoko “mwali awiisuumaaliha.” (2 Kor. 11:2; Wup. 14:4) Papulu akhalai naari nipuro ntokweene na malapelo atheru. Mwawiihiiha, Papulu Mutokotoko oneemelela mikhalelo soothene sa malapelo atheru. Mweeparipari, owo malapelo atheru a elapo yoothene.—Wup. 17:5, 18; moone mwaha wa mu Interneti mu jw.org “O que é Babilónia, a Grande?”

17. Tiheeni enahaala weereya wa Papulu Mutokotoko?

¹⁷ Tiheeni enahaala weereya wa Papulu mutokotoko? Wupulula 17:16, 17, onnaakhula nikoho nenla mmukhalelo ola: “Mwaashinama yoole ni manyaka khumi wonnaawe, onamwiicanano muthiyana yoole a namararuwe. Yaawo anammutatusha okhala milepe emuhiye ari epwitikiri ene. Ethayi awe anamukhuura, emweeyele ni  mooro. Tiwi Muluku aakuhavo vamurimani vaya okhwela wa weerano muupuwelo awe.” Chiryene, Yehova onahaala oweeriha maloko ompharihela mwaaxinama oophilivila, yoowo ori, Maloko Awiiwanana, wi ehiphele malapelo atheru a elapo yoothene ni waatoloxa moomalela.—Wup. 18:21-24.

18. Ti mwawiihai nneeraahu nroromele wi hinnamukhaviherya Papulu Mutokotoko mmukhalelo vyakala?

¹⁸ Tiheeni ela enataphulelaaya wa hiyaano? Nnaphwanela okhapelela “omulapa Muluku wawéla ni wohiripihiwa.” (Tiy. 1:27 NN) Nihirweru neemererye ovoloweliwa ni mahusiheryo atheru, ifesta sa amalapo, meecelo oohiphwanelela ni onamulosiwe sa Papulu Mutokotoko! Nave nnaphwanela otitelela waalopola akina wi ‘evinyewo wa yoowo,’ nave yeerano yeela awo hekhalano nthowa vamiithoni va Muluku ntakhara soocheka sawe.—Wup. 18:4.

19. “Enowa etokotoko yawoopiha yoophilivila” taani?

¹⁹ Liivuru a Wupulula onnathariha tho “enowa etokotoko yawoopiha, yoophilivila.” (Wup. 12:3) Enowa yeela yaahiwana ni Yesu vamoha ni ankeelo awe. (Wup. 12:7-9) Eyo ennaahiphela achu a Muluku, nave ennaavaha ikuru axinama, naari alamuleli a achu. (Wup. 12:17; 13:4) Enowa yeela taani? Eyo “enowa yakhalayi yawiichaniwa musaserya naari Saataana.” (Wup. 12:9; 20:2) Owo tonaakhaviherya amwiicani oothene a Yehova.

20. Tiheeni enahaala weereya ni enowa?

²⁰ Tiheeni enahaala weereya ni enowa yeela? Wupulula 20:1-3 onnathariha wi munkeelo onahaala ommaka Satana amurihele o mukotini wawiixawoxa, yoowo onahaala okhala ekariposo awe. Mu elukuluku yeela, Satana harwa ‘uuluula ohuweliha maloko, ophiyerya imanle miyakha 1.000.’ Vookuchulani, Satana ni masololo awe anahaala oriheliwa “munchiyani na mooro nnavarela ni maluku awunkha.” Ela enataphulela wi awo anahaala otoloxiwa moomalela. (Wup. 20:10) Mwaanyiherye elapo ahirimo Satana ni masololo awe. Ela enahaala okhala elukuluku yoohakalaliha!

21. Ntakhara heeni nnaphwanelaahu ohakalala wa nthowa na yeeyo nnaalakhanyaahu mu liivuru a Wupulula?

²¹ Ti yoolipiha vancipale wiiwexexa yootaphulela ya ineneeryo seiha sinalociwa mu liivuru a Wupulula! Noohuserya wi amwiicani a Yehova taani nave nohoona tho yeeyo enahaala weereya ni yaawo. Chiryene, “ooreeriwa muchu yoowo onaalakhanya masu ala a miririmo, ooreeriwa tho yoowo oniiwa ni ochariha yeeyo erempwemo.” (Wup. 1:3) Nyenya vaavaa amwiicani a Muluku anahaalaaya otoloxiwa, tiheeni achu oororomeleya anahaalaaya opuha? Nnahaala othokororya yeela mmwaha wookuchula wa miyaha seiha.